Na Rai ni iVolatabu

Ni Tukuni Mera Duavata na Lotu Vakarisito, Kena iBalebale Mera sa Tautauvata?

SA VAKA me itovo tu ni lotu nikua na duiyaloyalo. O ira sara mada ga na lewe ni dua ga na lotu, e rawa tale ni veicoqacoqa na ka era vakabauta me baleta na nodra ivakavuvuli kei na itovo. E kaya e dua na dauvolaivola: “E kunekunei dredre me rau vakabauta vata e dua ga na Kalou e rua na tamata. Edaidai tale ga, sa rairai tu ga na ka era vakabauta na tamata yadua.”

Ia, na kena veibasai eda raica ena veiuqeti i Paula vei ira na lotu Vakarisito mai Korinica ena imatai ni senitiuri, ni a tukuna mera ‘duavata ga ena ka era kaya’ ra qai “duavata sara e na vakasama kei na lewa.” (1 Korinica 1:10, VV) E so era vakalewa na vosa veiuqeti oqori i Paula. Era kaya nira ‘duidui na tamata’ qai ‘cala na kena tukuni tiko ni dodonu mera duavata ena vakasama kei na itovo na lotu Vakarisito.’ Ia a kaya tiko beka o Paula ena nona vosa oya mera sa tautauvata kece sara na lotu Vakarisito? E vakatara beka na iVolatabu meda vakatulewa ga vakataki keda?

Meda Duavata ga, Sega ni Tautauvata

Ena dua tale nona ivola, a uqeti ira na lotu Vakarisito o Paula mera qarava na Kalou ena nodra ‘vakasama vakatitobu.’ (Roma 12:​1, NW) E macala gona ni sega ni uqeti ira na lewe ni ivavakoso e Korinica me tautauvata na ivakarau ni nodra vakasama. Ia, na cava ga e tukuna tiko kina vei ira mera “duavata e na vakasama kei na lewa”? A veivakasalataki vaka oqori o Paula baleta ni sa basika e dua na leqa levu ena ivavakoso e Korinica. Era sa tawase tiko na lewena, ni so era raici Apolosa me nodra iliuliu, so tale era digi Paula se o Pita, e so tale era via dei tiko ga vei Karisito. E rivarivabitaki sara ga na duiyaloyalo vaka oqo ni na vakaleqa na veimaliwai vinaka ena ivavakoso.

E vinakata o Paula vei ira na lewe i Korinica mera ‘maroroya na duavata sa vakavuna na yalo tabu nira sa vauci vata ena veivinakati’ me vaka nona qai uqeti ira tale ga kina na lotu Vakarisito e Efeso. (Efeso 4:3) E uqeti ira na mataveitacini mera duavata ena nodra muri Jisu Karisito, mera kua ni tatawasewase. Nira cakava oya era na marau ni cakava vata na ka ena dua ga na inaki. (Joni 17:22) Na inaki ni nona ivakasala o Paula vei ira na lewe ni ivavakoso e Korinica oya mera veisautaka na nodra rai mera vakaduavatataki kina, sega ni ka mera tautauvata kina.​—2 Korinica 13:9, 11.

E bibi tale ga me tiko na duavata ena vuku ni ivakavuvuli vakaivolatabu. Era kila na dau vakamuria na we ni yava i Jisu ni “dua bauga na vakabauta” me vaka ga ni “sa dua bauga na Kalou na Tamada kece ga.” (Efeso 4:1-6) Era na vakadeitaka gona na lotu Vakarisito ni sa salavata sara tiko ga nodra vakabauta kei na ka dina e vakatakila na Kalou ena nona Vosa, e baleti koya vaka kina na nona inaki. Era duavata ena nodra vakabauta na Kalou dina kei na lomana. Era bulataka tale ga na ivakatagedegede savasava e volai tu ena Vosa ni Kalou. (1 Korinica 6:9-11) Nira cakava oqori era duavata tiko ga kina na lotu Vakarisito ena ivakavuvuli kei na itovo.

Wali na Duidui

E sega ni kena ibalebale oqo nira na dusimaki yadudua sara tiko ga na lotu Vakarisito ena ka mera vakasamataka se cakava ena ituvaki kece ga era sotava. Ena levu sara na ka sa ra na dui vakatulewa ga. Dikeva mada e dua na kena ivakaraitaki. Era lomatarotarotaka e so na lotu Vakarisito ena imatai ni senitiuri na kena kani na lewenimanumanu e kau mai ena valenilotu e qaravi kina na matakau. Era vakabauta ni sa na caka sara tiko ga kina na sokalou lasu ena gauna e laukana kina na lewenimanumanu oqori, e so tale era nanuma ni sega ni bibi na vanua e kau mai kina. Ia, ni sa veivakasalataki ena ituvaki leqataki oqo o Paula, a sega ni bulia e dua na vakavuvuli me dusimaki ira na lotu Vakarisito ena ka mera cakava. Na kena veibasai ga, ena ka e kaya e vakadinata ni na sega ni tautauvata na nodra rai na tamata.a​—1 Korinica 8:4-13.

Edaidai, era na dui vakatulewataka beka na lotu Vakarisito na veika e baleta na nodra cakacaka, nodra bula, na ka ni veivakamarautaki era lakova kei na so tale. E so e vaka me dredre nira ciqoma na tikina oqori. De ra nanuma kina ni oqori sara ga na ka ena rawa ni vakavuna na veisei ena loma ni ivavakoso. Ia e dau yaco ga na ituvaka vaka oya. Me kena ivakaraitaki: E lailai wale sara na ikabakaba ni sere e tiko vei ira na dauvola sere, ia dua na ka na levu ni sere kei na ivakatagi e rawa nira bulia kina. Sa vaka kina o ira na lotu Vakarisito, nira yavutaka nodra vakatulewa ena loma tiko ga ni ivakavuvuli vakalou. Ia e levu toka na galala mera vakatulewa kina.

E rawa vakacava nira dei ena duavata na lotu Vakarisito, ra qai rokova tale ga na ka era sa vakatulewataka e so tale? E bibi me tiko na loloma. Nida lomana na Kalou, eda na vakamalumalumutaki keda ina nona ivakaro. (1 Joni 5:3) Nida lomani ira tale ga na wekada eda na rokova na dodonu e tu vei ira mera vakatulewataka e lomadra na ka era via cakava. (Roma 14:3, 4; Kalatia 5:13) E ivakaraitaki vinaka kina o Paula ni vakamalumalumutaki koya ena ka eratou sa vakatulewataka na ilawalawa dauvakatulewa ena imatai ni senitiuri me baleta e dua na ivakavuvuli. (Maciu 24:45-47; Cakacaka 15:1, 2) Ena gauna vata tale ga oqori, e uqeti ira kece na lotu Vakarisito mera rokova na ka era sa dui vakatulewataka na nodra itokani lotu Vakarisito.​—1 Korinica 10:25-33.

Me kua ni dua e vakalewai ke sa vakatulewataka na ka e sega ni veicoqacoqa kei na ivakavuvuli vakaivolatabu. (Jemesa 4:12) Ena yasana adua, na lotu Vakarisito yalodina ena sega ni vakabibitaka na nona dodonu ga e rawa ni lai vakacaraka na lomadra e so tale, se vakavuna sara ga na duiyaloyalo ena ivavakoso. Ena sega tale ga ni tukuna ni tu vua na dodonu me cakava na ka e vakatabuya na Vosa ni Kalou. (Roma 15:1; 2 Pita 2:1, 19) Noda lomana na Kalou ena moici kina na noda lewaeloma me salavata kei na rai ni Kalou. Oqo ena qai vakaduavatataki keda tiko ga kei ira noda itokani vakabauta vata.​—Iperiu 5:14.

[iVakamacala e ra]