O Jiova e Dau Vakalougatataki Ira na Lomasoli

E DOKAI keda na Dauveibuli ena nona solia vei keda na isolisoli talei, na galala ni vakatulewa. Kuria qori, e vakalougatataki ira era vakayagataka vinaka nodra galala ni vakatulewa mera tokona na sokalou dina. E vakalougatataki ira tale ga era vakaitavi ena vakalagilagi ni yacana tabu kei na kena tutaki na nona inaki cecere. E sega ni vinakata o Jiova na talairawarawa e yavutaki ena veivakasaurarataki kei na rere. Ia e talei vua na veiqaravi e vu mai lomada, e yavutaki ena loloma dina kei na veidokai.

Kena ivakaraitaki, nira veilakoyaki voli na Isireli ena vanualiwa o Saineai, a vakarota o Jiova mera tara e dua na vanua ni sokalou. E kaya: “Mo ni taura maivei kemuni nai solisoli vei Jiova: ko koya sa lomasoli, me kauta ga mai ko koya nai solisoli vei Jiova.” (Lako 35:5) E rawa ni cautaka e dua na Isireli na ka e rawa ni solia, kei na cau e sega ni lavaki—se mani cava e cautaki se kena levu—ena vakayagataki vakamatau me vakayacori kina na inaki ni Kalou. Na cava era qai cakava?

O ‘ira yadua e uqeti ira na lomadra’ kei ‘ira e gu na lomadra’ era solia na cau e sega ni lavaki. Era cakava qori ni ‘vu mai lomadra.’ Era lomasoli na tagane kei na yalewa mera cautaka qo ena cakacaka i Jiova: na pini iukuuku, na sau, na mama, koula, siliva, parasa, wa pelu, na vutinisipi lokaloka, isulu kulakula, lineni matailalai, vutinime, kuli ni tamanisipi boro damudamu, kulinisili (sealskin), na kau akasia, vatutalei, waiwai vakaisaluaki, kei na waiwai. Ia na levu ni cau era solia ‘e sivia tale mai na ka e vinakati ena cakacaka kece me caka.’—Lako 35:21-24, 27-29; 36:7.

E marautaka vakalevu o Jiova na lomasoli e laurai vei ira na tokona na sokalou savasava, sega wale ga ni ka era cautaka. Sega ni koya ga ya, e gu sara ga na lomadra mera vakayagataka nodra gauna kei na nodra kaukaua. E tukuni ena iVolatabu: “Na yalewa kecega sa lomavuku, era sa mulomulo e na ligadra.” Io, o “ira na yalewa kecega sa uqeti ira na lomadra ni ra vuku, era sa muloca na vutika ni me.” E solia tale ga o Jiova vei Pisalieli na ‘vuku, yalomatua, kei na kila ni cakacaka vakamatai kece ga.’ Na Kalou e solia vei Pisalieli kei Aoliapi na taledi me rau cakava kina na cakacaka kece e vinakati me caka.—Lako 35:25, 26, 30-35.

Ni sureti ira na Isireli o Jiova mera cau, a nuidei ni o ira ‘kece era lomasoli mai vu ni lomadra’ era na tokona na sokalou dina. E qai vakalougatataki ira na lomasoli ena nona vukei ira kei na nona vakacegui ira. E vakaraitaka gona o Jiova ni gauna e vakalougatataki ira kina na nona dauveiqaravi era dau lomasoli, ena raica me tiko kece na ka e vinakati se na kila me vakacavari kina na nona inaki. (Same 34:9) Ni o vakuai iko mo qaravi Jiova, ena vakalougatataka na nomu lomasoli.

Sala Era Cau Kina Eso Ena Cakacaka E Vuravura Raraba

Me vaka ga ena nona gauna na yapositolo o Paula, e levu nikua era “biuta vakatikitiki” se ra maroroya na ilavo me biu ena kato ni cau ena ivavakoso e volai kina na “Cakacaka e Vuravura Raraba.” (1 Kor. 16:2) Era dau vakauta e veivula na ilavo qo na ivavakoso yadua ina valenivolavola ni iVakadinadina i Jiova ena nodra dui vanua. O rawa tale ga ni vakauta vakadodonu na nomu cau ina isoqosoqo e vakadonui vakalawa meda vakayagataka na iVakadinadina i Jiova. Ke o via kila na yaca ni isoqosoqo vakalawa e vakayagataki ena nomu vanua, veitaratara ina valenivolavola ni tabana. E rawa ni laurai ena www.pr418.com na itikotiko ni valenivolavola ni tabana. Qo na cau o rawa ni vakauta sara ga vakadodonu:

CAU E SOLI VAKAILOLOMA

E rawa ni vakau na cau ena sala qo: electronic bank transfer, debit card, se credit card. E rawa tale ga ni cakava qori eso na valenivolavola ni tabana ni vakayagataki na jw.org se dua tale na Web site veiganiti.
Cautaki na ilavo, iukuuku vatutalei kei na so tale na ka vakamareqeti. Me dua na ivola me vakau vata kei na cau qori, me vakamacalataka ni ka e cautaki ya e soli vakailoloma.

CAU E TIKO NA KENA VEIDINADINATI

Cautaki na ilavo qai tiko na veidinadinati ni na rawa ni suka tale vei koya e cau ke mani vinakata.
Me dua na ivola me vakau vata kei na cau qori, me vakamacalataka ni tiko na kena veidinadinati.

SOLIKA E LALAWATAKI

Me ikuri ni kena cautaki na ilavo kei na ka vakamareqeti tale eso, e tiko eso tale na cau me yaga ena cakacaka ni Matanitu ni Kalou e vuravura. Qori ena qai vakamacalataki ena vica na parakaravu tarava. Se mani sala cava o via cau kina, yalovinaka veitaratara e liu ina valenivolavola ni tabana ena nomu vanua mo rawa ni kila na sala e rawa ni cau kina e dua ena nomu vanua. E duidui na ka vakalawa kei na lawa ni saumi vakacavacava, e bibi gona mo veivosaki kei na dua na daunivakasala ni vakacavacava kei na ka vakalawa ni bera ni o digia na sala vinaka duadua mo cau kina.

Inisua: E rawa ni volai ina dua na isoqosoqo vakalawa e vakayagataka na iVakadinadina i Jiova na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni taura tu ga vakawawa se qai soli me taukena e dua na isoqosoqo vakalawa e vakayagataka na iVakadinadina i Jiova ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa ni dau soli na stock kei na bond ina dua na isoqosoqo vakalawa e vakayagataka na iVakadinadina i Jiova me dua ga na cau e soli vakailoloma se me dua na veidinadinati vakaivola me qai soli me taukena ni sa mate e dua.

Qele kei na Vale: E rawa ni soli vakadua na qele se na vale ina dua na isoqosoqo vakalawa e vakayagataka na iVakadinadina i Jiova, e rawa tale ga ni caka e dua na veidinadinati se me tawana tiko mada na qele se vale o koya e solia me yacova nona mate.

iLavo me Saumi e Veiyabaki: Na ilavo e cautaki ina dua na isoqosoqo vakalawa e vakayagataka na iVakadinadina i Jiova qai tuvanaki me dau soli e dua na kena iwase vei koya e cautaka mai ena veiyabaki me yacova na nona mate. Ena yabaki e soli kina na ilavo ina ituvatuva qo, ena rawa ni musu na nona ivakacavacava o koya e cautaka mai.

Wili kei na Trust: E rawa ni soli na iyau se na ilavo ina dua na isoqosoqo vakalawa e vakayagataka na iVakadinadina i Jiova, ena tabaki e dua na wili se rawa ni vakayacori e dua na veidinadinati, me maroroya toka na isoqosoqo vakalawa qori na nona ilavo se iyau e dua me yacova na nona mate, sa rawa ni qai taukena na isoqosoqo. Qori ena rawa ni vakalailaitaka na saumi ni vakacavacava.

Na cau va qori e vakatokai me “soli ka e lalawataki,” kena ibalebale ena vinakati me lalawa sara ga vakavinaka o koya e via solika. Sa vakarautaki e dua na brochure vakavalagi kei na kena vakaSipeni e vakatokai na Charitable Planning to Benefit Kingdom Service Worldwide me dusimaki ira na via solika ina cakacaka ni iVakadinadina i Jiova e vuravura raraba. A volai na brochure qori me kilai kina na sala ni solika vakailoloma e rawa ni caka ena gauna qo se dua na gauna se bera mai, me vaka na gauna sa mate kina e dua. Na ivakamacala ena brochure qori ena rairai sega ni ganita sara na kemu ituvaki ena vuku ni vakacavacava se so tale na lawa ena nomu vanua. Ni o wilika oti gona na brochure, veivosaki kei na nomu daunivakasala ni lawa se ivakacavacava. Ni vakayagataki e vica na sala sa cavuti oti mai, e levu era sa tokona na noda cakacaka kei na noda cakacaka ni veivuke e vuravura raraba, qai vakalailaitaki kina na ivakacavacava e dau lavaki. Ke tiko ena nomu vanua na brochure qori, o rawa ni kerea vua na vunivola ni ivavakoso.

Me ikuri ni ivakamacala, o rawa ni veitaratara ena valenivolavola ni tabana e qarava na nomu vanua.