“Erau Kaya Tiko ga na Yalo Tabu kei na Yalewavou: ‘Mai!’”
“Erau kaya tiko ga na yalo tabu kei na yalewavou: ‘Mai!’ . . . Me lako mai o koya yadua e karamaca; me mai gunuva wale na wai ni bula o koya yadua e vinakata.”—VKTA. 22:17.
1, 2. Me vakacava na bibi ni Matanitu ni Kalou ina noda bula, cava na vuna?
ME VAKACAVA na bibi ni Matanitu ni Kalou ina noda bula? E uqeti ira na nona imuri o Jisu mera ‘vakaliuca na matanitu ni Kalou,’ qai vakadeitaka ke ra cakava qo, ena vakarautaka na Kalou na ka era gadreva. (Maciu 6:25-33) E vakatauvatana na Matanitu ni Kalou ina dua na mataniciva isaulevu. Ni kunea e dua na dauveivoli a “volitaka kece na ka e tu vua me volia kina na mataniciva ya.” (Maciu 13:45, 46) Macala eke ni dodonu me vakabibitaki na vunautaki ni Matanitu ni Kalou kei na veivakatisaipelitaki.
2 Eda dikeva ena rua na ulutaga sa oti, na noda vosa ena doudou kei na noda maqosa ni vakayagataka na Vosa ni Kalou, e vakaraitaka nida dusimaki ena yalo tabu ni Kalou ena cakacaka vakaitalatala. E tiko na itavi bibi ni yalo tabu qori ena noda kacivaka na Matanitu ni Kalou. Meda raica mada se sala cava e vakayacori kina qo.
Veisureti Raraba!
3. Na mataqali wai vakacava eda sureti meda “mai” gunuva?
3 Ena vuku ni yalo tabu eda sureti raraba kina na kawatamata. (Wilika Vakatakila 22:17.) Eda sureti meda lako “mai” me vakacegui na noda karamaca ena noda gunuva e dua na mataqali wai e duatani sara. Qo e sega ni wai eda gunuva tiko e veisiga. Dina ni bibi ina noda bula na wai, a vakasamataka o Jisu e dua tale na mataqali wai ena nona tukuna vua na yalewa ni Samaria ena bati ni toevu: “O koya ena gunuva na wai au na solia ena sega ni viagunu tale, na wai au na solia vua ena vaka na waivure e lomana, ena tovure tiko ga me rawati kina na bula tawamudu.” (Joni 4:14) E veivakurabuitaki na wai eda sureti meda gunuva baleta ni rawati kina na bula tawamudu.
4. Na gauna cava a qai vinakati kina na wai ni bula, na cava e dusia qo?
4 A vinakati me gunuvi na mataqali wai va qo, ena nona tomani watina o Atama ena nodrau talaidredre vei koya sara ga a buli rau—na Kalou o Jiova. (Vkte. 2:16, 17; 3:1-6) Rau a cemuri mai na nodrau itikotiko ena were me kua kina ‘ni dodoka na ligana [o Atama] me taura tale ga na vu ni kau ni bula, me kania, me qai bula tawamudu kina.’ (Vkte. 3:22) Ni vuda o Atama, a vakavuna na mate vua na kawatamata kece. (Roma 5:12) E dusia na wai ni bula, na isolisoli kece e vakarautaka na Kalou me vueti kina na kawatamata talairawarawa mai na ivalavala ca kei na mate, qai rawati kina na bula uasivi tawamudu ena parataisi e vuravura. E rawati kece na isolisoli qo ena vuku ni nona isoro ni veivoli o Jisu Karisito.—Maciu 20:28; Joni 3:16; 1 Joni 4:9, 10.
5. O cei e vakavuna na veisureti meda “gunuva wale na wai ni bula”? Vakamacalataka.
5 O cei e vakavuna na veisureti meda mai “gunuva wale na wai ni bula”? Ni sa vakarautaki kece na isolisoli ni bula vei ira na kawatamata ena vuku i Jisu ena loma ni dua na udolu na yabaki ni nona veiliutaki, qo e dusia “e dua na uciwai ni wai bula, e savasava me vaka na karisitala.” Na uciwai qori e laurai ni “drodro mai na idabedabe vakaturaga ni Kalou kei na Lami.” (Vkta. 22:1) Koya gona, o Jiova na Dausoli Bula, e iVurevure ni wai e rawati kina na bula. (Same 36:9) O Koya ga e vakarautaka na wai, ena vuku i Jisu Karisito “na Lami.” (Joni 1:29) Na uciwai vakaivakatakarakara qo ena vakarautaka kina o Jiova na sala me vakaotia kina na ca kece e vakavuna o Atama vua na kawatamata ena nona talaidredre. Io, o Jiova e Vu ni veisureti, “mai.”
6. A tekivu vakadrodroi ena gauna cava “na uciwai ni wai bula”?
6 Dina ni na qai dave “na uciwai ni wai bula” ena Yabaki Duanadolu ni nona Veiliutaki o Karisito, ia sa tekivu vakadrodroi tiko mai “ena siga ni Turaga,” qori na gauna a tekivu veiliutaki kina mai lomalagi “na Lami” ena 1914. (Vkta. 1:10) Eso na ka sa vakarautaki tiko mai me rawati kina na bula ni oti na gauna qori. E okati kina na Vosa ni Kalou na iVolatabu, ni kena itukutuku e vaka na “wai.” (Efeso 5:26) E dola raraba na veisureti ni kena ‘gunuvi wale na wai ni bula’ ena gauna e rogoci kina qai ciqomi na itukutuku vinaka ni Matanitu ni Kalou. Ia o cei sara mada e veisureti tiko ena Siga ni Turaga?
E Kaya “Na Yalewavou,” “Mai!”
7. “Ena siga ni Turaga,” o cei e liutaka na veisureti ena vosa “mai”? O cei e sureti?
7 Na ilawalawa era vaka na yalewavou—era lumuti lotu vaKarisito—era liutaka na veisureti ena nodra kaya, “mai.” O cei era sureta? E sega ni sureti koya tiko ga na yalewavou ena nona tukuna, “Mai!” Na vosa e cavuta qori e tau vei ira na nuitaka na bula tawamudu e vuravura ni oti na “ivalu ni siga levu ni Kalou Kaukaua Duadua.”—Wilika Vakatakila 16:14, 16.
8. Era veisureti vakalevu vakacava na lumuti lotu vaKarisito mai na 1918?
8 Era tekivu veisureti vakalevu ena 1918 o ira na imuri lumuti i Karisito. Ena yabaki ya a rogoci kina na ivunau e kena ulutaga “Millions Now Living May Never Die” (Era na Sega Vakadua ni Mate na Vica Vata na Milioni Era Bula tu Qo). Na ivunau qo e vakavuna mera nuitaka kina e levu na bula e vuravura ni oti na ivalu na Amaketoni. Ena 1922, a rogoci e dua na ivunau ena dua na soqo ni tikina nodra na Gonevuli ni iVolatabu mai Cedar Point, Ohio, Mereke, ra qai uqeti kina na vakarorogo mera ‘vakarogoya me kilai na Tui kei na nona Matanitu.’ Era uqeti ena gauna qo na ivovo ni lumuti era vaka na yalewavou mera veisureti vakalevu. Ena 1929, na itabataba ni 15 Maji ni Watchtower e tiko kina e dua na ulutaga “Gracious Invitation,” (Veisureti Vakayalololoma) e yavutaki ena Vakatakila 22:17. E vakamacalataka ga vakatikina na ulutaga: “Era duavata na ivovo ni lumuti yalodina kei koya [e Cecere Duadua] ina veisureti vakayalololoma ra qai kaya, ‘Mai.’ Me vakarogoi na itukutuku qo vei ira na vinakata na yalododonu kei na ka dina. Kua tale ni lokuyara.” Me yaco mai qo, era se veisureti tiko ga na ilawalawa era vaka na yalewavou.
“Me Kaya Tale ga o Koya Yadua e Rogoca: ‘Mai!’”
9, 10. Na cava era cakava o ira na rogoca na veisureti, “Mai!”?
9 Vakacava o ira na rogoca na veisureti, “mai”? Era sureti mera kaya tale ga, “Mai!” Me kena ivakaraitaki ena itabataba ni Watchtower ni 1 Okosita, 1932, e tukuna na tabana e 232: “O ira na lumuti mera uqeti ira kece na rawa ni kacivaka na itukutuku vinaka ni Matanitu ni Kalou. E sega ni vinakati sara mera dua na lumuti mera na vakarogoya rawa kina na nona itukutuku na Turaga. E veivakacegui dina vei ira na iVakadinadina i Jiova mera kila nira rawa ni kauta ena gauna qo na wai ni bula vei ira na ilawalawa tamata era bulata na Amaketoni ra qai bula tawamudu e vuravura.”
10 Me baleta nodra itavi na vakarorogo era kaya, “Mai!” na Watchtower ni 15 Okosita, 1934, tabana e 249 e tukuna: “Dina ga nira sega ni ivakadinadina lumuti i Jiova o ira na ilawalawa vakataki Jionatapi, ia mera tomani ira na ilawalawa e vakatayaloyalotaki Jeu, ya o ira na lumuti ena nodra vakarogoya na matanitu.” Qai matata ena 1935 na kedra ivakatakilakila “na isoqosoqo levu” e cavuti ena Vakatakila 7:9-17. E vakavuna qo me vakalevutaki na veisureti ni Kalou. Tekivu mai na gauna ya, e tubu na kedra iwiliwili na isoqosoqo levu ni dausokalou dina—sa sivia qo e vitu na milioni, era ciqoma na veisureti oya. Nira rogoca oti na itukutuku, ra yalataka nodra bula vua na Kalou, tabadromuci ena wai, ra qai tomani ira na ilawalawa vaka na yalewavou ena nodra veisureti wasoma vei ira tale na so ‘mera mai gunuva wale na wai ni bula.’
E kaya “na Yalo Tabu” “Mai!”
11. Na cava na itavi ni yalo tabu ena cakacaka vakavunau ena imatai ni senitiuri S.K.?
11 Ena nona vunau tiko o Jisu ena dua na valenisoro mai Nasareci, a tevuka na ivolavivigi ni parofita o Aisea qai wilika kina: “Sa tu vei au na yalo i Jiova, e lumuti au meu vunautaka na itukutuku vinaka vei ira na dravudravua, e talai au meu tukuna yani na veisereki vei ira na vesu tu, mera rai na mataboko, mera sereki na vakaloloma.” Ni oti ya e qai cavuta o Jisu na vosa e vakaibalebaletaki vua ni kaya: “Sa vakayacori nikua na tikinivolatabu oni se qai rogoca.” (Luke 4:17-21) Ni bera ni lesu i lomalagi a tukuna vei ratou nona tisaipeli: “Dou na vakaukauataki ni sobuti kemudou na yalo tabu, dou na qai tukuni au e . . . na veivanua yawa sara kei vuravura.” (Caka. 1:8) E bibi na cakacaka ni yalo tabu ena imatai ni senitiuri ena cakacaka vakavunau.
12. Na cava na itavi ni yalo tabu ni Kalou ena veisureti ni gauna qo?
12 Na cava na itavi ni yalo tabu ni Kalou ni vakarogoi na veisureti ena gauna qo? O Jiova na iVurevure ni yalo tabu. E vakayagataka na yalo tabu me dolava na lomadra kei na nodra vakasama na ilawalawa era vaka na yalewavou mera kila kina vakamatata na nona Vosa, na iVolatabu. E uqeti ira na yalo tabu mera veisureti vakalevu ra qai vakamacalataka na ka dina ena iVolatabu vei ira na nuitaka na bula tawamudu ena Parataisi e vuravura. Vakacava o ira na ciqoma na veisureti, mera tisaipeli i Jisu Karisito, ra qai veisureti tale ga? E cakacaka tale ga na yalo tabu vei ira. Nira papitaiso ena ‘yaca ni yalo tabu,’ era na tokona, ra qai nuitaka na yalo tabu me vukei ira. (Maciu 28:19) Vakasamataka tale ga na itukutuku era vunautaka tiko na lumuti kei na isoqosoqo levu e tubu tiko ga na kedra iwiliwili. Na itukutuku ya e tiko ena iVolatabu—qori na ivola e veiuqeti kina na yalo tabu ni Kalou. E vakarogoi rawa na veisureti ena veivuke ni yalo tabu da qai dusimaki tale ga ena yalo vata ga ya. Ena uqeti keda vakacava qori ena noda veisureti vakalevu?
Era “Kaya Tiko ga . . . : ‘Mai!’ ”
13. Na cava na ibalebale ni kena tukuni “erau kaya tiko ga na yalo tabu kei na yalewavou: ‘Mai!’”?
13 Erau sega ni cavuta wale tiko ga “na yalo tabu kei na yalewavou: ‘Mai!’” Na vosa taumada e vakayagataki eke e dusia e dua na ka ena sega ni caka ga vakadua. Nida vakasamataka toka ga na tikina qori, e vakamacalataka na ivakadewa ni New World Translation: “Erau kaya tiko ga na yalo tabu kei na yalewavou: ‘Mai!’” Qo e vakaraitaka na kena vakalevutaki tiko ga nona veisureti na Kalou. Vakacava o ira na rogoca ra qai muria na veisureti? O ira tale ga era kaya, “Mai!” E tukuni ni o ira na isoqosoqo levu dausokalou dina era ‘veiqaravi ena siga kei na bogi ena valenisoro i Jiova.’ (Vkta. 7:9, 15) Na cava na ibalebale ni nodra ‘veiqaravi ena siga kei na bogi’? (Wilika Luke 2:36, 37; Cakacaka 20:31; 2 Cesalonaika 3:8.) E dusia na nodrau ivakaraitaki na parofita yalewa o Ana kei na yapositolo Paula ni ‘veiqaravi ena siga kei na bogi’ e caka wasoma qai gumatuataki kina na cakacaka vakaitalatala.
14, 15. E vakaraitaka vakacava o Taniela na bibi ni sokalou wasoma?
14 A vakaraitaka tale ga na parofita o Taniela na bibi ni sokalou wasoma. (Wilika Taniela 6:4-10, 16.) A sega ni veisautaka na ituvatuva ni nona sokalou—nona dau masu vua na Kalou “vakatolu e na veisiga, . . . me vaka sa daucakava”—e vula dua sara mada ga nona cakava tiko qo, dina ni kila ni na rawa ni kolotaki kina ena qara ni laione. E matata vinaka sara ga vei ira na tu e kea na ka a cakava qo, ni sega ni dua na ka e bibi cake mai na nona sokaloutaki Jiova wasoma!—Maciu 5:16.
15 Ni bogi dua oti nona moce ena qara ni laione o Taniela, a gole yani na tui me raici koya, qai kailavaka vua: “I Taniela, na tamata ni Kalou bula, sa rawata li, na nomu Kalou, o koya ko sa qarava tikoga me vakabulai iko maivei ira na laioni?” Sega ni bera nona sauma yani o Taniela: “Mo ni bula, na tui, ka sega ni mudu. A noqu Kalou sa tala mai na nona agilose, ka sa sogota vakaruburubu na gusudra na laioni, a ra sa sega kina ni vakacacani au: ni sa sega e dua na ka ca sa kunea vei au ko koya: ia sa sega talega na ka ca ka’u cakava e matamuni na tui.” A vakalougatataki Taniela o Jiova baleta ni qaravi koya “tikoga.”—Tani. 6:19-22.
16. Nida raica nona ivakaraitaki o Taniela, na taro cava meda tarogi keda kina me baleta noda cakacaka vakaitalatala?
16 A bolemate o Taniela, me kua ga ni vakawaletaka nona ituvatuva ni sokalou. Vakacava o keda? Na cava eso na ka eda sa vakuai keda tiko kina? Na veisau cava eda na cakava meda kacivaka wasoma kina na itukutuku vinaka ni Matanitu ni Kalou? E bibi meda vakarogoya na veika me baleti Jiova vei ira eso tale ena veivula! Ke rawa, meda saga ena veimacawa meda vakaitavi ena cakacaka vakaitalatala. Ke dredre meda vunau ena vuku ni keda ituvaki vakayago, eda se rawa tiko ga ni volatukutukutaka na cakacaka qo ke 15 mada ga na miniti noda vunau ena dua na vula. Na vuna? Baleta nida duavata kei na yalo tabu vaka kina na yalewavou, nida via tukuna tiko ga, “Mai!” Io, eda via solia noda vinaka kece meda dautukutuku wasoma ni Matanitu ni Kalou.
17. Ena gauna cava soti meda vakarogoya kina na nona veisureti o Jiova?
17 Meda vakarogoya na veisureti i Jiova ena veigauna kece, sega ni gauna ga eda vunau kina e veivale. E ka dokai meda sureti ira na karamaca ‘mera mai gunuva wale na wai ni bula,’ e rawa ni caka qori ena gauna ni volivoli, noda gole ina dua na vanua, gade, cakacaka, se i koronivuli! Ke vakatabui sara mada ga noda cakacaka vakavunau, eda na yaloqaseqasetaka—noda veisautaka na vanua kei na gauna ni noda cakacaka, se meda vunau tawalokuci vakalevu.
Kaya Tiko ga, “Mai!”
18, 19. O na vakaraitaka vakacava ni ka talei vei iko na nomu dua na tamata cakacaka ni Kalou?
18 Sa sivi qo e ciwasagavulu na yabaki na nodrau tukuna tiko na yalo tabu kei na yalewa vou, “Mai!” vei koya ga e via gunuva na wai ni bula. O sa bau rogoca na veisureti marautaki qo? O uqeti mo veisureti tale ga.
19 Eda sega ni kila na dede ni gauna ena veisureti tiko kina o Jiova, ia na noda rogoca da qai kaya, “Mai!” eda dua kina na tamata cakacaka ni Kalou. (1 Kor. 3:6, 9) Rui ka talei dina! Eda na vunau wasoma meda vakaraitaka ni ka talei tiko ga vei keda, na noda “cabora tiko ga vua na Kalou na isoro ni veivakacaucautaki.” (Iper. 13:15) Nida tomani ira na ilawalawa era vaka na yalewavou, meda tukuna tiko ga o keda na nuitaka na bula e vuravura, “Mai!” Mera lako tale ga mai e levu mera “mai gunuva wale na wai ni bula”!
Na Cava o Vulica?
• O cei tale era sureti mera lako “mai”?
• Na cava eda kaya kina ni o Jiova e vakavuna na veisureti “mai”?
• Na cava e cakava na yalo tabu ena veisureti “mai”?
• Na cava me wasoma kina noda cakacaka vakaitalatala?
[Chart/iYaloyalo ena tabana e 16]
(Raica tale na ivola)
Mo Kaya Tiko ga, “Mai!”
1914
5,100 na dautukutuku
1918
Levu era na bula ena Parataisi e vuravura
1922
“Vakarogoya, vakarogoya, vakarogoya, na Tui kei na nona Matanitu”
1929
Era kaya na ivovo ni lumuti, “Mai!”
1932
Na veisureti “Mai!” e sega ni tukuni ga vei ira na lumuti
1934
Era sureti na ilawalawa vakataki Jionatapi mera vunau
1935
Sa qai kilai na “isoqosoqo levu”
2009
7,313,173 na dautukutuku