Septembre

Ényí mǐ nɔ zán nǔníná e mǐ ɖó bo nɔ ɖɔ xó é ganjí ɔ, mǐ nɔ xlɛ́ mɛ ɖěvo lɛ́ ɖɔ mɛsɛntɔ́ Jexóva tɔn lɛ́ wɛ nú mǐ. Mǐ nɔ d’alɔ mɛ e lɛ́ lɛ̌ dó mǐ lɛ́ é, bɔ yě nɔ mɔ vogbingbɔn e ɖo “mɛ e nɔ sɛn [Mawu] kpó mɛ e ma nɔ sɛn [ɛ] ǎ lɛ́ kpó tɛ́ntin é” vaan. (Mal. 3:18) Nǔ e jɛ dó nɔví nyɔ̌nu e nɔ nyí Kimberly é wú é nɛ́. È zɔ́n azɔ̌ e kúnkplá wěmaxɔmɛ é ɖé é kpó wěmaxɔmɛvígbɛ́ tɔn ɖé kpó. Ée yě w’azɔ̌ ɖó kpɔ́ gúdo é ɔ, wěmaxɔmɛvígbɛ́ Kimberly tɔn ɖ’ayi wú ɖɔ é gbɔn vo nú wěmaxɔmɛví ɖěvo lɛ́. É nɔ ɖɔ xó nyanya dó mɛ ɖěvo lɛ́ wú ɖo gǔdo yětɔn ǎ, é nyɔ́ wa ɔ, xomɛnyínyɔ́xó lɛ́ wɛ é nɔ ɖɔ; é ka nɔ lɛ́ ɖɔ xó gblégblé ǎ. Énɛ́ jí wǔ nú wěmaxɔmɛvígbɛ́ Kimberly tɔn, bɔ wǎgbɔ tɔn ɔ, é wá gbeta ɔ kɔn bá kplɔ́n Biblu. Ényí lěe mǐ nɔ ɖɔ xó gbɔn é nɔ zɔ́n bɔ mɛ lɛ́ nɔ wá kplɔ́n nǔ dó Jexóva wú ɔ, é nɔ su nukún tɔn mɛ tawun! Mǐ bǐ wɛ nɔ ba ná ɖɔ xó ɖo ali ɖé nu b’ɛ ná kpa susu nú Jexóva. w22.04 5-6 akpá. 5-7

Jezu nya awǒvi tɛ́nwe e ɖo ya dó nú Mali Magidálanu wɛ lɛ́ é. Nǔsumɛnukúnmɛ sísɛ́ ɛ b’ɛ húzú ahwanvú Jezu tɔn, bo nɔ gǔdo n’i ɖo sinsɛnzɔ́ ɔ mɛ. (Luk. 8:1-3) Nǔ e Jezu wa nú Mali é su nukún tɔn mɛ tawun, amɔ̌, é sixú ko gɔn tuuntuun ɖɔ Jezu ná wá wa nǔ nú émí hú mɔ̌ ɖo nukɔnmɛ. É ná sɔ́ gbɛ tɔn jó “bónú mɛ ɖěbǔ e ná ɖe xlɛ́ ɖɔ émí ɖi nǔ n’i é” ná sixú ɖu gbɛ mavɔmavɔ sín vǐví. (Jaan 3:16) Amɔ̌, Mali nɔ gbejí dó xlɛ́ ɖɔ nǔ e Jezu wa nú émí é su nukún émítɔn mɛ. Hwenu e Jezu ɖo ya ji wɛ ɖo yatín jí é ɔ, é ɖo akpá tɔn, ɖó nǔ tɔn nɔ ɖu ayi mɛ n’i, bɔ é lɛ́ ba ná dó gbɔ nú mɛ ɖěvo ɖěɖěe ɖo fínɛ́ lɛ́ é. (Jaan 19:25) Ée Jezu kú gúdo é ɔ, Mali kpó nyɔ̌nu we ɖěvo lɛ́ kpó hɛn nǔhwɛ́nkún yi yɔdo tɔn kɔn, bo ná yi sá nú cyɔ tɔn. (Mak. 16:1, 2) Mali mɔ Jezu hwenu e é fɔ́n sín kú é bo ɖɔ xó xá ɛ; wǔjɔmɛ ɖé wɛ, bɔ ahwanvú lɛ́ gěgé ɖó ǎ.—Jaan 20:11-18. w23.01 27 akpá. 4

Mǐ ɖó ná lin ɖɔ ɖó mǐ ko sɛn Jexóva wá yi wútu ɔ, é kún sɔ́ byɔ́ ɖɔ mǐ ní kpo ɖo sinsɛn ɛ wɛ din ó ǎ. Nǔɖé lɛ́ sixú ɖó dogbó nú mǐ din tawun hú ɖ’ayǐ tɔn có, mǐ ɖó ná kpo ɖo alɔnu mǐtɔn hɛn ján ɖo “Aklúnɔ sín azɔ̌ ɔ” mɛ wɛ, bo ná kpo ɖo wunzɛn, bo lɛ́ kpo ɖo acéjí káká jɛ vivɔnu. (1 Kɔ. 15:58; Mat. 24:13; Mak. 13:33) Mǐ ɖó ná sɛn Jexóva kpó akpakpa sɔ́ mɛ kpó, bo lɛ́ wa mɔ̌ kpó ayi mǐtɔn bǐ kpó. Nǔjɛdo ɖěvo jí wɛ nǔ e Jezu ɖɔ sɛ́dó agun e ɖo Lawodisée é tɛɖɛ̌. Yě ‘gblɔ́ xɛ́ɛ́,’ ɖo Mawusinsɛn yětɔn mɛ. Ðó yě hunzo ǎ, yě ka lɛ́ fá ǎ wútu ɔ, Jezu ɖɔ nú yě ɖɔ ‘gbɛ̌dónánɔ kpó lelenɔ kpó’ wɛ yě nyí. Akpakpa ɖó ná sɔ́ yě tawun dó Jexóva wú, bo ná lɛ́ sɔ́ yě dó sɛn e sɛn ɛ wɛ yě ɖe é wú. (Nǔɖe. 3:16, 17, 19) Étɛ́ énɛ́ ka kplɔ́n mǐ? Ényí akpakpa ma sɔ́ nɔ sɔ́ mǐ dó nǔ gbigbɔ tɔn lɛ́ wú mɔ̌ ǎ ɔ, mǐ ɖó ná bló bɔ nǔ gbigbɔ tɔn e mǐ ɖó lɛ́ é ná lɛ́ su nukún mǐtɔn mɛ d’é jí. (Nǔɖe. 3:18) Mǐ ɖó ná lɔn gbeɖé bónú vivogbɛ zínzán ná fɛ́ ayi mǐtɔn, bo ná zɔ́n bɔ mǐ ná sɔ́ nǔ gbigbɔ tɔn lɛ́ ɖó tɛn wegɔ́ ɔ mɛ ǎ. w22.05 3-4 akpá. 7-8

Jexóva ɖo wěma bǔnɔ ɖé wlán wɛ sín xwe afatɔ́n mɔ̌kpán ɖíe. Nyǐkɔ lɛ́ wlán dó wěma énɛ́ mɛ wɛ é ɖe; Abɛ́li e nyí kúnnuɖetɔ́ gbejínɔtɔ́ nukɔntɔn ɔ é sín nyǐkɔ wɛ è dó wěma énɛ́ mɛ jɛ nukɔn. (Luk. 11:50, 51) Sín hwenɛ́nu ɔ, Jexóva ko dó nyǐkɔ gěgé ɖěvo lɛ́ wěma énɛ́ mɛ, bɔ ɖo égbé ɔ, nyǐkɔ lǐvi mɔ̌kpán wɛ ɖo wěma énɛ́ mɛ. È ylɔ́ wěma énɛ́ ɖɔ “wěma mɛ flínflín tɔn,” “gbɛwéma,” kpó “wěma mlámlá gbɛ tɔn” kpó ɖo Biblu mɛ. (Mal. 3:16, nwt; Nǔɖe. 3:5; 17:8) Mɛ ɖěɖěe nɔ sɛn Jexóva kpó sísí kpó, alǒ nɔ ɖó sísí e gɔ́ngɔ́n é n’i, bo lɛ́ yí wǎn nú nyǐkɔ tɔn lɛ́ é bǐ sín nyǐkɔ wɛ ɖo wěma bǔnɔ énɛ́ mɛ. Ali ɔ ná hun nú yě bɔ yě ná mɔ gbɛ mavɔmavɔ. Égbé ɔ, ényí mǐ zun xɔ́ntɔn vívɛ́ xá Jexóva gbɔn vɔ̌sísá gbɛxɔnúmɛ tɔn Vǐ tɔn Jezu Klísu tɔn jí ɔ, è sixú wlán nyǐkɔ mǐtɔn dó wěma énɛ́ mɛ. (Jaan 3:16, 36) Nukúnɖíɖó jǐxwé tɔn wɛ mǐ ɖó oo, alǒ ayǐkúngban jí tɔn wɛ mǐ ɖó ɔ, mǐ mɛ bǐ wɛ nɔ ba ɖɔ è ní dó nyǐkɔ mǐtɔn wěma énɛ́ mɛ. w22.09 14 akpá. 1-2

Wěma Nǔɖexlɛ́mɛ tɔn ɖɔ xó dó “kanlin baɖabaɖa ɖaxó vɔvɔ ɖé” wú, bɔ è nɔ ylɔ́ ɛ ɖɔ Dlagɔ́ɔn. (Nǔɖe. 12:3) Dlagɔ́ɔn énɛ́ fun ahwan xá Jezu kpó wɛnsagun tɔn lɛ́ kpó. (Nǔɖe. 12:7-9) É nɔ tɔ́n ahwan togun Mawu tɔn, bo nɔ ná acɛ gběkanlin lɛ́, alǒ acɛkpikpa lɛ́. (Nǔɖe. 12:17; 13:4) Mɛ̌ ka nyí Dlagɔ́ɔn énɛ́? “Dan xóxó e è nɔ ylɔ́ ɖɔ awǒvi abǐ Satáan é” wɛ. (Nǔɖe. 12:9; 20:2) É ɖó acɛ dó kɛntɔ́ Jexóva tɔn ɖě lɛ́ bǐ jí. Étɛ́ ka jɛ dó Dlagɔ́ɔn ɔ wú? Nǔɖexlɛ́mɛ 20:1-3 tínmɛ ɖɔ wɛnsagun ɖé ná dó wlɔ Satáan, bo ná zé è dó domaɖó-azan ɖé mɛ, bɔ é ná cí ɖɔ gankpá mɛ wɛ é ɖe ɖɔhun. Hwenu e Satáan ná ɖo domaɖó-azan ɔ mɛ é ɔ, é ‘sɔ́ ná dɔn to lɛ́ ɖě yi bú ǎ, káká bɔ xwe afatɔ́n (1000) lɛ́ ná wá yi.’ Gǔdo mɛ ɔ, è ná bɛ́ Satáan kpó awǒvi tɔn lɛ́ kpó dó “myɔ togotogo e mɛ hwemí ɖo jiji ɖe wɛ ɔ mɛ.” Tínmɛ énɛ́ tɔn wɛ nyí ɖɔ è ná sú kún yětɔn dó bǐ mlɛ́mlɛ́. Gbɛ ná víví kpɔ́n, hwenu e Satáan kpó awǒvi tɔn lɛ́ kpó ma sɔ́ ná tíin ǎ é! w22.05 14 akpá. 19-20

Azɔ̌syɛ́nsyɛ́nwatɔ́ wɛ Jezu nyí. Hwenu e é ɖo wǐnnyáwínnyá mɛ é ɔ, é wa xwlɛkpikpazɔ́. (Mak. 6:3) É ɖo wɛn ɖɔ alɔ e é nɔ dó mɛjitɔ́ tɔn e nɔ w’azɔ̌ syɛ́nsyɛ́n dó kpé nukún dó xwédo ɖaxó e mɛ yě ɖe é wú é nɔ su nukún yětɔn mɛ tawun. Jezu nyí mɛ maɖóblɔ̌ bɔ azɔ̌ e é nɔ wa lɛ́ é nɔ mɛ́ bɔ xó bǐ nɔ vɔ ɖ’é wú; énɛ́ wú ɔ, mɛ gěgé ná ɖibla nɔ ba ná xɔ nǔ e é nɔ bló lɛ́ é. Jezu ná ko mɔ awǎjijɛ tawun ɖo azɔ̌ e é wa é mɛ. Nǔgbó wɛ ɖɔ Jezu nɔ w’azɔ̌ syɛ́nsyɛ́n có, é nɔ mɔ nǔ jɛ wú ɖɔ émí ɖó hwenu e émí ná nɔ zán dó sɛn Jexóva ná é. (Jaan 7:15) Nukɔnmɛ e é jɛ Mawuxó ɖɔ jí hwebǐnu é ɔ, é ɖɔ nú tóɖóetɔ́ lɛ́ ɖɔ: “Mi ma jɛ tagba dó nǔɖuɖu e nɔ gblé é tamɛ ó, loɔ, mi jɛ tagba dó nǔɖuɖu e nɔ nɔ ayǐ bo nɔ kplá mɛ yi gbɛ mavɔmavɔ mɛ é tamɛ.” (Jaan 6:27) Gɔ́ ná ɔ, ɖo Mawuxóɖiɖɔ só jí tɔn Jezu tɔn hwenu ɔ, é ɖɔ: “Mi kplé dɔkun mitɔn lɛ́ ɖó [jǐxwé].” (Mat. 6:20) Nǔnywɛ́ e gosín Mawu gɔ́n é nɔ d’alɔ mǐ bɔ mǐ nɔ ɖó linlin e ɖo jlɛ̌ jí é dó agbazazɔ́ mǐtɔn wú. Ðó mǐ nyí Klisánwun wútu ɔ, è kplɔ́n mǐ ɖɔ mǐ ní nɔ ‘w’azɔ̌ syɛ́nsyɛ́n.’ w22.05 22-23 akpá. 9-10

Enísi sɔ́ kpɔ́ndéwú ɖagbe ɖ’ayǐ nú Timɔtée. É ɖo wɛn ɖɔ é ná ko mɔ ɖɔ wǎnyíyí adodwé e nɔ émítɔn ɖó nú Jexóva é wɛ nɔ sísɛ́ ɛ b’ɛ nɔ wa nǔ bɔ Jexóva sinsɛn hɛn awǎjijɛ wá nú nɔ émítɔn. Mɔ̌ ɖokpó ɔ ɖo égbé ɔ, nɔví nyɔ̌nu e ko ɖó vǐ é gěgé tíin bɔ yě “ɖɔ xó ɖé ǎ,” bo ka ko d’alɔ mɛ e ɖo xwédo yětɔn mɛ lɛ́ é bɔ yě ɖo Jexóva sɛn wɛ. (1 Pi. 3:1, 2) Hwi lɔ sixú wa nǔ ɖokpó ɔ. Gbɔn nɛ̌ é? Blǒ bónú kancícá e ɖo hwi kpó Jexóva kpó tɛ́ntin é ní nɔ tɛn nukɔntɔn ɔ mɛ. (Sɛ́n. 6:5, 6) Vǐnɔ gěgé ɖɔhun ɔ, a nɔ sá vɔ̌ gěgé. A nɔ sɔ́ hwenu, akwɛ́, amlɔ kpó nǔ ɖěvo lɛ́ kpó dó sá vɔ̌, bo ná dó kpé nukún dó hudó agbaza tɔn vǐ towe lɛ́ tɔn wú. Amɔ̌, alɔnu towe ɖó ná ján káká bɔ a ná ba hwenu e a ná dó ná hlɔ̌nhlɔ́n kancícá e ɖo hwi kpó Jexóva kpó tɛ́ntin é kpo ǎ. Nɔ ɖe hwenu ɖó vo nú nǔ élɔ́ lɛ́ hwɛhwɛ: ɖɛ, nǔkplɔ́nkplɔ́n mɛɖésúnɔ tɔn kpó kplé agun tɔn lɛ́ yiyi kpó. Ényí a nɔ wa mɔ̌ ɔ, a ná ná hlɔ̌nhlɔ́n kancícá e ɖo hwi kpó Jexóva kpó tɛ́ntin é, bo ná lɛ́ nyí kpɔ́ndéwú ɖagbe nú xwédo towe kpó mɛ ɖěvo lɛ́ kpó. w22.04 16 akpá. 1; 19 akpá. 12-13

Tuun e mǐ tuun ɖɔ é kún nyí mǐdɛɛ lɛ́ wɛ ná wá gbeta lěe è ná ɖɔ hwɛ mɛ ɖokpó ɖokpó tɔn gbɔn é tɔn kɔn ó é nɔ zɔ́n bɔ agbɔ̌n mǐtɔn nɔ jɛ do! Ðó Jexóva wɛ nyí Hwɛɖɔtɔ́ Ðaxó bǐ ɔ wútu ɔ, é ná kpé nukún dó azɔ̌ tají énɛ́ wú. (Hlɔ̌. 14:10-12) Mǐ sixú ɖeji bǐ mlɛ́mlɛ́ ɖɔ é ná ɖɔ hwɛ sɔgbe xá nǔgbódodó jlɔ́jlɔ́ tɔn e kúnkplá nǔ ɖagbe kpó nǔ nyanya kpó é hwebǐnu. (Bǐb. 18:25) É ná wa nǔ agɔ gbeɖé ǎ! Nǔ e hwɛhuhu gú e mǐ ɖu é hɛn gblé dó mǐ wú lɛ́ é ɔ, Jexóva ná ɖe bǐ síin mlɛ́mlɛ́. Mǐ ɖo te kpɔ́n hwenu e nǔ ná nyí mɔ̌ é kpó akpakpa sɔ́ mɛ kpó. Hwenɛ́nu ɔ, wǔvɛ́ e mǐ nɔ mɔ ɖo agbaza kpó lěe nǔ nɔ cí nú mɛ é kpó lixo lɛ́ é bǐ sín xó ná fó. (Ðɛh. 72:12-14; Nǔɖe. 21:3, 4) Yě sɔ́ ná wá ayi mɛ nú mǐ kpɔ́n gbeɖé ǎ. Ée mǐ ɖo te kpɔ́n hwenu ɖaaɖagbe énɛ́ é ɔ, é su nukún mǐtɔn mɛ tawun ɖɔ Jexóva ná mǐ nǔwúkpíkpé ɔ bɔ mǐ sixú xwedó kpɔ́ndéwú tɔn bo nɔ sɔ́ hwɛ kɛ mɛ. w22.06 13 akpá. 18-19

Hwɛɖɔtɔ́ ɖagbe ɖé ɖó ná tuun sɛ́n ganjí. É ɖó ná tuun nǔ ɖagbe kpó nǔ nyanya kpó. Nǔ ɖěvo tɛ́ sín hudó hwɛɖɔtɔ́ ɖagbe ɖé ka ɖó? É ɖó ná kpé wú bo gbéjé kúnnuɖenú tawun tawun lɛ́ bǐ kpɔ́n cóbó ɖɔ hwɛ. Ðo ali énɛ́ nu ɔ, Jexóva ɖokpónɔ wɛ jɛxá bo ná nyí Hwɛɖɔtɔ́. Ényí hwɛɖiɖɔxó ɖěbǔ wá jɛ nukɔn Jexóva tɔn ɔ, hwelɛ́bǐnu wɛ é nɔ mɔ nukúnnú jɛ kúnnuɖenú lɛ́ bǐ wú ganjí; gbɛtɔ́ ɖěɖěe nɔ ɖɔ hwɛ lɛ́ é tɔn ka nyí mɔ̌ ǎ. (Bǐb. 18:20, 21; Ðɛh. 90:8) Nǔwúkpíkpé tɔn zɛ nǔ e gbɛtɔ́ lɛ́ nɔ mɔ, alǒ se lɛ́ é wú. É nɔ mɔ nǔ jɛ wú bǐ mlɛ́mlɛ́ ɖɔ jijɔ gɔ́ nú nǔ ɖěvo e sín gǔ mɛ ɔ ɖu ɖo mɛjitɔ́ tɔn lɛ́ gɔ́n é, kplɔ́n e é yí é, fí e é nɔ nɔ é, káká jɛ lěe nǔ nɔ cí n’i é kpó lěe é ɖe gbɔn ɖo taglo mɛ é kpó jí wú wɛ nǔ e é nɔ wa lɛ́ é nɔ sín. Jexóva nɔ lɛ́ mɔ nǔ jɛ ayi mɛ. É nɔ mɔ nǔ jɛ nǔ e nɔ sísɛ́ mǐ mɛ ɖokpó ɖokpó bɔ mǐ nɔ wa nǔ é, linlin mǐtɔn lɛ́, kpó jlǒ mǐtɔn lɛ́ kpó wú bǐ mlɛ́mlɛ́. È sixú hwlá nǔ ɖěbǔ dó Jexóva ǎ. (Ebl. 4:13) Énɛ́ wú ɔ, ényí Jexóva sɔ́ hwɛ kɛ mɛɖé hǔn, kúnnuɖenú lɛ́ bǐ wɛ é ɖó wú wɛ é wa mɔ̌. w22.06 4 akpá. 8-9

Mǐ ɖó ná ɖ’ayi te tawun dó wlɛnwín ɖěɖěe Satáan zán dó Jɔbu wú lɛ́ é wú, ɖó wlɛnwín mɔ̌hun lɛ́ wɛ é nɔ lɛ́ zán ɖo égbé. Satáan ɖɔ ɖɔ mǐ kún ɖó wǎnyíyí adodwé nú Jexóva Mawu ó, lé ényí é byɔ́ ɖɔ mǐ ní jó é dó bo ná hwlɛ́n gbɛ mǐtɔn gán ɔ, mǐ ná wa mɔ̌. Satáan ɖɔ gɔ́ ná ɖɔ Mawu kún yí wǎn nú mǐ ó, lé é kún ka ná ɖ’ayi gǎn e dó wɛ mǐ ɖe bá nyɔ́ nukún tɔn mɛ é wú ó. Ðó mǐ tuun nǔ e Satáan ɖo gǎn dó wɛ bá wa é wútu ɔ, mǐ nɔ ɖi nǔ nú adingbanxó tɔn lɛ́ ǎ. Mǐ ɖó ná mɔ ɖɔ tagba lɛ́ ɔ, ali ɖé wɛ yě nyí bo hun nú mǐ bónú mǐ ná kplɔ́n nǔ dó mǐɖée wú. Wǔvɛ́ ɖěɖěe Jɔbu mɔ lɛ́ é d’alɔ ɛ b’ɛ ɖ’ayi gǎnmaɖó tɔn ɖé lɛ́ wú, lobo w’azɔ̌ ɖo yě wú. Ði kpɔ́ndéwú ɔ, é kplɔ́n ɖɔ émí ɖó ná lɛ́ sɔ́ nǔ nú mɛɖéesɔ́hwe d’é jí. (Jɔb. 42:3) Ényí mǐ lɔ ɖo tagba lɛ́ mɛ gbɔn wɛ ɔ, mǐ sixú kplɔ́n nǔ gěgé dó mǐɖée wú. Ényí mǐ ɖ’ayi gǎnmaɖó mǐtɔn lɛ́ wú ɔ, mǐ sixú w’azɔ̌ dó jlá yě ɖó. w22.06 23 akpá. 13-14

Jexóva ná mǐ gǎnjɛwú ɖɔ émí ná ɖo gǔdo nú mǐ. Ði kpɔ́ndéwú ɔ, cóbónú é ná ɖɔ: “Midɛɛ lɛ́ wɛ nyí Kúnnuɖetɔ́ ce” ɔ, é ɖɔ: “A ɖo tɔ mɛ gbɔn wɛ ɔ, un ná ɖo kpɔ́ xá we; a ɖo tɔ gbo wɛ ɔ, a ná kú tɔ ǎ. A ɖo zɔnlin ɖi gbɔn myɔ mɛ wɛ ɔ, a ná ji myɔ ǎ, myɔ ná wa nǔɖé nú we ǎ.” (Eza. 43:2) Ðo sinsɛnzɔ́ ɔ mɛ ɔ, mǐ nɔ wá mɔ wǔvɛ́ ɖé lɛ́ bɔ è sixú sɔ́ yě jlɛ́ dó tɔ wú, bo sixú sɔ́ tagba syɛ́nsyɛ́n e mɛ mǐ nɔ gbɔn lɛ́ é jlɛ́ dó myɔ wú. Amɔ̌, Jexóva ná d’alɔ mǐ bɔ mǐ ná kpo ɖo wɛn ɖagbe ɔ jlá wɛ. (Eza. 41:13) Mɛ gěgé nɔ gbɛ́ wɛn mǐtɔn ɖo égbé. Mǐ nɔ kpo ɖo hinhɛn d’ayi mɛ wɛ ɖɔ gbɛ̌ e yě gbɛ́ wɛn e jlá wɛ mǐ ɖe é kún xlɛ́ ɖɔ mǐ xo Kúnnuɖetɔ́ Mawu tɔn e mǐ nyí é sín azɔ̌ kpo ó. Tuun e mǐ tuun ɖɔ nǔ mǐtɔn nɔ nyɔ́ Jexóva nukúnmɛ, ɖó mǐ kpo ɖo wɛn tɔn jlá wɛ kpó gbejíninɔ kpó wútu é nɔ dó gbɔ nú mǐ, lobo nɔ lɛ́ ná mǐ hlɔ̌nhlɔ́n. Mɛsɛ́dó Pɔ́lu ɖɔ: “È ná dó ajɔ mɛ ɖokpó ɖokpó sɔgbe xá azɔ̌ éɖésúnɔ tɔn.”—1 Kɔ. 3:8; 4:1, 2. w22.11 3-4 akpá. 5-6

Égbé ɔ, nǔɖɔɖayǐ Biblu tɔn lɛ́ ɖo jijɛnu wɛ ɖo nukún mǐtɔn mɛ. Mɛ ɖěɖěe nɔ “dó gbe vovo” lɛ́ é ɖo “gbe mímɛ́” nǔgbó Biblu tɔn tɔn kplɔ́n wɛ. (Zak. 8:23; Sof. 3:9, nwt) Gbɛtɔ́ 8000000 jɛjí ɖo to 240 mɛ wɛ ɖo tutoblónúnǔ Jexóva tɔn mɛ, bɔ ɖo xwe ɖokpó ɖokpó mɛ ɔ, gbɛtɔ́ afatɔ́n mɔ̌kpán wɛ nɔ bló batɛ́mu! Amɔ̌, nǔɖé ɖe bo lɛ́ ɖo tají hú kɛ́n lɛ́, é wɛ nyí jijɔ Klisánwun tɔn lɛ́, ɖo xógbe ɖěvo mɛ ɔ, “gbɛtɔ́ yɔ̌yɔ́ ɔ”; é wɛ ahwanvú yɔ̌yɔ́ lɛ́ ko sɔ́ dó. (Koló. 3:8-10) Yě mɛ gěgé ko jó nǔblíblíwiwa, dǎkaxixo, mɛ ɖiɖe ɖó vo ɖo mɛ mɛ kpó hunjijɛ dó to mɛtɔn jí kpó dó. Nǔɖɔɖayǐ e ɖo Ezayíi 2:4 mɛ é ɖo jijɛnu wɛ; yě sɔ́ ɖo lěe ‘è nɔ fun ahwan gbɔn é kplɔ́n wɛ ǎ.’ Ðó mǐ nɔ dó gǎn bo nɔ sɔ́ gbɛtɔ́ yɔ̌yɔ́ ɔ dó wútu ɔ, mǐ nɔ d’alɔ mɛ ɖěvo lɛ́ bɔ yě nɔ sɛkpɔ́ tutoblónúnǔ Mawu tɔn; mɔ̌ mɛ ɔ, mǐ nɔ ɖe xlɛ́ ɖɔ mǐ ɖo Klísu Jezu e ɖo ali xlɛ́ mǐ wɛ é xwedó wɛ. (Jaan 13:35) Nǔ énɛ́ lɛ́ ɖě nyí kosɔ ǎ. Jezu wɛ ɖo alɔ dó mǐ wɛ. w22.07 9-10 akpá. 7-8

Mǐ ɖó ná nɔ xo ɖɛ sɛ́dó Jexóva kpó sísí ɖaxó kpó hwebǐnu. Lin tamɛ dó nǔmimɔ jí wǔ e Ezayíi, Ezekiyɛ́li, Daniyɛ́li kpó Jaan kpó mɔ lɛ́ é jí. Yě mɛ bǐ wɛ ɖɔ ɖɔ Jexóva nyí Axɔ́sú susunɔ ɖé. Ezayíi “mɔ Aklúnɔ ɖo ayǐjínjɔ́n axɔ́súzinkpo tɔn jí; axɔ́súzinkpo ɔ yi jǐ káká.” (Eza. 6:1-3) Ezekiyɛ́li mɔ Jexóva ɖo ayǐjínjɔ́n ɖo ahwankɛkɛ́ tɔn jǐxwé tɔn ɔ jí, bɔ wěziza ɖé lɛ́ lɛ̌ dó è; é “za wě . . . lěe jǐ nɔ ja bɔ nyǐ nɔ ɖi ɔ ɖɔhun.” (Ezek. 1:26-28) Daniyɛ́li mɔ “degénɔ kpikpoe ɖokpó,” bɔ awu e é dó lɛ́ é wé lawé ɖɔhun, lobɔ axɔ́súzinkpo Tɔn nɔ kán zo. (Dan. 7:9, 10) Gɔ́ ná ɔ, Jaan mɔ Jexóva ɖo ayǐjínjɔ́n ɖo axɔ́súzinkpo e nyǐ ɖi lɛ́ lɛ̌ dó, bɔ é nɔ kɔ́n awǐnnya e è nɔ ylɔ́ ɖɔ emɛlódu é ɖɔhun é jí. (Nǔɖe. 4:2-4) Ée mǐ nɔ ɖo tamɛ lin dó susu Jexóva tɔn e è ma sixú jlɛ́ ǎ é wú wɛ é ɔ, é nɔ flín mǐ ɖɔ ɖɛ e mǐ nɔ xo sɛ́dó Jexóva é ɔ, wǔjɔmɛ ɖaxó ɖé wɛ é nyí, bo nɔ lɛ́ flín mǐ ɖɔ é ɖo tají tawun ɖɔ mǐ ní nɔ wa mɔ̌ kpó sísí kpó. w22.07 20-21 akpá. 3

Mɛ wínnyáwínnyá lɛ́ mi, Satáan ná tɛ́n kpɔ́n bo ná sú ali dó mi, bónú mi ná gɔn nukɔn yi ɖo gbigbɔ lixo. Ali e nu é sixú wa mɔ̌ ɖe é ɖokpó wɛ nyí ɖɔ é ná bló bɔ mi ná jɛ nǔ xo kpɔ́n dó nǔkplɔ́nmɛ Biblu tɔn ɖé lɛ́ wú jí. Ði kpɔ́ndéwú ɔ, mɛɖé lɛ́ sixú tɛ́n kpɔ́n bo ná bló bɔ mi ná kú d’é jí ɖɔ Mawu kún dá mǐ ó, lé nǔ lɛ́ jɔ nú yěɖée wɛ zɔ́n bɔ mǐ tíin. Mi sixú gɔn nǔ káká ɖé, alǒ ɖěbǔ tuun dó xóta énɛ́ wú hwenu e mi ɖo wǐnnyáwínnyá mɛ é, amɔ̌ din e mi ko su é ɔ, è sixú ko ɖo nǔ kplɔ́n mi d’é wú wɛ ɖo wěmaxɔmɛ. Nǔ e ɖɔ wɛ mɛ̌si mitɔn lɛ́ ɖe dó nǔ lɛ́ jɔ nú yěɖée xó ɔ wú é sixú cí nǔ e xwe ali bo lɛ́ ɖu ɖo mɛ jí é ɖɔhun. Amɔ̌, yě sixú ko nɔ ma gbéjé kúnnuɖenú e xlɛ́ ɖɔ Gbɛɖótɔ́ ɖé tíin lɛ́ é kpɔ́n dó nǔjɔnǔ mɛ. Mi flín nǔgbódodó e ɖo Nǔnywɛ́xó 18:17 mɛ é: “Mɛɖé wá jɛ hwɛ dó nukɔn ɔ, è nɔ mɔ ɖɔ hwɛ tɔn jɔ; mɛ e é dó hwɛ ɔ ka wá ɔ, é nɔ flí xó tɔn xwe.” Mi ma yí gbe nú nǔ e mi se ɖo wěmaxɔmɛ lɛ́ é bǐ kpowun ó, é nyɔ́ wa hǔn, mi xwe sɔ bo gbéjé nǔgbó e ɖo Xó Mawu tɔn Biblu ɔ mɛ lɛ́ é kpó éé ɖo wěma mǐtɔn lɛ́ mɛ lɛ́ é kpó kpɔ́n. w22.08 2 akpá. 2; 4 akpá. 8

Mǐ ba ná mɔ nǔ jɛ nǔ e mǐ nɔ xa ɖo Xó Mawu tɔn mɛ lɛ́ é mɛ. É ma nyí mɔ̌ ǎ ɔ, mǐ ná ɖu le nǔ e mǐ nɔ xa lɛ́ é tɔn bǐ mlɛ́mlɛ́ ǎ. Ði kpɔ́ndéwú ɔ, ɖ’ayi xó e Jezu ɖɔ ɖó kpɔ́ xá “nya e tuun Sɛ́n ɔ ganjí é ɖé” é wú. (Luk. 10:25-29) Hwenu e nya ɔ kan nǔ e é ná wa bo ná mɔ gbɛ mavɔmavɔ é byɔ́ é ɔ, Jezu d’alɔ ɛ bɔ é mɔ xósin ɔ ɖo Xó Mawu tɔn mɛ; é kanbyɔ́ ɛ ɖɔ: “Étɛ́ è ka wlán dó Sɛ́n ɔ mɛ? Nɛ̌ a ka mɔ nukúnnú jɛ mɛ gbɔn?” Nya ɔ ná xósin e sɔgbe é, ɖó é ɖe xó sín Mawuxówéma ɔ mɛ dó ɖɔ xó dó wǎn yí nú Mawu kpó nɔzo kpó wú. (Lev. 19:18; Sɛ́n. 6:5) Amɔ̌, ɖ’ayi nǔ e nya ɔ ɖɔ bɔ d’é wú é wú: “Mɛ̌ ka nyí nɔzo ce tawun?” Nya ɔ ɖe xlɛ́ ɖɔ émí kún mɔ nǔ jɛ nǔ e émí xa é mɛ ganjí ó. Wǎgbɔ tɔn ɔ, é tuun lěe é ná zán wěmafɔ énɛ́ lɛ́ ganjí ɖo gbɛzán tɔn mɛ gbɔn é ǎ. Mǐ ɖó alɔdó Jexóva tɔn sín hudó cóbó ná mɔ nǔ jɛ Mawuxówéma ɔ mɛ, énɛ́ wú ɔ, mǐ sixú byɔ́ ɛ gbigbɔ mímɛ́ tɔn bo ná dó sɔ́ ayi ɖó nǔ e xa wɛ mǐ ɖe lɛ́ é jí. w23.02 9 akpá. 4-5

“Nɛ̌ a ka mɔ nǔgbó ɔ gbɔn?” É ɖo wɛn ɖɔ a ná ko ná xósin nú nǔkanbyɔ́ énɛ́ azɔn mɔ̌kpán. Nǔ nukɔntɔn e nǔɖitɔ́ hǎtɔ́ ɖé ná kanbyɔ́ we hwenu e mi xo go miɖée bo ba ná tuun miɖée ganjí é ɖokpó nɛ́. Mǐ nɔ ba ná se lěe nɔví mǐtɔn lɛ́ wá tuun Jexóva bo lɛ́ yí wǎn n’i gbɔn é, bɔ lěe mǐ yí wǎn nú nǔgbó ɔ gbɔn é ɖiɖɔ nú yě nɔ lɛ́ víví nú mǐ. (Hlɔ̌. 1:11) Xóɖɔɖókpɔ́ énɛ́ lɛ́ nɔ flín mǐ lě do nǔgbó ɔ xɔ akwɛ́ sɔ é. Mǐ tlɛ nɔ lɛ́ kán ɖ’é jí hú gǎn bo ná kpo ɖo “nǔgbó ɔ sín ali xwedó wɛ,” énɛ́ wɛ nyí ɖɔ mǐ nɔ kpo ɖo gbɛ zán wɛ ɖo ali ɖé nu bá mɔ tɛn dó ɖu nyɔ̌ná Jexóva tɔn lɛ́ sín le, lobɔ nǔ mǐtɔn ná lɛ́ nyɔ́ nukún tɔn mɛ. Hwɛjijɔ gěgé wú wɛ mǐ yí wǎn nú nǔgbó ɔ. Tají hú gǎn ɔ wɛ nyí ɖɔ mǐ yí wǎn nú Jexóva Mawu e nyí Jɔtɛn nǔgbó ɔ tɔn é. Xó tɔn Biblu ɔ d’alɔ mǐ bɔ mǐ tuun ɖɔ é wɛ bló jǐnukúnsin kpó ayǐkúngban kpó, bo lɛ́ nyí Tɔ́ mǐtɔn jǐxwé tɔn wǎnyíyínɔ e nɔ kpé nukún dó mǐ wú é.—1 Pi. 5:7. w22.08 14-15 akpá. 1, 3

Mɛsɛ́dó Pɔ́lu dó wǔsyɛ́n lanmɛ nú nɔví tɔn lɛ́ ɖɔ yě ní nɔ ɖe wǎnyíyí xlɛ́ gbɔn ‘nǔ ɖagbe wiwa gblamɛ.’ (Ebl. 10:24) Xó kɛ́ɖɛ́ wɛ é ɖɔ dó d’alɔ nɔví tɔn lɛ́ ǎ, loɔ, é lɛ́ d’alɔ yě gbɔn nǔwiwa tɔn lɛ́ gblamɛ. Ði kpɔ́ndéwú ɔ, hwenu e adɔ tɔ́n ɖo Judée é ɔ, Pɔ́lu hɛn nǔ e sín hudó nǔɖitɔ́ hǎtɔ́ tɔn e ɖo fínɛ́ lɛ́ é ɖó é ɖé lɛ́ wá nú yě. (Mɛ. 11:27-30) Nǔgbó wɛ ɖɔ alɔnu Pɔ́lu tɔn ján ɖo wɛn ɖagbe ɔ jíjlá mɛ lɛ́ kpó nǔ kplɔ́nkplɔ́n mɛ lɛ́ kpó sín azɔ̌ ɔ mɛ có, hwebǐnu wɛ é nɔ ba ali ɖěɖěe nu é ná d’alɔ mɛ ɖěɖěe ɖó hudó nǔ agbaza tɔn lɛ́ tɔn ɖe é. Mɔ̌ e é nɔ wa é zɔ́n bɔ jiɖe e nǔɖitɔ́ hǎtɔ́ tɔn lɛ́ ɖó ɖɔ Jexóva ná kpé nukún dó émí wú é lɛ́ jɛjí. Égbé ɖésú ɔ, ényí mǐ nɔ zán hwenu mǐtɔn, hlɔ̌nhlɔ́n mǐtɔn kpó nǔwúkpíkpé mǐtɔn lɛ́ kpó dó ɖ’alɔ ɖo sɔhɛnmɛzɔ́ ɔ mɛ hǔn, hlɔ̌nhlɔ́n ná nǔɖiɖi nɔví mǐtɔn lɛ́ tɔn wɛ mǐ ɖe mɔ̌ nɛ́. Mǐ sixú lɛ́ wa mɔ̌ gbɔn nǔ e mǐ nɔ ná hwɛhwɛ dó nɔ gǔdo nú azɔ̌ e wa gbɔn gbɛ ɔ bǐ mɛ wɛ è ɖe é gblamɛ. Ðo ali énɛ́ lɛ́ kpó ɖěvo lɛ́ kpó nu ɔ, mǐ nɔ d’alɔ nɔví mǐtɔn lɛ́ bónú yě ná ɖeji ɖɔ Jexóva kún ná jó yě dó kpɔ́n gbeɖé ó. w22.08 24 akpá. 14

Biblu ɖɔ nǔɖɔɖayǐ gěgé xó bɔ yě ko jɛnu; ɖé lɛ́ tíin bɔ è wlán é ɔ, é ko bló xwe kanweko mɔ̌kpán cóbɔ yě wá jɛnu. Hwenuxó dó zǒgbe jí ɖɔ nǔɖɔɖayǐ énɛ́ lɛ́ jɛnu. Énɛ́ kpácá mǐ ǎ, ɖó mǐ tuun ɖɔ Jexóva wɛ nyí Dǒwátɔ́ nǔɖɔɖayǐ énɛ́ lɛ́ e ɖo Biblu mɛ lɛ́ é tɔn. Lin tamɛ dó nǔɖɔɖayǐ ɖěɖěe kúnkplá lěe è ná gba toxo hwexónu tɔn Babilɔ́nu gbɔn é wú. Ðo xwe kanweko tántɔngɔ́ J.H.M. tɔn mɛ ɔ, gbeyíɖɔ Ezayíi ɖɔ ɖ’ayǐ ɖɔ toxo hlɔ̌nhlɔ́nnɔ e nɔ nyí Babilɔ́nu é ɔ, è ná gba. É tlɛ ɖɔ ɖɔ nya e nɔ nyí Silúsi é wɛ ná gba Babilɔ́nu toxo ɔ, bo lɛ́ tín lěe é ná wa mɔ̌ gbɔn é mɛ pɛ́pɛ́pɛ́. (Eza. 44:27–45:2) Ezayíi lɛ́ ɖɔ ɖ’ayǐ ɖɔ è ná wá gba Babilɔ́nu, bɔ mɛɖé kún sɔ́ ná nɔ fínɛ́ kpɔ́n ó. (Eza. 13:19, 20) Mɛdinu lɛ́ kpó Pɛ́sinu lɛ́ kpó gba Babilɔ́nu toxo ɔ ɖo 539 J.H.M. tɔn, bɔ toxo ɖaxó énɛ́ wá húzú dǒglín. w23.01 4-5 akpá. 10

Jexóva sɔ́ mǐ bónú mǐ ná nɔ xwédo tɔn e mɛ mɛsɛntɔ́ tɔn e gbɔn gbɛ ɔ bǐ mɛ lɛ́ é ɖe é mɛ. Wǔjɔmɛ bǔnɔ tawun wɛ nyí énɛ́, bo nɔ hɛn le gěgé wá. (Mak. 10:29, 30) Gbɔn gbɛ ɔ bǐ mɛ ɔ, mǐ ɖó nɔví ɖěɖěe yí wǎn nú Jexóva mǐ ɖɔhun, bo nɔ wa nǔ e wú yě kpé lɛ́ é bǐ lobo nɔ zán gbɛ sɔgbe xá nǔgbódodó tɔn lɛ́ é. Gbe, aca kpó nǔsísɔ́ kpó mǐtɔn sixú gbɔn vo nú yětɔn, amɔ̌, mǐ nɔ yí wǎn nú yě, nú é ná bo tlɛ nyí azɔn nukɔntɔn ɔ wɛ mǐ mɔ yě ɔ nɛ́. Tají ɔ, mǐ yí wǎn nú kpɔ́ e mǐ nɔ nɔ xá yě dó kpa susu nú Tɔ́ mǐtɔn jǐxwé tɔn wǎnyíyínɔ ɔ, bo nɔ lɛ́ sɛn ɛ é. Mǐ ɖó ná nɔ bǔ xá yě. (Ðɛh. 133:1) Hweɖélɛ́nu ɔ, yě nɔ d’alɔ mǐ, bo nɔ hɛn wǔvɛ́gban mǐtɔn lɛ́ xá mǐ. (Hlɔ̌. 15:1; Ga. 6:2) Yě nɔ lɛ́ d’alɔ mǐ bɔ mǐ nɔ ɖó kan dó sinsɛnzɔ́ Jexóva tɔn wú, lobo nɔ kpo ɖo xɔ́ntɔn Jexóva tɔn nyí wɛ. (Ebl. 10:23-25) Ényí agun ɔ ma ko ɖo fínɛ́ bo nɔ cyɔ́n alɔ mǐ jí, bónú mǐ ná gbí dɔn ɖo kɛntɔ́ mǐtɔn lɛ́, yě wɛ nyí Satáan Awǒvi kpó gbɛ tɔn nyanya ɔ kpó nukɔn ǎ ɔ, dǒ nukún lěe nǔ ná ko cí nú mǐ é mɛ kpɔ́n. w22.09 2-3 akpá. 3-4

Ényí mǐ ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe lɛ́ é jí ɔ, é sixú vɛ́ wǔ nú mǐ tawun bɔ mǐ ná nɔ ɖu ɖo mǐɖée jí. Ényí mǐ ma ɖó ayi te ǎ ɔ, mǐ sixú nɔ manywɛ́ mɛ bo sɔ́ kpáxó lɛ́ nyi to jí. Gɔ́ ná ɔ, ényí mǐ sɔ́ nǔɖé nyi Ɛntɛnɛ́ti jí ɔ, mǐ sɔ́ sixú ɖó acɛ ɖěbǔ dó lěe mɛ ɖěvo lɛ́ ná zán gbɔn é kpó tagba vovo e é ná dɔn nyi ayǐ lɛ́ é kpó jí ǎ. Mɛɖéejíɖuɖe nɔ lɛ́ d’alɔ mǐ bɔ mǐ nɔ nɔ xwíí hwenu e gbeklánxámɛtɔ́ lɛ́ tɛ́n kpɔ́n, bo ná sísɛ́ mǐ bónú mǐ ná ɖɔ nǔ ɖěɖěe sixú wa nǔ dó nɔví súnnu kpó nɔví nyɔ̌nu kpó mǐtɔn lɛ́ wú lɛ́ é. Nǔ mɔ̌hun sixú jɛ hwenu e kponɔ lɛ́ kan nǔ byɔ́ mǐ ɖo fí e è gbɛ́ azɔ̌ mǐtɔn alǒ ɖó dogbó ná ɖe lɛ́ é. Mǐ sixú zán nǔgbódodó e ɖɔ ‘mǐ ní hɛn nu mǐtɔn é’ ɖo ninɔmɛ énɛ́ lɛ́ kpó ɖěvo lɛ́ kpó mɛ. (Ðɛh. 39:2) Ényí mɛ e ɖo xwédo mǐtɔn mɛ lɛ́ é, xɔ́ntɔn mǐtɔn lɛ́, nɔví súnnu kpó nɔví nyɔ̌nu kpó mǐtɔn lɛ́, alǒ mɛ ɖěvo ɖěbǔ wa nǔ ɖó kpɔ́ xá wɛ mǐ ɖe ɔ, mǐ ɖó ná bló bɔ è ná nɔ ɖeji dó mǐ wú. Gɔ́ ná ɔ, bo ná dó nyí mɛ ɖejidéwú ɔ, é byɔ́ ɖɔ mǐ ní nɔ ɖu ɖo mǐɖée jí. w22.09 13 akpá. 16

Bo ná dó ɖó awǎjijɛ adodwé ɔ ɔ, mǐ ɖó ná nɔ xa Biblu, bo ná nɔ lɛ́ kplɔ́n. Nǔgbó ɔ, mǐ ɖó hudó tɔn. Énɛ́ wú wɛ Jezu ɖɔ: “Nǔɖuɖu kɛ́ɖɛ́ wɛ nɔ hɛn mɛ ɖó gbɛ ǎ, loɔ, xó e nɔ tɔ́n sín Jexóva nu mɛ é bǐ wɛ nɔ hɛn mɛ ɖó gbɛ.” (Mat. 4:4) Hǔn, mǐ ɖó ná lɔn bónú ayǐ ɖé ná hɔ́n bɔ mǐ ná gɔn Xó xɔ akwɛ́ Mawu tɔn Biblu ɔ xa ǎ. Ðó Jexóva yí wǎn nú mǐ wútu ɔ, é ɖɔ nǔ e mǐ ɖó ná wa, bo ná ɖó gbɛzán awǎjijɛnɔ é nú mǐ ɖo Xó tɔn Biblu ɔ mɛ. Mǐ nɔ kplɔ́n linlin e é ɖó nú mǐ mɛ gbɛtɔ́ lɛ́ é ɖo Biblu mɛ. Mǐ nɔ kplɔ́n lěe mǐ kpó é kpó sixú vɛ́ gbɔn é kpó nǔ e mǐ ná wa b’ɛ ná sɔ́ hwɛ mǐtɔn lɛ́ kɛ mǐ é kpó. Gɔ́ ná ɔ, mǐ nɔ lɛ́ kplɔ́n nǔ dó nukúnɖíɖó ɖaaɖagbe sɔgúdo tɔn e sín akpá é dó nú mǐ é wú. (Jel. 29:11) Nǔgbó énɛ́ lɛ́ e mǐ nɔ kplɔ́n ɖo Biblu mɛ é nɔ zɔ́n bɔ mǐ nɔ ɖó awǎjijɛ! Ényí gbɛ mɛ tagba lɛ́ zɔ́n bónú awakanmɛ kú we hweɖébǔnu hǔn, nɔ zán hwenu gěgé dó xa Xó Jexóva tɔn, bo nɔ lɛ́ lin tamɛ d’é jí. w22.10 7-8 akpá. 4-6

Hwɛ Biblu tɔn jɔ b’ɛ dó wǔsyɛ́n lanmɛ nú mǐ ɖɔ mǐ ní ma kpo ɖo gɔgɔnɔ nyí wɛ ó. Ényí mǐ nɔ zán nǔgbódodó Biblu tɔn lɛ́ ɖo gbɛzán mǐtɔn mɛ ɔ, mǐ nɔ húzú nǔnywɛ́tɔ́. Ényí mǐ nɔ wa mɔ̌ ɔ, mǐ ná mɔ lěe Biblu nɔ d’alɔ mǐ bɔ mǐ nɔ nyi alɔ nú tagba lɛ́, lobo nɔ wá gbeta e nǔnywɛ́ kpé lɛ́ é kɔn gbɔn é. É ná nyɔ́ ɖɔ mǐ ní nɔ lin tamɛ dó gbeta e kɔn mǐ ko wá lɛ́ é jí. Ényí mǐ ko ɖo Biblu kplɔ́n wɛ, bo ko lɛ́ jɛ kplé lɛ́ yi jí din é ɔ, é ko nɔ zaan ɔ, mǐ sixú kan nǔ e wú mǐ ma ko sɔ́ mǐɖée jó nú Jexóva bo bló batɛ́mu ǎ é byɔ́ mǐɖée. Ényí mǐ ko bló batɛ́mu wɛ ɔ, mǐ ka ɖo blǒbló wɛ bɔ nǔwúkpíkpé e mǐ ɖó bo nɔ ɖɔ Mawuxó, lobo nɔ lɛ́ kplɔ́n nǔ mɛ é ɖo te kpɔ́n d’é jí wɛ a? Gbeta e kɔn mǐ nɔ wá lɛ́ é ka nɔ xlɛ́ ɖɔ mǐ nɔ jó nǔgbódodó Biblu tɔn lɛ́ dó bónú yě nɔ xlɛ́ ali mǐ a? Mǐ ka nɔ ɖe jijɔ klisánwun tɔn lɛ́ xlɛ́ hwenu e mǐ ɖo nǔ wa ɖó kpɔ́ xá mɛ ɖěvo lɛ́ wɛ é a? Ényí mǐ ɖó ayi wú ɖɔ mǐ ɖó ná bló hǔzúhúzú lɛ́ ɔ, mǐ ɖó ná lin tamɛ dó nǔflínmɛ Jexóva tɔn e nɔ “ná nǔnywɛ́ mɛ e ma ɖó nǔnywɛ́ ɖě ǎ” lɛ́ é jí dó nǔjɔnǔ mɛ.—Ðɛh. 19:8. w22.10 20 akpá. 8

Ezekiyɛ́li mɔ lě do gbigbɔ mímɛ́ Mawu tɔn ɖó hlɔ̌nhlɔ́n sɔ é. Nǔ e Ezekiyɛ́li mɔ ɖo nǔmimɔ mɛ é d’alɔ ɛ bɔ é kú d’é jí ɖɔ gbigbɔ mímɛ́ Jexóva tɔn ɖo alɔ dó wɛnsagun hlɔ̌nhlɔ́nnɔ lɛ́ wɛ, bo lɛ́ ɖo tɛn sɛ nú ahwankɛkɛ́ ɖaxó jǐxwé tɔn ɔ wɛ. (Ezek. 1:21) Ée Ezekiyɛ́li mɔ nǔ énɛ́ é ɔ, nɛ̌ é ka wa nǔ gbɔn? É wlán ɖɔ: “Ée un mɔ mɔ̌ ɔ, un xwe agbɔ̌nnusú do.” Nǔ e Ezekiyɛ́li mɔ é jí wǔ n’i sɔmɔ̌ bɔ é xwe agbɔ̌nnusú do. (Ezek. 1:28) Ényí Ezekiyɛ́li lin tamɛ dó nǔmimɔ jí wú énɛ́ jí hweɖébǔnu ɔ, é ná ko nɔ ná hlɔ̌nhlɔ́n kán e é kán ɖ’é jí ɖɔ kpó alɔdó gbigbɔ mímɛ́ Mawu tɔn tɔn kpó ɔ, émí ná kpé sinsɛnzɔ́ émítɔn wú é. Jexóva ɖe gbe nú Ezekiyɛ́li ɖɔ: “Hwi gbɛtɔ́ ɔ, sí te bo nɔ te, un ɖó xó ɖé bo ná ɖɔ nú we.” Gbe énɛ́ e Jexóva ɖe é kpó gbigbɔ mímɛ́ tɔn kpó ná Ezekiyɛ́li hlɔ̌nhlɔ́n e sín hudó é ɖó bá sí te sín kɔ́mɛ é. (Ezek. 2:1, 2) Sín hwenɛ́nu káká jɛ vivɔnu sinsɛnzɔ́ Ezekiyɛ́li tɔn tɔn ɔ, Mawu xlɛ́ ali i kpó hlɔ̌nhlɔ́n tɔn kpó, énɛ́ wɛ nyí, kpó gbigbɔ mímɛ́ tɔn kpó.—Ezek. 3:22; 8:1; 33:22; 37:1; 40:1. w22.11 4 akpá. 7-8

Gbeyíɖɔ Ezayíi tínmɛ ɖɔ Jexóva cí mɛ̌si e sín ayi ɖo te, bɔ é ɖo zɔnlin ɖi wɛ ɖo wěmaxɔmɛví tɔn lɛ́ gúdo, bo ɖo ali e yě ná mlɛ́ é xlɛ́ yě wɛ é ɖɔhun. Éhɔ́nmɛ ɔ, mǐ nɔ se gbe Mawu tɔn ɖo gǔdo mǐtɔn. Gbɔn nɛ̌ é? É ko lín tawun din bɔ è wlán xó e Mawu sɔ́ dó ayi mɛ nú mɛ lɛ́ é dó Biblu mɛ. Énɛ́ wú ɔ, ényí mǐ ɖo Biblu xa wɛ ɔ, é nɔ cí ɖɔ mǐ ɖo gbe Mawu tɔn se wɛ ɖo gǔdo mǐtɔn ɖɔhun. (Eza. 51:4) Nɛ̌ mǐ ka sixú ɖu le wě e Jexóva nɔ ɖe xá mǐ é tɔn bǐ mlɛ́mlɛ́ gbɔn? Ð’ayi wú ɖɔ nǔ we xó wɛ Ezayíi ɖɔ. Nukɔntɔn ɔ, “ali ɔ ɖíe.” Wegɔ́ ɔ, “wlǐ bo ɖidó.” É ko kpé kpowun ɖɔ è ní tuun “ali ɔ” ǎ. Mǐ ɖó ná “wlí bo ɖidó.” Xó Jexóva tɔn kpó tínmɛ e tutoblónúnǔ tɔn nɔ ná lɛ́ é kpó nɔ kplɔ́n mǐ nǔ e Jexóva byɔ́ ɖo mǐ sí lɛ́ é. Mǐ nɔ lɛ́ kplɔ́n lěe mǐ ná zán nǔ e mǐ kplɔ́n lɛ́ é gbɔn é. Bo ná dó dɛ kpó awǎjijɛ kpó ɖo Jexóva e sɛn wɛ mǐ ɖe é mɛ ɔ, mǐ ɖó ná ɖe afɔ we énɛ́ lɛ́. Mɔ̌ jɛ́n mǐ ɖó ná wa cóbó ná ɖu nyɔ̌ná Jexóva tɔn lɛ́ sín le. w22.11 11 akpá. 10-11

Ée mɛsɛ́dó Jezu tɔn lɛ́ gěgé kú gúdo zaan é ɔ, klisánwun-nyíjɛtɔ́ gěgé byɔ́ agun ɔ mɛ. (Mat. 13:24-27, 37-39) Yě nɔ kplɔ́n ‘nǔ e ma sɔgbe xá wɛn ɖagbe ɔ ǎ lɛ́ mɛ, bónú mɛ gěgé ná xwedó yě ɖo mɛ e ɖi nǔ nú Jezu lɛ́ mɛ.’ (Mɛ. 20:30) “Nǔ e ma sɔgbe xá wɛn ɖagbe ɔ ǎ” bɔ klisánwun-nyíjɛtɔ́ énɛ́ lɛ́ wá jɛ mɛ kplɔ́n jí é ɖokpó wɛ nyí ɖɔ Jezu kún sɔ́ gbɛ tɔn dó sá vɔ̌ “azɔn ɖokpó géé . . . dó hwɛ gbɛtɔ́ gěgé tɔn tamɛ” lěe Biblu ɖɔ gbɔn é ó, amɔ̌, é ɖó ná fɔ́n bo ná kpo ɖo vɔ̌ ɔ sá wɛ. (Ebl. 9:27, 28) Égbé ɔ, mɛ gěgé ɖi nǔ nú adingban-núkplɔ́nmɛ énɛ́. Yě nɔ xo yěɖée kplé dó sinsɛnxɔ lɛ́ mɛ hwɛhwɛ, hweɖélɛ́nu ɔ, ayǐhɔ́ngbe ayǐhɔ́ngbe bo ná dó flín kú Jezu tɔn; sinsɛn Katolíka tɔn nɔ ylɔ́ nǔwiwa énɛ́ ɖɔ “la sainte Communion.” Mɛ ɖěɖěe ɖo sinsɛn ɖěvo lɛ́ mɛ lɛ́ é nɔ flín kú Jezu tɔn ɖě sɔmɔ̌ ǎ; é ɖo mɔ̌ có, yě tuun nǔ káká ɖé dó nǔ e vɔ̌sísá Jezu tɔn wa é wú ǎ. w23.01 21 akpá. 5

Ðo Axɔ́súɖuɖu xwe afatɔ́n tɔn Jezu tɔn hwenu ɔ, è ná fɔ́n mɛ e kú lɛ́ é sín kú bɔ gbɛtɔ́ tónúsetɔ́ lɛ́ ná húzú mɛ maɖóblɔ̌. Mɛ e Jexóva mɔ dó mɔ hwɛjijɔnɔ lɛ́ é ɔ, ‘ayǐkúngban ɔ ná nyí yětɔn, bɔ yě ná nɔ jí káká sɔ́yi.’ (Ðɛh. 37:10, 11, 29) Xomɛ hun mǐ ɖɔ è ná sú “kɛntɔ́ gǔdo tɔn” e nyí ‘kú é sín kún dó.’ (1 Kɔ. 15:26) Nukúnɖíɖó e mǐ ɖó bo ná nɔ gbɛ káká sɔ́yi é ɔ, Xó Mawu tɔn jí wɛ é jínjɔ́n. Nukúnɖíɖó énɛ́ sixú d’alɔ mǐ bɔ mǐ ná kpo ɖo gbejí ɖo azǎn gǔdo gúdo tɔn élɔ́ lɛ́ e vɛ́ wǔ tawun é mɛ. Amɔ̌, bónú nǔ mǐtɔn ná nyɔ́ Jexóva nukúnmɛ ɔ, ba e ba wɛ mǐ ɖe bo ná nɔ gbɛ é kɛ́ɖɛ́ wɛ ná sɔ́ akpakpa mǐ ǎ. É nyɔ́ wa ɔ, hwɛjijɔ tají e wú mǐ ná kpo ɖo gbejí nú Jexóva kpó Jezu kpó é wɛ nyí wǎn ɖaxó e mǐ yí nú yě é. (2 Kɔ. 5:14, 15) Wǎnyíyí énɛ́ nɔ sísɛ́ mǐ bɔ mǐ nɔ wa nǔ yěɖɔhun, bo nɔ ɖɔ xó nú mɛ ɖěvo lɛ́ dó nukúnɖíɖó mǐtɔn wú. (Hlɔ̌. 10:13-15) Ée mǐ ná ɖo kplɔ́nkplɔ́n wɛ, bo ma sɔ́ ná nyí cejɛ́nnábínɔ ǎ lobo ná nɔ hun alɔ dó ná nǔ mɛ é ɔ, mǐ ná nyí mɛ alɔkpa e Jexóva ba é, bo ná nyí xɔ́ntɔn tɔn lɛ́ káká sɔ́yi. w22.12 6-7 akpá. 15-16

Yadónúmɛ sixú xo nǔ e nɔ ná mǐ fífá ayǐvɔ̌gbe lɛ́ é yí sín mǐ sí. Ado sixú jɛ mǐ hu jí, bɔ mǐ ná jɛ xɛsi ɖi dó nǔ e ná wá jɛ lɛ́ é wú jí. Nǔ hɛn ɔ, é ná cí mɔ̌ nú mɛ. Amɔ̌, mǐ ɖó ná nɔ acéjí. Jezu ɖɔ ɖɔ yadónúmɛ sixú zɔ́n bɔ ahwanvú émítɔn lɛ́ ná klɛ́n afɔ. (Jaan 16:1, 2) Hwenu e Jezu ɖɔ nú mǐ ɖɔ mǐ ní ɖó nukún yadónúmɛ é ɔ, é lɛ́ ná gǎnjɛwú mǐ ɖɔ mǐ sixú kpo ɖo gbejí nɔ wɛ. (Jaan 15:20; 16:33) Ényí è gbɛ́ azɔ̌ mǐtɔn, alǒ ɖó dogbó syɛ́nsyɛ́n ná ɔ, alaxɔ kpó mɛxó agun tɔn lɛ́ kpó sixú ɖe wě ɖé lɛ́ xá mǐ. Hwɛjijɔ élɔ́ lɛ́ wú wɛ yě nɔ wa mɔ̌: bo ná dó cyɔ́n alɔ mǐ jí, ná nǔɖuɖu gbigbɔ tɔn mǐ, lobo d’alɔ mǐ bónú mǐ ná kpo ɖo wɛnɖagbejíjlázɔ́ ɔ wa wɛ. Wa nǔ e wú a kpé é bǐ bo xwedó wě e yě ɖe xá we é. (Ja. 3:17) Gɔ́ ná ɔ, ma ɖɔ kpáxó e kúnkplá nɔví lɛ́, alǒ agun ɔ sín azɔ̌ lɛ́ é nú mɛ ɖěɖěe é ma kan ǎ lɛ́ é gbeɖé ó.—Nǔt. 3:7. w22.12 20-21 akpá. 14-16

Égbé ɔ, Jezu kpo ɖo ali xlɛ́ ahwanvú tɔn lɛ́ wɛ ɖo wɛn ɖagbe Axɔ́súɖuto ɔ tɔn e jlá wɛ yě ɖe gbɔn ayǐkúngban ɔ bǐ jí é kɔn. É ɖe akpá e é dó é. Jezu nɔ kplɔ́n mǐ lěe mǐ ná jlá wɛn ɔ gbɔn é, bo nɔ lɛ́ ná mǐ azɔ̌wanú e sín hudó mǐ ɖó bo ná dó jlá wɛn ɖagbe ɔ gbɔn fí bǐ é. (Mat. 28:18-20) Ényí mǐ nɔ ɖó kan dó wɛn ɖagbe ɔ jíjlá kpó nǔ kplɔ́nkplɔ́n mɛ lɛ́ kpó sín azɔ̌ ɔ wú hǔn, azɔ̌ e nyí mǐtɔn é wa wɛ mǐ ɖe mɔ̌ nɛ́; ényí mǐ lɛ́ ɖo wunzɛn bo ɖo te kpɔ́n vivɔnu gbɛ élɔ́ tɔn hǔn, azɔ̌ e nyí mǐtɔn é wa wɛ mǐ lɛ́ ɖe mɔ̌ nɛ́. Ényí mǐ nɔ xwedó wěɖexámɛ e ɖo Eblée lɛ́ 6:11, 12 mɛ é ɔ, mǐ ná hɛn nukúnɖíɖó mǐtɔn syɛ́nsyɛ́n “káká sɔ́yi vivɔnu.” Jexóva ko sɔ́ azǎn e gbe é ná sú kún dó nú gbɛ Satáan tɔn é kpó gan ɔ mɛ kpó. Hwenu e é ɖó dó é su ɔ, é ná bló bɔ nǔɖɔɖayǐ e kúnkplá gbɛ yɔ̌yɔ́ ɔ, bo ɖo Xó tɔn mɛ lɛ́ é bǐ ná jɛnu. Amɔ̌ hweɖélɛ́nu ɔ, mǐ sixú lin ɖɔ vivɔnu ɔ ɖo lǐnlín wɛ. É ɖo mɔ̌ có, azǎn Jexóva tɔn ná gbɔ hwenu ǎ, é ná wá “jɛ́n wɛ.” (Xab. 2:3) Énɛ́ wú ɔ, mi nú mǐ ní kán ɖ’é jí bá ‘kpo ɖo te nɔ kpɔ́n Jexóva wɛ,’ dó xlɛ́ ɖɔ mǐ ɖeji dó Mawu e nɔ “hwlɛ́n [mǐ] gán” é wú.—Micée 7:7. w23.02 19 akpá. 15-16

Nǔ e gbé mɛ e nɔ fán só é ɖé nɔ nya é wɛ nyí ɖɔ, é ní yi só ɔ sín ahɔn mɛ. Amɔ̌, ɖo só ɔ fínfán hwenu ɔ, fí gěgé ɖe bɔ é sixú nɔ te ɖe, bo ɖu vǐví nǔ ɖagbe e é mɔ lɛ́ é tɔn. Ðo ali ɖokpó ɔ nu ɔ, nɔ ba hwenu hwɛhwɛ bo nɔ nɔ te, lobo nɔ dó nukún lěe a ɖo xwi ɖí xá wǔvɛ́ lɛ́ wɛ có, Jexóva ka ɖo blǒbló wɛ bɔ é nɔ kpa we gbɔn é jí. Ðo vivɔnu azǎn ɖokpó ɖokpó tɔn hǔn, nɔ kanbyɔ́ hwiɖée ɖɔ: ‘Ali tɛ́ nu un ka mɔ nyɔ̌ná Jexóva tɔn ɖe ɖo égbé? Nǔgbó wɛ ɖɔ tagba ɔ kpo ɖo ayǐ có, nɛ̌ Jexóva ka ɖo alɔ dó mì wɛ bónú má dɛ ɖ’é nu gbɔn?’ Kpɔ́n ɖɔ é hwe bǐ ɔ, émí ka sixú sɔ́ kɛ́n nǔ e Jexóva wa dó d’alɔ émí é tɔn ɖokpó vɔ́vɔ́ a jí. Nǔgbó ɔ, a sixú ɖo ɖɛ xo wɛ ɖɔ wǔvɛ́ towe lɛ́ ní vɔ. (Filí. 4:6) Amɔ̌, mǐ ɖó ná lɛ́ ɖó ayi nyɔ̌ná ɖěɖěe mɔ wɛ mǐ ɖe din lɛ́ é wú. È ná ɖɔ ɔ, Jexóva d’akpá ɖɔ émí ná ná hlɔ̌nhlɔ́n mǐ, bo lɛ́ d’alɔ mǐ bɔ mǐ ná dɛ. Énɛ́ wú ɔ, gǔdo e nɔ nú we wɛ Jexóva ɖe é ní nɔ sú nukún towe mɛ hwebǐnu. Énɛ́ ɔ, a ná mɔ lěe Jexóva ɖo alɔ dó we wɛ gbɔn bónú é ná kpá we ɖo wǔvɛ́ lɛ́ hwenu gbɔn é é.—Bǐb. 41:51, 52. w23.01 19 akpá. 17-18

Kanbyɔ́ hwiɖée ɖɔ: ‘Lěe un nɔ zán gbɛ gbɔn é ka nɔ xlɛ́ ɖɔ un tuun ɖɔ gbɛ élɔ́ sín vivɔnu ko sɛkpɔ́ a? Gbeta ɖěɖěe kɔn un wá dó wěma kplɔ́nkplɔ́n, alǒ azɔ̌ e un ná wa é wú é ka xlɛ́ ɖɔ Jexóva sinsɛn wɛ nyí nǔ tají hú gǎn ɔ ɖo gbɛzán ce mɛ a? Un ka kú d’é jí ɖɔ Jexóva ná kpé nukún dó nyi kpó xwédo ce kpó wú a?’ Ényí mǐ ɖo tíntɛ́nkpɔ́n wɛ bá wa jlǒ Jexóva tɔn ɖo nǔ e mǐ nɔ wa lɛ́ é bǐ mɛ ɔ, xomɛ nɔ hun i tawun. (Mat. 6:25-27, 33; Filí. 4:12, 13) É byɔ́ ɖɔ mǐ ní nɔ gbéjé linlin mǐtɔn kpɔ́n hwɛhwɛ, bo nɔ bló hǔzúhúzú ɖěbǔ e jɛxá é. Pɔ́lu ɖɔ nú Kɔlɛ́ntinu lɛ́ ɖɔ: “Mi tɛ́n miɖée kpɔ́n, bo kíjé ayi miɖée tɔn mɛ kpɔ́n ɖɔ émí nɔ zán gbɛ ɖo nǔɖiɖi mɛ a jí?” (2 Kɔ. 13:5) Énɛ́ wú ɔ, mǐ ɖó ná kpo ɖo linlin mǐtɔn lɛ́ húzú wɛ gbɔn Xó Mawu tɔn xixa, kplɔ́nkplɔ́n bo nɔ lin nǔ éɖɔhun kpó nǔ ɖěbǔ e é ɖo dandan ɖɔ mǐ ní wa bónú linlin mǐtɔn ná dó sɔgbe xá jlǒ Mawu tɔn lɛ́ é kpó wiwa gblamɛ.—1 Kɔ. 2:14-16. w23.01 9-10 akpá. 5-6