Novembre

Klisánwun ɖé ɖó ná nɔ ɖɔ xó gblégblé lɛ́ dó mɛ ɖěvo lɛ́ wú ǎ. Amɔ̌, mɛnúɖiɖɔ alɔkpa ɖé lɛ́ tíin bo nɔ jɛ wě mɔ̌ ǎ, bɔ mǐ ɖó ná lɛ́ cɔ́ mǐɖée d’é wú. Ði kpɔ́ndéwú ɔ, ényí mǐ ɖo xó ɖɔ dó mɛ e ɖó aca ɖěvo lɛ́, nyí akɔ ɖěvo lɛ́, alǒ gosín to ɖěvo lɛ́ mɛ é wú wɛ ɔ, mǐ ɖó ná cɔ́ mǐɖée bo ma wá jɛ xó nyanya ɖɔ dó yě wú jí ó. Gɔ́ ná ɔ, mǐ ba gbeɖé bo ná wá ɖɔ xó e ná dó xomɛsin xomɛ nú mɛ ɖěvo lɛ́ é dó yě wú ǎ. Nɔ ɖɔ xó e ná nɔ dó wǔsyɛ́n lanmɛ nú mɛ ɖěvo lɛ́ é. Nɔ ɖo gbesisɔmɛ bo nɔ kpa mɛ, bónú é ní ma nɔ nyí xó wɛ a nɔ mɔ ɖɔ dó mɛ wú, alǒ nǔ húnhún ɖɔ wɛ jɛ́n a nɔ ɖe ó. Izlayɛ́li ví lɛ́ ɖó nǔ e wú nǔ ná nɔ su nukún yětɔn mɛ é gěgé có, ayǐhɔ́ngbe ayǐhɔ́ngbe ɔ, nǔ húnhún ɖɔ wɛ jɛ́n yě nɔ ɖe. Ényí nǔ húnhún ɖɔ wɛ jɛ́n mǐ nɔ ɖe ɔ, é sixú zɔ́n bɔ mɛ ɖěvo lɛ́ lɔ jɛ nǔ húnhún ɖɔ jí. Flín ɖɔ gbe nyanya e amɛ̌ wǒ lɛ́ wá ɖó é zɔ́n bɔ ‘Izlayɛ́li ví lɛ́ jɛ nǔ húnhún ɖɔ dó Mɔyízi wú jí.’ (Kɛ́n. 13:31–14:4) Ðo alɔ ɖěvo mɛ ɔ, ényí mǐ nɔ kpa mɛ ɖěvo lɛ́ ɔ, é sixú d’alɔ mɛ lɛ́ bǐ bɔ yě ná ɖó awǎjijɛ. Énɛ́ wú ɔ, nɔ ba ali ɖěɖěe nu a ná kpa nɔví súnnu towe lɛ́ kpó nɔví nyɔ̌nu towe lɛ́ kpó ɖe é. w22.04 8 akpá. 16-17

Sín hwexónu ɖokpóo ɔ, Jexóva ko d’alɔ mɛ wínnyáwínnyá mɔ̌kpán bɔ yě húzú xɔ́ntɔn tɔn. É sixú d’alɔ vǐ towe lɛ́ lɔ bɔ yě ná su ɖo gbigbɔ lixo, ényí yě ɖó jlǒ tɔn ɔ nɛ́. (1 Kɔ. 3:6, 7) Ényí vǐ towe lɛ́ ná bo ma tlɛ ɖo Jexóva sɛn wɛ kpó ayi yětɔn bǐ kpó ǎ ɔ, é ná kpo ɖo wǎn yí nú yě wɛ. (Ðɛh. 11:4) Ényí yě ná bo tlɛ wa nǔ kléwún ɖé dó xlɛ́ ɖɔ émí ba ná nyɔ́ nukún tɔn mɛ ɔ, é ná ɖo gbesisɔmɛ, bo ná d’alɔ yě, bɔ yě ná húzú xɔ́ntɔn tɔn. (Mɛ. 13:48, nwt; 2 Tan 16:9) É sixú d’alɔ we bɔ a ná ɖɔ nǔ e sɔgbe é, ɖo hwenu e jɛxá dó é; énɛ́ wɛ nyí hwenu e vǐ towe lɛ́ ɖó hudó tɔn hú gǎn, bo ná se é. (Nǔx. 15:23) Kabǐ, é sixú sísɛ́ nɔví súnnu alǒ nɔví nyɔ̌nu e ɖo agun ɔ mɛ, bɔ nǔ mɛtɔn nɔ ɖu ayi mɛ n’i é ɖé, bɔ é ná nɔ ba tawun ná d’alɔ yě. Ényí vǐ towe lɛ́ ná bo tlɛ nyí mɛxó ɔ, Jexóva sixú bló bɔ yě ná flín nǔ e a ko kplɔ́n yě wá yi lɛ́ é. (Jaan 14:26) Ényí a kpo ɖo nǔ kplɔ́n vǐ towe lɛ́ wɛ gbɔn xó e a nɔ ɖɔ lɛ́ é kpó kpɔ́ndéwú towe kpó gblamɛ ɔ, Jexóva ná d’ajɔ we. w22.04 21 akpá. 18

Ðó Satáan ma sɔ́ sixú yi jǐxwé ǎ wútu ɔ, é nɔ tɔ́n ahwan mɛsɛntɔ́ yí ami dó ɖe Mawu tɔn e ɖo ayǐkúngban jí lɛ́ é. Nɔví yí ami dó ɖe énɛ́ lɛ́ sɔ́ Axɔ́súɖuto Mawu tɔn sín afɔ ɖó te, bo nɔ ɖɔ xó dó Jezu nu. (Nǔɖe. 12:17; 2 Kɔ. 5:20; Efɛ́. 6:19, 20) Ðo 1918 ɔ, è dó hwɛ agɔ nɔví agbanɖotananɔ tántɔn, bo ɖɔ ɖɔ yě ná sɛn gan nú hwenu línlín. É cí ɖɔ è ɖó azɔ̌ nɔví yí ami dó ɖe énɛ́ lɛ́ tɔn te wɛ ɖɔhun. Amɔ̌, ɖo bǐbɛ́mɛ 1919 ɔ, è ɖe nɔví súnnu yí ami dó ɖe énɛ́ lɛ́ nyi te, bɔ ɖo nukɔnmɛ ɔ, è dɔn nǔ gbɔn hwɛ e è ɖó nú yě é jí. Nɔví énɛ́ lɛ́ lɛ́vɔ́ yá wǔ jɛ azɔ̌ Axɔ́súɖuto ɔ tɔn lɛ́ wú. Amɔ̌, énɛ́ ɖó nǔ ahwan e Satáan tɔ́n togun Mawu tɔn é nu ǎ. Sín hwenɛ́nu ɔ, Satáan ko bló bɔ yadónúmɛ e cí “tɔsisa” ɖɔhun é nɔ wa nǔ dó mɛ e ɖo togun Mawu tɔn mɛ lɛ́ é bǐ wú. (Nǔɖe. 12:15) Nǔgbó ɔ, mǐ mɛ bǐ ɖó ná “dɛ, bo ɖó nǔɖiɖi.”—Nǔɖe. 13:10. w22.05 5-6 akpá. 14-16

Ðo nǔmimɔ ɖé mɛ ɔ, mɛsɛ́dó Jaan mɔ mɛ ɖěɖěe nɔ nɔ gǔdo nú acɛ e Jexóva ɖó bá kp’acɛ lɛ́ é sín gbɛ̌ta we, bɔ è dó gbɛ mavɔmavɔ sín ajɔ yě. Mɛ 144000 wɛ ɖo gbɛ̌ta nukɔntɔn ɔ mɛ. Ayǐkúngban ɔ jí wɛ è sɔ́ yě sín, bónú yě ná yi kpa acɛ xá Jezu ɖo jǐxwé. Yě ná wa azɔ̌ xá Jezu, bo ná kpa acɛ dó ayǐkúngban ɔ jí. (Nǔɖe. 5:9, 10; 14:3, 4) Ðo nǔmimɔ ɔ mɛ ɔ, Jaan mɔ bɔ yě kpó Jezu kpó ɖo te ɖo Sinyɔ́ɔ só e ɖo jǐxwé é jí. (Nǔɖe. 14:1) Sín mɛsɛ́dó lɛ́ hwenu káká jɛ égbé ɔ, gbɛtɔ́ afatɔ́n mɔ̌kpán wɛ è ko sɔ́, bónú yě ná nɔ mɛ 144000 lɛ́ mɛ. (Luk. 12:32; Hlɔ̌. 8:17) É ɖo mɔ̌ có, è ɖɔ nú Jaan ɖɔ mɛ yí ami dó ɖe kléwún ɖé jɛ́n ná kpo ɖo gbɛ ɖo ayǐkúngban jí ɖo azǎn gǔdo gúdo tɔn lɛ́ mɛ. (Nǔɖe. 12:17) Énɛ́ gúdo ɔ, hweɖénu ɖo ya ɖaxó ɔ hwenu ɔ, è ná bɛ́ mɛ yí ami dó ɖe ɖěɖěe kpo ɖo ayǐkúngban jí lɛ́ é yi jǐxwé, bɔ yé ná yi gɔ́ nú yě mɛ ɖěɖěe nɔ gbejí, bo kú, lobo ko yi jǐxwé lɛ́ é. Yě ná kpa acɛ xá Jezu ɖo Axɔ́súɖuto Mawu tɔn mɛ.—Mat. 24:31; Nǔɖe. 5:9, 10. w22.05 16 akpá. 4-5

Jezu kplɔ́n tóɖóetɔ́ lɛ́ ɖɔ yě ní nɔ ɖó linlin e ɖo jlɛ̌ jí é dó yěɖée wú. Jezu ná gǎnjɛwú yě, bo ɖɔ: “Ða nabí e ɖo ta nú mi é bǐ sín kɛ́n wɛ è tlɛ sɔ́.” (Mat. 10:30) Xó énɛ́ lɛ́ e Jezu ɖɔ é dó gbɔ nú mǐ tawun, tají ɔ, ényí mǐ nɔ mɔ ɖɔ mǐ nɔ ɖó linlin e ma sɔgbe ǎ lɛ́ é dó mǐɖée wú ɔ nɛ́. Énɛ́ ɖo xlɛ́xlɛ́ wɛ ɖɔ nǔ mǐtɔn nɔ ɖu ayi mɛ nú Tɔ́ mǐtɔn jǐxwé tɔn ɔ tawun; mǐ xɔ akwɛ́ ɖo nukún tɔn mɛ. Ényí Jexóva yí gbe ɖɔ mǐ ní sɛn émí, bo lɛ́ wá gbeta ɔ kɔn ɖɔ mǐ jɛxá bá nɔ gbɛ káká sɔ́yi ɖo gbɛ yɔ̌yɔ́ ɔ mɛ ɔ, mǐ ɖó ná xo nǔ kpɔ́n gbeɖé dó gbeta énɛ́ e kɔn é wá é wú ǎ. Xwe 15 mɔ̌ ɖíe ɔ, Atɔxwɛ ɖɔ ɖɔ mǐ ɖó ná ɖó linlin e sɔgbe é dó mǐɖée wú; é ɖɔ: “Mǐ ɖó ná nɔ mɔ mǐɖée zɛ nǔ e mǐ nyí é wú káká bo ná wá húzú goyítɔ́ ǎ. Mɔ̌ jɛ́n mǐ ma ka ɖó ná lin ɖɔ mǐ kún hwɛ́n nǔɖé ó káká bo ná lɛ́ wá flú bǐ ǎ é nɛ́. Hǔn, mǐ ɖó ná tɛ́n kpɔ́n bo ɖó linlin e sɔgbe é dó mǐɖée wú bo ná tuun nǔwúkpíkpé mǐtɔn lɛ́ kpó fí e mǐ vɔ́ da ɖe lɛ́ é kpó. w22.05 24-25 akpá. 14-16

Étɛ́ mǐ mɛ ɖokpó ɖokpó ka sixú wa dó gɔ́ so nú bǔninɔ ɖo agun ɔ mɛ? Mǐ sixú nɔ xo fífá kan. (Mat. 5:9; Hlɔ̌. 12:18) Hweɖébǔnu e mǐ ɖe afɔ nukɔntɔn ɔ dó xo fífá kan ɖo agun ɔ mɛ é ɔ, ɖɛkpɛ e palaɖísi gbigbɔ tɔn mǐtɔn nyɔ́ é gɔ́ so ná wɛ mǐ ɖe mɔ̌ nɛ́. Mǐ nɔ hɛn dó ayi mɛ ɖɔ Jexóva wɛ dɔn mɛ ɖěɖěe ɖo palaɖísi gbigbɔ tɔn ɔ mɛ lɛ́ é ɖokpó ɖokpó, bónú yě ná sɛn ɛ lěe é ba gbɔn é. (Jaan 6:44) Ényí Jexóva mɔ mǐ bɔ mǐ ɖo tíntɛ́nkpɔ́n wɛ bá gɔ́ so nú fífá kpó bǔninɔ kpó e ɖo mɛsɛntɔ́ tɔn e xɔ akwɛ́ tawun n’i lɛ́ é tɛ́ntin é ɔ, dǒ nukún lě do xomɛ nɔ hun i sɔ é mɛ kpɔ́n! (Eza. 26:3; Ajée 2:7) Jexóva nɔ ná nǔ ɖagbe gěgé mɛsɛntɔ́ tɔn lɛ́. Énɛ́ wú ɔ, nɛ̌ mǐ ka sixú ɖu le nǔ énɛ́ lɛ́ tɔn bǐ mlɛ́mlɛ́ gbɔn? Mǐ sixú nɔ lin tamɛ dó nǔ e mǐ nɔ kplɔ́n ɖo Xó Mawu tɔn mɛ é jí. Nǔ énɛ́ lɛ́ kplɔ́nkplɔ́n kpó tamɛ linlin dó yě jí kpó ná d’alɔ mǐ bɔ mǐ ná sɔ́ nǔ nú jijɔ klisánwun tɔn e ná sísɛ́ mǐ, bɔ mǐ ná nɔ ‘yí wǎn nú mǐɖée lɛ́ nɔví nɔví ɖɔhun’ bo ná nɔ ɖe “wǎnyíyí e gɔ́ngɔ́n é” xlɛ́ mɛ e ɖo agun ɔ mɛ lɛ́ é.—Hlɔ̌. 12:10. w22.11 12-13 akpá. 16-18

Ényí mǐ yí gbe ɖɔ Jexóva sɔ́ hwɛ kɛ mǐ ɔ, mǐ nɔ ɖu vǐví “kɔfánúmɛ sín hwenu lɛ́” tɔn; fífá ayi mɛ tɔn kpó ayi mímɛ́ ɖé kpó ɖo “kɔfánúmɛ sín hwenu lɛ́” ɔ mɛ. Gbɛtɔ́ sixú sɔ́ hwɛ mɔ̌hun kɛ mɛ ǎ; Jexóva ɖésúnɔ jɛ́n ná sɔ́ hwɛ mɔ̌hun kɛ mɛ. (Mɛ. 3:19, 20) Ényí Jexóva sɔ́ hwɛ kɛ mǐ ɔ, é nɔ lɛ́ bló bɔ xɔ́ntɔn e mǐ zun xá ɛ é nɔ lɛ́ jɛ ganjí, káká bɔ é nɔ cí ɖɔ mǐ kún hu hwɛ gbeɖé kpɔ́n ó ɖɔhun. Ényí Jexóva sɔ́ hwɛ kɛ mǐ ɔ, é sɔ́ ná wá dó hwɛ mǐ, alǒ dɔn tó nú mǐ ɖěvo ɖó hwɛ énɛ́ e mǐ hu é wú gbeɖé ǎ. (Eza. 43:25) “Lě do gbadahwe jí lín dó zǎnzǎnhwe jí sɔ ɔ,” mɔ̌ do wɛ Jexóva nɔ sɛ hwɛ mǐtɔn lɛ́ dó zɔ nú mǐ sɔ. (Ðɛh. 103:12) Ényí mǐ lin tamɛ dó lěe hwɛsɔ́kɛmɛ Jexóva tɔn d’agba sɔ é jí ɔ, é nɔ su nukún mǐtɔn mɛ tawun, bɔ mǐ nɔ lɛ́ ɖó sísí n’i. (Ðɛh. 130:4) Jexóva jló ná wá gbeta ɔ kɔn bo ná sɔ́ hwɛ kɛ mɛɖé ɔ, é nɔ zɔn dó lěe hwɛ ɔ syɛ́n sɔ é jí ǎ. Jexóva ná sɔ́ hwɛ kɛ mɛɖé alǒ gbɔ ɔ, é nɔ zán nukúnnúmɔjɛnǔmɛ e é ɖó, ɖó é nyí Gbɛɖótɔ́ mǐtɔn, Sɛ́ndótɔ́ mǐtɔn bo lɛ́ nyí Hwɛɖɔtɔ́ mǐtɔn wú é. w22.06 5 akpá. 12-14

Jexóva ná nukúnɖíɖó ɖaaɖagbe ɖé mɛ ɖěɖěe yí wǎn n’i lɛ́ é bǐ. Zaanɖé din ɔ, é ná ɖó nǔ azɔn, aluwɛ kpó kú kpó nu. (Nǔɖe. 21:3, 4) É ná d’alɔ “mɛ e nɔ sɔ́ yěɖée hwe” bo ɖo nukún ɖó è wɛ lɛ́ é, bɔ yě ná bló bɔ ayǐkúngban ɔ ná húzú palaɖísi. (Ðɛh. 37:9-11) Gɔ́ ná ɔ, é ná bló bɔ xɔ́ntɔn e mǐ mɛ ɖokpó ɖokpó ná zun xá ɛ é ná lɛ́ syɛ́n hú ée mǐ zun xá ɛ din é. Nukúnɖíɖó ɖaaɖagbe tɛ́ ɖíe! Amɔ̌, hwɛjijɔ tɛ́ lɛ́ mǐ ka ɖó bo ná kú d’é jí ɖɔ akpá Mawu tɔn lɛ́ ná jɛnu nǔgbó? Jexóva dó akpá ɖé ɔ, é nɔ ɖe dandan. Nǔgbó ɔ, mǐ ɖó hwɛjijɔ ɖagbe e wú mǐ ná ‘ɖó nukún Jexóva’ é. (Ðɛh. 27:14) Mǐ nɔ ɖe énɛ́ xlɛ́ gbɔn nǔ élɔ́ lɛ́ wiwa gblamɛ: te e mǐ nɔ nɔ kpɔ́n Mawu kpó suúlu kpó, kpó awǎjijɛ kpó ɖɔ é ná bló bɔ akpá tɔn lɛ́ ná jɛnu bǐ mlɛ́mlɛ́ é. (Eza. 55:10, 11) Mi nú mǐ ní kpo ɖo gbejí nú Jexóva, lobo kán ɖ’é jí ɖɔ é ná d’ajɔ “mɛ e ɖo biba ɛ wɛ lɛ́” é. w22.06 20 akpá. 1; 25 akpá. 18

Mǐ sixú ɖeji ɖɔ ɖó Jexóva wɛ nyí Tatɔ́ xwédo ɔ tɔn wútu ɔ, é ná wa nǔ sɔgbe xá nǔgbódodó e ɖo 1 Timɔtée 5:8 mɛ é. Ényí mǐ kú d’é jí ɖɔ Jexóva yí wǎn nú mǐ kpó xwédo mǐtɔn kpó ɔ, mǐ ná ɖeji ɖɔ mǐ ná mɔ nǔ e hudó mǐ lɛ́ é. (Mat. 6:31-33) Jexóva jló ná sú nǔ e hudó mǐ lɛ́ é sín do nú mǐ, ɖó é nɔ ná nǔ mɛ kpó wǎnyíyí kpó, lobo nɔ lɛ́ hun alɔ dó wa mɔ̌! Hwenu e é bló ayǐkúngban ɔ é ɔ, é nyí dandannú e sín hudó mǐ ɖó bá nɔ gbɛ lɛ́ é kpowun wɛ é ná mǐ ǎ. É dá nǔ gěgé ɖó ayǐkúngban ɔ jí bónú mǐ ná ɖu vǐví yětɔn. (Bǐb. 2:9) Hweɖélɛ́nu ɔ, nú é ná bo tlɛ nyí nǔ e sín hudó mǐ ɖó kpowun é jɛ́n ɖo mǐ sí ɔ, mǐ sixú flín ɖɔ Jexóva wɛ nyí tɔn bɔ mǐ ɖó nǔ e hudó mǐ é. (Mat. 6:11) Mǐ ɖó ná hɛn d’ayi mɛ ɖɔ nǔ e Mawu wǎnyíyínɔ mǐtɔn ná ná mǐ din, bo ná lɛ́ ná mǐ ɖo sɔgúdo lɛ́ é ná hú gǎn nǔ ɖěbǔ e mǐ ná sɔ́ dó sá vɔ̌ ná din é flaflá tɔn. —Eza. 65:21, 22. w22.06 15-16 akpá. 7-8

Ényí jlǒɖótɔ́ yɔ̌yɔ́ lɛ́ kɛ́ɖɛ́ wɛ ɖó hudó nǔɖuɖu gbigbɔ tɔn syɛ́nsyɛ́n tɔn ǎ. Mǐ mɛ bǐ wɛ ɖó hudó tɔn. Mɛsɛ́dó Pɔ́lu wlán ɖɔ ényí mǐ nɔ zán nǔ e mǐ nɔ kplɔ́n ɖo Biblu mɛ lɛ́ é ɔ, énɛ́ ná d’alɔ mǐ bɔ mǐ ná “tuun nǔ ɖagbe ɖo nǔ nyanya mɛ.” É sixú vɛ́ wǔ nú mǐ tawun din bónú mǐ ná se tónú nú nǔgbódodó Jexóva tɔn lɛ́, ɖó mɛ gěgé wɛ nyí nǔblíblíwatɔ́. Amɔ̌, Jezu nɔ mɔ nǔ jɛ wú ɖɔ mǐ kplɔ́n nǔ ɖěɖěe ná d’alɔ mǐ bɔ mǐ ná bló bɔ nǔɖiɖi mǐtɔn ná kpo ɖo dǒ lí wɛ lɛ́ é. Xó Mawu tɔn Biblu ɔ mɛ wɛ nǔkplɔ́nmɛ énɛ́ lɛ́ nɔ gosín. Jezu ɖɔhun ɔ, mǐ nɔ wlí yɛ̌yi e jɛxá é nú nyǐkɔ Mawu tɔn. (Jaan 17:6, 26) Ði kpɔ́ndéwú ɔ, ɖo 1931 ɔ, mǐ jɛ nyǐkɔ e jínjɔ́n Biblu jí é ɖé zán jí; nyǐkɔ énɛ́ wɛ nyí Kúnnuɖetɔ́ Jexóva tɔn. Nyǐkɔ énɛ́ e mǐ ɖó ɖo ta é xlɛ́ lě do nyǐkɔ Mawu tɔn ɖo tají nú mǐ sɔ é, bo lɛ́ xlɛ́ ɖɔ mǐ ba ɖɔ è ní tuun nyǐkɔ Tɔ́ mǐtɔn jǐxwé tɔn ɔ tɔn dó mǐ wú. (Eza. 43:10-12) Gbɔn vo nú énɛ́ ɔ, Biblu gbɛ yɔ̌yɔ́ ɔ tɔn lɛ́ sɔ́ nyǐkɔ Mawu tɔn ɖó tɛn ɖěɖěe mɛ é ɖó ná nɔ lɛ́ é. w22.07 11-12 akpá. 11-12

Wɛn ɖagbe e kunkplá Axɔ́súɖuto Mawu tɔn é lɔ ɖo nǔgbó Biblu tɔn lɛ́ mɛ. Jezu jlɛ́ nǔgbó e kúnkplá Axɔ́súɖuto ɔ é dó dɔkun e ɖo hwlǎhwlá é ɖé wú. Sɔgbe xá Matíe 13:44 ɔ, Jezu ɖɔ: “Axɔ́súɖuto jǐxwé tɔn cí dɔkun e ɖo hwlǎhwlá ɖo gle ɖé mɛ, bɔ nya ɖé mɔ bo lɛ́vɔ́ sɔ́ hwlá é ɖɔhun. É víví n’i káká bɔ é yi bo sa nǔ e é ɖó lɛ́ é bǐ, bo xɔ gle énɛ́.” Ð’ayi wú ɖɔ nya ɔ kún ko ɖo dɔkun ɔ ba wɛ ɖ’ayǐ ó. Amɔ̌, ée é mɔ é ɔ, é sɔ́ nǔ gěgé dó sá vɔ̌ bónú é ná dó jɛ así tɔn. Nǔgbó ɔ, é sa nǔ e é ɖó lɛ́ é bǐ. Aniwú? Ðó é tuun ɖɔ nǔ e émí mɔ é xɔ akwɛ́ tawun. Mǐ tuun ɖɔ è kún sixú sɔ́ nǔ e gbɛ élɔ́ nɔ xwlé mɛ é ɖěbǔ jlɛ́ dó nǔ élɔ́ lɛ́ wú ó: awǎjijɛ e Jexóva sinsɛn nɔ hɛn wá nú mǐ din é kpó nukúnɖíɖó gbɛ mavɔmavɔ tɔn e mǐ ɖó ɖo sɔgúdo ɖo hwenu e Axɔ́súɖuto ɔ ná jɛ acɛ kpa jí é kpó. Wǔ e è jɔ mǐ bɔ mǐ ná zun xɔ́ntɔn vívɛ́ xá Jexóva é xɔ akwɛ́ hú vɔ̌ ɖěbǔ e mǐ ná sá é flaflá tɔn. Nǔ e nɔ d’awǎjijɛ nú mǐ hú gǎn é wɛ nyí ɖɔ mǐ ní nɔ wa “nǔ e nɔ́ nyɔ́ nukún tɔn mɛ ɔ hwebǐnu.”—Koló. 1:10. w22.08 15-17 akpá. 8-9, 12

Nɛ̌ Jozɛ́fu ka wa gbɔn bo tuun ɖɔ agalilɛ ɔ, “nǔ baɖabaɖa” wɛ é ná ko nyí ɖo Mawu tɔn nukúnmɛ? Xwe afɔɖé mɔ̌ gúdo wɛ è wá ná Mɔyízisɛ́n ɔ Izlayɛ́li ví lɛ́; akpáxwé tɔn ɖé ka ɖɔ: “Ma lɛ aga ó.” (Tín. 20:14) É ɖo mɔ̌ có, Jozɛ́fu tuun Jexóva tawun, bo tuun ɖɔ é kún ná yí gbe nú agalilɛ ó. Ði kpɔ́ndéwú ɔ, é ɖo wɛn ɖɔ Jozɛ́fu tuun ɖɔ Jexóva bló tuto alɔwlíwlí tɔn, bɔ súnnu ɖokpó kpó nyɔ̌nu ɖokpó kpó wɛ ná nɔ da yěɖée. Gɔ́ ná ɔ, é ná ko se lěe Jexóva cyɔ́n alɔ nɔgbó tɔn Sala jí gbɔn azɔn we, bónú é ná dó kpo ɖo gbejí nú asú tɔn é. (Bǐb. 2:24; 12:14-20; 20:2-7) Ée Jozɛ́fu lin tamɛ dó nǔ énɛ́ lɛ́ jí é ɔ, é tuun nǔ e nyí nǔ ɖagbe ɖo Mawu nukúnmɛ é kpó nǔ e nylá ɖo nukún tɔn mɛ é kpó. Ðó Jozɛ́fu yí wǎn nú Jexóva wútu ɔ, é yí wǎn nú nǔgbódodó tɔn lɛ́, bo kán ɖ’é jí, bo ná tɛ́ dó yě wú. w22.08 26 akpá. 1-2

Ð’ayǐ ɔ, mǐ nɔ lin ɖɔ Daniyɛ́li 12:2 dó gesí fínfɔ́n sín kú jǐxwé tɔn kpó wɛnɖagbejíjlázɔ́ e kɛntɔ́ mǐtɔn lɛ́ ɖibla ɖó te ɖo 1918, b’ɛ ka lɛ́ wá yi nukɔn é kpó. Amɔ̌ din ɔ, mǐ mɔ nukúnnú jɛ mɛ ɖɔ mɛ ɖěɖěe è ná fɔ́n sín kú ɖo gbɛ yɔ̌yɔ́ e jawě é mɛ lɛ́ é xó ɖɔ wɛ wěmafɔ énɛ́ ɖe. Étɛ́wú mǐ ka ɖɔ mɔ̌? È lɛ́ zán xógbe “kɔ́ glɔ́” ɔ ɖo Jɔbu 17:16 mɛ, bɔ tínmɛ ɖokpó ɔ wɛ yě bǐ ɖó, énɛ́ wɛ nyí “yɔdo.” Énɛ́ xlɛ́ ɖɔ Daniyɛ́li 12:2 ɖo gesí dó fɔ́n e è ná fɔ́n mɛ lɛ́ sín kú hwenu e azǎn gǔdo gúdo tɔn lɛ́ ná ko fó, bɔ ahwan Aamagedɔ́ni tɔn lɔ ná ko fó gúdo é wɛ. Amɔ̌, étɛ́ ɖɔ wɛ Daniyɛ́li 12:2 ka ɖe hwenu e é ɖɔ ɖɔ è ná fɔ́n mɛɖé lɛ́ sín kú, bo ná ná yě “gbɛ mavɔmavɔ” é? Nǔ e ɖɔ wɛ é ɖe é wɛ nyí ɖɔ, mɛ ɖěɖěe fɔ́n sín kú, bo kplɔ́n bo tuun, alǒ ɖo gǎn dó wɛ bá tuun Jexóva kpó Jezu kpó ɖo xwe 1000 ɔ mɛ, lobo ná se tónú nú yě lɛ́ é ná wá mɔ gbɛ mavɔmavɔ.—Jaan 17:3. w22.09 21-22 akpá. 6-7

Xó énɛ́ ɖo xlɛ́xlɛ́ wɛ ɖɔ Jexóva nɔ ɖó nukún ɖɔ mǐ ní nɔ mɔ̌ kpowun, bo ɖeji dó mɛ ɖěvo lɛ́ wú ǎ. É nyɔ́ wá ɔ, é nɔ ɖó nukún ɖɔ mǐ ní nɔ ɖeji dó yě wú ɖó yě ko xlɛ́ ɖɔ mɛ ɖejidéwú wɛ émí nyí wútu. Ji ɖiɖe dó mɛ wú ɔ, sísí ɖɔhun wɛ é cí; è nɔ jɛxá wɛ, bɔ é ka nɔ lɛ́ byɔ́ hwenu. Étɛ́ a ka sixú nɔ wa bo ná nɔ ɖeji dó nɔví towe lɛ́ wú? Kplɔ́n, bo tuun yě ganjí. Nɔ ɖɔ xó xá yě ɖo kplé agun tɔn lɛ́ jí. Blǒ tuto, bo nɔ w’azɔ̌ xá yě ɖo sinsɛnzɔ́ ɔ mɛ. Nɔ ɖó suúlu dó yě wú, bo hun ali ɔ nú yě, bónú yě ní xlɛ́ ɖɔ mɛ ɖejidéwú wɛ émí nyí. Ðo bǐbɛ́mɛ ɔ, nú a tuun mɛɖé bɔ é ma ko lín ǎ ɔ, a sixú gɔn linlin towe lɛ́ kpó lěe nǔ nɔ cí nú we é kpó bǐ ɖɔ n’i. Ée mi ná ɖo miɖée tuun d’é jí wɛ é ɔ, a sixú nɔ lɛ́ vo hú gǎn, bo ná nɔ ɖɔ xó n’i dó lěe nǔ nɔ cí nú we é wú. (Luk. 16:10) Amɔ̌, ényí a ɖeji dó nɔví ɖé wú bɔ é flú we ɔ, étɛ́ a ka sixú wa? Ma zɔn kplakpla jí bo gbɛ́ xɔ́ntɔn mɛ ɔ tɔn ó. É nyɔ́ wa hǔn, nǔ jɔ ní nyi dó xó ɔ mɛ. Gɔ́ ná ɔ, ma lɔn nú nǔwiwa mɛ kléwún ɖé tɔn zɔ́n bónú a gɔn ji ɖe dó nɔví towe lɛ́ wú ó. w22.09 4 akpá. 7-8

Mɛxó agun tɔn e nɔ nyí Miqueas é mɔ ɖɔ nɔví e nɔ nɔ nukɔn nú nǔ lɛ́ é ɖé lɛ́ wa nǔ agɔ xá émí. Amɔ̌, é kpo ɖo jlɛ̌ jí nɔ wɛ, bo tɛ́n kpɔ́n lobo ɖu ɖo lěe nǔ nɔ cí n’i é jí. É nɔ xo ɖɛ hwɛhwɛ, bo nɔ byɔ́ Jexóva ɖɔ é ní ná émí gbigbɔ mímɛ́ tɔn kpó hlɔ̌nhlɔ́n e sín hudó émí ɖó bo ná dɛ é kpó. É lɛ́ ba nǔ e ná d’alɔ ɛ lɛ́ é ɖo wěma mǐtɔn lɛ́ mɛ. Étɛ́ ka nyí nǔkplɔ́nmɛ ɔ? Ényí a mɔ ɖɔ nɔví súnnu, alǒ nɔví nyɔ̌nu ɖé wa nǔ agɔ xá we hǔn, ɖǒ suúlu, bo tɛ́n kpɔ́n bo ɖu ɖo linlin agɔ ɖěbǔ e a sixú ɖó é jí. A sixú tuun ninɔmɛ ɖěɖěe zɔ́n bɔ mɛ ɔ ɖɔ xó alǒ wa nǔ gbɔn mɔ̌ lɛ́ é bǐ ǎ. Énɛ́ wú ɔ, xo ɖɛ sɛ́dó Jexóva bo byɔ́ ɛ ɖɔ é ní d’alɔ we bónú a ní tɛ́n kpɔ́n bo mɔ nukúnnú jɛ lěe mɛ ɔ nɔ kpɔ́n nǔ lɛ́ gbɔn é mɛ. A ná mɔ ɖɔ nǔɖitɔ́ hǎtɔ́ towe kún lin ná wa nǔ nyanya dó wǔ we ó, bo ná tɛ́n kpɔ́n bo ná sɔ́ hwɛ kɛ ɛ. (Nǔx. 19:11) Flín ɖɔ Jexóva mɔ nǔ jɛ ninɔmɛ towe wú, bo ná ná hlɔ̌nhlɔ́n e sín hudó a ɖó bá dɛ é we.—Nǔt. 5:8. w22.11 21 akpá. 5

Zun xɔ́ntɔn ɖěɖěe yí wǎn nú Jexóva lɛ́ é. Xɔ́ntɔn e a zun lɛ́ é sixú d’alɔ we bɔ a ná húzú klisánwun e zin é. (Nǔx. 13:20) Julien e nyí mɛxó agun tɔn ɖé din é ɖɔ: “Hwenu e un ɖo wǐnnyáwínnyá mɛ é ɔ, un zun xɔ́ntɔn ɖagbe lɛ́ ɖo sinsɛnzɔ́ ɔ mɛ. Xɔ́ntɔn énɛ́ lɛ́ nɔ ɖó kan dó nǔ wú, bo d’alɔ mì bɔ un mɔ awǎjijɛ e sinsɛnzɔ́ ɔ sixú hɛn wá é. . . . Un lɛ́ wá ɖ’ayi wú ɖɔ un xo xɔ́ntɔn ɖagbe gěgé zunzun kpo, ɖó un sɔ́ ayi ɖó xɔ́ntɔn zunzun xá mɛ e kpó nyi kpó ɖó xwe ɖokpó ɔ lɛ́ é jí wútu.” Ényí a ɖ’ayi wú ɖɔ mɛɖé ɖo agun ɔ mɛ, bo kún nyí gbɛ̌ ɖagbe bɔ a ná dó ó ɔ ka lo? Pɔ́lu tuun ɖɔ mɛɖé lɛ́ ɖo klisánwun xwe kanweko nukɔntɔn ɔ tɔn lɛ́ sín agun mɛ bo kún nɔ lin nǔ, alǒ wa nǔ klisánwun ɖɔhun ó, énɛ́ wú ɔ, é gb’akpá nú Timɔtée ɖɔ é ní ɖó wǔ zɔ nú yě. (2 Tim. 2:20-22) Xɔ́ntɔn e mǐ zun xá Jexóva é xɔ akwɛ́ tawun. Mǐ ná lɔn nú mɛ ɖěbǔ ná vɔ́ da nú xɔ́ntɔn e mǐ dó gǎn tawun bo zun xá Tɔ́ mǐtɔn jǐxwé tɔn ɔ é ǎ. w22.08 5-6 akpá. 13-15

Mǐ cí mɛ ɖěɖěe nɔ gbɛ́ wǎn nú wěɖexámɛ Mawu tɔn lɛ́ é ɖɔhun ǎ, é nyɔ́ wa ɔ, mǐ nɔ kplɔ́n bo nɔ yí wǎn nú lěe Jexóva nɔ wa nǔ gbɔn é káká jɛ nǔgbódodó tɔn walɔ ɖagbe tɔn lɛ́ jí. Ényí mǐ nɔ sɔ́ le e ɖo tónúsise nú nǔgbódodó walɔ ɖagbe tɔn Jexóva tɔn lɛ́ mɛ é jlɛ́ dó nǔ e tónúmase nú yě nɔ ji lɛ́ é wú ɔ, mǐ sixú ná hlɔ̌nhlɔ́n wǎn e mǐ yí nú nǔgbódodó énɛ́ lɛ́ é. Lin tamɛ dó tagba e mɛ mɛ lɛ́ nɔ dɔn yěɖée dó, ɖó xloyixa yětɔn zɔ́n bɔ yě gbɛ́ wěɖexámɛ Jexóva tɔn e nǔnywɛ́ kpé lɛ́ é wú. Énɛ́ gúdo hǔn, kpɔ́n lěe gbɛ towe nyɔ́ sɔ ɖó a ɖo tónú se nú Mawu wɛ wútu é. (Ðɛh. 32:8, 10) Jexóva hun ali nú mɛ lɛ́ bǐ bónú yě ná mɔ nǔnywɛ́ tɔn, amɔ̌, é nɔ hɛn mɛ ɖěbǔ gǎnnugǎnnu bónú é ná yí nǔnywɛ́ tɔn ǎ. Nǔ ɖo mɔ̌ có, é nɔ tínmɛ nǔ e tónúmase nú nǔnywɛ́ tɔn nɔ ji é nú mɛ ɖěɖěe ma nɔ ɖótó ǎ lɛ́ é. (Nǔx. 1:29-32) “Lěe [yě] jɔ ɔ, [yě] ná ɖu le tɔn.” Yě ná wá se wǔvɛ́ tawun, bo ji ya titewungbe tɔn ɖó lěe yě zán gbɛ yětɔn gbɔn é wútu, bɔ ɖo vivɔnu ɔ, Jexóva ná sú kún yětɔn dó. Ðo alɔ ɖěvo mɛ ɔ, è dó akpá élɔ́ nú mɛ ɖěɖěe nɔ ɖótó wěɖexámɛ Jexóva tɔn, lobo nɔ lɛ́ zán gbɛ sɔgbe xá lɛ́ é: “Mɛ e nɔ ɖótó mì é ná nɔ vivo mɛ; ayi tɔn ná jɛ ayǐ; nǔ nyanya ɖé ná dó adohu n’i ǎ.”—Nǔx. 1:33. w22.10 21 akpá. 11-13

È ní ɖi xɛsi nú Jexóva sín tínmɛ wɛ nyí ɖɔ è ní ɖó sísí e gɔ́ngɔ́n é n’i, bɔ énɛ́ ná zɔ́n bɔ è ná nyi alɔ nú nǔ ɖěbǔ e ná vɛ́ n’i é wiwa. (Nǔx. 16:6) Énɛ́ wú ɔ, mǐ nɔ ɖo gǎn dó wɛ hwebǐnu, bo ná zán gbɛ sɔgbe xá nǔgbódodó Mawu tɔn e kúnkplá nǔ ɖagbe kpó nǔ nyanya kpó, bɔ è tínmɛ ɖo Biblu mɛ lɛ́ é. (2 Kɔ. 7:1) Ényí mǐ nɔ wa nǔ ɖěɖěe Jexóva yí wǎn ná lɛ́ é, bo nɔ nyi alɔ nú nǔ ɖěɖěe é gbɛ́ wǎn ná lɛ́ é ɔ, mǐ ná ɖ’awǎjijɛ tawun. (Ðɛh. 37:27; 97:10; Hlɔ̌. 12:9) Mɛɖé sixú tuun ɖɔ Jexóva ɖó acɛ bo ná ɖɔ nǔ e nyɔ́ é kpó nǔ e nylá é kpó, amɔ̌, é ɖó ná lɛ́ wá gbeta ɔ kɔn bá xwedó nǔgbódodó Mawu tɔn lɛ́. (Hlɔ̌. 12:2) Mǐ nɔ xlɛ́ gbɔn nǔwiwa mǐtɔn lɛ́ gblamɛ ɖɔ mǐ kú d’é jí bǐ mlɛ́mlɛ́ ɖɔ nǔgbódodó Jexóva tɔn lɛ́ xwixwedó wɛ nyí nǔ ɖagbe hú gǎn e mǐ sixú wa é. (Nǔx. 12:28) Mɔ̌ wɛ nǔ cí nú Davídi. Nǔ e wú é ɖɔ xó élɔ́ dó Jexóva wú é nɛ́: “A ná xlɛ́ gbɛ li mì; awǎjijɛ ɖo gɔ̌n towe bo túnflá, gbɛ wɛ è nɔ ɖu ɖo gɔ̌n towe káká sɔ́yi.”—Ðɛh. 16:11. w22.10 8-9 akpá. 9-10

Jezu nɔ ɖó linlin e ɖo jlɛ́ jí é dó éɖée wú, bo nɔ lɛ́ sɔ́ éɖée hwe hwebǐnu. Cóbónú é ná wá ayǐkúngban jí ɔ, é ko wa nǔ ɖagbe gěgé nú Jexóva. Jezu jí wɛ “Mawu bló nǔ e ɖo jǐnukúnsin lɛ́ kpódó éé ɖo ayǐkúngban jí lɛ́ bǐ kpán gbɔn.” (Koló. 1:16) Ðo batɛ́mu Jezu tɔn hwenu ɔ, é cí ɖɔ é flín nǔ ɖěɖěe é ko wa hwenu e é ɖo kpɔ́ xá Tɔ́ tɔn lɛ́ é bǐ. (Mat. 3:16; Jaan 17:5) Amɔ̌, nǔ énɛ́ lɛ́ e Jezu flín é zɔ́n bonú é húzú goyítɔ́ ǎ. É nyɔ́ wa ɔ, é nɔ wa nǔ ɖo ali ɖé nu gbéɖé b’ɛ nɔ xlɛ́ ɖɔ é nɔ lin ɖɔ émí kpɔ́n te hú mɛ ɖěvo lɛ́ ǎ. É ɖɔ xó élɔ́ nú ahwanvú tɔn lɛ́: ‘Gbɛtɔ́ví ɔ wá, bónú è ná sɛn ɛ ǎ, loɔ, é ná sɛn mɛ, lobo sɔ́ gbɛ tɔn jó dó xɔ gbɛ nú mɛ gěgé.’ (Mat. 20:28) É lɛ́ ɖɔ kpó mɛɖéesɔ́hwe kpó ɖɔ émí kún sixú nɔ émíɖóɖó bo wa nǔ ɖokpó vɔ́vɔ́ ó. É nɔ sɔ́ éɖée hwe tawun! Jezu sɔ́ kpɔ́ndéwú ɖagbe hú gǎn ɔ ɖ’ayǐ bɔ mǐ ná xwedó. w22.05 24 akpá. 13

Nú Jexóva wá gbeta ɔ kɔn bá sɔ́ hwɛ kɛ mɛ ɔ, é nɔ kpɔ́n ɖɔ hwɛhutɔ́ ɔ ka tuun ɖɔ nǔ e émí wa é nylá a jí. Jezu ɖe énɛ́ xlɛ́ nyi wɛn ɖo Luki 12:47, 48 mɛ. Ényí mɛɖé lin ná wa nǔɖé, bo ka tuun fɛɛ ɖɔ nǔ ɔ kún nyɔ́ Mawu nukúnmɛ ó, lobo wa hǔn, hwɛ syɛ́nsyɛ́n wɛ é hu. Jexóva sixú wá gbeta ɔ kɔn ɖɔ émí kún ná sɔ́ hwɛ kɛ mɛ mɔ̌hun ó. (Mak. 3:29; Jaan 9:41) Nukúnɖíɖó ɖé ka ɖe ɖo ninɔmɛ mɔ̌hun mɛ a? Ganjí! Jexóva nɔ lɛ́ kpɔ́n ɖɔ hwɛhutɔ́ ɔ ka lɛ́ kɔ sín hwɛ tɔn lɛ́ gúdo nǔgbó nǔgbó a jí. È ní lɛ́ kɔ sín hwɛ mɛtɔn lɛ́ gúdo wɛ nyí “è ní húzú lěe è nɔ lin nǔ gbɔn é, nǔwalɔ mɛtɔn kpó nǔ e gbé nya wɛ è ɖe lɛ́ é kpó.” Ényí nǔ nyanya e mɛɖé wa lɛ́ é, alǒ nǔ ɖagbe e é ɖó ná wa, bo ma ka wa ǎ lɛ́ é vɛ́ n’i, bɔ é lɛ́ jɛ aluwɛ ɖaxó mɛ ɖó énɛ́ wú hǔn, énɛ́ xlɛ́ ɖɔ é lɛ́ kɔ sín hwɛ tɔn lɛ́ gúdo. Nǔ nyanya e mɛ e lɛ́ kɔ sín hwɛ tɔn lɛ́ gúdo é wa lɛ́ é kɛ́ɖɛ́ wɛ nɔ dɔn ɛ dó aluwɛ mɛ ǎ, loɔ, akpa e jɛ xɔ́ntɔn e é zun xá Jexóva é wú, b’ɛ zɔ́n bɔ é wa nǔ nyanya énɛ́ lɛ́ é lɔ nɔ dɔn ɛ dó aluwɛ mɛ. w22.06 6-7 akpá. 15-17

Kɛntɔ́ mǐtɔn lɛ́ nɔ fúnfún adingbanxó lɛ́ kpé dó nɔví e ɖo nukún kpé dó nǔ lɛ́ wú wɛ ɖo tutoblónúnǔ Jexóva tɔn mɛ lɛ́ é wú, alǒ nɔ bló bónú mǐ ná xo nǔ kpɔ́n dó yě wú. (Ðɛh. 31:14) È ko wlí nɔví mǐtɔn ɖé lɛ́ bo dó hwɛ yě ɖɔ yě nyí dǎkaxotɔ́ akowunká. Nǔ mɔ̌hun gbo klisánwun xwe kanweko nukɔntɔn ɔ tɔn lɛ́ hwenu e è dó hwɛ agɔ mɛsɛ́dó Pɔ́lu bo wlí i é. Hwenu e mɛsɛ́dó Pɔ́lu ɖo gankpá mɛ ɖo Hlɔ̌ma é ɔ, mɛ ɖé lɛ́ ɖó alɔ e yě nɔ dó è é te. (2 Tim. 1:8, 15; 2:8, 9) Dǒ nukún lěe nǔ ná ko cí nú Pɔ́lu é mɛ kpɔ́n. É dɛ ɖo wǔvɛ́ gěgé nu, káká bo tlɛ sɔ́ gbɛ tɔn ɖó axɔ́ nu. (Mɛ. 20:18-21; 2 Kɔ. 1:8) Mi nú mǐ ní ma wa nǔ mɛ ɖěɖěe jó Pɔ́lu dó lɛ́ é ɖɔhun gbeɖé ó! Énɛ́ wú ɔ, é ɖó ná kpácá mǐ ɖɔ mɛ e gbé Satáan nɔ nya tawun lɛ́ é wɛ nyí nɔví ɖěɖěe ɖo nukún kpé dó nǔ lɛ́ wú wɛ lɛ́ é ǎ. É ba ɖɔ nɔví énɛ́ lɛ́ ní gɔn gbejí nɔ nú Jexóva, bo lɛ́ ba ɖɔ xɛsi ní ɖi mǐ. (1 Pi. 5:8) Kpo ɖo gǔdo nɔ nú nɔví towe lɛ́ wɛ, bo lɛ́ tɛ́dó yě wú kpó gbejíninɔ kpó.—2 Tim. 1:16-18. w22.11 16-17 akpá. 8-11

É cí ɖɔ Jwifu wɛ nú dǎnúwatɔ́ e è xwe dó atín wú ɖo Jezu kpá cóbɔ é kú é. Jwifu lɛ́ ɔ, Mawu ɖokpó wɛ yě nɔ sɛn, amɔ̌, akɔta ɖě lɛ́ ɔ, Mawu gěgé wɛ yě ɖi nǔ ná. (Tín. 20:2, 3; 1 Kɔ. 8:5, 6) Ényí dǎnúwatɔ́ énɛ́ ko nyí Kosi wɛ ɔ, nǔ e è kanbyɔ́ ɖo tɛ́si égbé tɔn mɛ é ná ko nyí: “Hwɛ nɔ ɖi xɛsi nú mawu lɛ́ ɖěbǔ ǎ wɛ a?” Gɔ́ ná ɔ, “togun Izlayɛ́li tɔn e cí lɛ̌ngbɔ́ búbú ɖɔhun é” gbé mɛ wɛ è sɛ́ Jezu dó, é nyí dó Kosi lɛ́ gbé mɛ ǎ. (Mat. 15:24) Mawu bló bɔ Izlayɛ́li ví lɛ́ tuun ɖɔ é ná fɔ́n mɛkúkú lɛ́. Dǎnúwatɔ́ ɔ, ée hwɛ tɔn lɛ́ vɛ́ ná é sixú ko tuun xó énɛ́, bɔ lěe xó éɖésúnɔ tɔn lɛ́ xlɛ́ gbɔn é ɔ, Jexóva ná fɔ́n Jezu bɔ é ná kp’acɛ dó Axɔ́súɖuto Mawu tɔn nu. É cí ɖɔ nya ɔ ɖo nukún ɖó wɛ ɖɔ Mawu ná fɔ́n émíɖésúnɔ sín kú ɖɔhun. Ðó Jwifu wɛ dǎnúwatɔ́ énɛ́ e hwɛ tɔn lɛ́ vɛ́ ná é nyí wútu ɔ, é ná ko tuun nǔ dó Adámu kpó Ɛvu kpó, gɔ́ nú palaɖísi e mɛ Jexóva sɔ́ yě ɖó é wú. Hǔn, dǎnúwatɔ́ ɔ sixú ko tuun ɖɔ palaɖísi e xó ɖɔ wɛ Jezu ɖe é ɔ, jikpá ɖaaɖagbe ɖé xó ɖɔ wɛ é ná ko ɖe.—Bǐb. 2:15. w22.12 8-9 akpá. 2-3

Gbigbɔ mímɛ́ Mawu tɔn jɛ́n sixú nyí tɔn bɔ mǐ ná kpé wɛnɖagbejíjlázɔ́ mǐtɔn wú. Aniwú? Ðó Satáan tɔ́n ahwan mǐ, bo ba ná ɖó wɛnɖagbejíjlázɔ́ mǐtɔn te. (Nǔɖe. 12:17) Ðo gbɛtɔ́ nukúnmɛ ɔ, é cí ɖɔ Satáan ɖó hlɔ̌nhlɔ́n tawun bɔ mǐ kún sixú ɖu ɖo ahwan e fun xá ɛ wɛ mǐ ɖe é jí ó ɖɔhun. Amɔ̌, gbɔn wɛnɖagbejíjlázɔ́ mǐtɔn gblamɛ ɔ, mǐ nɔ ɖu ɖo jǐ tɔn! (Nǔɖe. 12:9-11) Ðo ali tɛ́ nu? Ényí mǐ nɔ ɖ’alɔ ɖo sinsɛnzɔ́ ɔ mɛ hǔn, xlɛ́xlɛ́ wɛ mǐ ɖe mɔ̌ ɖɔ mǐ kún ɖo xɛsi ɖi nú ahwan e tɔ́n mǐ wɛ Satáan ɖe é ó nɛ́. Hweɖébǔnu e mǐ ɖɔ Mawuxó é ɔ, é nɔ cí ɖɔ Satáan cí ahwan wɛ ɖɔhun. Énɛ́ xlɛ́ ɖɔ gbigbɔ mímɛ́ Mawu tɔn nɔ ná hlɔ̌nhlɔ́n mǐ, lobɔ nǔ mǐtɔn lɛ́ nyɔ́ Jexóva nukúnmɛ. (Mat. 5:10-12; 1 Pi. 4:14) Gbigbɔ mímɛ́ Mawu tɔn sixú ná mǐ hlɔ̌nhlɔ́n e sín hudó mǐ ɖó bo ná ɖí xwi xá wǔvɛ́ ɖěbǔ e mǐ ná mɔ ɖo sinsɛnzɔ́ ɔ mɛ é. (2 Kɔ. 4:7-9) Bɔ étɛ́ mǐ ka sixú wa bo ná dó kú d’é jí ɖɔ mǐ kpo ɖo gbigbɔ mímɛ́ Mawu tɔn mɔ wɛ? Mǐ ɖó ná nɔ xo ɖɛ kpó kanɖódónǔwú kpó dó byɔ́, lobo kú d’é jí ɖɔ Jexóva ná se ɖɛ e xo sɛ́dó è wɛ mǐ ɖe lɛ́ é. w22.11 5-6 akpá. 10-11

Mǐ nɔ ɖe wǎnyíyí xlɛ́ nɔví mǐtɔn lɛ́ gbɔn tíntɛ́nkpɔ́n bo nɔ fífá mɛ xá yě gblamɛ. Mǐ nɔ tɛ́n kpɔ́n bo nɔ xwedó kpɔ́ndéwú hwɛsɔ́kɛmɛ tɔn Jexóva tɔn. Ényí Jexóva sɔ́ jlǒ dó sɔ́ Vǐ tɔn jó bɔ é kú dó hwɛ mǐtɔn lɛ́ tamɛ ɔ, mǐ lɔ ɖó ná ɖo gbesisɔmɛ bá sɔ́ hwɛ kɛ nɔví mǐtɔn lɛ́ hwenu e yě jɛ agɔ dó mǐ é ǎ cé? Mǐ ba ná cí kannumɔ nyanya e xó Jezu ɖɔ ɖo lǒ tɔn lɛ́ ɖokpó mɛ é ɖɔhun ǎ. Kannumɔ énɛ́ sín gǎn sɔ́ axɔ́ ɖaxó e é ɖu dó è é kɛ ɛ có, éyɛ́ ka sɔ́ hwɛ kɛ kannumɔ gbɛ̌ tɔn ɖěvo e ɖu axɔ́ kpɛví títí ɖé dó è é ǎ. (Mat. 18:23-35) Ényí kwinkwin ɖé ɖo hwi kpó nɔví ɖé kpó tɛ́ntin ɖo agun ɔ mɛ ɔ, a ka ná sixú ɖe afɔ nukɔntɔn ɔ, bo xo fífá kan cóbó yi kú Klísu tɔn flínflín domɛ a? (Mat. 5:23, 24) Ényí a wa mɔ̌ ɔ, a ná ɖe xlɛ́ ɖɔ émí yí wǎn ɖaxó nú Jexóva kpó Jezu kpó. w23.01 29 akpá. 8-9

Ali e nu a sixú tuun nǔ e hudó nɔví towe lɛ́ ɖe é ɖokpó wɛ nyí ɖɔ a ní ɖó ayi te dó kan nǔ byɔ́ yě. (Nǔx. 20:5) Yě ka ɖó nǔɖuɖu, amasin, gɔ́ nú dandannú gbɛmɛ tɔn ɖěvo lɛ́ a? Azɔ̌ gblé dó yě, alǒ yě sɔ́ ɖó akwɛ́ káká ɖé bá dó sú xɔkwɛ́ ǎ wɛ a? Yě ka ɖó hudó mɛ e ná d’alɔ yě bɔ yě ná d’alɔ wěma mɛ, bá dó ɖu le alɔ e acɛkpikpa nɔ dó mɛ é tɔn wɛ a? Jexóva byɔ́ mǐ mɛ bǐ ɖɔ mǐ ní nɔ dó wǔsyɛ́n lanmɛ nú mɛ ɖěvo lɛ́, bo nɔ lɛ́ d’alɔ yě. (Ga. 6:10) Ényí mǐ ná bo tlɛ wa nǔ kléwún ɖé dó d’alɔ mɛ e ɖo azɔn jɛ wɛ é ɖé ɔ, é sixú dó wǔsyɛ́n lanmɛ n’i tawun. Yɔkpɔ́vú ɖé sixú sɛ́ káti, alǒ desɛ́ɛn e é ɖe é dó nɔví súnnu ɖé dó dó wǔsyɛ́n lanmɛ n’i. Mɛ wínnyáwínnyá ɖé sixú xwlé axi, alǒ wa nǔ mɔ̌hun ɖěvo lɛ́ nú nɔví nyɔ̌nu ɖé. Mɛ ɖěvo e ɖo agun ɔ mɛ lɛ́ é sixú ɖa nǔɖuɖu yi jó nú mɛ e ɖo agun ɔ mɛ bo ɖo azɔn jɛ wɛ é ɖé. Kúnnuɖetɔ́ ɖé lɛ́ sɛ́ wěmasɛ́dómɛ wǔsyɛ́n dó lanmɛ nú mɛ tɔn ɖé lɛ́ dó mɛxó agun tɔn lɛ́; hwɛhwɛ ɔ, mɛxó agun tɔn énɛ́ lɛ́ sín alɔnu nɔ ján ɖo jɛmɛjí ɖé hwenu hú lěe alɔnu yětɔn ko nɔ ján gbɔn ɖ’ayǐ é. Ényí mǐ wa nǔ e wú mǐ kpé é bǐ, bo ‘ná akɔ́nkpinkpan mǐɖée, lobo dó wǔsyɛ́n lanmɛ nú mǐɖée’ ɔ, é nɔ nyɔ́ tawun!—1 Tɛ. 5:11. w22.12 22 akpá. 2; 23-24 akpá. 5, 6

Nǔ e ɖo Nǔwlánwlán mímɛ́ Ebléegbe tɔn lɛ́ sín wěma atɔ́ɔ́n nukɔntɔn lɛ́ mɛ lɛ́ é má Saduseɛn lɛ́ tawun, amɔ̌, yě yí gbe nú nǔgbó tají ɖěɖěe ɖo wěma énɛ́ lɛ́ e Mawu sɔ́ d’ayi mɛ nú mɛ, bɔ è wlán lɛ́ é mɛ lɛ́ é ǎ. Ði kpɔ́ndéwú ɔ, mǐ ní gbéjé lěe Jezu ná xósin yě gbɔn hwenu e yě kan nǔ byɔ́ ɛ dó fínfɔ́n sín kú wú é kpɔ́n. É kanbyɔ́ yě ɖɔ: “Mi xa xó e Mawu ɖɔ nú Mɔyízi é ɖo wěma Mɔyízi tɔn mɛ, ɖo tan e kúnkplá wunkan ɔ é mɛ ǎ cé? É ɖɔ: ‘Un nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’” (Mak. 12:18, 26) É ɖo wɛn ɖɔ Saduseɛn lɛ́ ko xa akpáxwé énɛ́ azɔn mɔ̌kpán có, nǔ e Jezu kanbyɔ́ é xlɛ́ ɖɔ yě kún ké ya nú nǔgbó tají Mawuxówéma ɔ tɔn e kúnkplá fínfɔ́n sín kú é ó. (Luk. 20:38) Étɛ́ énɛ́ ka sixú kplɔ́n mǐ? Ényí mǐ ɖo nǔ xa wɛ ɔ, mǐ nɔ ba ná ɖó ayi te dó nǔ ɖěɖěe wěmafɔ ɖé, alǒ tan Biblu tɔn ɖé sixú kplɔ́n mǐ lɛ́ é bǐ wú. Mǐ nɔ ba ná mɔ nǔkplɔ́nmɛ nukɔn nukɔntɔn lɛ́ kɛ́ɖɛ́ kpowun ǎ, loɔ, mǐ nɔ lɛ́ ba ná mɔ nǔgbó kpó nǔgbódodó kpó ɖěɖěe gɔ́ngɔ́n, bo ɖo hwlǎhwlá lɛ́ é. w23.02 11 akpá. 9-10

Mɛ e dó gesí wɛ tɛ́si égbé tɔn ɖe lɛ́ é bǐ wɛ gbɔn tagba syɛ́nsyɛ́n lɛ́ mɛ có, yě nɔ gbejí nú Jexóva ɖo gbɛzán yětɔn bǐ mɛ. (Ebl. 11:36-40) Yě dɛ, bo lɛ́ dó gǎn énɛ́ lɛ́ bǐ dó wǔvɔ́ wɛ a? Cɛ́nnyícɛ́nnyí ɖé lɔ ǎ! Yě ná bo ma tlɛ mɔ lěe akpá Mawu tɔn lɛ́ bǐ jɛnu mlɛ́mlɛ́ gbɔn é ɖo gbɛhwenu yětɔn ǎ ɔ, yě ka kpo ɖo nukún ɖó Jexóva wɛ. Gɔ́ ná ɔ, kú e yě kú d’é jí ɖɔ nǔ émítɔn lɔ nyɔ́ Jexóva nukúnmɛ é zɔ́n bɔ yě kán ɖ’é jí ɖɔ émí lɔ ná mɔ akpá tɔn sín jijɛnu. (Ebl. 11:4, 5) Kpɔ́ndéwú yětɔn sixú ná hlɔ̌nhlɔ́n kán e mǐ kán ɖ’é jí bo ná kpo ɖo nukún ɖó Jexóva wɛ é. Égbé ɔ, mǐ ɖo gbɛ nɔ wɛ ɖo gbɛ e fɔ́n bo lɛ́ ɖo nylǎnylá d’é jí wɛ é ɖé mɛ. (2 Tim. 3:13) Satáan kpo ɖo togun Mawu tɔn tɛ́n kpɔ́n wɛ. Wǔvɛ́ lɛ́ ɖo nukɔn jawě có, mi nú mǐ ní kán ɖ’é jí bá w’azɔ̌ syɛ́nsyɛ́n nú Jexóva, lobo ɖeji ɖɔ “Mawu gbɛɖe e nyí Mɛhwlɛ́ngántɔ́ gbɛtɔ́ lɛ́ bǐ tɔn ɔ ɖó nukún wɛ” mǐ ɖe.—1 Tim. 4:10. w22.06 25 akpá. 17-18

Hwɛjijɔ e wú mǐ ɖó ná tɛ́n kpɔ́n bo nɔ ganjí ɖo agbaza mɛ é ɖokpó wɛ nyí ɖɔ énɛ́ ná zɔ́n bɔ mǐ ná sɛn Jexóva kpó nǔwúkpíkpé mǐtɔn lɛ́ bǐ kpó. (Mak. 12:30) Énɛ́ wú ɔ, mǐ ba ná nyi alɔ nú nǔ ɖěɖěe mǐ tuun ɖɔ yě sixú d’azɔn mǐ lɛ́ é wiwa. (Hlɔ̌. 12:1) É ɖo wɛn ɖɔ, mǐ ná bo tlɛ wa nǔ ɖěbǔ ɔ, mǐ sixú ɖɔ bo tɛ afɔ jí ɖɔ mǐ kún ná jɛ azɔn gbeɖé ó ǎ. Amɔ̌, mǐ nɔ wa nǔ e wú mǐ kpé é, ɖó mǐ ba ná xlɛ́ Tɔ́ mǐtɔn jǐxwé tɔn ɔ ɖɔ gbɛ e é ná mǐ é xɔ akwɛ́ ɖo nukún mǐtɔn mɛ. Azɔn kpó kpikpo kpó sixú sú ali dó mǐ bɔ nǔ e mǐ ko nɔ wa ɖ’ayǐ lɛ́ é gěgé wiwa ná vɛ́ wǔ nú mǐ. Wǎgbɔ tɔn ɔ, xomɛ sixú nɔ sin mǐ, bɔ mǐ lɛ́ flú. Amɔ̌, mǐ ɖó ná jó gbe bo dóvɛ̌ nú agbaza mǐtɔn gbeɖé ǎ. Aniwú? Ðó nú mǐ ná bo kpo gbɔn ɖěbǔ, alǒ ɖo azɔn jɛ wɛ gbɔn ɖěbǔ ɔ, mǐ sixú kpo ɖo susu kpa nú Jexóva wɛ axɔ́sú Davídi ɖɔhun. Tuun e mǐ tuun ɖɔ mǐ nyí hwɛhutɔ́ có, nǔ mǐtɔn ka nɔ nyɔ́ Mawu nukúnmɛ é nɔ su nukún mǐtɔn mɛ tawun. (Mat. 10:29-31) Mǐ ná bo tlɛ kú ɔ, akpakpa ɖo sísɔ́ ɛ wɛ bɔ é ná fɔ́n mǐ sín kú. (Jɔb. 14:14, 15) Din e mǐ ɖo gbɛ é ɔ, mǐ ba ná wa nǔ e wú mǐ kpé é bǐ dó nɔ ganjí ɖo agbaza mɛ, lobo lɛ́ nɔ ayijayǐ mɛ. w23.02 20-21 akpá. 3-5

Mɛ wɔ̌búwɔ́bú e ɖo lɛ̌ngbɔ́ ɖěvo lɛ́ mɛ é sín nyǐkɔ ka ná nɔ gbɛwéma ɔ mɛ hwenu e yě ná ko xo Aamagedɔ́ni zlɛ́ gúdo é a? Ganjí. (Nǔɖe. 7:14) Jezu ɖɔ ɖɔ mɛ énɛ́ lɛ́ e cí lɛ̌ngbɔ́ ɖɔhun é “ná mɔ gbɛ mavɔmavɔ.” (Mat. 25:46) Amɔ̌, è ná dó gbɛ mavɔmavɔ sín ajɔ mɛ ɖěɖěe ná xo Aamagedɔ́ni zlɛ́ lɛ́ é afɔjí afɔjí ǎ. Ðo Axɔ́súɖuɖu xwe afatɔ́n tɔn ɔ hwenu ɔ, Jezu “ná nyí Lɛ̌ngbɔ́nyitɔ́ yětɔn, bo ná kplá yě yi fí e sin ɖagbe e nɔ ná gbɛ mɛ ɔ nɔ tɔ́n sín lɛ́” é. Mɛ ɖěɖěe nɔ xwedó ali e xlɛ́ yě wɛ Klísu ɖe, bɔ è ná wá mɔ ɖɔ yě ɖo gbejí nú Jexóva lɛ́ é sín nyǐkɔ wɛ ná nɔ gbɛwéma ɔ mɛ káká sɔ́yi. (Nǔɖe. 7:16, 17) Amɔ̌, gbɔ̌ lɛ́ ɔ, è ná sú kún yětɔn dó ɖo Aamagedɔ́ni hwenu. Jezu ɖɔ “è ná sú mɛ énɛ́ lɛ́ sín kún dó káká sɔ́yi.” (Mat. 25:46) Mawu sɔ́ d’ayi mɛ nú mɛsɛ́dó Pɔ́lu bɔ é ɖɔ nú mǐ ɖɔ: “É ná sɔ́ kú mavɔmavɔ dó dɔn tó nú yě.”—2 Tɛ. 1:9; 2 Pi. 2:9. w22.09 16 akpá. 7-8

Ényí xwédo lɛ́ nɔ ɖu vǐví nǔ e Jexóva dá lɛ́ é tɔn ɔ, é ná zɔ́n bɔ yě ná d’ayihún ɖó kpɔ́ bo lɛ́ ɖe ayi ɖ’ayǐ; énɛ́ ná d’alɔ yě bɔ yě ná yí wǎn nú yěɖée lɛ́ d’é jí. (Nǔt. 3:1, 4.) Jexóva bló fí ɖɛkpɛ ɖɛkpɛ lɛ́ ɖó ayǐkúngban jí, bɔ mǐ sixú bló nǔ e mǐ yí wǎn ná lɛ́ é ɖo fí énɛ́ lɛ́. Xwédo gěgé yí wǎn nú nǔ ɖu ɖó kpɔ́, sa ɖi yi tomɛ ɖó kpɔ́, só fínfán ɖó kpɔ́, alǒ xutó yiyi. Ðo gbɛ yɔ̌yɔ́ Mawu tɔn mɛ ɔ, mɛjitɔ́ lɛ́ kpó vǐ lɛ́ kpó ná ɖu vǐví nǔɖíɖó Jexóva tɔn lɛ́ tɔn, lěe yě ma ko ɖu gbɔn kpɔ́n ǎ é. Hwenɛ́nu ɔ, mǐ sɔ́ ná ɖi xɛsi nú kanlin lɛ́ ɖě ǎ; yě lɔ ka sɔ́ ná ɖi xɛsi nú mǐ lɔmɔ̌ ǎ. (Eza. 11:6-9) Mǐ ná ɖu vǐví nǔ e Jexóva dá lɛ́ é tɔn nú hwenu maxamaxa lɛ́. (Ðɛh. 22:27) Amɔ̌, mɛjitɔ́ lɛ́ mi, mi ma nɔ te kpɔ́n hwenɛ́nu cóbó d’alɔ vǐ mitɔn lɛ́ bónú yě jɛ nǔɖíɖó lɛ́ sín vǐví ɖu jí ó. Ényí mi nɔ zán nǔɖíɖó lɛ́ dó kplɔ́n nǔ vǐ mitɔn lɛ́ dó Jexóva wú ɔ, yě lɔ ná ɖibla ɖɔ axɔ́sú Davídi ɖɔhun ɖɔ: ‘Jexóva nǔmɛsɛn ɖě sixú wa azɔ̌ e a nɔ wa lɛ́ é ǎ.’—Ðɛh. 86:8. w23.03 25 akpá. 16-17