“Lomavata” ni Vakalagilagia na Kalou

“Dou lomavata . . . ni dou sa vakarokorokotaka [“vakalagilagia,” NW] na Kalou, o koya na Tama i Jisu Karisito na noda Turaga.”​—ROMA 15:6.

1. Na lesoni cava a kaya o Paula vei ira na tacina vakayalo me baleta na kena wali na duidui ni nodra rai?

SEGA ni lotu Vakarisito kece e tautauvata nodra digidigi se ka era taleitaka. Ia, e dodonu meda lomavata na lotu Vakarisito kece nida muria na sala ina bula. E rawa beka? Io, kevaka eda sega ni vakalaiva na duidui lalai me leqa lelevu. Oqo na lesoni a kaya na yapositolo o Paula vei ira na tacina vakayalo ena imatai ni senitiuri. A vakamacalataka vakacava na ka ni vuli bibi oqori? Eda na muria vakacava nikua na ivakasala uqeti vakalou oya?

Na Bibi ni Duavata Vakarisito

2. A vakabibitaka vakacava o Paula na duavata?

² E kila o Paula ni bibi na duavata vakarisito, a veivakasalataki kina mera vukei na lotu Vakarisito mera veivosoti ena loloma. (Efeso 4:​1-3; Kolosa 3:​12-​14) Ia, ni sivi e 20 na yabaki nona tauyavutaka e levu na ivavakoso kei na nona sikovi ira tale e so, a qai kila ni na dredre me kune tiko ga na duavata. (1 Korinica 1:​11-​13; Kalatia 2:​11-​14) Oya na vuna, a vakauqeti ira kina na tacina vakayalo era tiko mai Roma: “Me solia mada vei kemudou na Kalou, o koya na vu ni vosota kei na veivakacegui . . . mo dou lomavata ka domovata ni dou sa vakarokorokotaka [vakalagilagia] na Kalou, o koya na Tama i Jisu Karisito na noda Turaga.” (Roma 15:​5, 6) Nikua tale ga e dodonu meda “lomavata” vakailawalawa ni vakalagilagia na Kalou o Jiova. Eda sa vakayacora tiko vakacava oqo?

3, 4. (a) Era duidui vakacava na lotu Vakarisito era tiko e Roma? (b) Era na qaravi Jiova vakacava ena “lomavata” na lotu Vakarisito mai Roma?

³ Levu na lotu Vakarisito mai Roma era itokani i Paula. (Roma 16:​3-​16) E dina ni duidui na nodra isususu, a ciqomi ira kece na tacina o Paula me vaka ni ‘daulomani ira na Kalou.’ A vola: “Ko Jisu Karisito ka’u sa vakavinavinaka kina vua na noqu Kalou e na vukumudou kecega, ni sa tukuni e vuravura taucoko na nomudou vakabauta.” Macala e ke ni levu na sala era ivakaraitaki vinaka kina o ira mai Roma. (Roma 1:​7, 8; 15:14) Ena gauna vata oya, e so ena ivavakoso a duidui nodra rai me baleta e so na ituvaki. E vakatale ga oya nikua, me vaka ni duidui nodra isususu kei na nodra itovo na lotu Vakarisito yadua, na vulici ni ivakasala uqeti vakalou i Paula me baleta na kena wali na duidui ena vukei ira mera veivosaki ena “lomavata.”

⁴ Era tiko ruarua e Roma na Jiu kei ira na kai Matanitu Tani era lotu Vakarisito. (Roma 4:1; 11:13) E so na Jiu lotu Vakarisito e kena irairai nira sega ni biuta rawa na veika e virikotori ena Lawa i Mosese, dina ga nira kila ni veika vaka oqo e sega ni yaga me rawati kina na bula. Ena dua tale na yasana, dua na iwiliwili ni Jiu lotu Vakarisito era ciqoma ni nona isoro na Karisito e vagalalataki ira mai na vakatatabu era dau muria tu ni bera nira mai lotu Vakarisito. Oya na vuna era veisautaka kina e so nodra itovo kei na nodra ivakarau. (Kalatia 4:​8-​11) Ia, me vaka a kaya o Paula, o ira kece e ‘daulomani ira na Kalou.’ E rawa kece nira vakalagilagia na Kalou ena “lomavata” kevaka e tiko ga vei ira na rai dodonu. Nikua tale ga, ena rairai duidui noda rai me baleta e so na ituvaki, e veiganiti kina meda dikeva na nona vakamacalataka o Paula na ivakavuvuli bibi oqo.​​—⁠Roma 15:⁠4.

“Dou Qai Veivakacegui”

5, 6. Na cava e duidui kina na rai ena ivavakoso mai Roma?

⁵ Ena nona ivola vei ira mai Roma, a tukuna kina o Paula e dua na ituvaki e duidui kina na rai. A vola: “E dua sa doudou me kania loa na ka kecega: ia ko koya sa malumalumu, sa daukania na rourou ga.” Na cava na vuna? Ena Lawa i Mosese, e tabu me laukana na vuaka. (Roma 14:2; Vunau ni Soro 11:⁠7) Ia, na nona mate o Jisu sa mai muduki kina na Lawa oqori. (Efeso 2:​15, VV) Ni oti tale ga e tolu veimama na yabaki nona mate o Jisu, sa qai kaya e dua na agilosi vua na yapositolo o Pita, ni Kalou e raica me savasava na kakana kece. (Cakacaka 11:​7-​12) Na nodra kila oqo e so na Jiu lotu Vakarisito, era nanuma kina ni sa rawa nira kania na vuaka se so tale na kakana e vakatabui ena Lawa.

⁶ Era rairai cata e so tale na Jiu lotu Vakarisito na laukana ni kakana e dau vakatokai tu e liu me tawasavasava. Era rairai cata tale ga mera raica nira kania na kakana vaka oqo na tacidra vakayalo era Jiu. Na ka e yaco oqo era rairai veilecayaki kina na lotu Vakarisito kai Matanitu Tani, baleta ni sega ni kena ivakarau vei ira mera vakatatabutaka na kakana. E sega ni cala ke dua e vakuai koya mai na so na kakana, ia me kua ga ni tiko ena nona vakasama ni nona cakava oya ena rawata kina na bula. Na duidui tale ga ni nodra rai a rawa ni vakacaudreva na veileti ena ivavakoso. Mera kua ni vakalaiva na lotu Vakarisito mai Roma na duidui oqo me tarova nodra vakalagilagia na Kalou ena “lomavata.”

7. Na duidui rai cava e basika me baleta na vakatatabutaki ni dua na siga e veimacawa?

⁷ Kaya sara o Paula na ikarua ni ituvaki: “E dua sa doka e dua na siga ka segai nai kadua: ka dua tani sa doka na siga kecega.” (Roma 14:5a) Ena Lawa i Mosese, e sega na cakacaka ena Siga ni Vakacecegu. E vakatabui sara mada ga na veilakoyaki ena siga oya. (Lako Yani 20:​8-​10; Maciu 24:20; Cakacaka 1:​12) Gauna e muduki kina na Lawa, sa oti tale ga e kea na kaukaua ni vakatatabu. Ia, e so na Jiu lotu Vakarisito era se rivarivabitaka tiko ga nodra cakava e so na cakacaka se lako vakayawa ena siga era dau vakatabuya tu e liu. Gauna mada ga era sa lotu Vakarisito kina, era rairai vakatikitikitaka tiko ga na ikavitu ni siga me vakayacori vakatabakidua kina na veika vakayalo, e dina mai na rai vakalou e sa sega tale ni dodonu me muri na Siga ni Vakacecegu. E cala beka kevaka era muria? Sega, vakavo ga ke ra nanuma ni vakatatabu ena Siga ni Vakacecegu e vakadonuya na Kalou. Na nona kauaitaka gona o Paula nodra lewaeloma na tacina lotu Vakarisito, a vola kina: “Me dui lewa deivaka na tamata yadua e na lomana.”​​—⁠Roma 14:5b.

8. Na cava mera kua ni cakava na lotu Vakarisito mai Roma, e dina nira na kauaitaka nodra lewaeloma e so tale?

⁸ E dina ni vakauqeti ira tiko vakayalololoma na tacina lotu Vakarisito o Paula mera yalovosovoso vei ira e malumalumu nodra lewaeloma, a vakacalai ira vakaukaua era dau vakasaurarataki ira na tacidra vakayalo mera muria na Lawa i Mosese me sala e rawati kina na bula. Kena ivakaraitaki, ena rauta na 61 S.K., a vola kina o Paula na ivola na Iperiu vei ira na Jiu lotu Vakarisito, e veilauti sara na ka e kaya qai vakamacalataka vakamatata kina ni sa tawayaga na muri ni Lawa i Mosese, baleta ni uasivi sara na veika era nuitaka na lotu Vakarisito ni yavutaki ena isoro ni veivoli i Jisu.​​—⁠Kalatia 5:​1-​12; Taito 1:​10, 11; Iperiu 10:​1-​17.

9, 10. Na cava mera kua ni cakava na lotu Vakarisito? Vakamacalataka.

⁹ Me vaka eda sa raica, e vakabibitaka o Paula ni sega ni dodonu me tarova na duavata na duidui ni vakatulewa vakavo ga ke beci kina na ivakavuvuli vakarisito. Oya na vuna, e tarogi ira kina na lotu Vakarisito e malumalumu nodra lewaeloma o Paula: “Ko sa lewai koya na wekamu e na vuku ni cava?” Qai tarogi ira e vinaka nodra lewaeloma (kena irairai o ira e vakatara nodra lewaeloma mera kania na kakana e vakatabui ena Lawa se mera cakacaka ena Siga ni Vakacecegu): “Ko sa beci koya na wekamu e na vuku ni cava?” (Roma 14:10) E kaya o Paula ni o ira na lotu Vakarisito e malumalumu na nodra lewaeloma mera kua ni vakacalai ira na tacidra e vinaka nodra lewaeloma. Ena gauna vata oya, o ira na lotu Vakarisito e vinaka na nodra lewaeloma mera kua ni beci ira e malumalumu nodra lewaeloma ena so na ituvaki. E dodonu vei ira kece mera doka na nodra nanuma e so tale, qai kua ni ‘sivia na nodra nanumi ira vakai ira.’​​—⁠Roma 12:​3, 18, VV.

¹⁰ E vakamacalataka vaka oqo o Paula na rai dodonu me tiko vei ira: “Me kakua ni beci koya sa sega ni kana ko koya sa kana: ia me kakua ni lewai koya sa kana ko koya sa sega ni kana: ni sa vinakati koya na Kalou.” E kaya tale: “Sa vakacegui kemudou na Karisito, me vakarokorokotaki na Kalou.” Nira vakadonui kece vua na Kalou kei Jisu o ira e vinaka kei ira e malumalumu nodra lewaeloma, e dodonu me vakatale ga oya na noda rai da qai dau “veivakacegui.” (Roma 14:3; 15:⁠7) Sega li ni dina na vakasama oqo?

Duavata Nikua ena Veilomani Vakaveitacini

11. Na ituvaki cava e basika ena gauna i Paula e duatani sara?

¹¹ Ena nona ivola vei ira mai Roma, a kaya kina o Paula e dua na ituvaki e duatani sara. Se qai bokoca ga o Jiova e dua na veiyalayalati qai tauyavutaka e dua na ka vou. A dredre vei ira e so mera veisau ina veiyalayalati vou oqo. Sa sega tale ni yaco nikua na veika vata oya, ia ena so na gauna e rawa ni basika na ituvaki e via tautauvata kaya.

12, 13. Na cava e so na ituvaki e rawa nira kauaitaka kina na lotu Vakarisito nikua nodra vakatulewa na tacidra?

¹² Kena ivakaraitaki, a lewe tu beka ni dua na lotu e dau vakatabuya na sasauni kei na daramaki ni isulu vakaiukuuku e dua na yalewa lotu Vakarisito. Ni sa ciqoma na ka dina, ena dredre beka me veisau nona vakasama ni rawa ni tokara na isulu rakorako se isulu rairai totoka ena so na soqo se me dau sauni koya. Ena cala ke dua e saga me vakacala nona vakatulewa na yalewa lotu Vakarisito oya baleta ni sega ni vauci kina e dua na ivakavuvuli vakaivolatabu. Ena gauna vata oqori, na yalewa oya me kua ni vakalewa nodra vakatulewa e so tale na yalewa lotu Vakarisito e donu vei ira mera vakayagataka na veika vaka oqo.

¹³ Dikeva mada e dua tale na ivakaraitaki. E susugi e dua na tagane lotu Vakarisito ena vanua e vakatabui kina na gunu. Ni mai kila na ka dina, e vulica kina na rai vakaivolatabu ni waini e isolisoli mai vua na Kalou qai rawa ni vakayagataki vakarauta. (Same 104:15) E ciqoma sara na rai oya. Ia, ena vuku ni nona isususu, e nakita me sa kua sara ga ni gunu yaqona ni valagi se yaqona ni viti, e sega tale ga ni dau vakalewai ira era vakayagataka ga vakarauta. E vakayacora kina na vosa i Paula: “Me da sa dau sasagataka tiko ga kina na veika e kauta mai na veilomani kei na veivakatataki cake.”​​—⁠Roma 14:​19, VV.

14. Ena ituvaki cava era na muria kina na lotu Vakarisito na ibalebale dina ni nona ivakasala o Paula vei ira mai Roma?

¹⁴ E so tale na ituvaki e basika e dodonu me muri kina na ibalebale dina ni nona ivakasala o Paula vei ira mai Roma. E levu era lewena na ivavakoso vakarisito, qai duidui na ka era taleitaka. Oya na vuna ena rairai duidui kina nodra digidigi​​—⁠me kena ivakaraitaki ena isulusulu kei na sasauni. E koto ena iVolatabu na kena ivakavuvuli matata mera muria na lotu Vakarisito kece era yalodina. E sega gona ni dodonu me duatani tu na isulu eda tokara se na icakacaka ni drauniuluda, me sega ni rakorako se me vakaraitaka nida vakatotomuri vuravura. (1 Joni 2:​15-​17) Mera nanuma na lotu Vakarisito ni veigauna kece, ena gauna mada ga era vakacegu kina, era italatala tiko ni Kalou Cecere Duadua. (Aisea 43:10; Joni 17:16; 1 Timoci 2:​9, 10) Ia, ena levu na vanua e vuqa tu na veika e veiganiti e rawa nira digitaka na lotu Vakarisito.a

Kua ni Vakatarabetaki Ira Tale e So

15. Ena gauna cava ena muduka kina e dua na lotu Vakarisito ni vakayacora na ka e dodonu vua, ena vukudra wale ga na tacina?

¹⁵ E dua tale tiko na ivakavuvuli yaga e kauta cake mai o Paula ena nona ivakasala vei ira na lotu Vakarisito mai Roma. Ena so na gauna, ena rairai nanuma e dua na lotu Vakarisito e vakavulici vinaka nona lewaeloma me vakatabui koya mai na veika e sega ni cala. Na cava na vuna? E nanuma ni nona tomana tiko ga na ka oya ena rawa ni vakaleqai ira tale e so. Ena ituvaki oya, na cava meda cakava? E kaya o Paula: “E vinaka mo kakua ni kania na lewe ni manumanu, se gunu waini, se kitaka e dua na ka sa bale kina na wekamu.” (Roma 14:​14, 20, 21) Koya gona, “oi keda sa kaukauwa, me da vosota na nodra malumalumu era sa sega ni kaukauwa, me da kakua talega ni kitaka na ka sa vinaka vei keda ga. Me da kitaka yadua na ka e vinaka vua na kai noda, na ka e yaga me vakatavulici kina ko koya.” (Roma 15:​1, 2) E rawa ni vakaleqa nona lewaeloma e dua na lotu Vakarisito na veika eda cakava, ia na veilomani vakaveitacini ena uqeti keda meda dau veinanumi da qai kua ni vakayacora na veika ena vakatarabetaki ira tale e so. Kena ivakaraitaki na gunu yaqona ni valagi se yaqona ni viti. E sega ni cala vua na lotu Vakarisito me gunuva ga vakarauta. Ia ke vakatarabetaki ira kina nona itokani, e sa na sega ni gunu, e dina ni oya e nona dodonu.

16. Eda na kauaitaki ira vakacava eda tiko veitikivi?

¹⁶ Na ivakavuvuli oqo e rawa ni vakayagataki tale ga ena taudaku ni ivavakoso vakarisito. Kena ivakaraitaki, eda na vakaitikotiko beka ena vanua e veiuqeti kina na lotu e takalevu e kea mera vakatikitikitaka na lewena e dua na siga me siga ni vakacegu. Me kua gona nira vakatarabetaki na tiko tikivi keda qai vakaleqa na cakacaka vakavunau, eda na saga meda kua sara ga ni cakava e dua na ka ena ca vei ira ena siga oya. Ena dua tale na ituvaki, ena toki beka e dua na lotu Vakarisito vutuniyau me lai veiqaravi ena vanua e gadrevi kina na cakacaka ra qai tiko kina o ira era sega ni rawaka. Ena nona kauaitaki ira na tiko tikivi koya, ena rairai digitaka me dau tokara na isulu rakorako e veirauti ga se bulataka na ivakarau ni bula rawarawa dina ga ni vutuniyau.

17. Na cava e namaki kina meda kauaitaki ira tale e so ena veika eda nanuma meda vakayacora?

¹⁷ E rawa beka ni namaki vei ira “sa kaukauwa” mera veisau vaka oqo? Vakasamataka mada e dua na ivakatautauvata: Nida draiva toka e gaunisala, eda raica sara nira qito voli e yasa ni sala e so na gone. Eda na vakauta tiko beka ga na motoka se lori ena kena totolo e lavaki baleta ni tu vei keda na dodonu vakalawa? Sega, eda na vakamalua de ra laucoqa na gone. Ena so na gauna, e gadrevi meda tu vakarau meda vakamalua, se vosota nida veimaliwai kei ira na tacida vakayalo se so tale. Eda na rairai cakava tiko na veika e dodonu vakaoti meda vakayacora, e sega ni saqati kina e dua na ivakavuvuli vakaivolatabu. Ia, kevaka eda cakava na ka e ca vei ira tale e so se da vakacalai ira e malumalumu nodra lewaeloma, na veilomani ga vakarisito ena uqeti keda meda qaqarauni. (Roma 14:​13, 15) E bibi cake na cuqeni ni duavata kei na tutaki ni veika ni Matanitu ni Kalou mai na noda cakava ga na ka ni tu vei keda na dodonu.

18, 19. (a) Eda na muria vakacava na ivakaraitaki i Jisu nida kauaitaki ira tale e so? (b) Na cava eda duavata kece kina, kei na cava ena veivosakitaki ena ulutaga e tarava?

¹⁸ Nida vakayacora oqo eda sa muria tiko kina na ivakaraitaki vinaka duadua. E kaya o Paula: “Na Karisito talega sa sega ni kitaka na ka sa vinakata ga ko koya; ia me vaka ga sa volai, Sa tu vei au na nodra vosa ca era sa vosavakacacataki iko.” A tu vakarau o Jisu me solia nona bula ena vukuda. Eda na tu vakarau tale ga meda vakuai keda mai na veika eda rawa ni cakava me rawa kina vei ira “sa sega ni kaukauwa” mera vakalagilagia vata kei keda na Kalou. Na noda yalorawarawa kei na noda kauaitaki ira na lotu Vakarisito e malumalumu nodra lewaeloma​​—⁠se noda yalana noda digidigi kei na noda sega ni cakava ga na veika ena vuku ni noda dodonu​​—⁠e vakaraitaka ni ‘tiko vei keda na ivakarau ni vakasama vata ga e tiko vei Karisito Jisu.’​​—⁠Roma 15:​1-5, NW.

¹⁹ E dina ni na via duidui noda rai ena ituvaki e sega ni vauci kina na ivakavuvuli vakaivolatabu, ia me baleta na noda sokalou, eda na duavata kece kina. (1 Korinica 1:​10) Kena ivakaraitaki, na duavata vaka oqo e laurai ena noda ivalavala vei ira era tusaqata na sokalou dina. Na Vosa ni Kalou e tukuni ira na dauveitusaqati vaka oqo mera vulagi da qai vakasalataki meda qarauna “na domo ni vulagi.” (Joni 10:⁠5) Eda na kilai ira vakacava na vulagi oqo? Eda na raici ira vakacava? Na taro oqo ena qai veivosakitaki ena ulutaga e tarava.

[iVakamacala e ra]

O na Sauma Vakacava?

• Na cava ena sega ni vakaleqa kina noda duavata na duidui ni noda rai ena veika e vauci keda yadudua ga?

• Nida lotu Vakarisito, na cava meda kauaitaki ira tale kina e so?

• Na cava e so na sala eda na muria kina na ivakasala i Paula me baleta na duavata nikua, kei na cava ena uqeti keda meda cakava vaka kina?

[iYaloyalo ena tabana e 9]

E bibi ena ivavakoso na ivakasala i Paula baleta na duavata

[iYaloyalo ena tabana e 10]

Era duavata na lotu Vakarisito dina ga ni duidui nodra isususu

[iYaloyalo ena tabana e 12]

Cava me cakava na draiva oqo?