Kplékplé Nɔví lɛ Tɔn E Ðò Bǔ É Ðé

NÚ XWÈ 1 500 mɔ̌ ɔ, Izlayɛli wɛ nyí togun e ɖó nyikɔ Jehovah tɔn ɖò ta é. Enɛ gudo ɔ, Jehovah “kpé nukún dó mɛ e ma nyí Jwifu ǎ lɛ wu . . . bo sɔ́ togun ɖokpo ɖò ye mɛ, bɔ é nyí étɔn.” (Mɛ. 15:14) Togun e ɖó nyikɔ Jehovah tɔn ɖò ta é na nyí kúnnuɖetɔ́ tɔn lɛ, bo na nɔ bǔ ɖò linlin kpo nǔwiwa kpo mɛ, nú ye na bo tlɛ ɖò fí ɖebǔ ɖò ayikúngban jí ɔ nɛ. Azɔ̌ wɛnɖagbejijla tɔn elɔ e Jezu ɖegbe tɔn é wɛ na xò ye kplé: “Hǔn, mi yì bo kplɔ́n nǔ akɔta lɛ bǐ, bonu ye ni huzu ahwanvu ce. Mi ylɔ́ Tɔ́ ɔ, Vǐ ɔ, kpodo [gbigbɔ mímɛ́] ɔ kpo sín nyikɔ dó [bló baptɛm] nú ye. Mi kplɔ́n nǔ ye, bonu ye ni setónú nú nǔ e un kplɔ́n mi lɛ bǐ.”—Mat. 28:19, 20.

² Ðó a zé hwiɖée jó nú Jehovah bo bló baptɛm wutu ɔ, a huzu ahwanvu Jezu Klisu tɔn ɖé. A nyí ɖokpo ɖò nɔvígbɛ́ Klisanwun tɔn e ɖò bǔ gbɔn gbɛ̀ ɔ bǐ mɛ, bo ma nɔ lɔn nú tò, akɔ, alǒ akwɛ nɔ klán ye ǎ é mɛ. (Ðɛh. 133:1) Wǎgbɔ tɔn ɔ, a yí wǎn nú Klisanwun gbɛ̌ towe e ɖò agun ɔ mɛ lɛ é bo nɔ lɛ́ ɖó sísí nú ye. Ye mɛ ɖé lɛ sixu gosin akɔ vovo alǒ tò vovo mɛ, kabǐ yí kplɔ́n vovo, bɔ ɖ’ayǐ ɔ, mi sixu jɛ kpɔ́ ǎ, ɖó vogbingbɔn enɛ lɛ wutu. Kancica wanyiyi nɔví nɔví tɔn tɔn e dɔn mi ɖó bǔ dìn é syɛn hú kancica ɖevo ɖebǔ, é sixu nyí ee è nɔ mɔ ɖò xɔ́ntɔn lɛ, sinsɛn, alǒ xwédo tɛntin é.—Mak. 10:29, 30; Kolo. 3:14; 1 Pi. 1:22.

LINLIN MƐTƆN HUZUHUZU

³ Enyi é nɔ vɛwǔ nú mɛɖé lɛ bɔ ye na ɖu ɖò linlin agɔ, ee vogbingbɔn sinmɛ agbaza tɔn tɔn, toxóɖiɖɔ tɔn, ninɔmɛ tɔn, alǒ nǔ mɔhun ɖevo lɛ tɔn nɔ zɔ́n bɔ ye nɔ ɖó lɛ é jí ɔ, ye sixu lin tamɛ dó Klisanwun Jwifu nukɔntɔn ɖěɖee ɖó na ɖu ɖò linlin agɔ e sinsɛn Jwifu lɛ tɔn nɔ ɖó dó akɔta ɖevo lɛ bǐ wu lɛ é jí. Hwenu e Jehovah ɖɔ nú Piyɛ́ɛ ɖɔ é na yì xwé Kɔnɛyi, ee nyí sɔja kanwekogán Hlɔma tɔn é tɔn gbè é ɔ, Jehovah zán xomɛnyínyɔ́ dó sɔnǔ nú Piyɛ́ɛ bonu é na w’azɔ̌ enɛ.—Mɛ., wemata 10.

⁴ Ðò nǔmimɔ ɖé mɛ ɔ, è ɖɔ nú Piyɛ́ɛ ɖɔ é ni hu kanlin e nyí kanlin blíblí ɖò aca Jwifu lɛ tɔn mɛ é ɖé lɛ bo ɖu. Ee Piyɛ́ɛ gbɛ́ é ɔ, gbè ɖé gosin jixwé bo ɖɔ n’i ɖɔ: “Nǔ e Mawu ɖɔ è hɛn ɔ, è na ɖu ɔ, hwɛ ma ɖɔ é vɛ́ mɛ ó.” (Mɛ. 10:15) É byɔ ɖɔ Mawu ni jla linlin Piyɛ́ɛ tɔn ɖó, bonu é na mɔ tɛn bo kpé azɔ̌ e na sɔ́ d’así n’i wɛ è ɖè é wu, enɛ wɛ nyí ba e é na yì ba nya kosi ɖé kpɔ́n é. Hwenu e Piyɛ́ɛ setónú nú alixlɛ́mɛ Jehovah tɔn é ɔ, é ɖɔ nú mɛ ɖěɖee kplé lɛ é ɖɔ: “Mi tuùn ganji ɖɔ, ɖò mǐ mɛ Jwifu lɛ sín sɛ́n mɛ ɔ, Jwifu ɖé kún ɖó na dó gbɛ̌ xá mɛ e ma nyí Jwifu ǎ é gbeɖé ó; é kún ka ɖó na byɔ ɖě xwé ó. Loɔ, Mawu ɖexlɛ́ [mì] dìn ɖɔ un kún ɖó na ylɔ́ mɛɖebǔ ɖɔ mɛ blíblí abǐ mɛ e un ma sixu dó gbɛ̌ xá ǎ é ó. Nǔ e wu wɛ hwenu e a ylɔ́ mì ɔ, un ma xò kpɔ́n cobo wá ǎ é nɛ.” (Mɛ. 10:28, 29) Enɛ gudo ɔ, Piyɛ́ɛ ɖesunɔ mɔ kúnnuɖenú ɔ ɖɔ Kɔnɛyi kpo xwédo tɔn kpo sín nǔ nyɔ́ Jehovah nukúnmɛ.

⁵ Solu Táasinu e nyí Falizyɛn ɖé bo sè wema tawun é wá sɔ́ éɖée hwe, bo dó gbɛ̌ xá mɛ ɖěɖee kpo é kpo ma nɔ jɛ kpɔ́ ɖ’ayǐ ǎ lɛ é. É tlɛ lɛ́ wá ba alixlɛ́mɛ ɖò ye gɔ́n. (Mɛ. 4:13; Ga. 1:13-20; Fili. 3:4-11) Mǐ sixu dó nukún lee Sɛjiwusi Polusi, Denisi, Damalisi, Filemɔ́ɔ, Onɛzimu, kpo mɛ ɖevo lɛ kpo huzu linlin yetɔn, hwenu e ye yí wɛnɖagbe ɔ bo huzu ahwanvu Jezu Klisu tɔn lɛ é gbɔn é mɛ kpɔ́n.—Mɛ. 13:6-12; 17:22, 33, 34; File. 8-20.

NƆ WLÍBO NÚ BǓ E MǏ ÐÈ GBƆN GBƐ̀ Ɔ BǏ MƐ É

⁶ É ɖò wɛn ɖɔ wǎn e nɔví sunnu lɛ kpo nɔví nyɔnu lɛ kpo yí nú yeɖée ɖò agun ɔ mɛ é dɔn we, bɔ a sɛkpɔ́ Jehovah kpo tutoblonunu tɔn kpo. A mɔ wanyiyi e ma sɛ̀ dò ǎ, bo nɔ ɖè ahwanvu nǔgbo Jezu Klisu tɔn lɛ xlɛ́ é, lee é ko ɖɔ gbɔn é: “Un ɖò sɛ́n yɔyɔ̌ ɖokpo na mi wɛ: mi yí wǎn nú miɖée. Mi ɖó na yí wǎn nú miɖée lee un yí wǎn nú mi gbɔn é. Wanyiyi e mi na ɖó nú miɖée ɔ, wɛ na ɖexlɛ́ mɛ lɛ bǐ ɖɔ mi nyí ahwanvu ce nǔgbo.” (Jaan 13:34, 35) Hwenu e a ɖó ayi wu ɖɔ wanyiyi e ɖò agun ɔ mɛ é nyí wanyiyi e ɖò kplékplé nɔví lɛ tɔn e gbɔn gbɛ̀ ɔ bǐ mɛ é tɛntin é sín xlɛ̌ é ɔ, Jehovah kpo tutoblonunu tɔn kpo lɛ́ sù nukún towe mɛ d’eji. A lɛ́ ɖò mimɔ wɛ bɔ nǔɖɔɖ’ayǐ Biblu tɔn e kúnkplá gbɛtɔ́ lɛ xixokplé ɖò azǎn gudogudo tɔn lɛ mɛ, bonu ye na sɛn Jehovah ɖò fífá kpo bǔninɔ kpo mɛ é ɖò jijɛnu wɛ.—Micée 4:1-5.

⁷ Nú è kpɔ́n nǔ tobutobu e nɔ klán mɛ ɖò égbé lɛ é ɔ, mɛ̌ ka sixu lin ɖɔ è hɛn ɔ, è na dɔn mɛ e “gosin tò lɛ bǐ mɛ, bo gosin akɔta lɛ bǐ mɛ, bo gosin togun lɛ bǐ mɛ, bo gosin gbè e è nɔ dó lɛ bǐ mɛ” lɛ é ɖó bǔ? (Nǔɖe. 7:9) Ðǒ ayi vogbingbɔn e ɖò mɛ ɖěɖee nɔ zán mɔ nǔnywɛ xwitixwiti tɔn ganji lɛ é kpo mɛ ɖěɖee nɔ tɛ́dó akɔ e mɛ ye gosin é sín aca hwexónu tɔn lɛ wu lɛ é kpo tɛntin é wu. Kpɔ́n adɔn e è nɔ mɔ ɖò sinsɛn sín ali nu ɖò mɛ ɖěɖee ɖó sinmɛ agbaza tɔn ɖokpo ɔ lɛ é kpo mɛ ɖěɖee gosin tò ɖokpo ɔ mɛ lɛ é kpo tɛntin é. Ðó hunjijɛ dó tò mɛtɔn jí wá huzu nǔ taji hugǎn wutu ɔ, gbɛtɔ́ lɛ wá klán ɖò toxóɖiɖɔ linu hú ɖ’ayǐ tɔn. Enyi a lin tamɛ dó vogbingbɔn e ɖò dɔkunnɔ kpo wamamɔnɔ kpo tɛntin é, gɔ́ nú nǔ maxamaxa ɖevo ɖěɖee nɔ klán mɛ lɛ é jí ɔ, a na mɔ ɖɔ gbɛtɔ́ e gosin akɔta lɛ bǐ, gbè lɛ bǐ kpo gbɛ̌ta lɛ bǐ kpo mɛ, bo ɖó ninɔmɛ vovo lɛ é dindɔn ɖó bǔ, bɔ kancica wanyiyi kpo fífá kpo tɔn e lidǒ ganji é na ɖò tɛntin yetɔn nyí nǔjiwǔ ɖé, bɔ Mawu Nǔbǐwukpétɔ́ ɔ kɛɖɛ jɛn sixu bló.—Zak. 4:6b.

⁸ Amɔ̌, bǔninɔ mɔhun ko tíìn, bɔ hwenu e a zé hwiɖée jó nú Jehovah bo bló baptɛm, lobo huzu Kúnnuɖetɔ́ tɔn é ɔ, hwi lɔ huzu ɖokpo ɖò mɛ e ɖò bǔ mɔ̌ lɛ é mɛ. Ðó a ɖò bǔninɔ mɔhun sín lè ɖu wɛ wutu ɔ, hwi lɔ ɖó na bló b’ɛ na kpó ɖò te. È sixu wà mɔ̌ gbɔn xó elɔ e mɛsɛ́dó Pɔlu ɖɔ ɖò Galatinu lɛ 6:10 mɛ é xwixwedó gblamɛ: “Enyi mǐ mɔ ɖagbewiwa sín ali hweɖebǔnu hǔn, mǐ ni nɔ wà nú mɛ bǐ, ɖò taji ɔ, nú nɔví ɖò nǔɖiɖi mɛ lɛ.” Mǐ nɔ lɛ́ xwedó wěɖexámɛ elɔ: “Mi ma sɔ́ ce jɛn na nyɔ́ sín ayixa, abǐ mɛɖée sɔ́ sù dó wuvɔ̌ sín ayixa dó wà nǔ ɖebǔ na ó; loɔ, mi nɔ sɔ́ miɖée hwe ɖò mɛ ɖě lɛ nukɔn, bonu mɛ ɖokpo ɖokpo ni nɔ mɔ ɖɔ mɛ ɖě lɛ hugǎn emi. Mɛɖebǔ ma nɔ ba ɖagbe éɖesunɔ tɔn ó; loɔ, mɛ ɖokpo ɖokpo ni nɔ ba ɖagbe mɛ ɖě lɛ tɔn.” (Fili. 2:3, 4) Enyi mǐ nɔ dó gǎn bo nɔ kpɔ́n nɔví sunnu mǐtɔn lɛ kpo nɔví nyɔnu mǐtɔn lɛ kpo lee Jehovah nɔ wà gbɔn é, bo ma nɔ kpɔ́n lee ye ɖè gbɔn ɖò wěxo é ǎ ɔ, mǐ na kpó ɖò kancica fífá kpo awǎjijɛ kpo tɔn ɖé sín vivǐ ɖu xá ye wɛ.—Efɛ. 4:23, 24.

NǓ MǏÐÉE LƐ TƆN NI NƆ ÐU AYI MƐ NÚ MǏÐÉE

⁹ Lee mɛsɛ́dó Pɔlu ɖexlɛ́ mǐ gbɔn é ɔ, kínklán nɔ nɔ agun ɔ mɛ ǎ, loɔ, mɛ e ɖ’emɛ lɛ é bǐ sín nǔ nɔ ɖu ayi mɛ nú yeɖée lɛ. (1 Kɔ. 12:14-26) Fí e kplékplé nɔví lɛ tɔn mǐtɔn e gbɔn gbɛ̀ ɔ bǐ mɛ é sín mɛɖé lɛ nɔ nɔ é sixu lín dó mǐ tawun, amɔ̌, ganjininɔ yetɔn nɔ ɖu ayi mɛ nú mǐ. Enyi è ɖò ya dó nú nɔví mǐtɔn ɖé lɛ wɛ ɔ, mǐ mɛ e kpò lɛ é lɔ nɔ flú bǐ. Enyi mɛɖé lɛ ɖò hudo mɛ, alǒ adla, ahwan, alǒ gǔfínfɔ́n tò tɔn hɛn nǔ gblé dó ye wu ɔ, akpakpa nɔ sɔ́ mɛ e kpò lɛ é bɔ ye nɔ ba ali ɖěɖee nu ye na d’alɔ mɛ mɔhun lɛ ɖò gbigbɔ kpo nǔɖokan kpo linu ɖè lɛ é.—2 Kɔ. 1:8-11.

¹⁰ Mǐ mɛ bǐ ɖó na nɔ xoɖɛ dó nɔví lɛ tamɛ ayihɔngbe ayihɔngbe. È nɔ tɛ́n ye mɛ ɖé lɛ kpɔ́n, bonu ye na wà nǔ nyanya. Mɛ ɖevo lɛ nɔ sè wuvɛ̌ e mɛ bǐ sixu mɔ nǔ jɛ wu lɛ é. Mǐ nɔ tuùn gbeklánxámɛ azɔ̌gbɛ́ kpo xwédo e klán ɖò sinsɛn-linu lɛ é kpo tɔn ɖěɖee sín wuvɛ̌ sè wɛ mɛ ɖevo lɛ ɖè é sɔmɔ̌ ǎ. (Mat. 10:35, 36; 1 Tɛ. 2:14) Nǔ enɛ lɛ nɔ ɖu ayi mɛ nú mǐ, ɖó mǐ nyí kplékplé nɔví lɛ tɔn ɖé gbɔn gbɛ̀ ɔ bǐ mɛ. (1 Pi. 5:9) Mɛɖé lɛ ɖò mǐ mɛ bo ɖò azɔ̌ syɛnsyɛn wà wɛ ɖò sinsɛnzɔ́ Jehovah tɔn mɛ, lobo nɔ kpé nukún dó wɛnɖagbejijlazɔ́ ɔ kpo agun lɛ kpo wu. Gɔ́ na ɔ, mɛ ɖevo lɛ nɔ kpé nukún dó azɔ̌ e wà gbɔn gbɛ̀ ɔ bǐ mɛ wɛ è ɖè é wu. Ye mɛ bǐ wɛ ɖó hudo ɖɛ mǐtɔn lɛ tɔn, bɔ enɛ nɔ xlɛ́ wanyiyi e mǐ ɖó nú ye é kpo lee nǔ yetɔn nɔ ɖu ayi mɛ nú mǐ nǔgbo nǔgbo gbɔn é kpo, enyi mǐ ma tlɛ sɔ́ sixu wà nǔ ɖevo ɖebǔ dó d’alɔ ye ǎ ɔ nɛ.—Efɛ. 1:16; 1 Tɛ. 1:2, 3; 5:25.

¹¹ Ðó nǔ lɛ fɔ́n bo ɖò wluwlú wɛ ɖò ayikúngban ɔ jí ɖò azǎn gudogudo tɔn elɔ lɛ mɛ wutu ɔ, togun Jehovah tɔn ɖó na sɔnǔ ɖ’ayǐ bo na d’alɔ yeɖée lɛ. Hweɖelɛnu ɔ, adla lɛ, ɖi ayikúngban dánwǔ kpo tɔgbamɛ kpo, nɔ byɔ ɖɔ è ni dó gǎn tawun bo hɛn sɔ mɛ, bo lɛ́ bló tuto nǔnina e ma hwexwɛ ǎ lɛ é tɔn. Klisanwun xwè kanweko nukɔntɔn ɔ tɔn lɛ zé kpɔ́ndéwú ɖagbe ɖ’ayǐ ɖò ali enɛ nu. Ee ahwanvu e ɖò Antyɔci lɛ é flín wěɖexámɛ Jezu tɔn é ɔ, kpo xomɛhunhun kpo wɛ ye sɛ́ nǔnina lɛ dó nɔví e ɖò Judée lɛ é. (Mɛ. 11:27-30; 20:35) Nukɔnmɛ ɔ, mɛsɛ́dó Pɔlu dó wusyɛn lanmɛ nú Kɔlɛntinu lɛ ɖɔ ye ni nɔ gudo nú sɔhɛnmɛzɔ́ e è wà ɖó tuto jí é. (2 Kɔ. 9:1-15) Égbé ɖesu ɔ, enyi adla jɛ nɔví mǐtɔn lɛ jí, bɔ ye ɖó hudo sɔhɛnmɛ tɔn ɔ, tutoblonunu ɔ alǒ Klisanwun ɖokpo ɖokpo nɔ yawǔ wà nǔɖe, bo nɔ sú hudo yetɔn lɛ sín dò.

È SƆ́ MǏ ÐÓ VO BƆ MǏ NA WÀ JLǑ JEHOHAH TƆN

¹² È bló tuto nú kplékplé nɔví lɛ tɔn mǐtɔn e gbɔn gbɛ̀ ɔ bǐ mɛ bo ɖò bǔ é, bonu é na wà jlǒ Jehovah tɔn. Ðò hwe mǐtɔn nu dìn ɔ, jlǒ tɔn wɛ nyí ɖɔ è ni jla wɛnɖagbe Axɔ́suɖuto ɔ tɔn gbɔn ayikúngban ɔ bǐ jí, bonu é ni nyí kúnnuɖiɖe nú akɔta lɛ bǐ. (Mat. 24:14) Ee mǐ na ɖò azɔ̌ enɛ wà wɛ é ɔ, jlǒ Jehovah tɔn wɛ nyí ɖɔ mǐ ni zán gbɛ̀ sɔgbe xá nǔgbododó tɔn e kúnkplá walɔ ɖagbe lɛ é. (1 Pi. 1:14-16) Mǐ ɖó na ɖò gbesisɔmɛ bo na nɔ sɔ́ mǐɖée hwe, lobo w’azɔ̌ nú nukɔnyiyi wɛnɖagbe ɔ tɔn. (Efɛ. 5:21) Dìn wɛ nyí hwenu ɔ, bɔ mǐ na sɔ́ Axɔ́suɖuto Mawu tɔn ɖó tɛn nukɔntɔn mɛ ɖò gbɛzán mǐtɔn mɛ, bo na xò jlǒ mǐɖesunɔ tɔn lɛ nyi kɛ́n. (Mat. 6:33) Nú mǐ hɛn enɛ d’ayi mɛ, hwenu e mǐ na ɖò azɔ̌ wà ɖó kpɔ́ wɛ dó wɛnɖagbe ɔ takúnmɛ é ɔ, mǐ na ɖó awǎjijɛ dìn, bo na lɛ́ mɔ nyɔna mavɔmavɔ lɛ.

¹³ Ðó mǐ nyí Kúnnuɖetɔ́ Jehovah tɔn lɛ wutu ɔ, è sɔ́ mǐ ɖó vo bɔ mǐ nyí togun mímɛ́ ɖé, bo nɔ ɖókan dó sinsɛnzɔ́wiwa nú Mawu wu. (Ti. 2:14) Jehovah e sɛn wɛ mǐ ɖè é zɔ́n bɔ mǐ gbɔn vo. É nyí azɔ̌ kɛɖɛ wɛ mǐ nɔ wà alɔ ɖò alɔ mɛ xá nɔví mǐtɔn e gbɔn gbɛ̀ ɔ bǐ mɛ lɛ é ǎ, loɔ, mǐ nɔ lɛ́ dó gbè nǔgbo ɔ tɔn ɖokpo géé ɔ, bo nɔ lɛ́ wà nǔ sɔgbe xá nǔgbo enɛ. Jehovah ko ɖɔ enɛ ɖ’ayǐ gbɔn gbeyiɖɔ tɔn Sofoníi jí, bo ɖɔ: “Un na ɖyɔ gbè togun lɛ tɔn dó gbè mímɛ́ ɖé, bonu ye bǐ ni dó sixu ylɔ́ nyikɔ Jehovah tɔn, bo sɛn ɛ alɔ ɖò alɔ mɛ.”—Sof. 3:9, nwt.

¹⁴ Enɛ gudo ɔ, Jehovah sɔ́ d’ayi mɛ nú Sofoníi, bɔ é tinmɛ kplékplé nɔví lɛ tɔn e gbɔn gbɛ̀ ɔ bǐ mɛ, bo nyí nǔgbo ɖò égbé é, bo ɖɔ: “Mɛ e na kpó ɖò gbɛ̀ ɖò Izlayɛli lɛ sɔ́ na wà nǔ agɔ ɖě ǎ; ye sɔ́ na ɖó adingban ɖě ǎ; ye sɔ́ na zé ɖɛ̌ yetɔn dó blɛ́ mɛ na ǎ. Ye na ɖu nǔ, bo na dɔ́ amlɔ, bɔ mɛɖebǔ na dó xɛsi nú ye ǎ.” (Sof. 3:13) Ðó mǐ mɔ nukúnnú jɛ Xó nǔgbo Jehovah tɔn wu, bo bló linlin mǐtɔn ɖó, lobo nɔ zán gbɛ̀ sɔgbe kpo nǔgbododó Jehovah tɔn lɛ kpo wutu ɔ, mǐ kpéwú bo nɔ w’azɔ̌ ɖò bǔ. Mǐ nɔ wà nǔ e mɛ ɖěɖee nɔ sɔ́ linlin gbɛtɔ́ tɔn dó kpɔ́n nǔ na lɛ é nɔ mɔ ɖɔ è kún sixu wà gbeɖé ó lɛ é. Nǔgbo ɔ, togun e ɖò vo é ɖé wɛ nú mǐ, togun Mawu tɔn, bɔ mǐ nɔ kpa susu n’i ɖò ayikúngban ɔ bǐ jí.—Micée 2:12.