Na Sala e Rawa ni Vukei Keda Kina o Jisu Karisito

E VAKATUBUQOROQORO dina na veika a cakava e vuravura o Jisu Karisito me vukei ira kina na tamata. Ni vakananuma lesu e dua a vakadinadinataka sara ga na bula i Jisu, e vakadeitaka ena nona kaya kina: “Sa vuqa talega na ka tani sa cakava ko Jisu, ia kevaka sa volai kecega, au sa vakasama ni na oso ko vuravura e na veivola ena volai.” (Joni 21:25) Ena rawa nida taroga ena vuku ni levu ni ka a cakava e vuravura o Jisu: ‘Ena vukei keda rawa vakacava ni sa lai tu mai lomalagi? Ena yaga vakacava vei keda ena gauna oqo na nona dauveikauaitaki?’

E veivakacegui dina qai veiuqeti na kena isau. E kaya na iVolatabu ni o Karisito e “sa curu sara ki na lomalagi dina, me rairai ki na mata ni Kalou e na vukuda.” (Iperiu 9:​24, VV) Na cava e lai cakava ena vukuda? E vakamacalataka na yapositolo o Paula: “Sa curu vakadua ga ko Karisito ki na Loqi Tabu Sara [“ki na lomalagi dina”] ka sega ni kauta na dra ni me kei na dra ni luve ni bulumakau ia na nona dra vaka i koya sara ga, ka sa rawata kina me solia vei keda na bula tawa mudu.”​—Iperiu 9:​12, VV; 1 Joni 2:2.

Sa dua na itukutuku rogo vinaka! E sega ni muduki kina na cakacaka vakatubuqoroqoro i Jisu ena vukuda, ia sa qai levu ga na ka e cakava ena vuku ni kawatamata ni sa vakaturi i lomalagi. E rawa oqori mai na loloma soli wale ni Kalou, e digitaki Jisu kina me dua “sa cakacaka tiko vaka Bete Levu”​—“e na liga i matau ni i tikotiko vakaturaga i Koya sa Cecere Sara mai lomalagi.”​—Iperiu 8:​1, 2, VV.

“Dua sa [Dauveiqaravi] Tiko Vaka Bete Levu”

Sa dua na dauveiqaravi ni Kalou mai lomalagi o Jisu ena vuku ni kawatamata. Na nona itavi e vaka na kena a dau cakava na bete levu e Isireli me baleti ira na tamata ni Kalou ena gauna e liu. Na cakacaka cava oya? E vakamacalataka o Paula: “Ni ra sa lesi kecega na bete levu me vakacabora nai madrali kei nai soro: o koya oqo sa dodonu talega kina vei koya na bete levu oqo me dua na ka me vakacabora.”​—Iperiu 8:3.

E cabora o Jisu e dua na ka e uasivi sara mai na kena a cabora na bete levu ni gauna makawa. “Ia kevaka sa yaga na dra ni pulumokau kei na me” me bau veivakasavasavataki vakayalo e Isireli makawa, “ena vakatanievei na dra nei Karisito, . . . ena sega beka ni rawarawa sara me vui laivi kina na nomudou lewa-eloma mai na cakacaka sa ka ni mate, mo dou qarava na Kalou bula?”​—Iperiu 9:​13, 14.

O Jisu tale ga e dua na dauveiqaravi vinaka vakaoti ni Kalou, me vaka ni sa soli oti vua na isolisoli me kakua tale ni mate rawa. E levu e Isireli makawa “era lesi me ra bete, era sa lewe vuqa, ni sa tarova na nodra tiko na mate.” Ia e vakacava ga o Jisu? E vola o Paula: “Ko koya oqo, sa sega ni vakaisosomitaki na nona cakacaka vakabete, . . . o koya oqo sa rawarawa kina vua me vakabulai ira sara era sa lako mai vua na Kalou e na vukuna, ni sa bula tikoga ko koya me masulaki ira.” (Iperiu 7:​23-25; Roma 6:9) Sa tiko dina ena yasa imatau ni Kalou mai lomalagi e dua na bete levu ‘sa bula tiko me masulaki keda.’ Vakasamataka mada na kena ibalebale oqori vei keda ena gauna oqo!

Era tabili yani vakayauyau na tamata vei Jisu ena gauna ni nona bula e vuravura mera qara veivuke, era taubaletaka ena so na gauna na sala yawa mera rawata kina na veivuke oqori. (Maciu 4:​24, 25) E rawarawa sara mera torovi Jisu na veivanua ena nona sa tiko mai lomalagi. E torovi rawarawa o koya me vaka e dua na dauveiqaravi ni Kalou ena nona itutu veiganiti mai lomalagi.

E Mataqali Bete Levu Vakacava o Jisu?

Na itukutuku kei Jisu Karisito me vaka e vakamacalataki ena Kosipeli e sega ni vakatitiqataki kina na nona dauveivuke kei na nona dauveikauaitaki. A sega ni kauaitaka na veika e baleti koya ga! Vakavica me vakasosataki ena gauna eratou gadreva dina kina na vakacegu kei iratou nona tisaipeli. A sega ni dua na ka vua ni dau vakataotaki nona gauna ni vakacegu ni “lomani ira” dina na tamata era mai kere veivuke vua. O Jisu e dau “vakacegui ira” na ivalavala ca era gadreva dina nona veivuke, e dina ni dau oca, viakana, se viagunu, e dau bolea sara ga me kua ni kana ena nona vakayacora oqo.​—Marika 6:​31-34; Luke 9:​11-17; Joni 4:​4-6, 31-34.

Ni uqeti koya nona lomani ira na tamata, a vakaceguya sara ga o Jisu nodra leqa vakayago, vakayalo, kei na nodra vakasama. (Maciu 9:​35-38; Marika 6:​35-44) Kuria oqori na nona vakavulici ira mera kunea na veivakacegui tawamudu. (Joni 4:​7-30, 39-42) Me kena ivakaraitaki mada, sa bau veivakayarayarataki dina na nona vosa ni veisureti: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou. Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou.”​—Maciu 11:​28, 29.

Sa vakaitamera dina na nona lomani ira na tamata o Jisu e qai yaco me solia nona bula ena vukudra na kawatamata ivalavala ca. (Roma 5:​6-8) E vakamacalataka kina na yapositolo o Paula: “O koya [na Kalou o Jiova] ka a sega ni bureitaka na Luvena dina, ka ni a soli koya ga e na vukuda kece, e na sega li ni solia wale ga vei keda na ka kece ga? . . . Sa i Jisu Karisito ga ka a mate; a sa vakaturi cake tale, sa tiko e na liga i matau ni Kalou e daidai ka sa dau vakamamasu tiko vua na Kalou ko koya e na vukuda.”​—Roma 8:​32-34.

E Dua na Bete Levu e Kauaitaka Noda Leqa

Ni a bula vakatamata, a sotava o Jisu na waloloi, karamaca, dadaga ni yago, yaluma, momosi, kei na mate. Ena nona vakila na nuiqawaqawa kei na dredre ni bula, sa vakarautaki koya vakatabakidua sara tiko ga kina ina nona itavi me noda Bete Levu ni kawatamata vakaloloma oqo. A vola o Paula: “O koya oqo sa kilikili kina kei koya [o Jisu], me yaco me vakataki ira na wekana e na ka kecega, me bete levu yalovinaka ka lomadina e na veika ni Kalou, me sorovaka na nodrai valavala ca na tamata. Ni sa vosota na ka ca ko koya, ni sa dauveretaki, sa qai rawata kina me vukei ira era sa dauveretaki.”​—Iperiu 2:​17, 18; 13:8.

A vakaraitaka o Jisu ni sa rawata na ivakatagedegede e ganiti koya tale ga me vukea na kawatamata mera toro voleka vua na Kalou. Kena ibalebale beka oqo ni Kalou e vakamasuta tiko e dau cudrucudru, tawayalololoma qai sega ni veivosoti rawa? Sega sara, ni vakadeitaka na iVolatabu ni “vinaka o Jiova qai tu vakarau me veivosoti.” E kaya tale ga: “Kevaka eda sa vakatusa na nodai valavala ca, sa yalodina ka yalododonu ko koya me bokoca na nodai valavala ca, ka vakasavasavataki keda mai na ka kecega sa sega ni dodonu.” (Same 86:​5, NW; 1 Joni 1:9) E dina sara ni vosa ni veivakacegui i Jisu kei na ka e cakava e sa vakamuria sara ga vakavinaka na dau veikauaitaki i Tamana, na nona yalololoma, kei na nona yalovinaka.​—Joni 5:19; 8:28; 14:​9, 10.

E veivakacegui vakacava o Jisu vei ira na tamata ivalavala ca era sa veivutuni? Ena nona vukei ira mera kunea na marau kei na vakacegu ena nodra sasagataka vakaidina mera vakamarautaka na Kalou. E umana vata o Paula na vakasama oqo ena nona vola vei ira nona itokani vakarisito lumuti: “Ia ni sa dua na noda bete levu, o koya ka curu ki lomalagi, o Jisu na Luve ni Kalou, tou taura matua na noda lotu. Ni sa sega ni noda bete levu ko koya sa sega ni lomani keda rawa ni da sa malumalumu; ia sa dauveretaki vakatautauvata e na ka kecega ko koya, ia ka sega na nona cala. E na vuku ni ka oqori tou toro doudou kina ki nai tikotiko-vakaturaga loloma, me da vinakati kina, me da lomani talega ka vukei e na gauna e yaga kina.”​—Iperiu 4:​14-16.

“Vukei e na Gauna e Yaga Kina”

Na cava ga e rawa nida cakava nida sotava na veileqa lelevu e so eda nanuma nira sa na sega ni wali rawa​—na tauvimate bibi, ora na lomada nida cakacala, na yalolailai, kei na lomabibi? E rawa nida vakayagataka na ivukevuke e dau vakayagataka sara ga vakawasoma o Jisu​—na isolisoli talei ni masu. Me kena ivakaraitaki, ena bogi ni se bera ni solia yani nona bula ena vukuda, “sa masu vagumatua cake kina: ia na nona buno sa vaka na titiri ni dra ni sa lutu ki na qele.” (Luke 22:44) Sa dina, e kila vinaka sara ga o Jisu na ivakarau ni lomana e dua ni masu vagumatua vua na Kalou. E “cabora oti na kerekere, kei na masumasu, kei na tagi vakararawa, ni sa vakawai na matana, vua sa rawata me vakabulai koya mai na mate, a sa rogoci ga e na ka sa rerevaka ko koya.”​—Iperiu 5:7.

E kila vinaka o Jisu na kena bibi vua na tamata me “rogoci” qai vakaukauataki. (Luke 22:43) E qai kuria ni yalataka: “A ka kecega dou na kerea vei Tamaqu e na yacaqu, ena solia vei kemudou ko koya. . . . Dou kerekere, dou na qai rawata, me levu sara na nomudou marau.” (Joni 16:​23, 24) Sa na rawa gona meda kerekere vua na Kalou ena yalodei ni na vakadonui Luvena me vakayagataka nona kaukaua kei na yaga ni isoro ni veivoli ena vukuda.​—Maciu 28:18.

E rawa nida vakadeitaka kina ni na vakarautaka o Jisu na veivuke veiganiti ena kena gauna ena nona itutu mai lomalagi. Kena ivakaraitaki, ke da ivalavala ca da qai veivutunitaka dina, e rawa ni solia vei keda na vakacegu ni “sa dua na noda Dautataro [se, “Dauveivuke,” NW] vei Tamada, ko Jisu Karisito, na yalododonu.” (1 Joni 2:​1, 2) Ena vakatutusa ena vukuda na noda Dauveivuke kei na Dauveivakacegui mai lomalagi me rogoci na noda masu ena yacana ni salavata kei na iVolatabu.​—Joni 14:​13, 14; 1 Joni 5:​14, 15.

Meda Vakavinavinakataka na Veivuke i Karisito

E levu na ka e vauci ena noda masuta na Kalou ena yaca i Luvena. Ena yaga ni isoro ni veivoli, “sa voli keda na Karisito,” sa qai yaco kina me “Turaga sa voli ira” na kawatamata. (Kalatia 3:13; 4:5; 2 Pita 2:1) Sa rawa nida vakaraitaka na noda vakavinavinakataka na veika kece e cakava vei keda na Karisito mai na noda vakadeitaka na nona veisureti: “Kevaka e dua sa via muri au, me kakua ni muria na lomana, ia me colata ga na nona kauveilatai e na veisiga, ka muri au.” (Luke 9:23) E sega ni ka me tukuni wale ga ‘me kakua ni muri lomana’ e dua ni sa veisau o koya e lewai koya. Me kilai tiko ni o Karisito e “mate . . . e na vuku ni tamata kecega, me ra kakua ni bula tiko me yaga vei ira ga, ko ira era sa bula, me ra yaga ga vua sa mate e na vukudra.” (2 Korinica 5:​14, 15) O koya gona, na noda vakavinavinakataka na ivoli ena dodonu me laurai ena ituvaki ni noda rai, noda isausau, kei na ivakarau ni noda bula. Na noda dinau tawamudu vei “Jisu Karisito, o koya ka soli koya ena vukuda,” e dodonu me yavalati keda meda vulica e levu na ka baleti koya kei na Tamana dau loloma, na Kalou o Jiova. E dodonu tale ga meda tubu cake ena vakabauta, meda bulataka na ivakatagedegede yaga vakalou, meda qai “lomakatakata e na cakacaka vinaka.”​—Taito 2:​13, 14; Joni 17:3.

Na ivavakoso vakarisito sa i koya na idewadewa ni noda ciqoma na kakana vakayalo ena kena gauna dodonu, veivakayaloqaqataki, kei na veidusimaki. (Maciu 24:​45-47, VV; Iperiu 10:​21-25) Kena ivakaraitaki, ke dua e tauvimate vakayalo ena rawa ni “kacivi ira na qase [qase ni ivavakoso digitaki] ni soqosoqo lewe ni lotu.” E qai kuria ni vakadeitaka o Jemesa: “Ia na masu ni vakabauta ena vakabulai koya sa tauvi-mate, ka na vakabulai koya na Turaga [o Jiova], ia kevaka ka kitaka nai valavala ca, ena sega ni cudruvi kina.”​—Jemesa 5:​13-15.

Me kena i vakaraitaki: A volavola e dua na tagane a kaivesu tu mai Sauca Aferika me vakaraitaka na nona vakavinavinaka vua e dua na qase ni ivavakoso me baleti ira “na iVakadinadina i Jiova taucoko era tomana tiko na cakacaka vinaka a tekivutaka o Jisu Karisito ena nodra vagolei mai na tamata ina Matanitu ni Kalou.” Qai kuria: “E vuabale na noqu marau niu sa mai taura na nomu ivola. E tarai au sara ga vakatitobu na nomu kauaitaka na noqu bula vakayalo. E vakavuna meu sa tekivu kauai ena nona vinakata na Kalou o Jiova meda veivutuni. Au a vakayayamo voli ena loma ni 27 na yabaki ena butobuto ni ivalavala ca, veidabui, lasa vakaveitalia, ivalavala dukadukali, kei na veimataqali lotu veilecayaki. Niu mai veikilai kei ira na iVakadinadina i Jiova, au sa qai vakila niu sa kunea na sala​—na sala dina! Sa qai vo ga meu muria.”

Levu Tale na Veivuke Era se Bera Mai

E vakadeitaka na kena sa torosobu tiko ga na ituvaki kei vuravura nida sa bula donuya na gauna vakairogorogo duadua, ena qai tarava mai na kacabote ni “veivakararawataki levu.” Ena gauna sara ga oqo, e dua na isoqosoqo levu sara mai na veivanua kece, veimataqali, veimatanitu, kei na duivosavosa era sa “sava nodrai sulu, ka vakavulavulataka e na dra ni Lami.” (Vakatakila 7:​9, 13, 14; 2 Timoci 3:​1-5) Nira sa vakabauta na isoro ni veivoli i Jisu, e sa mai bokoci kina na nodra ivalavala ca, era sa vukei tale tiko ga mera veiwekani voleka kei na Kalou​—era sa mai nona itokani sara ga.​—Jemesa 2:23.

Na Lami, o Jisu Karisito, ena “tuberi ira [na bulata na veivakararawataki levu] ki nai vurevure ni wai bula: ia ena tavoya kecega na Kalou na wai ni mata mai na matadra.” (Vakatakila 7:17) Sa na qai vakacavara kina na Karisito na nona itavi vakabete levu. Ena qai vukei ira kina na itokani ni Kalou me yaga vei ira “nai vurevure ni wai bula”​—vakayalo, vakayago, nodra vakasama, e lomadra tale ga. Sa na qai vakacavari me uasivi sara na veika a tekivutaka o Jisu ena 33 S.K., e qai lai vakuria tiko mai lomalagi mai na gauna oya me yacova mai oqo.

O koya gona, meda kua sara ni guce ena noda vakavinavinakataka na veika erau sa cakava oti vei keda na Kalou kei Karisito​—kei na veika erau sa cakava tiko​—me baleti keda. E veiuqeti na yapositolo o Paula: “Dou reki tikoga vua na Turaga. . . . Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.”​—Filipai 4:​4, 6, 7.

E tiko e dua na sala vakasakiti meda vakavinavinakataki Jisu Karisito kina, na noda Dauveivuke mai lomalagi. Ni sa dromu na siga ena Vukelulu, 19 Epereli, 2000, era na vakasosoqoni vata kina na iVakadinadina i Jiova e vuravura raraba mera vakananuma na mate i Karisito. (Luke 22:19) Oqo e dua na sala me vakatitobutaki kina na nomu vakavinavinakataki Jisu Karisito na isoro ni veivoli. Oni sureti mo ni mai rogoca na ituvatuva totoka ni veivakabulai ni Kalou ena vuku i Karisito ena rawa ni tawamudu kina na kena yaga vei kemuni. Yalovinaka mo ni qai veitaratara kei ira na iVakadinadina i Jiova ena vanua oni vakaitikotiko kina me rawa ni oni kila na gauna kei na vanua ni soqoni bibi oqo.

[iYaloyalo ena tabana e 7]

E kila vinaka tu o Jisu na ibalebale ni masu vagumatua vua na Kalou

[iYaloyalo ena tabana e 8]

Ena veivuke na Karisito meda walia na leqa eda sega ni walia rawa vakataki keda

[iYaloyalo ena tabana e 9]

E vukei keda o Karisito ena nona vakayagataki ira na qase ni ivavakoso dau loloma