Wase 2—Dolea ena Vakavinavinaka na Loloma i Jiova—Eda na Vakalougatataki Kina
1 E veivosakitaki ena ruku ni ulutaga oqo ena vula sa oti e va na sala eda vakaraitaka kina noda vakavinavinakataka na loloma i Jiova ena cakacaka vakaitalatala. (1 Joni 4:9-11) Ena kuri tale e lima na sala meda vakayacora kina oqo. Eda na vakalougatataki nida vakaitavi vakalevu ena nodra vukei vakayalo e so tale.
2 Vunau Tawalokuci: Oqo e dua na sala laulau ni nodra vukei o ira na via kania ka via gunuva na yalododonu, da qai solia na ivola e yaga vei ira. E vinaka meda ‘volia na gauna’ meda vunau e veigauna vei ira kece eda sotava. (Efeso 5:16) Ena vinakati vei keda na yalodoudou nida vunau ena sala oqo, ia kevaka eda doka na loloma i Jiova, da qai kauaitaka na ka era gadreva na tamata, eda na vunau ena veigauna kece ga.—2 Tim. 1:7, 8.
3 E vakalougatataki e dua na daukaulotu ni tekivutaka na veivosaki kei na dua erau vodo taxi vata tiko. E tataleitaki na turaga oya. Caka na veisikovi lesu, tekivutaki sara na vuli iVolatabu. A mani taura na dina na turaga oqo, yaco sara me lai qase ni ivavakoso!
4 Volavola: Ena sega beka ni rawa nida lako e veivale baleta ni leqa na ituvaki ni yagoda se ni draki ca. E rawa nida volavola, vunau ena meli vei ira eda veikilai, se o ira e mate na wekadra lomani, se na yalava era sega ni dau tiko e vale na kena itaukei. E rawa nida vakacuruma ena ivola na ivolacebaceba yavutaki vakaivolatabu. Ena uqeti koya e nona na ivola me volavola mai ke tu nona vakatataro. Vola na nomu katonimeli, se na nomu itikotiko se na katonimeli ni Kingdom Hall; me kua ga ni volai na katonimeli ni valenivolavola ni tabana.
5 Vunau ena Talevoni: Oqo na sala vinaka ni veitaratara kei ira eda sega ni sotavi ira ena veivale. Kevaka e caka vakayalomatua, vakayalololoma, qai maqosataki, ena rairai ciqomi na noda itukutuku. Na Noda Cakacaka Vakaitalatala ni Matanitu, Feperueri 2001, taqana 5-6, e vakaturi kina e so na iwalewale yaga me vuavuaivinaka kina na noda cakacaka.
6 A vunau ena talevoni e dua na tacida yalewa qai taroga vei koya na marama erau veivosaki se cava ena yacovi koya mai muri, vaka kina o iratou na lewe ni nona vuvale. A sauma na marama oya ni sa dau vakasamataka vakabibi. Ena levu gona ni nona yalolailaitaka e sa dau tu voli ga e vale. Nona veikauaitaki dina na tacida yalewa, e tarai koya na marama oya, mani vakadonuya me rau lai sota ena makete. Yaco kina me via vuli iVolatabu na marama oya!
7 Kidavaki Ira na Vulagi: Kevaka eda lomani ira na tamata kece ga, eda na tu vakarau meda kidavaki ira na vulagi era gole mai ena soqoni. (Roma 15:7) Me raica sara ga o koya ni tiko maliwai ira era kauaitaka dina nona bula vakayalo. Noda veikauaitaki kei na noda veisureti ena vuli iVolatabu, ena uqeti koya me ciqoma na noda veivuke.
8 Noda iTovo Vinaka: Na noda itovo vinaka eda vakarogovinakataka kina na ka dina. (Taito 2:10) Nira vakacaucautaki keda na iVakadinadina i Jiova o ira na kai vuravura, e vakalagilagi ga kina na noda Kalou. (1 Pita 2:12) Oqo ena vukei ira tale ga kina na tani mera muria na sala ni bula.
9 Vakacava mo railesuva tale na lima na sala e vakaraitaka na noda vakavinavinakataka na loloma levu i Jiova vei keda, qai saga mo cakava sara? (1 Joni 4:16) O na vakalougatataki vakalevu kevaka o muria.