Na Rai ni iVolatabu

Mera Namaka Beka na Lotu Vakarisito na Veitaqomaki ni Kalou?

E tukuni vakalevu ena iVolatabu na nona dau taqomaki ira nona dauveiqaravi na Kalou mai na leqa. E kaya o Tui Tevita: “Mo ni vakabulai au, Jiova, mai na tamata ca; mo ni maroroi au mai na tamata loma kaukauwa.” (Same 140:1) E levu na dauveiqaravi ni Kalou nikua era sotava na itovo voravora, se kaukaua, kei na leqa tubukoso e voleka sara nira mate kina. Ia nira sega ni vakaleqai, e so era nanuma de a vakabulai ira vakacakamana na Kalou, vakauasivi ni so tale era rerevaka na Kalou a sega nira drotaka rawa na leqa levu era sotava, era tini vakamatei vakaloloma sara kina.

E TAQOMAKI ira beka ga e so na Kalou o Jiova? Meda namaka beka meda vakabulai vakacakamana nida sotava na itovo kaukaua kei na leqa?

iTukutuku ni Veivakabulai Vakacakamana ena iVolatabu

E vakamacalataki vakalevu ena iVolatabu na nona dau vakabulai ira vakacakamana nona tamata na Kalou. (Aisea 38:1-8; Cakacaka 12:1-11; 16:25, 26) E volatukutukutaki tale ga ena iVolatabu ni so na gauna era sega ni dau vakabulai mai na leqa era sotava na tamata ni Kalou. (1 Tui 21:1-16; Cakacaka 12:1, 2; Iperiu 11:35-38) Ena nona gauna kei na nona inaki ena lewa ga o Jiova se o cei me taqomaka. O koya gona, kevaka e dua na lotu Vakarisito e sega ni vakabulai mai na nona leqa, me kua vakadua ni kaya ni sa guilecavi koya na Kalou. Meda kila deivaki ni na yaco ga na ka ca, vei ira sara mada ga na tamata yalodina i Jiova. Na cava na vuna?

Na Vu ni Kena Yaco na Ka Ca Vei Ira na Tamata ni Kalou

Dua na vuna, oya ni takavi keda na ivalavala ca i Atama kei Ivi. Eda sotava tiko kina na rarawa, mosi kei na mate. (Roma 5:12; 6:23) E dua tale na vuna nida bula tu oqo ena iotioti ni veisiga. E vakamacalataki ira na tamata ni gauna oqo na iVolatabu nira “caca veiwekani, era na dauyalayala ka lasu tale, era na dauveibeitaki vakailasu, era na sega ni daurawa na yalodra, era na daucudrucudru, era na daucati ira na tamata vinaka.” (2 Timoci 3:1-5) E laurai oqo ena kena takalevu na kucu, veivesu vakasaurara, laba, kei na so tale na ivakarau torosobu.

E vuqa na dauveiqaravi yalodina ni Kalou era bula vata qai cakacaka vata kei ira na tamata voravora, so na gauna era dau taketetaki ira sara ga. Eda na sotava beka vakacalaka e dua na ituvaki ririkotaki nida lai tu ena dua na vanua. Ia, eda na vakadinata na vosa i Solomoni ni “gauna kei na ka e sega ni namaki e dau yacovi keda kece.”​—Dauvunau 9:11, NW.

Kena ikuri, e kaya na yapositolo o Paula nira na vakacacani na lotu Vakarisito nira sokalou vua na Kalou. E kaya: “Io, ko ira kecega era na via lotu dina vei Karisito Jisu, era na vakacacataki.” (2 Timoci 3:12) Oqo e vakadinadinataki ena so na vanua ena vica na yabaki wale tiko ga oqo.

Era na sega gona ni drotaka rawa na tamata era rerevaka na Kalou na leqa ni itovo voravora, se kaukaua, leqa tubukoso se na vakacalaka e tini sara ina mate. Na nona ile o Setani ni o Jiova e viribaiti ira na nona tamata me kua kina ni tarai ira na leqa. (Jope 1:9, 10) E sega ni dina oya. Ia eda vakadeitaka ni kevaka mada ga e sega ni vakabulai ira vakacakamana na nona tamata o Jiova, ena taqomaki ira ga.

Taqomaki Ira Edaidai na Nona Tamata o Jiova

E vakarautaka o Jiova na nona Vosa me veidusimaki ena nodra taqomaki na nona tamata. Na ka vakayalo kei na kilaka mai na iVolatabu e vukei keda meda vakatulewa vinaka, da qai yalomatua meda levea kina na cala e sakasaka. (Same 38:4; Vosa Vakaibalebale 3:21; 22:3) Kena ivakaraitaki, na nodra muria na lotu Vakarisito na ivakasala vakaivolatabu ni veiyacovi vakaveitalia, kocokoco, cudrucudru kei na itovo voravora, ena taqomaki ira mai na leqa e rawa ni vakavuna na veika oqo. Noda sega tale ga ni dau vakailala vata kei ira na tamata ivakarau ca, eda na sega kina ni lai tu ena vanua e rawa ni yacovi keda kina na leqa. (Same 26:4, 5; Vosa Vakaibalebale 4:14) O ira na bulataka na ivakavuvuli vakaivolatabu era na marautaka na nodra bula, ena vinaka na nodra vakasama ra qai bulabula tale ga.

E veivakacegui tale ga meda kila ni kevaka e vakatara na Kalou me yaco na ka ca, ena solia vei ira na nona dauveiqaravi na kaukaua mera tutaka rawa kina na leqa era sotava. E veivakauqeti kina na yapositolo o Paula: “Sa yalodina na Kalou o koya ena sega ni laivi kemudou mo dou dauveretaki vakalevu cake, me vaka ga na nomudou kaukauwa; ka na cakava talega kei na vere na sala mo dou dro kina, mo dou vosota rawa.” (1 Korinica 10:13) E yalataka tale ga na iVolatabu ni na rawa ni vukei keda na “kaukauwa mana levu” meda tutaka kina na leqa.​—2 Korinica 4:7.

Vakatau ina Loma ni Kalou

Me namaka beka e dua na lotu Vakarisito me vakabulai vakacakamana mai na leqa kece ga e sotava? E sega ni tokona na iVolatabu na mataqali rai vaka oqo.

E rawa ni loma ni Kalou o Jiova me vakabula e dua na nona dauveiqaravi mai na leqa e sotava. O koya gona, kevaka e vakabauta e dua ni a vakabulai koya na Kalou, me kua ni vakalewai kina. Ia, kevaka e sega ni loma i Jiova me vakabulai koya, me kua vakadua ni nanuma ni cudruvi koya o Jiova.

Meda nuidei mada ga ni leqa cava ga eda sotava, ena taqomaki ira nona dauveiqaravi yalodina o Jiova, ena nona kauta laivi na leqa se na solia na nona kaukaua me rawa nida sotava kina, se kevaka eda mani mate sara ena vakaturi keda ina bula tawamudu ena vuravura vou.​—Same 37:10, 11, 29; Joni 5:28, 29.