Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • w07 10/1 t. 12-15
  • Veitikina Bibi Mai na iVola na Joeli kei na Emosi

Sega na kena vidio.

Vosota, sega ni laurai rawa na vidio.

  • Veitikina Bibi Mai na iVola na Joeli kei na Emosi
  • Na Vale ni Vakatawa Kacivaka na Matanitu i Jiova—2007
  • Ulutaga Lailai
  • iKuri ni Ulutaga
  • “ULEI NA SIGA KO YA”​—NA VUNA?
  • (Joeli 1:1–​3:​21)
  • “MO VAKARAU MO VEITAVAKI KEI NA NOMU KALOU”
  • (Emosi 1:1–​9:​15)
  • Tukuna ena Doudou na Vosa ni Kalou
    Na Vale ni Vakatawa Kacivaka na Matanitu i Jiova—2004
  • Ena Cudruvi Ira na Tamata Ca o Jiova
    Na Vale ni Vakatawa Kacivaka na Matanitu i Jiova—2004
  • Vakatotomuria na iVakaraitaki i Emosi
    Noda Cakacaka Vakaitalatala—2013
  • Golevi Jiova, ni Dauvakatovolea na Lomada
    Na Vale ni Vakatawa Kacivaka na Matanitu i Jiova—2004
Na Vale ni Vakatawa Kacivaka na Matanitu i Jiova—2007
w07 10/1 t. 12-15

E Bula na Vosa i Jiova

Veitikina Bibi Mai na iVola na Joeli kei na Emosi

E TUKUNA ga o Joeli ni o koya “na luve i Pecueli.” (Joeli 1:1) Ena ivola e vakayacani vua, e vakatabakidua na nona volavola ina nona itukutuku, e lailai sara na ka e vola me baleta na veika tale e so, sega mada ga ni kilai na gauna e parofisai kina​—e nanumi ni a tekivu parofisai rauta na 820 B.S.K., ni oti e ciwa na yabaki nona veiliutaki vakatui e Juta o Usaia. Na cava e sega ni tukuna kina e levu na ka me baleti koya o Joeli? Kena irairai ni a via vakabibitaka ga na itukutuku, sega ni o koya e vakasavuya.

Ena gauna i Usaia, a lesi tale ga me dua na parofita o Emosi, e dua na lewenivanua e Juta e ‘ivakatawa ni sipi qai dausamaki lolo.’ (Emosi 7:​14) O Joeli a parofisai voli ga e Juta, ia o Emosi a lesi ina vualiku, vei ira na tini na yavusa e Isireli. A mai cava oqori rauta na 804 B.S.K. ni sa lesu i Juta na parofita. Na ivola na Emosi e volai ena vosa rawarawa ga ia e matata.

“ULEI NA SIGA KO YA”​—NA VUNA?

(Joeli 1:1–​3:​21)

A raivotutaka o Joeli na nodra kabakoro na nuve, vodre, kei na kokoroti. E vakaibalebale tiko oqori ina “dua na mataqali lewe vuqa ka kaukauwa” ra qai “tamata qaqa.” (Joeli 1:4; 2:​2-7) “Ulei na siga ko ya,” e kaya o Joeli, “ni sa voleka na siga i Jiova, ia ena yaco mai me vaka na veivakarusai maivei Koya sa Kaukauwa.” (Joeli 1:​15) E vakaroti ira na lewe i Saioni o Jiova: “Mo dou lesu mai vei au e na vu ni yalomudou.” Ke ra muria na ivakaro oqori, ena “yalololoma vei ira na nona tamata” o Jiova, qai kauti ira vakayawa na manumanu vakasosa​—ina “tokalau.” Ia, ni bera ni yaco mai na nona siga levu, ena ‘sovaraka na yalona vei ira na tamata kece ga’ o Jiova qai “vakatakila na ka e veivakidacalataki mai lomalagi kei vuravura.”​—Joeli 2:​12, 18-​20, 28-​31.

Era bolei na veimatanitu: “Dou tukitukia na bati ni nomudoui siviyara mei seleiwau, kei na nomudoui sele ni samaki me moto,” mo ni vakarau ena ivalu. E tukuni mera ‘lako cake ki na buca i Jiosafati,’ na vanua era na lewai ra qai vakarusai kina. “Ia ko Juta, ena tawa tikoga ka sega ni mudu.”​—Joeli 3:​10, 12, 20.

Saumi na Taro Vakaivolatabu:

1:​15; 2:​1, 11, 31; 3:​14​—Na cava na “siga i Jiova”? Na gauna ena vakarusai ira kina nona meca o Jiova qai vakabulai ira ga na dau sokalou dina. Kena ivakaraitaki, na siga vata vaka oqo a yaco ena 539 B.S.K., ena nona vakamalumalumutaki Papiloni makawa o Mitia kei Perisia. (Aisea 13:​1, 6) Sa voleka e dua tale “na siga i Jiova” me na vakatauca kina nona lewa vei ‘Papiloni na Ka Levu’​—na lotu lasu kece e vuravura.​—Vakatakila 18:​1-4, 21.

2:​1-​10, 28​—E vakayacori vakacava na parofisai me baleta na nodra kabakoro na manumanu lalai daukata? Sega ni volai ena iVolatabu na kabakoro ni manumanu lalai daukata ena vanua o Kenani, me vaka na vakaitamera ni vanua e vakamacalataki ena ivola i Joeli nira kabakoro kina. O koya gona na kabakoro e vakamacalataka o Joeli, e vakatayaloyalotaka na veika a yaco ena 33 S.K., ena nona sovaraka o Jiova nona yalo tabu vei ira na imuri taumada i Karisito qai tekivu mera vunautaka na itukutuku e vakacudrui ira na iliuliu ni lotu lasu. (Cakacaka 2:​1, 14-​21; 5:​27-​33) E noda itavi dokai tale ga nikua meda vakaitavi ena cakacaka vata oqo.

2:​32​—Na cava na kena ibalebale meda “masuta na yaca i Jiova”? Oya na noda kila na yaca oya, doka vakalevu, vakararavi qai nuitaki koya e vakatokai ena yaca oya.​—Roma 10:​13, 14.

3:​14​—Na cava na “buca ni veicudruvi”? Na vanua vakaivakatakarakara ena tauca kina na Kalou na nona lewa. Ena gauna i Jiosafati na Tui Juta, na ibalebale ni yacana “Turaga ni Lewa o Jiova,” a vakabulai ira na lewe i Juta na Kalou mai vei ira na veimatanitu yavolita ena nona vakavuna mera veilecayaki na kena mataivalu. Koya gona na vanua oya e vakatokai tale ga “na buca i Jiosafati.” (Joeli 3:​2, 12) Ena noda gauna, e dusia tiko e dua na vanua vakaivakatakarakara era na qaqi kina na veimatanitu, me vaka na vua ni vaini ena ikeliniwaini.​—Vakatakila 19:15.

Na Ka Eda Vulica:

1:​13, 14. Me rawati na bula, e bibi na veivutuni dina kei na nona kilai na Kalou dina o Jiova.

2:​12, 13. Na veivutuni dina e vu mai lomada. E okati kina na kena ‘dresulaki na yaloda,’ sega ni ‘dresulaki ni isulu’ se na ka e raici e taudaku.

2:​28-​32. O koya ga “sa na masuta na yaca i Jiova, ena bula” ena “siga i Jiova, e levu ka rerevaki.” Eda vakavinavinaka ni sovaraka o Jiova na nona yalo tabu vei ira na veimataqali tamata, o ira na qase, gone, tagane kei na yalewa mera parofisai, oya na nodra tukuna tiko yani “na nona cakacaka e veivakurabuitaki na Kalou”! (Cakacaka 2:​11) Ni sa roro voleka mai na siga i Jiova, e dodonu me “savasava tiko ga noda ivalavala” qai salavata kei na “yalo ni qaravi Kalou.”​—2 Pita 3:​10-​12, NW.

3:​4-8, 19. A parofisaitaka o Joeli nira na totogitaki na veimatanitu yavoliti Juta, ena nodra vakacacani ira na nona tamata digitaki na Kalou. Na parofisai oya a yaco dina ena nona vakarusai Taia e vanua, o Nepukanesa na tui kei Papiloni. Oti oya, a vakamalumalumutaki Taia e yanuyanu o Alekisada na Ka Levu, ra mate e vica vata na udolu na kena sotia kei ira na tamata rogo ra qai volitaki mera bobula e le 30,000 na lewenivanua. Era sotava tale ga oqori na kai Filisitia ena veiliutaki i Alekisada kei ira era sosomitaki koya. Ena ikava ni senitiuri B.S.K., sa mai laladidi o Itomi. (Malakai 1:3) Na kena yaco na parofisai kece oya, e vaqaqacotaka noda vakabauta ni o Jiova e dau vakayacora nona vosa ni yalayala. E vakaraitaka tale ga na ka ena cakava vei ira na veimatanitu era dau vakacacani ira nona tamata nikua.

3:​16-​21. “Ena yavavala talega na lomalagi kei vuravura,” qai vakatauca o Jiova na kedra itotogi na veimatanitu. “Ia ko Jiova ena nodrai drodro na nona tamata,” ena vakacegui ira mera bula ena parataisi. Dodonu meda vakadeitaka tiko ga meda voleka vua, ni sa voleka sara na gauna me vakatauca kina nona lewa ena vuravura ca oqo.

“MO VAKARAU MO VEITAVAKI KEI NA NOMU KALOU”

(Emosi 1:1–​9:​15)

E via vakasavuya o Emosi e dua na itukutuku vei ira na matanitu meca era yavoliti Isireli, oka tale ga kina o Juta kei Isireli. Ena vakarusai o Siria, Filisitia, Taia, Itomi, kei Moapi nira dau vakatotogani ira na tamata ni Kalou. Era na vakarusai tale ga o ira na lewe i Juta “ni ra sa beca na vunau i Jiova.” (Emosi 2:4) Vakacava na tini na yavusa e Isireli? Nona caka cala e okati kina nona dau vakacolasau vei ira na dravudravua, nona itovo dukadukali, kei na itovo veibeci vei ira na parofita ni Kalou. E vakarota o Emosi ni o Jiova ena “cudruva na veicabocabo-ni-soro mai Peceli” qai “vakacataka na vale ni vula i liliwa, kei na vale ni vula i katakata.”​—Emosi 3:​14, 15.

Dina ni levu na itotogi sa tau oti, ia era se yalokaukaua ga na Isireli dau qaravi matakau. E kaya vei ira o Emosi: “Mo vakarau mo veitavaki kei na nomu Kalou.” (Emosi 4:​12) Na ibalebale ni siga i Jiova vei Isireli oya nona ‘kau vakabobula me sivi o Tamasiko,’ ina vanua o Asiria. (Emosi 5:​27) A sega ni bau rere o Emosi ni tusaqati koya e dua na bete e Peceli. “Sa yaco mai nai vakataotioti vei ira na noqu tamata na Isireli,” e kaya o Jiova vei Emosi. “Au na sega sara ni vosoti ira tale.” (Emosi 8:2) Gauna ena vakatauitotogi kina na Kalou, na ulunivanua cecere se na ibulubulu ena sega ni taqomaki ira rawa. (Emosi 9:​2, 3) Ia e yalataki nira na vakalesui mai. E tukuna o Jiova: “Ka’u na kauti ira tale mai na noqu tamata na Isireli era vakabobulataki, ka ra na tara na veikoro lala, ka vakatawa; ka ra na tea na veiwere-ni-vaini, ka gunuva na kena waini; era na cakava talega na were, ka kania na vuana.”​—Emosi 9:​14.

Saumi na Taro Vakaivolatabu:

4:1​—E vakatayaloyalotaki cei na ‘bulumakau ni Pasani’? Na vanua cecere e koto kina o Pasani ena tokalau ni wasawasa kei Kalili, e dau kilai me vanua vinaka ni susu manumanu, okati kina na bulumakau, baleta ni vanua veico bulabula. O Emosi e vakatauvatani ira na yalewa dau lomana na iyau ni Samaria kei na bulumakau ni Pasani. Kena irairai ni o ira na yalewa oqo era dau vakaukauataki ira “nodra turaga,” se watidra, mera vakasaurarataki ira na dravudravua me rawati kina na ka era vinakata.

4:6​—Na cava e vakaibalebaletaki ena ivosavosa ‘savasava ni bati’? E rawa ni vakaibalebaletaki ina gauna ni dausiga, ni dau savasava tu ga na bati ni sega na kakana me laukana.

5:5​—Ena sala cava mera ‘kua ni golevi Peceli’ kina na Isireli? A tauyavutaka o Jeropoami na sokaloutaki ni luve ni bulumakau e Peceli. Tekivu mai na gauna oya, sa vanua sara ga ni qaravi kalou lasu na korolevu oya. O Kilikali kei Pieri-sepa e vanua tale beka ga era tiko kina na vukitani. Me kua nira sotava na leqa levu sa tukuni oti mai, ena gadrevi vei ira na Isireli mera muduka na ilakolako vakalotu ina veivanua oqo ra qai tekivu vakasaqarai Jiova.

7:1​—Cava e vakaibalebaletaki ena “tamusuki oti na nona co na tui”? E rairai vakaibalebaletaki tiko ena ivakacavacava e lavaka na tui me qaravi kina o ira na nona tamata dauvodo ose kei na nona manumanu. Me dau saumi na ivakacavacava “ni sa qai tekivu me tubu na co emuri.” Oti sa na qai tekivu tamusuki na itei. Ia ni bera nira cakava oya, ra sa vakacacana na nodra itei ra kania tale ga na co ni vanua na vodre.

8:​1, 2​— Na cava e dusia na “dua na sova vuata dreu”? E dusia na kena sa voleka na siga i Jiova. Na vuata ni vulaikatakata e dau beti ni sa voleka ni cava na dua na yabaki ni vakayagataki qele. Ni vakavuna o Jiova me raica o Emosi e “dua na sova vuata dreu,” e vakaibalebaletaka ni sa voleka ni cava nodra gauna na Isireli. E kaya kina na Kalou vei Emosi: “Sa yaco mai nai vakataotioti vei ira na noqu tamata na Isireli; au na sega sara ni vosoti ira tale.”

Na Ka Eda Vulica:

1:​3, 6, 9, 11, 13; 2:​1, 4, 6. E kaya o Jiova me baleta na nona cudruvi Isireli, Juta kei na ono na matanitu yavoliti rau: “Ka’u na sega kina ni vakadaroya.” Ena sega ni drotaki rawa na vakatauitotogi i Jiova.​—Emosi 9:​2-5.

2:​12. Me kua nida vakayalolailaitaki ira na painia gugumatua, ivakatawa dauveilakoyaki, daukaulotu, se o ira na lewe ni vuvale e Peceli ena noda dau tukuna mera biuta nodra cakacaka vakaitalatala vakatabakidua, mera mai marautaka na ivakarau ni bula era vakatoka e so me vinaka. E dodonu ga meda uqeti ira mera tomana tiko ga na cakacaka vinaka era sa vakayacora tiko.

3:8. Me vaka nona rere e dua ni rogoca na tagi ni laione, e yavala tale ga o Emosi me vunau ni rogoca na vosa oqo i Jiova: “Mo la’ki parofisai vei ira na noqu tamata.” (Emosi 7:​15) Noda rerevaka na Kalou e dodonu me uqeti keda meda gumatua ni vunautaka na itukutuku ni nona Matanitu.

3:​13-​15; 5:​11. Ena veivuke i Jiova a rawa kina vei Emosi na dau vakatawa sipi yalomalumalumu, me “vakadinadina” vei ira era vakawelei tu ena nodra iyau. E rawa tale ga vei Jiova me vakavulici keda meda maqosa ni kacivaka na itukutuku ni nona Matanitu se mani ituvaki dredre cava e sotavi ena yalava eda vunau kina.

4:​6-​11; 5:​4, 6, 14. Dina nira dau be na Isireli mera “lesu” vei Jiova, ia era uqeti mera ‘golevi Jiova, me rawa nira bula.’ Ni se yalovosovoso tiko o Jiova qai vakatara me cici tiko na ituvaki ca kei vuravura oqo, e dodonu meda vakauqeti ira na tiko kina mera gole vua.

5:​18, 19. E ka vakalialia nona “gadreva me yaco na siga i Jiova” e dua e sega tu mada ga ni vakarautaki koya. Na tamata e cakava oqo ena vaka e dua e drotani mai na laioni rau qai sota kei na pera, ni drotani mai na pera qai kati koya na gata. Ena ka vakayalomatua meda “yadra tiko ga” vakayalo da qai vakavakarau tiko.​—Luke 21:​36, VV.

7:​12-​17. Meda yaloqaqa qai doudou nida kacivaka na itukutuku ni Kalou.

9:​7-​10. Me vakataki ira na luve i Kusa, a sega ni vakadonui ira tale ga na Isireli tawayalodina na Kalou, dina ga nira kawa mai vei ira na peteriaki yalodina kei ira na tamata digitaki ni Kalou era a vakabulai mai Ijipita. Nona vakadonui ira na Kalou e sega ni dau veivakaduiduitaki, ena vakatau ena nodra ‘rerevaki koya qai caka dodonu,’ sega ena iyatukawa era lako mai kina.​—Cakacaka 10:​34, 35.

Na Cava Meda Cakava

Sa voleka na siga me vakatauca kina na Kalou na nona lewa ena vuravura i Setani. Na Kalou e sovaraka nona yalo tabu vei ira nona tamata, me rawa nira vakaroti ira na tani ena nona siga sa voleka. Eda sa gugumatua tiko beka ena noda vukei ira na tani mera kilai Jiova ra qai ‘masuta na yacana’?​—Joeli 2:​31, 32.

E vakarota o Emosi: “Cata na ka ca, ka vinakata na ka vinaka, ka vakadeitaka na lewa dodonu e na matamata-ni-koro.” (Emosi 5:​15) Ni sa voleka na siga i Jiova, ena ka vakayalomatua meda toro voleka vua, da qai tawasei keda mai na vuravura ca kei na kena isoqosoqo dukadukali. Me rawati oqo, ena yaga vakalevu na veika eda vulica mai na ivola na Joeli kei na Emosi!​—Iperiu 4:​12.

[iYaloyalo ena tabana e 12]

A parofisaitaka o Joeli: “Sa voleka na siga i Jiova!”

[iYaloyalo ena tabana e 15]

Me vakataki Emosi ga, meda yaloqaqa da qai doudou nida kacivaka na itukutuku ni Kalou

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta