mars

“Lɛ̌ngbɔ́ lɛ́,” éé xó lǒ e ɖo Matíe 25:31-36 mɛ é ɖɔ é nɔ te nú ayijlɔ́jlɔ́nɔ ɖěɖěe ɖo gbɛ ɖo azǎn gǔdogúdo tɔn lɛ́ mɛ, bo ɖó nukúnɖíɖó ayǐkúngban jí tɔn lɛ́ é; yě wɛ nyí lɛ̌ngbɔ́ ɖěvo lɛ́. Yě nɔ d’alɔ nɔví Klísu tɔn yí ami dó ɖe e kpo ɖo ayǐkúngban ɔ jí lɛ́ é bónú yě ná wa wɛn ɖagbe ɔ jíjlá kpó nǔkplɔ́nkplɔ́n mɛ lɛ́ bónú yě ná húzú ahwanvú kpó sín azɔ̌ ɔ gbɔn gbɛ ɔ bǐ mɛ; mɔ̌ mɛ ɔ, yě nɔ xlɛ́ ɖo ali ɖé nu ɖɔ émí ɖo gǔdo nú yě kpó gbejíninɔ kpó. (Mat. 24:14; 28:19, 20) Xwewú xwewú ɔ, ɖo aklúnɔzángbla e nɔ jɛ nukɔn nú Flǐn ɔ lɛ́ é mɛ ɔ, lɛ̌ngbɔ́ ɖěvo lɛ́ nɔ ɖ’alɔ ɖo nǔjlájlá e gbɔn gbɛ ɔ bǐ mɛ é ɖé mɛ mlɛ́mlɛ́, bo nɔ ylɔ́ mɛ e jló lɛ́ é nú Flǐn ɔ, lobo nɔ xlɛ́ gbɔn mɔ̌ ɖɔ émí ɖo gǔdo nú nɔví Klísu tɔn lɛ́. Gɔ́ ná ɔ, yě nɔ wa nǔ e wú yě kpé é bǐ bónú Flǐn ɔ ná dó sixú yi ganjí ɖo agun lɛ́ bǐ mɛ, gbɔn gbɛ ɔ bǐ mɛ. Kpó xomɛhunhun kpó wɛ lɛ̌ngbɔ́ ɖěvo lɛ́ nɔ nɔ gǔdo nú nɔví Klísu tɔn lɛ́ ɖo ali énɛ́ lɛ́ nu. Lɛ̌ngbɔ́ énɛ́ lɛ́ tuun ɖɔ Jezu nɔ kpɔ́n nǔ e yě ɖo wiwa nú nɔví yí ami dó ɖe tɔn lɛ́ wɛ é dó mɔ nǔ e yě ɖo wiwa nú émíɖésúnɔ mɛtún ɔ wɛ lɛ́ é.—Mat. 25:37-40. w22.01 22-23 akpá. 11-12

Mǐ sixú xwedó jijɔ Jezu tɔn lɛ́ kpó lěe é nɔ wa nǔ gbɔn xá mɛ ɖěvo lɛ́ é kpó; ɖi kpɔ́ndéwú ɔ, é kú nǔbláwǔ nú gudunɔ ɖé, se wǔvɛ́ xá nyɔ̌nu e ɖo azɔn syɛ́nsyɛ́n ɖé jɛ wɛ é ɖé, bɔ mɛ ɖěɖěe mɛ kú dó lɛ́ é sín nǔ lɛ́ blá wǔ n’i. Ényí mǐ wa nǔ Jezu ɖɔhun ɔ, kpɔ́ndéwú Jexóva tɔn xwedó wɛ mǐ ɖe mɔ̌ nɛ́. (Mak. 1:40, 41; 5:25-34; Jaan 11:33-35) Lě do mǐ wa nǔ Jexóva ɖɔhun sɔ é ɔ, mɔ̌ do wɛ mǐ nɔ sɛkpɔ́ ɛ sɔ é nɛ́. Afɔ sísɔ́ dó afɔdo Jezu tɔn lɛ́ mɛ nɔ zɔ́n bɔ gbɛ nyanya élɔ́ nɔ fɛ́ ayi mǐtɔn ǎ. Ðo zǎn e jɛ nukɔn nú kú Jezu tɔn é mɛ ɔ, é kpé wú bo ɖɔ: “Un ko ɖu ɖo gbɛ ɔ jí.” (Jaan 16:33) Ðiɖɔ wɛ é ɖe ɖɔ émí kún lɔn bónú lěe gbɛ ɔ nɔ lin nǔ gbɔn é, nǔ e gbé é nɔ nya lɛ́ é kpó lěe é nɔ wa nǔ gbɔn é kpó wa nǔ dó émí wú ó. Jezu ɖe ayi sín nǔ tají e wú é wá ayǐkúngban jí é jí gbeɖé ǎ, énɛ́ wɛ nyí bo ná dó jɛhun dó nyǐkɔ Jexóva tɔn jí. Mǐdɛɛ lɛ́ ka lo? Nǔ gěgé wɛ sixú fɛ́ ayi mǐtɔn ɖo gbɛ élɔ́ mɛ. Amɔ̌, Jezu ɖɔhun ɔ, ényí mǐ zé ayi ɖó jlǒ Jexóva tɔn wiwa jí ɔ, mǐ lɔ ná “ɖu ɖo” gbɛ ɔ jí.—1 Jaan 5:5. w21.04 4 akpá. 7-8

Mɛsɛ́dó Pɔ́lu tuun akpá Jezu tɔn e ɖɔ ɖɔ ‘mɛ e ná ɖi nǔ nú [Jezu] lɛ́ é bǐ ná mɔ gbɛ mavɔmavɔ’ é. (Jaan 3:16; Hlɔ̌. 6:23) É ɖo wɛn ɖɔ Pɔ́lu ɖo mɛ ɖěɖěe ɖi nǔ nú gbɛxixɔ ɔ lɛ́ é mɛ. É kú d’é jí ɖɔ Jexóva ɖo gbesisɔmɛ bo ná sɔ́ hwɛ kɛ mɛ ɖěɖěe tlɛ hu hwɛ syɛ́nsyɛ́n dó è lɛ́ é, ényí yě lɛ́ kɔ sín hwɛ yětɔn lɛ́ gúdo ɔ nɛ́. (Ðɛh. 86:5) Pɔ́lu lɛ́ ɖi nǔ ɖɔ Mawu yí wǎn nú émí tawun, ɖó é tuun ɖɔ é sɛ́ Jezu dó bɔ é wá kú dó ta émítɔn mɛ. Ðǒ ayi gǎnjɛwúxó e ɖo vivɔnu Galátinu lɛ́ 2:20 tɔn é wú. Pɔ́lu ɖɔ: ‘Mawu ví ɔ yí wǎn nú mì, bo kú dó ta ce mɛ.’ Pɔ́lu lin ɖɔ émí nyí mɛ nyanya sɔmɔ̌ bɔ Mawu kún sixú yí wǎn nú émí ó ǎ. É lin nǔ lěhun ǎ: ‘Un mɔ nǔ e wú Jexóva sixú yí wǎn nú nɔví ce lɛ́ é, amɔ̌, é sixú yí wǎn nú nyɛ ǎ.’ Pɔ́lu flín nǔ élɔ́ Hlɔ̌manu lɛ́: “Hwenu e mǐ kpo ɖo hwɛhutɔ́ nyí wɛ ɔ wɛ Klísu kú dó ta mǐtɔn mɛ.” (Hlɔ̌. 5:8) Nǔ ɖěbǔ sixú ɖó dogbó nú wǎn e Mawu yí nú mǐ é ǎ. Pɔ́lu tuun lě do wǎnyíyí Mawu tɔn ɖó hlɔ̌nhlɔ́n sɔ é. Pɔ́lu tuun lěe Jexóva ɖó suúlu, bo wa nǔ xá togun Izlayɛ́li tɔn gbɔn é. w21.04 22-23 akpá. 8-10

Nú a ɖo Biblu kplɔ́nkplɔ́n ɖé wú kpé nukún dó wɛ hǔn, d’alɔ nǔkplɔ́ntɔ́ towe bónú é ní wá yí wǎn nú Jexóva. Gbɔn nɛ̌ è? Ba ali ɖěɖěe nu a sixú dɔn ayi nǔkplɔ́ntɔ́ towe tɔn wá jijɔ Jexóva tɔn lɛ́ jí ɖe é. D’alɔ nǔkplɔ́ntɔ́ towe bónú é ní mɔ ɖɔ Jexóva ɔ, Mawu awǎjijɛnɔ wɛ, bo nɔ nɔ gǔdo nú mɛ ɖěɖěe yí wǎn n’i lɛ́ é. (1 Tim. 1:11, nwt; Ebl. 11:6) Xlɛ́ nǔkplɔ́ntɔ́ ɔ ɖɔ nǔ e kplɔ́n wɛ é ɖe lɛ́ é zínzán ná hɛn le wá n’i. Énɛ́ gúdo hǔn, tínmɛ n’i ɖɔ le énɛ́ lɛ́ e é ná mɔ é nɔ xlɛ́ ɖɔ Jexóva yí wǎn n’i. (Eza. 48:17, 18) Ényí wǎn e nǔkplɔ́ntɔ́ towe yí nú Jexóva é ɖo jijɛjí wɛ ɔ, akpakpa ná lɛ́ sɔ́ ɛ hú gǎn dó hǔzúhúzú lɛ́ bíbló wú. Bónú Biblu kplɔ́ntɔ́ ɖé ná yi nukɔn bo bló batɛ́mu ɔ, é ɖó ná sá vɔ̌ ɖé lɛ. É sixú byɔ́ ɖɔ Biblu kplɔ́ntɔ́ ɖé lɛ́ ní sɔ́ nǔɖókan yětɔn lɛ́ dó sá vɔ̌. É sixú byɔ́ ɖɔ mɛ gěgé ní jó xɔ́ntɔn yětɔn ɖěɖěe ma yí wǎn nú Jexóva ǎ lɛ́ é dó. Mɛ ɖěvo lɛ́ tíin bɔ ɖó mɛ e ɖo xwédo yětɔn mɛ lɛ́ é ma yí wǎn nú Kúnnuɖetɔ́ Jexóva tɔn lɛ́ ǎ wútu ɔ, yě sixú gbɛ́ yě. Jezu d’akpá ɖɔ mɛ ɖěɖěe nɔ xwedó émí lɛ́ é kún ná ɖu winnyá gbeɖé ó. È ná d’ajɔ yě b’ɛ ná túnflá gbɔn xwédo gbigbɔ tɔn ɖé níná yě gblamɛ.—Mak. 10:29, 30. w21.06 4 akpá. 8-9

Mɛsɛ́dó Pɔ́lu jlɛ́ nǔ kplɔ́nkplɔ́n mɛ lɛ́ bónú yě ná húzú ahwanvú sín azɔ̌ ɔ dó gle lilɛ wú, bo xlɛ́ ɖɔ mǐ ɖó ná wa nǔ hú nǔkún dídó. É flín Kɔlɛ́ntinu lɛ́ ɖɔ: “Nyɛ wɛ tun atín ɔ, bɔ Apolósu hú sin ná; . . . Midɛɛ lɛ́ ka nyí gle Mawu tɔn.” (1 Kɔ. 3:6-9) Ðó azɔ̌ wa ɖo “gle Mawu tɔn” mɛ wɛ mǐ ɖe wútu ɔ, mǐ ɖó ná nɔ dó nǔkún kɛ́ɖɛ́ ǎ, loɔ, mǐ ɖó ná nɔ hú sin ná, bo ná nɔ lɛ́ gbéjé lěe su gbɔn wɛ nǔkún ɔ ɖe é kpɔ́n hwɛhwɛ. Hwe ɖokpó ɔ nú ɔ, mǐ hɛn ayi mɛ ɖɔ Mawu wɛ nɔ bló bɔ jinukún ɔ nɔ su. Wǔjɔmɛ tɛ́ ɖíe mǐ ɖó bo ná jlá wɛn ɔ, lobo lɛ́ kplɔ́n nǔgbó ɔ mɛ ɖěvo lɛ́ è! Awǎjijɛ adǒdwé ɔ wɛ azɔ̌ énɛ́ nɔ ná mɛ. Mɛsɛ́dó Pɔ́lu e d’alɔ mɛ gěgé ɖo Tɛsaloníki bɔ yě húzú ahwanvú é ɖe lěe nǔ cí n’i é xlɛ́ gbɔn lě: “Nukún mǐtɔn sɔ́ ɖo mɛɖé jí zɛ midɛɛ lɛ́ kɛ́ɖɛ́ wú ǎ; mi jí wɛ nukún mǐtɔn ɖe; mi wɛ nyí xomɛhunhun mǐtɔn, bo nyí ɖuɖéjí mǐtɔn sín xlɛ̌ e wú mǐ ná sixú tɛ afɔ ayǐ ɖo Aklúnɔ mǐtɔn Jezu nukɔn, ɖo hwenu e é ná lɛ́ kɔ wá é. Nǔgbó wɛ! Mi wɛ nyí susu mǐtɔn, bo nyí xomɛhunhun mǐtɔn.”—1 Tɛ. 2:19, 20; Mɛ. 17:1-4. w21.07 3 akpá. 5; 7 akpá. 17

Jexóva dɔn mǐ mɛ ɖokpó ɖokpó. (Jaan 6:44) Lin tamɛ dó nǔ e énɛ́ ɖe xlɛ́ é jí. Ée Jexóva ɖo gbɛtɔ́ lǐva mɔ̌kpán e ɖo gbɛ ɔ mɛ lɛ́ é gbéjé kpɔ́n wɛ kpó sɔxwixwe kpó é ɔ, é ɖó ayi nǔ xɔ akwɛ́ ɖé wú ɖo wǔ towe; énɛ́ wɛ nyí ɖɔ é mɔ ɖɔ a nyí ayijlɔ́jlɔ́nɔ, bo sixú yí wǎn n’i. (1 Tan 28:9) Jexóva tuun we, mɔ nukúnnú jɛ ninɔmɛ towe mɛ, bo lɛ́ yí wǎn nú we. Énɛ́ vɔ́ gǎnjɛwú ná mɛ tawun! Nǔ towe nɔ ɖu ayi mɛ nú Jexóva tawun, bɔ nɔví súnnu kpó nɔví nyɔ̌nu kpó towe lɛ́ lɔ sín nǔ nɔ ɖu ayi mɛ n’i. Bónú mǐ ná mɔ nukúnnú jɛ énɛ́ wú ɔ, Jezu jlɛ́ Jexóva dó lɛ̌ngbɔ́nyitɔ́ ɖé wú. Ényí lɛ̌ngbɔ́ 1 bú sín lɛ̌ngbɔ́kpó e mɛ lɛ̌ngbɔ́ 100 ɖe é ɔ, étɛ́ lɛ̌ngbɔ́nyitɔ́ ɔ ka ná wa? É ná “jó kanwe afɔtɔn-nukún-ɛnɛ (99) ɖě lɛ́ dó nyi fí ɖokpó ɖo sókan mɛ, lobo ɖidó ɖokpó e bú ɔ ba gbé.” Ényí lɛ̌ngbɔ́nyitɔ́ ɔ mɔ lɛ̌ngbɔ́ tɔn ɔ, xomɛ ná sin i dó wǔ tɔn ǎ. É nyɔ́ wa ɔ, é ná j’awǎ. Étɛ́ énɛ́ ka kplɔ́n mǐ? Lɛ̌ngbɔ́ lɛ́ bǐ wɛ xɔ akwɛ́ nú Jexóva. Jezu ɖɔ: ‘Tɔ́ ce e ɖo jǐxwé é jló ɖɔ mɛ ɖokpó géé ni bú ɖo yɔkpɔ́vú élɔ́ lɛ́ mɛ ǎ.’—Mat. 18:12-14. w21.06 20 akpá. 1-2

Ényí mǐ nɔ lin tamɛ dó nukúnɖíɖó sɔgúdo tɔn mǐtɔn e ɖó jiɖe é kpó wǎnyíyí e ma nɔ vɔ́ gbeɖé ǎ bɔ Mawu ɖó nú mǐ é kpó jí ɔ, wǎnyíyí e mǐɖésúnɔ ɖó nú Jexóva é nɔ syɛ́n d’é jí, bɔ mǐ kpó é kpó nɔ lɛ́ vɛ́. (Hlɔ̌. 8:38, 39) Kpɔ́ndéwú Jezu tɔn xwixwedó nɔ sɔ́ akpakpa mǐ. (1 Pi. 2:21) Ðo azǎn e jɛ nukɔn nú Flǐn ɔ lɛ́ é jí ɔ, mǐ nɔ sɔ́ ayi ɖó tan Biblu tɔn e kúnkplá aklúnɔzángbla gǔdogúdo tɔn e Jezu bló ɖo ayǐkúngban jí é, kú tɔn kpó fínfɔ́n sín kú tɔn kpó xixa jí. Énɛ́ gúdo ɔ, xóɖiɖɔ Flǐn ɔ tɔn nɔ wá flín mǐ ɖɔ Jezu yí wǎn nú mǐ. (Efɛ́. 5:2; 1 Jaan 3:16) Ée mǐ ná ɖo nǔ xa dó kpɔ́ndéwú mɛɖée sɔ́ dó sá vɔ̌ tɔn Jezu tɔn jí wɛ, bo ná lɛ́ ɖo tamɛ lin d’é jí wɛ é ɔ, mǐ ná mɔ ɖɔ é ɖo dandan ɖɔ mǐ ní ‘zán gbɛ lěe éɖésúnɔ zán gbɛ tɔn gbɔn é.’ (1 Jaan 2:6) Mǐ tlɛ nɔ lɛ́ kánɖéjí hú gǎn bo ná hɛn mǐɖée ɖo wǎnyíyí Mawu tɔn mɛ. (Judi 20, 21) Mǐ nɔ wa nǔ e wú mǐ kpé é bǐ dó se tónú nú Mawu, bló bɔ nyǐkɔ tɔn ná nyí nǔ mímɛ́, lobo lɛ́ hɛn xomɛ hun i dó hɛn mǐɖée ɖo wǎnyíyí tɔn mɛ. (Nǔx. 27:11; Mat. 6:9; 1 Jaan 5:3) Flǐn ɔ domɛ yiyi nɔ sísɛ́ mǐ bɔ mǐ nɔ kánɖéjí hú gǎn bo ná zán gbɛ ayǐhɔ́ngbe ayǐhɔ́ngbe ɖo ali ɖé nu b’ɛ ná cí ɖɔ mǐ ɖo xó élɔ́ ɖɔ nú Jexóva wɛ ɖɔhun: ‘Un jló ná hɛn nyiɖée ɖo wǎnyíyí towe mɛ káká sɔ́yi!’ w22.01 23-25 akpá. 17, 18, 19

Jexóva ná mǐ mɛɖésúsíninɔ. Mǐɖésúnɔ sixú wá gbeta nǔ e mǐ ná wa ɖo gbɛ mɛ é tɔn kɔn. Ényí mǐ wá gbeta ɔ kɔn bo ná sɛn Mawu wǎnyíyínɔ mǐtɔn ɔ, xomɛ nɔ hun i dó mǐ wú. (Ðɛh. 84:12; Nǔx. 27:11) Mǐ sixú zán mɛɖésúsíninɔ mǐtɔn ganjí ɖo ali gěgé nu. Ényí mǐ nɔ xwedó kpɔ́ndéwú Jezu tɔn ɔ, nǔ mɛ ɖěvo lɛ́ tɔn ná nɔ ɖu ayi mɛ nú mǐ hú mǐɖésúnɔ tɔn. Gbe ɖokpó ɔ, nǔ cikɔ nú Jezu kpó mɛsɛ́dó tɔn lɛ́ kpó tawun, bɔ yě yi fí e ɖo tóó é ɖé bo ná gbɔjɛ kpɛɖé. Amɔ̌, é sɔ́ wá nyí lěe yě lin gbɔn é ǎ. Mɛ wɔ̌búwɔ́bú ɖé mɔ yě, bo ɖo biba wɛ vɛ́návɛ́ná ɖɔ Jezu ní kplɔ́n nǔ émí. Amɔ̌, Jezu sin xomɛ ǎ. É nyɔ́ wa ɔ, nǔ yětɔn wɛ blá wǔ n’i. Étɛ́ é ka wa bɔ d’é wú? “É jɛ nǔ gěgé kplɔ́n yě jí.” (Mak. 6:30-34) Ényí mǐ nɔ zán hwenu mǐtɔn kpó hlɔ̌nhlɔ́n mǐtɔn kpó dó d’alɔ mɛ ɖěvo lɛ́ Jezu ɖɔhun ɔ, mǐ nɔ wlí yɛ̌yi nú Tɔ́ mǐtɔn jǐxwé tɔn ɔ.—Mat. 5:14-16. w21.08 3 akpá. 7-8

Nǔ wunmɛ wunmɛ wɛ Jexóva nɔ yí wǎn ná. Énɛ́ jɛ wě ɖo nǔ ɖaaɖagbe e é dá lɛ́ é mɛ; gbɛtɔ́ lɛ́ lɔ ɖ’é mɛ. Mǐ mɛ ɖokpó ɖokpó gbɔn vovo. Énɛ́ wú ɔ, Jexóva nɔ jlɛ́ we dó mɛ ɖěvo lɛ́ wú gbeɖé ǎ. É nɔ gbéjé ayi towe kpɔ́n, énɛ́ wɛ nyí mɛ alɔkpa e a nyí ɖo xomɛ é. (1 Sam. 16:7) É lɛ́ tuun ɖɔ a ɖó nǔwúkpíkpé lɛ́, gǎnmaɖó lɛ́, bo nɔ lɛ́ flín fí e a su ɖe é. Gɔ́ ná ɔ, é nɔ byɔ́ nǔ e zɛ nǔwúkpíkpé towe lɛ́ wú é we ǎ. Mǐ ɖó ná nɔ wa nǔ Jexóva ɖɔhun, bo ná nɔ ɖó linlin ɖokpó ɔ e é nɔ ɖó dó mǐ wú é. Mɔ̌ mɛ ɔ, mǐ ná ɖó linlin e ɖo “jlɛ̌ mɛ” é, bo ná nɔ mɔ mǐɖée zɛ xwé wú ǎ, mɔ̌ jɛ́n mǐ ma ka ná nɔ mɔ ɖɔ mǐ kún vó nǔɖé ó ǎ é nɛ́. (Hlɔ̌. 12:3) Nǔgbó ɔ, kpɔ́ndéwú ɖagbe mɛ ɖěvo lɛ́ tɔn sixú kplɔ́n nǔ mǐ. Ði kpɔ́ndéwú ɔ, vlafo mǐ tuun nɔví súnnu alǒ nɔví nyɔ̌nu ɖé bɔ sinsɛnzɔ́ ɔ bí alɔ n’i. (Ebl. 13:7) Mǐ lɔ sixú gbɔn yɛkan énɛ́ mɛ, bo ba ali e nu mǐ sixú bló bɔ sinsɛnzɔ́ ɔ ná bí alɔ nú mǐ ɖe lɛ́ é. (Filí. 3:17) Amɔ̌, vogbingbɔn ɖé ɖo è ní xwedó kpɔ́ndéwú ɖagbe mɛɖé tɔn kpó è ní jlɛ́ mɛɖée dó mɛ ɔ wú kpó tɛ́ntin. w21.07 20 akpá. 1-2

Ényí a nɔ xwe sɔ dó kpɔ́n kanlin lɛ́, atín lɛ́ kpó sunví lɛ́ kpó ɔ, a sixú bló bɔ nǔ e a ɖi ɖɔ Gbɛɖótɔ́ ɖé tíin é ná lí dǒ. (Ðɛh. 19:2) Lě do a kplɔ́n nǔ dó nǔ énɛ́ lɛ́ wú sɔ é ɔ, mɔ̌ do wɛ a ná kán ɖ’é jí ɖɔ Jexóva wɛ nyí Gbɛɖótɔ́ ɔ sɔ é nɛ́. Ényí a ɖo nǔ kplɔ́n dó nǔɖíɖó lɛ́ wú wɛ hǔn, nɔ ɖ’ayi nǔgbó e yě nɔ ɖe xlɛ́ dó Gbɛɖótɔ́ mǐtɔn wú lɛ́ é wú ganjí. (Hlɔ́. 1:20.) Ði kpɔ́ndéwú ɔ, hwesivɔ́ nɔ ná yǒzo kpó wěziza kpó e sín hudó mǐ ɖó bá nɔ gbɛ ɖo ayǐkúngban jí é mǐ. Amɔ̌, gǎ e hwe nɔ da é ɖé lɛ́ sixú wa nǔ dó mǐ wú. É byɔ́ ɖɔ è ní cyɔ́n alɔ mǐ jí, bónú gǎ énɛ́ lɛ́ ní ma wa nǔ dó mǐ wú ó. Nǔ ka nɔ nyí mɔ̌ nǔgbó. Gbɔn nɛ̌ é? Nǔ azizɔ ɖɔhun ɖé lɛ́ lɛ́ lɛ̌ dó ayǐkúngban ɔ, bo nɔ cyɔ́n alɔ mǐ jí bɔ gǎ e hwe nɔ da lɛ́ é nɔ wa nǔ dó mǐ wú ǎ. Ényí gǎ e nɔ wa nǔ dó mɛ wú bɔ hwe nɔ da lɛ́ é ɖo syɛ́nsyɛ́n wɛ ɔ, azizɔ e lɛ́ lɛ̌ dó ayǐkúngban ɔ é lɔ nɔ ɖo jijɛjí wɛ. Mɛɖé wɛ ɖó ná ko bló nǔ énɛ́ lɛ́, bo lɛ́ nyí Gbɛɖótɔ́ wǎnyíyínɔ e ɖó nǔnywɛ́ é a cé? w21.08 17 akpá. 9-10

Ényí mɛɖé bló batɛ́mu gúdo ɔ, mǐ ɖó ná kpo ɖo wǎnyíyí kpó sísí kpó ɖe xlɛ́ ɛ wɛ. (1 Jaan 4:20) Étɛ́ énɛ́ ka nɔ byɔ́? Mǐ nɔ gán jɛ wǔ tɔn, bo nɔ tuun ɖɔ nǔ ɖagbe lɛ́ wɛ nɔ sísɛ́ ɛ b’ɛ nɔ wa nǔ. Ði kpɔ́ndéwú ɔ, mǐ nɔ vɛ nǔ dó è, bo nɔ lin ɖɔ cejɛ́nnábí wɛ nɔ zɔ́n bɔ é nɔ wa nǔ e é nɔ wa lɛ́ é ǎ. É nyɔ́ wa ɔ, mǐ nɔ wlí yɛ̌yi nú nɔví mǐtɔn, bo nɔ mɔ ɖɔ é hú gǎn mǐ. (Hlɔ̌. 12:10; Filí. 2:3) Nǔgbó ɔ, mǐ ɖó ná ɖe nǔbláwúkúnúmɛ kpó xomɛnyínyɔ́ kpó xlɛ́ mɛ lɛ́ bǐ. Ényí mǐ ba ná nɔ xwédo Jexóva tɔn mɛ káká sɔ́yi ɔ, mǐ ɖó ná zán nǔ ɖěɖěe ɖo Biblu mɛ lɛ́ é ɖo gbɛzán mǐtɔn mɛ. Ði kpɔ́ndéwú ɔ, Jezu kplɔ́n mɛ ɖɔ mǐ ɖó ná nɔ ɖe nǔbláwúkúnúmɛ kpó xomɛnyínyɔ́ kpó xlɛ́ mɛ lɛ́ bǐ, káká jɛ kɛntɔ́ mǐtɔn lɛ́ jí. (Luk. 6:32-36) Hweɖélɛ́nu ɔ, mǐ sixú nɔ mɔ ɖɔ mɔ̌ wiwa vɛ́ wǔ nú mǐ. Ényí mɔ̌ hǔn, mǐ ɖó ná nɔ kplɔ́n, bo nɔ lin nǔ, lobo lɛ́ wa nǔ Jezu ɖɔhun. Ényí mǐ nɔ wa nǔ e wú mǐ kpé é bǐ, bo nɔ lin nǔ lobo nɔ lɛ́ wa nǔ Jezu ɖɔhun hǔn, xlɛ́xlɛ́ Tɔ́ mǐtɔn jǐxwé tɔn ɔ wɛ mǐ ɖe ɖɔ mǐ ba ná nɔ xwédo tɔn mɛ káká sɔ́yi nɛ́. w21.08 6 akpá. 14-15

Kplɔ́n bo nɔ gán jɛ Jexóva wú. É d’akpá nú mǐ ɖɔ ényí mǐ ɖeji dó émí wú bo ná nǔ e wú mǐ kpé é bǐ émí ɔ, émí ná kɔn nyɔ̌ná dó mǐ jí. Kpɔ́ndéwú mɛ ɖěɖěe zé yěɖée jó bǐ mlɛ́mlɛ́ nú sinsɛnzɔ́ Jexóva tɔn lɛ́ é tɔn gěgé wɛ ɖo Biblu mɛ. Ðo ninɔmɛ gěgé mɛ ɔ, yě tó ɖe afɔ nukɔntɔn ɔ hwɛ̌ cóbɔ Jexóva kɔn nyɔ̌ná dó yě jí. Ði kpɔ́ndéwú ɔ, ée Ablaxámu gosín to tɔn mɛ, “ma tuun fí e é xwé é,” gúdo é jɛ́n Jexóva kɔn nyɔ̌ná dó jǐ tɔn. (Ebl. 11:8) Jakɔ́bu dó alɔ xá wɛnsagun ɖé hwɛ̌ cóbɔ Jexóva kɔn nyɔ̌ná bǔnɔ ɖé dó jǐ tɔn. (Bǐb. 32:25-31) Hwenu e akɔta Izlayɛ́li tɔn xwe akpádídó-yikúngban ɔ jí é ɔ, vɔ̌sánúxwlémawutɔ́ lɛ́ dó afɔ Judɛ́ɛn Tɔ ɔ mɛ hwɛ̌ cóbɔ mɛ e kpo lɛ́ é kpé wú bo d’asá tɔ ɔ. (Joz. 3:14-16) Kpɔ́ndéwú Kúnnuɖetɔ́ e gán jɛ Jexóva wú bo vlɔ́n kan nú sinsɛnzɔ́ yětɔn ɖo égbé lɛ́ é tɔn gěgé sixú lɛ́ kplɔ́n nǔ we. w21.08 29-30 akpá. 12-14

Nǔ e mi mɛ mɛxómɔ súnnu kpó nyɔ̌nu kpó lɛ́ mɔ kpɔ́n lɛ́ é zɔ́n bɔ mi tuun lěe è nɔ wa nǔ gbɔn ɖ’ayǐ é, amɔ̌, mi lɛ́ mɔ ɖɔ è ɖó ná húzú sɔgbe xá ninɔmɛ yɔ̌yɔ́ lɛ́. Mi mɛxómɔ e bló batɛ́mu agaɖanu din lɛ́ é lɔ ɖó nǔ gěgé bo sixú má xá mɛ ɖěvo lɛ́. É ná víví nú mɛ wínnyáwínnyá lɛ́ hwenu e a ná ɖo nǔ e a ko mɔ kpɔ́n lɛ́ é kpó nǔ e a ko kplɔ́n lɛ́ é kpó má xá yě wɛ é. Ényí a nɔ sɔ́ nǔ e a ko mɔ kpɔ́n lɛ́ é dó “ná nǔ mɛ” ɔ, Jexóva ná kɔn nyɔ̌ná gěgé dó jǐ we. (Luk. 6:38) Ényí mi mɛxómɔ vívɛ́ lɛ́ zun xɔ́ntɔn vívɛ́ xá mɛ wínnyáwínnyá lɛ́ ɔ, mi ná kpé wú bo d’alɔ miɖée lɛ́. (Hlɔ̌. 1:12) Mɛ ɖokpó ɖokpó wɛ ɖó nǔ xɔ akwɛ́ e mɛ ɖěvo ma ɖó ǎ é ɖé. Ðó xwe gěgé ko wá yi wútu ɔ, mɛxómɔ lɛ́ ɖó nǔnywɛ́, bo lɛ́ mɔ nǔ gěgé kpɔ́n. Mɛ wínnyáwínnyá lɛ́ ɖó hlɔ̌nhlɔ́n. Ényí mɛ wínnyáwínnyá lɛ́ kpó mɛxómɔ lɛ́ kpó nɔ wa nǔ ɖó kpɔ́ xɔ́ntɔn xɔ́ntɔn lɛ́ ɖɔhun ɔ, yě nɔ kpa susu nú Tɔ́ mǐtɔn jǐxwé tɔn wǎnyíyínɔ ɔ, bo nɔ lɛ́ nyí nyɔ̌ná ɖé nú agun ɔ bǐ. w21.09 8 akpá. 3; 13 akpá. 17-18

Étɛ́wú Jwifu gěgé ka gbɛ́ Jezu ɖó lěe é kú gbɔn é wú? Ðo nukún yětɔn mɛ ɔ, kú e Jezu kú dó yatín jí é xlɛ́ ɖɔ é nyí dǎkáxotɔ́, bo lɛ́ nyí hwɛhutɔ́; é kún nyí Mɛsíya ɔ ó. (Sɛ́n. 21:22, 23) Jwifu ɖěɖěe kú Jezu tɔn nyí afɔklɛ́nnú ná lɛ́ é mɔ nǔ jɛ wú ɖɔ Jezu nyí xomɛvɔ́nɔ, bɔ è dó hwɛ agɔ ɛ, bo lɛ́ wa nǔ xá ɛ d’acɛ jí ǎ. Mɛ ɖěɖěe ɖɔ Jezu sín hwɛ lɛ́ é wa nǔ sɔgbe xá sɛ́n ǎ. Hwɛɖɔtɔ́ ɖěɖěe ɖo Hwɛɖɔxɔsá Ðaxó Jwifu lɛ́ tɔn lɛ́ é yá wǔ sɛ ta kplé bo dó hwɛ Jezu; yě ka xwedó sɛ́n cóbó wa mɔ̌ ǎ. (Luk. 22:54; Jaan 18:24) Hwɛɖɔtɔ́ lɛ́ wa nǔ sɔgbe xá sɛ́n, hwenu e yě ɖótó hwɛ agɔ e è dó Jezu é ǎ, é nyɔ́ wa ɔ, yě ɖo “mɛ e ná ɖekúnnu agɔ nú Jezu, bɔ yě ná mɔ tɛn bo ɖó kúhwɛ́ n’i ɔ ba wɛ.” (Mat. 26:59; Mak. 14:55-64) Ée Jezu fɔ́n sín kú gúdo é ɔ, hwɛagɔdótɔ́ énɛ́ lɛ́ “ná akwɛ́ gěgé” sɔ́ja Hlɔ̌ma tɔn e ɖo Jezu sín yɔdo cɔ́ wɛ lɛ́ é, bónú yě ná fúnfún xó e ma sɔgbe ǎ lɛ́ é kpé, dó tínmɛ nǔ e wú yɔdo ɔ ɖo vɔ̌ é.—Mat. 28:11-15. w21.05 11 akpá. 12-13

Jexóva sixú ɖó nǔ gbɛ nyanya élɔ́ nu hweɖěbǔnu. Amɔ̌, suúlu e ɖó wɛ é ɖe é ɖo ɖagbe wa nú mǐ wɛ tawun. Mɛ ɖěɖěe jɔ ɖo kúnkan Adámu kpó Ɛvu kpó tɔn mɛ lɛ́ é bǐ wɛ ɖó blɔ̌ ɖo wǔ. É ɖo mɔ̌ có, Jexóva yí wǎn nú yě, bo nɔ lɛ́ kpé nukún dó yě wú, lobo lɛ́ dó akpá ɖɔ émí ná ɖó nǔ gbɛ nyanya élɔ́ nu. (1 Jaan 4:19) Gɔ́ ná ɔ, Jexóva sixú wa nǔɖé dó ɖó wǔvɛ́ vǐ tɔn lɛ́ tɔn te. É ko sɔ́ hwenu ɖé, bo ná bló bɔ wǔvɛ́ e se wɛ vǐ tɔn lɛ́ ɖe lɛ́ é bǐ ná wá vivɔnu. Wǎnyíyí e é ɖó nú mǐ é ná sísɛ́ mǐ bɔ ényí é ná bo tlɛ lín gbɔn ɖěbǔ ɔ, mǐ ná dɛ éɖɔhun a cé? Jexóva wɛ sɔ́ kpɔ́ndéwú didɛ tɔn e nǔ bǐ vɔ ɖ’é wú é ɖ’ayǐ. Jezu kpé wú bo dɛ Tɔ́ tɔn ɖɔhun. Hwenu e Jezu ɖo ayǐkúngban jí é ɔ, è ɖɔ nǔyá n’i, dó winnyá ɛ, bo lɛ́ xwe è dó yatín jí có, é ka dɛ bo ná dó xɔ gbɛ nú mǐ. (Ebl. 12:2, 3) Kpɔ́ndéwú didɛ tɔn Jexóva tɔn wɛ ná hlɔ̌nhlɔ́n Jezu b’ɛ dɛ. É sixú ná hlɔ̌nhlɔ́n mǐ lɔmɔ̌. w21.07 12-13 akpá. 15-17

Gbe bǐ gbe wɛ Tɔ́ mǐtɔn jǐxwé tɔn ɔ nɔ sɔ́ hwɛ kɛ mǐ mɛ ɖokpó ɖokpó. (Ðɛh. 103:10-14) Gbɛtɔ́ hwɛhutɔ́ wɛ ahwanvú Jezu tɔn lɛ́ nyí có, é kú nǔbláwǔ nú yě, bo lɛ́ sɔ́ hwɛ kɛ yě. É tlɛ lɛ́ sɔ́ jlǒ dó sɔ́ gbɛ tɔn dó sá vɔ̌, bónú è ná dó sɔ́ hwɛ mǐtɔn lɛ́ kɛ mǐ. (1 Jaan 2:1, 2) Ényí mǐ nɔ sɔ́ hwɛ kɛ mǐɖée ɔ, wǎn e mǐ yí nú mǐɖée é nɔ syɛ́n d’é jí. (Efɛ́. 4:32) Nǔgbó ɔ, hwɛ sísɔ́ kɛ mɛ ɖěvo lɛ́ sixú vɛ́ wǔ tawun hweɖélɛ́nu, énɛ́ wú ɔ, é ná byɔ́ gǎndídó tawun ɖo mǐ sí. Nɔví nyɔ̌nu ɖé mɔ ɖɔ xóta “Mì Nọ Jona Ode Awetọ sọn Ojlo mẹ Wá” éé tɔ́n ɖo Atɔxwɛ mɛ é d’alɔ émí ɖo ali énɛ́ nu. É wlán ɖɔ: “Xóta ɔ tínmɛ ɖɔ jlǒ sísɔ́ dó sɔ́ hwɛ kɛ mɛ ɖěvo lɛ́ kún nyí gbeyíyí nú nǔwanyido yětɔn lɛ́, alǒ nukún kpɛví sɔ́ dó kpɔ́n nǔ e yě ji lɛ́ é ó. Loɔ, hwɛ sísɔ́ kɛ yě wɛ nyí ɖɔ è ní ma hɛn nǔ e yě wa nyi do lɛ́ é dó xomɛ ó, bo lɛ́ kpo ɖo fífá ayi mɛ tɔn ɖó wɛ.” Ényí mǐ nɔ sɔ́ jlǒ dó sɔ́ hwɛ kɛ nɔví súnnu kpó nɔví nyɔ̌nu kpó mǐtɔn lɛ́ ɔ, énɛ́ nɔ xlɛ́ ɖɔ mǐ yí wǎn nú yě, bo lɛ́ ɖo nǔ wa wɛ Tɔ́ mǐtɔn Jexóva ɖɔhun. w21.09 23-24 akpá. 15-16

Jezu yí wǎn nú nǔgbó ɔ, énɛ́ wɛ nyí nǔgbó e kúnkplá Mawu kpó linlin Tɔn lɛ́ kpó é. Jezu zán gbɛ sɔgbe xá nǔgbó énɛ́, bo lɛ́ ɖe nǔgbó énɛ́ xlɛ́ mɛ ɖěvo lɛ́. (Jaan 18:37) Ahwanvú nǔgbó Jezu tɔn lɛ́ lɔ yí wǎn nú nǔgbó ɔ tawun. (Jaan 4:23) Mɛsɛ́dó Piyɛ́ɛ tlɛ ylɔ́ sinsɛn klisánwun tɔn ɖɔ “nǔgbó sín ali.” (2 Pi. 2:2) Ðó klisánwun bǐbɛ́mɛ tɔn lɛ́ yí wǎn nú nǔgbó ɔ tawun wútu ɔ, yě gbɛ́ sinsɛn-núkplɔ́nmɛ lɛ́, hwɛndomɛnú lɛ́, kpó linlin gbɛtɔ́ lɛ́ tɔn kpó e ma sɔgbe xá nǔgbó ɔ ǎ lɛ́ é. (Koló. 2:8) Mɔ̌ ɖokpó ɔ, égbé ɔ, klisánwun nǔgbó lɛ́ nɔ sɔ́ nǔ e yě ɖi nǔ ná lɛ́ é bǐ jínjɔ́n Xó Jexóva tɔn jí tɛ́nwín lɛnwín, bo nɔ lɛ́ zán gbɛ sɔgbe xá, énɛ́ ɔ, yě nɔ ɖe xlɛ́ ɖɔ émí ɖo tíntɛ́nkpɔ́n wɛ bo ná ‘zán gbɛ ɖo nǔgbó ɔ mɛ.’ (3 Jaan 3, 4) Égbé ɔ, togun Mawu tɔn nɔ yí nugo ɖɔ émí mɔ nǔ jɛ nǔ e ɖo Biblu mɛ lɛ́ é mɛ hlɛ́nhlɛ́n ǎ. Hweɖélɛ́nu ɔ, lěe yě nɔ tínmɛ nǔkplɔ́nmɛ Biblu tɔn ɖé gbɔn é, alǒ lěe yě nɔ bló tuto nú nǔ lɛ́ gbɔn ɖo agun lɛ́ mɛ é nɔ sɔgbe ǎ. Nú nukúnnúmɔjɛnǔmɛ e yě ɖó dó nǔkplɔ́nmɛ ɔ jí é wá za wě bǐ ɔ, yě nɔ bló hǔzúhúzú e jɛxá lɛ́ é. w21.10 21-22 akpá. 11-12

Lěe ahohó e lɛ́l ɛ̌ dó toxo hwexónu tɔn ɖé é nɔ cyɔ́n alɔ mɛ e ɖo toxo ɔ mɛ lɛ́ é jí gbɔn é ɔ, mɔ̌ wɛ xomɛnyínyɔ́ núwiwa Jexóva tɔn e lɛ́ lɛ̌ dó mǐ lɛ́ é nɔ cyɔ́n alɔ mǐ jí ɖo gbigbɔ lixo sín nǔ nyanya e sixú tɛ́n gbejíninɔ mǐtɔn kpɔ́n lɛ́ é sí gbɔn é nɛ́. Gɔ́ ná ɔ, xomɛnyínyɔ́ Jexóva tɔn nɔ zɔ́n bɔ é nɔ dɔn mǐ dó wǔ. (Jel. 31:3) Ðɛhanwlántɔ́ Davídi zán nǔjlɛ́dónǔwú ɖěvo dó tínmɛ lěe Mawu nɔ cyɔ́n alɔ mɛsɛntɔ́ tɔn lɛ́ jí gbɔn é. É wlán ɖɔ: “Mawu xomɛnyɔ́tɔ́ ɔ, hwi wɛ nyí ahohó ce.” Davídi lɛ́ ɖɔ dó Jexóva wú ɖɔ: “[Xomɛnyɔ́tɔ́] ce ɔ, ahohó ce ɔ, bibɛtɛn ce ɔ, hwɛnɖemɛtɔ́ ce ɔ, é wɛ nyí gǎglónú ce e glɔ́ un nɔ bɛ ta dó é.” (Ðɛh. 59:18; 144:2) Étɛ́wú Davídi ka jlɛ́ xomɛnyínyɔ́ Jexóva tɔn dó bibɛtɛn ɖé kpó ahohó ɖé kpó wú? Mǐ ná bo nɔ nɔ fí ɖěbǔ ɖo ayǐkúngban ɔ jí ɔ, Jexóva ná ná nǔ e sín hudó mǐ ɖó bo ná cyɔ́n alɔ kancícá xɔ akwɛ́ e ɖo mǐ kpó é kpó tɛ́ntin é jí é mǐ, ényí mǐ vɛ́ ko ɖo sinsɛn ɛ wɛ ɔ nɛ́. w21.11 6 akpá. 14-15

Ée Jezu kpó ahwanvú tɔn lɛ́ kpó ɖo tɔ jí, bɔ jɔhɔn ɖaxó ɖé jɛ nyinyi jí é ɔ, Jezu gbɔn yɛkan énɛ́ mɛ bo d’alɔ yě bɔ yě mɔ ɖɔ émí ɖó nǔɖiɖi ɖaxó sín hudó. (Mat. 8:23-26) Ée jɔhɔn ɔ ɖo syɛ́nsyɛ́n wɛ bo ɖo sin xo dó tɔjíhún ɔ mɛ wɛ é ɔ, Jezu ɖo amlɔ dɔ́ wɛ fɛɛ. Ado hu ahwanvú tɔn lɛ́, bɔ yě fɔ́n ɛ bo byɔ́ ɛ ɖɔ é ní hwlɛ́n émí, Jezu ka kanbyɔ́ yě ɖɔ: “Étɛ́ sín xɛsi ɖi wɛ mi ka ɖe, nǔɖiɖihwedónánɔ è mi?” Tagba syɛ́nsyɛ́n ɖé mɛ wɛ a ɖe a? Vlafo adla j’ayǐ ɖé sín wuvɛ̌ se wɛ a ɖe. Alǒ azɔn syɛ́nsyɛ́n ɖé jɛ wɛ a ɖe, b’ɛ zɔ́n bɔ awakanmɛ kú we bǐ, lobɔ a dán ɖěwagbɛn. Ado sixú nɔ hu we hweɖélɛ́nu, amɔ̌, ma lɔn nú énɛ́ zɔ́n bónú a gɔn ji ɖe dó Jexóva wú ó. Nɔ xo ɖɛ vívɛ́ sɛ́dó Jexóva. Nɔ lin tamɛ dó lěe Jexóva d’alɔ we gbɔn wá yi é jí, énɛ́ ɔ, a ná ná hlɔ̌nhlɔ́n nǔɖiɖi towe. (Ðɛh. 77:12) Kúdéjí ɖɔ é kún ná jó we dó gbeɖé gbeɖé ó. w21.11 22-23 akpá. 7, 10

Mɛɖé sixú lin ɖɔ ényí émí ma sɔ́ nǔ e nyí mɛ ɖěvo tɔn é ɖé gbeɖé ǎ ɔ, émí ɖo tónú se nú sɛ́n énɛ́ wɛ. Amɔ̌, é sixú ɖo ajo ja wɛ ɖo ali ɖěvo lɛ́ nu. Ði kpɔ́ndéwú ɔ, ajɔ̌tɔ́ e nɔ zán nǔdagan, alǒ nǔjlɛ́nú e ma sɔgbe ǎ é bo ná dó kɔ́tɔ́ axisinɔ tɔn lɛ́ é ɔ, ajo ja wɛ é ɖe ɖo ali ɖé nu. Levíi-ví lɛ́ 19:13 cá ajojija ɖó kpɔ́ xá wlɛnwín ajɔ̌wiwa tɔn e ma sɔgbe ǎ lɛ́ é, bo ɖɔ: “Mi ma táfú nɔzo mitɔn ó.” Hǔn, mɛtítáfú ɖo ajɔ̌ linu cá kan xá ajojija. Sɛ́n tántɔngɔ́ ɔ ɖɔ ɖɔ ajojija nylá. Amɔ̌, gǒflɛ́mɛ ɖěɖěe ɖo wěma Levíi-ví lɛ́ tɔn mɛ lɛ́ é d’alɔ mǐ bɔ mǐ mɔ nukúnnú jɛ lěe è ná zán nǔgbódodó e ɖo sɛ́n énɛ́ mɛ é gbɔn é wú. Tamɛ linlin dó linlin e Jexóva nɔ ɖó dó nǔgbómaɖɔ kpó ajo kpó wú é jí sixú wa ɖagbe nú mǐ. Mǐ sixú kanbyɔ́ mǐɖée ɖɔ: “Ée un lin tamɛ dó Levíi-ví lɛ́ 19:11-13 jí é ɔ, un mɔ ɖɔ é byɔ́ ɖɔ má bló hǔzúhúzú ɖé lɛ́ ɖo gbɛzán ce mɛ, tají ɔ, ɖo lěe un nɔ w’ajɔ̌ gbɔn é linu wɛ a?” w21.12 9-10 akpá. 6-8

Gbe bǐ gbe ɔ, ényí hwiɖokpó ɖo ɖɛ xo wɛ hǔn, nɔ ɖɔ nǔ e a wa nyi do lɛ́ é nú Jexóva, bo lɛ́ byɔ́ ɛ hwɛsɔ́kɛ. Nǔgbó ɔ, ényí hwɛ syɛ́nsyɛ́n ɖé wɛ a hu ɔ, a ɖó ná lɛ́ yi byɔ́ alɔdó mɛxó agun tɔn lɛ́ tɔn. Yě ná ɖótó we, bo ná ɖe wě xá we kpó wǎnyíyí kpó sín Mawuxówéma ɔ mɛ. Yě ná xo ɖɛ ɖó kpɔ́ xá we, bo ná byɔ́ Jexóva ɖɔ é ní sɔ́ hwɛ kɛ we, “bónú azɔn [éé jɛ wɛ a ɖe ɖo gbigbɔ lixo é] ná gbɔ.” (Ja. 5:14-16) Gɔ́ ná ɔ, tamɛ linlin dó gbɛxixɔ ɔ jí ná d’alɔ we tawun. Ényí a nɔ lin tamɛ dó lě do Vǐ Mawu tɔn se wǔvɛ́ sɔ é jí ɔ, é sixú byɔ́ lanmɛ nú we tawun. Amɔ̌, lě do a lin tamɛ dó vɔ̌ e Jezu sá é jí sɔ é ɔ, mɔ̌ do wɛ wǎn e a yí nú é kpó Tɔ́ tɔn kpó é ná jɛjí sɔ. Xwewú xwewú ɔ, mǐ nɔ ɖe lěe gbɛxixɔ ɔ su nukún mǐtɔn mɛ gbɔn é xlɛ́ gbɔn Flǐn kú Jezu tɔn tɔn domɛ yiyi, kpó mɛ ɖěvo lɛ́ yíylɔ́ wá do tɔn mɛ kpó gblamɛ. Wǔ tɛ́ ɖíe Jexóva ka jɔ mǐ bɔ mǐ ná kplɔ́n nǔ mɛ ɖěvo lɛ́ dó Vǐ tɔn wú è! w21.04 18-19 akpá. 13-16

Dǒ nukún nǔ e Jezu wa hwenu e mɛ wɔ̌búwɔ́bú ɖé wá gɔ̌n tɔn ɖo só ɖé kpá é mɛ kpɔ́n. Zǎn ɔ bǐ wɛ Jezu sɔ́ dó xo ɖɛ ná. É ɖo gaan ɖɔ nǔ cikɔ n’i tawun, amɔ̌, hwenu e é mɔ ahwan ɔ é ɔ, nǔ wamamɔnɔ kpó azinzɔnnɔ kpó e ɖo yě mɛ lɛ́ é tɔn blá wǔ n’i. É nyí azɔn kɛ́ɖɛ́ wɛ é gbɔ nú yě ǎ, loɔ, é lɛ́ xwlé xóɖiɖɔ e dó wǔsyɛ́n lanmɛ nú mɛ hú gǎn bɔ è ma ko xwlé mɛ kpɔ́n ǎ é ɖé yě; é wɛ nyí Mawuxóɖiɖɔ Só jí tɔn ɔ. (Luk. 6:12-20) Jezu nɔ lɛ́ ɖi hwenu tɔn sín gwě ǎ. Dǒ nukún lěe nǔ cí nú Jezu hwenu e é se ɖɔ è gbo ta xɔ́ntɔn tɔn e nyí Jaan Batɛ́mublónúmɛtɔ́ ɔ é mɛ kpɔ́n. Biblu ɖɔ: “Ée Jezu se ɖɔ Jaan [Batɛ́mublónúmɛtɔ́] ɔ kú ɔ, é byɔ́ tɔjíhún ɖé mɛ, bó ɖidó zɔ fí e mɛɖé ma ná mɔ ɛ ɖe ǎ é.” (Mat. 14:10-13) Amɔ̌, mɛ wɔ̌búwɔ́bú ɖé ko yi fí e jɛ zɔ bɔ é jló ná nɔ é cóbɔ é yi fí ɔ. (Mak. 6:31-33) Jezu mɔ ɖɔ yě ɖó hudó alɔdó kpó gbɔ e Mawu nɔ dó nú mɛ é kpó tɔn, énɛ́ wú ɔ, é yá wǔ jɛ alɔ dó yě jí.—Luk. 9:10, 11. w22.02 21-22 akpá. 4, 6

Ényí mǐ ɖ’ayi wú ɖɔ mǐ jɛ do nú nǔɖitɔ́ hǎtɔ́ ɖé ɔ, étɛ́ mǐ ka ɖó ná wa? Mǐ ɖó ná xo ɖɛ sɛ́dó Jexóva kpó ayi bǐ kpó. Mǐ sixú byɔ́ Jexóva ɖɔ é ní kɔn nyɔ̌ná dó gǎn e dó wɛ mǐ ɖe, bá dó hwɛ gbɔ xá nɔví mǐtɔn é jí. Mǐ ɖó ná lɛ́ ba hwenu, bo gbéjé mǐɖée kpɔ́n. Mǐ sixú lɛ́ kan nǔ lěhun lɛ́ byɔ́ mǐɖée: ‘Un ka ɖo gbesisɔmɛ, bo ná yí gbe ɖɔ hwɛ ce kún jɔ ó, lobo sɔ́ nyiɖée hwe bo dó kɛnklɛ́n bá dó hwɛ gbɔ a? Ényí un ɖe afɔ nukɔntɔn ó bá dó hwɛ gbɔ xá nɔví súnnu, alǒ nɔví nyɔ̌nu ce ɔ, nɛ̌ nǔ ka nɔ cí nú Jexóva kpó Jezu kpó?’ Xósin e mǐ ná ná nú nǔkanbyɔ́ énɛ́ lɛ́ é ná sísɛ́ mǐ bɔ mǐ ná ɖótó Jezu, bo sɔ́ mǐɖée hwe lobo sɛkpɔ́ nǔɖitɔ́ hǎtɔ́ mǐtɔn bá mɔ tɛn dó dó hwɛ gbɔ xá ɛ. Ényí mǐ yi nɔví mǐtɔn gɔ́n, bo ná ɖeɖɛ gbemanɔkpɔ́ ɖé kpó é kpó ɔ, mǐ ɖó ná wa mɔ̌ kpó mɛɖéesɔ́hwe kpó. (Efɛ́. 4:2, 3) Mǐ ɖó ná ɖɔ xó xá mɛ e mǐ jɛ do ná é, bo d’alɔ ɛ bónú é ná lɛ́ ɖó kancícá ɖagbe ɖé xá mǐ. Flín ɖɔ hwɛ dídó gbɔ xá nɔví towe ɖo tají tawun hú mɛ e sín hwɛ jɔ é kpó mɛ e sín hwɛ kú é kpó biba.—1 Kɔ. 6:7. w21.12 26-27 akpá. 13-16

Jezu ɖo aluwɛ mɛ, ɖó é tuun ɖɔ Jwifu lɛ́ gěgé kún ná yí wɛn Axɔ́súɖuto ɔ tɔn ó. Wǎgbɔ tɔn ɔ, è ná sú Jeluzalɛ́mu sín kún dó, bo ná bɛ́ Jwifu ɖěɖěe ná gán lɛ́ é yi kannumɔgbénu. (Luk. 21:20-24) É blá wǔ ɖɔ lěe Jezu ko ɖɔ gbɔn jɛ nukɔn é ɔ, mɛ lɛ́ gěgé gbɛ́ wɛn tɔn. Nɛ̌ mɛ lɛ́ ka nɔ yí wɛn Axɔ́súɖuto ɔ tɔn gbɔn ɖo fí e a nɔ nɔ é? Ényí mɛ kpɛɖé wɛ nɔ ɖótó wɛn towe ɔ, étɛ́ avǐ e Jezu ya é ka sixú kplɔ́n we? Nǔ mɛ lɛ́ tɔn nɔ ɖu ayi mɛ nú Jexóva. Avǐ e Jezu ya lɛ́ é nɔ flín mǐ lě do nǔ mɛ lɛ́ tɔn nɔ ɖu ayi mɛ nú Jexóva sɔ é. “É jló ɖɔ mɛ ɖěbǔ ní dɔn ǎ; é nyɔ́ wa ɔ, é jló ɖɔ mɛ bǐ ní mɔ ali, bo lɛ́ kɔ sín nǔnyanyawiwa gúdo.” (2 Pi. 3:9) Égbé ɔ, mǐ nɔ xlɛ́ ɖɔ mǐ yí wǎn nú mɛ e jlá wɛn ɔ wɛ mǐ ɖe lɛ́ é, gbɔn tíntɛ́nkpɔ́n bo ná d’alɔ yě hwebǐnu bónú yě ná kplɔ́n nǔ dó wɛn ɖagbe e kúnkplá Axɔ́súɖuto ɔ é wú gblamɛ.—Mat. 22:39. w22.01 16-17 akpá. 10-12

Ényí a nɔ lin tamɛ dó nǔ e Jexóva ko wa nú togun tɔn wá yi lɛ́ é kpó nǔ e é ko wa nú hwiɖésúnɔ mɛtún ɔ lɛ́ é kpó jí ɔ, nǔɖiɖi towe ná lí dǒ d’é jí. Éé ɖo tají hú gǎn é wɛ nyí ɖɔ wǎn e a yí nú Jexóva é ná gɔ́ngɔ́n. Jijɔ e ɖo tají hú gǎn, bo ná zɔ́n bɔ a ná se tónú nú Jexóva é wɛ nyí wǎnyíyí; é ná lɛ́ d’alɔ we bɔ a ná sá vɔ̌ e ná dó xomɛhunhun n’i lɛ́ é, lobo lɛ́ dɛ ɖo tagba ɖěbǔ nu. (Mat. 22:37-39; 1 Kɔ. 13:4, 7; 1 Jaan 5:3) Nǔ ɖěvo ɖěbǔ sɔ́ ɖo tají hú kancícá wǎnyíyí tɔn syɛ́nsyɛ́n ɖé ɖíɖó xá Jexóva ǎ! (Ðɛh. 63:2-8) Flín ɖɔ ɖɛxixo, nǔkplɔ́nkplɔ́n kpó tamɛ linlin kpó ɖo mawusinsɛn mǐtɔn mɛ. Jezu ɖɔhun ɔ, nɔ ba fí e ɖo tóó lɛ́ é, bo nɔ zán hwenu ɖó kpɔ́ xá Jexóva. Nyi alɔ nú nǔ e ma ɖo dandan ɖɔ yě ní fɛ́ ayi towe ǎ lɛ́ é. Ényí a ɖo alɔ ɖó ɖo azɔ̌ gbigbɔ tɔn lɛ́ mɛ wɛ hǔn, nɔ byɔ́ Jexóva ɖɔ é ní d’alɔ we bónú a ná sɔ́ ayi towe ɖó fí ɖokpó. Ényí a nɔ zán hwenu towe ganjí din ɔ, Jexóva ná sɔ́ gbɛ mavɔmavɔ dó d’ajɔ we.—Mak. 4:24. w22.01 31 akpá. 18-20

Linlin mǐtɔn lɛ́ sixú zɔ́n bɔ mǐ ná wa nǔ ɖagbe, alǒ nyanya. Nǔ e wú Jezu kplɔ́n mǐ ɖɔ mǐ ní nya linlin ɖěɖěe sixú dɔn mǐ dó hwɛhuhu mɛ lɛ́ é dó gbě é nɛ́. (Mat. 5:21, 22, 28, 29) É ɖo wɛn ɖɔ mǐ ba ɖɔ nǔ mǐtɔn ní nyɔ́ Tɔ́ mǐtɔn jǐxwé tɔn ɔ nukúnmɛ. Énɛ́ wú ɔ, é ɖo tají tawun ɖɔ mǐ ní nɔ yá wǔ nya linlin nyanya ɖěbǔ e nɔ wá ayi mɛ nú mǐ é dó gbě. Jezu ɖɔ: “Nǔ e tɔ́n sín gbɛtɔ́ nu mɛ ɔ, ayi tɔn mɛ wɛ é gosín.” (Mat. 15:18) Nǔgbó ɔ, xó e mǐ nɔ ɖɔ lɛ́ é nɔ ɖe nǔ gěgé xlɛ́ dó nǔ e mǐ nyí ɖo xomɛ é wú. Énɛ́ wú ɔ, nɔ kan byɔ́ hwiɖée: ‘É ná bó tlɛ nyí ɖɔ nǔgbóɖiɖɔ ná wa nǔ dó wǔ ce ɔ, un ka nɔ gbɛ́ ɖɔ un kún ná ɖó adingban ó a? Ðó un ko wlí alɔ wú ɔ, un ka nɔ cɔ́ nyiɖée bó ma wá jɛ alɔlwɛ́ ɖú xá mɛ e kpó nyi kpó ma ɖó mɛ̌ ɖokpó ɔ ǎ é jí ó a? Un ka nɔ nyi alɔ nú xó blíblí lɛ́ ɖiɖɔ bǐ mlɛ́mlɛ́ a? Un ka nɔ ɖɔ xó kpó gbe fífá kpó, hwenu e mɛɖé dó xomɛsin nú mì é a?’ A ná mɔ ɖɔ tamɛ linlin dó nǔkanbyɔ́ énɛ́ lɛ́ jí ná d’alɔ we tawun. Ényí a nɔ wa nǔ e wú a kpé lɛ́ é bǐ, bó nɔ nyi alɔ nú mɛzunzun, adingbanɖíɖó kpó xó blíblí lɛ́ ɖíɖɔ́ kpó ɔ, a ná mɔ ɖɔ gbɛtɔ́ xóxó ɔ ɖiɖe nyi ayǐ bɔkun tawun. w22.03 5-6 akpá. 12-14

Hwɛhwɛ ɔ, mɛ ɖěɖěe ma nɔ nɔ te bónú è ná wá ɖe wě xá yě ǎ, bɔ yěɖésúnɔ nɔ yi ba wěɖexámɛ lɛ́ é nɔ yi nukɔn tawun ɖo gbigbɔ lixo, hú mɛ ɖěɖěe ma nɔ yi ba wěɖexámɛ ǎ lɛ́ é. Énɛ́ wú ɔ, nɔ ɖe afɔ nukɔntɔn ɔ, bó nɔ yi ba wěɖexámɛ. Hwetɛ́nu mǐ ka sixú yi ba wěɖexámɛ ɖo nǔɖitɔ́ hǎtɔ́ mǐtɔn lɛ́ gɔ́n? Ninɔmɛ ɖé lɛ́ ɖíe: (1) Nɔví nyɔ̌nu ɖé byɔ́ nɔví nyɔ̌nu e ko mɔ nǔ kpɔ́n é ɖé ɖɔ é ní kplá émí yi Biblu kplɔ́nkplɔ́n ɖé domɛ, bɔ nukɔnmɛ ɔ, é wá ɖo wěɖexámɛ ba wɛ ɖo gɔ̌n tɔn dó lěe é sixú bló gbɔn bɔ wlɛnwín mɛkplɔ́nkplɔ́n tɔn tɔn lɛ́ ná lɛ́ kpɔ́n te d’é jí é wú. (2) Nɔví nyɔ̌nu tlɛnnɔ ɖé jló ná xɔ nǔzínzán ɖé lɛ́, énɛ́ wú ɔ, é ɖo kinkanbyɔ́ nɔví nyɔ̌nu mɛxómɔ ɖé wɛ ɖɔ é ní ɖɔ nǔ e é lin dó nǔzínzán e ná xɔ gbé wɛ émí ja lɛ́ é wú é nú émí. (3) È ɖe azɔ̌ nú nɔví súnnu ɖé bónú é ná xwlé xóɖiɖɔ nú mɛ lɛ́ bǐ tɔn nukɔntɔn ɔ mɛ. É byɔ́ xóɖɔtɔ́ e ko mɔ nǔ kpɔ́n é ɖé ɖɔ é ní ɖótó émí kpó sɔxwixwe kpó hwenu e émí ná ɖo xóɖiɖɔ ɔ xwlé mɛ wɛ é, bó ɖɔ lěe émí sixú wa nǔ gbɔn bɔ é ná lɛ́ kpɔ́n te d’é jí é nú émí. É ná nyɔ́ ɖɔ nɔví súnnu e tlɛ ko xwlé xóɖiɖɔ mɛ nú xwe mɔ̌kpán é ɖé ní nɔ kan nǔ byɔ́ nɔví súnnu e nɔ xwlé xóɖiɖɔ mɛ, bó ko mɔ nǔ kpɔ́n lɛ́ é, lobo nɔ xwedó wě e è ɖe xá ɛ lɛ́ é.—Nǔx. 19:20. w22.02 13 akpá. 15-17

Jexóva yí wǎn nú mǐ, bo nɔ lɛ́ kpé nukún dó mǐ wú, lěe é yí wǎn nú Jezu bo lɛ́ kpé nukún wǔ tɔn hwenu e é ɖo ayǐkúngban jí é gbɔn é. (Jaan 5:20) É sú nǔ e sín hudó Jezu ɖó ɖo gbigbɔ, lěe nǔ nɔ cí nú mɛ é kpó agbaza kpó lixo é bǐ sín do. Gɔ́ ná ɔ, Jexóva gɔn ɖiɖexlɛ́ Vǐ tɔn ɖɔ émí yí wǎn n’i, bɔ nǔ tɔn lɛ́ nyɔ́ nukún émítɔn mɛ ǎ. (Mat. 3:16, 17) Ðó Jezu tuun ɖɔ émí sixú gán jɛ Tɔ́ émítɔn jixwé tɔn wǎnyíyínɔ ɔ wú hwebǐnu wútu ɔ, é nɔ mɔ ɖɔ émí ɖo émíɖokpó gbeɖé ǎ. Jezu ɖɔhun ɔ, ali gěgé nu wɛ mǐ bǐ ko mɔ ɖɔ Jexóva yí wǎn nú mǐ ɖe. Lin tamɛ dó nǔ élɔ́ jí: Jexóva dɔn mǐ, bo lɛ́ ná mǐ xwédo gbigbɔ tɔn e ɖo bǔ, bɔ wǎnyíyí ɖ’é mɛ é ɖé, bónú mǐ ná ɖó awǎjijɛ, bo lɛ́ sú lěe nǔ nɔ cí nú mǐ é sín do. (Jaan 6:44) Jexóva lɛ́ ná mǐ nǔ e sín hudó mǐ ɖó bo ná kpo ɖo nǔɖiɖi mǐtɔn hɛn lí dǒ wɛ lɛ́ é bǐ. É tlɛ nɔ lɛ́ d’alɔ mǐ, bɔ mǐ nɔ mɔ dandannú gbɛ mɛ tɔn lɛ́. (Mat. 6:31, 32) Tamɛ linlin dó wǎn e Jexóva yí nú mǐ é jí nɔ zɔ́n bɔ wǎn e mǐ yí n’i é nɔ jɛjí. w21.09 22 akpá. 8-9

Cóbónú a ná jɛ Biblu kplɔ́n xá Kúnnuɖetɔ́ Jexóva tɔn lɛ́ jí ɔ, nɛ̌ gbɛ towe ka cí? Mǐ mɛ gěgé sɔ́ nɔ ba ná lin nǔ jɛ jí ǎ. Nǔ e gbɛ ɔ nɔ ylɔ́ ɖɔ nǔ ɖagbe kpó nǔ nyanya kpó é wɛ sixú ko nɔ xlɛ́ ali linlin kpó mɛ alɔkpa e mǐ nyí é kpó. Ényí mɔ̌ hǔn, mǐ “tuun Mawu ǎ; [mǐ] ka ɖo nukún ɖó nǔɖé wɛ ǎ; [mǐ] ɖo gbɛ ɔ mɛ kpowun.” (Efɛ́. 2:12) Amɔ̌, ée a jɛ Biblu kplɔ́n jí é ɔ, a mɔ ɖɔ émí ɖó Tɔ́ ɖé ɖo jǐxwé, bɔ é yí wǎn nú émí tawun. A ɖó ayi wú ɖɔ ényí nǔ émítɔn ná nyɔ́ Jexóva nukúnmɛ, bɔ émí ná lɛ́ nɔ mɛ e nɔ sɛn ɛ lɛ́ é mɛ ɔ, émí ɖó ná bló hǔzúhúzú tají lɛ́ ɖo gbɛzán émítɔn kpó lěe émí nɔ lin nǔ gbɔn é kpó mɛ. A ɖó ná kplɔ́n bá zán gbɛ sɔgbe xá nǔgbódodó jlɔ́jlɔ́ tɔn lɛ́. (Efɛ́. 5:3-5) Jexóva wɛ nyí Gbɛɖótɔ́ mǐtɔn, bó lɛ́ nyí Tɔ́ mǐtɔn jǐxwé tɔn ɔ, énɛ́ wú ɔ, é ɖ’acɛ bó ná ɖɔ lěe mɛsɛntɔ́ tɔn lɛ́ ɖó ná wa nǔ gbɔn é. Gɔ́ ná ɔ, é byɔ́ mǐ ɖɔ cóbónú mǐ ná bló batɛ́mu ɔ, mǐ ɖó ná dó gǎn syɛ́nsyɛ́n, bó “ɖe gbɛtɔ́ xóxó e [mǐ] nyí ɖ’ayǐ ɔ kpódó walɔ tɔn lɛ́ bǐ kpán nyi ayǐ.” w22.03 2 akpá. 1-3

Kpó xomɛhunhun kpó wɛ mɛ ɖěɖěe è ylɔ́ wá alɔwlíwlí ɖé domɛ lɛ é ná kpɔ́n lěe nǔ lɛ́ ná yi gbɔn ɖo alɔwlíwlí ɔ domɛ é. Mɔ̌ ɖokpó ɔ, kpó xomɛhunhun kpó wɛ lɛ̌ngbɔ́ ɖěvo lɛ́ nɔ wá Flǐn ɔ domɛ, bo ná dó kpɔ́n lěe nǔ lɛ́ ná yi gbɔn é. Lɛ̌ngbɔ́ ɖěvo lɛ́ lɔ nɔ dó nukún nukúnɖíɖó yětɔn mɛ kpɔ́n. Akpakpa nɔ ɖo yě sɔ́ wɛ dó xóɖiɖɔ Flǐn ɔ tɔn sise wú, ɖó akpáxwé gěgé nɔ kɛnu dó nǔ e Klísu kpó mɛ 144000 e ná kp’acɛ xá ɛ lɛ́ é kpó ná wa nú gbɛtɔ́ gbejínɔtɔ́ lɛ́ ɖo Axɔ́súɖuɖu Xwe Afatɔ́n tɔn ɔ hwenu é wú. Ðo hwenu e Axɔ́sú Jezu Klísu ná ɖo acɛ kpa wɛ é ɔ, mɛ ɖěɖěe ná kp’acɛ xá ɛ sín jǐxwé lɛ é ná d’alɔ bɔ ayǐkúngban ɔ bǐ ná húzú palaɖísi, lobo lɛ́ d’alɔ gbɛtɔ́ lɛ́ bónú yě ná húzú mɛ maɖóblɔ̌. Ényí gbɛtɔ́ lǐvi mɔ̌kpán e ɖo lɛ̌ngbɔ́ ɖěvo lɛ́ mɛ lɛ́ é yi Flǐn ɔ domɛ, lobo dó nukún sɔgúdo yětɔn mɛ kpɔ́n, hwenu e nǔɖɔɖayǐ Biblu tɔn lɛ́ ná ɖo jijɛnu wɛ é ɔ, énɛ́ ná sɔ́ akpakpa yě kpɔ́n! Nǔɖɔɖayǐ énɛ́ lɛ́ ɖé lɛ́ ɖo Ezayíi 35:5, 6; 65:21-23 kpó Nǔɖexlɛ́mɛ 21:3, 4 kpó mɛ. Ényí yě dó nukún gbɛ yɔ̌yɔ́ ɔ mɛ kpɔ́n, bɔ yě kpó mɛvívɛ́ yětɔn lɛ́ kpó ɖo kpɔ́ ɔ, énɛ́ ná hɛn nukúnɖíɖó sɔgúdo tɔn yětɔn lí dǒ, lobo lɛ́ ná hlɔ̌nhlɔ́n kán e yě kánɖéjí, bo ma ná jó Jexóva sinsɛn dó kpɔ́n gbeɖé ǎ é.—Mat. 24:13; Ga. 6:9. w22.01 21-22 akpá. 5-7

Étɛ́ ka nyí gbɛxixɔ ɔ? Ðo Akpáxwé Biblu tɔn e è wlán dó Glɛ̌kigbe mɛ é mɛ ɔ, gbɛxixɔ ɔ nɔ dó gesí axɔ́ e Jezu sú, bo dó vɔ́ nǔ e Adámu hɛn bú é xɔ é. (1 Kɔ. 15:22) Étɛ́wú mǐ ka ɖó hudó gbɛxixɔ ɔ tɔn? Ðó nǔgbódodó jlɔ́jlɔ́ Jexóva tɔn e tɔ́n ɖo Sɛ́n ɔ mɛ é ɖɔ ɖɔ gbɛ wɛ ná sú gbɛ xɔ́. (Tín. 21:23, 24) Adámu hɛn gbɛ maɖóblɔ̌ e é ɖó é bú. Jezu zé gbɛ maɖóblɔ̌ tɔn jó, bo ná dó wa nǔ sɔgbe xá hwɛjijɔ Mawu tɔn. (Hlɔ̌. 5:17) Énɛ́ wú ɔ, é húzú “Tɔ́ Tɛgbɛ tɔn” nú mɛ ɖěɖěe ɖi nǔ nú gbɛxixɔ ɔ lɛ́ é bǐ. (Eza. 9:5; Hlɔ̌. 3:23, 24) Jezu sɔ́ gbɛ tɔn dó sá vɔ̌ kpó jlǒ kpó ɖó wǎn ɖaxó e é yí nú Tɔ́ tɔn jǐxwé tɔn ɔ kpó mǐ kpó é wú. (Jaan 14:31; 15:13) Wǎnyíyí énɛ́ sísɛ́ ɛ, b’ɛ kánɖéjí bá nɔ gbejí káká jɛ kú, lobo wa jlǒ Tɔ́ tɔn tɔn yi fó. Mɔ̌ e é wa é zɔ́n bɔ linlin e Jexóva ɖó nú gbɛtɔ́ lɛ́ kpó ayǐkúngban ɔ kpó ɖo bǐbɛ́mɛ é ná jɛnu bǐ mlɛ́mlɛ́. w21.04 14-16 akpá. 2-3