O Sega ni Vosota Rawa

E kaya o Adriana mai Brazil: “Sa qai ca tiko ga na bula, au nanuma ni vinaka cake meu mate.”

VAKACAVA o dau via tinia koso nomu bula ni o sega ni vosota rawa na ituvaki dredre? O na rairai duavata kei Adriana. Dua na ka nona lomabibi, rarawa, qai vakila ni sega ni dua na kena yaga. E laurai vakavuniwai ni dau lomabibi.

Dikeva tale ga na ivakaraitaki i Kaoru e dua na tagane ni Japani, e qaravi rau tiko nona itubutubu itabaqase, rau tautauvimate tale ga. E kaya: “Eso na gauna e vakaocai au na itavi au qarava e valenicakacaka, au sega ni via kana, sega tale ga niu moce vinaka. Au nanuma niu na lomavakacegu ga keu tinia noqu bula.”

E kaya o Ojebode e dua na tagane ni Nigeria: “Au dau tagi ena levu ni noqu rarawa, au dau qara gona na sala meu tinia kina noqu bula.” Eda marau ni ratou sega ni tinia koso nodratou bula o Ojebode, Kaoru, kei Adriana. Ia e vica vata na udolu era tinia koso tiko nodra bula e veiyabaki.

IVUKEVUKE YAGA

E levu ga na tagane era tinia koso tiko nodra bula nira dau madua na kere veivuke. E kaya o Jisu ni vinakati na vuniwai vua e tauvimate. (Luke 5:31) Ke o lomabibi o nanuma mo sa tinia nomu bula, yalovinaka kua ni madua ni qara nodra veivuke eso tale. E levu nira lomabibi e dau vukei ira ga na veiqaravi vakavuniwai. Qori na ka e vukei Ojebode, Kaoru, kei Adriana, ratou vakila tale ga na lomavakacegu.

De dua era na vakayagataka na vuniwai na wainimate, se ra veitalanoa kei ira na tauvimate me wali kina nodra lomabibi. O ira tale ga na tauvimate era vinakata mera veitokoni na lewenivuvale, mera vosovoso ra qai veikauaitaki. Na itokani vinaka duadua na Kalou o Jiova, e vakarautaka na veivuke ena nona Vosa na iVolatabu.

ENA RAWA NI WALI?

O ira na lomabibi ena vinakati mera qaravi vakadede vakavuniwai, mera veisautaka tale ga nodra ivakarau ni bula. Ia ke ra lomabibi tiko ga, era na rawa ni vakanamata ena veigauna vinaka se bera mai me vaka ga e nuitaka o Ojebode. E kaya: “Au rai vakanamata na kena vakayacori na Aisea 33:24, e parofisaitaka na gauna sa na sega ni kaya kina e dua ‘Au tauvimate.’” Me vakataki Ojebode, me vakacegui iko mada ga na yalayala ni Kalou me baleta na “vuravura vou,” ena sega ni vakilai tale kina na “mosi.” (Vakatakila 21:1, 4) Io, sa na oti vakadua kina na veilecayaki, kei na mosi o dau vakila. O na sega tale ni vakila na rarawa, o na ‘sega tale ni nanuma na ka makawa, ena sega ni tiko e lomamu.’—Aisea 65:17.

Tikinivolatabu e Veivakacegui

E kila na Kalou na lomamu.

“O yau o Jiova na nomu Kalou, au taura tiko na ligamu imatau, . . . e tukuna vei iko, ‘Kua ni rere. Au na vukei iko.’”—Aisea 41:13.

O Jiova duadua ga e kilai keda vinaka, e via vukei keda tale ga.

Vakasamataka vakatitobu na Vosa ni Kalou.

“E . . . kerea [o Ilaija] me mate. E kaya: ‘. . . Kemuni Jiova, moni kauta tani na noqu bula.’”—1 Tui 19:4.

E kaya o Ojebode: “E vukei au noqu vakasamataka vakatitobu na Vosa ni Kalou. Au vulica ni va tale ga ya na loma i Ilaija.”

Vuli ena ivakaraitaki vakaivolatabu.

“Au [Jisu] sa masulaki iko [Pita] oti me kua ni malumalumu nomu vakabauta.”—Luke 22:32.

Oti nona cakitaki Jisu vakatolu o Pita, dua na ka nona lomabibi qai sorova na tagi. E kaya o Kaoru: “Niu vakasamataka vakatitobu na ivakaraitaki i Pita, au vakadeitaka kina ni rau kauaitaka o Jiova kei Jisu na lomana. E uqeti au dina qori.”

O na ‘sega tale ni nanuma na ka makawa, ena sega ni tiko e lomamu.’—Aisea 65:17