Tiko Beka e Dua me Nuitaki?

SA QAI kilai e levu na ka vuni ni sa kasura ena 1989 na bai simede e vakatokai na Berlin Wall, a dau wasei rau tu na matanitu e rua kei Jamani. Kena ivakaraitaki, a qai kila o Lydiaa nira a vola lo na ovisa vakalecaleca na itukutuku ni veika a dau cakava, donumaka na veiliutaki vakominisi ena tokalau kei Jamani. Dina ni kidacalataka o Lydia, ia sa qai sokonu ga vakalevu ni kila ni o watina ga a dau tukuni koya lo tiko vei ira na ovisa vakalecaleca. A lawakitaki koya tale e dua ga e dodonu me nuitaka vakaoti.

Tabaki ena niusiveva ni Lodoni, na Times, na kena itukutuku e dua sa kena turaga, na yacana o Robert, e dau “doka vakalevu” nona vuniwai, “e qoroi koya qai nuitaki koya.” E tukuni ni dau “yalovinaka qai dauveikauaitaki” na vuniwai oya. Ia, a qai mate vakasauri o Robert. E sega ni leqa ena mateniuto se stroke. Era kaya na vakailesilesi ni a lako ga yani ina nona vale na nona vuniwai me lai culai koya, ratou qai sega ni kila o Robert kei na nona vuvale ni sa culai me mate. E labati Robert ga e dua e nuitaka vakaoti.

E matewale nodrau vakanuinui o Lydia kei Robert qai tini ena leqa. Ena so tale na gauna e sega ni dau ca sara na ka e yaco. Ia, e sega ni dodonu me vou vei keda na kena dau yaco na leqa vaka oqori. E vakaraitaki ena dua na ripote, na Allensbacher Yearbook of Opinion Polls 1998-​2002, e tabaka e dua na koronivuli ni vakadidike rogo e Jamani, ni 86 na pasede vei ira na vakatarogi era kaya nira sega ni dau dina o ira e dodonu mera nuitaki. O sa rairai sotava tale ga oqori. Eda sega gona kina ni kidroataka na kena volai ena niusiveva ni Suwitisiladi na Neue Zürcher Zeitung ni yabaki 2002 ni “sa yali tiko yani vakamalua na veinuitaki ena vanua lelevu ena vicasagavulu na yabaki sa sivi.”

Bucini Vakamalua, Vakarusai Totolo

Na cava sara mada na ibalebale ni noda nuitaka e dua? E kena ibalebale nomu vakabauta ni dau dina o koya qai sega ni nakita me cakava na ka ena vakavuna na nomu rarawa. Ena bucini vakamalua nomu nuitaka e dua ia e rawa ni vakarusai tale vakatotolo. Sa rauta bagi me sa dredre na veinuitaki nikua baleta ni levu era liaca ni tawayaga wale mera cakava oqori. E kainaki ena dua na vakadidike mai Jamani ena 2002, ni “rauta wale ga ni 1 mai na veiya3 na itabagone era se bau nuitaki ira tale tu e so.”

Eda na rairai tarogi keda: ‘Eda rawa ni nuitaka dina e dua? Ena yaga beka noqu nuitaka e dua ena qai sega ni dina e muri?’

[iVakamacala e ra]

[Tikina bibi ena tabana e 3]

E kune ena dua na vakadidike ni 86 na pasede vei ira na vakatarogi era rarawataka na nodra sega ni dina o ira era nuitaka