Décembre

Sín hweɖenu jɛ hweɖenu ɔ, é sixu vɛwǔ nú mǐ bɔ mǐ na mɔ nǔ jɛ nǔɖe wu ɖò Xó Mawu tɔn mɛ. Alǒ, Jehovah na sinkɔn nú ɖɛ mǐtɔn lɛ lee mǐ ba gbɔn é ǎ. Enɛ sixu zɔ́n bɔ mǐ jɛ nǔ xò kpɔ́n jí. Enyi mǐ wɔn ya nú nǔxokpɔ́n enɛ lɛ ɔ, ye sixu vɔ́da nú nǔɖiɖi mǐtɔn, bo wà nǔ dó kancica e mǐ ɖó xá Jehovah é wu. (Ja. 1:7, 8) Ye sixu zɔ́n bɔ mǐ ba nukúnɖiɖó sɔgudo tɔn mǐtɔn kpò. Mɛsɛ́dó Pɔlu jlɛ́ nukúnɖiɖó sɔgudo tɔn mǐtɔn dó gandótɔnu ɖé wu. (Ebl. 6:19) Gandótɔnu ɖé nɔ hɛn tɔjihun ɖé ɖó te, hwenu e jɔhɔn syɛnsyɛn ɖé ɖò nyinyi wɛ é bonu jɔhɔn ɔ ma dɔn ɛ yì fí e só lɛ ɖè é ó. Enyi wlɔ e dɔn gandótɔnu ɔ cá kpo tɔjihun ɔ kpo é ma wɛ́n ǎ ɔ jɛn gandótɔnu ɔ nɔ nyɔ́ zán. Lee gandótɔnu ɖé sín wlɔ jɛ ko ɔ, é nɔ vɔ́da nú gandótɔnu ɔ gbɔn é ɔ, mɔ̌ wɛ nǔxokpɔ́n e mǐ wɔn ya na lɛ é sixu vɔ́da nú nǔɖiɖi mǐtɔn gbɔn é nɛ. Enyi è klán gbè xá mɛɖé ɔ, nǔɖiɖi e é ɖó ɖɔ Jehovah sixu bló bɔ akpá tɔn lɛ na jɛnu é sixu vɔ́da. Enyi nǔɖiɖi mǐtɔn vɔ́da ɔ, mǐ nɔ ba nukúnɖiɖó kpò. Mɛ mɔ̌hun sixu nɔ ma ɖó awǎjijɛ gbeɖé! w21.02 30 akpá. 14-15

Xwè 70 jɛji mɔ̌ wɛ Ablaxamu ɖó, hwenu e é kpo xwédo tɔn kpo tɔ́n sín Wúu é. (Bǐb. 11:31–12:4) Nú xwè kanweko mɔ̌ ɔ, é nɔ ɖò goxɔ lɛ mɛ, bo nɔ ɖò fí ɖé gosin jɛ fí ɖevo wɛ ɖò Kanáa tò ɔ mɛ. Ablaxamu kú hwenu e é ɖó xwè 175 é. (Bǐb. 25:7) Amɔ̌, é mɔ akpá e Jehovah dó ɖɔ Emi na na Kanáa tò ɔ kúnkan tɔn lɛ é sín jijɛnu ǎ. É ka lɛ́ nɔ gbɛ̀ bo mɔ toxo ɖaxó ɔ, enɛ wɛ nyí Axɔ́suɖuto Mawu tɔn e è ɖó ayǐ é ǎ. É ɖò mɔ̌ có, è ɖɔ dó Ablaxamu wu ɖɔ cobonu é na kú ɔ, é “nɔ kpikpoxɔmɛ ɖesu” bɔ “gbɛ̀ nyɔ́ n’i.” (Bǐb. 25:8) Ablaxamu ɖó na ɖí xwi xá wuvɛ̌ enɛ lɛ bǐ có, é ka kpò ɖò nǔɖiɖi e lidǒ é ɖó wɛ, bo lɛ́ sɔ́ jlǒ dó nɔte kpɔ́n Jehovah. Etɛwu é ka kpéwú bo dɛ? Ðó ɖò gbɛzán Ablaxamu tɔn bǐ mɛ ɔ, Jehovah cyɔn alɔ jǐ tɔn bo wà nǔ xá ɛ xɔ́ntɔn ɖɔhun. (Bǐb. 15:1; Eza. 41:8; Ja. 2:22) Ablaxamu ɖɔhun ɔ, mǐ ɖò te kpɔ́n toxo ɖaxó e ɖó dodó syɛnsyɛn é. (Ebl. 11:10) Amɔ̌, mǐdɛɛ lɛ ɖò te kpɔ́n toxo enɛ sín blobló ǎ. È ko ɖó Axɔ́suɖuto Mawu tɔn ayǐ ɖò 1914, bɔ é ko ɖò acɛ kpa wɛ bǐ mlɛ́mlɛ́ ɖò jixwé. (Nǔɖe. 12:7-10) Amɔ̌, mǐ ɖò te kpɔ́n ɖɔ é ni wá kpa acɛ bǐ mlɛ́mlɛ́ ɖò ayikúngban jí. w20.08 4-5 akpá. 11-12

Cobonu mǐ na ɖótó mɛ ɖevo lɛ ganji ɔ, mǐ ɖó na nɔ sɔ́ mǐɖée hwe, bo ɖó na nɔ lɛ́ ɖó suúlu. É hwe bǐ ɔ, ɖó hwɛjijɔ atɔn wu wɛ é ɖò taji ɖɔ mǐ ni nɔ wà mɔ̌. Nukɔntɔn, é na sín enɛ wu bɔ mǐ na nɔ yawǔ ɖó linlin agɔ dó mɛ lɛ wu gbɔn mɔ̌ ǎ. Wegɔ́, mǐ sixu tuùn lee nǔ nɔ cí nú nɔví mǐtɔn é kpo nǔ ɖěɖee sísɛ́ ɛ b’ɛ wà nǔɖe é kpo, bɔ enɛ na d’alɔ mǐ bɔ mǐ na sè wuvɛ̌ xá ɛ hugǎn. Atɔngɔ́, mǐ sixu d’alɔ ɛ, b’ɛ na kplɔ́n nǔɖe dó éɖée wu. Hweɖelɛnu ɔ, mǐ tlɛ nɔ mɔ nǔ jɛ lee nǔ cí nú mǐɖesunɔ é mɛ ganji, kaka jɛ hwenu e mǐ ɖɔ xó dó ɖexlɛ́ dó é ǎ. É nɔ vɛwǔ nú nɔví mǐtɔn ɖé lɛ bonu ye na ɖɔ lee nǔ cí nú ye é, ɖó ninɔmɛ yetɔn, aca yetɔn, alǒ gbɛtɔ́ alɔkpa e ye nyí é wu. É sixu byɔ hwenu ɖò ye sí cobɔ ye na vo bo ɖɔ xó nú mǐ, amɔ̌, xó jɛn ye na ɖɔ hwɛ̌ có mǐ na tuùn lee nǔ cí nú ye tawun é. Nú mǐ nɔ ɖó suúlu Jehovah ɖɔhun ɔ, ye sixu ɖeji dó mǐ wu. Enɛ wu ɔ, enyi ye ɖò gbesisɔmɛ bo na ɖɔ lee nǔ cí nú ye é nú mǐ ɔ, mǐ ɖó na ɖótó ye ganji. w20.04 15-16 akpá. 6-7

Hwɛhwɛ ɔ, hweví lɛ nɔ nɔ fí e nyɔ́ nú ye ɖò tɔ̀ ɔ mɛ bɔ nǔɖuɖu sukpɔ́ ɖè é. Táan e mɛ hwehutɔ́ ɖé na yì wlí hweví é lɔ ɖò taji. Mɛsɛ́dó ɖé nɔ nɔ tɔtɛntinto Pacifique tɔn ɖé mɛ bo wá mɔ nǔ jɛ wu ɖɔ hwenu tawun ɖé tíìn bo nyɔ́ hugǎn bɔ è na yì wlí hweví. Kúnnuɖetɔ́ xá ɔ mɛ tɔn ɖé byɔ ɛ ɖɔ é na kplá emi yì hweví wlí gbé. Mɛsɛ́dó ɔ ɖɔ: “Mǐ na kpé sɔ zǎnzǎn gan tɛnnɛ mɛ.” Nɔví ɔ yí gbè n’i ɖɔ, “A mɔ nǔ jɛ mɛ ǎ. Hwenu e nyɔ́ bɔ è na wlí hweví é wɛ mǐ nɔ yì, é nyí hwenu e nyɔ́ nú mǐdɛɛ lɛ é ǎ.” Mɔ̌ ɖokpo ɔ, mɛ e nɔ dɔn gbɛtɔ́ lɛ hweví ɖɔhun ɖò xwè kanweko nukɔntɔn ɔ mɛ lɛ é nɔ yì fí e gbɛtɔ́ lɛ ɖè é kpo táan e mɛ ye sixu ɖò finɛ é kpo. Ði kpɔ́ndéwú ɔ, ahwanvu Jezu tɔn lɛ jlá wɛn ɔ ɖò tɛmpli mɛ, ɖò kplɔ́ngbasá Jwifu lɛ tɔn lɛ, gbɔn xwégbe xwégbe, kpo axi lɛ mɛ kpo. (Mɛ. 5:42; 17:17, nwt; 18:4) Mǐ lɔ ɖó na tuùn lee mɛ lɛ nɔ wà nǔ gbɔn ɖò fí e mǐ nɔ ɖɔ Mawuxó ɖè é. Mǐ lɔ ɖó na nɔ ɖyɔ tuto mǐtɔn bo na dó sixu jlá wɛn ɔ mɛ lɛ ɖò fí e mǐ sixu yawǔ mɔ ye ɖè é kpo hwenu e mǐ na mɔ ye dó é kpo.—1 Kɔ. 9:19-23. w20.09 4 akpá. 8-9

Ali e nu mǐ na zun xɔ́ntɔn xá Jezu ɖè é ɖokpo wɛ nyí ɖɔ mǐ ni nɔ nɔ gudo nú tuto agun Klisanwun tɔn tɔn lɛ. Kancica e mǐ ɖó xá Jezu e nyí gǎn agun ɔ tɔn é nɔ syɛn d’eji hwenu e mǐ nɔ wà nǔ ɖó kpɔ́ xá mɛ ɖěɖee è sɔ́ bonu ye na kpé nukún dó mǐ wu lɛ é é. (Efɛ. 4:16) Ði kpɔ́ndéwú ɔ, mǐ nɔ tɛ́n kpɔ́n dìn bonu è na zán Kpléxɔ Axɔ́suɖuto ɔ tɔn mǐtɔn lɛ bǐ ganji. Enɛ wu ɔ, è xò agun ɖé lɛ kplé. Tuto enɛ zɔ́n bɔ nǔnina lɛ nɔ gú ǎ. Ðò hwe ɖokpo ɔ nu ɔ, é byɔ ɖɔ wɛnjlatɔ́ ɖé lɛ ni huzu sɔgbe xá ninɔmɛ yɔyɔ̌ enɛ. Wɛnjlatɔ́ gbejinɔtɔ́ enɛ lɛ sixu ko nɔ agun ɖé mɛ nú xwè gegě, bo sixu ko vɛ́ kpo nɔví e ɖò finɛ lɛ é kpo tawun. Amɔ̌ dìn ɔ, è byɔ ye ɖɔ ye ni yì agun ɖevo mɛ. Kpɔ́n lee é nɔ hun xomɛ nú Jezu sɔ, hwenu e é nɔ mɔ bɔ ahwanvu gbejinɔtɔ́ enɛ lɛ nɔ ɖò nǔ wà sɔgbe xá tuto enɛ wɛ é é! w20.04 24-25 akpá. 14

Axɔ́su totaligbé tɔn ɔ kpo tofɔligbé tɔn ɔ kpo kpò ɖò agba hwlɛn wɛ bo na huzu acɛkpikpa agbɔ̌nnɔ bǐ ɔ. Ði kpɔ́ndéwú ɔ, mǐ ni kpɔ́n nǔ e jɛ ɖò Wɛkɛ Hwan Wegɔ́ ɔ gudo, hwenu e Union Soviétique kpo ahwan tɔn lɛ kpo jɛ acɛ kpa jí ɖò fí gegě ɖò Elɔpu é. Nǔwiwa axɔ́su totaligbé tɔn ɔ tɔn lɛ zɔ́n bɔ axɔ́su tofɔligbé tɔn ɔ jɛ ahwanfunfun sín akɔ ɖé gbɔn gbɛ̀ ɔ mɛ, bɔ è nɔ ylɔ́ ɖɔ OTAN. Axɔ́su totaligbé tɔn ɔ kpo tofɔligbé tɔn ɔ kpo kpò ɖò akwɛ gegě zán dó sɔnǔ nú ahwanfunnú agbɔ̌nnɔ hugǎn lɛ wɛ. Ye nɔ lɛ́ fun ahwan xá yeɖée, gbɔn gudo ninɔ nú kɛntɔ́ yetɔn lɛ sín kɛntɔ́ ɖò ahwan linu, ɖò Aflika, Azíi kpo Amérique Latine kpo gblamɛ. Ðò xwè e wá yì lɛ é mɛ ɔ, Russie kpo ahwan tɔn lɛ kpo fɔ́n bo ɖò hlɔnhlɔn ɖó dó hlɔnhlɔn jí wɛ. Ye nɔ lɛ́ zán ɔdinatɛ́ɛ dó tɔ́n ahwan axɔ́su tofɔligbé tɔn ɔ. Axɔ́su totaligbé tɔn ɔ nɔ dóhwɛ tofɔligbé tɔn ɔ ɖɔ é nɔ zán tuto ɔdinatɛ́ɛ jí tɔn nyanya lɛ dó wà nǔ dó akwɛzinkan emitɔn kpo acɛkpikpa emitɔn kpo wu; bɔ axɔ́su tofɔligbé tɔn ɔ lɔ nɔ ɖɔ nǔ ɖokpo ɔ. Lee Daniyɛli ɖɔ ɖ’ayǐ gbɔn é ɔ, axɔ́su totaligbé tɔn ɔ kpò ɖò ahwan tɔ́n togun Mawu tɔn wɛ.—Dan. 11:41. w20.05 13 akpá. 5-6

“Nyɔnu nɔ wɔn vǐ e ɖò anɔ̌ nɔ́ wɛ ɖò akɔ́n tɔn mɛ ɔ à?” Nǔ e Jehovah kanbyɔ ɖò gbeyiɖɔ Ezayíi hwenu é nɛ. Mawu ɖɔ nú togun tɔn ɖɔ: “É na bo ka nɔ wɔn ɛ ɔ, nyɛ ɔ, nyɛ na wɔn we ǎ.” (Eza. 49:15) Mawu nɔ yawǔ jlɛ́ éɖée dó nɔ ɖé wu ǎ. Amɔ̌, é wà mɔ̌ ɖò ninɔmɛ elɔ mɛ. Jehovah zán kancica e nɔ nɔ vǐnɔ ɖé kpo vǐ tɔn kpo tɛntin é dó xlɛ́ lee é nɔ tɛ́dó mɛsɛntɔ́ tɔn lɛ wu syɛnsyɛn gbɔn é. Vǐnɔ gegě na yí gbè nú xó elɔ lɛ e nɔví nyɔnu Jasmine ɖɔ é: “Enyi è ɖò anɔ̌ na vǐ ɖé wɛ ɔ, kancica bǔnɔ e nɔ nɔ ayǐ nú gbɛhwenu mɛtɔn bǐ é ɖé nɔ wá tíìn ɖò mɛ kpo vǐ ɔ kpo tɛntin.” Enyi vǐ Jehovah tɔn lɛ ɖokpo vɔ́vɔ́ tlɛ ɖó kúnnuɖegbé kpo kplé lɛ kpo yiyi te ɔ, é nɔ ɖó ayi wu. Nɔví vívɛ́ mǐtɔn e awakanmɛ gbɔjɔ na lɛ é gegě ko lɛkɔ wá agun ɔ mɛ, bɔ xomɛ nɔ hun mǐ tawun! Jehovah nɔ ba ɖɔ mɛ ɖěɖee awakanmɛ gbɔjɔ na lɛ é bǐ ni lɛkɔ wá, mɔ̌ wɛ mǐ lɔ nɔ ba.—1 Pi. 2:25. w20.06 18 akpá. 1-3

Nukún sixu mɔ nǔnina lɛ bǐ ǎ. Nǔgbo ɔ, nukún sixu mɔ nǔnina ɖěɖee xɔ akwɛ hú bǐ é ǎ. Ðò Mawuxóɖiɖɔ Só Jí tɔn ɔ mɛ ɔ, Jezu slɛ́ nǔnina jixwé tɔn ɖěɖee ɖò nukɔn nú nǔɖokan lɛ flaflá tɔn lɛ é. Enɛ gudo ɔ, é ɖɔ xó elɔ gɔ́ na: “Fí [e] dɔkun towe ɖè ɔ, finɛ wɛ ayi towe lɔmɔ̌ na nɔ.” (Mat. 6:19-21) Ayi mǐtɔn na sísɛ́ mǐ bɔ mǐ na nya nǔ e xɔ akwɛ nú mǐ hugǎn lɛ é gbé. Mǐ nɔ ‘kplé dɔkun mǐtɔn lɛ ɖó jixwé’ gbɔn nyikɔ ɖagbe ɖé ɖiɖó ɖò Mawu nukɔn gblamɛ. Jezu ɖɔ dó dɔkun enɛ lɛ wu ɖɔ ye kún sixu gblé, alǒ mɛɖé kún sixu fin ye gbeɖé ó. Mɛsɛ́dó Pɔlu dó wusyɛn lanmɛ nú mǐ ɖɔ mǐ ni ‘sɔ́ nukún mǐtɔn lɛ ɖó nǔ e è ma nɔ mɔ ɖó nukún wu ǎ lɛ é jí.’ (2 Kɔ. 4:17, 18) Nyɔna ɖěɖee sín vivǐ mǐ na ɖu ɖò gbɛ̀ yɔyɔ̌ Mawu tɔn mɛ lɛ é ɖò nǔ enɛ lɛ e nukún ma nɔ mɔ ǎ lɛ é mɛ. Mǐ ka nɔ ɖexlɛ́ ɖɔ nǔnina enɛ lɛ e nukún ma nɔ mɔ ǎ lɛ é nɔ sù nukún mǐtɔn mɛ à? w20.05 26 akpá. 1-2

Nǔ e Mɔyizi kplɔ́n Izlayɛli-ví lɛ é wà ɖagbe nú ye, bo lɛ́ fá kɔ nú ye, lee fò nɔ gbà kɔn nyi gbehan jí gbɔn é. Nɛ̌ mǐ ka sixu bló gbɔn bɔ nǔkplɔnmɛ mǐtɔn lɛ lɔ na nɔ cí mɔ̌? Nú mǐ ɖò kúnnu ɖè wɛ sín hɔn ɖé kɔn jɛ hɔn ɖé kɔn alǒ agbawungba ɔ, mǐ sixu zán Biblu dó xlɛ́ nyikɔ Mawu tɔn Jehovah ɔ mɛ lɛ. Mǐ sixu xwlé wema ɖɛkpɛɖɛkpɛ, video ɖagbeɖagbe, kpo nǔ ɖevo e ɖò tɛn Ɛntɛnɛti tɔn mǐtɔn jí lɛ é kpo ye; nǔ enɛ lɛ nɔ kpa susu nú Jehovah. Ali lɛ sixu hun nú mǐ hwenu e mǐ ɖò azɔ̌ jí, wemaxɔmɛ, alǒ tomɛ yì wɛ é bɔ mǐ na ɖɔ xó dó Mawu mǐtɔn wanyiyinɔ ɔ kpo mɛ alɔkpa e é nyí é kpo wu. Nú mǐ nɔ ɖɔ xó nú mɛ lɛ dó linlin e wanyiyi kpé bɔ Jehovah ɖó nú gbɛtɔ́ lɛ kpo ayikúngban ɔ kpo wu é jí ɔ, ali hun nú ye wɛ mǐ ɖè bonu ye na ɖó mɔjɛmɛ e sixu nyí nǔ yɔyɔ̌ ɖevo sésé nú ye é dó Jehovah wu nɛ. Enyi mǐ nɔ kplɔ́n nǔgbo ɔ mɛ lɛ dó Tɔ́ mǐtɔn wanyiyinɔ ɔ wu ɔ, mǐ nɔ d’alɔ bonu nyikɔ Mawu tɔn ɔ na nyí nǔ mímɛ́. Mǐ nɔ ɖè mɛ̌ adingban e mɛ ɖevo lɛ sixu ko nɔ kplɔ́n mɛ lɛ dó Jehovah wu é ɖé lɛ. Nǔ e mǐ nɔ zán Biblu dó kplɔ́n mɛ lɛ é nɔ nyí nǔ e ye sixu kplɔ́n b’ɛ na fá kɔ nú ye tawun é.—Eza. 65:13, 14. w20.06 10 akpá. 8-9

Enyi mǐ na d’alɔ mɛ e jló na lɛkɔ wá Jehovah gɔ́n lɛ é ɔ, jijɔ tɛ lɛ mǐ ka ɖó na ɖó? Ðǒ ayi nǔ e lǒ e Jezu dó dó vǐ ɖuvanɔ ɔ wu é sixu kplɔ́n mǐ é ɖé lɛ wu. (Luk. 15:17-24) Vǐ ɔ wá mɔ ɖò gudo mɛ ɖɔ emi wà xlonɔnú bo wá gbeta ɔ kɔn bo lɛkɔ wá xwé. Tɔ́ ɔ kánwezun bo yì kpé vǐ tɔn bo zunfan ɛ dó na ɛ jiɖe ɖɔ emi yí wǎn n’i. Vǐ ɔ sín ayixa ɖò hun xò xá ɛ wɛ, b’ɛ mɔ ɖɔ emi kún sɔ́ jɛxa bonu è na ylɔ́ emi ɖɔ vǐ ó. Hwenu e vǐ ɔ ɖɔ lee nǔ cí n’i é nú tɔ́ tɔn é ɔ, é sè wuvɛ̌ xá ɛ. Enɛ gudo ɔ, tɔ́ ɔ ɖè afɔ tawun tawun ɖé lɛ dó na jiɖe vǐ ɔ ɖɔ é víví nú emi ɖɔ é lɛkɔ wá xwé, bɔ emi na wà nǔ xá ɛ vǐ e emi yí wǎn na é ɖɔhun. Bo na dó ɖè enɛ xlɛ́ ɔ, tɔ́ ɔ ɖu agɔ̌ ɖé dó vǐ tɔn e lɛkɔ sín hwɛ tɔn lɛ gudo é takúnmɛ bo lɛ́ na ɛ awu ɖagbeɖagbe lɛ.Jehovah cí tɔ́ e xó è ɖɔ ɖò lǒ enɛ mɛ é ɖɔhun. É yí wǎn nú nɔví mǐtɔn e awakanmɛ gbɔjɔ na lɛ é bo ba ɖɔ ye ni lɛkɔ wá emi gɔ́n. Nú mǐ nɔ wà nǔ Jehovah ɖɔhun ɔ, mǐ sixu d’alɔ ye bɔ ye na lɛkɔ wá. Enɛ na byɔ suúlu, wuvɛ̌sexámɛ, kpo wanyiyi kpo ɖò mǐ sí. w20.06 25-26 akpá. 8-9

Jezu ɖɔ ɖɔ mɛɖé lɛ nɔ yí nǔgbo ɔ “kpo awǎjijɛ kpo,” amɔ̌, nú nǔɖiɖi yetɔn gbɔn tɛnkpɔn mɛ ɔ, ye nɔ xò nǔ kplá. (Mat. 13:3-6, 20, 21) Bɔya, ye sixu nɔ ma mɔ nǔ jɛ mɛ ɖɔ nú emi xwedó Jezu ɔ, emi na mɔ wuvɛ̌ lɛ. (Mat. 16:24) Alǒ, ye sixu lin ɖɔ nú emi huzu Klisanwun ɔ, gbɛ̀ na ɖò tɔnfinnɔɔ nú emi hwebǐnu, bɔ nyɔna kɛɖɛ wɛ na gɔ́ mɛ, é na ɖó wuvɛ̌ ɖě ǎ. Amɔ̌, ɖò gbɛ̀ e mɛ mǐ ɖè é ɔ, wuvɛ̌ lɛ na hán ǎ. Ninɔmɛ lɛ sixu wá ɖyɔ, bo na zɔ́n bɔ awǎjijɛ mǐtɔn na ɖekpo nú hwenu ɖé. (Ðɛh. 6:7; Nǔt. 9:11, nwt) Ðibla nyí nɔví mǐtɔn lɛ bǐ wɛ nɔ ɖexlɛ́ ɖɔ ye kúdeji ɖɔ ye ɖò nǔgbo ɔ mɛ. Gbɔn nɛ̌ é? Nú nǔɖitɔ́ hatɔ́ ɖé na bo tlɛ wà nǔɖe nyi dò nú ye alǒ ɖ’alɔ ɖò walɔ bliblí ɖé mɛ ɔ, nǔɖiɖi yetɔn nɔ xò ǎ. (Ðɛh. 119:165) Mɛtɛnkpɔn ɖokpo ɖokpo gudo ɔ, nǔɖiɖi yetɔn nɔ syɛn só d’eji, é nɔ vɔ́da ǎ. (Ja. 1:2-4) Mǐ ɖó na sɔnǔ nú nǔɖiɖi mɔ̌hun ɖé. w20.07 8 akpá. 1; 9 akpá. 4-5

Cobonu a na jɛ Biblu xà jí hǔn, xoɖɛ sɛ́dó Jehovah ɖɔ é ni d’alɔ we bonu a na mɔ lee nǔ e xà wɛ a ɖè é sixu hɛn lè wá nú we gbɔn é. Ði kpɔ́ndéwú ɔ, enyi a ɖò wěɖexámɛ ba wɛ dó lee a na ɖí xwi xá tagba ɖé gbɔn é wu hǔn, byɔ̌ Jehovah ɖɔ é ni d’alɔ we bonu a na mɔ nǔgbododó ɖěɖee ɖò Xó tɔn mɛ, bo sixu d’alɔ we lɛ é. (Fili. 4:6, 7) Jehovah na mǐ nǔwukpíkpé jiwǔ ɖé, b’ɛ nɔ zɔ́n bɔ mǐ nɔ dó nukún nǔ lɛ mɛ kpɔ́n. Enyi a dó nukún nǔ lɛ mɛ kpɔ́n, bo sɔ́ hwiɖée dó mɛ e xó tan ɔ ɖɔ lɛ é sín tɛnmɛ ɔ, é na zɔ́n bɔ tan Biblu tɔn ɔ na ɖò gbɛ̀. Tɛ́n kpɔ́n bo mɔ nǔ e mɛ e xó tan ɔ ɖɔ lɛ é mɔ é, bonu lee nǔ sixu ko cí nú ye é ni cí mɔ̌ nú hwi lɔ. Enɛ gudo hǔn, lin tamɛ kpɔ́n. Tamɛ linlin sín tinmɛ wɛ nyí ɖɔ è ni lin tamɛ dó nǔ e xà wɛ è ɖè é kpo lee é kan mɛ gbɔn é kpo jí kpo sɔxwixwe kpo. É na d’alɔ we bɔ a na cá nǔ e jí a lin tamɛ dó lɛ é ɖó kpɔ́, bo mɔ nukúnnú jɛ nǔ e kplɔ́n wɛ a ɖè é mɛ hugǎn. Enyi è ɖó ajɔxanú tɛnmɛ tɛnmɛ bo ma ka cáká ye ɖó kpɔ́ ǎ ɔ, è sixu ɖa nǔɖuɖu víví ɖé ǎ. Tamɛ linlin nɔ d’alɔ mǐ bɔ mǐ nɔ mɔ nukúnnú jɛ nǔ ɔ blebu wu. w21.03 15 akpá. 3-5

Mɛsɛ́dó Pɔlu sixu ko sɔ́ ayi dó nǔ e jɛ wá yì ɖò gbɛzán tɔn mɛ é jí, bo na ko lin ɖɔ enyi emi ko wá gbeta ɖevo lɛ kɔn wɛ nyí ɔ, è sixu ko gɔn emi wlí. Xomɛ sixu ko sin i dó sunnu ɖěɖee ɖò tokpɔn Azíi tɔn mɛ, bo jó è dó lɛ é wu; é sixu ko gɔn jiɖe ɖó dó xɔ́ntɔn tɔn ɖevo lɛ wu. Amɔ̌, Pɔlu wà nǔ enɛ lɛ ɖě ǎ. É tuùn ɖɔ zaanɖé dìn ɔ emi na kú có, é wɔn ɖɔ é ɖò taji tawun ɖɔ è ni kpa susu nú Jehovah ǎ. Gɔ́ na ɔ, é kpò ɖò tamɛ lin dó lee é sixu dó wusyɛn lanmɛ nú mɛ ɖevo lɛ gbɔn é jí wɛ. É nɔ ganjɛ Jehovah wu, gbɔn ɖɛxixo sɛ́dó è hwɛhwɛ gblamɛ. Pɔlu fɔ́n tɛgbɛ bo nɔ ɖò tamɛ lin dó nɔví ɖěɖee jó è dó lɛ é jí wɛ ǎ. É nyɔ́ wà ɔ, é ɖɔ ɖɔ ali e nu xɔ́ntɔn wanyiyinɔ emitɔn lɛ nɔ gudo nú emi, bo lɛ́ d’alɔ emi ɖè é sù nukún emitɔn mɛ tawun. Gɔ́ na ɔ, Pɔlu kpò ɖò Xó Mawu tɔn kplɔ́n wɛ. (2 Tim. 3:16, 17; 4:13) Taji bǐ ɔ, é ɖeji mlɛ́mlɛ́ ɖɔ Jehovah kpo Jezu kpo yí wǎn nú emi. w21.03 18 akpá. 17-18

Ðò hweɖenu ɖò xwè kanweko wegɔ́ H.M. tɔn mɛ ɔ, Klisanwun-nyijɛtɔ́ gegě wá byɔ agun Klisanwun nǔgbo lɛ tɔn mɛ. Ye kplɔ́n linlin pagáwun tɔn lɛ mɛ, bo lɛ́ sló kɔ nú nǔgbo e ɖò Xó Mawu tɔn mɛ lɛ é. Sín hwenɛnu kaka jɛ vivɔnu xwè kanweko 19gɔ́ ɔ tɔn ɔ, Mawu ɖó tutoblonunu ɖě ɖò ayikúngban jí ǎ. Klisanwun-nyijɛtɔ́ lɛ ɖò kpɔ́ sù wɛ gbehan nyanya ɖò gle mɛ ɖɔhun, b’ɛ vɛwǔ tawun bɔ è na tuùn Klisanwun nǔgbo lɛ. (Mat. 13:36-43) Etɛwu é ka ɖò taji ɖɔ è ni tuùn nǔ enɛ? Enɛ xlɛ́ ɖɔ nǔ e mǐ xà ɖò Daniyɛli wemata 11gɔ́ ɔ mɛ, bɔ é kúnkplá axɔ́su totaligbé tɔn ɔ kpo axɔ́su tofɔligbé tɔn ɔ kpo é sixu nɔ ma kan axɔ́su alǒ axɔ́suɖuto e kp’acɛ ɖò xwè 100 kpo 1870 kpo vlamɛ lɛ é. Tutoblonunu Mawu tɔn ɖě ɖè ɖò avla enɛ mɛ bonu ye na tɔ́n ahwan ǎ. É ɖò mɔ̌ có, mǐ sixu ɖó nukún ɖɔ axɔ́su totaligbé tɔn ɔ kpo axɔ́su tofɔligbé tɔn ɔ kpo na lɛ́ wá xwetɔ́n táan klewun ɖé ɖò 1870 gudo. w20.05 3 akpá. 5

Jowɛli ɖɔ ɖ’ayǐ ɖɔ wɛn lɛ na vunbla Izlayɛli tò ɔ bo na ɖu nǔ e ye mɔ lɛ é bǐ. (Jowɛ. 1:4) Nú xwè mɔ̌kpan ɔ, mǐ ko zán nǔɖɔɖ’ayǐ enɛ ɖò nǔjlɛdonǔwu linu dó xlɛ́ lee togun Jehovah tɔn cí wɛn sín gɔnu e nǔɖe ma sixu ɖó te ǎ é ɖɔhun, bo nɔ ɖ’alɔ ɖò wɛnɖagbejijlazɔ́ yetɔn mɛ gbɔn é. Mǐ mɔ nǔ jɛ mɛ ɖɔ azɔ̌ enɛ nyí nǔɖe, bo vunbla “tò” ɔ, alǒ wà nǔ dó mɛ e ɖò acɛ sinsɛngán lɛ tɔn glɔ́ lɛ é wu. Amɔ̌, hwenu e mǐ gbéjé nǔ e lɛlɛ̌ dó nǔɖɔɖ’ayǐ ɔ lɛ é kpɔ́n é ɔ, mǐ mɔ ɖɔ nukúnnúmɔjɛnǔmɛ ɖevo wɛ sɔgbe. Ðǒ ayi wu ɖɔ Jehovah dó akpá ɖɔ emi na nya wɛn lɛ “dó zɔ.” (Jowɛ. 2:20) Enyi wɛn lɛ nɔte nú Kúnnuɖetɔ́ Jehovah tɔn e ɖò tónú sè nú gbeɖiɖe Jezu tɔn e ɖɔ ɖɔ è ni jlá wɛnɖagbe ɔ, bo kplɔ́n nǔ mɛ lɛ bonu ye ni huzu ahwanvu é wɛ lɛ é ɔ, etɛwu Jehovah ka na d’akpá ɖɔ emi na nya ye dó zɔ? (Ezek. 33:7-9; Mat. 28:19, 20) É ɖò wɛn ɖɔ Jehovah kún nɔ nya mɛsɛntɔ́ tɔn gbejinɔtɔ́ lɛ dó zɔ ó, é nyɔ́ wà ɔ, nǔ alǒ mɛ e sixu wà nǔ dó togun tɔn wu é wɛ é nɔ nya dó zɔ. w20.04 3 akpá. 3-5

Enyi mǐ mɔ ɖɔ Jehovah kún na sinkɔn nú ɖɛ mǐtɔn tlolo ó ɔ, etɛ mǐ ka ɖó na wà? Jaki ɖɔ ɖɔ mǐ ɖó na “nɔ byɔ” Mawu. Akpɔ nɔ ɖó Jehovah ɖó nǔnywɛ e byɔ ɛ wɛ mǐ nɔ ɖè é wu ǎ. É na sin xomɛ dó mǐ ǎ. Nú mǐ xoɖɛ dó byɔ nǔnywɛ bá mɔ tɛn dó dɛ ɖò mɛtɛnkpɔn lɛ nu ɔ, Tɔ́ mǐtɔn jixwé tɔn ɔ “nɔ hun alɔ dó na nǔ mǐ.” (Ðɛh. 25:12, 13) É nɔ mɔ wuvɛ̌ e mɛ gbɔn wɛ mǐ ɖè lɛ é, bo nɔ sè wuvɛ̌ xá mǐ, bo ka nɔ lɛ́ ɖò gbesisɔmɛ bá d’alɔ mǐ. Enɛ nɔ zɔ́n bɔ mǐ nɔ j’awǎ tawun. Amɔ̌, nɛ̌ Jehovah ka nɔ na mǐ nǔnywɛ gbɔn? É nɔ na mǐ nǔnywɛ gbɔn Xó tɔn gblamɛ. (Nǔx. 2:6) Bo na dó ɖó nǔnywɛ enɛ ɔ, mǐ ɖó na nɔ kplɔ́n Xó Mawu tɔn kpo wema jinjɔn Biblu jí lɛ kpo. Amɔ̌, mǐ ɖó na wà nǔ hugǎn nǔ kplɔnkplɔn kpowun. Mǐ ɖó na wà nǔ e Mawu ɖɔ mǐ ni wà lɛ é. Jaki wlán ɖɔ: “Mi ma ɖò . . . Mawuxó ɔ ɖótó wɛ kpowun ó; azɔ̌ wɛ mi na nɔ zé dó wà na titewungbe.” (Ja. 1:22) Nú mǐ nɔ xwedó wěɖexámɛ Mawu tɔn lɛ ɔ, mǐ nɔ huzu fífá gbɛ́tɔ́, nɔ ɖó linlin e ɖò jlɛ̌ jí é, bo nɔ lɛ́ nyɔ́ xomɛ hugǎn. (Ja. 3:17) Jijɔ enɛ lɛ nɔ d’alɔ mǐ, bɔ mǐ nɔ dɛ ɖò wuvɛ̌ ɖebǔ nu, bo nɔ lɛ́ zɔ́n bɔ mǐ nɔ ba awǎjijɛ mǐtɔn kpò ǎ. w21.02 28-29 akpá. 10-11

Enyi nɔví e ɖò agun ɔ mɛ lɛ é nɔ d’alɔ Biblu kplɔntɔ́ ɖé ɔ, enɛ na zɔ́n bɔ é na kpò ɖò nukɔn yì wɛ, bo na wá bló baptɛm. Wɛnjlatɔ́ lɛ ɖokpo ɖokpo sixu gɔ́ sò nú nukɔnyiyi agun ɔ tɔn. Gbexosin-alijitɔ́ ɖé ɖɔ: “Lǒ ɖé ɖɔ ɖɔ tò wɛ nɔ kplɔ́n vǐ. Un lin ɖɔ nǔgbo wɛ nyí xó enɛ ɖò nǔ kplɔnkplɔn mɛ lɛ bonu ye na huzu ahwanvu lɔ sín akpáxwé. Hwɛhwɛ ɔ, agun ɔ bǐ wɛ nɔ bló bɔ mɛɖé nɔ wá nǔgbo ɔ mɛ.” Mɛ e ɖò xwédo ɖé mɛ lɛ é, xɔ́ntɔn lɛ, kpo mɛ̌si lɛ kpo bǐ wɛ nɔ w’azɔ̌ bǔnɔ ɖé dó d’alɔ vǐ ɖé b’ɛ na zin. Ye nɔ wà mɔ̌, gbɔn wusyɛn didó lanmɛ nú vǐ ɔ, kpo nǔ taji lɛ kpinkplɔn ɛ kpo gblamɛ. Mɔ̌ ɖokpo ɔ, wɛnjlatɔ́ lɛ sixu nɔ ɖè wě xá Biblu kplɔntɔ́ lɛ, nɔ dó wusyɛn lanmɛ nú ye, lobo lɛ́ sɔ́ kpɔ́ndéwú ɖagbe e na d’alɔ ye bɔ ye na yì nukɔn bo bló baptɛm lɛ é ɖ’ayǐ nú ye. (Nǔx. 15:22) Etɛwu wɛnjlatɔ́ e ɖò nukún kpé dó Biblu kplɔnkplɔn ɖé wu wɛ é ka na yí gbè nú alɔ e wɛnjlatɔ́ ɖevo lɛ sixu dó Biblu kplɔntɔ́ ɔ é? Ðó mɛ gegě sixu gɔ́ sò nú nukɔnyiyi gbigbɔ tɔn nǔkplɔntɔ́ ɔ tɔn. w21.03 8-9 akpá. 1-3

Klisanwun lɛ bǐ, mɛ winnyawinnya kpo mɛxo kpo, wɛ ɖó na gbí dɔn ɖò kɔ e è nɔ gbidí nú ye bonu ye na zán gbɛ̀ we é nukɔn. Mɛsɛ́dó Jaan ɖexlɛ́ ɖɔ mǐ kún sixu ɖò gbɛ̀ zán wɛ ɖò nǔgbo ɔ mɛ, bɔ ɖò hwe ɖokpo ɔ nu ɔ, mǐ na lɛ́ ɖò gbɛ̀ bliblí zán wɛ ó. (1 Jaan 1:6) Enyi nǔ mǐtɔn na nyɔ́ Mawu nukúnmɛ dìn kpo sɔgudo kpo ɔ, mǐ ɖó na nɔ flín hwebǐnu ɖɔ é nɔ mɔ nǔ e wà wɛ mǐ ɖè lɛ é bǐ. Enyi gbɛtɔ́ lɛ ma tlɛ sixu mɔ nǔ e mǐ nɔ wà ɖò nǔglɔ lɛ é ǎ ɔ, Jehovah nɔ mɔ nǔ bǐ. (Ebl. 4:13) Mǐ ɖó na nyi alɔ nú linlin e gbɛ̀ ɔ nɔ ɖó dó hwɛhuhu wu é. Ðò Jaan hwenu ɔ, gǔfɔndómawujitɔ́ lɛ nɔ ɖɔ ɖɔ mɛɖé hɛn ɔ, é na nɔ sɔ́ jlǒ dó zán hwɛhuhu gbɛ̀, bo sixu lɛ́ kpò ɖò kancica ɖó xá Mawu wɛ. Égbé ɔ, mɛ e nɔ lin nǔ gbɔn mɔ̌ lɛ é tɛntin wɛ mǐ ɖè. Mɛ gegě nɔ ɖɔ ɖɔ emi ɖi nǔ nú Jehovah, amɔ̌, ye nɔ yí gbè nú linlin e é nɔ ɖó dó hwɛhuhu wu é, ɖò taji ɔ, xóɖóxámɛ wu é ǎ. Nǔ e Jehovah nɔ kpɔ́n dó mɔ hwɛhuhu é ɔ, yedɛɛ lɛ nɔ ɖɔ ɖɔ mɛɖesunɔxó wɛ, alǒ lee é jló mɛ gbɔn é wɛ è na wà gbɔn. w20.07 22 akpá. 7-8

A ka nɔ jɛhun dó nɔví nyɔnu gbigbɔ tɔn towe lɛ jí hwenu e ye ɖó hudo tɔn é à? Mǐ ni gbéjé kpɔ́ndéwú elɔ kpɔ́n. Wɛnjlatɔ́ ɖé lɛ ɖ’ayi wu ɖɔ nɔví nyɔnu e asú tɔn ma nyí Kúnnuɖetɔ́ ǎ é ɖé nɔ gbɔ hwenu wá kplé lɛ hwɛhwɛ, bɔ kplé lɛ ka fó tlolo ɔ, é nɔ lɛ́ yawǔ yì xwé. Ye ɖ’ayi wu ɖɔ é kún nɔ kplá vǐ tɔn lɛ wá kplé lɛ mɔ̌ ó. Enɛ wu ɔ, ye jɛ xó mɔ ɖɔ dó wǔ tɔn jí, ɖó ye lin ɖɔ é ɖó na byɔ gbè asú tɔn bo na nɔ kplá vǐ lɛ wá kplé lɛ. É ɖò mɔ̌ có, nǔ e ye ma ka tuùn ǎ é wɛ nyí ɖɔ nɔví nyɔnu ɔ ɖò nǔ e wu é kpé é bǐ wà wɛ. É ɖ’acɛ dó tuto éɖesu tɔn lɛ jí bǐ mlɛ́mlɛ́ ǎ, mɔ̌ jɛn é ma ka lɛ́ nyí é wɛ nɔ wá gbeta gudo tɔn ɔ kɔn dó vǐ tɔn lɛ wu ǎ é nɛ. Enyi a kpa nɔví nyɔnu ɔ, bo lɛ́ ɖɔ nǔ ɖagbe e wà wɛ é ɖè lɛ é nú mɛ ɖevo lɛ ɔ, a sixu ɖó xómɔɖɔdómɛwu mɔ̌hun te. Mɛxo lɛ tuùn ɖɔ lee è nɔ wà nǔ xá nɔví nyɔnu lɛ gbɔn é nɔ ɖu ayi mɛ nú Jehovah tawun. (Ja. 1:27) Enɛ wu ɔ, mɛxo lɛ nɔ wà nǔ Jezu ɖɔhun bo nɔ lɛ́ nɔ jlɛ̌ jí. Lee ye nɔ wà mɔ̌ gbɔn é wɛ nyí ɖɔ ye nɔ hɛn nǔ gángángán hwenu e é byɔ ɖɔ ye ni nyɔ́ xomɛ é ǎ. (Mat. 15:22-28) Nú mɛxo lɛ tɛ́n kpɔ́n bo d’alɔ nɔví nyɔnu yetɔn lɛ ɔ, nɔví nyɔnu lɛ nɔ mɔ ɖɔ Jehovah kpo tutoblonunu tɔn kpo yí wǎn nú emi. w20.09 24-25 akpá. 17-19

Gbeyiɖɔ Daniyɛli nɔ sɔ́ éɖée hwe, bo nɔ ba alixlɛ́mɛ Jehovah tɔn hwebǐnu. Ði kpɔ́ndéwú ɔ, hwenu e Jehovah zán ɛ, bɔ é tinmɛ dlɔ̌ Nabukodonɔzɔ́ɔ tɔn é ɔ, é xɔ susu nú éɖée ǎ. É nyɔ́ wà ɔ, é nɔ jlɛ̌ jí, bo sɔ́ susu ɔ bǐ jó nú Jehovah. (Dan. 2:26-28) Etɛ enɛ ka kplɔ́n mǐ? Enyi xóɖiɖɔ mǐtɔn lɛ nɔ nyɔ́ sè nú nɔví lɛ, alǒ enyi mǐ ɖó nukɔnyiyi ɖó bǎ ɖé mɛ ɖò sinsɛnzɔ́ ɔ mɛ ɔ, mǐ ɖó na flín bo sɔ́ susu ɔ bǐ jó nú Jehovah. Mǐ ɖó na tuùn ɖɔ mǐ kún sixu kpé nǔ enɛ lɛ wu bo wà Jehovah mɛvo ó. (Fili. 4:13) Enyi mǐ ɖó linlin enɛ ɔ, kpɔ́ndéwú ɖagbe Jezu tɔn xwedó wɛ mǐ lɛ́ ɖè. Jezu ganjɛ Jehovah wu. (Jaan 5:19, 30) É tɛ́n kpɔ́n gbeɖé bo na xò acɛ yí sín Tɔ́ tɔn jixwé tɔn ɔ sí ǎ. Filipunu lɛ 2:6 ɖɔ nú mǐ ɖɔ Jezu kún ‘zé éɖée ɖó Mawu hǎ jí kpo hlɔnhlɔn kpo ó.’ Ðó Jezu nyí Vǐ e nɔ hwíhwɛ́ éɖée ɖó glɔ̌ nú Tɔ́ tɔn é wutu ɔ, é tuùn dogbó tɔn lɛ, bo nɔ lɛ́ ɖó sísí nú acɛ Tɔ́ tɔn tɔn. w20.08 11 akpá. 12-13

Mɛ e ɖò gbɛ̀ wezun ɔ jí é ɖé lɛ nɔ ɖò xwi ɖí xá tagba yeɖesunɔ tɔn e mɛ ɖevo lɛ ma sixu mɔ alǒ mɔ nukúnnú jɛ mɛ ǎ lɛ é wɛ. Enyi nǔɖe lɛ ɖó dogbó nú we, bɔ a lɛ́ mɔ ɖɔ è kún mɔ nǔ jɛ ninɔmɛ emitɔn wu ó ɔ, kpɔ́ndéwú Mɛfibáalu tɔn sixu dó wusyɛn lanmɛ nú we. (2 Sam. 4:4) É ɖó na ɖí xwi xá wɔ̌n e ɖò wǔ tɔn é, bɔ Axɔ́su Davidi lɛ́ dá hwɛ agɔ n’i. É ɖò mɔ̌ có, é lɔn nú nǔ ɖě dó xomɛsin n’i ǎ; nǔ ɖagbe e é nɔ mɔ ɖò gbɛzán tɔn mɛ lɛ é nɔ sù nukún tɔn mɛ. Xomɛ e Davidi nyɔ́ dó wǔ tɔn wá yì é sù nukún tɔn mɛ. (2 Sam. 9:6-10) Enɛ wu ɔ, hwenu e Davidi dá hwɛ agɔ nú Mɛfibáalu é ɔ, Mɛfibáalu kpɔ́n nǔ e lɛlɛ̌ dó ninɔmɛ ɔ lɛ é bǐ. É lɔn nú nǔwanyido Davidi tɔn ɖ’akpɔ n’i ǎ. É ka lɛ́ dóhwɛ Jehovah ɖó nǔ e Davidi wà é wu ǎ. É sɔ́ ayi ɖó nǔ e é sixu wà, dó nɔ gudo nú axɔ́su e Jehovah sɔ́ é jí. (2 Sam. 16:1-4; 19:25-31) Lè mǐtɔn wu wɛ Jehovah bló bɔ Mɛfibáalu sín kpɔ́ndéwú ɖagbeɖagbe enɛ ɖò Xó Tɔn mɛ.—Hlɔ. 15:4. w20.04 26 akpá. 3; 30-31 akpá. 18-19

È sixu sɔ́ mɛɖé lɛ bɔ ye na nyí mɛsɛ́dó, gbexosin-alijitɔ́ titewungbe, alǒ gbexosin-alijitɔ́ hwebǐnu tɔn ɖò agun ɔ mɛ. Ye sɔ́ wɛnjijlazɔ́ ɔ kpo nǔkplɔnkplɔn mɛ lɛ bonu ye na huzu ahwanvu sín azɔ̌ ɔ kpo dó ɖó azɔ̌ yetɔn hwebǐnu tɔn. Hwɛhwɛ ɔ, wɛnɖagbejlatɔ́ hwebǐnu tɔn enɛ lɛ nɔ ɖó nǔ kaka ɖé ɖò agbaza lixo ǎ, amɔ̌, Jehovah ka nɔ dó nú ye, bɔ nyɔna nɔ gɔ́ gbɛzán yetɔn mɛ. (Mak. 10:29, 30) Mǐ yí wǎn nú nɔví vívɛ́ enɛ lɛ, bɔ é nɔ lɛ́ sù nukún mǐtɔn mɛ ɖɔ ye ɖò agun ɔ mɛ. Nɔví sunnu e gbigbɔ sɔ́ lɛ é kpo mɛ ɖěɖee ɖò sinsɛnzɔ́ hwebǐnu tɔn mɛ lɛ é kpo kɛɖɛ wɛ ɖó tɛn ɖé ɖò agun ɔ mɛ à? Ðebǔ ǎ! Wɛnɖagbejlatɔ́ lɛ bǐ wɛ xɔ akwɛ nú Mawu kpo agun ɔ kpo. (Hlɔ. 10:15; 1 Kɔ. 3:6-8) Nǔgbo ɔ, nǔ taji hugǎn e gbé nya wɛ agun ɔ ɖè é ɖokpo wɛ nyí nǔ kplɔnkplɔn mɛ lɛ bonu ye na huzu Aklunɔ mǐtɔn Jezu Klisu sín ahwanvu lɛ. (Mat. 28:19, 20; 1 Tim. 2:4) Wɛnjlatɔ́ e ɖò agun ɔ mɛ lɛ é bǐ, ee ko bló baptɛm lɛ é kpo ee ma ko bló ǎ lɛ é kpo bǐ wɛ nɔ tɛ́n kpɔ́n bo nɔ sɔ́ azɔ̌ enɛ ɖó tɛn nukɔntɔn mɛ.—Mat. 24:14. w20.08 21 akpá. 7-8

Lee wemafɔ e jí tɛ́si mǐtɔn égbé tɔn ɔ jinjɔn é xlɛ́ gbɔn é ɔ, Jezu na nɔ gudo nú mǐ ɖò wuvɛ̌ mǐtɔn lɛ mɛ. Nǔgbo ɔ, xó Jezu tɔn enɛ lɛ sixu na hlɔnhlɔn mǐ. Etɛwu? Ðó didɛ ɖò azǎn ɖé lɛ jí nɔ vɛwǔ. Ði kpɔ́ndéwú ɔ, enyi mɛvívɛ́ ɖé kú nú mǐ ɔ, enyi azǎn klewun ɖé kpowun wɛ mǐ nɔ nɔ aluwɛ mɛ xɔ ǎ, loɔ, é sixu ɖu xwè gegě. Mɛ ɖevo lɛ ɖó na ɖí xwi xá wuvɛ̌ e mɛxoxwe nɔ hɛn wá lɛ é. Mɔ̌ ɖokpo ɔ, mɛ ɖevo lɛ nɔ ɖí xwi xá linkpɔ́nzɔn syɛnsyɛn. É ɖò mɔ̌ có, mǐ nɔ mɔ hlɔnhlɔn bo nɔ dɛ, ɖó mǐ tuùn ɖɔ Jezu ɖò kpɔ́ xá mǐ “tɛgbɛ” kaka jɛ azǎn e d’ablu ɖò gbɛzán mǐtɔn mɛ lɛ é jí. (Mat. 11:28-30) Xó Mawu tɔn na jiɖe mǐ ɖɔ Jehovah nɔ d’alɔ mǐ gbɔn wɛnsagun tɔn lɛ jí. (Ebl. 1:7, 14) Ði kpɔ́ndéwú ɔ, wɛnsagun lɛ nɔ nɔ gudo nú mǐ, lobo nɔ lɛ́ xlɛ́ ali mǐ, hwenu e mǐ ɖò ‘wɛnɖagbe axɔ́suɖuto ɔ tɔn’ jlá ‘tò bǐ, akɔta bǐ, kpo gbè bǐ kpo’ wɛ é.—Mat. 24:13, 14; Nǔɖe. 14:6. w20.11 13-14 akpá. 6-7

Mǐ ba ɖɔ nǔkplɔntɔ́ mǐtɔn ni mɔ nǔ jɛ wu ɖɔ Biblu mɛ wɛ nǔ e kplɔ́n wɛ é ɖè é gosin. (1 Tɛ. 2:13.) Nɛ̌ mǐ ka sixu wà mɔ̌ gbɔn? Dǒ wusyɛn lanmɛ nú nǔkplɔntɔ́ towe ɖɔ é ni nɔ ɖɔ xó dó nǔ e kplɔ́n wɛ é ɖè é wu. Ma nɔ tinmɛ wemafɔ lɛ n’i hwebǐnu ó, é nyɔ́ wà hǔn, nɔ byɔ ɛ ɖɔ é ni tinmɛ ɖé lɛ nú emi. D’alɔ ɛ bonu é ni tuùn lee Xó Mawu tɔn kan éɖesunɔ gbɔn é. Kan nǔ e na d’alɔ ɛ bɔ é na ɖɔ nǔ e é lin dó wemafɔ e é xà lɛ é wu é kpo lee nǔ cí n’i dó ye wu é kpo lɛ é byɔ ɛ. (Luk. 10:25-28) Ði kpɔ́ndéwú ɔ, a sixu kanbyɔ ɛ ɖɔ: “Nɛ̌ wemafɔ elɔ ka d’alɔ we bɔ a ɖ’ayi jijɔ Jehovah tɔn lɛ ɖokpo wu gbɔn?” “Nɛ̌ nǔgbo Biblu tɔn enɛ ka sixu hɛn lè wá nú we gbɔn?” “Nɛ̌ nǔ ka cí nú we dó nǔ e a kplɔ́n zaanɖé dìn é wu?” Nǔ taji ɔ wɛ nyí lě dò nǔkplɔntɔ́ ɔ tuùn nǔ sɔ é ǎ, loɔ, lě dò é yí wǎn nú nǔ e é tuùn lɛ é bo zán ye sɔ é wɛ ɖò taji. Nɔ zán Biblu ɖò nǔkplɔnkplɔn ɔ hwenu. Enyi a ba ɖɔ nǔwukpíkpé mɛkplɔnkplɔn tɔn towe ni kpɔ́n te d’eji ɔ, a ɖó na nɔ sɔ́ hwiɖée hwe. w20.10 15-16 akpá. 5-6

Mǐ sixu kúdeji ɖɔ wɛn Axɔ́suɖuto ɔ tɔn jijla na wá vivɔnu ɖò hwenu e jɛxa dó é. Kpɔ́n nǔ e jɛ ɖò Nɔwée hwenu é. Jehovah xlɛ́ ɖɔ emi nyí Ganmɛjinɔtɔ́ ɖagbe hugǎn ɔ. Xwè 120 mɔ̌ jɛ nukɔn ɔ, Jehovah sɔ́ azǎn e jí Sinvɔgbɛ ɔ na bɛ́ é. Xwè gegě gudo ɔ, Jehovah ɖɔ nú Nɔwée ɖɔ é ni bló tɔjihun ɔ. Vlafo nú xwè 40 alǒ 50 jɛ nukɔn nú bǐbɛ̌ Sinvɔgbɛ ɔ tɔn ɔ, Nɔwée nɔ ɖò azɔ̌ wà wɛ syɛnsyɛn. Mɛ lɛ nɔ ɖótó è ǎ có, é kpò ɖò wɛn akpágbánúmɛ tɔn ɔ jlá wɛ kaka jɛ hwenu e Jehovah ɖɔ é ni byɔ tɔjihun ɔ mɛ é. Enɛ gudo ɔ, ‘Jehovah sú hɔn ɔ’ hwenu e é jɛxa dó é. (Bǐb. 6:3; 7:1, 2, 16) Zaanɖé dìn ɔ, Jehovah na ɖó nǔ wɛnjijlazɔ́ ɔ nu; ɖò ali ɖé nu ɔ, é na ‘sú hɔn’ dó gbɛ̀ Satáan tɔn, bo na hun nǔ sín gbɛ̀ yɔyɔ̌ ɔ nu. Kaka jɛ hwenɛnu ɔ, mi nú mǐ ni xwedó kpɔ́ndéwú Nɔwée kpo mɛ ɖevo e ma gɔn azɔ̌ wà ǎ lɛ é kpo tɔn. Mi nú mǐ ni nɔ sɔ́ ayi ɖó azɔ̌ ɔ jí, nɔ ɖó suúlu, bo nɔ ɖó nǔɖiɖi e lidǒ é nú Jehovah kpo akpá tɔn lɛ kpo. w20.09 13 akpá. 18-19

Nú tuto acɛkpikpa tɔn e zawě é ɖé ma ɖè ǎ ɔ, xwédo Jehovah tɔn na hánnyá, bo na lɛ́ ba awǎjijɛ kpò. Ði kpɔ́ndéwú ɔ, mɛɖé na tuùn mɛ e na nɔ wá gbeta gudogudo tɔn lɛ kɔn é kpo mɛ e na nɔ xlɛ́ ali nǔ lɛ, bɔ è na nɔ xwedó gbeta enɛ lɛ é kpo ǎ. Enyi tuto acɛkpikpa tɔn e Jehovah bló é nyí nǔ ɖagbe ɖé ɔ, aniwu nyɔnu gegě ka nɔ mɔ égbé ɖɔ asú yetɔn nɔ xò daka ye wu? Ðó sunnu gegě nɔ wɔn ya nú nǔgbododó Jehovah tɔn e ɖɔ nǔ dó xwédo lɛ nu é, bo nɔ xwedó aca ɖěɖee ɖò xá yetɔn lɛ mɛ lɛ é. Ye sixu nɔ lɛ́ xò daka asì yetɔn lɛ wu, bo na sú jlǒ cejɛnnabi tɔn yetɔn lɛ sín dò. Ði kpɔ́ndéwú ɔ, sunnu ɖé sixu nɔ kp’acɛ nú asì tɔn dó xlɛ́ ɖɔ emi wɛ sɔ lě, alǒ, xlɛ́ mɛ ɖevo lɛ ɖɔ emi nyí sunnu. É sixu nɔ lin ɖɔ emi kún sixu hɛn asì emitɔn gannugánnú bɔ é na yí wǎn nú emi ó, amɔ̌, emi sixu bló bɔ é na nɔ ɖi xɛsi nú emi. É sixu gbɔn xɛsi enɛ sín yɛkan mɛ bo kp’acɛ gannaganna n’i. É ɖò wɛn ɖɔ linlin enɛ kpo walɔ enɛ kpo e sunnu ɖé lɛ ɖó é kún sɔgbe ó. Ye nɔ sí nyɔnu lɛ lee ye ɖó na wà gbɔn é ǎ, bɔ nǔ e ye nɔ wà lɛ é nɔ sɔ́ ta nǔ e Jehovah ba lɛ é tlɔlɔ.—Efɛ. 5:25, 28. w21.02 3 akpá. 6-7

Enyi Klisanwun e ɖò ninɔmɛ syɛnsyɛn mɛ lɛ é xoɖɛ vívɛ́ sɛ́dó Jehovah ɔ, ye sixu mɔ kɔ dó sà fún i. “Fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ” sixu nyí sinkɔn ɖɛ towe lɛ tɔn. (Fili. 4:6, 7) Jehovah nɔ zán gbigbɔ mímɛ́ tɔn hlɔnhlɔnnɔ ɔ dó xò hwihwɛ́ mǐ hwenu e mǐ ɖò linkpɔ́n mɛ é. (Ga. 5:22) Nɔ ɖɔ xomɛ nú Jehovah hwenu e a ɖò ɖɛ xò sɛ́dó è wɛ é. Nɔ nɔ tlɔlɔ. Ðɔ tagba e wɛ é n’i, bo lɛ́ ɖɔ lee nǔ cí nú we d’ewu é n’i. Enyi è sixu ɖeɖɛ tagba ɔ wɛ ɔ, byɔ ɛ nǔnywɛ kpo hlɔnhlɔn kpo e a na dó ɖeɖɛ na é. Enyi tagba e è ma sixu ɖeɖɛ ǎ é ɖé wɛ ɔ, byɔ Jehovah ɖɔ é ni d’alɔ we bonu ado e ma ɖò dandan ǎ é ni hu we d’ewu ó. Enyi a nɔ nɔ tlɔlɔ ɖò ɖɛ towe lɛ mɛ ɔ, lee Jehovah na sinkɔn nú ye gbɔn é na zawě nú we hugǎn ɖò nukɔnmɛ. Enyi a ma mɔ sinkɔn nú ɖɛ towe lɛ tlolo ǎ hǔn, ma jó gbè ó. Jehovah ba ɖɔ a ni nɔ nɔ tlɔlɔ ɖò ɖɛ towe lɛ mɛ, bo lɛ́ ba ɖɔ a ni ɖókan dó ɖɛxixo wu.—Luk. 11:8-10. w21.01 3 akpá. 6-7

Asú kpo asì kpo lɛ, gɔ́ nú xwédo lɛ ɖò agun lɛ mɛ égbé. É ɖò mɔ̌ có, nɔví e ma wlí alɔ ǎ lɛ é gegě lɛ́ ɖò agun lɛ mɛ. Nukún tɛ mǐ ka ɖó na nɔ sɔ́ dó kpɔ́n tlɛnnɔ enɛ lɛ na? Mǐ ni kpɔ́n linlin e Jezu nɔ ɖó dó tlɛnmɛninɔ wu é. Jezu da asì ɖò sinsɛnzɔ́ tɔn ayikúngban jí tɔn ɔ hwenu ǎ. É nɔ tlɛnmɛ, bo sɔ́ éɖée bǐ jó nú azɔ̌ e è zɔ́n ɛ é. Jezu kplɔ́n mɛ gbeɖé ɖɔ dandan mɛ ɔ, Klisanwun lɛ ɖó na nɔ tlɛnmɛ alǒ wlí alɔ ǎ. É ɖò mɔ̌ có, é ɖɔ ɖɔ Klisanwun ɖé lɛ na wá gbeta ɔ kɔn bo na nɔ tlɛnmɛ. Jezu nɔ ɖó sísí nú mɛ e ma ko wlí alɔ ǎ lɛ é. É nɔ kpɔ́n tlɛnnɔ lɛ dó mɔ mɛ e ma hwɛ́n nǔɖe alǒ mɛ e nǔɖe hwedó ɖò ali ɖé nu lɛ é ǎ. Jezu ɖɔhun ɔ, tlɛnnɔ wɛ nú mɛsɛ́dó Pɔlu hwenu e é wà sinsɛnzɔ́ tɔn é. Pɔlu kplɔ́n mɛ gbeɖé ɖɔ é nyla ɖɔ Klisanwun ɖé ni wlí alɔ ǎ. É tuùn ɖɔ gbeta mɛɖesunɔ tɔn wɛ. w20.08 28 akpá. 7-8

Nǔ gegě jɛ ɖò gbɛzán mɛsɛ́dó Jaan tɔn mɛ. É ɖí xwi xá wuvɛ̌ alɔkpa alɔkpa e sixu vɔ́da nú nǔɖiɖi tɔn lɛ é bǐ. Amɔ̌, hwebǐnu wɛ é wà nǔ e wu e kpé é bo setónú nú gbeɖiɖe Jezu tɔn lɛ, kaka jɛ ee ɖɔ ɖɔ è ni yí wǎn nú nɔví mɛtɔn lɛ é jí. Wǎgbɔ tɔn ɔ, Jaan kúdeji ɖɔ Jehovah kpo Jezu kpo yí wǎn nú emi, bo na na hlɔnhlɔn emi bɔ emi na ɖu ɖò mɛtɛnkpɔn ɖebǔ jí. (Jaan 14:15-17; 15:10) Nǔ e Satáan alǒ gbɛ̀ tɔn wà é ɖebǔ zɔ́n bonu Jaan gɔn wanyiyi ɖexlɛ́ ǎ.) Jaan ɖɔhun ɔ, mǐ ɖò gbɛ̀ e Satáan, wangbɛnúmɛtɔ́ ɔ kp’acɛ na é ɖé mɛ. (1 Jaan 3:1, 10) É ba ɖɔ mǐ ni gbɔ wǎn yí nú nɔví mǐtɔn lɛ có, é sixu kpé enɛ wu ǎ, afi nú mǐ na tɛn ɛ ɖɔ ni wà mɔ̌ ɔ nɛ. Mi bonu mǐ ni kánɖeji bo na yí wǎn nú nɔví mǐtɔn lɛ, lobo ɖè wanyiyi enɛ xlɛ́ ɖò xó kpo nǔwalɔ mǐtɔn lɛ kpo mɛ. Mɔ̌ mɛ ɔ, mǐ na ɖu xwédo Jehovah tɔn e mɛ mǐ ɖè é sín vivǐ ganji, bɔ gbɛ̀ mǐtɔn na lɛ́ ɖó nu tawun.—1 Jaan 4:7. w21.01 13 akpá. 18-19

Gbɛ̀ elɔ e nu Satáan kp’acɛ dó é sixu vɛwǔ bɔ è na ɖí xwi xá, bɔ hweɖelɛnu ɔ, é tlɛ nɔ wá hú agbɔ̌n mɛ. (2 Tim. 3:1) Amɔ̌, é byɔ ɖɔ ado ni hu mǐ alǒ xɛsi ni ɖi mǐ zɛ xwé wu ǎ. Jehovah tuùn nǔ e mɛ gbɔn dín wɛ mǐ ɖè lɛ é. É d’akpá ɖɔ enyi mǐ na bo tlɛ j’ayǐ ɔ, emi na sɔ́ mǐ site kpo aɖisí lɔ emitɔn hlɔnhlɔnnɔ ɔ kpo. (Eza. 41:10, 13) Mǐ kúdeji ɖɔ Jehovah na d’alɔ mǐ, bɔ Biblu na na hlɔnhlɔn e sín hudo mǐ ɖó bo na dɛ ɖò tagba ɖebǔ nu é mǐ. Video mǐtɔn lɛ, xóyidókanji lɛ kpo xóta ɖebɔdoɖewu “Ði Nǔ Ye Ðɔhun” lɛ kpo nɔ zɔ́n bɔ tan Biblu tɔn lɛ nɔ ɖò gbɛ̀. Cobonu a na kpɔ́n, ɖótó, alǒ xà tan enɛ lɛ ɔ, byɔ̌ Jehovah ɖɔ é ni d’alɔ we bonu a na mɔ nǔkplɔnmɛ taji e a sixu zán lɛ é. Sɔ́ hwiɖée dó mɛ taji e xó tan ɔ ɖɔ é sín tɛnmɛ. Lin tamɛ dó nǔ e mɛsɛntɔ́ Jehovah tɔn gbejinɔtɔ́ enɛ lɛ wà é kpo lee Jehovah d’alɔ ye bɔ ye ɖu ɖò ninɔmɛ vɛwǔ lɛ jí gbɔn é kpo jí. Enɛ gudo hǔn, zǎn nǔkplɔnmɛ lɛ ɖò ninɔmɛ towe mɛ. Dǒkú nú Jehovah ɖó alɔ e dó we wɛ é ɖè é wu. Xlɛ́ ɖɔ alɔ e é dó we é sù nukún towe mɛ, bo ba ali ɖěɖee nu a sixu dó wusyɛn lanmɛ nú mɛ ɖevo lɛ, bo lɛ́ nɔ gudo nú ye ɖè lɛ é. w21.03 19 akpá. 22-23

Nú asú kpo asì kpo wɛ mi nyí bo jló na jì vǐ hǔn, mi kanbyɔ miɖée ɖɔ: ‘Mǐ ka nyí mɛɖéesɔ́hwetɔ́, bo yí wǎn nú Jehovah kpo Xó tɔn kpo à? Jehovah ka na sɔ́ mǐ bɔ mǐ na kpé nukún dó vǐ yɛyɛ̌ e xɔ akwɛ é ɖé wu à?’ (Ðɛh. 127:4) Nú mɛjitɔ́ ɖé wɛ a ko nyí hǔn, kanbyɔ hwiɖée ɖɔ: ‘Un ka nɔ kplɔ́n vǐ ce lɛ ɖɔ nǔ ɖagbe wɛ azɔ̌syɛnsyɛnwiwa nyí à?’ (Nǔt. 3:12, 13) ‘Un ka nɔ wà nǔ e wu un kpé é bǐ dó cyɔn alɔ vǐ ce lɛ jí sín awovínú lɛ sí à?’ (Nǔx. 22:3) A sixu cyɔn alɔ vǐ towe lɛ jí sín wuvɛ̌ lɛ bǐ mɛ ǎ. A sixu kpé enɛ wu ǎ. Amɔ̌, kpɛɖé kpɛɖé ɔ, a sixu sɔnǔ nú ye kpo wanyiyi kpo bonu ye na ɖ í xwi xá gbɛ̀ mɛ tagba lɛ gbɔn lee ye na nɔ ba wěɖexámɛ lɛ ɖò Xó Mawu tɔn mɛ gbɔn é kpinkplɔn ye gblamɛ. (Nǔx. 2:1-6) Ði kpɔ́ndéwú ɔ, enyi hɛ̌nnumɔ ɖé wá gbeta ɔ kɔn bo jó Jehovah sinsɛn dó hǔn, d’alɔ vǐ towe lɛ bonu ye ni kplɔ́n nǔ e wu é ɖò taji ɖɔ è ni nɔ gbeji nú Jehovah é ɖò Xó Mawu tɔn mɛ. (Ðɛh. 31:24) Alǒ, enyi mɛvívɛ́ ɖé wɛ kú nú mi hǔn, xlɛ́ vǐ towe lɛ lee è nɔ zán Xó Mawu tɔn dó ɖí xwi xá aluwɛ bo nɔ lɛ́ mɔ fífá gbɔn é.—2 Kɔ. 1:3, 4; 2 Tim. 3:16. w20.10 27-28 akpá. 7