Lesoni 3
O Cei o Jisu Karisito?
Na cava e vakatokai kina o Jisu me Luve “ulumatua” ni Kalou? (1)
Na cava e vakatokai kina “na Vosa”? (1)
Na cava e mai bula kina vakatamata o Jisu e vuravura? (2-4)
Na cava e cakamana kina? (5)
Na cava ena vakayacora o Jisu ena gauna sa voleka mai oqo? (6)
1. Ni se bera ni mai bula e vuravura o Jisu, a bula vakayalo tu mai lomalagi. E imatai sara ga ni bulibuli ni Kalou o koya, oya na vuna e vakatokai kina me Luve ni Kalou “ulumatua.” (Kolosa 1:15, VV; Vakatakila 3:14) O Jisu na Luvena duadua e bulia sara ga na Kalou. Ni se bera ni mai bula vakatamata o Jisu, a vakayagataki koya o Jiova me nona “matai daucakacaka” me bulia na ka kece tale e so e lomalagi kei vuravura. (Vosa Vakaibalebale 8:22-31; Kolosa 1:16, 17) Na Kalou e vakayagataki koya tale ga me nona matanivanua levu. Oya na vuna e vakatokai kina o Jisu “na Vosa.”—Joni 1:1-3; Vakatakila 19:13.
2. E talai Luvena mai vuravura na Kalou ena nona tokitaka nona bula ina katonigone i Meri. E sega kina ni dua e vuravura me tama i Jisu. Oya na vuna e sega ni sucu kaya mai na ivalavala ca o koya. E tolu na vuna e talai Jisu mai kina i vuravura na Kalou: (1) Me vakavulici keda ena ka dina me baleta na Kalou (Joni 18:37), (2) me yalodina ena kena iyacoyaco e vinaka vakaoti, me ivakarau kina vei keda meda muria (1 Pita 2:21), kei na (3) me solia nona bula me isoro me sereki keda kina mai na ivau ni ivalavala ca kei na mate. Na cava na vuna e vinakati kina oqo?—Maciu 20:28.
3. Ni sa talaidredre ina ivakaro ni Kalou na imatai ni tagane o Atama, e kaya na iVolatabu ni sa “valavala ca.” E totogitaki koya kina na Kalou me mate. (Vakatekivu 3:17-19) Sa sega ni yacova o koya na ivakatagedegede ni Kalou, sa sega kina ni tamata uasivi. Tekivu me qase vakamalua o koya mani mate sara. E vakadewa o Atama na ivalavala ca vei ira kece na luvena. Oya na vuna eda qase kina, tauvimate da qai mate. Ena vakabulai vakacava na kawatamata?—Roma 3:23; 5:12.
4. E tamata uasivi o Jisu me vakataki Atama. Ia e sega ga ni muri Atama o Jisu, ni a vinaka vakaoti nona talairawarawa ena gauna ni nona vakatovolei levu duadua. Sa rawa kina vua me cabora nona bula uasivi vakatamata me saumi kina na ivalavala ca i Atama. Oqo na ka e vakatoka na iVolatabu me ‘ivoli.’ Ra sa na rawa ni sereki na luve i Atama mai na kedra itotogi mate. O ira kece na vakabauti Jisu, sa rawa ni vosoti na nodra ivalavala ca ra qai vakadonui mera bula tawamudu.—1 Timoci 2:5, 6; Joni 3:16; Roma 5:18, 19.
5. Ena nona bula o Jisu e vuravura, e vakabulai ira na tauvimate, vakani ira na via kana, e tarova na laba ni cagi. E bau vakaturi ira tale ga na mate. Na cava e cakamana kina? (1) E lomani ira na rarawa voli, qai vinakata me vukei ira. (2) Nona cakamana e vakadinadinataka ni Luve ni Kalou. (3) Era ivakadei ni ka ena cakava ena vukudra na kawatamata talairawarawa ni sa dabe o koya me Tui kei vuravura.—Maciu 14:14; Marika 2:10-12; Joni 5:28, 29.
6. Ni sa mate o Jisu, e vakaturi koya na Kalou ina bula vakayalo, qai lesu tale i lomalagi. (1 Pita 3:18) Ena dua na gauna e muri, sa qai buli koya me Tui na Kalou. Sa voleka oqo me kauta tani o Jisu na ca kei na rarawa kece mai vuravura.—Same 37:9-11; Vosa Vakaibalebale 2:21, 22.
[iYaloyalo ena tabana e 7]
Nona cakacaka vakaitalatala o Jisu e okati kina nona veivakavulici, cakamana, kei na nona solia sara ga nona bula ena vukuda