Muri Karisito, na iLiuliu Uasivi

E LEVU era sotava na leqa nira muri ira na iliuliu vakatamata. E duidui sara qori vei ira era vakamalumalumu ena veiliutaki i Karisito. E tukuna o Jisu: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu.” (Maciu 11:28, 29) E veivakacegui qai veivakauqeti na veiliutaki i Jisu. E dau kauaitaki ira na tauvanua kei ira na vakaloloma, e sureti ira tale ga mera mai colata na nona ivua e mamada. Na cava soti e okati ena noda muria tiko ga na veiliutaki i Jisu?

A vola na yapositolo o Pita: “A vakararawataki o Karisito ena vukumuni, e qai laiva vei kemuni na ivakarau moni muria na weniyavana.” (1 Pita 2:21) E bibi dina meda muria na weniyava i Jisu. Kaya mada ke o dua vei ira na ilala e via takosova na vanua e bulu tu kina na gasaukuro, ia e dua ga vei kemudou e kila vinaka na sala me muri mo dou takoso bula kina. E macala ga ni o na muri koya vakavoleka sara se o na butuka sara ga na weniyavana. E va tale ga qori na noda taqomaki ena veigauna se bera mai, ni vakatau qo ena noda vakatotomuria vakavoleka na ivakaraitaki i Jisu. Na noda vakatotomuri Jisu e okati kina na noda vakarorogo, na noda talairawarawa vua da qai tokoni ira tiko na matataki koya.

Rogoca Qai Muria

Ni vakarau tinia na nona iVunau ena Ulunivanua o Jisu, e tukuna: “O koya e rogoca na noqu vosa qo qai cakava ena vaka na tamata vuku e tara nona vale ena delanivatu. Ni bisa na uca, coka na dobui, laba na cagi, e sega ni bale na vale ya, ni tara toka e delanivatu.”—Maciu 7:24, 25.

A tukuna gona o Jisu ni o koya e rogoca qai muria na nona vosa e “vuku.” Vakacava, e dau vu mai lomada na noda talairawarawa meda doka qai vakavinavinakataka na ivakaraitaki i Karisito, se da dau digia ga eso na nona ivakaro e ganiti keda qai rawarawa meda muria? E kaya o Jisu: “[Au] dau cakava na ka e vinakata [na Kalou].” (Joni 8:29) Meda gumatua mada ga ni vakatotomuria na ivakaraitaki oya.

Eratou ivakaraitaki vinaka na yapositolo ena imatai ni senitiuri, ni ratou vakamalumalumu ena veiliutaki i Karisito. Ena dua na gauna e tukuna kina o Pita vei Jisu: “Raica! Keitou sa biuta na ka kece, keitou sa mai muri kemuni tiko.” (Mari. 10:28) Eratou raica vakabibi na veiliutaki i Jisu na yapositolo, eratou yalorawarawa kina ni biuta na ka kece me ratou rawa ni muri koya.—Maciu 4:18-22.

Tokoni Ira na Matataki Karisito

Ni bera ni mate, e tukuna o Jisu e dua tale na sala meda muria kina na nona veiliutaki. E kaya: “O koya e ciqoma e dua vei ira au tala yani e ciqomi au.” (Joni 13:20) O Jisu mada ga e tukuni ira na lumuti era matataki koya mera ‘tacina.’ (Maciu 25:40) Na gauna e vakaturi kina e lomalagi o Jisu era lesi na ‘tacina’ qori mera sosomitaki koya, qo mera “matataki Karisito” ena nodra sureti ira eso tale mera mai veiwekani kei na Kalou o Jiova. (2 Kor. 5:18-20) E okati ena noda kila na veiliutaki i Karisito na noda vakamalumalumu vei ira na ‘tacina.’

E bibi gona meda dikeva na ka eda cakava me baleta na ivakasala vakaivolatabu e tabaki ena noda ivola ena kena gauna donu. Na noda vulica na iVolatabu kei na noda tiko ena soqoni eda vakadreti kina ena vosa i Karisito. (2 Pita 3:1, 2) Na noda vakayagataka wasoma na kakana vakayalo qo, eda sa vakavinavinakataka tiko mai vu ni lomada na kena vakarautaki mai. Na cava meda cakava ke wasoma na noda vakasalataki ena dua tiko ga na ka? Me kena ivakaraitaki, na Vosa ni Kalou e vakasalataki keda na lotu vaKarisito meda vakawati ga “ena Turaga.” (1 Kor. 7:39) Sa dede mai na kena dau veitalanoataki na ulutaga qo ena Vale ni Vakatawa. Era vakaraitaka na nodra lomani keda na taci Karisito, era kauaitaka tale ga na noda veika vakayalo ena nodra tabaka tiko ga e levu na ulutaga me baleta na vakawati kei na so tale na ivakasala vakaivolatabu. Na noda muria tiko ga na ivakasala kece qori, e dua na sala eda vakaraitaka tiko kina ni noda iliuliu uasivi o Jisu Karisito.

E tukuna na Vosa Vakaibalebale 4:18: “Na nodra sala na yalododonu sa vaka na rarama sa cila tu, sa levu cake tiko na kena rarama ka yacova na siga levu.” Io, e toso tiko ga na nona veiliutaki o Jisu, e sega ni tu vakadua. E dua tale na sala meda tokoni ira kina na ‘taci’ Karisito, oya me donu tiko ga na noda rai me baleta eso na veisau ena kena vakamatatataki na ivakavuvuli vakaivolatabu e tabaka na “dauveiqaravi e yalodina e vuku.”—Maciu 24:45.

Eda vakaraitaka tale ga na noda vakamalumalumu vei ira na ‘taci’ Karisito, na noda tokoni ira na ivakatawa era lesi ena ivavakoso vaKarisito. E kaya na yapositolo o Paula: “Moni talairawarawa vei ira era liutaki kemuni tiko moni yalorawarawa tale ga, nira yadravi kemuni tiko.” (Iper. 13:17) Me kena ivakaraitaki, ena rairai uqeti keda e dua na qase me baleta na bibi ni kena caka wasoma na Sokalou Vakavuvale, se na rairai vakatututaka eso na ka eda rawa ni cakava me baleta na noda vunau. Ena rairai vukei keda na ivakatawa dauveilakoyaki ena so na ivakasala vakaivolatabu me baleta e dua na ivakarau ni bula vaKarisito. Nida yalorawarawa ni muria na ivakasala qori, e dusia nida muri Jisu tiko me noda iLiuliu.

E ka ni rarawa ni lekata o vuravura na veiliutaki vinaka. Ia e veivakacegui na noda muria na veiliutaki vakayalololoma i Karisito! O koya gona, meda talairawarawa mada ga vua na noda iLiuliu da qai tokoni ira na matataki koya tiko nikua.

[iYaloyalo ena tabana e 27]

O na muria na ivakasala vakaivolatabu mo kua ni veitokani kei na dua e sega ni vakabauta?