Wase 1—Dolea ena Vakavinavinaka na Loloma i Jiova—Eda na Vakalougatataki Kina
1 E vola na yapositolo o Joni: “Eda sa lomani koya [na Kalou], e na vuku ni sa taumada na nona loloma vei keda.” (1 Joni 4:19) Nida vakasamataka na levu ni ka e solia o Jiova vei keda, e uqeti keda meda dolea ena vakavinavinaka. E ivakaraitaki e ke o Jisu ena nona vunautaka ena talairawarawa na yaca ni Kalou kei na nona Matanitu. (Joni 14:31) Meda raica mada e so na sala e rawa nida dolea kina ena vakavinavinaka na loloma i Jiova kei na veivakalougatataki eda rawata kina.
2 Vunau e Veivale: A vakavulici iratou na nona tisaipeli o Jisu ena sala me ratou vunautaka kina na Matanitu ni Kalou. E matata vakasigalevu mai na nona veidusimaki ni dodonu me ratou lako e veivale ena nodratou vakatetea na itukutuku vinaka. (Luke 9:1-6; 10:1-7) Ke ra sega ni kauai na itaukeinivale se da vakacacani eda na lako tiko ga, nida lomana na Kalou, da lomani ira tale ga na wekada. Ia e yaga tale ga vei keda meda lako tiko ga, ni vakaukauataka se vakadeitaka vinaka na noda vakabauta, me ramase tiko ga kina na noda inuinui.
3 Ena nodra veidusimaki na agilosi eda sa kunea e vuqa era via kania ka gunuva na ka dina. (Vkta. 14:6) Era kaya e so na itaukeinivale na veitaudonui ni nodra masuta tiko na veivuke, ra tokatu sara ena nodra matanikatuba na iVakadinadina. Mai na yanuyanu na Caribbean, eratou lako tiko e veivale e rua na iVakadinadina uabula kei na dua na gone. Ni rau sa nanuma na qase me sa rauta na nodratou cakacaka ena siga oya, e se lako ga o gone, lai tukituki sara ena vale e tarava. E dolava na katuba e dua na goneyalewa. Rau mani tini lakovi koya tale yani na goneyalewa oqo na iVakadinadina uabula me ratou lai veitalanoa. Ni sureti iratou ina nona lomanivale, e vakamacalataka ni se qai masuta tiko ga na Kalou de rawa ni vakatalai ira yani na iVakadinadina mera lai vakavulici koya ena iVolatabu!
4 Vunau ena Salatu: Na vunau ena salatu e dua na sala vinaka meda vunau kina, ni sa qai dredre tiko ga na kunei ira na lewenivanua ena nodra vale. Qai levu era tu ena veivale e sega nida sikova rawa nida vunau yani, se era tu ena veikoro e vakatabui meda vunau kina. Ia nida via dolea ena vakavinavinaka na loloma i Jiova, eda na vakayagataka na sala kece e rawa meda tarai ira kina na lewenivanua ena itukutuku ni Matanitu ni Kalou, okati kina na noda vunau ena salatu.—Vkai. 1:20, 21.
5 Veisikovi Lesu: Eda vaqarai ira tiko “era kauaitaka na nodra gagadre vakayalo.” O koya gona, meda solia na noda vinaka taucoko mera vakacegui kina. (Maciu 5:3, NW) Ena okati e ke na noda lesuvi ira meda lai vakasuasuataka na sore ni ka dina eda sa teivaka. (1 Kor. 3:6-8) E dua na tacida yalewa mai Ositerelia a solia e dua na ivolacebaceba vua e dua na marama e vaka ni sega soti ni tataleitaki. Ia e saga ga na tacida yalewa me lai sotavi koya tale na marama oqo ena nona vale. Ni rau sota tale, a kaya na marama oqo vua na tacida yalewa ni lai volia sara ga e dua na iVolatabu saulevu ni oti na imatai ni nodrau sota. Sa tekivu vuli sara kei koya na tacida yalewa!
6 Vakayaco Vuli iVolatabu: Oqo e rawa ni tiki ni noda cakacaka vakaitalatala e marautaki qai yaga duadua. E ka ni veivakalougatataki na noda vukea e dua me kilai Jiova, noda raica na nona veisautaka na nona bula me vakamarautaki Jiova, da qai raica na nona papitaiso me lotu Vakarisito me ivakaraitaki ni nona sa yalataka na nona bula vua na Kalou!—1 Ces. 2:20; 3 Joni 4.
7 Ena Noda Cakacaka Vakaitalatala ni Matanitu e tarava, eda na veitalanoataka kina e so tale na veivakalougatataki e lako mai ena noda dolea ena vakavinavinaka na loloma i Jiova.