Octobre

Mǐ bǐ sixú ɖ’alɔ ɖo kplé mǐtɔn lɛ́ mɛ gbɔn gbe mǐtɔn lɛ́ sísɔ́ dó jǐ dó ji han, kpó xósin e mǐ sɔ́ nǔ ná ganjí lɛ́ é níná kpó gblamɛ. É nɔ vɛ́ wǔ nú mɛɖé lɛ́ ɖɔ yě ní ji han, alǒ ná xósin ɖo kplé agun tɔn lɛ́ jí. Mɔ̌ wɛ nǔ nɔ cí nú hwiɖésú a? Ényí mɔ̌ hǔn, kpɔ́n nǔ e mɛ ɖěvo lɛ́ wa dó ɖu ɖo xɛsi yětɔn lɛ́ jí é. Mɛ ɖé lɛ́ mɔ ɖɔ hanjiji kpó ayi bǐ kpó nɔ d’alɔ émí. Ényí mǐ ɖo han Axɔ́súɖuto ɔ tɔn mǐtɔn lɛ́ ji wɛ ɔ, nǔ nukɔntɔn e jí mǐ ɖó ná sɔ́ ayǐ ɖó é wɛ nyí susu kpikpa nú Jexóva. Énɛ́ wú ɔ, ényí a ɖo nǔ sɔ́ nú kplé lɛ́ wɛ hǔn, nɔ lɛ́ kplɔ́n lěe è nɔ ji han lɛ́ gbɔn é bo nɔ tɛ́n kpɔ́n bo nɔ mɔ kancícá e ɖo xógbe han lɛ́ tɔn kpó nǔ ɖěɖěe jí ná ɖɔ xó dó wɛ è ɖe ɖo kplé ɔ jí lɛ́ é kpó tɛ́ntin é. Gɔ́ ná ɔ, nɔ sɔ́ ayi ɖó xógbe han lɛ́ tɔn jí hú gǎn, ní ma nɔ nyí dó nǔwúkpíkpé e a ɖó bo nɔ ji han é jí ó. Xósín níná sixú vɛ́ wǔ tawun nú mɛɖé lɛ́. Étɛ́ ka ná d’alɔ? Nɔ tɛ́n kpɔ́n bo nɔ ná xósin ɖo kplé lɛ́ bǐ jí. Ka flín, ényí xósin towe ɖo kléwún, bɔkun, bo lɛ́ yi nǔ tají ɔ jí hǔn, é xlɛ́ ɖɔ é sɔgbe. Kán e mǐ kán ɖ’é jí bo ná kpa susu nú Jexóva ɖo kplé agun tɔn mǐtɔn lɛ́ jí é nɔ su nukún tɔn mɛ tawun. w22.04 7-8 akpá. 12-15

Xógbe “d’alɔ” nɔ dó gesí mɛ e kán wezun, bo ná yi d’alɔ mɛ e ɖo xó sú dó byɔ́ alɔdó wɛ é ɖé é. Dǒ nukún mɛ kpɔ́n, Jexóva ɖo hwlɛndó jí bo ná yi hwlɛ́n mɛ e ɖo aluwɛ mɛ é ɖé. É ɖo wɛn ɖɔ a ná yí gbe ɖɔ tínmɛ énɛ́ ɖe jlǒ e Jexóva ɖó, ɛɛn, akpakpa e ɖo sísɔ́ ɛ wɛ bónú é ná d’alɔ mǐ é xlɛ́. Jexóva ɖo ahwan mǐtɔn mɛ ɔ, mǐ sixú dɛ ɖo wǔvɛ́ mǐtɔn lɛ́ nu kpó awǎjijɛ kpó. Ali tɛ́ lɛ́ nu mɔ̌ Jexóva ka nɔ d’alɔ mǐ ɖe? Bo ná dó mɔ xósin ɔ ɔ, mi nú mǐ ní gbéjé akpáxwé ɖé lɛ́ kpɔ́n ɖo wěma Ezayíi tɔn mɛ. Aniwú? Nǔɖɔɖayǐ e Jexóva sɔ́ dó ayi mɛ nú Ezayíi bɔ é wlán lɛ́ é gěgé kúnkplá mɛsɛntɔ́ Mawu tɔn lɛ́ ɖo égbé. Gɔ́ ná ɔ, hwɛhwɛ wɛ Ezayíi zán xógbe e bɔkun tawun lɛ́ é dó ɖɔ xó dó Jexóva wú. Mǐ ní kpɔ́n kpɔ́ndéwú tɔn ɖokpó ɖo Ezayíi wěmata 30gɔ́ ɔ mɛ. Ðo wěmata énɛ́ mɛ ɔ, Ezayíi zán nǔjlɛ́dónǔwú ɖaaɖagbe lɛ́, dó tínmɛ lěe Jexóva nɔ d’alɔ togun tɔn gbɔn é; é wlán ɖɔ Jexóva nɔ wa nǔ élɔ́ lɛ́ dó d’alɔ mǐ: (1) nɔ ɖótó ɖɛ mǐtɔn lɛ́ kpó sɔxwixwe kpó, bo nɔ lɛ́ ná xósin nú yě, (2) nɔ ɖe wě xá mǐ, (3) nɔ kɔn nyɔ̌ná lɛ́ dó mǐ jí din, bo ná lɛ́ wa mɔ̌ ɖo sɔgúdo. w22.11 8-9 akpá. 2-3

Ðo xó e Jezu ɖɔ sɛ́dó agun Simíini kpó Filadɛlufíi kpó tɔn é mɛ ɔ, é ɖɔ nú Klisánwun e ɖo fínɛ́ lɛ́ é ɖɔ yě ní ma ɖi xɛsi nú yadónúmɛ ó, ɖó è ná d’ajɔ yě ɖó gbejíninɔ yětɔn wú. (Nǔɖe. 3:10) Mǐ ɖó ná ɖó nukún ɖɔ è ná dó ya nú mǐ, bɔ mǐ ka ɖó ná ɖo gbesisɔmɛ bá dɛ ɖ’é nu. (Mat. 24:9, 13; 2 Kɔ. 12:10) Wěma Nǔɖexlɛ́mɛ tɔn flín mǐ ɖɔ è ná dó ya nú togun Mawu tɔn ɖo “Aklúnɔ sín azǎn gbe,” énɛ́ wɛ nyí hwenu e mǐ ɖe din é. (Nǔɖe. 1:10) Nǔɖexlɛ́mɛ wěmata 12gɔ́ ɔ ɖɔ ɖɔ è ɖó Axɔ́súɖuto Mawu tɔn ayǐ gúdo tlóló é ɔ, ahwan tɔ́n ɖo jǐxwé. Micɛ́li, éé nyí Jezu Klísu susunɔ ɔ é kpó ahwankpá tɔn lɛ́ kpó fun ahwan xá Satáan kpó awǒvi tɔn lɛ́ kpó. (Nǔɖe. 12:7, 8) Wǎgbɔ tɔn ɔ, è ɖu ɖo kɛntɔ́ Mawu tɔn lɛ́ jí, bo sɔ́ yě nyi dó ayǐkúngban ɔ jí, bɔ yě ɖo wǔvɛ́ ɖó nú gbɛtɔ́ lɛ́ wɛ dó nǔjɔnǔ mɛ.—Nǔɖe. 12:9, 12. w22.05 5 akpá. 12-13

Hwɛ e Jexóva nɔ ɖɔ lɛ́ é nɔ sɔgbe, bo nɔ lɛ́ nyí hwɛ jlɔ́jlɔ́ hwebǐnu. É nɔ ɖe mɛɖé ɖó vo ɖo mɛɖé mɛ gbeɖé ǎ. É nɔ zɔn dó nǔ élɔ́ lɛ́ wú gbeɖé dó sɔ́ hwɛ kɛ mɛ ǎ: lěe mɛ ɔ ɖe ɖo wěxo é, dɔkun e é jɛ é, mɛ nukúnɖéjí e é nyí é, alǒ nǔwúkpíkpé e é ɖó lɛ́ é. (1 Sam. 16:7; Ja. 2:1-4) Mɛɖé sixú gbídí kɔ nú Jexóva alǒ dó nǔ nu n’i ǎ. Xomɛsin, alǒ lěe nǔ nɔ cí nú mɛ é nɔ wa nǔ dó gbeta e kɔn É nɔ wá lɛ́ é wú gbeɖé ǎ. (Tín. 34:7) É ɖo wɛn ɖɔ Jexóva wɛ nyí Hwɛɖɔtɔ́ ɖagbe hú gǎn ɔ, ɖó é nɔ mɔ nǔ jɛ nǔ e kúnkplá mǐ lɛ́ é kpó ninɔmɛ mǐtɔn kpó bǐ wú. (Sɛ́n. 32:4) Mɛ ɖěɖěe wlán Akpáxwé Biblu tɔn e è wlán dó Ebléegbe mɛ lɛ́ é yí gbe ɖɔ hwɛsɔ́kɛmɛ Jexóva tɔn kún kpé we ó. Ðo ninɔmɛ ɖé lɛ́ mɛ ɔ, yě zán xókwín Ebléegbe tɔn ɖé, bɔ wěma alɔdlɛ́ndónǔ tɔn ɖé ɖɔ xó élɔ́ d’é wú: “Lěe Mawu nɔ sɔ́ hwɛ kɛ hwɛhutɔ́ lɛ́ gbɔn é kɛ́ɖɛ́ wɛ è zán xókwín énɛ́ dó tínmɛ ná; è zán xókwín énɛ́ gbeɖé dó ɖɔ xó dó hwɛ e gbɛtɔ́ lɛ́ nɔ sɔ́ kɛ yěɖée bɔ é ɖó dogbó é wú ǎ.” Jexóva ɖokpónɔ wɛ ɖ’acɛ bo ná sɔ́ hwɛ kɛ hwɛhutɔ́ e lɛ́ kɔ sín hwɛ tɔn lɛ́ gǔdo é bǐ mlɛ́mlɛ́. w22.06 4-5 akpá. 10-11

Ényí hwiɖokpónɔ wɛ ɖo vǐ towe lɛ́ wú kpé nukún dó wɛ, alǒ xwédo e klán ɖo sinsɛn lixo é mɛ wɛ a ɖe hǔn, kú d’é jí ɖɔ kpɔ́ndéwú gbejíninɔ tɔn towe nɔ ná hlɔ̌nhlɔ́n mɛ e lɛ́ lɛ̌ dó we lɛ́ é, bo nɔ lɛ́ sísɛ́ yě bɔ yě nɔ wa nǔ. Ényí a ɖo gǎn e wú a kpé é bǐ dó wɛ, b’ɛ ka cí ɖɔ vǐ towe kún ɖo nǔ e ɖɔ wɛ a ɖe é ɖě se wɛ ó ɔ ka lo? Flín ɖɔ vǐ kplɔ́nkplɔ́n nɔ ɖu hwenu. Ényí a dó nǔkún ɖé ɔ, a sixú nɔ wá kanbyɔ́ hwiɖée hweɖélɛ́nu ɖɔ é ka ná su káká bo ná wá ná sínsɛ́n a jí. Nǔgbó wɛ ɖɔ a ɖó acɛ dó sínsɛ́n e é ná wá ná é jí ǎ có, a nɔ kpo ɖo sin hú ná wɛ, bo ná dó hun ali ɖagbe hú gǎn ɖé n’i bónú é ná su. (Mak. 4:26-29) Ðo ali ɖokpó ɔ nu ɔ, vǐnɔ ɖé sixú nɔ kanbyɔ́ éɖée hweɖélɛ́nu ɖɔ gǎn e dó wɛ émí ɖe lɛ́ é ka ɖo alɔ dó vǐ émítɔn lɛ́ wɛ nǔgbó nǔgbó bónú yě ná yí wǎn nú Jexóva a jí. A sixú ɖ’acɛ dó gbeta e kɔn vǐ towe lɛ́ ná wá é jí ǎ. Amɔ̌, ényí a kpo ɖo nǔ e wú a kpé é bǐ wa dó kplɔ́n nǔ yě wɛ ɔ, a ná hun ali ɖagbe hú gǎn ɔ nú yě, bɔ yě ná zun xɔ́ntɔn xá Mawu. w22.04 19-21 akpá. 16-17

Hwenu e Salomɔ́ɔ kpo ɖo Jexóva sɛn wɛ kpó gbejíninɔ kpó é ɔ, é nɔ ɖó linlin e ɖo jlɛ̌ jí é dó éɖée wú. Hwenu e é ɖo wǐnnyáwínnyá mɛ é ɔ, é yí gbe kpó mɛɖéesɔ́hwe kpó ɖɔ émí hwe dó nǔ wú, lobo ba alixlɛ́mɛ Jexóva tɔn. (1 Axɔ́. 3:7-9) Salomɔ́ɔ jɛ acɛ kpa jí bɔ é ná nɔ zaan é ɔ, é lɛ́ ɖ’ayi wú ɖɔ goyíyí ɔ awǒvinú wɛ. É wlán ɖɔ: “Mɛɖé ja cu kpé gbé ɔ, goyíyí wɛ é nɔ bɛ́. Mɛ e nɔ mɔ éɖée ɔ nɔ sɔ́ éɖée nyi gbě.” Nukɔnmɛ ɔ, é blá wǔ ɖɔ Salomɔ́ɔ kún kpé wú bo zán wě e éɖésúnɔ ɖe xa mɛ é ó. É wá su hweɖénu bɔ é jɛ éɖée mɛ mɔ jí, bo sɔ́ nɔ xwedó alixlɛ́mɛ Mawu tɔn lɛ́ ǎ. Ði kpɔ́ndéwú ɔ, sɛ́n e Mawu dó lɛ́ é ɖokpó ɖɔ ɖɔ axɔ́sú Eblée ɖé kún ɖó ná “ɖó asi gěgé ó; é táá jó Mawu dó.” (Sɛ́n. 17:17) Salomɔ́ɔ xwedó sɛ́n énɛ́ ǎ, bo da asi 700, lobo lɛ́ ɖó xɔnnɔ 300! (1 Axɔ́. 11:1-3) Vlafo Salomɔ́ɔ sixú ko lin ɖɔ yě kún ná dɔn émí dó ali nyanya jí ó. Salomɔ́ɔ wá sún sin tónú e é ma se nú Jexóva ǎ é tɔn.—1 Axɔ́. 11:9-13. w22.05 23-24 akpá. 12

Gbɛtɔ́ lɛ́ bǐ ɖó ná wá gbeta tají ɖé kɔn ɖo égbé. Yě ná nɔ gǔdo nú Jexóva Mawu e ɖ’acɛ bo ná kp’acɛ dó gbɛ ɔ nu é, alǒ yě ná nɔ gǔdo nú Satáan Awǒvi éé nyí kɛntɔ́ tɔn dǎkaxotɔ́ ɔ é. Mɛ ɖokpó ɖokpó ná sɔ́ akpáxwé ɖé dandan. Ényí yě ná nɔ gbɛ káká sɔ́yi kpó yě ná gbɔ kpó ɔ, é ná sín gbeta e kɔn yě ná wá é wú. (Mat. 25:31-33, 46) Ðo “ya ɖaxó ɔ” hwenu ɔ, è ná ɖó wuntun e ná zɔ́n bɔ yě ná gán é, alǒ wuntun e ná zɔ́n bɔ è ná sú kún yětɔn dó é yě. (Nǔɖe. 7:14; 14:9-11; Ezek. 9:4, 6) Ényí a wá gbeta ɔ kɔn bá nɔ gǔdo nú acɛ e Jexóva ɖó bo ná kpa acɛ é hǔn, gbeta e nǔnywɛ́ kpé é ɖé kɔn wɛ a wá nɛ́. Din ɔ, akpakpa ɖo sísɔ́ we wɛ bónú a ná d’alɔ mɛ ɖěvo lɛ́, bɔ yě lɔ ná wá gbeta ɖagbe ɔ kɔn. Gbejínɔtɔ́ e nɔ gǔdo nú acɛkpikpa Jexóva tɔn lɛ́ é ná mɔ nyɔ̌ná gěgé. Mǐ ɖó ná kplɔ́n nǔgbó tají énɛ́ lɛ́. Mɔ̌ wiwa ná ná hlɔ̌nhlɔ́n kán e mǐ kán ɖ’é jí bo ná kpo ɖo Jexóva sɛn wɛ é. Gɔ́ ná ɔ, mǐ sixú zán nǔ e mǐ ko kplɔ́n lɛ́ é dó d’alɔ mɛ ɖěvo lɛ́ bónú yě ná wá gbeta ɔ kɔn bá sɛn Jexóva, lobo lɛ́ tɛ́dó wǔtu tɔn. w22.05 15 akpá. 1-2

Mǐ ɖó ná nɔ ɖótó kɛntɔ́ mǐtɔn lɛ́ ǎ, é nyɔ́ wa ɔ, Jexóva wɛ mǐ ná nɔ ɖótó. Jɔbu tɛ́tó ganjí hwenu e Jexóva ɖo xó ɖɔ n’i wɛ é. Mawu zɔ́n tamɛ lin Jɔbu gbɔn nǔ élɔ́ e é kanbyɔ́ ɛ é gblamɛ: ‘Un tuun nǔ e ɖo gbigbo we wɛ lɛ́ é tɛ́nwín lɛnwín. A lin ɖɔ un kún sixú kpé nukún dó wǔ we ó wɛ a?’ Jɔbu yí gbe kpó mɛɖéesɔ́hwe kpó, bo lɛ́ ɖe lěe ɖagbewiwa Jexóva tɔn su nukún tɔn mɛ sɔ é xlɛ́. É ɖɔ: “Káká jɛ fí ɔ, è ɖɔ xó towe bɔ un se; amɔ̌, din ɔ, un mɔ we ɖó nukún wú.” (Jɔb. 42:5) É cí ɖɔ hwenu e Jɔbu ɖɔ xó énɛ́ lɛ́ é ɔ, é kpo ɖo ayǐjínjɔ́n ɖo afín mɛ, bɔ akpa gbɔn wǔ tɔn bǐ. É ɖo mɔ̌ có, Jexóva dó zǒgbe jí nú Jɔbu ɖɔ émí yí wǎn n’i, bo lɛ́ vɔ́ gǎnjɛwú ná ɛ ɖɔ nǔ tɔn nyɔ́ nukún émítɔn mɛ. (Jɔb. 42:7, 8) Égbé ɖésú ɔ, mɛ lɛ́ sixú nɔ zun mǐ, bo nɔ gblɔ́n adǎn nú mǐ, cí nǔ ɖɔ mǐ kún hwɛ́n nǔɖé ó ɖɔhun. Yě sixú tɛ́n kpɔ́n bo ná kɔ́n wi e ɖo ta mǐtɔn é, alǒ kɔn cí dó tutoblónúnǔ ɔ wú. Tan Jɔbu tɔn kplɔ́n mǐ ɖɔ Jexóva nɔ ɖeji ɖɔ ényí mǐ ɖo tagba lɛ́ mɛ gbɔn wɛ ɔ, mǐ ná kpo ɖo gbejí nú émí. w22.06 24-25 akpá. 15-16

Nǔgbó wɛ ɖɔ mɛ ɖěɖěe ɖo jǐxwé lɛ́ é ná sú xó ɖaxó dó ɖe awǎjijɛ yětɔn xlɛ́ hwenu e è ná ko sú Babilɔ́nu Ðaxó ɔ sín kún dó é, amɔ̌, nǔ ɖěvo ná ɖe bo ná lɛ́ d’awǎjijɛ ɖaxó nú mɛ hú gǎn. (Nǔɖe. 19:1-3) Nǔ tají hú gǎn e ɖo wěma Nǔɖexlɛ́mɛ tɔn mɛ é wɛ; énɛ́ wɛ nyí “alɔwlíwlí Lɛ̌ngbɔ́ví ɔ tɔn.” Hwenu kléwun ɖé jɛ nukɔn nú ahwan Aamagedɔ́ni tɔn ɔ, mɛ e kpo ɖo mɛ 144000 lɛ́ mɛ, bo ɖo ayǐkúngban jí lɛ́ é bǐ ná yi jǐxwé. Amɔ̌, hwenɛ́nu wɛ Lɛ̌ngbɔ́ví ɔ ná wlí alɔ ǎ. (Nǔɖe. 21:1, 2) È ná ko fun ahwan Aamagedɔ́ni tɔn ɔ bo ná ko sú kún dó nú kɛntɔ́ Mawu tɔn lɛ́ bǐ gúdo, hwɛ̌ cóbɔ Lɛ̌ngbɔ́ví ɔ ná wlí alɔ. (Ðɛh. 45:4, 5, 14-18) Étɛ́ ka nyí tínmɛ alɔ e Lɛ̌ngbɔ́ví ɔ ná wlí é tɔn tawun nú mɛ ɖěɖěe é kan lɛ́ é? Alɔwlíwlí ɖé nɔ dɔn súnnu ɖokpó kpó nyɔ̌nu ɖokpó kpó cá; ɖo ali ɖokpó ɔ nu ɔ, alɔ e Lɛ̌ngbɔ́ví ɔ ná wlí é ná dɔn Jezu Klísu Axɔ́sú ɔ cá kpó “asi” tɔn e nyí mɛ 144000 lɛ́ é kpó. Nǔwiwa tají énɛ́ ná ɖó acɛkpikpa yɔ̌yɔ́ ɖokpó ayǐ, b’ɛ ná kpa acɛ dó ayǐkúngban ɔ jí xɔ xwe 1000.—Nǔɖe. 20:6. w22.05 17 akpá. 11-13

Jezu ɖɔ ɖ’ayǐ ɖɔ ɖo azǎn gǔdo gúdo tɔn lɛ́ mɛ ɔ, émí ná sɔ́ “mɛsɛntɔ́ gbejínɔtɔ́ ayiɖotenánɔ” ɖé b’ɛ ná nɔ ná nǔɖuɖu gbigbɔ tɔn mɛ. (Mat. 24:45) Mɔ̌ wɛ é ka nyí nǔgbó. Jezu ɖo gbɛ̌ta mɛ yí ami dó ɖe lɛ́ tɔn kléwún ɖé zán wɛ dó ɖo nǔɖuɖu gbigbɔ tɔn ná togun Mawu tɔn kpó jlǒɖótɔ́ lɛ́ kpó wɛ “dó hwetɔnnu.” Súnnu énɛ́ lɛ́ nɔ mɔ ɖɔ émí nyí gǎn, bo ɖó ná kp’acɛ dó nǔɖiɖi mɛ ɖěvo lɛ́ tɔn jí ǎ. (2 Kɔ. 1:24) É nyɔ́ wa ɔ, yě tuun ɖɔ Jezu Klísu wɛ nyí “gǎn, bo kpa acɛ” nú togun tɔn. (Eza. 55:4) Sín 1919 ɔ, mɛsɛntɔ́ gbejínɔtɔ́ ɔ ko sɔ́ nǔ nú wěma vovo lɛ́ bɔ yě ko hun ali ɔ nú jlǒɖótɔ́ yɔ̌yɔ́ lɛ́ bɔ yě kplɔ́n nǔgbó e ɖo Xó Mawu tɔn mɛ lɛ́ é azɔn nukɔntɔn ɔ ɖo gbɛzán yětɔn mɛ. Ðo 1921 ɔ, mɛsɛntɔ́ ɔ sɔ́ nǔ nú wěma e nɔ nyí La Harpe de Dieu é, bo ná dó d’alɔ jlǒɖótɔ́ lɛ́ bónú yě ná mɔ nǔ jɛ nǔkplɔ́nmɛ dodó Biblu tɔn lɛ́ wú. Hwenu ɖo yiyi wɛ é ɔ, deví ɔ lɛ́ sɔ́ nǔ nú wěma ɖěvo lɛ́. Wěma ɖětɛ́ ka d’alɔ we bɔ a tuun Tɔ́ mǐtɔn jǐxwé tɔn ɔ, lobo lɛ́ yí wǎn n’i? w22.07 10-11 akpá. 9-10

Jexóva wɛ nyí Mɛ e nɔ hun alɔ dó ná nǔ mɛ hú gǎn é. A na bo tlɛ nɔ ná nǔ i gbɔn ɖěbǔ ɔ, nǔ e é nɔ ná we é nɔ zɛ nǔ ɖěbǔ e a nɔ ná ɛ é wú flaflá tɔn hwebǐnu. (Mak. 10:29, 30) Gbɛ ɖagbe hú gǎn e ná sɔ́ akpakpa we, ɖó le, bo ná lɛ́ jɛmɛ nú we é wɛ é ná ná we; nǔ tlɛ sixú nyí mɔ̌ din ɖo gbɛ nyanya élɔ́ mɛ. Bǐbɛ́mɛ nǔ lɛ́ tɔn kpowun wɛ ka nyí énɛ́. A sixú ɖo Tɔ́ wǎnyíyínɔ towe sɛn wɛ káká sɔ́yi. Wǎnyíyí e ɖo hwi kpó Tɔ́ towe kpó tɛ́ntin é ná ɖo syɛ́nsyɛ́n d’é jí wɛ, bɔ a ná wá nɔ gbɛ káká sɔ́yi éɖɔhunÉnyí a zé hwiɖée jó nú Mawu bo bló batɛ́mu ɔ, ali wɛ hun nú we bɔ a ná ná nǔ e xɔ akwɛ́ tawun é ɖé Tɔ́ towe. É wɛ ná nǔ ɖagbe lɛ́ kpó hwenu awǎjijɛ tɔn e sín vǐví a ɖu lɛ́ é kpó bǐ we. Nú a ná ɖe nǔsumɛnukúnmɛ xlɛ́ Mɛ e ɖó jǐnukúnsin kpó ayǐkúngban kpó é ɔ, a sixú ná ɛ nǔ e é ma ko ɖó ǎ é ɖé, énɛ́ wɛ nyí ɖɔ a ná ɖo gbesisɔmɛ bá sɛn ɛ kpó gbejíninɔ kpó. (Jɔb. 1:8; 41:3; Nǔx. 27:11) Ali ɖagbe hú gǎn e nu a sixú zán gbɛ towe ɖe é nɛ́. w23.03 6-7 akpá. 16-17

Ényí a ɖo wǐnnyáwínnyá mɛ ɔ, jlǒ xóɖóxámɛ tɔn sixú syɛ́n tawun, bɔ è sixú lɛ́ gbídí kɔ nú we syɛ́nsyɛ́n bónú a ná lɛ aga. Satáan nɔ ba ɖɔ a ní gbɔ jlǒ towe. Étɛ́ ka sixú d’alɔ we bɔ a ná gbí dɔn ɖo mɛtɛ́nkpɔ́n nukɔn? (1 Tɛ. 4:3, 4) Nɔ ɖɔ lěe nǔ cí nú we é nú Jexóva ɖo ɖɛ towe lɛ́ mɛ. Nɔ ɖɔ lěe nǔ cí nú we nǔgbó nǔgbó é n’i, bo nɔ byɔ́ ɛ ɖɔ é ní ná hlɔ̌nhlɔ́n we. (Mat. 6:13) Nɔ flín ɖɔ nǔ e ba wɛ Jexóva ɖe é wɛ nyí ɖɔ é ná d’alɔ we, é kún nyí é ná ɖó hwɛ nú we wɛ ó. (Ðɛh. 103:13, 14) Ma nɔ tɛ́n kpɔ́n bo ná ɖe ɖɛ tagba towe lɛ́ hwiɖésúnɔ ó. Nɔ ɖɔ xó dó nǔ e ɖí xwi xá wɛ a ɖe lɛ́ é wú xá mɛjitɔ́ towe lɛ́. Nǔgbó wɛ ɖɔ xó ɖɔ dó nǔ mɔ̌hun e kúnkplá mɛɖésúnɔ lɛ́ é wú nɔ bɔ wǔ ǎ, amɔ̌, é ɖo tají ɖɔ a ní wa mɔ̌. Ényí a nɔ xa Biblu, lobo nɔ lɛ́ lin tamɛ dó nǔgbódodó tɔn lɛ́ jí ɔ, é ná bɔ wǔ nú we hú gǎn, bɔ a ná wá gbeta e nɔ dó xomɛhunhun nú Jexóva lɛ́ é kɔn. A ná ɖ’ayi wú ɖɔ é kún byɔ́ ɖɔ è ní nɔ dó sɛ́n nú we dó ninɔmɛ ɖokpó ɖokpó wú ó, ɖó a ná mɔ nǔ jɛ linlin e Jexóva nɔ ɖó dó nǔ lɛ́ wú é wú. w22.08 5 akpá. 10-12

Tatɔ́ xwédo tɔn e nyí klisánwun é nɔ ylɔ́ nukúnkpíkpé dó xwedó tɔn wú ɖo agbaza lixo sín azɔ̌ ɖɔ nǔjɔnǔ. Ényí tatɔ́ xwédo tɔn wɛ nú we ɔ, ado sixú ko hu we ɖɔ a kún ná kpé wú bo ná nǔɖuɖu xwédo towe lobo lɛ́ sú xɔkwɛ́ ó. A sixú ko lɛ́ ɖi xɛsi ɖɔ, ényí azɔ̌ gblé dó émí ɔ, émí kún ná kpé wú bo lɛ́ mɔ ɖěvo ó. Alǒ, hǔzúhúzú e a ná bló ɖo agbazazɔ́ towe sín akpáxwé b’ɛ ná kúnkplá gbɛzán towe é sixú nɔ hu ado nú we. Ðó nǔ nɔ cí mɔ̌ nú mɛ gěgé wútu ɔ, Satáan ko kpé wú bo bló bɔ, mɛ gěgé ɖó Jexóva sinsɛn te. Satáan nɔ tɛ́n kpɔ́n bo ná bló bɔ mǐ ná lin ɖɔ Jexóva kún ɖo mǐtɔn ɖɔ wɛ ó, é kún ka ná d’alɔ mǐ bónú mǐ ná kpé nukún dó xwédo mǐtɔn wú ó. Wǎgbɔ tɔn ɔ, mǐ sixú wá gbeta ɔ kɔn ɖɔ ényí é ná bo tlɛ byɔ́ ɖɔ mǐ ní wa nǔ ɖěbǔ, énɛ́ wɛ nyí ɖɔ ényí é ná bo tlɛ byɔ́ ɖɔ mǐ ní wɔn ya nú nǔgbódodó Biblu tɔn lɛ́ bo ná dó sixú kpo ɖo azɔ̌ e wa wɛ mǐ ɖe din é wa wɛ ɔ, mǐ ná wa. w22.06 15 akpá. 5-6

Mǐ tuun ɖɔ Mawu mǐtɔn nyí ‘Mawu nǔbláwǔkúnúmɛtɔ́, Mawu xomɛfátɔ́; é nɔ yá wǔ sin xomɛ ǎ, bo nyí Mawu xomɛnyɔ́tɔ́, Mawu gbejínɔtɔ́.’ (Tín. 34:6) Jexóva yí wǎn nú nǔjlɔ́jlɔ́wiwa. (Eza. 61:8) Ényí é mɔ bónú mǐ ɖo wǔvɛ́ se wɛ ɔ, é nɔ vɛ́ n’i tawun; bɔ é ɖo gbesisɔmɛ, ɛɛn, akpakpa ɖo sísɔ́ ɛ wɛ bɔ é ná ɖó nǔ wǔvɛ́ mǐtɔn lɛ́ bǐ nu ɖo hwenu e é ɖó dó é. (Jel. 29:11) É jí wǔ kpɔ́n! É ɖo wɛn ɖɔ mǐ yí wǎn nú Jexóva tawun! Hwɛjijɔ ɖěvo tɛ́ wú mǐ ka yí wǎn nú nǔgbó ɔ? Nǔgbó ɔ nɔ hɛn le gěgé wá nú mǐ. Ð’ayi kpɔ́ndéwú élɔ́ wú. Nukúnɖíɖó sɔgúdo tɔn mǐtɔn ɖo nǔgbó Biblu tɔn lɛ́ mɛ. Lěe gandótɔnu nɔ hɛn tɔjíhún ɖó te gbɔn é ɔ, nukúnɖíɖó e mǐ ɖó bɔ é jínjɔ́n Biblu jí é sixú zɔ́n bɔ mǐ gbí dɔn ɖo gbɛ mɛ wúvɛ́ mǐtɔn lɛ́ nukɔn. Ðo tɛ́si égbé tɔn mɛ ɔ, nukúnɖíɖó jǐxwé tɔn e nɔ xɔ akwɛ́ tawun nú klisánwun yí ami dó ɖe lɛ́ é xó ɖɔ wɛ mɛsɛ́dó Pɔ́lu ɖe. Amɔ̌, xó énɛ́ lɛ́ e é ɖɔ lɛ́ é lɛ́ kan klisánwun ɖěɖěe ɖo nukún ɖó wɛ bá nɔ gbɛ káká sɔ́yi ɖo palaɖísi mɛ ɖo ayǐkúngban jí lɛ́ é lɔmɔ̌. (Jaan 3:16) É ɖo wɛn ɖɔ nǔ kplɔ́nkplɔ́n dó nukúnɖíɖó gbɛ mavɔmavɔ tɔn wú nɔ zɔ́n bɔ gbɛzán mǐtɔn nɔ ɖó nu. w22.08 14-15 akpá. 3-5

Wǎnyíyí jí wɛ ji ɖiɖe dó mɛ wú nɔ jínjɔ́n. Kɔlɛ́ntinu lɛ́ nukɔntɔn wěmata 13 ɖɔ xó dó wǎnyíyí sín akpáxwé vovo lɛ́ wú, bɔ yě sixú d’alɔ mǐ bɔ mǐ ná ɖeji dó mɛ ɖěvo lɛ́ wú, alǒ lɛ́vɔ́ ji ɖe dó yě wú. (1 Kɔ. 13:4-8) Ði kpɔ́ndéwú ɔ, wěmafɔ 4gɔ́ ɔ ɖɔ ɖɔ “wǎnyíyí nɔ kú hǔn, é nɔ nyɔ́ xomɛ.” Jexóva nɔ ɖó suúlu dó mǐ wú, ényí mǐ ná bo tlɛ nɔ hu hwɛ dó è ɔ nɛ́. Énɛ́ wú ɔ, ényí nɔví mǐtɔn lɛ́ ɖɔ alǒ wa nǔ e dó xomɛsin nú mǐ, kabǐ vɛ́ nú mǐ lɛ́ é ɔ, mǐ ɖó ná nɔ ɖó suúlu dó yě wú. Wěmafɔ 5gɔ́ ɔ ɖɔ gɔ́ ná ɖɔ: “Nǔɖé nɔ sin xomɛ nú [wǎnyíyí] ǎ; é ka nɔ lɛ́ hɛn mɛ dó xomɛ ǎ.” Mǐ ná nɔ ɖo nǔ e nɔví mǐtɔn lɛ́ wa nú mǐ bɔ é vɛ́ nú mǐ lɛ́ é flín wɛ kpowun ǎ. Nǔnywɛ́tɔ́xó 7:9 ɖɔ ɖɔ mǐ kún ɖó ná “nɔ yá wǔ sin xomɛ ó.” Tɛ́n kpɔ́n bo nɔ kpɔ́n nɔví towe lɛ́ lěe Jexóva nɔ kpɔ́n yě gbɔn é. Mawu yí wǎn nú yě, bo ka nɔ lɛ́ cyán kɛ́n nú hwɛ yětɔn lɛ́ ǎ. Mɔ̌ wɛ mǐ lɔ ɖó ná nɔ wa nǔ gbɔn é nɛ́. (Ðɛh. 130:3) Mǐ ɖó ná dó gǎn bo ná nɔ sɔ́ ayi ɖó jijɔ ɖagbe yětɔn lɛ́ jí, lobo ná nɔ lɛ́ lin tamɛ dó nǔ ɖagbe e yě sixú wa lɛ́ é jí.—Mat. 7:1-5. w22.09 3-4 akpá. 6-7

Wěma Daniyɛ́li tɔn ɖe nǔ ɖěɖěe ná jɛ ɖo azǎn gǔdo gúdo tɔn lɛ́ mɛ, bo sɔ́ akpakpa mɛ lɛ́ é xlɛ́ ɖěbɔdóɖěwú. Ði kpɔ́ndéwú ɔ, Daniyɛ́li 12:1 ɖe xlɛ́ ɖɔ Micɛ́li e nyí Jezu Klísu é “nɔ nya xɛ ɖo togun [Mawu tɔn] jí.” Akpáxwé nǔɖɔɖayǐ ɔ tɔn énɛ́ jɛnu ɖo 1914 hwenu e è sɔ́ Jezu b’ɛ húzú axɔ́sú nú Axɔ́súɖuto Mawu tɔn ɖo jǐxwé é. Amɔ̌, è lɛ́ ɖɔ nú Daniyɛ́li ɖɔ Jezu “ná wá,” alǒ sí te, bɔ hwenu e é ná sí te dó é ná nyí “akpɔmimɔ sín hwenu ɖé” “bɔ nǔ e ná jɛ akɔta énɛ́ ɔ hwenu ɔ, ɖě ná ko jɛ kpɔ́n sín hwenu e akɔta ɖě lɛ́ ko jɔ é ǎ.” “Wǔvɛ́ ɖaxó” e xó è ɖɔ ɖo Matíe 24:21 mɛ é wɛ nyí “akpɔmimɔ sín hwenu” énɛ́. Jezu ná sí te, alǒ ná wa nǔɖé dó jɛ hun dó togun Mawu tɔn jí, ɖo vivɔnu akpɔmimɔ sín hwenu ɔ tɔn; énɛ́ wɛ nyí ɖo Aamagedɔ́ni hwenu. Togun Mawu tɔn wɛ wěma Nǔɖexlɛ́mɛ tɔn ylɔ́ ɖɔ “mɛ wɔ̌búwɔ́bú” e “è dó ya ɖaxó ɔ ná lɛ́ é.”—Nǔɖe. 7:9, 14. w22.09 21 akpá. 4-5

È sixú súnsún, alǒ ɖe nyǐkɔ e è wlán dó wěma énɛ́ mɛ din lɛ́ é síin, cí nǔ ɖɔ klɛnyɔ́ɔ wɛ Jexóva zán dó wlán nyǐkɔ lɛ́ ná jɛ nukɔn ɖɔhun. (Nǔɖe. 3:5.) Mǐ ɖó ná kpo ɖo gǎn dó wɛ bónú nyǐkɔ mǐtɔn ná nɔ wěma énɛ́ mɛ káká jɛ hwenu e è ná sɔ́ bǐki dó wlán d’é mɛ dó é. Mɛ ɖěɖěe sín nyǐkɔ è wlán dó gbɛwéma ɔ mɛ lɛ́ é sín gbɛ̌nu ɖokpó wɛ nyí mɛ ɖěɖěe è cyán bɔ yě ná yi kp’acɛ xá Jezu ɖo jǐxwé lɛ́ é. Sɔgbe xá xó e mɛsɛ́dó Pɔ́lu ɖɔ nú “azɔ̌gbɛ́” tɔn e ɖo Filípu lɛ́ é ɔ, nyǐkɔ mɛ yí ami dó ɖe ɖěɖěe è cyán bɔ yě ná kp’acɛ xá Jezu lɛ́ é tɔn ko ɖo gbɛwéma ɔ mɛ din. (Filí. 4:3) Amɔ̌, cóbónú nyǐkɔ yětɔn ná nɔ wěma nǔjlɛ́dónǔwú tɔn énɛ́ mɛ ɔ, yě ɖó ná kpo ɖo gbejí nɔ wɛ. Nú è ɖó wuntun gǔdo tɔn ɔ yě gúdo ɔ wɛ è ná wlán nyǐkɔ yětɔn dó wěma énɛ́ mɛ bǐ mlɛ́mlɛ́. É sixú nyí jɛ nukɔn nú kú yětɔn, alǒ jɛ nukɔn nú hwenu e wǔvɛ́ ɖaxó ɔ ná bɛ́ dó é wɛ nǔ ná nyí mɔ̌.—Nǔɖe. 7:3. w22.09 14-15 akpá. 3; 15-16 akpá. 5-6

A ko gbɔn ninɔmɛ lěhun mɛ kpɔ́n a? Mɛɖé ɖa nǔɖuɖu e a yí wǎn ná tawun é ɖé nú we. Amɔ̌, ɖó a ɖo hwlɛndó jí, alǒ a ma hwíhwɛ́ hǔn ǎ wútu ɔ, a zɔn kplakpla jí bo ɖu nǔ ɔ, ma tɛ aɖǔ jí. Amɔ̌, ée a ɖu nǔ ɔ fó é ɔ, a ɖ’ayi wú ɖɔ émí hwlɛndó dín, b’ɛ ná ko jló we ɖɔ a ní ɖu dɛ̌dɛ̌ bo ɖu vǐví tɔn. Mɔ̌ ɖokpó ɔ, a ka ko zɔn kplakpla jí, bo xa Biblu kpɔ́n bɔ énɛ́ zɔ́n bɔ a gɔn vǐví wɛn e ɖ’é mɛ é tɔn ɖu a? Nɔ zán hwenu dó ɖu vǐví Xó Mawu tɔn xixa tɔn, nɔ dó nukún nǔ lɛ́ mɛ kpɔ́n, nɔ ɖótó gbe lɛ́, bo nɔ lin tamɛ dó nǔ e a xa é jí. Mɔ̌ wiwa ná gɔ́ so nú awǎjijɛ towe. Jezu sɔ́ “mɛsɛntɔ́ gbejínɔtɔ́ ayiɖotenánɔ” ɔ bónú é ná ná nǔɖuɖu gbigbɔ tɔn mǐ dó hwetɔnnu, bɔ mǐ ka nɔ mɔ nǔ ɖu ɖo gbigbɔ lixo ganjí. (Mat. 24:45) Biblu wɛ nyí ajɔxanú tají e jí nǔɖuɖu e mɛsɛntɔ́ gbejínɔtɔ́ ɔ nɔ sɔ́ nǔ ná lɛ́ é bǐ nɔ jínjɔ́n é.—1 Tɛ. 2:13. w22.10 7-8 akpá. 6-8

Biblu gb’akpá nú mǐ ɖɔ mɛcákotɔ́ lɛ́ ná sukpɔ́ ɖo azǎn gǔdo gúdo tɔn lɛ́ mɛ. (2 Pi. 3:3, 4) Yě nɔ ba ná zán gbɛ yětɔn “sɔgbe xá jlǒ nyanya yěɖésúnɔ tɔn lɛ́.” (Ju. 7, 17, 18) Nɛ̌ mǐ ka sixú cɔ́ mǐɖée bo ma ná wá jɛ nǔ wa jí mɛcákotɔ́ lɛ́ ɖɔhun ǎ gbɔn? Ali e nu mǐ sixú cɔ́ mǐɖée ɖe é ɖokpó wɛ nyí ɖɔ mǐ ní nyi alɔ nú gbɛ̌dídó xá mɛ ɖěɖěe nɔ ɖɔ slamɛ mɛ wú lɛ́ é. (Ðɛh. 1:1) Tínmɛ tɔn wɛ nyí ɖɔ mǐ ná nɔ ɖótó, alǒ xa nǔ ɖěbǔ e ná gosín gǔfɔ́ndómawujítɔ́ lɛ́ gɔ́n lɛ́ é ǎ. Mǐ tuun ɖɔ ényí mǐ ma cɔ́ mǐɖée ǎ ɔ, bléwún jɛ́n mǐ ná jɛ nǔ húnhún ɖɔ jí, lobo ná jɛ nǔ xo kpɔ́n dó Jexóva kpó ali e é nɔ xlɛ́ mǐ gbɔn tutoblónúnǔ tɔn jí é kpó wú jí. Bo ná dó nyi alɔ nú aca énɛ́ ɔ, mǐ sixú nɔ kan nǔ élɔ́ lɛ́ byɔ́ mǐɖée: ‘Ényí è ɖe wě yɔ̌yɔ́ lɛ́ xá mǐ, alǒ è tínmɛ nǔ lɛ́ nú mǐ ɖo ali yɔ̌yɔ́ ɖé nu ɔ, un ka nɔ mɔ xó ɖɔ d’é wú hwɛhwɛ wɛ a? Un ka nɔ ɖo do jijɛ mɔ nú mɛ ɖěɖěe ɖo nukún kpé dó nǔ lɛ́ wú wɛ é wɛ a?’ Ényí ‘ɛɛn’ wɛ nyí xósin nǔkanbyɔ́ énɛ́ lɛ́ tɔn ɔ, mǐ ɖó ná yá wǔ w’azɔ̌ ɖo mǐɖée wú ɖo ali énɛ́ lɛ́ nu bónú nǔ mǐtɔn ná nyɔ́ Jexóva nukúnmɛ.—Nǔx. 3:34, 35. w22.10 20 akpá. 9-10

Gbigbɔ mímɛ́ Mawu tɔn ná hlɔ̌nhlɔ́n Ezekiyɛ́li ɖo Mawuxó e é ná ɖɔ nú ‘nǔgbɛ́hɛn kpó mɛ e ali ma yi tó yětɔn mɛ ǎ lɛ́ é kpó’ é kɔn. Jexóva ɖɔ nú Ezekiyɛ́li ɖɔ: “Un ná sɔ́ hwi lɔ dó húzú nǔgbɛ́hɛn, ali ná yi tó hwi lɔ tɔn mɛ ǎ yěɖɔhun. Un ná sɔ́ we dó húzú mɛɖé bɔ a ná syɛ́n awǐnnya xɔ akwɛ́ diamáá ɖɔhun; a ná syɛ́n hú só. Énɛ́ ɔ wú ɔ, ma ɖi xɛsi nú yě ó.” (Ezek. 3:8, 9) È ná ɖɔ xójɔxó ɔ, ɖiɖɔ nú Ezekiyɛ́li wɛ Jexóva ɖe ɖɔ: ‘Ma lɔn nú lě do togun ɔ syɛ́n ta sɔ é ní dó awakanmɛ kú nú we ó. Un ná ná hlɔ̌nhlɔ́n we.’ Énɛ́ gúdo ɔ, gbigbɔ mímɛ́ Mawu tɔn d’alɔ Ezekiyɛ́li bɔ é wa sinsɛnzɔ́ tɔn. Ezekiyɛ́li wlán ɖɔ: ‘Hlɔ̌nhlɔ́n Jexóva tɔn wá jǐ ce bɔ é syɛ́n ɖésú.’ Aklúnɔzángbla ɖokpó wɛ é byɔ́ ɖo gbeyíɖɔ ɔ sí cóbɔ é kplɔ́n wɛn e ná jlá mɛ lɛ́ wɛ é ɖe é. (Ezek. 3:14, 15) Énɛ́ gúdo ɔ, Jexóva ɖɔ n’i ɖɔ é ní yi tɔdo ɖé mɛ; fínɛ́ wɛ ‘gbigbɔ Mawu tɔn wá jǐ tɔn’ ɖe. (Ezek. 3:23, 24) Ezekiyɛ́li ɖo gbesisɔmɛ bo ná bɛ́ sinsɛnzɔ́ tɔn. w22.11 4-5 akpá. 8-9

Gbeyíɖɔ Xabakúku mɔ wǔvɛ́ gěgé. É wá su hweɖénu bɔ é cí ɖɔ é xo nǔ kpɔ́n dó nukún e kpé dó wǔ tɔn wɛ Jexóva ɖe é wú ɖɔhun. Énɛ́ wú ɔ, é ɖɔ lěe nǔ cí n’i é nú Jexóva ɖo ɖɛ mɛ. Jexóva ná xósin nú ɖɛ e mɛsɛntɔ́ tɔn gbejínɔtɔ́ énɛ́ xo sɛ́dó è kpó ayi bǐ kpó é. (Xab. 2:2, 3) Amɔ̌, ée Xabakúku lin tamɛ dó lěe Jexóva ko hwlɛ́n togun tɔn gbɔn é jí céɖécéɖé é ɔ, é lɛ́vɔ́ ɖó awǎjijɛ. É wá kú d’é jí ɖɔ Jexóva ɖo nukún kpé dó émí wú wɛ, bo ka ná lɛ́ d’alɔ émí bɔ émí ná dɛ ɖo wǔvɛ́ lɛ́ bǐ nu. (Xab. 3:17-19) Étɛ́ énɛ́ ka kplɔ́n mǐ? Ényí a ɖo wǔvɛ́ lɛ́ ɖí xwi xá wɛ hǔn, nɔ xo ɖɛ sɛ́dó Jexóva, bo nɔ ɖɔ lěe nǔ cí nú we é n’i. Énɛ́ gúdo hǔn, ba alɔdó tɔn. Ényí a wa mɔ̌ ɔ, a sixú kú d’é jí ɖɔ Jexóva ná ná hlɔ̌nhlɔ́n e sín hudó a ɖó bá dɛ é we. Gɔ́ ná ɔ, ényí a ɖ’ayi lě do é ɖo alɔ dó we wɛ gbɔn é wú ɔ, nǔɖiɖi towe ná lɛ́ lí dǒ d’é jí. Ényí a tɛ́dó tuto gbigbɔ tɔn towe lɛ́ wú ɔ, a ná lɔn nú wǔvɛ́ lɛ́, alǒ nǔxokpɔ́n ná ɖe we ɖó vo nú Jexóva ǎ.—1 Tim. 6:6-8. w22.11 15-16 akpá. 6-7

Jezu kpó dǎnúwatɔ́ we e è xwe nyi atín wú ɖo akpá tɔn lɛ́ é kpó ɖo wǔvɛ́ se wɛ, hwenu e gbɔjɛ yětɔn ɖo xwixwɛ wɛ é. (Luk. 23:32, 33) Dǎnúwatɔ́ we lɛ́ bǐ wɛ ɖo xó nyanya ɖɔ dó Jezu wú wɛ. (Mat. 27:44; Mak. 15:32) Amɔ̌, mɛ ɖokpó ɖo yě mɛ bo húzú linlin. É ɖɔ: “Jezu, flín mì hwenu e a ná byɔ́ Axɔ́súɖuto towe mɛ é.” Jezu ɖɔ xó e ɖo tɛ́si égbé tɔn ɔ mɛ lɛ́ é dó ná ɛ xósin. (Luk. 23:39-43) Xó e Jezu ɖɔ nú dǎnúwatɔ́ ɔ é ɖó ná sísɛ́ mǐ bɔ mǐ ná lin tamɛ dó lěe gbɛ ná cí ɖo palaɖísi mɛ é wú. Din hwɛ̌ ɔ, acɛ e axɔ́sú Salomɔ́ɔ kpa ɖo fífá mɛ é sixú kplɔ́n nǔ tají ɖé mǐ dó palaɖísi wú. Gɔ́ ná ɔ, mǐ sixú ɖó nukún ɖɔ Jezu e hú gǎn Salomɔ́ɔ é, kpó mɛ e ná kp’acɛ xá ɛ lɛ́ é kpó ná bló bɔ mǐ ná nɔ ninɔmɛ ɖagbe mɛ ɖo ayǐkúngban jí. (Mat. 12:42) É ɖo wɛn ɖɔ, “lɛ̌ngbɔ́ ɖěvo lɛ́” ná ba ná tuun nǔ e yě ná wa, bá jɛxá bo ná nɔ gbɛ káká sɔ́yi ɖo palaɖísi mɛ é.—Jaan 10:16. w22.12 8 akpá. 1; 9 akpá. 4

Ezayíi ná mǐ gǎnjɛwú ɖɔ Jexóva ná ɖótó xó e sú ylɔ́ ɛ wɛ mǐ ɖe lɛ́ é kpó sɔxwixwe kpó, bo ka ná lɛ́ yá wǔ ná xósin nú ɖɛ mǐtɔn lɛ́. Ezayíi ɖɔ gɔ́ ná ɖɔ: “É se gbe towe lě tlóló ɔ, é ná sɔ nú we.” Xógbe énɛ́ lɛ́ e vɔ́ gǎnjɛwú ná mɛ é nɔ flín mǐ ɖɔ Tɔ́ mǐtɔn ɖo gbesisɔmɛ, ɛɛn, akpakpa ɖo sísɔ́ ɛ wɛ bónú é ná d’alɔ mɛ ɖěɖěe nɔ byɔ́ alɔdó tɔn lɛ́ é. Énɛ́ tuuntuun nɔ d’alɔ mǐ bɔ mǐ nɔ dɛ kpó awǎjijɛ kpó. Jexóva nɔ ɖótó ɖɛ mǐ mɛ ɖokpó ɖokpó tɔn kpó sɔxwixwe kpó. Aniwú mǐ ka sixú ɖɔ mɔ̌? Ðo akpáxwé nukɔntɔn Ezayíi wěmata 30gɔ́ ɔ tɔn mɛ ɔ, togun ɔ bǐ ɖɔ xó ná wɛ è ɖe. Amɔ̌, ɖo wěmafɔ 19gɔ́ ɔ mɛ ɔ, mɛ ɖokpó ɖokpó ɖɔ xó ná wɛ è ɖe. Ezayíi ɖɔ: “A sɔ́ ná ya avǐ kpɔ́n gbeɖé ǎ.” “É ná ɖo gbesisɔmɛ bo ná ɖótó we”; “é ná sɔ nú we.” Ðó Jexóva nyí Tɔ́ wǎnyíyínɔ ɖé wútu ɔ, é nɔ kpé nukún dó mǐ mɛ ɖokpó ɖokpó wú, bo nɔ lɛ́ ɖótó ɖɛ mǐ mɛ ɖokpó ɖokpó tɔn ganjí.—Ðɛh. 116:1; Eza. 57:15. w22.11 9 akpá. 5-6

Hwɛjijɔ tají e wú Satáan nɔ tɔ́n ahwan togun Mawu tɔn é ɖokpó wɛ nyí ɖɔ mǐ ‘nɔ ɖe kúnnu dó Jezu wú.’ (Nǔɖe. 12:17, nwt) Ma jó Satáan kpó gbɛ tɔn kpó dó nú yě dó xɛsi we ó. Mawuxóɖiɖɔ kpó nǔkplɔ́nkplɔ́n mɛ lɛ́ kpó sín azɔ̌ ɔ nɔ zɔ́n bɔ mǐ nɔ ɖ’awǎjijɛ hwenu e è ɖo gbe klán xá mǐ wɛ é. Hwenu e acɛkpatɔ́ Jwifu lɛ́ tɔn lɛ́ ɖe gbe nú mɛsɛ́dó lɛ́ ɖo xwe kanweko nukɔntɔn ɔ mɛ ɖɔ yě ní ɖó Mawuxóɖiɖɔzɔ́ ɔ te é ɔ, súnnu gbejínɔtɔ́ énɛ́ lɛ́ wá gbeta ɔ kɔn bo ná se tónú nú Mawu. Yě kpo ɖo Mawuxó ɖɔ wɛ, bɔ azɔ̌ énɛ́ zɔ́n bɔ yě ɖ’awǎjijɛ. (Mɛ. 5:27-29, 41, 42) Nǔgbó ɔ, ényí è ɖó dogbó nú azɔ̌ mǐtɔn ɔ, mǐ ɖó ná ɖó ayi te hwenu e mǐ ɖo wɛn ɖagbe ɔ jlá wɛ é. Amɔ̌, ényí mǐ wa nǔ e wú mǐ kpé é bǐ ɔ, mǐ ná ɖó fífá e è nɔ ɖó, ɖó nǔ mɛtɔn nyɔ́ Jexóva nukúnmɛ, bɔ è lɛ́ ɖo alɔ ɖó ɖo wɛn gbɛhwlɛ́ngán tɔn ɔ mɛ wɛ é wútu é. Kú d’é jí ɖɔ ényí mǐ ná bo tlɛ ɖo ninɔmɛ e vɛ́ wǔ tawun lɛ́ é mɛ gbɔn wɛ ɔ, mǐ sixú ɖó fífá. Ðo ninɔmɛ mɔ̌hun lɛ́ mɛ ɔ, mǐ ɖó ná flín ɖɔ fífá e Jexóva ɖokpónɔ jɛ́n sixú ná mǐ é sín hudó wɛ mǐ ɖó. Ényí a ɖo xwi ɖí xá jɛmɛjí, adla, alǒ yadónúmɛ wɛ hǔn, ɖeji dó Jexóva wú. Tɛ́ dó tutoblónúnǔ tɔn wú. Sɔ́ ayi ɖó sɔgúdo jí wǔ e ɖo te kpɔ́n we é jí. Ényí a nɔ wa mɔ̌ ɔ, “Mawu e nɔ ná fífá mǐ ɔ ná nɔ kpɔ́ xá [we].”—Filí. 4:9. w22.12 21 akpá. 17-18

Énɛ́ byɔ́ ɖɔ mǐ ɖó ná ɖe afɔ ɖé lɛ́. Jijɔ baɖabaɖa élɔ́ lɛ́ ɖo nǔ e mǐ ɖó ná dó gǎn bo jó dó lɛ́ é mɛ: akpɔmimɔ, aɖi ɖíɖó kpó xomɛsin kpó. (Efɛ́. 4:31, 32) Étɛ́wú énɛ́ ka sixú vɛ́ wǔ? Ðó é sixú vɛ́ wǔ tawun bɔ è ná jó jijɔ nyanya ɖé lɛ́ dó. Ði kpɔ́ndéwú ɔ, Biblu ɖɔ ɖɔ mɛɖé lɛ́ nyí “xomɛsinnɔ,” bo nɔ “ɖo adǎn jí.” (Nǔx. 29:22) È na bo tlɛ ko bló batɛ́mu ɔ, é ná ɖibla byɔ́ gǎndídó tɛgbɛ tɔn cóbɔ è ná ɖu ɖo jijɔ mɔ̌hun lɛ́ jí. (Hlɔ̌. 7:21-23) Xo ɖɛ sɛ́dó Jexóva dó jijɔ e a ɖo tíntɛ́nkpɔ́n wɛ bo ná jó dó é takúnmɛ, bo ɖeji ɖɔ é ná se, lobo d’alɔ we. (1 Jaan 5:14, 15) Jexóva ná bló nǔjíwǔ dó ɖe jijɔ énɛ́ síin ǎ có, é sixú ná we hlɔ̌nhlɔ́n bɔ a ná jó gbe ǎ. (1 Pi. 5:10) Din hwɛ̌ ɔ, nɔ wa nǔ sɔgbe xá ɖɛ towe lɛ́ gbɔn alɔ nyinyi nú nǔ ɖěbǔ e ná zɔ́n bɔ gbɛtɔ́ xóxó ɔ ná lɛ́ wá xwetɔ́n é gblamɛ. Gɔ́ ná ɔ, ma nɔ ɖo tamɛ lin dó linlin masɔgbe lɛ́ jí wɛ magbokɔ ó.—Filí. 4:8; Koló. 3:2. w23.01 10-11 akpá. 7, 9-10

Ali e nu mǐ nɔ ɖe wǎnyíyí mǐtɔn xlɛ́ ɖe é ɖokpó wɛ nyí alɔ e mǐ nɔ ɖó ɖo wɛnɖagbejíjlázɔ́ ɔ mɛ kpó kanɖódónǔwú kpó é. Mǐ nɔ jlá wɛn ɔ mɛ ɖěbǔ e mǐ xo go é. Mǐ nɔ gɔn wɛn ɔ jlá mɛɖé, ɖó sinmɛ agbaza tɔn ɖěvo e é ɖó é, alǒ ɖó to ɖěvo mɛ e é gosín é wú ǎ. Mǐ nɔ lɛ́ jlá wɛn ɔ mɛ lɛ́ bǐ, dɔkunnɔ kpó wěmasetɔ́ kpó, wamamɔnɔ kpó mɛ e ma se wěma ǎ é kpó. Mɔ̌ e mǐ nɔ wa é sɔgbe xá linlin Jexóva tɔn, é wɛ nyí ɖɔ “gbɛtɔ́ lɛ́ bǐ ní mɔ hwlɛngán, bo ná tuun nǔgbó ɔ bǐ dégbédégbé.” (1 Tim. 2:4) Mǐ nɔ lɛ́ ɖe wǎn e mǐ yí nú Mawu kpó Klísu kpó é xlɛ́ gbɔn wǎn yí nú nɔví mǐtɔn lɛ́ gblamɛ. Nǔ e hudó yě lɛ́ é nɔ ɖu ayi mɛ nú mǐ tawun, bɔ mǐ nɔ lɛ́ d’alɔ yě ɖo wǔvɛ́ yětɔn lɛ́ mɛ. Mǐ nɔ dó gbɔ nú yě hwenu e mɛ vívɛ́ná yětɔn ɖé kú é, nɔ yi ba yě kpɔ́n hwenu e yě ɖo azɔn jɛ wɛ é, bo nɔ lɛ́ wa nǔ e wú mǐ kpé é bǐ dó dó wǔsyɛ́n lanmɛ nú yě, hwenu e awakanmɛ kú yě é. (2 Kɔ. 1:3-7; 1 Tɛ. 5:11, 14) Mǐ nɔ kpo ɖo ɖɛ xo dó ta yětɔn mɛ wɛ, ɖó mǐ tuun ɖɔ “ɖɛ e hwɛjijɔnɔ nɔ xo ɔ nɔ ɖó hlɔ̌nhlɔ́n ɖésú.”—Ja. 5:16. w23.01 28-29 akpá. 7-8

Lěe xɔzɔ́watɔ́ ɖé nɔ fɔ́n bo nɔ ɖo azɔ̌ tuun d’é jí wɛ gbɔn é ɔ, mɔ̌ wɛ wǔsyɛ́n dídó lanmɛ nú mɛ ɖěvo lɛ́ lɔ sixú wá bí alɔ nú mǐ hú gǎn gbɔn é nɛ́. Mǐ sixú d’alɔ mɛ ɖěvo lɛ́ bónú yě ná mɔ hlɔ̌nhlɔ́n bá dɛ ɖo wǔvɛ́ yětɔn lɛ́ nu gbɔn xó ɖiɖɔ nú yě dó kpɔ́ndéwú mɛ ɖěɖěe ko dɛ ɖo wǔvɛ́ yětɔn ɖɔhun nu wá yi lɛ́ é tɔn wú gblamɛ. (Ebl. 11:32-35; 12:1) Mǐ sixú nɔ gɔ́ so nú fífá gbɔn nǔ élɔ́ lɛ́ wiwa gblamɛ: xó ɖiɖɔ dó nǔ ɖagbe e wú mǐ nɔ ɖ’ayi ɖo mɛ ɖěvo lɛ́ gɔ́n é wú, fífá kan xixo hwenu e nǔɖé wá d’avaja mɛ é kpó hwɛ dídó gbɔ hwenu e tagba lɛ́ wá fɔ́n é kpó. (Efɛ́. 4:3) Gɔ́ ná ɔ, mǐ sixú kpo ɖo hlɔ̌nhlɔ́n ná nǔɖiɖi nɔví mǐtɔn lɛ́ tɔn wɛ gbɔn nǔgbó Biblu tɔn tají lɛ́ mímá xá yě, alɔ dídó yě ɖo ali tawun tawun ɖé lɛ́ nu kpó gǔdo ninɔ nú mɛ ɖěɖěe awakanmɛ kú ɖo gbigbɔ lixo lɛ́ é kpó gblamɛ. Ényí mǐ nɔ ná hlɔ̌nhlɔ́n nǔɖiɖi nɔví mǐtɔn lɛ́ tɔn ɔ, mǐ ná ɖ’awǎjijɛ, bɔ xomɛ ná nɔ lɛ́ hun mǐ. Nǔ e mǐ ná wa lɛ́ é ná nɔ ayǐ nú táan kpɛɖé bo gblé xɔ e è nɔ gbá lɛ́ é ɖɔhun ǎ, loɔ, yě ná nɔ ayǐ káká sɔ́yi! w22.08 22 akpá. 6; 25 akpá. 17-18

Jezu ɖɔ jijɔ tají ɖé xó bɔ mǐ ɖó hudó tɔn cóbá mɔ nǔ jɛ nǔ e mǐ nɔ xa ɖo Xó Mawu tɔn mɛ lɛ́ é mɛ; ayiɖote wɛ. (Mat. 24:15) Étɛ́ ka nɔ nyí ayiɖote? Nǔwúkpíkpé e mɛɖé ɖó bo nɔ tuun lěe linlin ɖé cá kan xá ɖěvo gbɔn é kpó lěe linlin ɖé gbɔn vo nú ɖěvo gbɔn é kpó é wɛ. Ayiɖote nɔ zɔ́n bɔ è nɔ mɔ nǔ jɛ xó e è ma ɖɔ nyi wɛn ǎ é mɛ. Gɔ́ ná ɔ, lěe Jezu ɖɔ gbɔn é ɔ, mǐ ɖó hudó ayiɖote tɔn bá dó tuun nǔ ɖěɖěe ɖo jijɛ wɛ bo ɖo blǒbló wɛ bɔ nǔɖɔɖayǐ Biblu tɔn lɛ́ nɔ jɛnu lɛ́ é. Mǐ lɛ́ ɖó hudó jijɔ énɛ́ tɔn bá mɔ tɛn dó ɖu le nǔ ɖěɖěe mǐ nɔ xa ɖo Biblu mɛ lɛ́ é bǐ tɔn. Jexóva nɔ ná ayiɖote mɛsɛntɔ́ tɔn lɛ́. Énɛ́ wú ɔ, xo ɖɛ sɛ́dó è bo byɔ́ ɛ ɖɔ é ní d’alɔ we bónú a ná tɛ́n kpɔ́n bo ɖó jijɔ énɛ́. Nɛ̌ a ka sixú wa nǔ sɔgbe xá ɖɛ towe gbɔn? Nɔ xwe sɔ bo nɔ gbéjé nǔ e a xa lɛ́ é kpɔ́n, lobo nɔ ɖ’ayi lěe yě cá kan xá nǔ ɖěvo e a ko tuun lɛ́ é gbɔn é wú. Ba wěmafɔ Biblu tɔn lɛ́ sín tínmɛ bá dó mɔ ali ɖěɖěe nu a sixú zán yě ɖo gbɛzán towe mɛ ɖe lɛ́ é. (Ebl. 5:14) Ényí a nɔ ɖ’ayi te hwenu e a ɖo nǔ xa wɛ é ɔ, nukúnnúmɔjɛnǔmɛ e a ɖó dó Mawuxówéma ɔ wú é ná lɛ́ jɛjí. w23.02 10 akpá. 7-8

Mǐ ní ɖɔ ɖɔ xɔ́ntɔn ɖé ná we xwé ɖokpó. Sɛn e è sá dó xwé ɔ é ko sún ɖo fí ɖé lɛ́, bɔ fí ɖěvo lɛ́ nɔ kun sin. Nǔ ɖo mɔ̌ có, xwé ɔ kpo ɖo akwɛ́ xɔ wɛ tawun. É ɖo wɛn ɖɔ, xwé énɛ́ ná xɔ akwɛ́ ɖo nukún towe mɛ, bɔ a ná wlǐbo ná. Ðo ali ɖokpó ɔ nu ɔ, Jexóva ná mǐ nǔníná xɔ akwɛ́ ɖé; gbɛ mǐtɔn wɛ. Nǔgbó ɔ, Jexóva sɛ́ Vǐ tɔn dó bɔ é wá kú dó ta mǐtɔn mɛ dó xlɛ́ lě do gbɛ mǐtɔn xɔ akwɛ́ ɖo nukún tɔn mɛ sɔ é. (Jaan 3:16) Jexóva wɛ nyí Jɔtɛn gbɛ tɔn. (Ðɛh. 36:10) Mɛsɛ́dó Pɔ́lu yí gbe nú nǔgbó énɛ́ hwenu e é ɖɔ xó élɔ́ é: “É wɛ zɔ́n bɔ mǐ ɖo gbɛ, nɔ dán wǔ, bo lɛ́ tíin.” (Mɛ. 17:25, 28) Énɛ́ wú ɔ, é jɛxá ɖɔ è ní ɖɔ ɖɔ gbɛ mǐtɔn ɔ, nǔníná ɖé wɛ bo gosín Mawu gɔ́n. Wǎnyíyí wɛ nɔ sísɛ́ ɛ bɔ é nɔ ná mǐ nǔ e sín hudó mǐ ɖó bo ná nɔ gbɛ lɛ́ é. (Mɛ. 14:15-17) Amɔ̌, Jexóva nɔ nya xɛ ɖo mǐ jí ɖo nǔjíwǔ linu ǎ. É nyɔ́ wa ɔ, é nɔ ɖó nukún ɖɔ mǐ ní nɔ kpé nukún dó mǐɖée wú ɖo agbaza kpó gbigbɔ kpó lixo, lěe mǐ kpé wú gbɔn é bǐ.—2 Kɔ. 7:1. w23.02 20 akpá. 1-2

Biblu e Jexóva Mawu ná mǐ é su nukún mǐtɔn mɛ kpɔ́n! Wě e nǔnywɛ́ kpé lɛ́ é wɛ Jexóva ɖe xá mǐ ɖ’é mɛ; wě énɛ́ lɛ́ e é ɖe xá mǐ é sixú d’alɔ mǐ, bɔ mǐ ná ɖí xwi xá tagba mǐtɔn lɛ́ ɖo égbé bɔ é ná kpa mǐ. É lɛ́ ná mǐ nukúnɖíɖó sɔgúdo tɔn ɖaaɖagbe ɖé. Tají hú gǎn ɔ, Jexóva ɖe jijɔ e é ɖó é gěgé xlɛ́ mǐ ɖo Biblu mɛ. Ényí mǐ lin tamɛ dó jijɔ tɔn ɖaaɖagbe lɛ́ jí ɔ, yě nɔ dɔn mǐ tawun, bɔ mǐ nɔ ba ná zun xɔ́ntɔn vívɛ́ xá ɛ. (Ðɛh. 25:14) Jexóva ba ɖɔ mɛ lɛ́ ní tuun émí. Ðo hwexónu ɔ, Jexóva gbɔn nǔ lěhun lɛ́ gblamɛ dó ɖe éɖée xlɛ́: dlɔ̌ lɛ́, nǔmimɔ lɛ́ kpó wɛnsagun lɛ́ kpó. (Kɛ́n. 12:6; Mɛ. 10:3, 4) Amɔ̌, ényí è ma wlán dlɔ̌ énɛ́ lɛ́, nǔmimɔ énɛ́ lɛ́, alǒ wɛn e wɛnsagun énɛ́ lɛ́ dó lɛ́ é ǎ ɔ, nɛ̌ è ka sixú kplɔ́n yě gbɔn? Nǔ e wú Jexóva zán súnnu ɖé lɛ́ bɔ yě ‘wlán’ nǔ e é ba ɖɔ mǐ ní tuun lɛ́ é “dó wěma mɛ” é nɛ́. Ðó Jexóva wɛ nyí “alixlɛ́mɛtɔ́ e nyɔ́ bɔ nǔ bǐ vɔ ɖ’é wú” é wútu ɔ, mǐ sixú ɖeji ɖɔ wlɛnwín énɛ́ e é zán dó ɖɔ xó xá mǐ é wɛ nyí ɖagbe hú gǎn ɔ.—Ðɛh. 18:31. w23.02 2 akpá. 1-2

Nya nǔ ɖagbe lɛ́ gbé. Nya nǔ ɖěɖěe ná ná hlɔ̌nhlɔ́n nǔɖiɖi towe, bo lɛ́ d’alɔ we bɔ a ná zin ɖo gbigbɔ lixo lɛ́ é gbé. (Efɛ́. 3:16) Ði kpɔ́ndéwú ɔ, a sixú wá gbeta ɔ kɔn bo ná nɔ kplɔ́n nǔ, bo lɛ́ xa Biblu ɖo gbesisɔmɛ. (Ðɛh. 1:2, 3) Alǒ, a sixú tɛ́n kpɔ́n bo nɔ xo ɖɛ sín ayi mɛ hwɛhwɛ hú gǎn. É sixú byɔ́ ɖɔ a ɖó ná ɖu ɖo hwiɖée jí tawun ɖo ayiɖeɖayǐ e a nɔ cyán lɛ́ é kpó hwenu e a nɔ zán ɖo yě kɔn é kpó linu. (Efɛ́. 5:15, 16) Ényí a nɔ d’alɔ mɛ ɖěvo lɛ́ ɔ, a ná húzú klisánwun e zin é. Ði kpɔ́ndéwú ɔ, a sixú wá gbeta ɔ kɔn bo ná nɔ d’alɔ mɛxómɔ kpó wɔ̌nɖowǔnánɔ kpó e ɖo agun towe mɛ lɛ́ é. Vlafo a sixú nɔ xwlé axi nú yě, alǒ d’alɔ yě bɔ yě ná zán alǒkan, alǒ tablɛ́ti kpó nǔ mɔ̌hun ɖěvo lɛ́ kpó. A nɔ lɛ́ jlá wɛn ɖagbe Axɔ́súɖuto ɔ tɔn mɛ ɖěvo lɛ́, bo nɔ dó ɖe wǎnyíyí xlɛ́ yě. (Mat. 9:36, 37) Ényí é nyɔ́ bló hǔn, nya nǔɖé lɛ́ gbé ɖo sinsɛnzɔ́ hwebǐnu tɔn ɔ mɛ. w22.08 6-7 akpá. 16-17