“Dou Lomani Jiova, Koi Kemudou Kecega na Nona Tamata Yalosavasava”
Me Vakananumi na Mate i Jisu ena ika4 ni Epereli
1 Ena vica vata na yabaki sa oti, ni se veiliutaki tu e Ukraine na matanitu vakominisi, era dau vakaraici matua sara na mataveitacini vakauasivi ena gauna sa voleka kina na iVakayakavi ni Turaga, baleta nira via kila na vakailesilesi na vanua ena vakayacori kina. E dau vakavu leqa sara oqo ena veigauna kece, baleta nira sa kila vinaka tu na vakailesilesi na tikinisiga ni iVakananumi. Cava era na cakava na mataveitacini? Dua na vale ni tacida yalewa sa luvu tu na kena botonivale. Me vaka nira sega ni namaka na vakailesilesi ni na caka e kea na soqoni, sa ra qai tara e dua na vatavata na mataveitacini e sivia na iyalayala ni wai, me rawa nira dabe kina. Dina nira na dabe cuvacuva ga ni sa tara tale na uludra na rukunivale, e sega ni dua e vakasosataki ira ra qai marautaka na iVakananumi.
2 Nodra sasaga na tacida mai Ukraine mera talairawarawa ina ivakaro mera vakananuma na mate i Jisu, e ivakaraitaki vakasakiti ni nodra lomana na Kalou. (Luke 22:19; 1 Joni 5:3) Na veigauna kece eda sotava kina na veika dredre, me vakayaloqaqataki keda mada ga e so na ivakaraitaki vaka oqori, da qai saga meda na tiko ena kena vakananumi na iVakayakavi ni Turaga ena ika4 ni Epereli. Ena noda cakava oqori, eda sa vakaraitaka tiko kina nida duavata kei na ka e kaya na daunisame ni lagata: “Dou lomani Jiova, koi kemudou kecega na nona tamata yalosavasava.”—Same 31:23.
3 Vukei Ira e so Tale Mera Lomana na Kalou: Noda lomana na Kalou eda na sureti ira kina e so tale mera mai vakananuma vata kei keda na iVakayakavi ni Turaga. E uqeti keda na Noda Cakacaka Vakaitalatala ni Matanitu ena Feperueri meda vola na yacadra o ira eda na sureta ena iVakananumi. O sa saga tiko beka mo sureti ira kece? Me tiko na gauna mo vakamacalataka kina vei ira na bibi ni soqo oqo. Nomu lai vakadeitaka tale vei ira na siga kei na gauna ena caka kina na iVakananumi mera nanuma tiko, kei na nomu tukuna ni o rawa sara ga ni lako vata yani kei ira, ena uqeti ira mera lako yani.
4 Saga sara ga mo kidavaki ira na ciqoma noda veisureti nira sa yaco yani ena vanua ni soqo, mera kua ni madua tale tiko. O na vukei ira vakacava mera lomani Jiova? Vakarautaki iko mo sauma na nodra vakatataro. Ke veiganiti na ituvaki, sureti ira sara ga mera vuli iVolatabu. Sureti ira mera tiko tale ga ena noda soqoni vakaivavakoso e veimacawa. E bibi sara ga vei ira na qase ni vavakoso mera kauaitaki ira na iVakadinadina era sa malumalumu tu vakayalo era tiko tale ga ena iVakananumi. E rawa sara ga ni tuvanaki mera sikovi ra qai vakayaloqaqataki mera tomana tale na nodra vakaitavi ena ivavakoso, me ikuri ni veika era sa rogoca ena iVakananumi.—Roma 5:6-8.
5 Me Titobu Noda Lomani Jiova: Ena titobu na noda lomani Jiova kei Luvena nida vakasamataka vakabibi na isoro ni veivoli. (2 Kor. 5:14, 15) E kaya e dua na tacida sa dau tiko wasoma ena iVakananumi: “Keitou dau vakanamata ena soqo ni iVakananumi. Sa qai bibi tiko ga ena veiyabaki. Au nanuma lesu noqu a duri tu ena 20 na yabaki sa oti ena vanua era dau biu toka kina vakawawa na yago ni mate, au raici tamaqu tu qai dua na ka na noqu vakavinavinakataka mai vu ni lomaqu na isoro ni veivoli i Jisu. Ni se bera ni leqa o tamaqu, au dau taura tu ga vakamamada na isoro ni veivoli. Au kila vinaka na kena tikinivolatabu kei na kena ivakamacala! Ia, ni mai tarai au sara ga na mate i tamaqu, au marautaka dina kina na veika ena rawati ena vuku ni isoro talei oya.”—Joni 5:28, 29.
6 Ni sa roro tiko mai oqo na iVakananumi, vakarautaka sara kina na lomamu. (2 Vei. 19:3) Vakasamataka vakabibi na tikinivolatabu ena wiliki tiko ena iVakananumi me vaka e volai ena Dikeva na iVolatabu e Veisiga—2004 kei na noda ivolanivula ni 2004. E so era dau taleitaka mera raica lesu na wase 112-16 ni ivola Tamata Rogo ena gauna era vuli kina vakavuvale. E so era vakadidike ena so tani tale na ivola e vakarautaka mai na dauveiqaravi yalodina. (Maciu 24:45-47, VV) Eda rawa kece sara ga ni masulaka mai vu ni lomada na isoro ni veivoli. (Same 50:14, 23) Meda qai vakasamataka tiko mada ga ena gauna ni iVakananumi na nona lomani keda o Jiova, da qai vakasaqara na sala meda vakaraitaka kina vua na noda lomani koya.—Mari. 12:30; 1 Joni 4:10.