O Jiova e ‘Noda Kaukaua ena Gauna ni Rarawa’
“Sa ka maivei Jiova na nodra vakabulai na yalododonu: a nodra kaukauwa ko koya e na gauna rarawa.”—SAME 37:39.
1, 2. (a) Na cava e masuta o Jisu ena vukudra nona tisaipeli? (b) Na cava e loma ni Kalou vei ira nona tamata?
OJIOVA e kaukaua duadua. E tu vua na kaukaua me taqomaki ira nona dauveiqaravi yalodina ena sala ga e vinakata. E rawa sara mada ga ni kauti ira tani nona tamata mai vuravura me lai biuti ira ena dua na vanua era na taqomaki kina. E masuti Tamana vakalomalagi vaka oqo ena vukudra nona tisaipeli o Jisu: “Au sega ni masulaka mo ni kauti iratou tani mai vuravura, ia mo ni maroroi iratou ga mai vua na Vunica.”—Joni 17:15, VV.
2 Sa lewa o Jiova me kua ni kauti keda “tani mai vuravura.” E lewa ga meda bula tiko kei ira na lewe i vuravura me rawa kina nida vunautaka vei ira na itukutuku me baleta na inuinui kei na bula vakacegu. (Roma 10:13-15) Ia e vakaraitaka o Jisu ena nona masu ni na vakaleqai keda “na Vunica” ena vuravura oqo. O ira na tamata talaidredre kei ira na veivavakoso yalo ca era na vakavuna na veika rarawa kei na yaluma, na veika ena tarai ira tale ga na lotu Vakarisito.—1 Pita 5:9.
3. Na cava era na bau vakila tale ga na dauveiqaravi yalodina i Jiova, ia na veivakacegui cava eda kunea ena Vosa ni Kalou?
3 Nida sotava na veika rarawa oqori, sa na macala tu ga nida na yalolailai ena so na gauna. (Vosa Vakaibalebale 24:10) E volai tu ena iVolatabu na kedra itukutuku e le levu era sotava na veika rarawa. A kaya na daunisame: “Sa levu na ka rarawa sa yaco vua na yalododonu; ia sa vakabulai koya ko Jiova mai na ka kecega.” (Same 34:19) Io, era na vakila tale ga na veika ca o ira “na yalododonu.” Me vakataki koya na daunisame o Tevita, ena rawa tale ga meda “malumalumu ka musulaki sara.” (Same 38:8) Ia e veivakacegui dina na noda kila ni “voleka ko Jiova vei ira sa ramusu na yalodra; ka sa vakabulai ira sa dasila na lomadra.”—Same 34:18; 94:19.
4, 5. (a) Me vaka na Vosa Vakaibalebale 18:10, na cava meda cakava me qai rawa kina ni taqomaki keda na Kalou? (b) Na cava e dodonu meda cakava me qai rawa kina ni vukei keda na Kalou?
4 Me vaka na masu i Jisu, ena taqomaki keda tiko o Jiova. E noda “kaukauwa ko koya e na gauna rarawa.” (Same 37:39) E via tautauvata na ka e tukuna na Vosa Vakaibalebale: “Na yaca i Jiova sa vale-cecere kaukauwa: sa dro kina na yalododonu, ka sa bula.” (Vosa Vakaibalebale 18:10) E vakaraitaka na iVolatabu na nona kauaitaki ira vakayalololoma na nona ibulibuli o Jiova. Na Kalou e dau taqomaki ira na yalododonu era vakasaqarai koya tiko, e vaka sara ga eda dro ina dua na vale cecere meda lai vakaruru kina.
5 Nida sotava na leqa e vakayalolailaitaki keda, eda na dro vakacava vei Jiova me taqomaki keda? Meda raica mada e tolu na ka bibi eda rawa ni cakava me qai rawa kina ni vukei keda o Jiova. E vinakati taumada meda dau masu vua na Tamada vakalomalagi. Kena ikarua, meda muria na ivakasala ni yalona tabu. Kena ikatolu, meda talairawarawa ina ituvatuvanaki i Jiova ena noda dau veimaliwai kei ira noda itokani lotu Vakarisito era rawa ni vakacegui keda nida rarawa.
Na Yaga ni Masu
6. Era raica vakacava na masu na lotu Vakarisito dina?
6 So era kenadau ena qaravi bula era vakatura na masu me iwali ni yalolailai kei na lomaocaoca. Dina ni na rawa ni walia na lomaocaoca na mataqali vakanomodi e dau vakilai ena gauna ni masu, ia e rawa ni vakilai tale ga oqori nida rogoca e so na rorogo, se ni masi na dakuda. O ira na lotu Vakarisito dina era sega ni taura vakamamada na masu me ka e rawati ga kina na lomavakacegu. Eda raica ga na masu me sala ni veivosaki rakorako kei na Dauveibuli. Na masu e dau vakatitobutaka na noda lomana na Kalou kei na noda nuitaki koya. Io, na masu e tiki ni noda sokalou.
7. Na cava na ibalebale ni noda masu ena nuidei, e vukei keda vakacava na masu vaka oqori me walia na lomaocaoca?
7 Me dau vakilai ena noda masu na noda nuitaki Jiova. E vola na yapositolo o Joni: “Sa i koya oqo eda sa nuidei kina e na mata ni Kalou: koya ni da kila ni na rogoci keda ko koya kevaka eda kerea e dua na ka me vaka na lomana.” (1 Joni 5:14, VV) O Jiova, o koya e Cecere Duadua, na Kalou dina qai kaukaua duadua, e kauaitaka dina na nodra masu o ira na sokaloutaki koya. E veivakacegui dina noda kila mada ga ni rogoci keda na Kalou dau loloma oqo nida vakaraitaka vua na noda nuiqawaqawa kei na noda leqa.—Filipai 4:6.
8. Na cava mera kua kina ni madua se beci ira na lotu Vakarisito yalodina nira masu vei Jiova?
8 Mera kua ni madua, beci ira, se sega ni veinuitaki na lotu Vakarisito yalodina nira masu vei Jiova. Ni so na gauna eda rarawataki keda se rui bikai keda vakasivia na leqa, eda na rairai sega ni via masu vei Jiova. Ena gauna vaka oqori ena vinaka meda nanuma ni o Jiova e “lomani ira na nona era sa rarawa” qai “dau vakaukauwataki ira na yalolailai.” (Aisea 49:13; 2 Korinica 7:6, VV) Ena gauna eda vakila kina na yaluma kei na lomaocaoca oya sara ga na gauna meda vakararavi kina vua na Tamada vakalomalagi, baleta ni o koya e noda kaukaua.
9. E yaga vakacava na vakabauta ena noda torova na Kalou ena masu?
9 Me rawa ni qai yaga vei keda na sala ni masu, ena vinakati me tu vei keda na vakabauta dina. E kaya na iVolatabu ni o koya e “torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.” (Iperiu 11:6) Na vakabauta e sega ni okati ga kina na noda vakabauta ni bula tiko na Kalou. Na vakabauta dina e okati tale ga kina na noda vakabauta ni rawa vua na Kalou qai vinakata tale ga o koya me solia na noda icovi ni talairawarawa vua. “Sa wanonovi ira na yalo dodonu na mata ni Turaga [o Jiova]; ka sa vakarorogo tu na daligana ki na nodra masu.” (1 Pita 3:12, VV) Ena bibi sara na noda masu baleta nida kila ni kauaitaki keda o Jiova qai lomani keda tale ga.
10. Meda masu vakacava kevaka eda gadreva me vakacegui keda vakayalo o Jiova?
10 Ena rogoca na noda masu o Jiova ke da masu ena yaloda taucoko. E vola na daunisame: “Au a tagi e na yaloqu taucoko; mo ni rogoci au, Jiova.” (Same 119:145) Eda na sega ni dau masu wale tu ga me rawa se da lomalomarua me vaka na ivakarau ni masu ni levu na lotu. Nida masu vei Jiova ena ‘yaloda taucoko,’ ena vakaibalebale cake noda masu. Ni vaka oya na ivalavala ni noda masu, eda na vakila sara ga na vakacegu baleta nida sa biuta vei ‘Jiova na noda icolacola bibi.’ E yalataka na iVolatabu, ni na ‘tokoni keda o koya.’—Same 55:22; 1 Pita 5:6, 7.
Vukei Keda na Yalona Tabu na Kalou
11. Na cava e dua na sala e sauma kina noda masu o Jiova nida ‘kerea’ tiko me vukei keda?
11 E sega ni rogoca wale ga na masu o Jiova, e sauma tale ga. (Same 65:2) E vola o Tevita: “E na siga ka’u rarawa kina ka’u na masuti kemuni, ni kemuni na vosa mai vei au.” (Same 86:7) Oya na vuna e uqeti ira kina na nona tisaipeli o Jisu mera ‘kerei’ Jiova tiko me vukei ira baleta ni o koya na ‘Tamada vakalomalagi’ ena ‘solia na yalona tabu vei ira era kerea vua.’ (Luke 11:9-13) Io, e dau vukei ira na nona tamata na igu yavavala ni Kalou.—Joni 14:16.
12. Ena vukei keda vakacava na yalona tabu na Kalou nida lomaocaoca vakalevu?
12 Ena gauna mada ga eda vakatovolei kina, ena vakaukauataki keda ena “kaukauwa mana levu,” na yalona tabu na Kalou. (2 Korinica 4:7) E kaya ena nuidei na yapositolo o Paula, o koya e vosota tale ga na veika rarawa: “Au rawata na ka kece ga mai vua e vakaukauataki au.” (Filipai 4:13, NW) Era vakila tale ga na lotu Vakarisito nikua na kaukaua ni nodra bula vakayalo kei na vinaka ni lomadra ni saumi mai na nodra vakamamasu. Dau vakalevu me seavu na lomaocaoca ni sa vukei keda na yalona tabu na Kalou. Me baleta na kaukaua e solia mai na Kalou, eda rawa ni kaya vata kei na yapositolo: “Keitou sa dau vakacacani e na ka kece ga, ia keitou sega ni vakaleqai sara, keitou dau loma leqa, ia keitou sega ni vakaleqai sara. Keitou vakararawataki ia keitou sega ga ni vakanadakui sara. Keitou sa dau mavoa sara vaka ca e na so na gauna, ia keitou sa sega ni vakarusai sara.”—2 Korinica 4:8, 9, VV.
13, 14. (a) E yaco vakacava me noda kaukaua o Jiova ni vakayagataka nona Vosa? (b) E vukei iko vakacava na nomu vakayagataka na ivakavuvuli vakaivolatabu?
13 Na yalo tabu e uqeta na kena volai kei na kena maroroi voli mai na Vosa volai ni Kalou e yaga vei keda. E yaco vakacava me noda kaukaua o Jiova ena gauna ni rarawa ni vakayagataka nona Vosa? Ni solia vei keda na vuku kei na lewa vinaka. (Vosa Vakaibalebale 3:21-24) Na iVolatabu e dau vakavulica noda vakasama qai vukea tale ga meda dau lewa vinaka. (Roma 12:1) Nida wilika, vulica, da qai bulataka na Vosa ni Kalou, eda na rawa ni ‘vakavulica na lomada me rawa ni vakaduiduitaka na vinaka mai na ca.’ (Iperiu 5:14, VV) O sa rairai vakila na kena vukei iko na ivakavuvuli vakaivolatabu me vinaka nomu vakatulewa ena gauna o sotava kina e dua na leqa. E dau vakavulici keda na iVolatabu meda yalomatua me rawa kina nida walia na veileqa e vakalomaocaocataki keda.—Vosa Vakaibalebale 1:4.
14 E vukei keda tale ga na Vosa ni Kalou meda vakanuinuitaka na bula. (Roma 15:4) E tukuna vei keda na iVolatabu ni na sega ni yaco tiko ga me tawamudu na veika ca. Ena tini koso na veivakararawataki eda sotava tiko. (2 Korinica 4:16-18) Eda ‘vakanuinui ina bula tawamudu. Sa yalataka makawa sara tu na bula oqo na Kalou, o koya sa sega ni dau lasu.’ (Taito 1:2, VV) Kevaka eda marautaka tiko na inuinui oya, qai dei vinaka tu ga vei keda na veika vinaka sa yalataka tu o Jiova, eda na vosota tiko na veika rarawa.—Roma 12:12; 1 Cesalonaika 1:3.
Na iVavakoso e iVakaraitaki ni Loloma ni Kalou
15. Era na veivukei vakacava na lotu Vakarisito?
15 E vakarautaka tale ga o Jiova na veimaliwai ena ivavakoso vakarisito me vukei keda ena gauna eda rarawa kina. E kaya na iVolatabu: “Sa loloma tiko e na veigauna kece na wekana na tamata, ka sa vaka na tacina e na gauna ni rarawa.” (Vosa Vakaibalebale 17:17) Na Vosa ni Kalou e uqeti ira kece na lewe ni ivavakoso mera dau veirokorokovi ra qai veilomani. (Roma 12:10) E vola na yapositolo o Paula, “Me kakua e dua me qara na ka sa yaga duaduaga vei koya, a ka talega sa yaga vei koya na tani.” (1 Korinica 10:24) Ni tu vei keda na rai oqori, ena vukei keda meda dau kauaitaka na veika era gadreva e so tale, eda na sega tale ga ni kauaitaka soti kina na rarawa eda sotava tiko. Nida soli keda ena vukudra e so tale, eda sega wale ga ni vukei ira ia eda na marau da qai lomavakacegu tale ga. Ena vakamamadataka na noda icolacola.—Cakacaka 20:35.
16. Eda na veivakauqeti vakacava na lotu Vakarisito?
16 E rawa nira dau veivakaukauataki na tagane kei na yalewa era matua vakayalo. Ena rawa oqo kevaka era dau soli ira. (2 Korinica 6:11-13) Ena yaga sara ina ivavakoso na noda dau vakacaucautaki ira na gone, uqeti ira na vakabauta vou, kei na noda dau vakauqeti ira na yalobibi. (Roma 15:7) Nida veilomani vakaveitacini eda na sega ni dau kasami. Me kua ni totolo noda nanuma ni leqa e sotava tiko e dua e ivakaraitaki ni nona malumalumu vakayalo. O Paula e uqeti ira na lotu Vakarisito mera “vakacegui ira era sa yalolailai.” (1 Cesalonaika 5:14) E vakaraitaka na iVolatabu nira bau dau rarawa tale ga na lotu Vakarisito yalodina.—Cakacaka 14:15.
17. Ena gauna cava soti e rawa nida vaqaqacotaka kina na ivau ni veitacini vakarisito?
17 Na soqoni vakarisito e gauna vinaka ni noda veivakacegui kei na veivakayaloqaqataki. (Iperiu 10:24, 25) Ena sega ni dau caka ga ena gauna ni soqoni na veimaliwai vinaka oqo. Era na saga tale ga na tamata ni Kalou mera veimaliwai vinaka ena veigauna tale e so. Ni sotavi na rarawa, era na dau veivukei baleta e kaukaua na ivau ni veiwekani era sa bucina rawa. E vola na yapositolo o Paula: “Me kakua kina ni veisei na yago, . . . me veinanumi vakatautauvata na veitikina vakai ira. Ia kevaka sa rarawa e dua na tikina, sa rarawa vata na tikina kecega; se dua na tikina sa dokai, sa reki vata na tikina kecega.”—1 Korinica 12:25, 26.
18. Na cava meda kua ni cakava nida lomabibi?
18 De so na gauna eda sega ni dau veimaliwai kei ira na noda itokani lotu Vakarisito baleta nida lomabibi. Meda valuta na itovo ni rai oqori me kua kina nida calata na veivakacegui kei na veivukei era dau solia o ira eda vakabauta vata. E vakasalataki keda na iVolatabu: “Ni sa tawasei koya tani na tamata, sa qara na ka e domona, a sa veivorati kei na vuku kece.” (Vosa Vakaibalebale 18:1) O ira na tacida e ivakaraitaki ni nona kauaitaki keda na Kalou. Ke da kauaitaka na isolisoli loloma oya, eda na vakacegui ena gauna ni rarawa.
Me Vinaka Tu ga Nomu Rai
19, 20. E vukei keda vakacava na iVolatabu meda kua ni lomalomarua?
19 Ke da yalolailai da qai rarawa, ena rawarawa sara meda lomalomarua. Me kena ivakaraitaki, nira sotava na veika dredre, so era nanuma nira sa malumalumu vakayalo ra qai nanuma tale ga ni oya e vakaraitaka ni sa sega ni vakadonui ira na Kalou. Kua ni guilecava ni o Jiova e sega ni dau veretaka e dua e “na ka ca.” (Jemesa 1:13) E kaya na iVolatabu, “Sa sega ni vu mai na lomana [na Kalou] me cudruvi ira na tamata, se me vakararawataka na lomadra.” (Lele i Jeremaia 3:33) E dina ga na kena veibasai, e dau rarawa vakalevu o Jiova nira rarawa nona tamata.—Aisea 63:8, 9; Sakaraia 2:8.
20 O Jiova e “Tama ni loloma, kei na Kalou ni veivakacegui kecega.” (2 Korinica 1:3) E dau kauaitaki keda o koya, ena qai vakalevulevui keda ena gauna sa lokuca. (1 Pita 5:6, 7) Ena vinaka tu ga na noda rai da qai marau tale ga kevaka eda nanuma tiko ni dau lomani keda na Kalou. E vola o Jemesa: “Ni okata ga me ka ni reki na nomuni sota kaya na veimataqali veivakatovolei e vuqa.” (Jemesa 1:2, VV) Baleta? E sauma: “Ni sa vorata rawa na veivakatovolei, e na soli vua na bula, koya na i covi ka sa yalataka oti na Kalou vei ira era lomani koya.”—Jemesa 1:12, VV.
21. Se mani rarawa cava eda sotava, na cava e yalataka na Kalou vei keda na yalodina tiko vua?
21 A vakasalataki keda o Jisu nida na sotava e vuravura na rarawa. (Joni 16:33) Ia e yalataka na iVolatabu ni na sega ni tawasei keda mai na nodrau loloma o Jiova kei Luvena na veika me vaka na ‘rarawa, yaluma, veivakacacani, dausiga, luvawale se na veivakarerei.’ (Roma 8:35, 39) E veivakacegui noda kila ni na sega ni tawamudu na rarawa eda sotava tiko! Ia ena gauna mada ga oqo, nida waraka tiko na gauna me oti kina na rarawa, ena taqomaki keda tiko na Tamada dau loloma, o Jiova. Ke da kerei koya me taqomaki keda, ena vakadeitaka o koya ‘me nona uluvatu o koya sa vakararawataki, na uluvatu ena gauna ni veivakacacani.’—Same 9:9.
Na Cava Eda Vulica?
• Na cava mera namaka na lotu Vakarisito nira bula tiko ena vuravura ca oqo?
• Ena veivuke vakacava na noda dau masu nida sotava na veivakatovolei?
• E veivuke vakacava na yalona tabu na Kalou?
• Eda na veivukei vakacava?
[iYaloyalo ena tabana e 18]
Meda vakasaqarai Jiova me vaka nida cici ina dua na vale cecere kaukaua
[iYaloyalo ena tabana e 20]
O ira na matua vakayalo era vakayagataka na veigauna kece mera vakavinavinaka kina ra qai veivakayaloqaqataki