E Gadrevi Beka na Mesaia?
O NA rairai taroga, “E gadrevi beka na Mesaia?” E ka vakayalomatua meda vakasamataka se yaga vakacava na Mesaia ena noda bula.
E rairai oni na doka na nodra rai e so era vakadeitaka vei iko ni isaunitaro oqori e matata qai sega ni lomalomaruataki: Io, eda gadreva dina na tamata kece na Mesaia. Dua na kenadau ena lawa vakajiu ena imatai ni senitiuri a vola me baleta na Mesaia: “Ni sa io na vosa ni yalayala kecega ni Kalou e na vukuna.” A vakabibitaka gona e ke na itavi levu ni Mesaia ena kena vakayacori na inaki ni Dauveibuli meda vakalougatataki kina na kawatamata kece e vuravura. (2 Korinica 1:20) E bibi dina na nona itavi na Mesaia, ni usutu sara ga ni parofisai ena iVolatabu na nona basika kei na nona bula voli e vuravura. Tukuna o Henry H. Halley ena nona ivola era vakayagataka e le vica vata na milioni na tamata ena 70 na yabaki sa sivi: “Na vuna e volai kina na Veiyalayalati Makawa, oya me uqeta na nanamaki kei na kena vakarautaki na nona na Basika [na Mesaia].” A gadrevi beka me basika mai? Na cava e dodonu meda kauaitaka kina?
Na vosa “Mesaia” e kena ibalebale, “O Koya na Lumuti,” e tautauvata gona kei na vosa kilailevu na “Karisito.” Na ivola na Encyclopædia Britannica, ena itabataba ni 1970, e vakatokai koya me “ivakabula uasivi duadua.” Ena gadrevi me basika na Mesaia ena vuku ni itovo veibeci erau a vakayacora na imatai ni veiwatini o Atama kei Ivi. Rau a buli me uasivi qai rawa tale ga ni rau marautaka na bula tawamudu e Parataisi, ia rau a vakayalia na inuinui totoka oqori. E dua na agilosi talaidredre, a qai mai vakatokai me o Setani na Tevoro, a vakatura vei rau ni sa rui yalana vakalevu na Dauveibuli na nodrau galala, qai vinaka cake me rau vakatulewataka ga vakataki rau na ka e vinaka kei na ka e ca.—Vakatekivu 3:1-5.
A rawai o Ivi ena veitemaki oqori i Setani. Kena irairai ni a bibi cake vei Atama na nona veiwekani kei watina mai na nona yalodina vua na Kalou, yaco kina me coko tale ga ena talaidredre a tekivuna na Tevoro. (Vakatekivu 3:6; 1 Timoci 2:14) Na ka erau cakava oqo, erau vakayalia kina na nodrau nuitaka na bula tawamudu ena parataisi. Ia, e sega ni okati rau ga, erau sa mai vakadewa tale ga vei ira na nodrau kawa na ivalavala ca qai kena itinitini na mate.—Roma 5:12.
Sega ni bera na nona vakadeitaka o Jiova, na noda Dauveibuli, na sala me na vakaotia kina na veileqa e sotavi ena vuku ni ivalavala ca a vu mai na talaidredre. Ena qai yaco me veivinakati tale na Kalou kei na tamata ena nona na cakacaka o Jiova ena dua na vakasama a qai yaco e muri me dua vei ira na yavu ni Lawa i Mosese—oya me isau ni mate na mate se na kena veisausaumitaki na cala e vakayacori. (Vakarua 19:21; 1 Joni 3:8) Na yavu ni lawa oqori ena gadrevi me muri ke dua na kawa ivalavala ca i Atama kei Ivi ena vinakata me bula tawamudu ena parataisi e vuravura, me vaka a nakita taumada vua na kawatamata na Dauveibuli. Na tikina oqo sa na vinakati kina na Mesaia.
Ena nona vakatauitotogitaka na Tevoro, a cavuta kina na Kalou o Jiova na imatai ni parofisai ena iVolatabu: “Ia ka’u na vakaveimecakitaki kemudrau kei na yalewa, kei na nomu kawa kei na nona kawa; ena butuqaqia na ulumu ko koya, ia ko na qaqia na bukubukuni-yavana.” (Vakatekivu 3:15) E kaya e dua na vuku ni iVolatabu ni “veivosa [oqori] e tekivutaki kina na itukutuku ni veika e yalataki tu ena iVolatabu me na cakava na Mesaia.” Dua tale na vuku e kaya ni Kalou ena vakayagataka na Mesaia me “vakalesuya tale mai na veika erau a vakayalia na vuda ena vuku ni nodrau ivalavala ca,” era na qai vakila kina na kawatamata na kena veivakalougatataki.—Iperiu 2:14, 15.
Rairai o sa na raica nira sega ni vakalougatataki na kawatamata ena gauna oqo. Vakauasivi ni sa dua na ka na levu ni veika e tu e vakavuna na yalolailai kei na nuiqawaqawa. E kaya na World Book Encyclopedia ni “levu na Jiu era se namaka tiko ga me basika mai na Mesaia” me “vakadodonutaka na veika ca qai vakarusa na nodra meca.” Ia na iVolatabu e kaya ni sa basika oti na Mesaia. E dodonu beka meda vakabauta na ka e kaya na iVolatabu? Ena saumi na taro oqori ena ulutaga e tarava.