Wase Tinikava

E Dusimaka Vakacava Nona iSoqosoqo o Jiova?

1. Na cava e vakatakila na iVolatabu me baleta na isoqosoqo i Jiova, ia na cava e bibi kina oqori vei keda?

E TIKO beka na isoqosoqo ni Kalou? E tukuna na iVolatabu ni tiko. Bau vakatakila vakalailai vei keda o koya ena nona Vosa na iwasewase vakaitamera ni isoqosoqo oya e tiko mai lomalagi. (Isikeli 1:1, 4-14; Taniela 7:9, 10, 13, 14) Dina ni sega ni laurai, ia e tokoni ira vakalevu na dau sokalou dina era bula tu nikua. (2 Tui 6:15-17) E tiko tale ga na iwasewase rairai ni isoqosoqo i Jiova, e vuravura. E vakamacalataka na isoqosoqo oqori na iVolatabu kei na sala e dusimaka kina o Jiova.

Kilai Vakacava na iSoqosoqo Rairai?

2. Na cava na ivavakoso vou a tauyavutaka na Kalou?

² A ivavakoso tu ni Kalou me 1,545 na yabaki na matanitu o Isireli. (Cakacaka 7:38, VV) A sega ni muria dei o Isireli na lawa ni Kalou qai tini cakitaka na Luve ni Kalou. Mani cakitaka kina na ivavakoso oya o Jiova qai biuti ira tani vakadua. A kaya o Jisu vei ira na Jiu: “Raica, sa qai biu vei kemudou na nomudou vale me lala didi.” (Maciu 23:38) Mani tauyavutaka na Kalou e dua na ivavakoso vou, qai dua sara nona veiyalayalati vou kei ira. Mera na lewena na ivavakoso oya e 144,000, e digi ira na Kalou mera lai tomani Luvena i lomalagi.​—Vakatakila 14:1-4.

3. Na cava a yaco ena Penitiko 33 S.K. e vakaraitaka ni sa vakayagataka na Kalou e dua na ivavakoso vou?

³ Era lumuti ena yalo tabu i Jiova ena Penitiko ni 33 S.K., o ira na imatai mera lewe ni ivavakoso vou. Oqo na ka eda wilika me baleta na gauna vakatubuqoroqoro oya: “Ni sa yaco sara na siga ni Penitiko, era sa tiko lomavata ko ira kecega e na dua na tikina. Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, a sa vakasinaita na vale taucoko era sa tiko kina. A sa rairai vei ira na ka e vaka na veiyameyame ni buka waqa sa dui veisebayaki, a sa tiko yadua vei ira vakaaduaga. A ra sa vakasinaiti kecega e na Yalo Tabu.” (Cakacaka 2:1-4) E vakaraitaka vakamatata na yalo tabu ni sa vakayagataki ira na ilawalawa oqo na Kalou mera vakayacora na nona inaki ni dusimaki ira voli o Jisu Karisito mai lomalagi.

4. O cei nikua era lewe ni isoqosoqo rairai i Jiova?

⁴ Era se bula tiko ga edaidai e vuravura e dua na kena vo mai vei ira na le 144,000. Ia me vaka sa parofisaitaki oti, sa ra mai veitomani kei ira na vo ni lumuti e dua “nai soqosoqo levu” ni ‘so tani tale na sipi,’ era le vica na milioni. O Jisu na iVakatawa Vinaka, sa mai vakaduavatataki ira na so tani tale na sipi oqo kei ira na kena vo mera dua bau ga na qelenisipi, me qai kedra ivakatawa o koya. (Vakatakila 7:9; Joni 10:11, 16) O ira oqori era lewe kece ni dua bau na ivavakoso duavata, na isoqosoqo rairai i Jiova.

iSoqosoqo Liutaki Vakalou

5. O cei e dusimaka tiko na isoqosoqo ni Kalou, qai vakayacora vakacava oqori?

⁵ Na vosa e volai oqo ena iVolatabu, “nai soqosoqo lewe ni lotu ni Kalou bula” e dusia vakamatata na ivakarau ni kena liutaki. E liutaki vakalou. E vakayagataki Jisu o Jiova me dusimaki ira na nona tamata, e lesi Jisu me Ulu tawarairai ni ivavakoso. E vakarautaka tale ga na Kalou na nona Vosa volai, na iVolatabu mera dusimaki kina na nona tamata.​—1 Timoci 3:14, 15; Efeso 1:22, 23; 2 Timoci 3:16, 17.

6. (a) E laurai vakacava na veidusimaki vakalou vei ira na lewe ni ivavakoso ena imatai ni senitiuri? (b) E kilai vakacava ni se Ulu tiko ga ni ivavakoso o Jisu?

⁶ E laurai vinaka na veidusimaki oqori ena siga ni Penitiko. (Cakacaka 2:14-18, 32, 33) E laurai tale ga ena veidusimaki ni agilosi i Jiova me vunautaki yani i Aferika na itukutuku vinaka, vaka kina ena rogo ni domo i Jisu e vakavuna na tavuki i Saula na kai Tarisu, kei na gauna e dolava kina o Pita na cakacaka vakavunau vei ira na kai Matanitu Tani. (Cakacaka 8:26, 27; 9:3-7; 10:9-16, 19-22) Ia e yaco na gauna me sa sega tale ni rogo na domo mai lomalagi, ra sega tale ni raici na agilosi, sa oti tale ga na isolisoli mana e so ni yalo tabu. Ia sa yalataka oti o Jisu oqo: “Mo dou kila, au sa tiko vata kei kemudou e na veisiga kecega, ka yacova nai vakataotioti kei vuravura.” (Maciu 28:20; 1 Korinica 13:8) Era vakavinavinakataka na veidusimaki i Jisu na iVakadinadina i Jiova nikua. Ke sega oya, sa na sega tu ga ni vunautaki rawa na itukutuku vinaka ena kaukaua ni veitusaqati.

7. (a) O cei sara mada na “dauveiqaravi yalo dina ka vuku”? Na cava o tukuna kina oqori? (b) Na cava na ilesilesi i koya na “dauveiqaravi”?

⁷ Ni sa toro mai na gauna me mate kina o Jisu, a vakatakila vei iratou na nona tisaipeli ni na cadra mai e dua na nona “dauveiqaravi yalo dina ka vuku,” ena qai lesi vua e dua na itavi bibi. Ena tiko na “dauveiqaravi” oya ni sa na biubiu na Turaga me lesu i lomalagi qai cakacaka tiko ga vakaukaua ni sa lesu tawarairai mai na Karisito ena nona itutu vakatui ni Matanitu ni Kalou. Ke dina oqo, ena sega ni ganita e dua wale ga na tamata na kena ivakamacala na dauveiqaravi oya, ia e sota vinaka ga kei ira na lewe ni ivavakoso lumuti i Karisito. E vakatoka na ivavakoso oya me nona “dauveiqaravi” ni a volia ena nona dra. A lesia me vukea e so tale mera tisaipeli, me qai vakani ira oqori vakalalai ena “kedra kakana [vakayalo] e na kena gauna dodonu.”​—Maciu 24:45-47, VV; 28:19; Aisea 43:10; Luke 12:42; 1 Pita 4:10

8. (a) Na itavi cava soti e sa colata tiko nikua na dauveiqaravi yalodina? (b) Na cava e bibi kina meda ciqoma na ivakasala e vakadewataka tiko mai vei keda na dauveiqaravi yalodina?

⁸ A qarava vinaka tiko na cakacaka a lesi vua na dauveiqaravi yalodina ena gauna e lesu tawarairai mai kina na nona Turaga ena 1914, qai laurai ni levu tale na ka e nuitaki vua ena yabaki 1919. Ni oti na yabaki oya, e tete yani ina veiyasa i vuravura kece na vunautaki ni Matanitu ni Kalou, ra qai vakasoqoni tiko edaidai e dua na isoqosoqo levu era sokaloutaki Jiova mera na bula yani ena veivakararawataki levu. (Maciu 24:14, 21, 22; Vakatakila 7:9, 10) E yaga tale ga vei ira oqo na kakana vakayalo, qai nona cakacaka na dauveiqaravi yalodina me vakarautaka oqori vei ira. Ena marau o Jiova kevaka eda ciqoma na nona ivakasala e vakadewataka tiko mai vei keda na dauveiqaravi yalodina, da qai saga sara meda bulataka.

9, 10. (a) Ke sega ni matata e so na ivakavuvuli se gadrevi na veidusimaki me baleta na vunautaki ni itukutuku vinaka, o cei e dau vakatulewa kina ena imatai ni senitiuri? (b) O cei nikua e vakarautaka na veidusimaki maqosa me baleta na nodra cakacaka na tamata i Jiova?

⁹ So na gauna e dau votu na vakatataro me baleta e so na ivakavuvuli kei na sala me cicivaki kina na ka ena ivavakoso. Na cava e dau caka kina? Eda wilika ena Cakacaka wase e 15 na ivalavala e wali kina e dua na vakatataro me baleti ira na Kai Matanitu Tani era tavuki. Mani kau cake na vakatataro oya vei iratou na yapositolo kei ira na tagane matua e Jerusalemi era veiqaravi tiko ena dua na matabose liu, se ilawalawa dauvakatulewa. Sega ni kena ibalebale oqo nira sega ni dau cala o ira na ilawalawa tagane oya, ia a vakayagataki ira ga na Kalou. Era dikeva na veitikinivolatabu e tara na usutu oqo, era raica tale ga na ivakadinadina e dusia ni sa dolava na yalo tabu na sala mera rogoca tale ga kina na itukutuku vinaka na Kai Matanitu Tani. Oti, ra sa qai vakatulewa. A vakalougatataka na ituvatuva oya na Kalou. (Cakacaka 15:1-29; 16:4, 5) Sa qai lesia na ilawalawa dauvakatulewa e so mera lai vakatetea yani na itukutuku me baleta na Matanitu ni Kalou.

¹⁰ Ena noda gauna, eratou lewena tiko na iLawalawa Dauvakatulewa ni isoqosoqo rairai i Jiova na tacida eratou lumuti ena yalo tabu, eratou cavutu mai na dui vanua. Eratou tiko na ilawalawa oqo ena itikotiko liu ni iVakadinadina i Jiova. Ena veiliutaki i Jisu Karisito, e vakatetea na sokalou savasava na iLawalawa Dauvakatulewa ina veivanua kece ga, e dusimaka na nodra cakacaka vakavunau na iVakadinadina i Jiova era lewena e vica vata na udolu na ivavakoso. E tiko vei iratou na lewe ni iLawalawa Dauvakatulewa na rai vata ga e tiko vua na yapositolo o Paula, e vola vei ira na nona itokani lotu Vakarisito: “Ni kua ni nanuma ni keitou sa vialewa tiko ga yani na nomuni vakabauta, ka ni ko ni sa tudei tu e na nomuni vakabauta. Ia keitou via veivuke ga vei kemuni e na ka mo ni reki kina.”​—2 Korinica 1:24, VV.

11. (a) Era dau lesi vakacava na qase kei ira na dauveiqaravi vakaitalatala? (b) Na cava meda tokoni ira kina vakavoleka na tacida era lesi?

¹¹ O ira na iVakadinadina i Jiova e vuravura raraba era nuitaka na iLawalawa Dauvakatulewa me digitaki ira na tagane matua qai vakacolata vei ira mera dau lesi ira na qase kei na dauveiqaravi vakaitalatala mera qarava na ivavakoso. Na ivakatagedegede mera yacova o ira na lesi e volai tu ena iVolatabu, qai sega ni guilecavi kina nira tamata ivalavala ca ra qai dau cala tale ga. Sa itavi bibi dina e vakacolata na Kalou vei ira na qase era na vakatura e dua, kei ira era na vakatulewataka na nona lesi. (1 Timoci 3:1-10, 12, 13; Taito 1:5-9) Era dau kerea gona ena masu na veivuke ni yalo tabu ni Kalou ra qai qara ivakasala mai na nona Vosa volai. (Cakacaka 6:2-4, 6; 14:23) Meda marautaki ira mada ga na ‘isolisoli tamata’ oqo era dau vukei keda “me da lomavata e na vakabauta.”​—Efeso 4:8, 11-16.

12. E vakayagataki ira vakacava na yalewa o Jiova ena nona isoqosoqo?

¹² E dusia na iVolatabu ni dodonu mera raica na cicivaki ni ka ena ivavakoso o ira na tagane. Sega ni kena ibalebale nira beci kina na yalewa, ni so vei ira era wili mera itaukei ni Matanitu vakalomalagi, qai dua na iwase levu ni cakacaka vakavunau era cakava tiko. (Same 68:11, NW) Nira qarava tale ga ena yalodina na yalewa na nodra itavi mai vale, ena lai rogo vinaka cake kina na ivavakoso. (Taito 2:3-5) Ia e nodra itavi na tagane era lesi mera veivakavulici ena ivavakoso.​—1 Timoci 2:12, 13.

13. (a) Me vaka e tukuni ena iVolatabu, na rai cava me tiko vei ira na qase me baleta na nodra itutu? (b) Na itavi dokai cava eda rawa ni vakaitavi kece kina?

¹³ Ni dua e vakaitutu levu toka e vuravura, sa bau ka dokai dina oya, ia ena loma ni isoqosoqo i Jiova, na tikina oqori e raici vaka oqo: “Ko koya e lailai duadua vei kemudou kece sa i koya ga e levu duadua.” (Luke 9:46-48, VV; 22:24-26) Era vakasalataki na qase ena iVolatabu mera kua ni viavia turaga vei ira na qelenisipi ni Kalou, ia mera ivakaraitaki vinaka ga vei ira. (1 Pita 5:2, 3, VV) E sega ni le vica ga era kalougata mera matataki koya na Turaga Sau ni lomalagi kei vuravura, ia o ira kece na iVakadinadina i Jiova, tagane kei na yalewa, e nodra na itavi dokai mera vosa ena yacana ena dela ni yalomalumalumu ra qai tukuna vei ira na tamata kece na itukutuku ni nona Matanitu.

14. Vakayagataka na veitikinivolatabu era sega ni lavetaki mo vakalewa kina na taro era volai tiko ena icavacava ni parakaravu.

¹⁴ De vinaka meda dui tarogi keda ena taro oqo: ‘Au ciqoma beka, au doka tale ga na ivalavala e dusimaka tiko kina na nona isoqosoqo rairai o Jiova? E laurai beka oqori ena noqu itovo, ena ka au tukuna, kei na noqu ivalavala?’ Mo sauma rawa na rua na taro oqo, tei vakasamataka mada e vica na tikina e toka oqori e ra.

Keu rokovi Karisito dina me Ulu ni ivavakoso, na cava e dodonu meu cakava me vaka e tukuni tiko ena veitikinivolatabu oqo? (Maciu 24:14; 28:19, 20; Joni 13:34, 35)

Niu ciqoma ena marau na isolisoli vakayalo e dau vakarautaka mai na dauveiqaravi yalodina kei na kena iLawalawa Dauvakatulewa, o cei au sa rokova tiko? (Luke 10:16)

Na ivalavala cava e dodonu mera vakaivalavalataki ira kina na lewe kece ni ivavakoso, vakabibi o ira na qase? (Roma 12:10)

15. (a) Na noda doka na isoqosoqo rairai i Jiova ena vakaraitaka na cava? (b) Na cava meda cakava meda vakaraitaka ni dau lasulasu na Tevoro da qai vakamarautaki Jiova kina?

¹⁵ E vakayagataka tiko nikua o Jiova na nona isoqosoqo rairai, e kena iliuliu o Jisu, meda dusimaki kina. Na noda doka na ituvatuva oqo ena vakaraitaka se veiliutaki cecere i cei eda tutaka. (Iperiu 13:17) Na nona ile o Setani ni o keda eda dau nanumi keda ga. Ia kevaka eda cakava na ka e gadrevi me caka da qai saga meda kua ni vakabibitaki keda vakasivia, eda na vakaraitaka tiko e keri ni dau lasulasu na Tevoro. Eda na vakamarautaki Jiova kevaka eda lomani ira da qai dokai ira na veiliutaki tiko ena keda maliwa, da qai sega ni ‘cavilaki ira meda rawata kina na ka eda vinakata.’ (Juta 16, VV; Iperiu 13:7) Kevaka eda yalodina ina isoqosoqo i Jiova, eda sa vakaraitaka tiko e keri ni o Jiova e noda Kalou, nida duavata tale ga ena noda sokaloutaki koya.​—1 Korinica 15:58.

Railesuvi

• Na cava na isoqosoqo rairai i Jiova nikua? Na cava na kena inaki?

• O cei e lesi me Ulu ni ivavakoso, ia e vakayagataka tiko na cava o koya meda dusimaki kina vakayalololoma?

• Me dau vakacava na noda ivalavala vei ira kece sara era lewena na isoqosoqo i Jiova?

[iYaloyalo ena tabana e 133]

E vakayagataka o Jiova na nona isoqosoqo rairai, e kena iliuliu o Karisito, me dusimaki keda