Na Lotu Cava Mo Digia?

‘DINA ni duidui na lotu qai duidui na sala era muria, ia e dua ga na vanua era naulu kece tiko kina, ni dua ga na Kalou, se vakacava?’ E levu era duavata ena vakasama oqori nira vakabauta ni bibi na nodra lewena e dua na lotu, se mani lotu cava ga era digia mera muria.

Ni o rogoca ena imatai ni gauna na vakasama oqori eda na rairai nanuma beka ni dina, ni tiko e dua ga na Kalou, o Koya sa Kaukaua Duadua. (Aisea 44:6; Joni 17:3; 1 Korinica 8:5, 6) Ia, eda sega ni rawa ni raibaleta na duidui levu—⁠na veika era veicoqacoqa kina—⁠e kune ena kedra maliwa e vuqa na isoqosoqo lotu era kaya nira qarava na Kalou dina. E duidui vakalevu na nodra ivalavala, nodra vakabauta, nodra ivakavuvuli, kei na veika era gadreva. Ni sa rui duidui vakalevu, e dredre kina vei ira na lewe ni dua na lotu mera kila se ciqoma na veika era vakabauta kei na veika era vakavuvulitaka na veilotu tale e so.

Ena dua tale na yasana, a kaya o Jisu: “A Yalo na Kalou: ia ko ira sa lotu vua, e dodonu me ra lotu vakayalo ka vakaidina.” (Joni 4:24) Me vakaidina na qaravi ni Kalou, e dodonu li me kune e levu na vakasama veicoqacoqa me baleti koya, na nona inaki, kei na sala e vinakata me sokaloutaki kina? E dodonu beka meda vakabauta ni sega ni ka bibi vua na Kalou Kaukaua Duadua, na sala eda sokaloutaki koya kina?

Lotu Vakarisito Dina—E Liu kei na Gauna Oqo

So na gauna, e dau duidui na nodra rai na lotu Vakarisito ena imatai ni senitiuri me baleta e so na ka. Me kena ivakaraitaki, nona vosa tiko vei ira mai Korinica, a kaya na yapositolo o Paula: “Ni sa tukuni kemudou mai vei au, kemudou na veiwekani, ko ira na lewe ni vale i Kiloi, ni dou sa dauveileti vakai kemudou. Ia na ka oqo ka’u sa vosa kina, ni dou sa kaya yadua, Oi au sa nei Paula; ia, Oi au sa nei Apolosa, ia, Oi au sa nei Kifa; ia, Oi au sa nei Karisito.”​—1 Korinica 1:11, 12.

A taura beka vakamamada o Paula na veivakaduiduitaki oqo? E dodonu beka mera dui muria ga na nodra sala mera rawata kina na bula? Sega! A vakarota o Paula: “Ka’u sa vakamasuti kemudou, na veiwekani, e na yaca ni noda Turaga ko Jisu Karisito, mo dou tauvata kecega e na vosa, ia me kakua vei kemudou na veisei; mo dou veivinakati sara ni dou sa lomavata ka lewa vata.”​—1 Korinica 1:10.

Io, ena sega ni rawati na duavata ena vakabauta ena dela ni veivakasaurarataki. Ena rawati wale ga ke dikeva vakavinaka na tamata yadua na veika e vauci kina, ra ciqoma qai duavata ena dua na vakasama. Oya na vuna e bibi kina na noda vulica vakataki keda na Vosa ni Kalou da qai vinakata dina na bulataka na ka eda vulica, meda marautaka kina na duavata a cavuta o Paula. E rawa beka ni kune na duavata vaka oqo? Me vaka e tukuni ena ulutaga e liu, ni se makawa sara na nona dau veitaratara na Kalou kei ira na nona ilawalawa tamata. E rawa beka nida kunea nikua na ilawalawa oqori?

Yaga ni Veimaliwai kei na iLawalawa e Vakadonuya na Kalou

A taroga ena dua na gauna na daunisame o Tevita: “I Jiova, o cei ena tiko e na nomuni vale? O cei ena tiko vakadua e na nomuni ulu-ni-vanua tabu?” E vakavure vakasama dina na taro oqori. Ia, a qai sauma o Tevita: “O koya sa lako vakadodonu, ka kitaka nai valavala dodonu, ka vosa dina tiko mai na vu ni yalona.” (Same 15:1, 2) Na nona kila vinaka na iVolatabu e dua, ena vukei koya me kunea na lotu e laurai kina na ivakatagedegede vakalou oqori. Nida lewena na ilawalawa oqori, eda na marautaka kina na veimaliwai e veitaraicake kei ira era qarava na Kalou ena duavata, qai “vakayalo ka vakaidina.”

Era vakadinadinataka na iVakadinadina i Jiova ni rawa ni kune na duavata ena vakabauta kei na cakacaka ena vuravura tatawasewase oqo. E tiko tale ga ena kedra maliwa o ira na duikaikai, kei ira era lako mai ena so na veimatalotu. E so sara mada ga era sa mai iVakadinadina oqo, era a sega tu ni vakadeitaka e liu ni bula na Kalou se ra vakabauti koya. So tale era sega ga ni dau kauaitaka tu na lotu. Mai na vuqa gona na veimatalotu, duidui itovo vakavanua, vaka kina na ivakatagedegede ni vuku vakatamata, era sa tabili mai na tamata yadua ena gauna oqo mera mai duavata ena sokalou, na ka e sega ni kune rawa ena vuravura nikua.

E yavutaki ga na veivakaduavatataki oqo ena Vosa ni Kalou, na iVolatabu. Io, era kila na iVakadinadina i Jiova nira na sega ni rawa ni tukuna na ka mera cakava na so tale. Ia era marau mera vakaitavi ena nodra uqeti na tani mera vulica na iVolatabu, me rawa ni qai yavutaki vinaka kina na nodra digidigi e vauca na nodra sokalou. Ena sala oqo era na vakila tale ga kina e levu, na yaga ni nodra qarava na Kalou “vakayalo ka vakaidina.”

Nikua, e sa qai kaukaua cake sara na veivakamuai e veivakaleqai. E bibi gona na noda digitaka vinaka na noda itokani. E kaya na iVolatabu ni na “vuku mai ko koya sa malele vata kei ira na vuku” qai “dau vakarusa na i vakarau vinaka ko ira na i tokani ca.” (Vosa Vakaibalebale 13:20; 1 Korinica 15:33, VV) E itataqomaki gona na veitokani kei ira na tamata dina ni Kalou. Ni vakaroti keda na iVolatabu: “Me da veivakananumi keda vakai keda me da veivakatakatai me dauloloma kai valavala vinaka: me da kakua ni biuta na vakasoqoni vata, me vaka nai valavala ni tamata eso; me da veivakamasuti tiko: ia me vakalevu, ni dou sa raica sa toro voleka mai na siga.” (Iperiu 10:24, 25) E ka ni veivakalougatataki dina nira dau veivukei vakayalololoma na noda itokani dina era tacida vakayalo, meda vakayacora kina na noda itavi vua na Kalou!

E vakadinata o Ottmar na vakasama oqo. A susu o koya mai na dua na vuvale lotu Katolika mai Jamani, qai muduka na nona lako i lotu. A vakamacalataka: “Niu lai lotu, au na suka mai ena yalorarawa.” Ia, a sega ni yali na nona vakabauta na Kalou. E muri sa qai veitaratara kei ira na iVakadinadina i Jiova qai vakadeitaka kina ni o ira oqo era tamata dina ni Kalou. A raica rawa o koya na kena gadrevi me veimaliwai kei ira. Nikua e kaya: “Niu dua na lewe gugumatua ni isoqosoqo e qaravi Jiova e vuravura raraba, au vakila kina na vakacegu ni lomaqu kei na noqu vakasama. E toso tiko ga na noqu vukei meu rawata na kilaka dodonu ena iVolatabu. Oqori e dua dina na ka talei vei au.”

Ra Sureti na Vaqaqara Voli

E laurai ni dau levu sara na ka e rawati ke ra cakacaka vata e dua na ilawalawa, sega ni nodra dui cakava ga vakataki ira na ka. Me kena ivakaraitaki, na vosa ni tautau i Jisu vei iratou na nona imuri: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.” (Maciu 28:19, 20, VV) Ena rawati vakacava na itavi oqo ke sega na isoqosoqo me veidusimaki? Ena talairawarawa vakacava e dua ina ivakaro vakaivolatabu oqo, ke saga taudua ga me qarava na Kalou?

Ena loma ni yabaki sa oti, era solia rawa na iVakadinadina i Jiova e vuravura raraba e 91,933,280 na ivolatabaki era yavutaki ena iVolatabu, ivola lalai, kei na brochure, vaka kina e 697,603,247 na ivoladraudrau, era rogoca rawa kina e vica vata na milioni na tamata ena 235 na vanua na itukutuku vinaka mai na Vosa ni Kalou. Oqo na ivakadinadina vakasakiti ni levu cake sara na ka e rawati ni duavata na isoqosoqo qai tuvanaki vakamatau, mai na nona vinakata e dua me cakacaka vakataki koya ga!

Me ikuri ni nodra veisoliyaka yani na ivola vakaivolatabu, era dau caka vuli iVolatabu sega ni saumi tale ga na iVakadinadina i Jiova, ena nodra vukei na tamata me titobu na nodra kila na veika e vinakata na Kalou. Ena yabaki sa oti, e rauta ni 5,726,509 na levu ni vuli iVolatabu vaka oqo a vakayacori vakailawalawa se yadudua. Na veivakavulici vakaivolatabu vaka oqo e sa vukea e vica na milioni mera yavutaka vinaka kina na nodra digidigi e vauca na nodra sokalou. Oni sureti tale ga mo ni vulica na ivakatagedegede vakalou e koto ena iVolatabu. Mo qai vakatulewa kina.​—Efeso 4:13; Filipai 1:9, VV; 1 Timoci 6:20; 2 Pita 3:18.

Ke o via vakamarautaka na Kalou, e bibi dina mo lewe ni dua na lotu—⁠e sega ni kena ibalebale oqori mo lewena e dua rawa ga na lotu. Ia, e dodonu mo yavutaka na nomu digidigi ena kilaka dodonu mai na iVolatabu, o na sega ni yavutaka ena ivakavuvuli e sega ni vakadeitaki se ena veika ga o rogoca. (Vosa Vakaibalebale 16:25) Vulica na veika e kilai tani kina na lotu dina, qai vakatauvatana kei na nomu lotu. Oti mo qai vakatulewa.​—Vakarua 30:19.

[iYaloyalo ena tabana e 7]

Era duavata na iVakadinadina i Jiova ena vuravura tatawasewase oqo