Yɛhwexɔ́suɖuto ɔ Glɔ́ Ninɔ Nɔ Hɛn Lè Wá

COBONU mǐ na nɔ tuto jí bo wà jlǒ Jehovah tɔn ɔ, é ɖò taji ɖɔ mǐ ni hwíhwɛ́ mǐɖée dó Nǔbǐwukpétɔ́ Wɛkɛ ɔ tɔn glɔ́. Mǐ nɔ tuùn ɖɔ Vǐ tɔn wɛ nyí gǎn nú agun Klisanwun tɔn, bo nɔ lɛ́ xwedó nǔgbododó gǎn nyínyí tɔn ɖò gbɛzán mǐtɔn sín akpáxwé ɖevo lɛ mɛ. Mɛɖée hwíhwɛ́ hwíhwɛ́ dó yɛhwexɔ́suɖuto ɔ glɔ́ gbɔn mɔ̌ nɔ hɛn lè wá nú mɛ e é kúnkplá lɛ é bǐ.

² Jikpá Edɛni tɔn mɛ wɛ è na hwihwɛ́ mɛɖée dó acɛkpikpa glɔ́ xó ɔ tɔ́n ɖè azɔn nukɔntɔn. Gbeɖiɖe Mawu tɔn e mǐ mɔ ɖò Bǐbɛ̌mɛ 1:28 kpo 2:16, 17 kpo mɛ lɛ é wɛ xlɛ́ mɔ̌. Nǔɖiɖó kpɛví kpɛví lɛ ɖó na hwíhwɛ́ yeɖée dó gbɛtɔ́ lɛ glɔ́, lobɔ Adamu kpo Ɛvu kpo ɖó na hwíhwɛ́ yeɖée dó jlǒ Mawu tɔn kpo acɛkpikpa tɔn kpo glɔ́. Tónúsíse nú acɛkpikpa Mawu tɔn na zɔ́n bɔ fífá kpo tuto ɖagbe kpo na tíìn. Nukɔnmɛ ɔ, è tɛɖɛ̌ nǔgbododó gǎn nyínyí tɔn ɔ jí ɖò 1 Kɔlɛntinu lɛ 11:3 mɛ. Mɛsɛ́dó Pɔlu wlan ɖɔ: “Un jló ɖɔ mi ni mɔ nukúnnú jɛ nǔ elɔ wu: Klisu nyí gǎn nú sunnu bǐ; asisúnɔ nyí gǎn nú asì tɔn, bɔ Mawu ka nyí gǎn nú Klisu.” Enɛ xlɛ́ ɖɔ, Jehovah jɛn ma ɖó mɛɖé glɔ́ bo na hwíhwɛ́ ɖè ǎ.

³ Égbé ɔ, mɛ gegě nɔ xwedó nǔgbododó gǎn nyínyí tɔn ɔ ǎ. Aniwu? Jikpá Edɛni tɔn mɛ wɛ tagba ɔ bɛ́ ɖè, hwenu e tɔ́gbó mǐtɔn lɛ jló bo gosin acɛkpikpa Mawu Nǔbǐwukpétɔ́ ɔ tɔn glɔ́ é. (Bǐb. 3:4, 5) É ɖò mɔ̌ có, ye ɖó mɛɖesúsíninɔ kaka ɖé ǎ. É nyɔ́ wà ɔ, ye huzu kannumɔ nú nǔɖiɖó gbigbɔ tɔn baɖabaɖa ɖé, é wɛ nyí Satáan Awoví. Gǔfínfɔ́n nukɔntɔn ɔ lilɛ jɔ nú gbɛtɔ́ lɛ sín Mawu gudo. (Kolo. 1:21) É sín enɛ wu bɔ gbɛtɔ́ gegě kpó ɖò Mɛnyanya ɔ sín acɛ mɛ ɖò égbé.—1 Jaan 5:19.

⁴ Nǔgbo e ɖò Xó Mawu tɔn mɛ é kplɔnkplɔn kpo nǔgbo enɛ xwixwedó kpo ko zɔ́n bɔ mǐ gosin hlɔnhlɔn Satáan tɔn glɔ́. Ðó mǐ zé mǐɖée jó nú Jehovah bo bló baptɛm, lobo huzu Kúnnuɖetɔ́ wutu ɔ, mǐ yí gbè ɖɔ é wɛ nyí Nǔbǐwukpétɔ́ mǐtɔn. Mǐ yí gbè nú xó e Axɔ́su Davidi ɖɔ é, é ɖɔ ɖɔ Jehovah wɛ nyí “axɔ́su e kpa acɛ dó atín kpo kan kpo nu é.” (1 Tan 29:11) Ɛɛn, mǐ nɔ yí gbè kpo mɛɖéesɔ́hwe kpo ɖɔ: ‘Mi ni tuùn ɖɔ Jehovah, Mawu ɖokponɔ wɛ è ɖó na sɛn, é wɛ bló mǐ, bɔ mǐ nyí étɔn; togun tɔn wɛ mǐ nyí, é wɛ nyí lɛngbɔnyitɔ́ mǐtɔn.’ (Ðɛh. 100:3) Mǐ tuùn ɖɔ Jehovah kló, bɔ é jɛxa ɖɔ mǐ ni hwíhwɛ́ mǐɖée dó glɔ̌ tɔn bǐ mlɛ́mlɛ́, ɖó é wɛ bló nǔ bǐ. (Nǔɖe. 4:11) Ðó mǐ nyí devízɔ́watɔ́ Mawu nǔgbo ɔ tɔn lɛ wutu ɔ, mǐ nɔ xwedó Jezu Klisu, éyɛ sɔ́ kpɔ́ndéwú mɛɖée hwíhwɛ́ hwíhwɛ́ dó Mawu glɔ́ tɔn e nǔ bǐ vɔ ɖ’ewu é ɖ’ayǐ.

⁵ Etɛ wuvɛ̌ ɖěɖee Jezu mɔ ɖò ayikúngban jí lɛ é ka kplɔ́n ɛ? Eblée lɛ 5:8 na xósin ɔ: “É kplɔ́n tónúsíse gbɔn ya e é jì lɛ gblamɛ, có Mawu ví wɛ é ka nyí.” Nǔgbo ɔ, Jezu hwíhwɛ́ éɖée dó Tɔ́ tɔn jixwé tɔn ɔ glɔ́ kpo gbejininɔ kpo, é tlɛ nyí hwenu e è dóya n’i é ɔ nɛ. Hú mɔ̌ ɔ, Jezu ɖesunɔ site kpowun bo wà nǔɖe kpɔ́n ǎ. É ɖɔ xó éɖesunɔ tɔn kpɔ́n ǎ; mɔ̌ jɛn é ma ka lɛ́ ba susu éɖesunɔ tɔn kpɔ́n ǎ é nɛ. (Jaan 5:19, 30; 6:38; 7:16-18) Ðò sinsɛnzɔ́ tɔn hwenu ɔ, jlǒ Tɔ́ tɔn tɔn wiwa hɛn gbeklánxámɛ kpo yadonúmɛ kpo wá n’i có, é ka wà kpo xomɛhunhun kpo. (Jaan 15:20) Jezu hwíhwɛ́ éɖée dó Mawu glɔ́, bo lɛ́ “sɔ́ éɖée hwe” kaka yì kú, “[yatín] jí wɛ é kú ɖè lɔ.” Jehovah glɔ́ e é hwíhwɛ́ éɖée dó mlɛ́mlɛ́ é hɛn lè wá ɖò ali gegě nu; é hun gbɛ̀ mavɔmavɔ li nú gbɛtɔ́ lɛ, Mawu sɔ́ ɛ sù, bɔ é lɛ́ kpa susu nú Tɔ́ tɔn.—Fili. 2:5-11; Ebl. 5:9.

NINƆMƐ ÐĚÐEE MƐ È NA HWÍHWƐ́ MƐÐÉE DÓ YƐHWEXƆ́SUÐUTO Ɔ GLƆ́ ÐÈ LƐ É

⁶ Enyi mǐ nɔ hwíhwɛ́ mǐɖée dó Jehovah Nǔbǐwukpétɔ́ ɔ glɔ́ gbɔn jlǒ tɔn wiwa gblamɛ ɔ, mǐ nɔ xógló adohu adohu kpo akpɔ kpo e nɔ vunbla mɛ ɖěɖee nɔ gbɛ́ mɔ̌ wà lɛ é. Kɛntɔ́ mǐtɔn Awoví ɖò biba wɛ hwebǐnu bo na vún mǐ ɖu. Enyi mǐ huzu kpannukɔn mɛ nyanya enɛ, lobo sɔ́ jlǒ dó hwíhwɛ́ mǐɖée dó Jehovah glɔ́ ɔ, mǐ na gán.—Mat. 6:10, 13; 1 Pi. 5:6-9.

⁷ Ðò agun Klisanwun tɔn mɛ ɔ, mǐ nɔ yí gbè nú gǎn e Klisu nyí é kpo acɛ e é na ‘deví gbejinɔtɔ́ ayiɖotenanɔ ɔ’ é kpo. Enɛ nɔ kúnkplá linlin e mǐ nɔ ɖó dó mǐɖée lɛ wu é kpo lee mǐ nɔ wà nǔ xá mǐɖée lɛ gbɔn é kpo. Mawu glɔ́ hwíhwɛ́ hwíhwɛ́ dó ɖò agun ɔ mɛ na sísɛ́ mǐ bɔ mǐ na nɔ setónú nú Xó Mawu tɔn ɖò sinsɛn-biblo mǐtɔn sín akpáxwé lɛ bǐ mɛ. Tónúsíse enɛ nɔ byɔ ɖɔ mǐ ni nɔ ɖ’alɔ ɖò sinsɛnzɔ́ ɔ mɛ, mǐ ni nɔ yì kplé lɛ bo nɔ ɖ’alɔ ɖò ye mɛ, mǐ ni ɖó kancica ɖagbe xá mɛxo agun tɔn lɛ, lobo nɔ wà nǔ ɖó kpɔ́ xá tutoblonunu ɔ.—Mat. 24:45-47; 28:19, 20; Ebl. 10:24, 25; 13:7, 17.

⁸ Mǐɖée hwíhwɛ́ hwíhwɛ́ dó Mawu glɔ́ nɔ zɔ́n bɔ fífá, ayijayǐ kpo tuto ɖagbe kpo nɔ ɖò agun Klisanwun tɔn mɛ. È nɔ mɔ jijɔ Jehovah tɔn lɛ ɖò mɛ e hwíhwɛ́ yeɖée dó glɔ̌ tɔn lɛ é tɛntin. (1 Kɔ. 14:33, 40) Nǔ e mǐɖesunɔ ko mɔ kpɔ́n ɖò tutoblonunu Jehovah tɔn mɛ lɛ é ko sísɛ́ mǐ bɔ mǐ nɔ ɖó linlin ɖokpo ɔ Axɔ́su Davidi ɖɔhun. Ee Davidi ɖ’ayi vogbingbɔn e ɖò Jehovah sɛntɔ́ lɛ kpo mɛ nyanya lɛ kpo tɛntin é wu gudo é ɔ, é ɖɔ kpo awǎjijɛ kpo ɖɔ: ‘Nǔ nyɔ́ nú togun e sɔ́ Jehovah dó ɖó Mawu é.’—Ðɛh. 144:15.

⁹ Ðò tuto alɔwliwli kpo xwédo kpo tɔn mɛ ɔ, “asisúnɔ nyí gǎn nú asì tɔn.” Hwe ɖokpo ɔ nu ɔ, asú lɛ ɖó na hwíhwɛ́ yeɖée dó Klisu glɔ́, bɔ Mawu ka nyí gǎn nú Klisu. (1 Kɔ. 11:3) Asì lɛ ɖó na hwíhwɛ́ yeɖée dó asú yetɔn lɛ glɔ́, bɔ vǐ lɛ ɖó na hwíhwɛ́ yeɖée dó mɛjitɔ́ yetɔn lɛ glɔ́. (Efɛ. 5:22-24; 6:1) Enyi mɛ e ɖò xwédo ɔ mɛ lɛ é ɖokpo ɖokpo xwedó nǔgbododó gǎn nyínyí tɔn ɔ, fífá nɔ tíìn.

¹⁰ Asú ɖé ɖó na wà nǔ Klisu ɖɔhun bo na nɔ zán gǎn sín acɛ tɔn kpo wanyiyi kpo. (Efɛ. 5:25-29) Enyi é ma zán gǎn sín acɛ tɔn nyi dò alǒ hɔn jó dó ǎ ɔ, asì tɔn kpo vǐ tɔn lɛ kpo nɔ hun xomɛ dó hwíhwɛ́ yeɖée dó glɔ̌ tɔn. Alɔgɔnúmɛtɔ́ wɛ asì lɛ nyí. (Bǐb. 2:18) Enyi asì lɛ nɔ ɖó suúlu bo nɔ nɔ gudo nú asú yetɔn lɛ lobo nɔ lɛ́ ɖó sísí nú ye ɔ, nǔ yetɔn na nyɔ́ asú yetɔn nukúnmɛ, bɔ enɛ na lɛ́ kpa susu nú Mawu. (1 Pi. 3:1-4) Enyi asú lɛ kpo asì lɛ kpo nɔ xwedó wěɖexámɛ Biblu tɔn e kúnkplá gǎn nyínyí lɛ é ɔ, ye nɔ zé mɛɖée hwíhwɛ́ hwíhwɛ́ dó Mawu glɔ́ sín kpɔ́ndéwú ɖ’ayǐ nú vǐ yetɔn lɛ.

¹¹ Mawu glɔ́ e mǐ nɔ hwíhwɛ́ mǐɖée dó é lɛ́ kúnkplá linlin e mǐ nɔ ɖó dó “acɛkpikpa e ɖò tò ɔ nu” bɔ ‘Mawu ɖó ye ayǐ’ lɛ é wu é. (Hlɔ. 13:1-7) Ðó Klisanwun lɛ nyí toví e nɔ setónú nú sɛ́n lɛ é wutu ɔ, ye nɔ sú takwɛ lɛ, bɔ mɔ̌ mɛ ɔ, ye nɔ “sɔ́ nǔ e nyí Dada Hlɔma tɔn tɔn ɔ jó nú Dada Hlɔma tɔn, bo [nɔ] sɔ́ nǔ e nyí Mawu tɔn ɔ jó nú Mawu.” (Mat. 22:21) Gɔ́ na ɔ, tuto e mǐ nɔ bló dó ɖɔ Mawuxó ɖò fí e mǐ nɔ ɖɔ gbɔn lɛ é nɔ sɔgbe xá sɛ́n ɖěɖee ɖɔ nǔ dó alɔcyɔncyɔn nǔ mɛɖesunɔ tɔn lɛ jí nu lɛ é. Enyi mǐ nɔ hwíhwɛ́ mǐɖée dó acɛkpikpa e ɖò ayǐ lɛ é glɔ́, bo nɔ setónú nú sɛ́n yetɔn ɖěɖee ma t’afɔ nǔgbododó jlɔjlɔ Jehovah tɔn lɛ jí ǎ lɛ é bǐ ɔ, mǐ nɔ kpéwú bo nɔ zé mǐɖée bǐ jó nú Mawuxóɖiɖɔzɔ́ ɔ.—Mak. 13:10; Mɛ. 5:29.

¹² Yɛhwexɔ́suɖuto ɔ glɔ́ ninɔ kúnkplá gbɛzán mǐtɔn sín akpáxwé lɛ bǐ. Mǐ ɖi nǔ ɖɔ gbè ɖokpo na wá sù bɔ gbɛtɔ́ lɛ bǐ na hwíhwɛ́ yeɖée dó Jehovah Mawu glɔ́. (1 Kɔ. 15:27, 28) Jehovah na kɔn nyɔna tɔn dó mɛ ɖěɖee yí gbè kpo xomɛhunhun kpo ɖɔ é wɛ nyí Nǔbǐwukpétɔ́ ɔ, bo hwíhwɛ́ yeɖée dó glɔ̌ tɔn kaka sɔyi lɛ é jí.