Mme Mbụme Oro Mme Andikot Ẹbụpde

Ndi ọfọn mme Christian ẹsifọp okpo owo?

N̄wed Abasi itịn̄ke n̄kpọ ndomokiet oro owụtde ke ikpanaha ẹfọp okpo owo.

Ndusụk mbụk ke Bible ẹwụt ke ẹma ẹsifọp okpo m̀mê ọkpọ owo. (Josh. 7:25; 2 Chron. 34:4, 5) Ekeme ndidi ẹkesinam emi ke ntak emi mmọ ẹkedide mme idiọkowo ndien idotke se ẹbụkde ukpono ukpono. Edi emi iwọrọke ke kpukpru mbon oro ẹkefọpde-fọp ini oro ẹkedi mme idiọkowo.

Mbụk Bible emi aban̄ade n̄kpa Edidem Saul ye nditọ esie ita owụt ke emi edi akpanikọ. Mmọ mbinan̄ ẹkekpan̄a ke ini ẹken̄wanade ekọn̄ ye mbon Philistia. Kiet ke otu nditọ esie emi ekedi Jonathan, ata ufan David emi ọkọsọn̄ọde ada ye enye. Ke ini iren uko Israel emi ẹkedụn̄de ke Jabesh-gilead ẹkekopde ke Saul ye nditọ esie ẹkpan̄a ke ekọn̄, mmọ ẹma ẹketan̄ okpo mmọ ẹkefọp, ẹnyụn̄ ẹbụk ọkpọ mmọ. Ndien David ama otoro mbon Jabesh-gilead ke se mmọ ẹkenamde oro.—1 Sam. 31:2, 8-13; 2 Sam. 2:4-6.

N̄wed Abasi ọdọhọ ke Abasi ayanam mbon emi ẹkpan̄ade ẹset. Jehovah ekeme ndinam owo eset ye obufa idem, inamke n̄kpọ m̀mê ẹkefọfọp m̀mê ẹkebobụk enye. Ke ini Edidem Nebuchadnezzar ọkọnọde uyo ete ẹfọp nditọ Hebrew ita ke akwa ikan̄, mmọ ikekereke ke edieke ẹfọpde mmimọ iforo ntọn̄, ke Abasi idikemeke ndinam mmimọ iset. (Dan. 3:16-18) Ukem ekikere emi ke mme anam-akpanikọ asan̄autom Jehovah emi ẹkewotde ẹnyụn̄ ẹfọp ke ufọk-n̄kpọkọbi mbon Nazi ẹkenyene. Bọm owot ediwak mme asan̄autom Abasi emi ẹnamde akpanikọ, ndusụk ẹnyụn̄ ẹkpan̄a ke usụn̄ en̄wen emi owo mîkwe okpo. Abasi edisụk inanam mmọ ẹset.—Edi. 20:13.

Jehovah inyeneke nditan̄ nsio nsio ndido idem owo ndian kiet mbemiso anamde owo eset. Nte Abasi anamde mme Christian oro ẹyetde aran ẹset ẹka heaven anam ifiọk emi. Kpa nte ẹkenamde Jesus eset odu uwem nte spirit, ẹsinọ mme Christian oro ẹyetde aran idem eke spirit ke ini ẹnamde mmọ ẹset. Mmọ isimenke akani idem mmọ ika heaven.—1 Pet. 3:18; 1 Cor. 15:42-53; 1 John 3:2.

Edide ẹfọfọp okpo owo m̀mê owo ifọpke, imenịm ke Abasi ekeme ndinam owo eset, ke akam ọdọdọn̄ enye ndinam emi. (Utom 24:15) Nnyịn inen̄ekede ifiọk nte Abasi akasan̄ade anam mme owo ẹset ke ini edem ye nte enye edinamde emi ke ini iso. Edi isụk ibọbuọt idem ye Jehovah. Enye ndinam Jesus eset owụt ke enye ayanam mme owo ẹset.—Utom 17:31; Luke 24:2, 3.

Ọkpọfọn mme Christian ẹkere ẹban̄a se ẹsinamde ye okpo owo ke edem mmọ, nte mbio obio ẹdisede se mmọ ẹnamde, ye se ukara ẹtịn̄de ẹban̄a se ẹkpenamde ye okpo owo. (2 Cor. 6:3, 4) Ntre, owo kiet kiet m̀mê ubon kiet kiet enyene ndibiere m̀mê akpana ifọfọp owo mmimọ.