Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • w05 1/15 t. 4-7
  • Sa Lewai Oti Tu Beka na Nomu Bula?

Sega na kena vidio.

Vosota, sega ni laurai rawa na vidio.

  • Sa Lewai Oti Tu Beka na Nomu Bula?
  • Na Vale ni Vakatawa Kacivaka na Matanitu i Jiova—2005
  • Ulutaga Lailai
  • iKuri ni Ulutaga
  • E Vei Vei Rau​—Sa Lewai Oti tu na Noda Bula se Noda na Galala ni Vakatulewa?
  • E Lesi na Tamata Yadua se Dua na iLawalawa?
  • Ena Vakatau ga Vei Iko na Nomu Bula
  • O Cei e Lewa na Nomu Bula?
    Na Vale ni Vakatawa Kacivaka na Matanitu i Jiova—2005
  • Na Galala Dina
    Na Vale ni Vakatawa Kacivaka na Matanitu i Jiova (Vulici)—2018
  • Voleka ni Oti na Leqa ni Kawatamata!
    Na Vale ni Vakatawa Kacivaka na Matanitu i Jiova—2002
  • E Dau Tukuna o Jiova ‘Na iVakataotioti Mai na iVakatekivu’
    Na Vale ni Vakatawa Kacivaka na Matanitu i Jiova—2006
Raica Tale Eso
Na Vale ni Vakatawa Kacivaka na Matanitu i Jiova—2005
w05 1/15 t. 4-7

Sa Lewai Oti Tu Beka na Nomu Bula?

E SA lewai oti tu beka na itinitini ni noda bula? Sega li ni na cakayaco ena noda bula na digidigi eda cakava?

Kaya mada ke lewa ga na tamata na ka e yaco ena nona bula. Ena rawa beka me lesi oti tu e dua me taura e dua na itutu vakacakacaka se cakava e dua na itavi? E rawa vakacava vua na Kalou me cakava na lomana e vuravura ke rawa ni vakatulewataka ga na tamata na ka e yaco ena nona bula? Na iVolatabu e sauma vakamatata na taro oqori.

E Vei Vei Rau​—Sa Lewai Oti tu na Noda Bula se Noda na Galala ni Vakatulewa?

Dikeva mada na sala e buli keda kina na Kalou o Jiova. E kaya na iVolatabu: “E nai tovo ni Kalou sa buli koya [na tamata] . . . ; na tagane kei na yalewa sa buli rau ko koya.” (Vakatekivu 1:27) Nida a buli meda ucuya na Kalou, e rawa gona nida bulataka na nona itovo qoroi, me vaka na loloma, lewadodonu, vuku, kei na kaukaua. Na Kalou e solia tale ga vei keda na galala ni vakatulewa. Oqori na vuna eda duidui sara kina vei ira na veika bula tale e so e vuravura. E rawa nida digia meda muria se sega, na veidusimaki ni Kalou me baleta na itovo. Sa rauta me kaya kina na parofita o Mosese: “Au sa cavuti lomalagi kei vuravura edaidai me kila, ni’u sa tauca e matamuni na bula kei na mate, na veivakalougatataki kei na veicudruvi: ia mo ni digitaka mada na bula, mo ni bula kina, koi kemuni kei na nomuni kawa: mo ni lomani Jiova na nomuni Kalou, mo ni vakarorogo ki na nona vosa, mo ni kabiti koya talega.”​​—Vakarua 30:​19, 20.

Ia, na isolisoli ni galala ni vakatulewa oqo e vakaiyalayala ga. Eda se vauci tiko ga ena lawa e baleta na itovo e kotora na Kalou kei na lawa e vauca na veika buli e lomalagi kei vuravura, me dei qai rawati tale ga na bula vakacegu. A kotori na veilawa oqori meda vinaka kina, ia ke dua e vorata ena sotava ga kina na leqa. Vakasamataka mada na ka ena yaco ke da vorata na lawa e vauca na idre ni vuravura, da qai rika mai na dua na vale e tabavica!​​—Kalatia 6:7.

Na galala ni vakatulewa e yalana tale ga na ka e rawa nida cakava, ia era sega ni cakava rawa oya na manumanu lolovira. A taroga gona na vuku o Corliss Lamont: “E rawa vakacava meda namaka vua na tamata me vakaraitaka na itovo kilikili, ra qai totogitaki nira cakacala, kevaka eda . . . vakabauta ni sa lewai oti tu na noda bula kei na ka eda na cakava?” Ena cala toka oya. Na manumanu e porokaramutaki tu na nona bula me vaka ga na kompiuta, ni rau cakacala erau na sega ni saumitaro kina. Na galala ni vakatulewa e vakataqara vei keda e dua na icolacola bibi, eda na saumitaro ena veika eda cakava.

E tawadodonu qai sega ni loloma na Kalou o Jiova ke sa lewa oti tu ni bera nida sucu, na sala meda muria, ni oti oya ena qai totogitaki keda tale ena vuku ni noda ivalavala! Ena sega ni cakava vaka oqori baleta ‘e Kalou loloma,’ qai “dodonu na nonai valavala kecega.” (1 Joni 4:8; Vakarua 32:4) E solia vei keda na galala ni vakatulewa, ena cala gona ke sa ‘nakita oti tu mai na ivakatekivu o cei me na bula tawamudu kei koya ena cudruvi tawamudu,’ me vaka era kaya o ira era vakabauta ni sa lewa oti tu na Kalou na noda bula. Na galala gona ni vakatulewa e vakacala na vakasama oqori.

E vakamatatataka na iVolatabu ni digidigi eda cakava e rawa ni veisautaka na ka ena yaco ena noda bula. Me kena ivakaraitaki, a vakamasuti ira vaka oqo na tamata ca na Kalou, ena nona kaya: “Dou dui lesu yadua edaidai mai na nonai tovo ca, kei na ca ni nonai valavala . . . ka’u na qai sega ni vakacacani kemudou.” (Jeremaia 25:​5, 6) Ena tawayaga na veivakamasuti oqo ke a sa lewa oti tu na Kalou na ka ena yaco ena nona bula e dua. Kuria oya, e kaya na Vosa ni Kalou: “O koya mo dou qai veivutuni ka saumaki mai, me bokoci kina na nomudoui valavala ca, me yaco kina na gauna ni vakacegu mai na mata ni Turaga.” (Cakacaka 3:​19) Na cava me vakauqeti ira kina na tamata o Jiova mera veivutuni qai saumaki mai, ke kila o koya ni sega ni tu vei ira na kaukaua mera veisautaka na ka ena yaco ena nodra bula?

Na iVolatabu e cavuti ira e so a sureta na Kalou mera veiliutaki vakatui kei Jisu Karisito mai lomalagi. (Maciu 22:14; Luke 12:32) Ia, e kaya na iVolatabu ni na kau laivi vei ira na itavi lavotaki oqori ke ra sega ni vosota me yacova na ivakataotioti. (Vakatakila 2:​10) Na cava e sureti ira kina na Kalou ke sa vakatulewataka oti tu nira na sega ni digitaki? Dikeva tale mada ga na nona vosa na yapositolo o Paula vei ira na nona itokani vakabauta vata. A kaya: “Kevaka eda sai valavala ca ka sa yaloda kina, ni da sa kila oti nai vakavuvuli dina, sa qai sega tale e dua tani nai soro ni valavala ca.” (Iperiu 10:26) Ena tawayaga wale na ivakaro oqori ke a sa lewa oti tu na Kalou na ka ena yaco ena nodra bula. Ia, e so era kaya ni iVolatabu e tukuna ni sa lesia oti tu na Kalou e so mera na veiliutaki vata kei Jisu Karisito.

E Lesi na Tamata Yadua se Dua na iLawalawa?

“O koya [na Kalou] ka sa vakalougatataki keda e na ka ni veivakalougatataki vakayalo kece ga, mai na veiyasana vakalomalagi e na vuku i Karisito,” e kaya na yapositolo o Paula, “ni sa bera ni tauyavutaki ko vuravura, sa digitaki keda tu na Kalou me da nona e na vuku i Karisito . . . A sa lesi keda ko koya e na nona loloma me da vakabau me da luvena e na vuku i Jisu.” (Efeso 1:​3-5, VV) A lesi cei na Kalou, qai cava e vakaibalebaletaka na nodra digitaki “ni sa bera ni tauyavutaki ko vuravura”?

Na tikinivolatabu oqo e tukuna ni Kalou a digitaka e so na kawa i Atama, na vuda, mera na veiliutaki vata kei Karisito mai lomalagi. (Roma 8:​14-​17, 28-​30; Vakatakila 5:​9, 10) E nanumi ni a lesi ira oti tu na Kalou o Jiova mera taura na itavi lavotaki oqori ena udolu vakacaca na yabaki ni bera nira sucu, ia e veicalati sara ga oqori kei na galala ni vakatulewa a soli vua na tamata. A lesia gona na Kalou e dua na ilawalawa, sega ni tamata yadua.

Me kena ivakaraitaki: Taura mada ke vakatulewataka e dua na matanitu me tekivutaka e dua na taba ni cakacaka. Ena lesia na ka me cakava, na ka me lewa, kei na kena levu. Dua na gauna e muri ni sa tuvanaki oti, e sa na tekivu cicivaki na taba ni cakacaka oqo, ra qai tabaka o ira na lewena e dua na kena ivakamacala lekaleka: “Ena vica na yabaki sa oti e sa lewa oti tu mai na matanitu na veika e vauca na neimami cakacaka. Ia oqo, keimami sa tekivu cakava tiko na cakacaka keimami lesi kina.” E rawa beka ni o kaya ni sa lesia oti tu mai na matanitu ena vica na yabaki sa sivi se o cei soti ena lewena na taba ni cakacaka oqo? Sega. Ena vakasama vata ga oqori, a lewa o Jiova me vakaduria e dua na taba ni cakacaka lavotaki me wali kina na leqa ni ivalavala ca i Atama. A lesia tu mai vakailiu e dua na ilawalawa me cicivaka​​—sega ni tamata yadua. Era a digitaki o ira oqori ena dua na gauna e muri, kei na digidigi era na cakava ena nodra bula ena vakatau kina na nodra vakadonui se sega.

Na vuravura cava e vakaibalebaletaka na yapositolo o Paula ena gauna e tukuna kina: “Ni sa bera ni tauyavutaki ko vuravura, sa digitaki keda tu na Kalou me da nona e na vuku i Karisito”? Na vuravura e cavuta e ke o Paula e sega ni kena a tauyavutaka na Kalou ena gauna a buli Atama kina kei Ivi. Ni vuravura oya e vakatokai me “vinaka sara”​​—galala mai na ivalavala ca kei na leqa e vu mai kina. (Vakatekivu 1:​31) A sega ni gadrevi me “sereki” mai na ivalavala ca.​​—Efeso 1:​7, VV.

Na vuravura gona e vakaibalebaletaka e ke o Paula, oya na kena a qai mai tauyavutaki ni rau sa ivalavala ca oti o Atama kei Ivi ena were o Iteni​​—na vuravura oqo e duidui vakalevu mai na kena a nakita taumada na Kalou. A tekivutaki na vuravura oqo vei ira na luve i Atama kei Ivi. Sa ra qai lewena gona na tamata era vakanadakuya na Kalou, ra qai bobula ena ivalavala ca kei na leqa e vu mai kina. Na vuravura gona e cavuta e ke o Paula e dusi ira na tamata e rawa nira na vakabulai, nira sega ni vakataki Atama kei Ivi ena nodrau nakita me rau ivalavala ca.​​—Roma 5:​12; 8:​18-​21.

A walia totolo na Kalou o Jiova na leqa a yaco ena were o Iteni ena vuku ni talaidredre. Mani lesia sara na taba ni cakacaka lavotaki ena gauna a gadrevi kina​​—oya na Matanitu ni Kalou ena veiliutaki kina na Mesaia o Jisu Karisito​​—ena vakayagataka me sereki ira kina na kawatamata mai na ivalavala ca a vakavuna o Atama. (Maciu 6:​10, VV) A vakayacora oqori na Kalou “ni sa bera ni tauyavutaki ko vuravura,” na kawatamata e ganiti ira mera vakabulai, oya ni se bera ni rau vakaluveni na vuda talaidredre o Atama kei Ivi.

Vakavuqa, ena lalawataka na tamata me vakaotia na ka e cakava. E semai vata na ivakavuvuli ni sa lewai oti tu na noda bula kei na vakasama ni lalawataka tu vakamatailalai na Kalou na veika e vuravura kei na lomalagi. Na veika kece era bula kina e sa lewai oti tu. “E levu na vuku era vakabauta,” e vola o Roy Weatherford, “ni sa dodonu ga me lewai kece tu mai na noda bula, ni oqori na ka e vakadeitaka ni Kaukaua Duadua na Kalou.” Ia, e gadrevi dina beka vua na Kalou me vakatakila vakamatailalai vakailiu na veika kece ena yaco?

Me vaka ni tawavakaiyalayala na nona kaukaua qai sega ni katumi rawa na nona vuku, sega ni vakabekataki ni na walia rawa o Jiova na leqa tubukoso e vu ke ra taurivaka cala na galala ni vakatulewa na nona ibulibuli. (Aisea 40:​25, 26; Roma 11:33) Sega ni gadrevi me lalawataka o Jiova na veika matailalai me cakava, ni rawa vua me walia na leqa oqori ena tikinigauna vata ga oya. Na Kalou Kaukaua Duadua e sega ni vakataki keda na tamata ivalavala ca e vakaiyalayala ga na ka eda rawa ni cakava, e sega gona ni gadreva me vakamacalataka vakamatailalai vakailiu na veika ena yaco ena noda dui bula e vuravura. (Vosa Vakaibalebale 19:21) Ena so na ivakadewa ni iVolatabu ni Efeso 3:​11, VV, e tukuni kina ni tiko na nona “i naki tawa mudu” na Kalou, ia e sega ni lewa oti tu na ka ena yaco.

Ena Vakatau ga Vei Iko na Nomu Bula

E tiko na nona inaki na Kalou me baleta na vuravura qele eda bula tu kina oqo, qai inaki oqori e sa lewai oti tu. Na Vakatakila 21:​3, 4 e kaya: “Raica, a vale ni Kalou sa tu vei ira na tamata, ia ena tiko vata kei ira ko koya, ia era na nona tamata, ia ko koya na Kalou ena tiko vata kei ira, me nodra Kalou. Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” Io, ena yaco na vuravura oqo me parataisi, me vaka ga a nakita taumada o Jiova. (Vakatekivu 1:​27, 28) Ia na taro, O na bula beka kina? Ena vakatau oqori ena digidigi o cakava ena gauna oqo. E sega ni lewa oti tu o Jiova na ka ena yaco ena nomu bula.

Ena yavu ga ni isoro ni veivoli ni Luve ni Kalou, o Jisu Karisito, e rawa kina vua e dua me rawata na bula tawamudu ni cakacakataka na nona vakabauta. (Joni 3:​16, 17; Cakacaka 10:​34, 35) “O koya sa vakabauta na Luvena, sa rawata na bula tawa mudu,” e kaya na iVolatabu. “Ko koya sa sega ni vakabauta na Luvena, ena sega ni raica na bula.” (Joni 3:​36) O rawa ni digitaka na bula ke o vulica na veika me baleta na Kalou, na Luvena, kei na nona inaki ena iVolatabu qai o bulataka sara. O koya ga e muria na vuku dina e volai tu ena Vosa ni Kalou e vakadeitaki ni na vakila “na vakacegu ka sega ni rerevaka e dua na ka ca.”​​—Vosa Vakaibalebale 1:​20, 33.

[iYaloyalo ena tabana e 5]

Eda sega ni tautauvata kei ira na manumanu lolovira, nida na saumitaro ena ka eda dui cakava

[Credit Line]

Ikeli: Foto: Cortesía de GREFA

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta