Toro Voleka Vua na Kalou
E Vakaicovitaki Ira Kece Era Qaravi Koya
“VINAKA.” Eda dau marau kece nida vakavinavinakataki ena dua na ka eda cakava vinaka se nida solia mai vu ni lomada e dua na iloloma. Eda vinakata mera marautaka eso tale na ka eda cakava, vakabibi o ira eda lomana. E macala ga nida lomana vakalevu duadua na Kalou o Jiova. Vakacava e marautaka na noda sasaga meda qaravi koya? Meda raica mada na ka e cakava vei Epeti-meleki, na turaga a bolemate me vakabula e dua na parofita ni Kalou.—Wilika Jeremaia 38:7-13 kei na 39:16-18.
O cei o Epeti-meleki? A rairai dua na vakailesilesi ena nona vale o Tui Setekaia. O Epeti-meleki a bula ena gauna i Jeremaia, na parofita a tala na Kalou me veivakasalataki ena veivakarusai sa vakarau sotava o Juta. A bula maliwai ira na ravouvou era sega ni qarava na Kalou o Epeti-meleki, ia e dau rerevaka na Kalou qai dokai Jeremaia vakalevu. A vakatovolei na nona itovo vakalou o Epeti-meleki nira beitaki Jeremaia vakailasu na ravouvou ca ni via vuaviritaka na matanitu, ra kolotaki koya ena dua na qara lolobo qai biuti koya tu e kea me mate. (Jeremaia 38:4-6) Na cava ena cakava o Epeti-meleki?
A yaloqaqa o Epeti-meleki qai dei ena nona vakatulewa, e sega ni rerevaki ira na ravouvou dau liumuri. E lai raici Setekaia qai kudruvaka e matanalevu na ivakarau vakaloloma e caka vei Jeremaia. De dua a dusi ira sara ga na cakava na itovo oya, qai tukuna vua na tui: “Sa caka ca ko ira na tamata oqo. . .vei Jeremaia.” (Jeremaia 38:9) A rogoci na nona kudru qai tukuna vua o Setekaia me kauta e 30 na turaga mera lai vueti Jeremaia.
E dua tale na itovo talei e vakaraitaka o Epeti-meleki, na yalololoma. E kauta “nai sulu sa kadresu kei nai sulu vuca, ka tukuca sobu e na dali . . . vei Jeremaia.” Na cava e kauta kina na isulu kadresu kei na isulu vuca? Me kua ni vakila kina o Jeremaia na mosi ni kirikiriwana ni dreti cake tiko mai na qara lolobo qai titobu a biu tu kina.—Jeremaia 38:11-13.
E raica tu o Jiova na ka e cakava o Epeti-meleki. Vakacava a marautaka? E tukuna o Jeremaia vei Epeti-meleki ni kaya na Kalou ni sa vakarau vakarusai o Juta. Sa qai vakadeitaka vei Epeti-meleki o Jiova ni na yaco dina e lima na ka a yalataka me vakabulai koya kina. E kaya o Jiova: “Ka’u na vakabulai iko . . . Ko na sega ni soli ki na ligadra na tamata . . . Ni’u na vakabulai iko vakaidina . . . Ko na sega ni bale e nai seleiwau . . . Nomu bula ga ena nomui toki ni valu.” Na cava e yalataka kina o Jiova me taqomaki Epeti-meleki? E tukuna vua o Jiova: “Ni ko sa vakararavi vei au.” (Jeremaia 39:16-18) E kila o Jiova ni sega wale ga ni kauaitaki Jeremaia o Epeti-meleki, ia e vakararavi tale ga vei Jiova qai vakabauti koya.
Eda vulica kina ni marautaka o Jiova na ka eda cakava nida qaravi koya. E vakadeitaka vei keda na iVolatabu ni sega ni guilecava o Jiova na ka lalai eda cakava mai vu ni lomada ena noda sokalou vua. (Marika 12:41-44) Vakacava e uqeti iko qori mo toro voleka vua na Kalou e marautaka na nomu qaravi koya? Ke o toro voleka vua, mo nuidei ni na dina ena ka e tukuna na nona Vosa me baleti koya: ‘E vakaicovitaki ira era vakasaqarai koya ena yalogu.’—Iperiu 11:6.
Wili Volatabu e Vakatututaki ena Me: