XÓÐƆÐÓKPƆ́ ÐÉ BÍBƐ́
NǓKPLƆ́NKPLƆ́N 2
Nɔ ɖɔ xó nú é ní nɔ jɛ gan
Nǔgbódodó: “È ɖɔ xó nú é jɛ gan ɔ, é nɔ nyɔ́ tawun!”—Nǔx. 15:23.
Nǔ e Filípu wa é
1. Kpɔ́n VIDEO ɔ, alǒ xa Mɛsɛ́dó 8:30, 31. Énɛ́ gúdo hǔn, lin tamɛ dó nǔkanbyɔ́ élɔ́ lɛ́ jí:
Nɛ̌ Filípu ka bɛ́ xóɖɔɖókpɔ́ ɔ gbɔn?
Étɛ́wú lěe Filípu bɛ́ xóɖɔɖókpɔ́ xá nya ɔ bo má nǔgbó yɔ̌yɔ́ ɖé xá ɛ gbɔn nɛ́ é ka jɛ gan?
Étɛ́ kpɔ́ndéwú Filípu tɔn ka sixú kplɔ́n mǐ?
2. Ényí mǐ bló bónú xóɖɔɖókpɔ́ ɖé yi tiin bo jɛ gan ɔ, mɛ e kpó mǐ kpó ɖo xó ɔ ɖɔ ɖó kpɔ́ wɛ é ná ɖibla vo hú gǎn, bo ná lɛ́ ɖo gbesisɔmɛ, bá ɖɔ xó xá mǐ dó wɛn mǐtɔn jí.
Xwedó kpɔ́ndéwú Filípu tɔn
3. Nɔ ɖó ayi nǔ wú. Nukúnmɛ mɛɖé tɔn sín xlɛ̌, afɔ e bló wɛ é ɖe é kpó alɔ e bló wɛ é ɖe é kpó sixú ɖɔ nǔ gěgé. É ka cí ɖɔ mɛ ɔ ɖo gbesisɔmɛ bo ná ɖɔ xó xá we a? A sixú kan nǔ kléwún lěhun byɔ́ dó sɔ́ nǔgbó Biblu tɔn ɖé sín nu ɖó te: “Mi ka tuun ɖɔ . . . ?” Nú mɛɖé ma jló ná ɖɔ xó ǎ hǔn, ma zín jǐ tɔn ó.
4. Nɔ ɖó suúlu. Ma lin ɖɔ émí ɖó ná sɔ́ nǔgbó Biblu tɔn ɖé sín nu ɖó te tlóló tlóló ó. Nɔ te jɛ hwenu e ali tɔn ná hun nú we é, bo ná dó sixú xwlé nǔgbó Biblu tɔn mɛ ɔ, b’ɛ ná jɛ gan. Hweɖélɛ́nu ɔ, é sixú byɔ́ ɖɔ a ní nɔ te káká jɛ hweɖévonu e a ná ɖɔ xó ɖó kpɔ́ xá mɛ ɔ é.
5. Nɔ húzú alɔ. Xóɖɔɖókpɔ́ ɖé sixú wlí ali e a ma ɖó nukún tɔn ǎ é. Énɛ́ wú ɔ, ɖo gbesisɔmɛ bo ná má nǔ e sɔgbe xá mɛ ɔ é ɖé xá ɛ, ényí é ná bo tlɛ byɔ́ ɖɔ a ní jó nǔgbó Biblu tɔn e ɖo ayi mɛ nú we é dó, bo ɖɔ xó dó ɖěvo jí xá ɛ ɔ nɛ́.