Vakaraitaka ni O Kauai Dina ena Nomu Raici Koya Drau Veivosaki Tiko
1 Nida cakacaka vakavunau ena veivale, ena salatu se dua tale na vanua, e dau kena ivakarau ga meda raica na mata i koya eda vakarau veivosaki. Noda raici koya oya, eda na kila kina se taleitaki keda se sega, e via vakarorogo se sega. E levu tale ga na ka e rawa ni taura o koya mai na irairai ni matada. Me kena ivakaraitaki, e kaya e dua na marama ena nona sikovi koya yani e dua na iVakadinadina: “Au sega ni guilecava rawa na noqu raica e matana nona lomavakacegu. Au via kila sara ga se cava e vaka kina oya na kena irairai.” Na ka oqori e vu ni nona rogoca kina na marama oya na itukutuku vinaka.
2 E dau laulau na vunau ena salatu, ikelekele ni basi se so tale na vanua ke da saga meda raica sara ga na mata i koya eda via vosa vua. Dua na tacida tagane e dau vakaraici ira na tavali. Na gauna ga e sota kina na matadra, e dau matadredredre sara qai vakaraitaka vei ira na ivoladraudrau. Nona dau vakayagataka na iwalewale oqo, e vakarawarawataka na nona dau veivosaki kei ira, e veisoliyaka tale ga kina e levu na ivola.
3 Dau Laurai e Matadra na Ka e Tu e Lomadra: Na noda raici ira na itaukeinivale eda na rawa ni kila kina na ka e tu e lomadra. Kena ivakaraitaki, ke dua e sega ni taura rawa na ka eda tukuna tiko, se dua e sega ni duavata kei na ka eda kaya, ena kilai sara ga ena irairai ni matana. Eda na kila tale ga ke osooso, se ka ni voraki vua na rogoci keda. Eda rawa ni veisautaka se vakalekalekataka na noda vosa me ganita koya. Oqo e dua na sala eda vakaraitaka kina noda kauaitaki koya dina.
4 Vakabauta kei na Yalodina: Ena levu na vanua, na noda raica na mata i koya eda veivosaki tiko e vakaraitaka nida tamata yalodina, eda vakabauta dina na ka eda tukuna. Dikeva mada na ka e cakava o Jisu ena gauna era tarogi koya kina na nona tisaipeli: “O cei ena qai vakabulai rawa?” E kaya na iVolatabu: “A sa vakaraici ira [“vakaraica na matadra,” NW] ko Jisu, ka kaya, vei ira, Oqo sa dredre sara vei ira na tamata; ia sa rawarawa vua na Kalou na ka kecega.” (Maciu 19:25, 26) Sega ni vakabekataki ni laurai ena mata i Jisu ni vakabauta dina ka e tukuna, qai lauti ira sara ga na vakarorogo. Era na vakila tale ga o ira na tiko ena noda yalava nida tamata yalodina, da qai vakabauta na itukutuku eda kacivaka tiko, kevaka eda dau raici ira nida veivosaki.—2 Kor. 2:17; 1 Ces. 1:5.