Décembre

Axɔ́súzɔ́watɔ́ Etiopíinu ɔ ka ko ɖo gbesisɔmɛ dóó bá bló batɛ́mu a? Lin tamɛ kpɔ́n: Nya Etiopíinu ɔ, “Jeluzalɛ́mu wɛ é yi bo yi sɛn Mawu.” (Mɛ. 8:27) Énɛ́ wú ɔ, é cí ɖɔ é kún nyí Jwifu ó, é wá húzú nǔɖitɔ́ wɛ. É ɖo wɛn ɖɔ, é kplɔ́n nǔ dó Jexóva wú ɖo Nǔwlánwlán mímɛ́ Ebléegbe tɔn lɛ́ mɛ. É ɖo mɔ̌ có, é kpo ɖo biba wɛ vɛ́návɛ́ná bo ná kplɔ́n nǔ d’é jí. Nǔgbó ɔ, hwenu e Filípu xo go axɔ́súzɔ́watɔ́ énɛ́ ɖo ali jí é ɔ, gbeyíɖɔ Ezayíi sín wěma mlámlá xa wɛ é ɖe. (Mɛ. 8:28) É ba ná kpo ɖo nǔ kplɔ́n d’é jí wɛ. É nɔ zɔn ali sín Etiopíi bo nɔ yi káká Jeluzalɛ́mu bo nɔ yi sɛn Jexóva ɖo tɛ́npli mɛ. Filípu d’alɔ nya Etiopíinu ɔ, bɔ é kplɔ́n nǔgbó yɔ̌yɔ́ tají ɖé lɛ́, nǔgbó énɛ́ lɛ́ ɖokpó wɛ nyí ɖɔ Jezu wɛ nyí Mɛsíya ɔ. (Mɛ. 8:34, 35) Wǎnyíyí e é ɖó nú Jexóva kpó Vǐ tɔn kpó é jɛjí. Énɛ́ sísɛ́ ɛ bɔ é wá gbeta ɔ kɔn bo ná bló batɛ́mu, lobo húzú ahwanvú Jezu Klísu tɔn; gbeta tají ɖé kɔn wɛ nyí énɛ́ bɔ é wá. Mɔ e Filípu mɔ ɖɔ nya ɔ ɖo gbesisɔmɛ é zɔ́n bɔ é bló batɛ́mu n’i. w23.03 8-9 akpá. 3-6

Ényí mǐ nɔ ɖó adingban ɔ, nǔ mǐtɔn sixú nyɔ́ Jexóva nukúnmɛ ǎ. (Nǔx. 6:16-19) Nǔgbó wɛ ɖɔ mɛ gěgé nɔ mɔ ɖo égbé ɖɔ gbɛtɔ́ kún sixú gɔn adingban ɖó ó, amɔ̌, mǐdɛɛ lɛ́ nɔ nyi alɔ ná, ɖó Jexóva ɖɔ ɖɔ é kún nyɔ́ ó. (Ðɛh. 15:1, 2) Nǔgbó wɛ ɖɔ mǐ ɖó ná nyi alɔ nú adingban ɖíɖó bǐ mlɛ́mlɛ́, amɔ̌, mǐ ɖó ná lɛ́ cɔ́ mǐɖée, bo ná nyi alɔ nú xó agboɖe e ná zɔ́n bɔ mɛ ɖěvo lɛ́ ná wá gbeta nyanya lɛ́ kɔn é ɖiɖɔ. Mǐ ɖó ná lɛ́ nyi alɔ nú xó masɔgbe lɛ́ fúnfún fúnfún kpé dó mɛ ɖěvo lɛ́ wú. (Nǔx. 25:23; 2 Tɛ. 3:11) Ényí a ɖó ayi wú ɖɔ xóɖɔɖókpɔ́ ɖé jɛ xó e ma sɔgbe ǎ lɛ́ é sín ali mlɛ́ jí hǔn, jɛ xó ɖěvo e ná dó wǔsyɛ́n lanmɛ nú mɛ é ɖɔ jí. Ðó mǐ ɖo gbɛ e mɛ xó gblégblé lɛ́ gbɔn tó kɔ awɔn kɔ ɖe é mɛ wútu ɔ, mǐ ɖó ná wa nǔ e wú mǐ kpé é bǐ bo mɔ nǔ jɛ wú ɖɔ xó mǐtɔn lɛ́ nɔ nyɔ́ Jexóva nukúnmɛ. É ná kɔn nyɔ̌ná dó gǎn e dó wɛ mǐ ɖe kpó ayi bǐ kpó, bo ná zán nǔwúkpíkpé xóɖiɖɔ tɔn mǐtɔn dó kpa susu n’i ɖo ninɔmɛ élɔ́ lɛ́ mɛ é jí: ɖo sinsɛnzɔ́ ɔ mɛ, ɖo kplé lɛ́ jí kpó hwenu e mǐ nɔ ɖo xó ɖɔ ɖó kpɔ́ xá mɛ ɖěvo lɛ́ wɛ ayǐhɔ́ngbe ayǐhɔ́ngbe é kpó. Hwenu e Jexóva ná sú kún dó nú gbɛ nyanya élɔ́ é ɔ, susu kpikpa n’i kpó xó e mǐ nɔ ɖɔ lɛ́ é kpó ná bɔkun tawun hú gǎn.—Ju. 15. w22.04 9 akpá. 18-20

Ényí mǐ lin tamɛ dó lě do Jexóva kpó Jezu kpó yí wǎn nú mǐ sɔ é jí ɔ, é nɔ sísɛ́ mǐ bɔ mǐ lɔ nɔ yí wǎn nú yě. (1 Jaan 4:10) Tuuntuun ɖɔ mǐ mɛ ɖokpó ɖokpó takúnmɛ wɛ Jezu kú dó, nɔ zɔ́n bɔ wǎn e mǐ yí nú yě é nɔ lɛ́ jɛjí. Mɛsɛ́dó Pɔ́lu mɔ nukúnnú jɛ énɛ́ wú bo ɖe nǔsumɛnukúnmɛ xlɛ́ hwenu e é wlán xó élɔ́ lɛ́ sɛ́dó Galátinu lɛ́ é: “Mawu ví . . . yí wǎn nú mì, bo kú dó ta ce mɛ.” (Ga. 2:20) Gbɛxixɔ ɔ zɔ́n bɔ Jexóva dɔn we sɛkpɔ́ éɖée, bɔ énɛ́ zɔ́n bɔ a sixú nyí xɔ́ntɔn tɔn. (Jaan 6:44) Tuun e a tuun ɖɔ Jexóva mɔ nǔ ɖagbe ɖé ɖo ayi towe mɛ, bo sú axɔ́ ɖaxó ɖé bónú a ná dó sixú nɔ xɔ́ntɔn tɔn lɛ́ mɛ é víví nú we tawun ǎ cé? Énɛ́ ná hlɔ̌nhlɔ́n wǎn e a yí nú Jexóva kpó Jezu kpó é ǎ cé? É ná nyɔ́ ɖɔ mǐ ní nɔ kanbyɔ́ mǐɖée ɖɔ: ‘Étɛ́ wǎnyíyí énɛ́ ka ɖó ná sísɛ́ mì bɔ un ná wa?’ Wǎn e mǐ yí nú Mawu kpó Klísu kpó é nɔ sísɛ́ mǐ bɔ mǐ nɔ ɖe wǎnyíyí xlɛ́ mɛ ɖěvo lɛ́.—2 Kɔ. 5:14, 15; 6:1, 2. w23.01 28 akpá. 6-7

Azɔ̌wanú tají ɖé wɛ Biblu nyí bɔ Jexóva nɔ zán dó d’alɔ togun tɔn, bónú “yě ná ɖó gbe kpɔ́ bo sɛn ɛ” Jexóva bló bɔ akpáxwé Biblu tɔn gěgé tíin lobɔ mɛɖéesɔ́hwetɔ́ ɖěɖěe nɔ xa lɛ́ é kɛ́ɖɛ́ jɛ́n sixú mɔ nukúnnú jɛ mɛ. (Luk. 10:21) Fí lɛ́ bǐ wɛ mɛ lɛ́ nɔ xa Biblu ɖe. Amɔ̌, mɛ e nɔ sɔ́ yěɖée hwe lɛ́ é kɛ́ɖɛ́ jɛ́n nɔ mɔ nukúnnú jɛ nǔ e yě xa é mɛ, bo nɔ lɛ́ zán. (2 Kɔ. 3:15, 16) Mǐ nɔ lɛ́ kplɔ́n nǔ dó nǔnywɛ́ Jexóva tɔn wú ɖo Biblu mɛ, ɖo ali ɖěvo nu. É nyí mǐ bǐ wɛ Jexóva nɔ xo kplé bo nɔ zán Xó tɔn dó kplɔ́n nǔ kpowun ǎ, é nɔ lɛ́ kplɔ́n nǔ mǐ mɛ ɖokpó ɖokpó, bo nɔ lɛ́ dó gbɔ nú mǐ. Ényí mǐ ɖo Xó Mawu tɔn xa wɛ ɔ, mǐ sixú mɔ lěe nǔ mǐ mɛ ɖokpó ɖokpó tɔn nɔ ɖu ayi mɛ n’i gbɔn é. (Eza. 30:21) Azɔn nabí a ka nɔ sɔ́ Biblu bo nɔ xa wěmafɔ ɖé, cí nǔ ɖɔ hwiɖokpónɔ wɛ è wlán ná ɖɔhun? Nǔgbó ɔ, Biblu nɔ dɔn gbɛtɔ́ lǐvi mɔ̌kpán. Nɛ̌ nǔ e sín hudó a ɖó din lɛ́ é pɛ́pɛ́pɛ́ ka sixú ɖo Biblu mɛ gbɔn? Nǔ nyí mɔ̌, ɖó mɛ e ɖó nǔnywɛ́ hú gǎn ɖo wɛ̌kɛ́ ɔ mɛ é wɛ nyí Dǒwátɔ́ tɔn wútu.—2 Tim. 3:16, 17. w23.02 4-5 akpá. 8-10

Ðó mǐ nyí klisánwun nǔgbó lɛ́ wútu ɔ, mǐ yí wǎn nú Jexóva tawun. Mǐ ba ná ná nǔ ɖagbe hú gǎn e mǐ ɖó lɛ́ é Jexóva. Amɔ̌, cóbónú mǐ ka ná kpé nǔ énɛ́ wú bǐ mlɛ́mlɛ́ ɔ, é byɔ́ ɖɔ mǐ ní nya nǔɖé lɛ́ gbé ɖo gbigbɔ lixo, ɖi nǔ sísɔ́ nú jijɔ klisánwun tɔn lɛ́, kplɔ́nkplɔ́n bónú alɔ ní bí nú mɛ ɖo nǔ tawun tawun ɖé lɛ́ wiwa kɔn kpó ali e nu mǐ sixú wa devízɔ́ nú mɛ ɖěvo lɛ́ ɖe lɛ́ é biba kpó. Étɛ́wú nukɔnyiyi ɖo gbigbɔ lixo ka ɖó ná nɔ ɖu ayi mɛ nú mǐ? Jɛ nukɔn hwɛ̌ ɔ, mǐ ba ɖɔ nǔ mǐtɔn ní nyɔ́ Tɔ́ mǐtɔn jǐxwé tɔ́n wǎnyíyínɔ ɔ nukúnmɛ wɛ zɔ́n. Ényí Jexóva mɔ bɔ mǐ ɖo nǔwúkpíkpé mǐtɔn lɛ́ zán wɛ bǐ mlɛ́mlɛ́ ɖo sinsɛnzɔ́ tɔn mɛ ɔ, xomɛ nɔ hun i. Gɔ́ ná ɔ, mǐ ba ná yi nukɔn ɖo gbigbɔ lixo, bo ná dó sixú lɛ́ d’alɔ nɔví mǐtɔn lɛ́ d’é jí. (1 Tɛ. 4:9, 10) Nú mǐ ná bo tlɛ ɖo nǔgbó ɔ mɛ bɔ é ma sɔ́ hwe ǎ ɔ, mǐ bǐ sixú yi nukɔn ɖo gbigbɔ lixo. w22.04 22 akpá. 1-2

Ðo malínmálín mɛ ɔ, acɛkpikpa ɖěɖěe ɖo gbɛ ɔ mɛ lɛ́ é ná tɔ́n ahwan Babilɔ́nu Ðaxó ɔ, éé nyí kplékplé sinsɛn nǔvú lɛ́ bǐ tɔn é. Wuntun e ná xlɛ́ ɖɔ ya ɖaxó ɔ bɛ́ é nɛ́. Amɔ̌, énɛ́ ka ná zɔ́n bɔ mɛ gěgé ná jɛ Jexóva sɛn jí wɛ a? Éǒ! É nyɔ́ wa ɔ, Nǔɖexlɛ́mɛ wěmata 6gɔ́ ɔ xlɛ́ ɖɔ ɖo táan syɛ́nsyɛ́n énɛ́ mɛ ɔ, mɛ ɖěɖěe ma ɖo Jexóva sɛn wɛ ǎ lɛ́ é ná ba alɔcyɔ́nmɛjí tutomɛ toxóɖiɖɔ kpó ajɔ̌wiwa kpó tɔn gbɛ ɔ tɔn e è sɔ́ jlɛ́ dó só wú lɛ́ é tɔn. Ðó mɛ énɛ́ lɛ́ wá gbeta ɔ kɔn bo nɔ gǔdo nú Axɔ́súɖuto Mawu tɔn ǎ wútu ɔ, Jexóva ná mɔ ɖɔ yě klán gbe xá émí. (Luk. 11:23; Nǔɖe. 6:15-17) Nǔgbó ɔ, mɛsɛntɔ́ gbejínɔtɔ́ Jexóva tɔn lɛ́ ná gbɔn vo ɖo táan énɛ́ lɛ́ e ná syɛ́n tawun é mɛ. Yě jɛ́n ná kpo ɖo gbɛ̌ta ɖokpó géé e ɖo ayǐkúngban ɔ jí, bo ɖo Jexóva Mawu sɛn wɛ, lobo lɛ́ gbɛ́ ɖɔ émí kún ná nɔ gǔdo nú “kanlin ɔ” ó lɛ́ é nyí wɛ.—Nǔɖe. 13:14-17. w22.05 16-17 akpá. 8-9

“Wɛn ɖagbe Axɔ́súɖuto ɔ tɔn” kɛ́ɖɛ́ wɛ nyí wɛn e togun Mawu tɔn ɖó ná jlá é ǎ. (Mat. 24:14) Yě ɖó ná lɛ́ nɔ gǔdo nú azɔ̌ e wa wɛ wɛnsagun lɛ́ ɖe bɔ è ɖɔ xó tɔn ɖo Nǔɖexlɛ́mɛ wěmata 8 jɛ 10 mɛ lɛ́ é. Wɛnsagun énɛ́ lɛ́ ɖo awě ɖěbɔdóɖěwú e ná xo mɛ ɖěɖěe klán gbe xá Axɔ́súɖuto Mawu tɔn lɛ́ é jlá wɛ. Énɛ́ wú ɔ, Kúnnuɖetɔ́ Jexóva tɔn lɛ́ ko ɖo wɛn hwɛɖónúmɛ tɔn e è sɔ́ jlɛ́ dó “kɛ́njí kpó myɔ kpán” wú é jlá wɛ; wɛn énɛ́ ɖe hwɛ e Mawu ná ɖó nú akpáxwé vovo gbɛ nyanya Satáan tɔn tɔn lɛ́ é xlɛ́. (Nǔɖe. 8:7, 13) Mɛ lɛ́ ɖó ná tuun ɖɔ vivɔnu ɔ ko ɖo kɛ́nnɛ́kɛ́nnɛ́, bo ná dó sixú yá wǔ bló hǔzúhúzú lɛ́ ɖo gbɛzán yětɔn mɛ, bá gán ɖo xomɛsinzán Jexóva tɔn gbe. (Sof. 2:2, 3) Amɔ̌, mɛ lɛ́ nɔ yí wǎn nú wɛn énɛ́ ǎ. Énɛ́ wú ɔ, é ná byɔ́ akɔ́nkpinkpan ɖo mǐ sí, cóbɔ mǐ ná jlá wɛn énɛ́. Ðo ya ɖaxó ɔ hwenu ɔ, wɛn hwɛɖónúmɛ tɔn gǔdo tɔn ɔ tlɛ ná dó xomɛsin nú mɛ lɛ́ hú gǎn.—Nǔɖe. 16:21. w22.05 7 akpá. 18-19

Mi ní ɖɔ ɖɔ asú kpó asi kpó klisánwun ɖé húzú mɛjitɔ́. Ðo xwe lɛ́ vlamɛ ɔ, yě sixú ko se xóɖiɖɔ gěgé dó lěe yě ná kplɔ́n vǐ lɛ́ gbɔn é wú. Amɔ̌, vo wɛ yě ná mɔ nǔgbódodó énɛ́ lɛ́ gbɔn din. Zaanɖé din ɔ, yě lɔmɔ̌ ná ɖó vǐ yěɖésúnɔ tɔn bo ná kplɔ́n. Azɔ̌ kpinkpɛn ɖé wɛ nyí azɔ̌ énɛ́! É ɖo wɛn ɖɔ ninɔmɛ yɔ̌yɔ́ lɛ́ sixú zɔ́n bɔ lěe mǐ mɔ nukúnnú jɛ nǔgbódodó Biblu tɔn lɛ́ mɛ gbɔn ɖ’ayǐ é ná lɛ́ kpɔ́n te d’é jí. Nǔ e wú mɛsɛntɔ́ Jexóva tɔn lɛ́ nɔ xa Mawuxówéma ɔ é ɖokpó nɛ́; gɔ́ ná ɔ, lěe è byɔ́ axɔ́sú Izlayɛ́li tɔn lɛ́ gbɔn é ɔ, yě ná nɔ lin tamɛ dó nǔ e yě xa lɛ́ é jí “hwebǐnu” ɖo gbɛzán yětɔn mɛ. (Sɛ́n. 17:19) Mɛjitɔ́ lɛ́ mi, wǔjɔmɛ ɖaxó hú gǎn e Klisánwun ɖé sixú ɖó é ɖokpó wɛ mi ɖó, énɛ́ wɛ nyí ɖɔ mi ná kplɔ́n nǔ vǐ mitɔn lɛ́ dó Jexóva wú. Amɔ̌, mi ba ná wa nǔ hú nǔgbó ɖěɖěe kúnkplá Mawu mǐtɔn é kpínkplɔ́n yě kpowun. Mi ba ná d’alɔ vǐ mitɔn lɛ́ bɔ yě ná yí wǎn nú Jexóva kpó ayi yětɔn bǐ kpó. w22.05 26-27 akpá. 2-3

Ali nyanya e mǐ mlɛ́ é, alǒ hwɛ e mǐ hu é vɛ́ nú mǐ kpowun ko kpé ǎ. Mǐ ɖó ná ɖo gbesisɔmɛ bá wa nǔ. Nǔ tají ɖěvo e Jexóva nɔ gbéjé kpɔ́n hwenu e é ɖo gbeta ɔ kɔn wá wɛ bá sɔ́ hwɛ kɛ mɛ é wɛ nyí hǔzúhúzú e è bló é. Hǔzúhúzú bíbló sín tínmɛ wɛ nyí “è ní dó gǔdo fɔ.” Ðo xógbe ɖěvo mɛ ɔ, mɛ ɔ ɖó ná jó gbɛ nyanya e zán wɛ é ɖe é dó, bo jɛ nǔ wa jí lěe Jexóva ba gbɔn é. (Eza. 55:7) Mɛ ɔ ɖó ná húzú lěe é nɔ lin nǔ gbɔn é, énɛ́ ɔ, linlin e Jexóva nɔ ɖó dó nǔ lɛ́ wú é ná nɔ xlɛ́ ali i. (Hlɔ̌. 12:2; Efɛ́. 4:23) É ɖó ná kán ɖ’é jí bo ná ɖó lěe é nɔ lin nǔ, bo nɔ lɛ́ wa nǔ gbɔn ɖ’ayǐ bɔ é ma sɔgbe ǎ lɛ́ é te. (Koló. 3:7-9) É ɖo wɛn ɖɔ, nǔ e mǐ ɖi nú vɔ̌ e Klísu sá é wɛ nyí hwɛjijɔ tají e jí Jexóva nɔ zɔn dó dó sɔ́ hwɛ kɛ mǐ, bo nɔ lɛ́ lɛ mǐ wé sín hwɛ mǐtɔn lɛ́ mɛ é. Ényí Jexóva mɔ ɖɔ mǐ ɖo gǎn e wú mǐ kpé é bǐ dó wɛ bo ná húzú zǐnzán mǐtɔn ɔ, é ná zɔn dó vɔ̌sísá énɛ́ wú, dó sɔ́ hwɛ kɛ mǐ.—1 Jaan 1:7. w22.06 6-7 akpá. 16-17

Sín hwenu e Adámu kpó Ɛvu kpó fɔ́n gǔ dó Jexóva jí é ɔ, gbɛtɔ́ lɛ́ nɔ xo dǎka yěɖée wú. (Nǔt. 8:9) Ði kpɔ́ndéwú ɔ, mɛ lɛ́ nɔ zán acɛ e yě ɖó lɛ́ é nyi do; wɔ̌nxogbɛwútɔ́ lɛ́ nɔ wa alǎnnú mɛ lɛ́ wú; ɖo wěmaxɔ lɛ́ mɛ ɔ, nǔɖɔbamɛtɔ́ lɛ́ nɔ zun wěmaxɔmɛvígbɛ́ yětɔn lɛ́, lobo nɔ lɛ́ gblɔ́n adǎn nú yě, bɔ mɛɖé lɛ́ tlɛ nɔ ɖú zǐngídi xá mɛ e ɖo xwédo yětɔn mɛ lɛ́ é. Énɛ́ wú ɔ, gbɛtɔ́ ná ɖi xɛsi nú nɔzo tɔn ɔ, nǔ ɖo gaan wɛ. Nɛ̌ Satáan ka nɔ tɛ́n kpɔ́n bo nɔ zán xɛsi ɖi nú gbɛtɔ́ dó wa nǔ dó mǐ wú gbɔn? Satáan nɔ tɛ́n kpɔ́n bo ná bló bɔ mǐ ná ɖi xɛsi nú gbɛtɔ́ lɛ́ káká bo ná gɔn wɛn ɖagbe ɔ jlá, alǒ gɔn nǔ ɖěvo e Jexóva byɔ́ mǐ lɛ́ é wa. Satáan nɔ sísɛ́ acɛkpikpa lɛ́ bɔ yě nɔ ɖó azɔ̌ mǐtɔn te, bo nɔ lɛ́ klán gbe xá mǐ. (Luk. 21:12) Gbɛ Satáan tɔn sín tutomɛ vovo lɛ́ nɔ fúnfún adingbanxó baɖabaɖa lɛ́ kpé dó Kúnnuɖetɔ́ Jexóva tɔn lɛ́ wú. Mɛ e ɖi nǔ nú adingbanxó énɛ́ lɛ́ é sixú nɔ cá nú mǐ, alǒ tlɛ xo dǎka mǐ wú. (Mat. 10:36) Wlɛnwín ɖěɖěe Satáan nɔ zán lɛ́ é nɔ kpácá mǐ wɛ a? Ðěbǔ lɔ ǎ. Sín xwe kanweko nukɔntɔn ɔ mɛ wɛ é ko ɖo wlɛnwín énɛ́ lɛ́ zán wɛ.—Mɛ. 5:27, 28, 40. w22.06 16-17 akpá. 10-11

Mɛ̌ mɛ̌ e ka ná ɖo “mɛ gěgé” e è ná dɔn wá nǔ jlɔ́jlɔ́ li jí lɛ́ é mɛ? Mɛ ɖěɖěe è ná fɔ́n sín kú lɛ́ é kpó mɛ ɖěɖěe ná xo Aamagedɔ́ni zlɛ́ lɛ́ é kpó, gɔ́ nú vǐ ɖěbǔ e è sixú ji ɖo gbɛ yɔ̌yɔ́ ɔ mɛ lɛ́ é ná ɖo mɛ énɛ́ lɛ́ mɛ. Ðo xwe 1000 ɔ sín vivɔnu ɔ, mɛ e ɖo gbɛ ɖo ayǐkúngban jí lɛ́ é bǐ ná húzú mɛ maɖóblɔ̌. Mǐ ɖó ná flín ɖɔ, é kún nyí ɖɔ mɛɖé nyí mɛ maɖóblɔ̌ wɛ ná zɔ́n bɔ é ná mɔ gbɛ mavɔmavɔ ɔ afɔjí afɔjí ó. Flín Adámu kpó Ɛvu kpó. Mɛ maɖóblɔ̌ wɛ nú yě có, yě ka ɖó ná xlɛ́ ɖɔ émí nɔ se tónú nú Jexóva Mawu cóbó ná nɔ gbɛ káká sɔ́yi. É ka blá wǔ ɖɔ yě kún kpé wú bo se tónú n’i ó. (Hlɔ̌. 5:12) Ðó mɛ bǐ ná húzú mɛ maɖóblɔ̌ ɖo vivɔnu xwe 1000 ɔ tɔn wútu ɔ, mɛ maɖóblɔ̌ énɛ́ lɛ́ bǐ ka ná nɔ gǔdo nú acɛkpikpa Jexóva tɔn bǐ mlɛ́mlɛ́ káká sɔ́yi a? Alǒ mɛɖé lɛ́ ná wa nǔ Adámu kpó Ɛvu kpó, éé nyí mɛ maɖóblɔ̌ cóbó ka gɔn gbejí nɔ é ɖɔhun wɛ a? É byɔ́ ɖɔ è ní ná xósin nú nǔkanbyɔ́ énɛ́ lɛ́. w22.09 22-23 akpá. 12-14

Ényí a kpɔ́n ninɔmɛ e mɛ gbɛ ɔ ɖe ɖo égbé é ɔ, é ka nɔ vɛ́ wǔ nú we bónú a ná ɖi ɖɔ nǔ lɛ́ ná wá kpɔ́n te gbe ɖokpó wɛ a? Mɛ ɖěɖěe ɖo xwédo ɖokpó ɔ mɛ lɛ́ é sɔ́ nɔ yí wǎn nú yěɖée, lěe é ko nɔ nyí gbɔn é ǎ. Dǎkaxixo kpó cejɛ́nnábí kpó mɛ lɛ́ tɔn fɔ́n ɔ, jijɛjí wɛ jɛ́n é nɔ ɖe. É nɔ vɛ́ wǔ nú mɛ gěgé bónú yě ná ɖeji dó mɛ e ɖo tɛn acɛkpikpa tɔn mɛ lɛ́ é wú. Amɔ̌, ninɔmɛ énɛ́ lɛ́ sixú ná mǐ gǎnjɛwú ɖɔ nǔ lɛ́ ná wá kpɔ́n te. Aniwú? Ðó mɛ lɛ́ ɖo nǔ wa wɛ pɛ́pɛ́pɛ́ lěe nǔɖɔɖayǐ Biblu tɔn e kúnkplá “azǎn gǔdo gúdo” tɔn lɛ́ é tají ɖokpó ɖɔ gbɔn é. (2 Tim. 3:1-5) Gbɛtɔ́ ayijlɔ́jlɔ́nɔ ɖě sixú ɖɔ ɖɔ nǔɖɔɖayǐ énɛ́ lɛ́ kún ɖo jijɛnu wɛ ó ǎ; gɔ́ ná ɔ, nǔɖɔɖayǐ énɛ́ lɛ́ e ɖo jijɛnu wɛ é xlɛ́ ɖɔ Klísu Jezu ko húzú Axɔ́sú nú Axɔ́súɖuto Mawu tɔn. Amɔ̌, nǔɖɔɖayǐ tootóbú e kúnkplá Axɔ́súɖuto ɔ lɛ́ é ɖokpó kpowun wɛ énɛ́ nyí. Lěe mɛ e nɔ tɔ avɔ é ɖé nɔ tɔ avɔxwɛ e é sɛ́n lɛ́ é bɔ é nɔ húzú awu blěbú ɖokpó gbɔn é ɔ, mɔ̌ wɛ nǔɖɔɖayǐ vovo lɛ́ xlɛ́ nyi wɛn ɖɔ vivɔnu ɔ ko ɖo kɛ́nnɛ́kɛ́nnɛ́, lěe Jexóva ko d’akpá tɔn gbɔn é nɛ́. w22.07 2 akpá. 1-2

Ðo jɛmɛjí Covid-19 ɔ hwenu ɔ, è ɖe wě e za wě lɛ́ é xá mǐ dó lěe mǐ ná nɔ bló kplé mǐtɔn lɛ́ gbɔn é kpó lěe mǐ ná nɔ wa wɛnɖagbejíjlázɔ́ mǐtɔn gbɔn é kpó wú. É sɔ́ lín ɖěbǔ ǎ bɔ mǐ jɛ kplé klisánwun tɔn lɛ́ kpó kpléɖókpɔ́ lɛ́ kpó bló jí gbɔn kan jí. Gɔ́ ná ɔ, wěma wínwlán sɛ́dó mɛ kpó alǒkan zínzán kpó wɛ wá nyí wlɛnwín tají e mǐ nɔ zán dó ɖɔ mawuxó ná é. Jexóva kɔn nyɔ̌ná dó gǎndídó mǐtɔn lɛ́ jí. Alaxɔ gěgé ɖó gbe ɖɔ kɛ́n wɛnjlátɔ́ lɛ́ tɔn jɛjí tawun. Nǔgbó ɔ, mɛ gěgé ɖu nǔ e dó wǔsyɛ́n lanmɛ nú mɛ lɛ́ é sín vǐví ɖo hwe énɛ́ nu. Mɛɖé lɛ́ sixú ko mɔ ɖɔ tutoblónúnǔ ɔ sín ayi ɖo te dín dó jɛmɛjí ɔ wú. Amɔ̌, azɔn mɔ̌kpán wɛ mǐ ko mɔ vaan ɖɔ wě e nǔnywɛ́ kpé lɛ́ é wɛ é nɔ ɖe xá mǐ. (Mat. 11:19) Gɔ́ ná ɔ, ényí mǐ nɔ lin tamɛ dó ali e nu Jezu nɔ xlɛ́ ali togun tɔn kpó wǎnyíyí kpó ɖe é jí ɔ, mǐ nɔ ɖeji ɖɔ gbɛ ná bo wá gbɔn ɖěbǔ ɔ, Jexóva kpó Vǐ vívɛ́ná tɔn kpó ná nɔ kpɔ́ xá mǐ.—Ebl. 13:5, 6. w22.07 13 akpá. 15-16

Gɔ́ nú susu kpikpa nú Jexóva ɔ, mǐ ɖó ná nɔ dó kú n’i ɖó nǔjíwǔ tootóbú e é bló lɛ́ é wú ɖo ɖɛ mǐtɔn lɛ́ mɛ. Ði kpɔ́ndéwú ɔ, mǐ sixú nɔ dó kú n’i ɖó nǔ élɔ́ lɛ́ wú: sinmɛ ɖaaɖagbe e folówa e mǐ nɔ mɔ lɛ́ é ɖó é, nǔɖuɖu víví maxamaxa lɛ́, gɔ́ nú awǎjijɛ e mǐ nɔ mɔ ɖó xɔ́ntɔn vívɛ́ e mǐ zun lɛ́ é wú é. Tɔ́ wǎnyíyínɔ ɔ ná mǐ nǔ énɛ́ lɛ́ kpó gěgé ɖěvo lɛ́ kpó, bónú mǐ ní ɖó awǎjijɛ. (Ðɛh. 104:12-15, 24) Tají hú bǐ ɔ, mǐ nɔ dó kú nú Jexóva nú nǔɖuɖu gbigbɔ tɔn tootóbú e é nɔ ná mǐ lɛ́ é kpó nukúnɖíɖó jí wǔ sɔgúdo tɔn e mǐ ɖó é kpó. É sixú bɔ wǔ tawun bɔ mǐ ná nɔ wɔn bo gɔn kú dó nú Jexóva ɖó nǔ tootóbú e é nɔ bló nú mǐ lɛ́ é wú. Étɛ́ ka sixú d’alɔ mǐ bɔ mǐ ná nɔ flín? Mǐ sixú nɔ wlán nǔ tawun tawun e mǐ byɔ́ ɖo ɖɛ mɛ lɛ́ é ɖ’ayǐ, bɔ sín hweɖénu jɛ hweɖénu ɔ, mǐ ná nɔ yi kpɔ́n, bo ná dó tuun lěe Jexóva ná xósin nú yě gbɔn é. Énɛ́ gúdo hǔn, xo ɖɛ bo dó kú nú Jexóva ɖó alɔ e é dó we é wú.—Koló. 3:15. w22.07 22-23 akpá. 8-9

Mǐ tuun ɖɔ nǔgbó ɔ kplɔ́nkplɔ́n kpowun kún ko kpé ó. Bo ná dó ɖu le tɔn bǐ mlɛ́mlɛ́ ɔ, mǐ ɖó ná nɔ zán gbɛ sɔgbe xá nǔgbó ɔ, énɛ́ wɛ nyí ɖɔ mǐ ɖó ná nɔ zán nǔ e kplɔ́n wɛ mǐ ɖe lɛ́ é ɖo gbɛzán mǐtɔn mɛ. Mɔ̌ jɛ́n mǐ ɖó ná wa cóbó ná ɖó awǎjijɛ jɔ awǎjijɛ ɔ. (Ja. 1:25) Nɛ̌ mǐ ka sixú wa gbɔn bo kú d’é jí ɖɔ mǐ ɖo gbɛ zán wɛ sɔgbe xá nǔgbó ɔ? Nɔví súnnu ɖokpó ɖɔ ɖɔ mǐ ɖó ná nɔ gbéjé mǐɖée kpɔ́n, bo ná kpɔ́n ali ɖěɖěe nu nǔ lɛ́ ɖo yiyi ɖe wɛ ganjí é kpó ali ɖěɖěe nu mǐ ba ná bló hǔzúhúzú ɖe lɛ́ é kpó. Mɛsɛ́dó Pɔ́lu ɖe énɛ́ xlɛ́ gbɔn lě: “Nǔ ɖěbǔ ná bo ɖo jijɛ wɛ hǔn, mi nú mǐ nǎ wlí ali e jí mǐ ko ɖe káká jɛ din ɔ ɖidó fí e mǐ xwe é.” (Filí. 3:16) Ényí mǐ wa nǔ e wú mǐ kpé lɛ́ é bǐ, bo ɖo “nǔgbó ɔ sín ali xwedó wɛ” ɔ, dǒ nukún le ɖěɖěe é nɔ hɛn wá lɛ́ é mɛ kpɔ́n! Jijɔ mǐtɔn lɛ́ nɔ kpɔ́n te d’é jí, lobɔ mǐ nɔ lɛ́ bló bɔ xomɛ nɔ hun Jexóva kpó nǔɖitɔ́ hǎtɔ́ mǐtɔn lɛ́ kpó. (Nǔx. 27:11; 3 Jaan 4) Hwɛjijɔ ɖagbe hú gǎn e wú mǐ nɔ yí wǎn nú nǔgbó ɔ, bo nɔ lɛ́ ɖo nǔgbó ɔ sín ali xwedó wɛ é nɛ́. w22.08 19 akpá. 16-18

Nɛ̌ mɛxó agun tɔn lɛ́ ka sixú ɖe xlɛ́ ɖɔ yě yí wǎn nú Jexóva kpó Jezu kpó gbɔn? Ali tají e nu yě sixú wa mɔ̌ ɖe é wɛ nyí ɖɔ yě ná nɔ kpé nukún dó hudó lɛ̌ngbɔ́ Jezu tɔn lɛ́ tɔn wú. (1 Piyɛ́ɛ 5:1, 2) Jezu ɖe énɛ́ xlɛ́ nyi wɛn nú mɛsɛ́dó Piyɛ́ɛ. Ée Piyɛ́ɛ gbɛ́ Jezu azɔn atɔn gúdo é ɔ, é lɛ́ ba vɛ́návɛ́ná bá xlɛ́ Jezu ɖɔ émí yí wǎn n’i. Ée Jezu fɔ́n sín kú gúdo é ɔ, é kanbyɔ́ Piyɛ́ɛ ɖɔ: “Sinmɔ́ɔ Jaan ví, a yí wǎn nú mì a?” Mǐ sixú kú d’é jí ɖɔ Piyɛ́ɛ ná ko wa nǔ e wú é kpé é bǐ dó xlɛ́ Gǎn tɔn ɖɔ émí yí wǎn n’i. Jezu ɖɔ nú Piyɛ́ɛ ɖɔ: “Kpé nukún dó lɛ̌ngbɔ́ví ce lɛ́ wú.” (Jaan 21:15-17) Nǔgbó ɔ, nú gbɛhwenu Piyɛ́ɛ tɔn e kpo é bǐ ɔ, é kpé nukún dó lɛ̌ngbɔ́ Aklúnɔ tɔn lɛ́ wú kpó wǎnyíyí kpó, dó ɖe xlɛ́ ɖɔ émí yí wǎn nú Jezu. Mɛxó agun tɔn lɛ́ mi, nɛ̌ mi ka sixú ɖe xlɛ́ ɖɔ xó e Jezu ɖɔ nú Piyɛ́ɛ lɛ́ é ɖo tají tawun nú mi gbɔn? Ényí mi nɔ ɖ’alɔ ɖo mɛbakpɔ́n lɛ̌ngbɔ́nyitɔ́ tɔn mɛ hwɛhwɛ, bo nɔ lɛ́ dó gǎn bǔnɔ ɖé dó d’alɔ mɛ ɖěɖěe awakanmɛ ko kú lɛ́ é bónú yě ní lɛ́ kɔ wá Jexóva gɔ́n hǔn, lě do mi yí wǎn nú Jexóva kpó Jezu kpó sɔ é ɖe xlɛ́ wɛ mi ɖe mɔ̌ nɛ́.—Ezek. 34:11, 12. w23.01 29 akpá. 10-11

Ma nɔ lin nǔ gbɔn lě gbeɖé ó: Mɛ ɖěbǔ sixú mɔ nǔ jɛ wǔvɛ́ e ɖí xwi xá wɛ un ɖe é mɛ ǎ. Nǔ lin gbɔn mɔ̌ sixú zɔ́n bɔ a ná lin ɖɔ nukúnɖíɖó ɖěbǔ kún sɔ́ ɖe nú émí ó, bɔ a sɔ́ ná mɔ gǎn bo ɖí xwi xá jlǒ masɔgbe lɛ́ ǎ. Flíjɛ tɔn wɛ Biblu ɖɔ. É ɖɔ: “Hwenu e mi ka ná ɖo mɛtɛ́nkpɔ́n mɛ é ɔ, é ná lɛ́ ɖe ali e mi ná gbɔn bo tɔ́n sín mɛ é, bónú mi ná dó sixú kpé wú bo dɛ ɖ’é nu.” Nǔgbó ɔ, ényí jlǒ nyanya ɖé ná bo tlɛ ko dó ɖɔ do ɖo ayi mǐtɔn mɛ bǐ ɔ, mǐ sixú dɛ ɖ’é nu, bɔ é ná kpa mǐ. Kpó alɔdó Jexóva tɔn kpó ɔ, mǐ sixú gɔn nǔ wa sɔgbe xá jlǒ énɛ́. Nɔ flín nǔ élɔ́ hwebǐnu: Ðó gbɛtɔ́ hwɛhutɔ́ wɛ nú we wútu ɔ, a sixú gɔn jlǒ nyanya lɛ́ ɖó bǐ mlɛ́mlɛ́ ǎ. Amɔ̌, ényí yě wá xwetɔ́n ɔ, mǐ sixú nya yě dó gbě afɔjíafɔjí, lěe Jozɛ́fu yá wǔ hɔ́n ɖo Potifáa sín asi nukɔn gbɔn é ɖɔhun. (Bǐb. 39:12) É byɔ́ ɖɔ a ní wa nǔ sɔgbe xá jlǒ nyanya lɛ́ ǎ! w23.01 12-13 akpá. 16-17

Jijɔ Jexóva tɔn ɖokpó wɛ nyí hwɛjijɔ. (Sɛ́n. 32:4) Hwɛjijɔ cá kan tawun xá mɛ ma ɖe ɖó vo ɖo mɛ mɛ; Jexóva ka nɔ ɖe mɛɖé ɖó vo ɖo mɛɖé mɛ ǎ. (Mɛ. 10:34, 35) Gbe vovo e mɛ è wlán Biblu dó é xlɛ́ ɖɔ Mawu kún nɔ ɖe mɛɖé ɖó vo ɖo mɛɖé mɛ ó. Jexóva d’akpá ɖɔ ɖo azǎn gǔdo gúdo tɔn lɛ́ mɛ ɔ, “nukúnnúmɔjɛnǔmɛ nǔgbó” Xó Mawu tɔn tɔn ná wá “túnflá,” énɛ́ wɛ nyí ɖɔ mɛ gěgé ná mɔ nukúnnú jɛ Biblu ɔ mɛ. (Da. 12:4, nwt) Ali e nu nukúnnúmɔjɛnǔmɛ énɛ́ túnflá ɖe é ɖokpó wɛ nyí ɖɔ, è nɔ tínmɛ Biblu kpó wěma lɛ́ kpó dó gbe ɖěvo lɛ́ mɛ, nɔ ɖe tɔ́n, bo nɔ lɛ́ má. Sín hwenu línlín ɖíe wɛ togun Jexóva tɔn ko ɖo Xó Mawu tɔn blěbú, alǒ akpáxwé tɔn ɖé tínmɛ wɛ; gbe 240 jɛjí mɛ wɛ yě ko tínmɛ dó, bɔ mɛ bǐ sixú yí vɔ̌nu. Wǎgbɔ tɔn ɔ, gbɛtɔ́ e gosín akɔta lɛ́ bǐ mɛ lɛ́ é ɖo gbe yí nú “wɛn ɖagbe Axɔ́súɖuto ɔ tɔn” wɛ, cóbónú vivɔnu ɔ ná wá. (Mat. 24:14) Mawu mǐtɔn hwɛjijɔnɔ ɔ jló ná hun ali nú mɛ gěgé lěe é nyɔ́ bló gbɔn é, bónú yě ná kplɔ́n, bo tuun i gbɔn Xó tɔn xixa gblamɛ. Nǔ nyí mɔ̌, ɖó é yí wǎn nú mǐ mɛ bǐ tawun wútu. w23.02 5 akpá. 11-12

A ka yí wǎn nú nǔjlɔ́jlɔ́wiwa a? É ɖo wɛn ɖɔ nǔ nyí mɔ̌. Amɔ̌, mǐ mɛ bǐ wɛ nyí hwɛhutɔ́ bɔ ényí mǐ ma ɖó ayi te ǎ ɔ, bléwún jɛ́n linlin e gbɛ ɔ nɔ ɖó dó nǔjlɔ́jlɔ́wiwa wú é sixú wa nǔ dó mǐ wú. (Eza. 5:20) Mɛɖé lɛ́ nɔ mɔ ɖɔ émí nyí nǔjlɔ́jlɔ́watɔ́ cóbó ka nɔ gó ɖó yěɖée wú zɛ xwé wú, nɔ mɔ xó ɖɔ dó mɛ ɖěvo lɛ́ wú, alǒ nɔ lin ɖɔ émí kpɔ́n te hú mɛ ɖěvo lɛ́. Amɔ̌, Mawu gbɛ́ wǎn nú jijɔ énɛ́ lɛ́ bǐ mlɛ́mlɛ́. Hwenu e Jezu ɖo ayǐkúngban jí é ɔ, é gbɛ́ nǔ nú sinsɛngán hwetɔnnu tɔn lɛ́ syɛ́nsyɛ́n, ɖó yě nɔ ɖó nǔgbódodó nǔjlɔ́jlɔ́wiwa tɔn yěɖésúnɔ tɔn lɛ́ ayǐ wútu. (Nǔt. 7:16; Luk. 16:15) Mɛ e nɔ wa nǔ e Jexóva mɔ ɖɔ é sɔgbe é ɖé nɔ lin gbeɖé ɖɔ émí kpɔ́n te hú mɛ ɖěvo lɛ́ ǎ. Nǔjlɔ́jlɔ́wiwa ɔ, jijɔ ɖaaɖagbe ɖé wɛ. È ná ɖɔ ɔ, tínmɛ tɔn wɛ nyí ɖɔ è ní nɔ wa nǔ e sɔgbe ɖo Jexóva Mawu nukúnmɛ é. Ðo Biblu mɛ ɔ, xókwín ɖěɖěe è zán nú “nǔjlɔ́jlɔ́wiwa” lɛ́ é nɔ dó gesí gbɛzínzán sɔgbe xá nǔgbódodó e yi aga hú gǎn lɛ́ é, énɛ́ wɛ nyí nǔgbódodó Jexóva tɔn lɛ́. w22.08 26-27 akpá. 3-5

Ahwanvú Jezu tɔn lɛ́ nɔ wa nǔ nyi do có, Jezu ka nɔ ɖeji dó yě wú. (Jaan 15:16) Hwenu e Jaki kpó Jaan kpó byɔ́ Jezu ɖɔ é ní sɔ́ émí ɖó tɛn bǔnɔ ɖé mɛ ɖo Axɔ́súɖuto ɔ mɛ é ɔ, Jezu xo nǔ kpɔ́n dó nǔ e wú yě ɖo Jexóva sɛn wɛ é wú, alǒ ɖe yě sín mɛsɛ́dó tɔn lɛ́ mɛ ǎ. (Mak. 10:35-40) Nukɔnmɛ ɖo zǎn e mɛ è wlí Jezu é ɔ, ahwanvú tɔn lɛ́ bǐ wɛ jó è dó. (Mat. 26:56) Jezu ka gɔn jiɖe ɖó dó yě wú gbeɖé ǎ. Jezu tuun lěe do yě nɔ wa nǔ nyi do sɔ é có, é ka “yí wǎn nú yě káká yi vivɔnu.” (Jaan 13:1) Ée è fɔ́n Jezu sín kú gúdo é ɔ, é tlɛ sɔ́ azɔ̌ tají ɖé d’así nú mɛsɛ́dó tɔn gbejínɔtɔ́ 11 lɛ́; énɛ́ wɛ nyí ɖɔ yě ná nɔ nukɔn nú nǔkplɔ́nkplɔ́n mɛ lɛ́ bónú yě ná húzú ahwanvú sín azɔ̌ ɔ, lobo lɛ́ kpé nukún dó lɛ̌ngbɔ́ xɔ akwɛ́ tɔn lɛ́ wú. (Mat. 28:19, 20; Jaan 21:15-17) Hwɛ tɔn ka jɔ nǔgbó, bɔ é ɖeji dó súnnu hwɛhutɔ́ énɛ́ lɛ́ wú. Yě mɛ bǐ sɛn Mawu kpó gbejíninɔ kpó káká jɛ hwenu e yě kú é. É ɖo wɛn ɖɔ Jezu kpó zé kpɔ́ndéwú ɖagbe ɖ’ayǐ nú mǐ ɖo ji ɖiɖe dó gbɛtɔ́ hwɛhutɔ́ lɛ́ wú kpáxwé. w22.09 6 akpá. 12

Ényí mǐ kú d’é jí ɖɔ Jexóva yí wǎn nú mǐ, alǒ ɖo xógbe ɖěvo mɛ ɔ, é ɖo ahwan mǐtɔn mɛ ɔ, mǐ sixú bló bɔ gǎn e dó wɛ Satáan ɖe bɔ mǐ ná ɖi xɛsi lɛ́ é ná cifo. Ði kpɔ́ndéwú ɔ, mɛ e wlán Ðɛhan 118gɔ́ ɔ é gbɔn ninɔmɛ vɛ́ wǔ ɖé lɛ́ mɛ. Kɛntɔ́ gěgé wɛ é ɖó, mɛ e tlɛ ɖo tɛn nukúnɖéjí mɛ lɛ́ é ɖé lɛ́ tlɛ ɖo kɛntɔ́ tɔn lɛ́ mɛ (wěmafɔ 9, 10). Hweɖélɛ́nu ɔ, é gbɔn ninɔmɛ e ɖó linkpɔ́n n’i tawun lɛ́ é mɛ (wěmafɔ 13). Gɔ́ ná ɔ, Jexóva lɛ́ dɔn tó n’i dó nǔjɔnǔ mɛ (wěmafɔ 18). Nǔ ɖo mɔ̌ có, ɖɛhanwlántɔ́ ɔ ji han ɖɔ: “Un ɖi xɛsi ǎ.” É tuun ɖɔ Jexóva e nyí Tɔ́ émítɔn jǐxwé tɔn é gbɛ́ nǔ nú émí có, é ka yí wǎn nú émí. Ðɛhanwlántɔ́ ɔ kú d’é jí ɖɔ gbɛ ná bo gbɔn ɖěbǔ ɔ, Mawu wǎnyíyínɔ émítɔn ná ɖo gbesisɔmɛ hwebǐnu bá d’alɔ émí. (Ðɛh. 118:29) É byɔ́ ɖɔ mǐ ní kú d’é jí ɖɔ Jexóva yí wǎn nú mǐ mɛ ɖokpó ɖokpó. Énɛ́ ná d’alɔ mǐ bɔ mǐ ná ɖu ɖo xɛsi vovo atɔn élɔ́ lɛ́ e è nɔ ɖi ɖo kpaa mɛ é jí: (1) xɛsi e mǐ nɔ ɖi ɖɔ mǐ kún sixú kpé wú bo sú hudó xwedó mǐtɔn tɔn sín do lɛ́ ó é, (2) xɛsi ɖi nú gbɛtɔ́, (3) xɛsi ɖi nú kú. w22.06 14-15 akpá. 3-4

Mǐ ɖó ná tɛ́n kpɔ́n bɔ Jexóva sinsɛn ná nɔ tɛn nukɔntɔn ɔ mɛ ɖo gbɛzán mǐtɔn mɛ. Ðó Jexóva wɛ nyí Gbɛɖótɔ́ mǐtɔn wútu ɔ, é wɛ mǐ ɖó ná sɛn. (Nǔɖe. 4:11; 14:6, 7) Nǔ tají hú gǎn e gbé mǐ ɖó ná nya ɖo gbɛzán mǐtɔn mɛ é wɛ nyí ɖɔ, mǐ ɖó ná sɛn Jexóva lěe é ba ɖɔ è ní sɛn émí gbɔn é; énɛ́ wɛ nyí ‘ɖo gbigbɔ kpó nǔgbó kpó mɛ.’ (Jaan 4:23, 24) Mǐ ba ɖɔ gbigbɔ mímɛ́ Mawu tɔn ní xlɛ́ ali lěe sɛn Mawu gbɔn wɛ mǐ ɖe é, énɛ́ ɔ, lěe sɛn ɛ gbɔn wɛ mǐ ɖe é ná sɔgbe xá nǔgbó ɖěɖěe ɖo Xó tɔn mɛ lɛ́ é. Ényí mǐ ná bo tlɛ ɖo to e mɛ è ɖó dogbó nú azɔ̌ mǐtɔn, alǒ gbɛ́ ɖe é ɖé mɛ ɔ, mawusinsɛn ɖó ná nɔ tɛn nukɔntɔn ɔ mɛ nú mǐ. Alɔnu din ɔ, nɔví súnnu kpó nɔví nyɔ̌nu kpó mǐtɔn lɛ́ 100 jɛjí wɛ è sú dó gankpá mɛ ɖó yě nyí Kúnnuɖetɔ́ Jexóva tɔn kpowun wútu. Nǔ ɖo mɔ̌ có, yě nɔ wa nǔ e wú yě kpé é bǐ, bo nɔ xo ɖɛ, kplɔ́n nǔ, bo nɔ ɖɔ xó nú mɛ ɖěvo lɛ́ dó Mawu mǐtɔn kpó Axɔ́súɖuto tɔn kpó wú kpó awǎjijɛ kpó. Ényí è ɖo mǐ zun wɛ, alǒ è ɖo ya dó nú mǐ wɛ ɔ, mǐ sixú ɖó awǎjijɛ, ɖó mǐ tuun ɖɔ Jexóva ɖo kpɔ́ xá mǐ, bo ná lɛ́ dó ajɔ mǐ wútu.—1 Pi. 4:14. w22.10 9 akpá. 13

Ðo wěma Nǔnywɛ́xó tɔn blěbú mɛ ɔ, Jexóva ɖe wě e nyɔ́ zán, bo nɔ w’azɔ̌ tɛgbɛ lɛ́ é xá mɛ. Kpɔ́n wěɖexámɛ énɛ́ lɛ́ e nǔnywɛ́ kpé é we kpowun. Nukɔntɔn, nǔ e a ɖó é ní nɔ kpé we. Nǔnywɛ́xó 23:4, 5 ɖe wě élɔ́ xá mǐ: “Ma nɔ ɖo hlɔ̌nhlɔ́n dó wɛ ɖɔ dɔkun jɛ́n émí ná jɛ dandan ó; . . . awa wɛ é wú, bo ko zɔn yi jǐxwé gangan ɖɔhun.” É ɖo mɔ̌ có, dɔkun jijɛ ka nɔ myá nukún nú dɔkunnɔ kpó wamamɔnɔ kpó bǐ. Énɛ́ nɔ zɔ́n bɔ hwɛhwɛ ɔ, yɛ ɖě sɔ́ nɔ ɖo ta nú yě ǎ, xɔ́ntɔn e yě zun lɛ́ é nɔ gblé, b’ɛ tlɛ nɔ lɛ́ wa nǔ dó lanmɛ yětɔn wú. (Nǔx. 28:20; 1 Tim. 6:9, 10) Wegɔ́, nɔ lin tamɛ cóbó nɔ ɖɔ xó. Ényí mǐ ma cɔ́ mǐɖée ǎ ɔ, xó mǐtɔn lɛ́ sixú hɛn nǔ gěgé gblé. Nǔnywɛ́xó 12:18 ɖɔ: “Mɛ e nɔ ɖɔ xó dín ɔ, xó tɔn nɔ gblé wǔ mɛ hwǐ ɖɔhun; mɛ e ka ɖó nǔnywɛ́ ɔ, xó tɔn nɔ gbɔ azɔn.” Ényí mǐ ma nɔ ɖo nǔ e mɛ ɖěvo lɛ́ wa nyi do lɛ́ é fúnfún kpé wɛ ǎ hǔn, hun jɛ dó fífá jí wɛ mǐ ɖe mɔ̌ nɛ́.—Nǔx. 20:19. w22.10 21 akpá. 14; 22-23 akpá. 16-17

Ezekiyɛ́li ɖó ná mɔ nǔ jɛ wɛn e ná dó wɛ é ɖe é mɛ ganjí. É ɖó ná ɖi nǔ nú wɛn énɛ́; énɛ́ wɛ ná sísɛ́ ɛ bɔ é ná jlá. Énɛ́ gúdo ɔ, nǔ maɖónukún ɖé jɛ. Ezekiyɛ́li ɖ’ayi wú ɖɔ wěma mlámlá ɔ “víví ɖo nu [émítɔn] mɛ wǐin ɖɔhun.” (Ezek. 3:3) Aniwú? Wǔ e è jɔ Ezekiyɛ́li bɔ é ná sɔ́ afɔ Jexóva tɔn ɖó te é víví n’i, bo lɛ́ ná ɛ awǎjijɛ tawun. (Ðɛh. 19:9-12) Nǔ tɔn e nyɔ́ Jexóva nukúnmɛ, bɔ é sɔ́ ɛ bónú é ná nyí gbeyíɖɔ tɔn é su nukún tɔn mɛ tawun. Nukɔnmɛ ɔ, Jexóva ɖɔ nú Ezekiyɛ́li ɖɔ: “Ðǒtó xó e ɖɔ nú we gbé un ja é céɖécéɖé bo hɛn ayi mɛ.” (Ezek. 3:10) Ðiɖɔ nú Ezekiyɛ́li wɛ Jexóva ɖe gbɔn mɔ̌ ɖɔ é ní sɛ nǔ e ɖo wěma mlámlá ɔ jí lɛ́ é xwe dó ayi mɛ, lobo nɔ lin tamɛ dó yě jí. Ée Ezekiyɛ́li wa mɔ̌ é ɔ, nǔɖiɖi tɔn lí dǒ. Wěma mlámlá ɔ lɛ́ d’alɔ ɛ bɔ é tuun wɛn agbɔ̌nnɔ e ná jlá mɛ lɛ́ wɛ é ɖe é. (Ezek. 3:11) Wɛn Mawu tɔn e ɖo ayi Ezekiyɛ́li tɔn mɛ, bo lɛ́ ɖo nu tɔn é zɔ́n bɔ é ɖo gbesisɔmɛ bo ná bɛ́ sinsɛnzɔ́ tɔn, bo lɛ́ wa yi fó. w22.11 6 akpá. 12-14

Ényí hǔzúhúzú e tutoblónúnǔ ɔ bló lɛ́ é tɛ́n gbejíninɔ towe kpɔ́n ɔ, étɛ́ a ka sixú wa? Hwenu e Izlayɛ́li ví lɛ́ ɖo yiyi wɛ ɖo gbětótló mɛ é ɔ, Kexáti ví lɛ́ wɛ nɔ sɔ́ akɔjijɛgbá ɔ bo nɔ jɛ nukɔn nú togun ɔ. (Kɛ́n. 3:29, 31; 10:33; Joz. 3:2-4) Wǔjɔmɛ bǔnɔ ɖé wɛ! Amɔ̌, Kexáti ví lɛ́ sín azɔ̌ húzú hwenu e Izlayɛ́li ví lɛ́ jɛ Akpádídó yíkúngban ɔ jí é. É sɔ́ byɔ́ ɖɔ è ní nɔ ɖo tɛn sɛ nú akɔjijɛgbá ɔ wɛ hwɛhwɛ ǎ. Énɛ́ wú ɔ, è sɔ́ azɔ̌ ɖěvo lɛ́ d’así nú Kexáti ví lɛ́. (1 Tan 6:31-33; 26:1, 24) È wlán dó fí ɖěbǔ ɖɔ Kexáti ví lɛ́ nɔ ɖo nǔ húnhún ɖɔ wɛ, alǒ nɔ byɔ́ ɖɔ è ní sɔ́ azɔ̌ e nyí nukúnɖéjí hú gǎn é d’así nú émí, ɖó yě ko nɔ w’azɔ̌ bǔnɔ ɖé ɖ’ayǐ wú ǎ. Étɛ́ énɛ́ ka sixú kplɔ́n mǐ? Nɔ nɔ gǔdo nú hǔzúhúzú e tutoblónúnǔ ɔ bló lɛ́ é kpó ayi bǐ kpó, nú hǔzúhúzú énɛ́ lɛ́ ɖě ná bo tlɛ kan azɔ̌ e a nɔ wa é ɔ nɛ́. È na bo tlɛ sɔ́ azɔ̌ ɖěbǔ d’así nú we hǔn, nǔ é ní dó xomɛhunhun nú we. Flín ɖɔ é kún nyí azɔ̌ e è sɔ́ d’así nú we é wɛ nɔ ɖe lě do a xɔ akwɛ́ sɔ é xlɛ́ ó. Tónú e a nɔ se nú Jexóva é nɔ xɔ akwɛ́ ɖo nukún tɔn mɛ hú azɔ̌ ɖěbǔ e a nɔ wa é. w22.11 23-24 akpá. 10-11

Onɛzifɔ́ɔ ba fí e mɛsɛ́dó Pɔ́lu ɖe é, bɔ hwenu e é mɔ ɛ é ɔ, é wa nǔ tawun tawun ɖé lɛ́ dó d’alɔ ɛ. Gbɛ éɖée tɔn wɛ é ka sɔ́ ɖ’axɔ́ nu dó wa mɔ̌. Étɛ́ énɛ́ ka sixú kplɔ́n mǐ? Mǐ ɖó ná lɔn nú xɛsi ɖi nú gbɛtɔ́ ní wa nǔ dó mǐ wú, alǒ gbo kpo nyi ali jí nú mǐ bónú mǐ ná gɔn gǔdo nɔ nú nɔví mǐtɔn ɖěɖěe è ɖo ya dó ná wɛ lɛ́ é ǎ. É nyɔ́ wa hǔn, mi nú mǐ ní wa nǔ e wú mǐ kpé é bǐ bá d’alɔ yě. (Nǔx. 17:17) Yě ɖó hudó wǎnyíyí mǐtɔn kpó gǔdo e mǐ ná nɔ nú yě é kpó tɔn. Nɔví mǐtɔn ɖěɖěe ɖo Russie lɛ́ é nɔ nɔ gǔdo nú nǔɖitɔ́ hǎtɔ́ yětɔn vívɛ́ ɖěɖěe ɖo ganxó lɛ́ é. Mi nú mǐ ní ɖɔ xó dó lěe yě nɔ wa mɔ̌ gbɔn é wú. Ényí è ɖo yě mɛɖé lɛ́ e è wlí dó gankpá mɛ é sín hwɛ ɖɔ wɛ ɔ, nɔví gěgé nɔ yi hwɛɖɔxɔsá ɔ dó nɔ gǔdo nú yě. Étɛ́ énɛ́ ka kplɔ́n mǐ? Ényí è kɔn cí dó nɔví ɖěɖěe ɖo nukɔn nú nǔ lɛ́ é wú, wlí yě, alǒ dó ya nú yě hǔn, ma nú xɛsi ɖi we ó. Nɔ xo ɖɛ dó ta yětɔn mɛ, nɔ kpé nukún dó mɛ e ɖo xwédo yětɔn mɛ lɛ́ é wú, bo lɛ́ ba ali tawun tawun ɖěvo e nu a ná xlɛ́ ɖɔ émí ɖo gǔdo nú yě ɖe lɛ́ é.—Mɛ. 12:5; 2 Kɔ. 1:10, 11. w22.11 17 akpá. 11-12

Azɔ̌ e mɛxó agun tɔn lɛ́ nɔ wa é ɖokpó wɛ nyí alɔ dídó mɛ ɖo gbigbɔ kpó lěe nǔ nɔ cí nú mɛ é kpó lixo. (1 Pi. 5:2) Ényí adla ɖé j’ayǐ ɔ, mɛxó agun tɔn lɛ́ ɖó ná tɛ́n kpɔ́n bo tuun ɖɔ nɔví lɛ́ ɖo ayijayǐ mɛ, ɖó nǔɖuɖu, avɔ kpó fí e yě ná dɔ́ é kpó. Amɔ̌, ɖo sun mɔ̌kpán gúdo ɔ, mɛ ɖěɖěe gán ɖ’é mɛ lɛ́ é ná ɖó hudó nǔ gbigbɔ tɔn lɛ́ tɔn, bo ná lɛ́ ba ɖɔ è ní d’alɔ émí ɖo lěe nǔ nɔ cí nú mɛ é linu. (Jaan 21:15) Harold e ɖo Wěɖegbɛ́ alaxɔ tɔn mɛ, bo ko xo go nɔví ɖěɖěe wú adla wa nǔ dó lɛ́ é gěgé é ɖɔ: “É nɔ byɔ́ hwenu cóbɔ è nɔ mɔ mɛɖée mɛ. Yě sixú jɛ nǔ e bú dó yě lɛ́ é wɔn jí kpɛɖé kpɛɖé, amɔ̌, yě nɔ sixú yá wǔ wɔn nǔ élɔ́ lɛ́ ǎ: mɛ vívɛ́ná yětɔn e kú é, nǔɖókan yětɔn bǔnɔ ɖé, ninɔmɛ vɛ́ wǔ e mɛ yě ko gbɔn é. Nǔ énɛ́ lɛ́ flínflín sixú zɔ́n bɔ yě ná nɔ nɔ aluwɛ mɛ. Ényí nǔɖiɖi hwe dó mɛ ǎ, loɔ, lěe nǔ nɔ cí nú mɛ ɖo jɔwámɔ linu é wɛ.” Mɛxó agun tɔn lɛ́ nɔ zán wěɖexámɛ e ɖɔ ɖɔ è ní “nɔ ya avǐ xá mɛ e ɖo avǐ ya wɛ lɛ́” é é.—Hlɔ̌. 12:15. w22.12 22 akpá. 1; 25 akpá. 10-11

Bo ná dó d’alɔ mǐ bónú mǐ ná ɖu ɖo gǎn e dó wɛ mǐ ɖe bá wa nǔ ɖagbe é jí ɔ, Jexóva nɔ hun alɔ dó ná gbigbɔ mímɛ́ tɔn mǐ. Ényí mǐ nɔ kplɔ́n Xó Mawu tɔn hǔn, tɛn ná gbigbɔ mímɛ́ tɔn wɛ mǐ ɖe mɔ̌ nɛ́. Kplé mǐtɔn lɛ́ lɔmɔ̌ yiyi nɔ zɔ́n bɔ mǐ nɔ mɔ gbigbɔ mímɛ́. Ðo kplé klisánwun tɔn énɛ́ lɛ́ jí ɔ, mǐ sixú zán hwenu ɖó kpɔ́ xá nɔví mǐtɔn e ɖo tíntɛ́nkpɔ́n wɛ bá wa nǔ ɖagbe mǐ ɖɔhun lɛ́ é, bɔ énɛ́ nɔ dó wǔsyɛ́n lanmɛ nú mǐ. (Ebl. 10:24, 25; 13:7) Gɔ́ ná ɔ, ényí mǐ xo ɖɛ vívɛ́ sɛ́dó Jexóva, bo sa vo n’i ɖɔ é ní d’alɔ mǐ ɖo gǎnmaɖó mǐtɔn lɛ́ mɛ ɔ, é ná ná mǐ gbigbɔ mímɛ́ tɔn, bɔ gbigbɔ mímɛ́ énɛ́ ná ná mǐ hlɔ̌nhlɔ́n, bɔ mǐ ná kpó ɖo za li xá gǎnmaɖó ɔ wɛ. Nǔ énɛ́ lɛ́ wiwa sixú gɔn jlǒ nyanya lɛ́ ɖe síin có, yě ka ná d’alɔ mǐ bɔ mǐ ná dɛ ɖo zɛn e ɖo mǐ sɔ́ wɛ bɔ mǐ ná wa nǔ nyanya é nu. Ényí mǐ jɛ nǔ e ná zɔ́n bɔ mǐ kpó Jexóva kpó ná vɛ́ d’é jí lɛ́ é wa jí ɔ, é ɖo tají ɖɔ mǐ ní kpo ɖo nǔ énɛ́ lɛ́ wa wɛ, bo lɛ́ kpo ɖo linlin e sɔgbe lɛ́ é ɖó wɛ. w23.01 11-12 akpá. 13-14

Wěma e ɖɔ xó dó lěe è ná nɔ ganjí gbɔn ɖo agbaza mɛ é, alǒ nǔɖuɖu hunsin ɖagbe tɔn e è ná ɖu lɛ́ é wú é ɖé wɛ Biblu nyí ǎ có, é ɖe linlin e Jexóva nɔ ɖó dó nǔ énɛ́ lɛ́ wú é xlɛ́. Ði kpɔ́ndéwú ɔ, é byɔ́ mǐ ɖɔ mǐ ní “hɔn nú nǔ e ná zɔ́n bɔ [mǐ] ná jɛ azɔn lɛ́ é.” (Nǔt. 11:10) Biblu ɖɔ ɖɔ mǐ kún ɖó ná ɖu nǔ díngan, alǒ nu ahan díngan ó, ɖó nǔ énɛ́ lɛ́ bǐ sixú wa nǔ dó mǐ wú, bo tlɛ sixú lɛ́ hu mǐ fɛɛ. (Nǔx. 23:20) Jexóva nɔ ɖó nukún ɖɔ mǐ ní nɔ ɖu ɖo mǐɖée jí, hwenu e mǐ ɖo gbeta nǔ e mǐ ná ɖu é, gɔ́ nú ahan e mǐ ná nu é kpó bǎ e mɛ mǐ ná wa mɔ̌ yi ɖó é kpó tɔn kɔn wá wɛ é. (1 Kɔ. 9:25) Ényí mǐ nɔ zán nǔwúkpíkpé tamɛ linlin tɔn mǐtɔn ɔ, mǐ sixú wá gbeta e xlɛ́ ɖɔ gbɛ e Mawu ná mǐ é su nukún mǐtɔn mɛ tawun lɛ́ é kɔn. (Ðɛh. 119:99, 100; Nǔx. 2:11) Ði kpɔ́ndéwú ɔ, mǐ nɔ kpɔ́n nǔ bo nɔ ɖu. Ényí mǐ yí wǎn nú nǔɖuɖu ɖé lɛ́, bo ka tuun ɖɔ yě nɔ dó azɔn mǐ ɔ, mǐ nɔ tɛ́n kpɔ́n bo nɔ nyi alɔ nú yě. Ényí mǐ nɔ d’amlɔ ganjí, nɔ ba lanmɛ kpɔ́n hwɛhwɛ, bo nɔ lɛ́ hɛn agbaza mǐtɔn kpó xwé mǐtɔn kpó ɖó mǐmɛ́ jí hǔn, xlɛ́xlɛ́ wɛ mǐ ɖe ɖɔ mǐ lɛ́ nyí nǔnywɛ́tɔ́ nɛ́. w23.02 21 akpá. 6-7

Nɛ̌ a ka sixú mɔ nǔ xɔ akwɛ́ lɛ́ hwenu e a ɖo Biblu xa wɛ é gbɔn? Ð’ayi nǔ e 2 Timɔtée 3:16, 17 ɖɔ é wú. Ð’ayi wú ɖɔ wěmafɔ ɔ ɖɔ “nǔ e è wlán dó Mawuxówéma ɔ mɛ ɔ . . . bǐ . . . nyɔ́ nú” (1) è ná sɔ́ dó kplɔ́n nǔ mɛ, (2) bo ná dó ɖe mɛ dó ali jí, (3) bo ná dó ɖe nǔwanyido lɛ́ xlɛ́, (4) lobo ná dó kplɔ́n lěe è ná zán gbɛ ɖagbe gbɔn ɔ mɛ. A sixú ɖu le ɛnɛ énɛ́ lɛ́ e xó è ɖɔ é, é ná bo tlɛ nyí ɖo wěma Biblu tɔn ɖěɖěe a ma nɔ zán mɔ̌ ǎ lɛ́ é mɛ ɔ nɛ́. Gbějé tan ɔ kpɔ́n, bo kpɔ́n nǔ e é kplɔ́n we dó Jexóva, linlin tɔn, alǒ nǔgbódodó Biblu tɔn lɛ́ wú é. Ð’ayi lěe é sixú ɖe mɛ dó ali jí gbɔn é wú. Ényí a nɔ mɔ lěe wěmafɔ lɛ́ nɔ d’alɔ we bɔ a nɔ ɖ’ayi jlǒ, alǒ nǔwalɔ e ma sɔgbe ǎ lɛ́ é wú, lobo nɔ nyi alɔ nú yě gbɔn é kpó lěe yě nɔ d’alɔ we bɔ a nɔ nɔ gbejí nú Jexóva gbɔn é kpó wú hǔn, mɔ̌ wa wɛ a ɖe nɛ́. Gbějé lěe è sixú zán wěmafɔ ɔ dó ɖe nǔwanyido lɛ́ xlɛ́, alǒ jlá linlin masɔgbe ɖé ɖó, vlafo linlin masɔgbe mɛ e a xo go ɖo sinsɛnzɔ́ ɔ mɛ é ɖé tɔn gbɔn é kpɔ́n. Gɔ́ ná ɔ, nɔ ba ali ɖěɖěe nu wěmafɔ lɛ́ sixú gbɛ́ nǔ nú we, alǒ d’alɔ we bɔ a ná ɖó linlin ɖokpó ɔ Jexóva ɖɔhun ɖe é. Ényí a hɛn le ɛnɛ énɛ́ lɛ́ ayi mɛ ɔ, a ná mɔ nǔ xɔ akwɛ́ ɖěɖěe sixú dó jɛ̌ kɔ nú Biblu xixa towe lɛ́ é. w23.02 11 akpá. 11

Nǔɖɔɖayǐ ɖé ɖo wěma Daniyɛ́li tɔn mɛ, bo ɖɔ ɖɔ Jezu ná jɛ acɛ kpa jí dó Axɔ́súɖuto énɛ́ jí, ɖo xwe tɛ́nwe nǔɖɔɖayǐ tɔn ɔ sín vivɔnu. É ka nyɔ́ bló ɖɔ mǐ ní tuun hwenu e Jezu jɛ acɛ kpa jí é a? (Dan. 4:7-14) “Xwe tɛ́nwe” lɛ́ nɔ te nú xwe 2520. Táan nǔɖɔɖayǐ tɔn énɛ́ bɛ́ ɖo 607 J.H.M. tɔn hwenu e Babilɔ́nunu lɛ́ ɖe axɔ́sú gǔdo tɔn ɔ sín axɔ́súzinkpo Jexóva tɔn jí ɖo Jeluzalɛ́mu é. É fó ɖo 1914 H.M. tɔn, hwenu e Jexóva sɔ́ Jezu éé nyí “mɛ e ɖó acɛ ɖo sɛ́n linu é” ɖó axɔ́súzinkpo jí bɔ é nyí Axɔ́sú Axɔ́súɖuto Mawu tɔn tɔn é. (Ezek. 21:25-27, nwt) Le tɛ́ nǔɖɔɖayǐ énɛ́ ka sixú hɛn wá nú mǐ? Ényí mǐ mɔ nǔ jɛ nǔɖɔɖayǐ e kúnkplá “xwe tɛ́nwe” lɛ́ é wú ɔ, énɛ́ nɔ ná mǐ gǎnjɛwú ɖɔ Jexóva nɔ ɖe akpá tɔn lɛ́ dó ganmɛ. Lěe é ko sɔ́ hwenu ɖé lě tawun bónú Axɔ́súɖuto tɔn ná jɛ acɛ kpa jí gbɔn é ɔ, é ná lɛ́ bló bɔ nǔɖɔɖayǐ ɖěvo e kpo lɛ́ é bǐ ná jɛnu ɖo hwenu e é ɖó dó é. É ɖo wɛn, azǎn Jexóva tɔn “ná [wá] jɛ́n wɛ!”—Xab. 2:3. w22.07 3 akpá. 3-5