Doka na iTavi i Karisito ena iTuvatuva vaKalou

“ENA ivakatekivu, e bulia na lomalagi kei na vuravura na Kalou.” E “totoka dina” na veika kece e bulia. (Vkte. 1:1, 31) E bulia o Jiova na tamata qai vakarautaka na veika kece me totoka kina vakaoti na bula ena veigauna se bera mai. Ia e vakaleqa na bula marau ni kawatamata na veivorati mai Iteni. E sega ga ni veisau na inaki i Jiova me baleta na vuravura kei na kawatamata. E tukuna o Jiova nira na vakabulai na kawa i Atama era talairawarawa. Na Kalou ena vakalesuya mai na sokalou dina, ena qai vakarusa na vunica kei na nona cakacaka kece. (Vkte. 3:15) Ena vakalesui na ka kece me “totoka dina.” Ena vakayacora qo o Jiova ni vakayagataki Luvena o Jisu Karisito. (1 Joni 3:8) Bibi gona meda doka na itavi i Jisu ena vakayacori ni inaki ni Kalou.—Caka. 4:12; Fpai. 2:9, 11.

ITAVI I KARISITO

² Nida vakasamataka na itavi i Karisito ena ituvatuva ni Kalou, eda kila ni levu na ka e vauci ena nona itavi. E noda iVakabula o Jisu, e Bete Levu, e Ulu ni ivavakoso vaKarisito, ena gauna qo sa Tui tiko ni Matanitu ni Kalou. Nida vakasamataka na itavi kece oya, eda na vakavinavinakataka na ituvatuva ni Kalou, eda na lomani Karisito Jisu tale ga vakalevu. E vakamacalataki vakavinaka na itavi kece qo i Jisu ena iVolatabu.

³ E macala ena cakacaka vakaitalatala i Karisito ni vukuna ga era na veiyaloni tale kina kei na Kalou o ira na talairawarawa. (Joni 14:6) Ni noda iVakabula o Jisu, e solia kina nona bula me keda ivoli. (Maciu 20:28) E sega wale ga ni vakaraitaka o Jisu na ivakarau ni bula vakalou. E vakayagataki koya sara ga o Jiova me vakayacora nona inaki vei keda na kawatamata. Ena vukuna ga eda veiyaloni tale kina kei na Kalou. (Caka. 5:31; 2 Kor. 5:18, 19) Na nona mate vakaisoro qai vakaturi e dolava kina na katuba ni veivakalougatataki tawamudu vei ira na talairawarawa ni sa veiliutaki na Matanitu ni Kalou.

⁴ Ni noda Bete Levu o Jisu, e “sega ni nanuma na noda malumalumu,” e sorovaka tale ga na noda ivalavala ca na nona imuri yalayala e vuravura. E kaya na yapositolo o Paula: “E sega ni noda bete levu o koya e sega ni nanuma na noda malumalumu, o koya ga e vakatovolei ena ka kece me vakataki keda, ia e sega ni bau ivalavala ca.” E mani uqeti ira era vakabauti Jisu Karisito o Paula mera vakayagataka vinaka sara na ituvatuva e vakarautaka qo na Kalou mera veiyaloni kina kei koya, ni kaya: “O koya gona, meda torova na idabedabe vakaturaga ni loloma soli wale, meda doudou ni masuta na Kalou me lomani keda, me sobuti keda tale ga na nona loloma soli wale ena gauna eda gadreva kina na veivuke.”—Iper. 4:14-16; 1 Joni 2:2.

⁵ E Ulu tale ga ni ivavakoso vaKarisito o Jisu. Me vakataki ira ga na nona imuri ena imatai ni senitiuri, e sega ni vinakati tale ga nikua me dua noda iliuliu vakatamata. E dau veidusimaki nikua o Jisu ni vakayagataka na yalo tabu, kei ira na ivakatawa ena ivavakoso. O ira na ivakatawa qo era na saumitaro vua, era na saumitaro tale ga vua na Tamana vakalomalagi, nira qarava tiko na qelenisipi ni Kalou. (Iper. 13:17; 1 Pita 5:2, 3) A parofisaitaka o Jiova me baleti Jisu: “Raica! Au lesi koya me ivakadinadina vei ira na veimatanitu, me nodra iliuliu kei na nodra turaga na veimatanitu.” (Aisea 55:4) A tukuna o Jisu ni vakayacori sara ga vua na parofisai oya ni kaya vei ratou nona tisaipeli: “Ni kua ni vakatokai tale ga moni iliuliu, ni dua ga nomuni iLiuliu, o Karisito.”—Maciu 23:10.

⁶ E vakaraitaka o Jisu na nona rai kei na nona via vukei keda dina ni kaya: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu. E veivakacegui na noqu ivua, e mamada tale ga na noqu icolacola.” (Maciu 11:28-30) Ni yalomalua o Jisu me qarava na veika e vauca na ivavakoso vaKarisito me veivakacegui tale ga, e vakaraitaka kina ni “ivakatawa vinaka” me vakataki Tamana vakalomalagi, na Kalou o Jiova.—Joni 10:11; Aisea 40:11.

⁷ E vakamacalataka o Paula ena imatai ni nona ivola vei ira mai Korinica e dua tale na itavi i Jisu Karisito, e kaya: “Ni dodonu me veiliutaki tiko vakatui me yacova nira sa vakamalumalumutaki kece na meca e ruku ni yavana. Ni sa na vakamalumalumutaki na ka kece vua, ena qai vakamalumalumutaki koya tale ga na Luvena vei koya a vakamalumalumutaka na ka kece vua, me rawa ni ka kece ga na Kalou vei ira na tamata kece.” (1 Kor. 15:25, 28) Ni bera ni mai bula e vuravura o Jisu, a veiqaravi tu mai lomalagi me “matai ligamaqosa” ni Kalou. E imatai sara ga ni ibulibuli ni Kalou. (Vkai. 8:22-31) Ni talai mai vuravura, a vakayacora tiko ga na loma ni Kalou. E vosota na veivakatovolei dredre duadua, oya nona vakamatei kei na nona yalodina tiko ga vei Tamana. (Joni 4:34; 15:10) A vakaicovitaki o Jisu ni yalodina vua na Kalou me yacova na mate. A vakaturi koya kina na Kalou i lomalagi qai solia vua na lewa me Tui ni Matanitu vakalomalagi. (Caka. 2:32-36) Ni Tui ni Matanitu ni Kalou o Jisu Karisito, e nona itavi lagilagi me liutaka na mataivalu kaukaua vakayalo mera kau tani e vuravura na veiliutaki vakatamata ra qai cavuraka laivi na veika ca kece. (Vkai. 2:21, 22; 2 Ces. 1:6-9; Vkta. 19:11-21; 20:1-3) Ena qai liutaki vuravura duadua ga na Matanitu vakalomalagi ni Kalou e kena Tui o Jisu Karisito.—Vkta. 11:15.

IBALEBALE NI NODA DOKA NA ITAVI I KARISITO

⁸ E uasivi na nona iVakaraitaki o Jisu Karisito, e lesi me qaravi keda. Me rawa ni yaga vei keda na itavi i Jisu, ena vinakati meda yalodina tiko ga vei Jiova qai toso vata tiko kei na nona isoqosoqo.

⁹ O ira na imuri i Jisu ena imatai ni senitiuri era doka na itavi bibi i Karisito ena kena vakayacori na inaki ni Kalou. Qori nira vakarorogo ina nona veiliutaki, mera vakamalumalumu ena veidusimaki ni yalo tabu. (Caka. 15:12-21) A cavuta na yapositolo o Paula na nodra duavata na ivavakoso lumuti: “Ena noda tukuna na ka dina, me uqeti keda tiko ga na noda loloma meda tubu cake kina ena ka kece, meda duavata kei koya na uluda, na Karisito. Era sema vata vei koya na tikiniyago kece ra qai vakarautaki mera cakacaka vata na isema yadua. Nira cakava vinaka nodra itavi na veitikiniyago, ena tubu kina na yago taucoko qai vakatubura na loloma.”—Efeso 4:15,16.

¹⁰ Nira cakacaka vata o ira yadua ena ivavakoso mera doka na veiliutaki i Karisito, ena bulabula vakayalo na ivavakoso, era na veilomani tale ga ni qo “na ivau vinaka duadua ni duavata.”—Joni 10:16; Kolo. 3:14; 1 Kor. 12:14-26.

¹¹ Sa yaco tiko e levu na ka e parofisaitaki ena iVolatabu. Qo e vakaraitaka ni sa tekivu veiliutaki o Jisu ena Matanitu ni Kalou ena 1914. Sa veiliutaki sara tiko ga ena kedra maliwa na kena meca. (Same 2:1-12; 110:1, 2) Cava eda vulica kina? Sa voleka me vakaraitaka o Jisu nona kaukaua ni o koya na nodra Tui na tui, e nodra Turaga na turaga, ni sa na mai vakatauca na lewa ni Kalou vei ira na kena meca. (Vkta. 11:15; 12:10; 19:16) Sa voleka me vakayacori na ka e yalataka taumada o Jiova ena ivakatekivu, oya me vakabulai ira na talairawarawa ena vuku i Karisito. (Maciu 25:34) Eda marau nida doka na itavi i Karisito ena vakayacori ni inaki ni Kalou! Meda duavata mada ga ni vakaitavi ena cakacaka vakaitalatala ena veiliutaki i Karisito ena iotioti ni veisiga qo.