Mbụme Oro Mme Andikot Ẹbụpde
Ntak Emi Ikpokotde Enyịn̄ Abasi Sia Owo Mîtịmke Ifiọk nte Ẹkesikotde Enye?
Idụhe owo ndomokiet mfịn oro ọfiọkde nte ẹkesikotde enyịn̄ Abasi ke akpasarade usem Hebrew. Nte ededi, odot ẹtịm ẹfiọk ke enyịn̄ Abasi odu n̄kpọ nte utịm ike-7,000 ke Bible. Jesus ama anam mme owo ẹfiọk enyịn̄ Abasi ke ini enye okodude ke isọn̄, onyụn̄ ọdọhọ mbet esie ẹsibọn̄ akam ẹte ẹnam enyịn̄ Abasi asana. (Matthew 6:9; John 17:6) Emi enen̄ede owụt ke enyịn̄ Abasi edi ata akpan n̄kpọ ọnọ mme Christian. Ntak ndien emi owo mîtịmke ifiọk nte ẹkesikotde enyịn̄ emi-e? Ntak iba ẹdu.
Akpa, n̄kpọ nte isua tọsịn iba ko ke eset, nsunsu ekikere mme Jew ama anam mmọ ẹdọhọ ke ifọnke ndikot enyịn̄ Abasi. Ke ini owo okokotde Bible ekesịm ebiet emi ẹwetde enyịn̄ Abasi, enye ekenyene ndikabade n̄kot “Ọbọn̄.” Mmọdo, nditre ndikot enyịn̄ Abasi ke ata ediwak isua ama anam mme owo ẹfre nte ẹkesikotde enyịn̄ emi.
Ọyọhọ ntak iba edi ke ẹkesida mme anana-uyo abisi ẹwet akpasarade usem Hebrew. Okotn̄wed ekenyene ndidọn̄ mme enyene-uyo abisi oro ke ibuot. Nte ini akakade, ẹma ẹsio usụn̄ ukotn̄wed ẹdi man mme owo ẹkûfre nte ẹsikotde ikọ ke usem Hebrew. Ẹma ẹdian mme enyene-uyo abisi ke mme ikọ kiet kiet ke Bible usem Hebrew. Nte ededi, ekeme ndidi mme enyene-uyo abisi oro ẹkediande ẹnọ enyịn̄ Abasi ẹkedi enye oro ẹdinamde ẹkot enye “Ọbọn̄,” mîdịghe, owo ikadianke-dian ndomokiet.
Ntre, se ikatakde isụhọ ekedi mme anana-uyo abisi inan̄ oro ẹdade ẹnọ enyịn̄ Abasi. N̄wed ukabadeikọ kiet ọdọhọ ke “abisi Hebrew inan̄ emi ẹsiwakde ndiwet nte YHWH m̀mê JHVH ẹdi ata enyịn̄ Abasi ke Bible.” Isọn̄ke do ndikụt nte ẹdiande mme enyene-uyo abisi ke JHVH ẹnam enye edi “Jehovah,” ndien mme owo ẹnen̄ede ẹfiọk enyịn̄ emi.
Ndusụk nditọ ukpepn̄kpọ Bible ẹdọhọ ke ẹkpekam ẹkot enye “Yahweh.” Ndi Yahweh enen̄ede ebiet nte ẹkesikotde enyịn̄ Abasi ke akpasarade usem Hebrew? Owo ifiọkke. Nte ededi, ndusụk nditọ ukpepn̄kpọ Bible ẹtịn̄ mme ntak oro owo mîkotke Abasi Yahweh. Ke akpanikọ, akam etie nte nnyịn isikotde mme enyịn̄ eken ke Bible ikam ibietke-biet nte ẹkesikotde mmọ ke akpasarade usem Hebrew, ndien idụhe owo oro ọtọhọde. Ntak edi koro nnyịn ikot mme enyịn̄ oro idahaemi ke usem nnyịn, mme owo ẹsinyụn̄ ẹsọp ẹdiọn̄ọ owo oro ikotde. Ntre n̄ko ke edi ye enyịn̄ oro, Jehovah.
Ẹkekot mme Christian akpa isua ikie ikọt enyịn̄ Abasi. Mmọ ẹma ẹtan̄a enyịn̄ emi ẹnọ mme owo ẹnyụn̄ ẹsịn udọn̄ ẹnọ mmọ ndikot enyịn̄ emi. (Utom 2:21; 15:14; Rome 10:13-15) Ana in̄wan̄-in̄wan̄ nte ke Abasi enen̄ede oyom nnyịn ikot enyịn̄ imọ ke usem ekededi oro isemde, ifiọk se enyịn̄ oro ọwọrọde, inyụn̄ idu uwem ekekem ye se enye ọwọrọde.
[Se ẹwetde ke ikpọ abisi ke page 31]
Odot ẹtịm ẹfiọk ke enyịn̄ Abasi odu n̄kpọ nte utịm ike-7,000 ke Bible