Veivakacegui Vei Ira na Lolosi

ERA domobula sara ga na tamata e vuravura taucoko ena vuku ni vakacaca a yaco mai na korolevu o Niu Yoka kei Washington, D.C. ena 11 Sepiteba, 2001. Era mate ena loma ni dua ga na siga e vica vata na udolu, wili kina o ira na daubokobuka yaloqaqa, na ovisa kei ira na dau soli veivuke vakavuniwai ena gauna ni leqa tubukoso.

Me tekivu mai na gauna oya, era veitauriligataka na iVakadinadina i Jiova na nodra saga tiko mera vakacegui ira era mate na wekadra lomani ena leqa vakaloloma oya. Era cakava oqo me “vakabulai ira sa ramusu na yalodra” qai “vakacegui ira kecega era sa tagi.”​—Aisea 61:1, 2.

Ena veiyabaki sa oti yani, era raica rawa na iVakadinadina i Jiova nira dau vakataroga o ira na sa mate na wekadra voleka na veitaro era koto oqo e ra. Na iVolatabu ga ena sauma na veitaro oqori. Vakacava mo cega sara ga na veitikina oqori ena nomu iVolatabu?

Sa lewai oti tu beka mai na siga me mate kina e dua?

E kaya na iVolatabu ena Dauvunau 9:11 (NW) ni “gauna kei na ka e sega ni namaki” e dau yacovi keda kece na kawatamata. Kevaka gona sa lewai oti tu mai na noda mate, na cava ga e qai uqeti keda kina na iVolatabu meda dau qaqarauni?​—Kena ivakaraitaki, raica na Vakarua 22:8.

Na cava na vu ni noda mate?

Erau a biu ena dua na parataisi e vuravura na imatai ni veiwatini o Atama kei Ivi. Rau na sega ni mate ke rau talairawarawa. Ena qai mate ga na tamata ke talaidredre vua na Kalou. (Vakatekivu 1:28; 2:15-17) Ka ni rarawa ni rau a talaidredre o Atama kei Ivi vua na Dauveibuli. O koya gona, na isau ni nodrau ivalavala ca​—na mate. Nira kawa kece mai vei Atama kei Ivi na tamata, era ivalavala ca kina ra qai mate tale ga. E vakamacalataka na iVolatabu: “Sa curu ki vuravura nai valavala ca; e na vuku ni tamata e lewe dua [o Atama], kei na mate e na vuku ni valavala ca; a sa yaco vakakina na mate ki na tamata kecega.”​—Roma 5:12.

E vakacava tu na kedra ituvaki na mate?

Ni sa talaidredre oti o Atama sa qai kaya na Kalou: “Ko na suka tale . . . ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.” (Vakatekivu 3:19) E sega gona nira qai yavala rawa tale na mate​—ni sa sega sara ga ni dua na ka era vakila. E kaya na iVolatabu: “Ra sa kila ko ira sa bula ni ra na mate: ia ko ira na mate era sa sega ni kila e dua na ka.” (Dauvunau 9:5) E kaya tale ga na iVolatabu ni gauna e mate kina e dua na tamata e “suka ko koya ki na kena qele; e na siga dina ko ya sa oti na ka e vakanananu kina.”​—Same 146:3, 4.

Na cava na nodra inuinui na sa mate?

E vakaraitaka na iVolatabu ni inaki ni Kalou mera vakabulai tale na mate ena vuku ni veivakaturi ina dua na parataisi e vuravura, ena sega kina vakadua na tauvimate se mate. E kaya o Jisu: “Sa lako mai na gauna era na rogoca kina na domona ko ira kecega e nai bulubulu, a ra na lako maikina.”​—Joni 5:28, 29; Vakatakila 21:1-4.

E vakatauvatana o Jisu na mate ni nona itokani o Lasarusa me vaka ga na mocelutu. (Joni 11:11-13) Kena ikuri, ni sa vakaturi Lasarusa oti o Jisu, a sega ni bau mai talanoataka ni a tiko mai ina dua na vanua ni veivakararawataki se a bula tu ena dua na vanua totoka ena gauna lekaleka a mate tu kina. (Joni 11:37-44) E macala vinaka oqori baleta nira sa sega ni vakila tu e dua na ka o ira na mate. Era sega ni vakila tu na rarawa ia era sa waraka tu ga na “gauna” mera na qai vakaturi kina. O koya gona, na nona vakaturi o Lasarusa e vakaraitaka sara ga na nodra rawa ni vakabulai tale na tamata mate. Io, na cakamana gona i Jisu e ivakaraitaki lailai ga ni ka ena yaco e vuravura ni sa veiliutaki na Matanitu ni Kalou. (Cakacaka 24:15) E ka ni veivakacegui dina ena gauna dredre oqo vei ira na sa mate na wekadra voleka!