Ena Gauna Dredre, Nuitaki Jiova Vakatabakidua

“A nodai drodro kei na noda kaukauwa na Kalou, sa voleka sara me vukei keda ni da sa rarawa.”​—SAME 46:1.

1, 2. (a) Na ivakaraitaki cava e dusia ni sega ni rauta wale ga meda kaya nida nuitaka na Kalou? (b) Na cava meda kua ni kaya wale ga kina nida nuitaki Jiova?

E RAWARAWA ga na tukuni ni nuitaki na Kalou, ia e sega ni laurai ena veika e caka. Dua na kena ivakaraitaki vinaka na vosa “Neimami iNuinui na Kalou,” sa dede na kena volai se ceuti ena ilavo ni Mereke.a Mai na 1956 sara, e vakadonuya na bose lawa ni matanitu o Mereke me sa nodra ibole ni matanitu na vosa oqo. Ia e lasa nida vakasamataka ni levu e kea​—vaka kina ena veiyasa i vuravura​—era vakanuinui ga vakalevu ena ilavo kei na iyau vakayago. Era sega ni vakanuinui vua na Kalou.​—Luke 12:​16-​21.

² Nida lotu Vakarisito dina, me kua nida kaya wale ga nida nuitaki Jiova. Me vaka ni ‘mate na vakabauta ni sa takali na cakacaka,’ ena mate vaka kina na noda kaya nida nuitaka na Kalou, ia e sega ni laurai ena ka eda cakava. (Jemesa 2:​26) Ena ulutaga sa oti, eda vulica kina ni noda nuitaki Jiova e laurai ena noda toro vua ena masu, na noda qara ivakasala ena nona Vosa, kei na noda rai ina nona isoqosoqo me veidusimaki. Meda dikeva mada na sala e rawa nida vakayagataka kina e tolu na tikina oqo ena gauna dredre.

Vakacegui Mai na Cakacaka se Lailai na iLavo

3. Na tadre ni bula vakailavo cava era sotava na tamata i Jiova ena “gauna cacamatua” oqo? Eda kila vakacava ni tu vakarau na Kalou me vukei keda?

³ Ena “gauna cacamatua” oqo, eda na sotava na lotu Vakarisito na tadre ni bula vakailavo era sotava e so tale. (2 Timoci 3:​1, NW) Koya gona, meda namaka ni rawa nida na vakacegui vakasauri mai na noda cakacaka. Ke sega, eda na cakacaka ga vakabalavu ia sa na lailai na keda isau. Ena ituvaki vaka oqo, ena rairai dredre kina meda ‘qaravi ira na noda lewenivuvale.’ (1 Timoci 5:​8, VV) E tu vakarau beka na Kalou Cecere Sara me vukei keda ena gauna vaka oqo? Io! Me kua ga nida nanuma ni o Jiova ena tarova na veika dredre kece e sotavi ena ivakarau ni bula nikua me kua ni tarai keda. Ia, kevaka eda nuitaki koya, eda na qai vakila na dina ni Same 46:1: “A nodai drodro kei na noda kaukauwa na Kalou, sa voleka sara me vukei keda ni da sa rarawa.” Eda na vakaraitaka vakacava nida nuitaki Jiova vakatabakidua ke da sotava na bula dredre vakailavo?

4. Nida leqa vakailavo, na cava e rawa nida masulaka, ia ena sauma vakacava o Jiova na masu vaka oqo?

⁴ Dua na sala eda na vakaraitaka kina nida nuitaki Jiova oya na noda torovi koya ena masu. Ia na cava eda na masulaka? Nida sotava tu na leqa vakailavo, e sega ni vakabekataki nida gadreva dina na vuku meda vakasamataka vinaka kina na ka. Oqo sara ga na ka meda masulaka! Na Vosa i Jiova e vakadeitaka: “Kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.” (Jemesa 1:5) Io, kerea vei Jiova na vuku, oya na noda rawa ni vakayagataka na noda kilaka, rai titobu, kei na yalomatua​—​meda vakatulewa vinaka da qai digidigi donu kina. Na Tamada vakalomalagi dauloloma e vakadeitaka vei keda ni na rogoca na masu vaka oqo. E tu vakarau me vakadodonutaka nodra ilakolako era nuitaki koya se vakararavi vua ena yalodra taucoko.​—Same 65:2; Vosa Vakaibalebale 3:​5, 6.

5, 6. (a) Na cava e rawa nida rai kina ena Vosa ni Kalou me vukei keda meda vosota na leqa vakailavo? (b) Na cava e rawa nida cakava me vakalailaitaka na lomaocaoca ke da vakacegui mai na noda cakacaka?

⁵ Dua tale na sala eda vakaraitaka kina nida nuitaki Jiova, oya na noda rai ena nona Vosa me dusimaki keda. Na nona itukutuku ena iVolatabu e vakadeitaka ni “nuitaki vakaoti.” (Same 93:​5, NW) E dina ni a vakacavari na kena volai ena sivia na 1,900 na yabaki sa oti, na ivola uqeti vakalou oqo e lewena na ivakasala nuitaki kei na rai veiganiti e rawa ni vukei keda meda vosota kina na leqa vakailavo. Dikeva mada e so na kena ivakaraitaki ena iVolatabu.

⁶ Ena gauna makawa, e dikeva rawa na tui vuku o Solomoni: “Sa vinaka na nona moce na tamata daucakacaka se kana vakalailai se kana vakalevu: ia na nonai yau levu na vutuniyau sa dredre kina vua me moce.” (Dauvunau 5:​12) E kania na gauna kei na ilavo na vakavinakataki, vakasavasavataki, maroroi, kei na taqomaki ni iyau vakayago. Koya gona, ke da vakacegui mai ena noda cakacaka, de vinaka meda vakalewa tale mada na ivakarau ni noda bula, meda wasea kina na veika eda gadreva dina mai na veika e sega soti ni bibi. Me vakalailaitaka gona na lomaocaoca, ena ka vakavuku meda cakava e so na veiveisau. Kena ivakaraitaki, e rawa beka nida vakarawarawataka noda bula, nida toki ena dua na vale vakarauta ga se meda vakalailaitaka na iyau eda taukena tu e sega soti ni bibi?​—Maciu 6:​22.

7, 8. (a) E vakaraitaka vakacava o Jisu ni noda ivalavala ga na tamata na lomaocaocataka vakalevu na veika vakayago? (Raica na ivakamacala e ra.) (b) Na ivakasala cava e solia o Jisu me kua kina na lomaocaoca?

⁷ Ena iVunau ena Ulunivanua, e vakasala kina o Jisu: “Kakua ni lomaocaoca e na vuku ni nomudou bula, e na ka mo dou kania, se na ka mo dou gunuva: se ena vuku ni yagomudou, e na ka mo dou vakaisulu kina.”b (Maciu 6:​25) E kila o Jisu ni dau noda ivalavala na tamata meda dau lomaocaocataka na ka meda bula kina. Ia eda na sega ni ‘lomaocaocataka’ vakacava na veika vaka oqo? E kaya o Jisu: “Dou vakasaqara taumada na matanitu ni Kalou.” Se mani vakacava na leqa eda sotava, meda vakaliuca tiko ga na noda sokaloutaki Jiova. Kevaka eda cakava oya, na veika kece eda gadreva e veisiga ena ‘vakaikuritaka’ vei keda na Tamada vakalomalagi. Ena tiko na sala e vakarautaka kina na ka eda gadreva.​—Maciu 6:​33.

⁸ E tomana o Jisu nona ivakasala: “Dou qai kakua kina ni lomaocaoca me baleta na mataka, ka ni na qai lomaocaocataka ga na mataka na ka e baleta.” (Maciu 6:​34, VV) E sega ni vinaka meda sa lomaocaocataka rawa tu na veika ena rairai kauta mai na siga e tarava. E kaya e dua na vuku: “Tawayaga wale meda dau nuiqawaqawataka vakalevu na siga nimataka, ni dau duidui sara na ka e yaco mai na ka eda nanuma ni na yaco.” Nida muria vakavinaka gona na ivakasala ena iVolatabu ena noda vakaliuca na veika e bibi kei na noda kauaitaka mada ga na bula ni veisiga yadua, ena vukei keda meda kua ni lomaocaoca.​—1 Pita 5:​6, 7.

9. Nida leqa vakailavo, na veivuke cava eda na kunea ena ivolatabaki e vakarautaka na “dauveiqaravi yalo dina ka vuku”?

⁹ Dua tale na sala eda vakaraitaka kina nida nuitaki Jiova ke da sotava na leqa vakailavo, oya ena noda qara veivuke ena ivolatabaki e vakarautaka na “dauveiqaravi yalo dina ka vuku.” (Maciu 24:​45, VV) Vakawasoma na kena dau kau cake mai ena ivoladraudrau na Awake! na ulutaga e tu kina e so na ivukevuke kei na ivakasala me wali kina na leqa vakailavo. Na ulutaga “Out of a Job​—What Are the Solutions?” (Vakacegui Mai na Cakacaka​—Na Cava e Rawa ni Caka?) ena itabataba ni 8 Okosita, 1991, e tiko kina e walu na idusidusi yaga sa vukei ira e levu me rawa tiko kina nodra bula ra qai lomavakacegu, dina nira sotava na leqa vakailavo nira vakacegui mai na cakacaka.c Ia, ena rawa ga nida muria na vakatutu vivinaka e dulaki ena itabataba ni Awake! oqo, ke da kotora na ilavo ena kena ikotokoto dodonu. A veivosakitaki oqo ena ulutaga “Something More Vital Than Money” (Ka e Yaga Cake Mai na iLavo) ena itabataba vata tiko ga oqo.​—Dauvunau 7:​12.

Nida Tauvimate

10. E laurai vakacava ena ivakaraitaki i Tui Tevita ni yaga meda nuitaki Jiova nida tauvimate bibi?

¹⁰ E yaga beka meda nuitaki Jiova nida tauvimate bibi? E dodonu me vaka kina! O Jiova e kauaitaki ira na nona tamata era tauvimate. Kena ikuri, e tu vakarau sara ga me veivuke. Kena ivakaraitaki, o Tui Tevita. A rairai tauvimate bibi sara tu ga ni vola na ka e dau cakava na Kalou vei ira na tamata yalododonu era tauvimate. E kaya: “Ena vakaukauwataki koya ko Jiova ni sa malumalumu koto; o na cakava me vinaka tiko na nonai mocemoce ni sa mate no.” (Same 41:​1, 3, 7, 8) Sega vakadua ni luluqa nona nuitaki Jiova o Tevita, e yaco na gauna e bula tale kina mai na nona tauvimate. Eda na vakaraitaka gona vakacava nida nuitaka na Kalou ke da tautauvimate?

11. Nida tauvimate, na cava e rawa nida kerea vua na Tamada vakalomalagi?

¹¹ Nida tauvimate, e dua na sala eda na vakaraitaka kina nida nuitaki Jiova oya na noda kere veivuke vua ena masu meda vosota tiko ga. Eda rawa ni kerea me vukei keda meda vakayagataka na “vuku dina” meda yalomatuataka kina na ka meda cakava ena keda ituvaki. (Vosa Vakaibalebale 3:​21) E rawa tale ga nida kerea me vukei keda meda yalovosovoso meda vorata kina na tauvimate. Kena ilutua, meda kerea vei Jiova me vakaukauataki keda, me solia na igu meda yalodina tiko ga, da qai tauri keda vinaka, da kua ni yalolailai, veitalia se cava e yaco. (Filipai 4:​13) Na noda yalodina tiko ga vua na Kalou e bibi cake sara mai na noda via taqomaka noda bula. Kevaka gona eda yalodina tiko ga, o koya na Dauveisaumi levu ena solia vei keda na bula vinaka me tawamudu, da qai sega ni tauvimate tale.​—Iperiu 11:6.

12. Na ivakavuvuli vakaivolatabu cava e rawa ni vukei keda meda vakatulewataka vinaka na veiqaravi vakavuniwai eda digia?

¹² Na noda nuitaki Jiova ena uqeti keda tale ga meda rai ena nona Vosa, na iVolatabu, me dusimaki keda. Na ivakavuvuli e kune ena iVolatabu e rawa ni vukei keda meda lewa vakavuku na veiqaravi vakavuniwai eda digia. Kena ivakaraitaki, na noda kila ni vakacala na iVolatabu na “vakacuru,” eda na levea kina na veiqaravi e vauci kina. (Kalatia 5:​19-​21, NW; Vakarua 18:​10-​12) Oqo e dua tale na ivakaraitaki me baleta na nuitaki ni vuku ena iVolatabu: “O koya sa yalowai sa vakabauta na vosa kecega: ia na tamata yalomatua sa daulewa vakavinaka na nonai lakolako.” (Vosa Vakaibalebale 14:15) Koya gona, nida vakasamataka tiko na veiqaravi vakavuniwai, ena ka vakavuku meda qara na itukutuku nuitaki, me kua nida “vakabauta na vosa kecega.” Na “[i]valavala yalomatua” gona e rawa ni vukei keda meda vakadikeva vinaka na ituvaki da qai vakatulewa vakavuku.​—Taito 2:​12.

13, 14. (a) Na ulutaga yaga cava me baleta na tauvimate sa ra tabaki ena ivoladradrau Na Vale ni Vakatawa kei na Yadra!? (Raica na kato ena tabana e 17.) (b) Na ivakasala cava me baleta na vosoti ni tauvimate bibi e tiko ena itabataba ni Awake!, 22 Janueri, 2001?

¹³ Eda na vakaraitaka tale ga nida nuitaki Jiova ena tikina oqo nida vakasaqaqara ena ivola e vakarautaka na dauveiqaravi yalodina. Sa vakawasoma na kena tabaki ena ivoladraudrau Na Vale ni Vakatawa kei na Yadra! na ulutaga yaga e so ni veimataqali tauvimate.d Ena so na gauna, era lewenivola oqo na kedra italanoa era vosota rawa na tauvimate, kei na leqa ni yago. Kuria, ni so na ulutaga era tu kina na rai mai na iVolatabu kei na ivakasala yaga me vosoti kina na tauvimate bibi.

¹⁴ Me kena ivakaraitaki, na itabataba ni Awake!, 22 Janueri, 2001, e kena ulutaga “Comfort for the Sick” (Vakacegu Vei Ira na Tauvimate). Na ulutaga oqo e vakaraitaka na ivakavuvuli vakaivolatabu yaga kei na itukutuku sara ga e kau mai vei ira era vakatarogi nira vosota voli na tauvimate e vakaleqai ira ena vica vata na yabaki. Na ulutaga “Living Successfully With Your Ailment​—How?” (O na Vosota Vakacava Nomu Tauvimate?) e tukuna na veivakasala oqo: Tovolea mo kila vinaka na kemu mate. (Vosa Vakaibalebale 24:5) Kotora e so na isausau yaga, okati kina na isausau mo vukei ira tale e so, ia nanuma tiko ni o na rairai sega ni rawata na isausau era rawata e so tale. (Cakacaka 20:35; Kalatia 6:4) Kua ni tawasei iko mai vei ira tale e so. (Vosa Vakaibalebale 18:1) Nira sikovi iko e so tale, saga mera marautaka na nodra veisiko. (Vosa Vakaibalebale 17:22) Koya e bibi sara, kabiti Jiova matua kei na ivavakoso. (Neumi 1:7; Roma 1:​11, 12) E dodonu gona meda vakavinavinakataka na ivakasala nuitaki e vakarautaka o Jiova ena nona isoqosoqo.

Ni Dau Votu Tiko ga na Malumalumu Vakayago

15. E rawa vakacava vua na yapositolo o Paula me qaqa ena nona vorata na malumalumu ni yagona ivalavala ca, kei na cava e rawa nida nuidei kina?

¹⁵ E vola na yapositolo o Paula: “Sa sega sara ni tiko vei au e na noqui tovo vakayago e dua na ka vinaka.” (Roma 7:​18) E kila o Paula mai na veika e sotava ni gadrevi na sasaga vagumatua me vorati kina na gagadre kei na malumalumu ni yago ivalavala ca. Ia, e nuidei o Paula ni na qaqa. (1 Korinica 9:​26, 27) A rawata vakacava? Ena nona nuitaki Jiova vakatabakidua. Oya na vuna e kaya rawa kina o Paula: “A tamata vakaloloma koi au! o cei ena sereki au mai na yago ni mate oqo? Au sa vakavinavinaka vua na Kalou e na vuku ni noda Turaga ko Jisu Karisito.” (Roma 7:​24, 25) Vakacava o keda? O keda tale ga eda sasaga tiko meda vorata noda malumalumu vakayago. Nida sasaga tiko, e rawa meda yalolailai, meda nanuma ni sa na dreve noda sasaga. Ia ena vukei keda o Jiova kevaka eda vakataki Paula, meda nuitaki koya vakatabakidua, sega ena noda kaukaua ga.

16. Ke votu tiko ga noda malumalumu vakayago, na cava meda masulaka, kei na cava meda cakava ke da rawai tale ena noda malumalumu?

¹⁶ Ke votu tiko ga na malumalumu vakayago, e rawa nida vakaraitaka nida nuitaki Jiova ena noda toro vua ena masu. E dodonu meda kerea, meda cikeva tale ga, na veivuke ni yalo tabu i Jiova. (Luke 11:​9-​13) E rawa sara ga nida kerea meda lewai keda vinaka, e dua vei ira na vua ni yalo tabu ni Kalou. (Kalatia 5:​22, 23, VV) Vakacava kevaka eda rawai tale ena noda malumalumu? Meda kua vakadua ni soro koso. Meda kua ni datuvu ni masu ena yalomalumalumu vua na noda Kalou dauloloma, nida kerea nona veivosoti kei na veivuke. O Jiova ena sega ni vakanadakuya na yalo e “ramusu, ka bibivoro” ena vuku ni ca ni lewaeloma. (Same 51:17) Kevaka eda vakamamasu vua ena lomadina kei na yalobibivoro, ena vukei keda meda valuta na veitemaki.​—Filipai 4:​6, 7.

17. (a) Na cava e yaga kina meda kila na rai i Jiova me baleta na malumalumu eda valuta tiko? (b) Na tikinivolatabu cava soti e rawa nida vakananuma ke da saga meda kua ni dau cudru totolo? qarauna na yameda? vorata na malele ni lomada ena ka ni veivakalasai torosobu?

¹⁷ E rawa tale ga nida vakaraitaka nida nuitaki Jiova nida vakasaqaqara ena nona Vosa. Na noda vakayagataka na Bible concordance se na idusidusi e dau tabaki ena Vale ni Vakatawa ni ika15 ni Tiseba e veiyabaki, e rawa nida kunea kina na isaunitaro, ‘E raica vakacava o Jiova na malumalumu au saga tiko meu valuta?’ Na noda kila na rai i Jiova me baleta noda leqa ena vakaukauataka noda gagadre meda vakamarautaki koya. E rawa kina ni tautauvata noda rai, meda cata na ka e cata. (Same 97:10) E so era raica ni yaga kevaka era dau nanuma tu e so na tikinivolatabu me baleta na malumalumu era valuta tiko. Eda saga tiko beka meda kua ni dau cudru totolo? E vinaka meda nanuma na tikinivolatabu me vaka na Vosa Vakaibalebale 14:17 kei na Efeso 4:​31. E dau dredre beka meda qarauna na yameda? De vinaka me kasa dei toka vei keda na tikinivolatabu me vaka na Vosa Vakaibalebale 12:18 kei na Efeso 4:​29. Eda dau malele beka ena ka ni veivakalasai torosobu? E rawa nida tovolea meda nanuma na tikinivolatabu me vaka na Efeso 5:3 kei na Kolosa 3:5.

18. Na cava meda kua ni madua kina ni kere veivuke vei ira na qase ena vorati ni noda malumalumu?

¹⁸ Na noda qara veivuke vei ira na qase ena ivavakoso era lesi ena yalo tabu e ivakaraitaki tale ga ni noda nuitaki Jiova. (Cakacaka 20:28) O ira gona ‘na isolisoli tamata’ oqo era isolisoli i Jiova vei Karisito mera taqomaka ra qai karona na nona sipi. (Efeso 4:​7, 8, 11-​14) Ia, meda nanuma tiko ni na sega ni rawarawa na noda kerea na veivuke me baleta na noda malumalumu. Eda na rairai madua, nida nanuma nira na raici keda vakaca na qase. Ia na kena veibasai, ni o ira na qase oqo era na dokai keda nida doudou ni kere veivuke. Kuria ni o ira tale ga na qase era dau saga mera vakaraitaka na itovo i Jiova nira veitaratara kei ira na qelenisipi. Na nodra ivakasala kei na ivakaro veivakacegui qai yaga mai na Vosa ni Kalou, ena rawa sara ga ni ka eda gadreva me vakaukauataki keda meda vorata kina na noda malumalumu.​—Jemesa 5:​14-​16.

19. (a) Na cava na inaki ni nona vakayagataka o Setani na ca ni vuravura oqo? (b) Na cava e vauci ena vakanuinui, kei na cava me noda inaki dei?

¹⁹ Kua ni guilecava ni kila o Setani ni sa sega ni dede na nona gauna. (Vakatakila 12:12) Dua na ka nona vinakata me vakayagataka na ca ni vuravura se kena veika tawayaga me vakayalolailaitaki keda da qai soro koso. Meda nuitaka vakatabakidua mada ga na veika e tukuni ena Roma 8:​35-​39: “O cei me na tawasei keda mai na loloma i Karisito? a ka rarawa li, se na yaluma, se na dauveivakacacani, se na dausiga, se na luvawale, se na dauveivakarerei, se nai seleiwau? . . . E segai, e na ka kecega oqo eda sa gumatua sara kina, e na vuku i koya sa lomani keda. Ni’u sa kila vakaidina, ni na sega ni rawata na mate, se na bula, se ko ira na agilose, se ko ira sa liu, se ko ira sa kaukauwa, se na veika sa yaco edaidai, se na veika ena yaco emuri, se na ka cecere, se na ka titobu, se dua tani na ka, me tawasei keda mai na loloma ni Kalou, sa yaco e na vuku i Karisito Jisu na noda Turaga.” Sa itukutuku vakasakiti dina ni nona nuitaki o Jiova! Na vakanuinui vaka oqo, e sega ni vakanananutaki wale tu ga. E vauci kina na vakatulewa kei na vakasamataki vakatitobu ni ka eda cakava e veisiga. Koya gona, me noda inaki dei mada ga meda nuitaki Jiova vakatabakidua ena gauna dredre.

[iVakamacala e ra]

O se Nanuma Tiko?

• Nida sotava na leqa vakailavo, na sala cava soti eda na vakaraitaka kina nida nuitaki Jiova?

• Eda na nuitaka vakacava na Kalou nida tauvimate?

• Ke votu tiko ga na noda malumalumu, eda na vakaraitaka vakacava nida nuitaki Jiova vakatabakidua?

[Kato ena tabana e 17]

O se Nanuma na Veiulutaga Oqo?

Nida lomabibitaka na ituvaki ni noda bula, e veivakayaloqaqataki meda wilika na kedra italanoa e so era vosota rawa na nodra tauvimate, se leqa ni yagodra. E koto e ra e so na ulutaga sa ra tabaki oti ena ivoladraudrau Na Vale ni Vakatawa kei na Yadra!

“Na iVola a Veisautaka Noqu Bula,” e vakamacalataki kina na nona kune marau e dua, dina ni didivara qai galu.​—Na Vale ni Vakatawa, 1 Janueri, 2003.

“Vakamamadataka na Rarawa na Qaravi Ira na Tani,” e vakamacalataka na sala e vosoti rawa kina na multiple sclerosis.​—Na Vale ni Vakatawa, 1 Julai, 2003.

“Sa Tauvi Luvemu na Matenisuka!”​—Yadra!, Janueri-Maji, 2000.

“Dou sa Sega ni Kila na Ka sa na Yaco e na Mataka,” e vakamacalataki kina na vosoti ni bipolar disorder.​—Na Vale ni Vakatawa, 1 Tiseba, 2000.

“Loida’s Journey out of Silence,” e vakaraitaka na sala e vosoti kina na mavoa ni mona na cerebral palsy.​—Yadra!, 8 Me, 2000.

“Duavata ena Qarava na Kalou ena Gauna Vinaka kei na Gauna Dredre,” e vosoti na kenisa ni sucu.​—Na Vale ni Vakatawa, 1 Maji, 1996.

“Noqu Bula Niu Tauvi Vukavuka​—Rekitaki Qai Vakalougatataki Vakayalo.”​—Na Vale ni Vakatawa, 1 Epereli, 1998.

“Sotava na Bula Dredre, ia Au Marau ga ena Noqu Qaravi Jiova,” e vosoti na polio.​—Na Vale ni Vakatawa, 1 Feperueri, 1999.

[iYaloyalo ena tabana e 15]

Ke da vakacegui mai ena noda cakacaka, de vinaka meda vakalewa tale mada na ivakarau ni noda bula

[iYaloyalo ena tabana e 16]

Na kena italanoa o Loida e vakaraitaka ni nuitaki Jiova e rawa ni vukea e dua me vosota. (Raica na kato ena tabana e 17)

[iYaloyalo ena tabana e 18]

Meda kua ni madua ni kere veivuke me vorati kina na noda malumalumu