“Tou Mai Lako ki na Vale i Jiova”

¹ E gu na yalo i Tevita me ciqoma na veisureti: “Tou mai lako ki na vale i Jiova.” (Same 122:1) A vakatakarakarataka na “vale” i Jiova na valenisoro era dau soqoni kina o ira era gadreva mera qarava na Kalou dina. Edaidai na “vale” ni Kalou na ivavakoso ena vuravura taucoko. (1 Tim. 3:15) E vakarautaki mai kina na isolisoli kece meda bula kina. Oya na vuna ena vinakati mera “na drodro kina na veimatanitu kecega” ke ra na via marautaka na veivakalougatataki e yalataki tu ena ruku ni veiliutaki ni Matanitu ni Kalou.​—Aisea 2:2.

² Vakamua na Tataleitaki ina iSoqosoqo: Mai na imatai ga ni gauna eda veitaratara kina kei koya e tataleitaki, e dodonu meda sa tekivu vakamuai koya ina isoqosoqo. E lako mai ena isoqosoqo na veika kece eda kila, qai vakayagataki na ilawalawa e vaka e le dua na dauveiqaravi me solia na “kakana e na kena gauna dodonu.” (Maciu 24:45-47, VV) Ni se qai tekivu na vuli, vukei koya sara me kila ni isoqosoqo oqo e robota na vuravura taucoko, qai dusimaka tiko o Jiova.

³ Tukuna vua na vanua e tiko kina na Kingdom Hall, kei na gauna ni soqoni. Vakamacalataka na duidui e tiko ena noda soqoni kei na lotu e dau lakova. E dola raraba na soqoni; qai sega ni dau caka na soli. Dina nira tiko o ira na dauveiqaravi era lesi mera liutaka na porokaramu, ia era vakaitavi tale ga na vakarorogo ena nodra vakamacala se ra vakaitavi ena so na tiki ni porokaramu. Eratou sureti vakavuvale; ra wili tale ga na gone ena kena vulici na iVolatabu. E sega tale ga ni duatani na nodra isulusulu na noda italatala se dauveiqaravi. E matau na irairai ni loma ni noda Kingdom Hall, qai sega kina na kadrala se matakau.

⁴ Veitaravitaka Nomu Vakamua na Vuli iVolatabu: Me okati tale ga ena vuli iVolatabu e veimacawa na ivakamacala me vukei gonevuli me kila kina na isoqosoqo. Tikica e vica na miniti e veimacawa mo vakamacalataka kina e dua na ka me baleta na isoqosoqo kei na kena cicivaki. Na brochure Na iVakadinadina i Jiova​—Duavata ni Vakayacora na Loma ni Kalou e Vuravura e vakamalacataka vakavinaka na kena cicivaki na isoqosoqo kei na sala e yaga kina vei keda. De vinaka mo saga me sarava o gonevuli na vidio Jehovah’s Witnesses​—The Organization Behind the Name, me raica kina na veika e sa rawata na isoqosoqo. Digitaka tale ga e so na italanoa se vakasavuirogorogo mai na Yearbook me kila kina na vuavuaivinaka ni cakacaka ena veivanua, dina ga ni duatani na ivakarau ni bula e sotavi kina. Ni toso na nomudrau vuli, vakamacalataka vakaveitaravi vua na vuna eda vunau kina e veivale, na inaki ni noda soqoni, na qaravi vakailavo ni noda cakacaka, da qai cakacaka tiko e vuravura taucoko.

⁵ E vinaka ke ra sureti ena so na gauna e so na dautukutuku mera tomani kemudrau ena vuli. De dua ena vukea vakalevu na rai i gonevuli ke drau veitomani kei na dua ena ivavakoso e via tautauvata na nodrau isususu, se ka erau taleitaka. Ena vinaka sara ke drau veitomani kei na dua na qase me rau lai veikilai. Tuvanaka mo drau veitomani kei na ivakatawa ni tabacakacaka se o watina, ni na yaga sara oya. Ke ra tiko volekati koya e so na iVakadinadina, vakaveikilaitaki ira kei na vuli iVolatabu ni oya tale ga e dua na sala ena rawa ni uqeti koya me tiko ena soqoni ni ivavakoso.

⁶ Uqeti Koya na Tataleitaki me Tiko ena Soqoni: Vukea na tataleitaki me raica ni bibi na tiko ena soqoni, saga gona mo uqeti koya. Vakaraitaka vua na ulutaga ena vulici tiko ena Vuli Vale ni Vakatawa. Tukuna tale ga vua e so na ulutaga ni vunau soqovi levu era na rogoci tiko. Vakamacalataka vua e so na ulu ni ivakamacala ena kovuti tiko ena Koronivuli ni Vuli Vunau kei na Vulivola ni iVavakoso. Ke tiko na nomu motoka, de rawa ni o vakavodoki koya ina soqoni. Ena rawa ni uqeti koya tale ga me tiko ena soqoni ke o qiriti koya ni bera ni o lako ina soqoni.

⁷ So na Ka e Rawa ni Veivakataotaki: Ena vuqa na gauna, veitalia na levu ni veivuke o cakava, e se dredre ga vei ira e so mera toso mai ina ivavakoso. Ia, kua ni soro. Tovolea mo biuti iko ena kedra ituvaki. De dua era sega ni dau lako ga i lotu, vakavo ga ke dua na nodra lotu lavaki. Se, era dau tusaqati beka mai vei ira na nodra matavuvale se nodra itokani voleka. De leqa levu ga na nodra vakaosoti ira ena levu ni soqo kei na ka ni veivakamarautaki era vakaogai ira kina. Mo vukei ira gona me vakadodonutaki na nodra rai, mera “digitaka [rawa kina] na veika e uasivi sara.”​—Fpai. 1:10, VV.

⁸ Vakaraitaka mai na iVolatabu na vuna meda sasaga tiko ga kina. Vakabibitaka ni ka bibi na noda sosoqoni vata nida vakaukauataki, da taraicake tale ga kina vakayalo. (Roma 1:11, 12) A vakamatatataka o Jisu ni sega ni dodonu me vakataotaki keda nodra tusaqati keda na noda matavuvale. (Maciu 10:34-39) E uqeti keda o Paula me kua nida maduataka noda vakatakila e matanalevu nida tisaipeli i Jisu. (2 Tim. 1:8, 12-14) Me lewai vakamatau noda saga na veika e baleti keda se veika eda vakaogai keda kina; ke sega ena tini keda icori tale. (Luke 21:34-36) Nida bucina mera taleitaka na ivakavuvuli vakaivolatabu vaka oqo, ena rawa beka ni dolava na sala mera toso kina vakayalo.

⁹ E Dola Tu na Katuba: Sa vakaceceretaki cake na vale ni sokalou dina vei Jiova mai na veimataqali sokalou kece tale e so. Sa kuruvaki tiko na veisureti oqo ena 235 na veimatanitu e veiyasa i vuravura kece: “Me da mai la’ki cabe cake ki na ulu-ni-vanua i Jiova, . . . ena vakavulica vei keda ko koya na nonai valavala, ia eda na muria na nona sala.” (Aisea 2:3) Ke ra ciqoma na tataleitaki na veisureti oqo ena rawa ni vakabulai ira. E dua na sala vinaka duadua meda vukei ira kina oya na noda vakamuai ira ina isoqosoqo i Jiova.