Octobre

É ka ko vɛ́ wǔ nú we bɔ a ná se tónú kpɔ́n a? Nǔ cí mɔ̌ nú axɔ́sú Davídi, énɛ́ wú ɔ, é xo ɖɛ élɔ́ sɛ́dó Mawu: “Fɔ́n tónú sise nú we sín jlǒ dó lanmɛ nú mì.” (Ðɛh. 51:12, nwt) Davídi yí wǎn nú Jexóva. Amɔ̌, hweɖélɛ́nu ɔ, gǎn wɛ é nɔ dó tawun cóbó nɔ se tónú, bɔ mɔ̌ wɛ é nɔ nyí gbɔn nú mǐ lɔ. Étɛ́wú? Nukɔntɔn, mǐ ɖu tónúmase sín gǔ. Wegɔ́, Satáan nɔ ɖo tíntɛ́nkpɔ́n wɛ hwebǐnu, bo ná sísɛ́ mǐ bónú mǐ ná fɔ́n gǔ éɖɔhun. (2 Kɔ. 11:3) Atɔngɔ́, mɛ e ɖo gbɛ élɔ́ e ɖo gǔ fɔ́n wɛ é mɛ lɛ́ é, énɛ́ wɛ nyí “gbigbɔ e ɖo azɔ̌ wa wɛ ɖo vǐ tónúmasetɔ́ lɛ́ mɛ é” wɛ lɛ́ lɛ̌ dó mǐ. (Efɛ́. 2:2) É nyí hwɛhuhu sín ninɔmɛ mǐtɔn kɛ́ɖɛ́ wɛ mǐ ɖó ná ɖí xwi xá ǎ, loɔ, mǐ ɖó ná lɛ́ gbí dɔn ɖo kɔ e Awǒvi kpó gbɛ élɔ́ kpó nɔ gbídí nú mǐ, bónú mǐ ná gɔn tónú se é nu. Mǐ ɖó ná dó gǎn syɛ́nsyɛ́n bá se tónú nú Jexóva kpó mɛ ɖěɖěe é sɔ́, bɔ yě ɖo tɛn acɛkpikpa tɔn mɛ lɛ́ é kpó. w23.10 6 akpá. 1

Étɛ́ nǔjíwǔ e Jezu bló bo sɔ́ sin dó húzú vɛ̌ɛn é ka sixú kplɔ́n mǐ? É kplɔ́n nǔɖé mǐ dó mɛɖéesɔ́hwe wú. Jezu bló nǔjíwǔ énɛ́ dó jlá ajɔ̌ nú éɖée ǎ; nǔgbó ɔ, é jlá ajɔ̌ nú éɖée gbeɖé ɖó nǔ e é wa lɛ́ é ɖě wú ǎ. É nyɔ́ wa ɔ, kpó mɛɖéesɔ́hwe kpó wɛ é nɔ sɔ́ susu ɔ bǐ jó nú Tɔ́ tɔn hwebǐnu. (Jaan 5:19, 30; 8:28) Ényí mǐ nɔ ɖó linlin e ɖo jlɛ̌ jí é dó mǐɖée wú Jezu ɖɔhun ɔ, mǐ ná jlá ajɔ̌ nú mǐɖée ɖó nǔ e mǐ nɔ wa lɛ́ é ɖě wú ǎ. Mi nú mǐ ní nɔ gó ɖó wǔjɔmɛ e mǐ ɖó bo ɖo Mawu mǐtɔn e ma kpé we ǎ é sɛn wɛ é wú, é ní ma nyí ɖó mǐɖée wú ó. (Jel. 9:23, 24) Mi nú mǐ ní nɔ sɔ́ susu e jɛxá ɛ é n’i. È ná ɖɔ ɔ, nǔ ɖagbe tɛ́ mǐ ka sixú wa alɔdó Jexóva tɔn mɛvo? (1 Kɔ. 1:26-31) Ényí mǐ nɔ sɔ́ mǐɖée hwe ɔ, mǐ ná nɔ xɔ susu nú mǐɖée ɖó ɖagbe e mǐ wa nú mɛ ɖěvo lɛ́ é wú ǎ. Tuun e mǐ tuun ɖɔ Jexóva nɔ mɔ nǔ e mǐ nɔ wa lɛ́ é, bɔ yě nɔ lɛ́ xɔ akwɛ́ ɖo nukún tɔn mɛ é ko kpé mǐ. (Sɔ́ jlɛ́ dó Matíe 6:2-4 wú; Ebl. 13:16) É ɖo wɛn ɖɔ, ényí mǐ nɔ sɔ́ mǐɖée hwe Jezu ɖɔhun ɔ, nǔ mǐtɔn nɔ nyɔ́ Jexóva nukúnmɛ.—1 Pi. 5:6. w23.04 4-5 akpá. 9; 5 akpá. 11-12

Mawu sɔ́ d’ayi mɛ nú mɛsɛ́dó Pɔ́lu bɔ é dó wǔsyɛ́n lanmɛ nú klisánwun lɛ́ ɖɔ yě ní nɔ ba ɖagbe mɛ ɖěvo lɛ́ tɔn. Nɛ̌ mǐ ka sixú nɔ xwedó wěɖexámɛ énɛ́ ɖo kplé lɛ́ jí gbɔn? Mǐ sixú nɔ wa mɔ̌, ényí mǐ nɔ flín ɖɔ mɛ ɖěvo lɛ́ lɔ ba ná ná xósin mǐɖɔhun ɔ nɛ́. Lin tamɛ dó nǔ élɔ́ jí. Ényí a ɖo xó ɖɔ xá xɔ́ntɔn towe lɛ́ wɛ ɔ, a ná ɖɔ xó káká bɔ yědɛɛ lɛ́ sɔ́ ná mɔ ali bá ɖɔ xó ɖě ǎ wɛ a? É ɖo wɛn ɖɔ a kún ná wa mɔ̌ ó. A ba ɖɔ yě lɔmɔ̌ ní ɖ’alɔ ɖo xóɖɔɖókpɔ́ ɔ mɛ. Mɔ̌ ɖokpó ɔ, mǐ nɔ ba ná ná tɛn mɛ gěgé lěe é nyɔ́ bló gbɔn é, bónú yě lɔ ná ná xósin ɖo kplé lɛ́ jí. Nǔgbó ɔ, tɛn e mǐ nɔ ná nɔví mǐtɔn lɛ́ bɔ yě nɔ ná xósin dó ɖe nǔɖiɖi yětɔn xlɛ́ é nyí ali ɖagbe hú gǎn e nu mǐ sixú dó wǔsyɛ́n lanmɛ nú yě ɖe é ɖokpó. (1 Kɔ. 10:24) Mi nú mǐ ní ɖɔ xó dó lěe mǐ sixú wa mɔ̌ gbɔn é jí. Énɛ́ wú ɔ, nɔ ná xósin e ɖo kléwún lɛ́ é, mɔ̌ mɛ ɔ, hwenu ná tíin hú gǎn bɔ mɛ gěgé ná ɖ’alɔ ɖo kplé ɔ mɛ. Ényí a na bo tlɛ ná xósin e ɖo kléwún é ɖé hǔn, nyi alɔ nú nǔ tají e ɖo akpáxwé ɔ mɛ lɛ́ é gěgé ɖiɖɔ ɖo xósin towe mɛ. Ényí a ɖɔ nǔ e ɖo akpáxwé ɔ mɛ lɛ́ é bǐ ɔ, nǔ káká ɖé sɔ́ ná kpo bónú mɛ ɖěvo lɛ́ ná ɖɔ ǎ. w23.04 22-23 akpá. 11-13

Mǐ ɖó ná flín lě do é ɖo tají ɖɔ mǐ ní kpo ɖo alɔ dó mɛ ɖěvo lɛ́ wɛ sɔ é, tají ɔ, gbɔn wɛnɖagbejíjlázɔ́ mǐtɔn gblamɛ. É byɔ́ ɖɔ mǐ ní nɔ ɖyɔ́ alɔ ɖo sinsɛnzɔ́ mǐtɔn mɛ. Mɛ ɖěɖěe ɖi nǔ nú nǔ vovo lɛ́, ɖó walɔ vovo lɛ́, bo lɛ́ gosín xá vovo mɛ lɛ́ é wɛ mǐ nɔ xo go. Mɛsɛ́dó Pɔ́lu nɔ húzú alɔ, bɔ kpɔ́ndéwú tɔn sixú kplɔ́n nǔ mǐ. Jezu sɔ́ Pɔ́lu, bɔ é nyí “mɛsɛ́dó nú mɛ e ɖo akɔta ɖě lɛ́ mɛ lɛ́ é.” (Hlɔ̌. 11:13) Ðó azɔ̌ énɛ́ e è sɔ́ d’así nú Pɔ́lu é wútu ɔ, é nɔ jlá wɛn ɖagbe ɔ Jwifu lɛ́, Glɛ̌kinu lɛ́, wěmasetɔ́ ɖaxó ɖaxó lɛ́, glesi yǎyá lɛ́, mɛ nukúnɖéjí lɛ́ kpó axɔ́sú lɛ́ kpó. Bónú wɛn e jlá wɛ Pɔ́lu ɖe é ná mɔ tɛn dó byɔ́ ayi mɛ nú mɛ vovo énɛ́ lɛ́ bǐ ɔ, é sɔ́ éɖée dó ɖó “nǔ bǐ nú gbɛtɔ́ alɔkpa lɛ́ bǐ.” (1 Kɔ. 9:19-22) É nɔ sɔ́ ayi ɖó fí e tóɖóetɔ́ lɛ́ gosín é kpó nǔ e yě ɖi nǔ ná lɛ́ é kpó jí, énɛ́ nɔ d’alɔ ɛ bɔ é nɔ húzú alɔ bo nɔ ɖɔ xó nú mɛ ɖokpó ɖokpó ɖo ali ɖé nu, bo ná dó dɔn ɛ wá Mawu gɔ́n. Ényí mǐ nɔ húzú alɔ bo nɔ tɛ́n kpɔ́n bo nɔ lin tamɛ dó ali ɖagbe hú gǎn e nu mǐ sixú d’alɔ mɛ ɖokpó ɖokpó ɖe é jí ɔ, sinsɛnzɔ́ mǐ lɔmɔ̌ tɔn sixú kpa mǐ. w23.07 23 akpá. 11-12

Ényí è ɖɔ mɛɖé nyí xomɛfátɔ́ ɔ, ɖiɖɔ wɛ è ɖe ɖɔ é vɔ́ da ǎ. É nɔ byɔ́ ɖɔ è ní dó gǎn cóbá kpé wú bá fá xomɛ hwenu e è ɖo ninɔmɛ syɛ́nsyɛ́n mɛ gbɔn wɛ é. “Jijɔ ɖěɖěe gbigbɔ [Mawu tɔn] nɔ zɔ́n bɔ è nɔ ɖó lɛ́ é” ɖokpó wɛ xomɛfífá nyí. (Ga. 5:22, 23) Hweɖélɛ́nu ɔ, è nɔ zán xókwín Glɛ̌kigbe tɔn e è tínmɛ bɔ é nyí “xomɛfífá” é dó dó gesí sɔ́ gběmɛ tɔn e è dé é ɖé. Dǒ nukún mɛ kpɔ́n ɖɔ sɔ́ gběmɛ tɔn ɖé kún sɔ́ nylá hun ó. Nǔgbó wɛ ɖɔ lěe é nɔ wa nǔ gbɔn din é xlɛ́ ɖɔ é fá tawun, amɔ̌, é lɛ́ kpo ɖo hlɔ̌nhlɔ́n ɖó wɛ. Nɛ̌ mǐ ka sixú tɛ́n kpɔ́n bo nyí xomɛfátɔ́, bɔ hwe ɖokpó ɔ nu ɔ, mǐ ná lɛ́ ɖó hlɔ̌nhlɔ́n gbɔn? Mǐ sixú wa énɛ́ mǐɖóɖó ǎ. Mǐ ɖó ná nɔ xo ɖɛ dó byɔ́ gbigbɔ mímɛ́ Mawu tɔn, bo lɛ́ byɔ́ ɛ ɖɔ é ní d’alɔ mǐ bónú mǐ ná tɛ́n kpɔ́n bo ɖó jijɔ énɛ́. Nǔ e ko jɛ kpɔ́n lɛ́ é xlɛ́ ɖɔ nǔ sixú nyí mɔ̌. Nɔví súnnu kpó nɔví nyɔ̌nu kpó mǐtɔn gěgé ko zán gbe fífá dó ná xósin mɛ ɖěɖěe yě xo go bɔ yě klán gbe xá wɛn ɔ lɛ́ é, bɔ énɛ́ d’alɔ yě bɔ yě ɖó linlin ɖagbe dó Kúnnuɖetɔ́ Jexóva tɔn lɛ́ wú.—2 Tim. 2:24, 25. w23.09 15 akpá. 3

Ðo nǔmimɔ jí wǔ ɖé mɛ ɔ, mɛsɛ́dó Jaan mɔ mɛxó 24 lɛ́ ɖo jǐxwé, bɔ yě ɖo Jexóva sɛn wɛ. Yě kpa susu nú Mawu, bo ɖɔ ɖɔ “susu, yɛ̌yi kpó hlɔ̌nhlɔ́n kpó” jɛxá ɛ. (Nǔɖe. 4:10, 11) Wɛnsagun gbejínɔtɔ́ lɛ́ lɔ ɖó hwɛjijɔ e wú yě ná kpa susu nú Jexóva, bo lɛ́ wlí yɛ̌yi n’i é maxamaxa. Yě ɖo jǐxwé xá ɛ, bo kplɔ́n lobo tuun i ganjí. Yě nɔ mɔ jijɔ tɔn lɛ́ ɖo nǔ ɖěɖěe é bló lɛ́ é mɛ. Ényí yě ɖo lěe Jexóva nɔ wa nǔ gbɔn é kpɔ́n wɛ ɔ, énɛ́ nɔ sísɛ́ yě bɔ yě nɔ kpa susu n’i. (Jɔb. 38:4-7) Mǐ lɔmɔ̌ nɔ ba ná kpa susu nú Jexóva ɖo ɖɛ mǐtɔn lɛ́ mɛ, gbɔn nǔ e mǐ yí wǎn ná ɖo gɔ̌n tɔn lɛ́ é kpó nǔ e wú mǐ nɔ ɖó sísí n’i é kpó ɖiɖɔ n’i gblamɛ. Ényí a ɖo Biblu xa wɛ, bo lɛ́ ɖo kplɔ́nkplɔ́n wɛ hǔn, tɛ́n kpɔ́n bo nɔ ɖ’ayi jijɔ Jexóva tɔn ɖěɖěe dɔn we hú gǎn lɛ́ é wú. (Jɔb. 37:23; Hlɔ̌. 11:33) Énɛ́ gúdo hǔn, nɔ ɖɔ lěe nǔ cí nú we dó jijɔ énɛ́ lɛ́ wú é nú Jexóva. Mǐ sixú lɛ́ kpa susu nú Jexóva, ɖó é nɔ d’alɔ mǐ, bo nɔ lɛ́ d’alɔ xwédo gbigbɔ tɔn mǐtɔn blěbú.—1 Sam. 2:1, 2. w23.05 3-4 akpá. 6-7

Ðo 1919 ɔ, Babilɔ́nu ɖaxó ɔ ba acɛ e é ɖó dó togun Mawu tɔn jí é kpo. Xwe énɛ́ xwe ɔ, “mɛsɛntɔ́ gbejínɔtɔ́ ayiɖotenánɔ” ɔ jɛ azɔ̌ wú, bá dó dó doo nú ayijlɔ́jlɔ́nɔ e mlɛ́ “Ali mímɛ” ɔ tlóló lɛ́ é. (Mat. 24:45-47; Eza. 35:8) Azɔ̌ e mɛ ɖěvo lɛ́ wa ɖo hwexónu dó sɔ́ nǔ nú ali énɛ́ é d’alɔ mɛ e jɛ ali ɔ jí gbɔn jí lɛ́ é bɔ yě kplɔ́n nǔ gěgé dó Jexóva kpó linlin tɔn lɛ́ kpó wú. (Nǔx. 4:18) Yě sixú lɛ́ húzú gbɛzán yětɔn, bɔ é ná sɔgbe xá nǔ e Jexóva nɔ ɖó nukún ɖo mǐ sí lɛ́ é. Jexóva ɖó nukún ɖɔ togun tɔn ní bló hǔzúhúzú lɛ́ bǐ xawun ǎ. É nyɔ́ wa ɔ, kpɛɖé kpɛɖé wɛ é w’azɔ̌ ɖo togun tɔn wú. Dǒ nukún mɛ bo kpɔ́n lěe xomɛ ná hun mǐ sɔ, hwenu e mǐ ná kpé wú bo ná nɔ wa nǔ e ná nɔ nyɔ́ Mawu mǐtɔn nukúnmɛ lɛ́ é ɖo nǔ bǐ mɛ é! Ali lɛ́ bǐ wɛ é byɔ́ ɖɔ è ní nɔ jlá ɖó. Sín 1919 ɔ, azɔ̌ e wa wɛ è ɖe ɖo “Ali mímɛ́” ɔ jí é kpo ɖo nukɔn yi wɛ, bónú mɛ gěgé ná mɔ tɛn bo tɔ́n sín Babilɔ́nu ɖaxó ɔ mɛ. w23.05 17 akpá. 15; 19 akpá. 16

Hǎgbɛ́ alixlɛ́mɛtɔ́ ɔ ɖésúnɔ ko kplɔ́n azɔ̌ alɔgɔ́tɔ́ e ɖo wěɖegbɛ́ Hǎgbɛ́ alixlɛ́mɛtɔ́ ɔ tɔn vovo lɛ́ mɛ lɛ́ é. Alɔgɔ́tɔ́ énɛ́ lɛ́ ko ɖo azɔ̌ kpinkpɛn e è sɔ́ d’así nú yě lɛ́ é wa wɛ kpó gbejíninɔ kpó din. È ko sɔ́ nǔ nú yě ganjí bónú yě ná gbɛ kan dó nukún kpíkpé dó Klísu sín lɛ̌ngbɔ́ lɛ́ wú ɔ nu. Ényí mɛ gǔdo tɔn e ɖo mɛ ɖěɖěe gbigbɔ mímɛ́ sɔ́ lɛ́ é mɛ é yi jǐxwé ɖo vivɔnu wǔvɛ́ ɖaxó ɔ tɔn ɔ, è ná kpo ɖo Jexóva sɛn wɛ lěe é ba gbɔn é. Nukɔn e Jezu Klísu ɖe nú mawusɛntɔ́ lɛ́ é ná zɔ́n bɔ è ná ɖó mawusinsɛn kpó gbejíninɔ kpó te gbeɖé ǎ. Nǔgbó wɛ ɖɔ, ɖo hwenɛ́nu ɔ, gbɛ̌ kplékplé akɔta lɛ́ tɔn e Biblu ylɔ́ ɖɔ Gɔ̌gu Magɔ́gi tɔn é ná tɔ́n ahwan togun Mawu tɔn. (Ezek. 38:18-20) Amɔ̌, ahwantɔ́nmɛ kléwún énɛ́ ná nyi ta fí ɖé ǎ; é ná zɔ́n bɔ togun Mawu tɔn ná ɖó Jexóva sinsɛn te ǎ. É ɖo wɛn ɖɔ Jexóva ná hwlɛ́n togun tɔn. Ðo nǔmimɔ ɖé mɛ ɔ, mɛsɛ́dó Jaan mɔ “ahwan ɖaxó ɖé”, Klísu sín lɛ̌ngbɔ́ ɖěvo lɛ́ wɛ. È ɖɔ nú Jaan ɖɔ “ahwan ɖaxó” énɛ́ “xo wǔvɛ́ ɖaxó ɔ zlɛ́.” (Nǔɖe. 7:9, 14) Ɛɛn, nǔɖé ná tɔ́n fɛn yě ǎ! w24.02 5-6 akpá. 13-14

Étɛ́ lɛ́ mǐ ka sixú wa bo ná mɔ gbigbɔ mímɛ́ yí? Mǐ sixú nɔ xo ɖɛ dó byɔ́, nɔ kplɔ́n Xó Mawu tɔn, lobo nɔ lɛ́ dó gbɛ̌ xá tutoblónúnǔ Mawu tɔn e gbigbɔ mímɛ́ tɔn ɖo ali xlɛ́ wɛ é. Mɔ̌ wiwa ná d’alɔ mǐ bɔ mǐ ná tɛ́n kpɔ́n bo ɖó “jijɔ ɖěɖěe gbigbɔ ɔ nɔ zɔ́n bɔ è nɔ ɖó lɛ́ é.” (Ga. 5:22, 23) Mɛ ɖěɖěe nɔ ɖó linlin ɖagbe, bo nɔ lɛ́ zán gbɛ jlɔ́jlɔ́ lɛ́ é kɛ́ɖɛ́ jɛ́n Mawu nɔ ná gbigbɔ tɔn. Ényí mǐ nɔ ɖo tamɛ lin dó nǔ e ma sɔgbe ǎ lɛ́ é jí wɛ, bo nɔ lɛ́ zán gbɛ blíblí ɔ, é sɔ́ ná ná gbigbɔ tɔn ɖě mǐ ǎ. (1 Tɛ. 4:7, 8) Bo ná dó kpo ɖo gbigbɔ mímɛ́ tɔn mɔ yí wɛ ɔ, mǐ ɖó ná nɔ ‘dó vɛ̌ nú nǔɖɔɖayǐ lɛ́’ ǎ. (1 Tɛ. 5:20) Ðo wěmafɔ élɔ́ mɛ ɔ, ‘nǔɖɔɖayǐ lɛ́’ wɛ nyí xó ɖěɖěe Jexóva ɖɔ nú mǐ gbɔn gbigbɔ mímɛ́ tɔn gblamɛ lɛ́ é; xó e kúnkplá azǎn Jexóva tɔn kpó lěe mǐ ná hwlɛndó hwenu lɛ́ gbɔn é kpó lɔ ɖ’é mɛ. Mǐ nɔ lin ɖɔ azǎn Jexóva tɔn, alǒ Aamagedɔ́ni kún ná wá ɖo gbɛhwenu mǐtɔn ó ǎ. É nyɔ́ wa ɔ, mǐ nɔ hɛn azǎn énɛ́ d’ayi mɛ gbɔn alɔnu mǐtɔn hinhɛn ján ɖo walɔ mímɛ́ kpó “gbejí nɔ nú Mawu sín nǔ lɛ́” wiwa kpó mɛ gblamɛ.—2 Pi. 3:11, 12. w23.06 12-13 akpá. 13-14

Ðó mǐ nyí klisánwun wútu ɔ, ényí fɔtóo nǔblíblíwiwa tɔn ɖé wá xwetɔ́n ɖo tablɛ́ti, alǒ alǒkan mǐtɔn jí ajijimɛ ɔ, étɛ́ mǐ ka ɖó ná wa? Mǐ ɖó ná yá wǔ ɖe nukún sín jí. Ényí mǐ flín ɖɔ nǔ e xɔ akwɛ́ nú mǐ hú gǎn é wɛ nyí xɔ́ntɔn e mǐ zun xá Jexóva é ɔ, énɛ́ sixú d’alɔ mǐ bɔ mǐ ná yá wǔ ɖe afɔ mɔ̌hun. Fɔtóo e ma tlɛ nyí nǔblíblíwiwa tɔn ǎ é ɖé lɛ́ sixú zɔ́n bɔ linlin blíblí lɛ́ ná byɔ́ ayi mǐtɔn mɛ. Aniwú mǐ ka ɖó ná nyi alɔ nú yě? Ðó mǐ tlɛ ba ná lin tamɛ dó nǔ e ma sɔgbe ǎ é ɖé wiwa jí ǎ. (Mat. 5:28, 29) Mɛxó agun tɔn ɖokpó nɔ nɔ Thaïlande, bo nɔ nyí David; é ɖɔ: “Un nɔ kanbyɔ́ nyiɖée ɖɔ: ‘Ényí fɔtóo lɛ́ ná bo ma tlɛ nyí fɔtóo nǔblíblíwiwa tɔn lɛ́ ǎ, bɔ un ka ɖo kpínkpɔ́n wɛ ɔ, é ka ná víví nú Jexóva a?’ Tamɛ linlin gbɔn mɔ̌ nɔ d’alɔ mì bɔ un nɔ wa nǔ kpó nǔnywɛ́ kpó.” Ényí xɛsi nɔ ɖi mǐ dó nǔ ɖěbǔ e wiwa tɔn ná zɔ́n bɔ xomɛ ma ná hun Jexóva ǎ é wú ɔ, é ná d’alɔ mǐ bɔ mǐ ná wa nǔ kpó nǔnywɛ́ kpó. Xɛsi ɖiɖi nú Mawu, alǒ sísí ɖíɖó nú Mawu wɛ nyí “fí e” “nǔnywɛ́” bɛ́sín é, alǒ jɔtɛn nǔnywɛ́ tɔn. w23.06 23 akpá. 12-13

Xókwín “xɔ” ɔ sixú ɖo gesí dó agun mǐtɔn lɛ́ wɛ. Jexóva d’akpá ɖɔ émí ná cyɔ́n alɔ mǐ jí ɖo wǔvɛ́ ɖaxó ɔ hwenu, ényí mǐ nɔ nɔ bǔ xá nɔví mǐtɔn lɛ́ ɔ nɛ́. Énɛ́ wú ɔ, mǐ ɖó ná dó gǎn din bá yí wǎn nú nɔví mǐtɔn lɛ́; nǔwanyido yětɔn lɛ́ kɛ́ɖɛ́ nu wɛ mǐ ɖó ná dó gǎn bá dɛ ɖe ǎ. Hwlɛngán mǐtɔn ná sín énɛ́ wú! Gbɛtɔ́ lɛ́ bǐ wɛ ná se xɔxɔ ‘azǎn ɖaxó Jexóva tɔn’ tɔn. (Sof. 1:14, 15) Togun Jexóva tɔn lɔ ná se wǔvɛ́ tɔn. Amɔ̌, ényí mǐ sɔ́ nǔ ɖ’ayǐ din ɔ, mǐ ná kpé wú bo ná cí xwíí, lobo lɛ́ d’alɔ mɛ ɖěvo lɛ́. Mǐ ná dɛ ɖo wǔvɛ́ ɖěbǔ e mǐ sixú mɔ lɛ́ é nu. Hwenu e nǔɖitɔ́ hǎtɔ́ mǐtɔn lɛ́ ná ɖo wǔvɛ́ mɛ é ɔ, mǐ ná wa nǔ e wú mǐ kpé é bǐ dó hɛn sɔ yě gbɔn wǔvɛ́ sise xá yě kpó nǔ e hudó yě lɛ́ é sín do súsú nú yě kpó gblamɛ. Gɔ́ ná ɔ, ényí mǐ kplɔ́n bo nɔ yí wǎn nú nɔví mǐtɔn lɛ́ din ɔ, mǐ ná lɛ́ ɖe wǎnyíyí xlɛ́ yě ɖo sɔgúdo. Mɔ̌ mɛ ɔ, Jexóva ná dó gbɛ mavɔmavɔ sín ajɔ mǐ; mɛɖé sɔ́ ná flín adla kpó wǔvɛ́ kpó ɖě ɖo gbɛ énɛ́ mɛ ǎ.—Eza. 65:17. w23.07 7 akpá. 16-17

Hwɛhwɛ wɛ Xó Mawu tɔn nɔ ɖɔ dó gbejínɔtɔ́ lɛ́ wú ɖɔ yě ɖó hlɔ̌nhlɔ́n. Amɔ̌, mɛ e tlɛ ɖó hlɔ̌nhlɔ́n hú gǎn ɖo yě mɛ é nɔ mɔ hwebǐnu ɖɔ émí ɖó hlɔ̌nhlɔ́n ǎ. Ði kpɔ́ndéwú ɔ, ɖo ninɔmɛ ɖé lɛ́ mɛ ɔ, axɔ́sú Davídi mɔ ɖɔ émí “lí dǒ só ɖɔhun,” amɔ̌, ɖo ninɔmɛ ɖěvo lɛ́ mɛ ɔ, é mɔ ɖɔ émí kún ɖó gǎn ó, bɔ xɛsi ɖi i. (Ðɛh. 30:8) Sanmusɔ́ɔn mɔ ɖɔ émí ɖó hlɔ̌nhlɔ́n titewungbe tɔn hwenu e gbigbɔ mímɛ́ Mawu tɔn ɖo ali xlɛ́ ɛ wɛ é có, é tuun ɖɔ hlɔ̌nhlɔ́n e nɔ gosín Mawu gɔ́n é mɛvo ɔ, émí kún “sɔ́ ná ɖó hlɔ̌nhlɔ́n [ó], bo ná cí gbɛtɔ́ kpaa ɖé ɖɔhun.” (Hwɛ. 14:5, 6; 16:17) Jexóva ɖokpónɔ wɛ nɔ ná hlɔ̌nhlɔ́n mɛsɛntɔ́ tɔn gbejínɔtɔ́ lɛ́. Mɛsɛ́dó Pɔ́lu tuun ɖɔ émí lɔ ɖó hlɔ̌nhlɔ́n e nɔ gosín Jexóva gɔ́n é sín hudó. (2 Kɔ. 12:9, 10) É lɔ mɔ azɔn wúvɛ́. (Ga. 4:13, 14) Hweɖélɛ́nu ɔ, nǔ ɖagbe wiwa nɔ vɛ́ wǔ n’i. (Hlɔ̌. 7:18, 19) Gɔ́ ná ɔ, hweɖélɛ́nu ɔ, ado hu i, bɔ xɛsi lɛ́ ɖi i. (2 Kɔ. 1:8, 9) É ɖo mɔ̌ có, hwenu e Pɔ́lu ma ɖó gǎn ǎ é ɔ, é nɔ ɖó hlɔ̌nhlɔ́n. Gbɔn nɛ̌ é? Jexóva nɔ ná ɛ hlɔ̌nhlɔ́n e sín hudó é ɖó bá dɛ ɖo tagba tɔn lɛ́ nu é. w23.10 12 akpá. 1-2

Ényí hweɖélɛ́nu ɔ, mǐ nɔ mɔ ɖɔ mǐ kún hwɛ́n nǔɖé ó, bo ɖo xwi ɖí xá linlin mɔ̌hun lɛ́ wɛ ɔ, mǐ sixú flín ɖɔ Jexóva ɖésúnɔ wɛ dɔn mǐ wá éɖée gɔ́n. (Jaan 6:44) É nɔ mɔ nǔ ɖagbe e ɖo mǐ mɛ, bɔ mǐdɛɛ lɛ́ ɖésú ma sixú mɔ ǎ lɛ́ é bo lɛ́ tuun nǔ e ɖo ayi mǐtɔn mɛ é. (2 Tan 6:30) Énɛ́ wú ɔ, ényí é ɖɔ ɖɔ mǐ xɔ akwɛ́ ɔ, mǐ sixú ɖeji dó xó énɛ́ wú.(1 Jaan 3:19, 20) Cóbónú mǐ mɛ ɖé lɛ́ ná kplɔ́n nǔgbó ɔ ɔ, mǐ ko wa nǔɖé lɛ́ bɔ káká jɛ din ɔ, nǔ énɛ́ lɛ́ sín agban kpo ɖo mǐ kpɛn wɛ. (1 Pi. 4:3) Klisánwun gbejínɔtɔ́ lɛ́ lɔ tlɛ sixú ɖí xwi xá gǎnmaɖó lɛ́. Ayi towe ka nɔ dó hwɛ we wɛ a? Ényí mɔ̌ ɔ, tuuntuun ɖɔ mɛsɛntɔ́ gbejínɔtɔ́ Jexóva tɔn ɖé lɛ́ ko ɖí xwi xá linlin mɔ̌hun lɛ́ ná dó gbɔ nú we. Ði kpɔ́ndéwú ɔ, mɛsɛ́dó Pɔ́lu mɔ ɖɔ gbɛ émítɔn blá wǔ hwenu e é lin tamɛ dó nǔwanyido tɔn lɛ́ jí é. (Hlɔ̌. 7:24) É ɖo wɛn ɖɔ hwɛ Pɔ́lu tɔn lɛ́ vɛ́ n’i, bɔ é bló batɛ́mu. É ɖo mɔ̌ có, é ɖɔ dó éɖée wú ɖɔ émí wɛ nyí “mɛ e hwe hú mɛ bǐ ɖo mɛsɛ́dó lɛ́ mɛ é,” bo lɛ́ ɖɔ dó éɖée wú ɖɔ émí wɛ “nyí hwɛhutɔ́ hú hwɛhutɔ́ lɛ́ bǐ.”—1 Kɔ. 15:9; 1 Tim. 1:15. w24.03 27 akpá. 5-6

Nǔ e gbeta nyanya e kɔn axɔ́sú Joasi wá lɛ́ é sixú kplɔ́n mǐ é ɖokpó wɛ nyí ɖɔ, mɛ ɖěɖěe yí wǎn nú Jexóva bo ba ná hɛn xomɛ tɔn hun lɛ́ é wɛ mǐ ná nɔ zun xɔ́ntɔn xá; mɛ énɛ́ lɛ́ ná nɔ d’alɔ mǐ bɔ mǐ ná nɔ wa nǔ ɖagbe lɛ́. É byɔ́ ɖɔ mǐ ní zun xɔ́ntɔn xá mɛ e kpó mǐ kpó ɖó xwe ɖokpó ɔ lɛ́ é kɛ́ɖɛ́ ǎ. Flín ɖɔ Yexoyáda nyí mɛxó nú Joasi flaflá tɔn. Nɔ kan nǔ élɔ́ byɔ́ hwiɖée dó xɔ́ntɔn e a nɔ zun lɛ́ é wú: ‘Yě ka nɔ d’alɔ mì bɔ nǔ e un ɖi nú Jexóva é nɔ lí dǒ a? Yě ka nɔ dó wǔsyɛ́n lanmɛ nú mì bónú má zán gbɛ sɔgbe xá nǔgbódodó Mawu tɔn lɛ́ a? Yě ka nɔ ɖɔ xó dó Jexóva kpó nǔgbó xɔ akwɛ́ tɔn lɛ́ kpó wú a? Yě ka nɔ ɖó sísí nú nǔgbódodó Mawu tɔn lɛ́ a? Nǔ e un nɔ ba ná se lɛ́ é kpowun wɛ yě nɔ ɖɔ nú mì a, alǒ, ényí un zɛ gbě ɔ, yě nɔ kpankɔ́n lobo nɔ ɖe mì dó ali jí?’ (Nǔx. 27:5, 6, 17) Nú è ná ɖɔ xójɔxó ɔ, ényí xɔ́ntɔn towe lɛ́ ma yí wǎn nú Jexóva ǎ ɔ, é byɔ́ ɖɔ a ní kpo ɖo xɔ́ntɔn zun xá yě wɛ ǎ. Amɔ̌, ényí xɔ́ntɔn e a zun lɛ́ é yí wǎn nú Jexóva hǔn, tɛ́ dó yě wú gbánwúngbánwún ɖó hwebǐnu wɛ yě ná d’alɔ we.—Nǔx. 13:20. w23.09 9-10 akpá. 6-7

Ðo Glɛ̌kigbe mɛ ɔ, Alúfa wɛ nyí wěkwín nukɔntɔn ɔ bɔ Omɛ́ga nyí wěkwín gǔdo tɔn ɔ. Ðɔ e Jexóva ɖɔ ɖɔ émí nyí “Alúfa bo lɛ́ nyí Omɛ́ga” é xlɛ́ ɖɔ ényí é jɛ nǔɖé wú ɔ, é nɔ wa yi fó ganjí bɔ xó ɖě nɔ ɖ’é wú ǎ. Ée Jexóva dá Adámu kpó Ɛvu kpó gúdo é ɔ, é ɖɔ nú yě ɖɔ: ‘Mi ji, mi gba kún, bo kpé ayǐkúngban ɔ jí, bo sɔ́ ɛ ɖó acɛ mitɔn glɔ́.” (Bǐb. 1:28) È ná ɖɔ ɔ, ɖiɖɔ wɛ Jexóva ɖe hwenɛ́nu ɖɔ “Alúfa.” É ɖɔ linlin tɔn sɔ́ nyi wɛn: Hwe ɔ nu ná wá su bɔ kúnkan Adámu kpó Ɛvu kpó tɔn e nyí mɛ maɖóblɔ̌ bo nɔ se tónú nú Mawu lɛ́ é ná kpé ayǐkúngban ɔ bǐ jí bo ná bló bɔ é ná húzú Palaɖísi. Hwenu e linlin Jexóva tɔn ná jɛnu bǐ mlɛ́mlɛ́ é ɔ, é ná cí ɖɔ ɖiɖɔ wɛ é ɖe ɖɔ “Omɛ́ga” ɖɔhun. Ée Jexóva ɖó “wɛ̌kɛ́ ɔ [énɛ́ wɛ nyí jǐxwé gɔ́ nú ayǐkúngban] kpó nǔ e ɖ’é mɛ lɛ́ bǐ kpó” gúdo é ɔ, é ɖɔ nǔɖé bɔ é xlɛ́ ɖɔ linlin tɔn ná jɛnu dandan. É ná mǐ gǎnjɛwú ɖɔ émí ná bló bɔ linlin e émí ɖó nú gbɛtɔ́ lɛ́ kpó ayǐkúngban ɔ kpó é ná jɛnu dandan. É ná jɛnu bǐ mlɛ́mlɛ́ ɖo vivɔnu azǎn tɛ́nwegɔ́ énɛ́ tɔn.—Bǐb. 2:1-3. w23.11 5 akpá. 13-14

Ali zinzɔn sín Babilɔ́nu yi Izlayɛ́li nɔ d’ayihún ɖěbǔ ǎ; sun ɛnɛ mɔ̌ wɛ é sixú byɔ́ ɖo mɛ sí, amɔ̌, Jexóva d’akpá ɖɔ è ná ɖe afɔklɛ́nnú ɖěbǔ e ná ba nǔ mɛ ná glɔ́n ali nú yě ɖo kɔlílɛ́ yětɔn hwenu é sín ali yětɔn jí. Jwifu gbejínɔtɔ́ lɛ́ tuun ɖɔ le e ɖo kɔlílɛ́ yi Izlayɛ́li mɛ lɛ́ é tlí tawun hú vɔ̌ ɖěbǔ e émí ná sá é. Nyɔ̌ná ɖaxó hú gǎn e yě ná mɔ lɛ́ é ɖokpó wɛ nyí Mawu e yě ná lɛ́ jɛ sinsɛn jí é. Fí e è ná sɛn Jexóva ɖe é ɖě ɖo Babilɔ́nu ǎ. Vɔ̌sákpe e jí Izlayɛ́li ví lɛ́ sixú sá vɔ̌ ɖěɖěe Mɔyízisɛ́n ɔ byɔ́ lɛ́ é ɖe é ɖě ɖo fínɛ́ ǎ, mɔ̌ jɛ́n è ma ka lɛ́ bló tuto vɔ̌sánúxwlémawutɔ́ ɖěɖěe ná nɔ sá vɔ̌ énɛ́ lɛ́ tɔn ǎ é nɛ́. Gɔ́ ná ɔ, vodúnsɛntɔ́ ɖěɖěe ma nɔ mɔ yɛ ɖo Jexóva, alǒ nǔgbódodó tɔn lɛ́ ta ǎ lɛ́ é sukpɔ́ tawun hú mɛ e ɖo togun Jexóva tɔn mɛ lɛ́ é. Énɛ́ wú ɔ, Jwifu ɖěɖěe nɔ ɖó sísí nú Mawu lɛ́ é afatɔ́n mɔ̌kpán ɖo nukún ɖó hwenu e yě ná lɛ́ kɔ yi jɔtɛn yětɔn, bo sixú lɛ́ vɔ́ mawusinsɛn nǔgbó ɔ ɖ’ayǐ é wɛ. w23.05 14-15 akpá. 3-4

Mǐ ɖó alɔdó gbigbɔ mímɛ́ Mawu tɔn tɔn sín hudó bo ná dó kpo ɖo gbɛ zán wɛ “vǐ wěziza tɔn lɛ́ ɖɔhun.” Aniwú? Ðó é vɛ́ wǔ tawun bɔ è ná nɔ mǐmɛ́ jí ɖo gbɛ élɔ́ e nǔblíblíwiwa gɔ́ é mɛ. (1 Tɛ. 4:3-5, 7, 8) Gbigbɔ mímɛ́ sixú d’alɔ mǐ bɔ mǐ ná fun ahwan xá linlin gbɛ ɔ tɔn lɛ́, káká jɛ tamɛ-núkplɔ́nmɛ tɔn lɛ́ kpó linlin e mɛ e ɖo gbɛ ɔ mɛ lɛ́ é nɔ ɖó bɔ yě sɔ́ ta linlin Mawu tɔn lɛ́ é kpó jí. Gbigbɔ mímɛ́ sixú lɛ́ d’alɔ mǐ bɔ mǐ ná ná sínsɛ́n “ɖagbewiwa alɔkpa bǐ” kpó “nǔjlɔ́jlɔ́wiwa alɔkpa bǐ” kpó tɔn. (Efɛ́. 5:9) Ali e nu mǐ sixú mɔ gbigbɔ mímɛ́ yí ɖe lɛ́ é ɖokpó wɛ nyí ɖɔ mǐ ná nɔ xo ɖɛ dó byɔ́. Jezu ɖɔ ɖɔ Jexóva ná “ná gbigbɔ mímɛ́ mɛ e nɔ ɖo byɔ̌byɔ́ ɛ wɛ lɛ́ é.” (Luk. 11:13) Gɔ́ ná ɔ, ényí mǐ ɖo susu kpa nú Jexóva wɛ ɖó kpɔ́ ɖo kplé klisánwun tɔn mǐtɔn lɛ́ jí ɔ, mǐ nɔ lɛ́ mɔ gbigbɔ mímɛ́ yí. (Efɛ́. 5:19, 20) Alɔ e gbigbɔ mímɛ́ Mawu tɔn nɔ dó mǐ é ná zɔ́n bɔ mǐ ná zán gbɛ e nɔ nyɔ́ Mawu nukúnmɛ é. w24.03 23-24 akpá. 13-15

A ka ɖó hudó suúlu tɔn hú gǎn wɛ a? É nyí mɔ̌ hǔn, xo ɖɛ bo byɔ́. Suúlu ɔ, jijɔ ɖěɖěe gbigbɔ mímɛ́ nɔ d’alɔ bɔ è nɔ ɖó lɛ́ é ɖokpó wɛ. (Ga. 5:22, 23) Énɛ́ wú ɔ, mǐ sixú xo ɖɛ bo byɔ́ ɖɔ gbigbɔ mímɛ́ Jexóva tɔn ní d’alɔ mǐ bónú mǐ ná tɛ́n kpɔ́n bo ɖó jijɔ énɛ́. Ényí mǐ gbɔn ninɔmɛ e tɛ́n suúluɖíɖó mǐtɔn kpɔ́n é ɖé mɛ ɔ, mǐ “nɔ ɖo” gbigbɔ mímɛ́ ‘byɔ́’ wɛ, bónú é ná d’alɔ mǐ nú mǐ ná ɖó suúlu. (Luk. 11:13) Mǐ sixú lɛ́ byɔ́ Jexóva ɖɔ é ní d’alɔ mǐ bónú mǐ ná ɖó linlin ɖokpó ɔ éɖɔhun dó nǔ lɛ́ wú. Ényí mǐ xo ɖɛ gúdo ɔ, mǐ ɖó ná wa nǔ e wú mǐ kpé é bǐ bo ná nɔ ɖó suúlu ayǐhɔ́ngbe ayǐhɔ́ngbe. Bǎ e mɛ mǐ xo ɖɛ bo byɔ́ suúlu, lobo lɛ́ ɖo gǎn dó wɛ bá ɖó jijɔ énɛ́ yi ɖó é ɔ, bǎ énɛ́ mɛ wɛ jijɔ énɛ́ ná dó ɖɔ do ɖo ayi mǐtɔn mɛ, bo ná húzú akpáxwé mɛ alɔkpa e mǐ nyí é tɔn yi ɖó é nɛ́.É nɔ lɛ́ d’alɔ bɔ è nɔ lin tamɛ dó kpɔ́ndéwú Biblu tɔn lɛ́ jí. Kpɔ́ndéwú mɛ e nɔ ɖó suúlu lɛ́ é tɔn gěgé wɛ ɖo Biblu mɛ. Ényí mǐ nɔ lin tamɛ dó kpɔ́ndéwú yětɔn lɛ́ jí ɔ, mǐ sixú mɔ ali ɖěɖěe nu mǐ ná nɔ ɖó suúlu ɖe lɛ́ é. w23.08 22 akpá. 10-11

Jezu ná gǎnjɛwú mɛsɛ́dó Piyɛ́ɛ ɖɔ Jexóva ɖo kpɔ́ xá ɛ. Ée Jezu fɔ́n sín kú gúdo é ɔ, é bló bɔ Piyɛ́ɛ kpó mɛsɛ́dó gbɛ̌ tɔn lɛ́ kpó lɛ́ wlí hweví ɖo nǔjíwǔ linu. (Jaan 21:4-6) É ɖo wɛn ɖɔ, nǔjíwǔ énɛ́ vɔ́ gǎnjɛwú ná Piyɛ́ɛ ɖɔ Jexóva hɛn ɔ, é ná kpé nukún dó nǔ e hudó è ɖo agbaza lixo é wú faa. Bóyá énɛ́ gúdo ɔ, mɛsɛ́dó ɔ flín xógbe Jezu tɔn ɖěɖěe ɖɔ ɖɔ Jexóva ná kpé nukún dó mɛ ɖěɖěe ‘Axɔ́súɖuto ɔ nɔ myá nukún ná jɛ nukɔn’ lɛ́ é wú lɛ́ é. (Mat. 6:33) Nǔ énɛ́ lɛ́ bǐ d’alɔ Piyɛ́ɛ bɔ é sɔ́ sinsɛnzɔ́ tɔn ɖó tɛn nukɔntɔn ɔ mɛ, bo lɔn nú hwehuhujɔ́ tɔn yí tɛn sín sinsɛnzɔ́ ɔ sí ǎ. É ɖe kúnnu kpó akɔ́nkpinkpan kpó ɖo Pantekótu xwe 33 H.M. tɔn, lobo d’alɔ mɛ afatɔ́n mɔ̌kpán bɔ yě yí wɛn ɖagbe ɔ. (Mɛ. 2:14, 37-41) Énɛ́ gúdo ɔ, é d’alɔ Samalíinu lɛ́ kpó Kosi lɛ́ kpó bɔ yě ɖi nǔ nú Klísu. (Mɛ. 8:14-17; 10:44-48) É ɖo wɛn ɖɔ, Jexóva zán Piyɛ́ɛ ɖo ali jí wǔ ɖé nu dó dɔn gbɛtɔ́ alɔkpa lɛ́ bǐ wá agun tɔn mɛ. w23.09 20 akpá. 1; 23 akpá. 11

Babilɔ́nunu lɛ́ sú Jeluzalɛ́mu sín kún dó, bɔ é ná bló xwe we mɔ̌ gúdo é ɔ, Babilɔ́nu xɔ́sú Nabukodonɔzɔ́ɔ kú dlɔ̌ bo mɔ bǒcyɔ ɖaxó ɖé, bɔ é gba ayi dó n’i. É gblɔ́n adǎn ɖɔ émí ná hu nǔnywɛ́tɔ́ lɛ́ bǐ, káká jɛ Daniyɛ́li jí, ényí yě ma ɖɔ dlɔ̌ e émí kú é kpó tínmɛ tɔn kpó nú émí ǎ ɔ nɛ́. (Dan. 2:3-5) Daniyɛ́li ɖó ná yá wǔ wa nǔɖé; é ma nyí mɔ̌ ǎ ɔ, mɛ gěgé ná dɔn. É “yi mɔ axɔ́sú ɔ, bo sa vo n’i ɖɔ é ní nɔ te kpɔ́n émí kpɛɖé nú émí ná wá tín nǔ e sín dlɔ̌ e é kú ɔ mɛ n’i.” (Dan. 2:16) Énɛ́ byɔ́ akɔ́nkpinkpan kpó nǔɖiɖi kpó. È mɔ xa ɖo fí ɖě ɖo Biblu mɛ ɖɔ Daniyɛ́li ko tín dlɔ̌ mɛ kpɔ́n ǎ. É ɖɔ nú xɔ́ntɔn tɔn lɛ́ ɖɔ “yě ní byɔ́ nǔbláwǔkúnúmɛ Mawu tɔn sín [jǐxwé], nú Mawu ní ɖe dlɔ̌ mamɔdoná énɛ́ ɔ xlɛ́ émí.” (Dan. 2:18) Jexóva se ɖɛ énɛ́ lɛ́. Kpó alɔdó Mawu tɔn kpó ɔ, Daniyɛ́li tín Nabukodonɔzɔ́ɔ sín dlɔ̌ ɔ mɛ. Daniyɛ́li kpó xɔ́ntɔn tɔn lɛ́ kpó sɔ́ kú ǎ. w23.08 3 akpá. 4

Nɔ lin tamɛ dó le ɖěɖěe ɖo suúluɖíɖó mɛ lɛ́ é jí. Ényí mǐ nɔ ɖó suúlu ɔ, mǐ nɔ ɖó awǎjijɛ, bo nɔ lɛ́ ɖó vivo ɖo ayi mɛ. Nǔgbó ɔ, suúluɖíɖó nɔ zɔ́n bɔ mǐ nɔ nɔ ganjí ɖo ayi mɛ, bo nɔ lɛ́ nɔ ganjí ɖo agbaza mɛ. Ényí mǐ nɔ ɖó suúlu dó mɛ ɖěvo lɛ́ wú ɔ, mǐ nɔ ɖu vǐví xɔ́ntɔn e mǐ zun xá yě é tɔn hú gǎn. Agun e mɛ mǐ ɖe é nɔ nɔ bǔ hú gǎn. Ényí mɛ ɖěvo lɛ́ ba nǔɖɔ mǐ ɔ, sɔ e mǐ nɔ xwe, bo ma nɔ yá wǔ sin xomɛ ǎ é nɔ zɔ́n bɔ ninɔmɛ ɔ nɔ nylá d’é jí ǎ. (Ðɛh. 37:8; Nǔx. 14:29) Amɔ̌, tají hú gǎn ɔ, Tɔ́ mǐtɔn jǐxwé tɔn ɔ ɖɔhun wa nǔ wɛ mǐ ɖe, bo lɛ́ ɖo blǒbló wɛ bɔ xɔ́ntɔn e mǐ zun xá ɛ é ná syɛ́n d’é jí nɛ́. Suúlu ɔ, jijɔ e nɔ dɔn mɛ, bo lɛ́ ɖó le tawun é ɖé wɛ! Nǔgbó wɛ ɖɔ é sixú nɔ vɛ́ wǔ nú mǐ hweɖélɛ́nu ɖɔ mǐ ní ɖó suúlu, amɔ̌, kpó alɔdó Jexóva tɔn kpó ɔ, mǐ sixú kpo ɖo tíntɛ́nkpɔ́n wɛ bo ná ɖó jijɔ énɛ́. Gɔ́ ná ɔ, ée mǐ ná ɖo te kpɔ́n gbɛ yɔ̌yɔ́ ɔ é ɔ, mǐ sixú ɖeji ɖɔ ‘Jexóva sín nukún nɔ ɖo mɛ e nɔ nɔ gbejí n’i lɛ́ é jí, mɛ e nɔ ɖó nukún xomɛnyínyɔ́ tɔn lɛ́ é’ jí. (Ðɛh. 33:18) Mi nú mǐ bǐ ní kán ɖ’é jí, bá kpo ɖo suúlu sɔ́ dó wɛ awu ɖɔhun. w23.08 22 akpá. 7; 25 akpá. 16-17

Jaki ɖe xlɛ́ ɖɔ mɛɖé sixú ɖɔ ɖɔ émí ɖó nǔɖiɖi, amɔ̌, nǔwiwa tɔn lɛ́ ka xlɛ́ mɔ̌ a? (Ja. 2:1-5, 9) Jaki lɛ́ ɖɔ mɛɖé xó, bɔ é mɔ ‘nɔví ɖé, bɔ avɔ alǒ nǔɖuɖu hán ɛ,’ bɔ é ka wa nǔ ɖě tawun dó d’alɔ ɛ ǎ. Ényí mɛ énɛ́ ná bo tlɛ ɖɔ ɖɔ émí ɖó nǔɖiɖi ɔ, é wa nǔ ɖě dó xlɛ́ mɔ̌ ǎ, énɛ́ wú ɔ, nǔɖiɖi tɔn nyí nǔɖéwanú ǎ. (Ja. 2:14-16) Jaki kɛ nu dó Hlaxábu wú, bo ɖɔ ɖɔ é nyí kpɔ́ndéwú nǔɖiɖi e nɔ ɖe éɖée xlɛ́ gbɔn nǔwiwa lɛ́ gblamɛ é tɔn ɖé. (Ja. 2:25, 26) É se xó dó Jexóva wú, bo mɔ ɖɔ é ɖo gǔdo nú Izlayɛ́li ví lɛ́. (Joz. 2:9-11) É ɖe xlɛ́ gbɔn nǔwiwa tɔn lɛ́ gblamɛ ɖɔ émí ɖó nǔɖiɖi; é cyɔ́n alɔ amɛ̌ Izlayɛ́linu we lɛ́ jí, hwenu e gbɛ yětɔn ɖo axɔ́ nu é. É sín énɛ́ wú bɔ nǎwe hwɛhutɔ́ énɛ́ e ma nyí Izlayɛ́linu ǎ é ɔ, è kpɔ́n ɛ dó mɔ nǔjlɔ́jlɔ́watɔ́, lěe é nyí gbɔn nú Ablaxámu é. Kpɔ́ndéwú e é sɔ́ ɖ’ayǐ é dó zǒgbe jí ɖɔ é ɖo tají ɖɔ nǔwiwa mǐtɔn lɛ́ ní nɔ xlɛ́ ɖɔ mǐ ɖó nǔɖiɖi. w23.12 5-6 akpá. 12-13

Ðó mǐ nyí klisánwun lɛ́ wútu ɔ, mǐ nɔ ba ná nɔ te ɖó nǔkplɔ́nmɛ nukɔn nukɔntɔn e ɖo Biblu mɛ lɛ́ é kɛ́ɖɛ́ tuuntuun jí kpowun ǎ. Alɔ e gbigbɔ mímɛ́ Mawu tɔn nɔ dó mǐ é nɔ zɔ́n bɔ akpakpa nɔ sɔ́ mǐ dó nǔkplɔ́nkplɔ́n wú “káká jɛ nǔ Mawu tɔn e gɔ́ngɔ́n lɛ́ é jí.” (1 Kɔ. 2:9, 10) A sixú ba do nú nǔ ɖé lɛ́ kpó sɔxwixwe kpó ɖo nǔkplɔ́nkplɔ́n mɛɖésúnɔ tɔn towe hwenu kpó linlin ɔ kpó, bá dó vɛ́ xá Jexóva d’é jí. Ði kpɔ́ndéwú ɔ, a sixú gbéjé lěe é ɖe wǎnyíyí xlɛ́ mɛsɛntɔ́ tɔn hwexónu tɔn lɛ́ gbɔn é kpó lěe é nɔ wa mɔ̌ nú hwiɖésúnɔ ɖo égbé gbɔn é kpó kpɔ́n. A sixú lɛ́ kplɔ́n nǔ dó lěe Jexóva ba ɖɔ è ní sɛn émí gbɔn ɖo Izlayɛ́li é wú, bo sɔ́ jlɛ́ dó lěe é ba ɖɔ è ní nɔ sɛn émí gbɔn ɖo égbé é wú. Bóyá, a sixú xwe sɔ bo kplɔ́n nǔ dó gǒflɛ́mɛ e kunkplá nǔɖɔɖayǐ ɖěɖěe ɖɔ xó dó gbɛ ninɔ Jezu tɔn kpó sinsɛnzɔ́ tɔn kpó ɖo ayǐkúngban jí lɛ́ é wú. Index des publications des Témoins de Jéhovah, alǒ Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́ zínzán sixú zɔ́n bɔ nǔ kplɔ́nkplɔ́n dó xóta énɛ́ lɛ́ wú ná víví nú we tawun. Biblu kplɔ́nkplɔ́n kpó sɔxwixwe kpó sixú ná hlɔ̌nhlɔ́n nǔɖiɖi towe, bo lɛ́ d’alɔ we bɔ a ná mɔ nǔ jɛ “lěe è nɔ tuun Mawu gbɔn é wú.”—Nǔx. 2:4, 5. w23.10 18-19 akpá. 3-5

Mi nú mǐ ní lin tamɛ dó xó Piyɛ́ɛ tɔn lɛ́ jí kpó sɔxwixwe kpó. Akpáxwé nukɔntɔn wěmafɔ 8​gɔ́ ɔ tɔn ɖɔ xó dó wǎnyíyí alɔkpa e mǐ ɖó ná ɖó é wú, é wɛ nyí “wǎnyíyí e gɔ́ngɔ́n é.” Xókwín e Piyɛ́ɛ zán, bɔ è tínmɛ bɔ é nyí “gɔ́ngɔ́n” é sín blǔju wɛ nyí “è bló bɔ é d’agba.” Akpáxwé wegɔ́ wěmafɔ ɔ tɔn ɖɔ xó dó le e nɔ tɔ́n sín wǎnyíyí e gɔ́ngɔ́n é mɔ̌hun mɛ é wú. É nɔ cyɔ́n nǔ dó hwɛ nɔví mǐtɔn lɛ́ tɔn. Mǐ sixú jlɛ́ dó nǔ élɔ́ wú: Mǐ hɛn wǎnyíyí mǐtɔn alɔ we, cí nǔ ɖɔ avɔ gblogblo ɖé wɛ ɖo alɔ mǐtɔn mɛ, bɔ mǐ ɖo vlɔ̌nvlɔ́n wɛ, bo ɖo vlɔ̌nvlɔ́n wɛ káká bɔ é cyɔ́n nǔ dó hwɛ nɔví mǐtɔn lɛ́ tɔn, é nyí ɖokpó ǎ, é ka nyí we ǎ, loɔ, “wɔ̌búwɔ́bú” ɖɔhun. Ényí è ɖɔ è cyɔ́n nǔ dó hwɛ ɔ, ɖiɖɔ wɛ è ɖe ɖɔ è sɔ́ kɛ mɛ. Lěe avɔ ɖé sixú bú nǔ dó blɔ̌ e ɖo mɛ ɖěvo lɛ́ wú é gbɔn é ɔ, mɔ̌ wɛ wǎnyíyí e gɔ́ngɔ́n é sixú cyɔ́n nǔ dó gǎnmaɖó kpó nǔwanyido kpó nɔví lɛ́ tɔn gbɔn. Wǎnyíyí e mǐ ná ɖó nú nɔví mǐtɔn lɛ́ é ɖó ná syɛ́n tawun, bo sixú zɔ́n bɔ mǐ ná sɔ́ nǔ e yě nɔ wa nyi do nú mǐ lɛ́ é kɛ yě, ényí é ná bo tlɛ vɛ́ wǔ tawun ɔ nɛ́. (Koló. 3:13.) Ényí mǐ nɔ kpé wú bo nɔ sɔ́ hwɛ kɛ mɛ ɖěvo lɛ́ hǔn, xlɛ́xlɛ́ wɛ mǐ ɖe ɖɔ wǎnyíyí e mǐ ɖó nú yě é gɔ́ngɔ́n, bɔ mǐ ba ná nyɔ́ Jexóva nukúnmɛ. w23.11 11-12 akpá. 13-15

Hwenu e axɔ́sú Joziyási ɖo xwe 26 ɖó wɛ é ɔ, é jɛ tɛ́npli ɔ vɔ́ jlá ɖó jí. Ée è ɖo azɔ̌ énɛ́ wa wɛ é ɔ, è mɔ ‘sɛ́n e Jexóva dó gbɔn Mɔyízi jí é sín wěma.’ Hwenu e axɔ́sú ɔ se nǔ e sɛ́nwéma ɔ ɖɔ é ɔ, é bló hǔzúhúzú lɛ́ afɔjíafɔjí bá se tónú nú nǔ e sɛ́n ɔ ɖɔ é. (2 Tan 34:14, 19-21) A ka nɔ xa Biblu ɖo gbesisɔmɛ a? Ényí mɔ̌ wɛ ɔ, nɛ̌ a ka ɖo vǐví tɔn ɖu wɛ gbɔn? A ka nɔ sɔ́ kɛ́n wěmafɔ ɖěɖěe ná d’alɔ hwiɖésúnɔ mɛtún ɔ lɛ́ é tɔn a? Hwenu e Joziyási ɖo xwe 39 mɔ̌ ɖó wɛ é ɔ, é ɖe afɔ ɖé nyi do bɔ é dɔn kú wá n’i. Nǔ ɖo ganjí ɔ, é ɖó ná ɖeji dó wěɖexámɛ Jexóva tɔn wú, amɔ̌, é ɖeji dó éɖée wú. (2 Tan 35:20-25) Énɛ́ sixú kplɔ́n nǔɖé mǐ. Ényí mǐ ná bo tlɛ nyí mɛxó gbɔn ɖěbǔ, alǒ ɖo Biblu kplɔ́n wɛ din é ɔ, xwe ko jɛ ɔ, mǐ ɖó ná kpo ɖo Jexóva ba wɛ. Énɛ́ nɔ byɔ́ ɖɔ mǐ ní wa nǔ lěhun lɛ́: Ðɛ xixo hwebǐnu dó byɔ́ ɛ ɖɔ é ní xlɛ́ ali mǐ, Xó tɔn kplɔ́nkplɔ́n kpó tó ɖíɖó wě e klisánwun e ko zin lɛ́ é nɔ ɖe xá mǐ lɛ́ é kpó. Énɛ́ ɔ, mǐ ná ɖibla kpá kɛ́n nú nǔwanyido syɛ́nsyɛ́n lɛ́ bo ná ɖibla ɖ’awǎjijɛ hú gǎn.—Ja. 1:25. w23.09 12 akpá. 15-16

Biblu ɖɔ nyɔ̌nu jijɔ ɖagbenɔ gěgé xó, bɔ yě yí wǎn nú Jexóva bo lɛ́ sɛn ɛ. Yě “nɔ jlɛ̌ jí ɖo walɔ yětɔn lɛ́ mɛ” bo lɛ́ “nɔ gbejí ɖo nǔ bǐ mɛ.” Gɔ́ ná ɔ, nɔví nyɔ̌nu lɛ́ sixú mɔ nɔví nyɔ̌nu e zin ɖo gbigbɔ lixo bɔ è sixú xwedó kpɔ́ndéwú yětɔn lɛ́ é ɖo agun yětɔn lɛ́ mɛ. Nɔví nyɔ̌nu wínnyáwínnyá lɛ́ mi, mi lin tamɛ dó nɔví nyɔ̌nu ɖěɖěe mi tuun bɔ yě zin ɖo gbigbɔ lixo bɔ mi sixú wa nǔ yěɖɔhun lɛ́ é jí. Mi nɔ ɖ’ayi jijɔ yětɔn e dɔn mɛ lɛ́ é wú; énɛ́ gúdo hǔn, mi nɔ lin tamɛ dó lěe mi sixú ɖe jijɔ énɛ́ lɛ́ xlɛ́ gbɔn é jí. Cóbónú è ná zin ɖo gbigbɔ lixo ɔ, è ɖó hudó mɛɖéesɔ́hwe tɔn. Ényí nyɔ̌nu ɖé nɔ sɔ́ éɖée hwe ɔ, é ná ɖu vǐví xɔ́ntɔn ɖagbe zunzun xá Jexóva kpó mɛ ɖěvo lɛ́ kpó tɔn. Ði kpɔ́ndéwú ɔ, nyɔ̌nu e yí wǎn nú Jexóva é nɔ sɔ́ éɖée hwe dó nɔ gǔdo nú tuto tatɔ́ nyínyí tɔn e Tɔ́ tɔn jǐxwé tɔn ɔ sɔ́ ɖ’ayi é. (1 Kɔ. 11:3) È nɔ xwedó tuto énɛ́ ɖo ali tawun tawun lɛ́ nu ɖo agun ɔ kpó xwédo kpó mɛ. w23.12 18-19 akpá. 3-5

Jijɔ ɖěɖěe sín hudó a ɖó lɛ́ é xó jɛ́n Jexóva nɔ ɖó nukún ɖɔ asú ɖé ní yí wǎn nú asi tɔn, bo kpé nukún dó wǔ tɔn ɖo agbaza, lěe nǔ nɔ cí nú mɛ é kpó gbigbɔ kpó lixo. Tíntɛ́nkpɔ́n bo ɖó nǔwúkpíkpé tamɛ linlin tɔn, sísí ɖíɖó nú nyɔ̌nu lɛ́ kpó mɛ ɖejidéwú nyínyí kpó ná d’alɔ we bɔ a ná nyí asú ɖagbe. Ényí a wlí alɔ gúdo ɔ, a sixú húzú tɔ́. Étɛ́ Jexóva ka sixú kplɔ́n we dó tɔ́ ɖagbe nyínyí wú? (Efɛ́. 6:4) Jexóva nɔ ɖɔ nú Vǐ tɔn Jezu nyi wɛn ɖɔ émí yí wǎn n’i, bɔ nǔ tɔn lɛ́ nyɔ́ nukún émítɔn mɛ. (Mat. 3:17) Ényí a húzú vǐtɔ́ hǔn, tɛ́n kpɔ́n bo nɔ ná gǎnjɛwú vǐ towe lɛ́ hwɛhwɛ ɖɔ émí yí wǎn nú yě. Nɔ kpa vǐ towe lɛ́ hwɛhwɛ ɖó nǔ ɖagbe e yě nɔ wa lɛ́ é wú. Vǐtɔ́ e nɔ wa nǔ Jexóva ɖɔhun lɛ́ é nɔ d’alɔ vǐ yětɔn lɛ́ bɔ yě nɔ húzú klisánwun e zin lɛ́ é. Nɔ kpé nukún dó mɛ ɖěvo e ɖo xwédo towe kpó agun ɔ kpó mɛ lɛ́ é wú kpó wǎnyíyí kpó, bo nɔ lɛ́ ɖe xlɛ́ yě ɖɔ émí yí wǎn nú yě, bɔ yě lɛ́ xɔ akwɛ́ nú émí dó sɔ́ nǔ nú hwiɖée din nú azɔ̌ énɛ́.—Jaan 15:9. w23.12 28-29 akpá. 17-18

Mɛ e ɖo gbɛ ɔ mɛ lɛ́ é bǐ ɖɔhun ɔ, mɛsɛntɔ́ Jexóva tɔn gbejínɔtɔ́ lɛ́ bǐ wɛ nɔ se wǔvɛ́ bo nɔ lɛ́ jɛ azɔn. Mǐ sixú lɛ́ dɛ ɖo gbeklánxámɛ alǒ yadónúmɛ mɛ ɖěɖěe ma yí wǎn nú togun Mawu tɔn ǎ lɛ́ é tɔn nu. Jexóva nɔ cyɔ́n alɔ mǐ jí sín wǔvɛ́ syɛ́nsyɛ́n mɔ̌hun lɛ́ sí ǎ có, é d’akpá ɖɔ émí ná d’alɔ mǐ. (Eza. 41:10) Kpó alɔdó tɔn kpó ɔ, mǐ sixú kpo ɖo awǎjijɛ ɖó wɛ, wá gbeta ɖagbe lɛ́ kɔn, bo lɛ́ kpo ɖo gbejí nɔ n’i wɛ, é ná bo tlɛ nyí ɖo ninɔmɛ e vɛ́ wǔ hú gǎn lɛ́ é mɛ ɔ nɛ́. Jexóva d’akpá ɖɔ émí ná ná mǐ nǔ e Biblu ylɔ́ ɖɔ “fífá Mawu tɔn” é. (Filí. 4:6, 7) Fífá énɛ́ nɔ dó gesí vivo e è nɔ ɖó ɖo ayi mɛ, ɖó è ɖó kancícá xɔ akwɛ́ ɖé xá Jexóva wútu é. Fífá énɛ́ “zɛ nukúnnúmɔjɛnǔmɛ bǐ wú”; é nyɔ́ hú gǎn nǔ ɖěbǔ e mɛ mǐ sixú dó nukún kpɔ́n é. Ði kpɔ́ndéwú ɔ, a ka ko xo ɖɛ vívɛ́ ɖé sɛ́dó Jexóva bɔ énɛ́ gúdo ɔ, a ɖ’ayi wú ɖɔ agbɔ̌n towe jɛ do tawun a? “Fífá Mawu tɔn” wú wɛ nǔ cí mɔ̌ nú we. w24.01 20 akpá. 2; 21 akpá. 4

Wǎn yí nú Mawu nɔ sísɛ́ gbejínɔtɔ́ lɛ́, bɔ yě nɔ kpa susu nú nyǐkɔ tɔn kpó ayi yětɔn bǐ kpó. Axɔ́sú Davídi mɔ nukúnnú jɛ mɛ ɖɔ susu kpikpa nú nyǐkɔ Jexóva tɔn wɛ nyí ɖɔ è ní kpa susu nú Jexóva ɖésú mɛtún ɔ. Ényí mǐ se nyǐkɔ Jexóva tɔn ɔ, mǐ nɔ lin tamɛ dó mɛ alɔkpa e é nyí é, jijɔ tɔn ɖaaɖagbe lɛ́ bǐ kpó nǔjíwǔ e é ko bló lɛ́ é bǐ kpó jí. Davídi ba ná hɛn nyǐkɔ Tɔ́ tɔn tɔn ɖó mǐmɛ́ jí, lobo lɛ́ kpa susu ná. É ba ná wa mɔ̌ kpó “nǔ e ɖo wǔ [tɔn] lɛ́ é bǐ” kpó, énɛ́ wɛ nyí, kpó ayi tɔn bǐ kpó. Ðo ali ɖokpó ɔ nu ɔ, Levíi ví lɛ́ nɔ nɔ nukɔn ɖo susu kpikpa nú Jexóva mɛ. Yě yí gbe kpó mɛɖéesɔ́hwe kpó ɖɔ xó émítɔn lɛ́ kún sixú ɖe susu kpikpa nú nyǐkɔ mímɛ́ Jexóva tɔn xlɛ́ bǐ mlɛ́mlɛ́ gbeɖé ó. (Nɛɛ. 9:5) É ɖo wɛn ɖɔ susu énɛ́ e yě nɔ kpa nú Jexóva kpó mɛɖéesɔ́hwe kpó, lobo nɔ lɛ́ wa mɔ̌ kpó ayi yětɔn bǐ kpó é nɔ hɛn xomɛ hun Jexóva. w24.02 9 akpá. 6

Ényí a ma sixú kpé nǔ e zɛ hlɔ̌nhlɔ́n towe wú bɔ a ɖo gbě tɔn nya wɛ é ɖé wú ǎ ɔ, Jexóva ná lin ɖɔ a hwedó nǔ wú ǎ. (2 Kɔ. 8:12) Nǔmaɖónukún e jɛ é ní kplɔ́n nǔ we. Hɛn nǔ e wú a ko kpé lɛ́ é ayi mɛ. Biblu ɖɔ: “Mawu nɔ dó hwɛ agɔ ǎ; é ná wɔn azɔ̌ e mi wa é ǎ.” (Ebl. 6:10) Énɛ́ wú ɔ, hwi lɔ ɖó ná wɔn nǔ e a ko wa lɛ́ é ǎ. Nɔ lin tamɛ dó nǔ ɖěɖěe gbé a ko nya bo kpé wú lɛ́ é jí; é sixú nyí gǎn e a dó bo zun xɔ́ntɔn xá Jexóva é, xó e a nɔ ɖɔ dó wǔ tɔn nú mɛ ɖěvo lɛ́ é, alǒ batɛ́mu e a bló é. Lěe a kpé wú bo yi nukɔn bo jɛ nǔ e gbé nya wɛ a ɖe wá yi lɛ́ é kɔn gbɔn é ɔ, a sixú kpo ɖo nukɔn yi wɛ, bá jɛ nǔ e gbé nya wɛ a ɖe din lɛ́ é kɔn. Kpó alɔdó Jexóva tɔn kpó ɔ, a sixú kpé nǔ e gbé nya wɛ a ɖe é wú. Ée a ná ɖo tíntɛ́nkpɔ́n wɛ, bá kpé nǔ e gbé nya wɛ a ɖe ɖo gbigbɔ lixo é wú é ɔ, ma wɔn bo gɔn vǐví lěe Jexóva ɖo alɔ dó we wɛ, bo ɖo nyɔ̌ná kɔn dó jǐ towe wɛ gbɔn é tɔn ɖu ó. (2 Kɔ. 4:7) Ényí a ma jó gbe ǎ ɔ, a ná mɔ nyɔ̌ná e tlɛ hú mɔ̌ lɛ́ é.—Ga. 6:9. w23.05 31 akpá. 16-18

Jexóva nɔ ba ali ɖěɖěe nu é ná ɖe xlɛ́ mɛ e ɖo togun tɔn mɛ lɛ́ é ɖe ɖɔ émí yí wǎn nú yě, bɔ xomɛ nɔ lɛ́ hun émí dó yě wú ɖe lɛ́ é. Mawuxówéma ɔ ɖɔ xó dó ninɔmɛ e mɛ Jexóva ɖɔ nú Jezu ɖɔ Vǐ súnnu vívɛ́ná émítɔn wɛ é nyí bɔ xomɛ nɔ lɛ́ hun émí dó wǔ tɔn ɖe é we wú. (Mat. 3:17; 17:5) A ka nɔ ba ná se bɔ Jexóva ná vɔ́ gǎnjɛwú ná we ɖɔ nǔ towe nɔ nyɔ́ nukún émítɔn mɛ a? Jexóva nɔ ɖɔ xó nú mǐ tlɔlɔ ǎ, loɔ, é nɔ ɖɔ xó nú mǐ gbɔn Xó tɔn gblamɛ. Ényí mǐ ɖo xó Jezu tɔn e ɖo Wɛnɖagbewéma lɛ́ mɛ lɛ́ é xa wɛ ɔ, mǐ sixú “se” gbe Jexóva tɔn e ɖo ɖiɖɔ wɛ ɖɔ nǔ mǐtɔn nyɔ́ nukún émítɔn mɛ é. Jezu ɖe jijɔ Tɔ́ tɔn tɔn lɛ́ xlɛ́ bɔ nǔ bǐ vɔ ɖ’é wú. Énɛ́ wú ɔ, ée mǐ xa ɖɔ Jezu ɖe xlɛ́ ahwanvú tɔn hwɛhutɔ́ e ka ɖo gbejí lɛ́ é ɖɔ nǔ yětɔn nyɔ́ nukún émítɔn mɛ é ɔ, mǐ sixú dó nukún mɛ kpɔ́n ɖɔ Jexóva ɖo xó énɛ́ lɛ́ ɖɔ nú mǐ lɔ wɛ. (Jaan 15:9, 15) Ényí mǐ ɖo tagba lɛ́ mɔ wɛ ɔ, xlɛ́xlɛ́ wɛ é ɖe ɖɔ nǔ mǐtɔn kún sɔ́ nyɔ́ Mawu nukúnmɛ ó ǎ. É nyɔ́ wa ɔ, yě nɔ hun ali lɛ́ nú mǐ bónú mǐ ná ɖe lě do mǐ yí wǎn nú Mawu bo nɔ ɖeji dó wǔ tɔn sɔ é xlɛ́.—Ja. 1:12. w24.03 28 akpá. 10-11