Septembre

Mawu ná hlɔ̌nhlɔ́n Jezu bónú é ná ɖe ɖɛ tagba gbɛtɔ́ lɛ́ tɔn lɛ́ bǐ. Gbɔn nǔjíwǔ e Jezu bló lɛ́ é gblamɛ ɔ, é xlɛ́ ɖɔ émí ɖó hlɔ̌nhlɔ́n bo ná ɖe wǔvɛ́ e mǐ ma sixú ɖe síin mǐɖésúnɔ gbeɖé ǎ lɛ́ é bǐ síin. Ði kpɔ́ndéwú ɔ, é ɖó hlɔ̌nhlɔ́n bo ná tún kan nú mǐ sín nǔ e wú tagba mǐtɔn lɛ́ nɔ sín é sí, énɛ́ wɛ nyí hwɛhuhugú e mǐ ɖu é; é ná lɛ́ tún kan nú mǐ sín nǔ e é nɔ ji lɛ́ é sí, káká jɛ azɔn kpó kú kpó jí. (Mat. 9:1-6; Hlɔ̌. 5:12, 18, 19) Nǔjíwǔ e é bló lɛ́ é xlɛ́ ɖɔ é sixú gbɔ azɔn “tɛnmɛ tɛnmɛ bǐ,” bo tlɛ lɛ́ fɔ́n mɛ sín kú. (Mat. 4:23; Jaan 11:43, 44) Gɔ́ ná ɔ, é ɖó acɛ bo sixú ɖó jɔhɔn syɛ́nsyɛ́n lɛ́ te, lobo lɛ́ nya gbigbɔ nyanya lɛ́ sín mɛ lɛ́ jí. (Mak. 4:37-39; Luk. 8:2) Tuun e mǐ tuun ɖɔ Jexóva sɔ́ acɛ énɛ́ d’alɔ mɛ nú Vǐ tɔn é ná gǎnjɛwú mǐ kpɔ́n! Mǐ sixú ɖeji bǐ mlɛ́mlɛ́ ɖɔ nyɔ̌ná sɔgúdo tɔn ɖěɖěe Axɔ́súɖuto Mawu tɔn ná hɛn wá lɛ́ é kún ná gblá ó. Nǔjíwǔ ɖěɖěe Jezu bló hwenu e é ɖo ayǐkúngban jí lɛ́ é kplɔ́n mǐ ɖɔ hwenu e é ná wá húzú Axɔ́sú nú Axɔ́súɖuto Mawu tɔn ɖo jǐxwé é ɔ, ayǐkúngban ɔ bǐ jí wɛ é ná bló nǔjíwǔ énɛ́ lɛ́ gbɔn. w23.04 3-4 akpá. 5-7

Ényí a ɖo agun e mɛ gbɛtɔ́ sukpɔ́ ɖe é ɖé bɔ énɛ́ nɔ zɔ́n bɔ è nɔ yá wǔ mɔ alɔ towe ǎ ɔ, é sixú nɔ jló we ɖɔ a ní jó gbe. Amɔ̌, ma jó gbe dó xósin níná wú ó. Nɔ sɔ́ nǔ nú xósin gěgé nú kplé lɛ́ ɖokpó ɖokpó. Énɛ́ ɔ, ényí è ma ylɔ́ we bónú a ná xósin ɖo bǐbɛ́mɛ nǔkplɔ́nkplɔ́n ɔ tɔn ǎ ɔ, ali ɔ ná lɛ́ hun nú we bɔ a ná ná xósin ɖo kplé ɔ hwenu. Ényí a ɖo nǔ sɔ́ nú Atɔxwɛ kplɔ́nkplɔ́n wɛ hǔn, nɔ lin tamɛ dó lěe akpáxwé lɛ́ ɖokpó ɖokpó cá kan xá xóta nǔkplɔ́nkplɔ́n ɔ tɔn gbɔn é jí. Ényí a nɔ wa mɔ̌ ɔ, a ná ɖibla mɔ xósin ɖagbe ɖěvo bo ná ɖo nǔkplɔ́nkplɔ́n ɔ hwenu. Gɔ́ ná ɔ, a sixú sɔ́ nǔ bá ná xósin ɖo akpáxwé ɖěɖěe ɖɔ xó dó nǔgbó Biblu tɔn e gɔ́ngɔ́n, bɔ é nɔ vɛ́ wǔ bɔ è ná tínmɛ lɛ́ é wú é jí. Aniwú? Ðó mɛ gěgé sixú gɔn alɔ sɔ́ ɖo nǔkplɔ́nkplɔ́n ɔ sín akpáxwé énɛ́. Nú a mɔ ɖɔ ɖo kplé gěgé gúdo ɔ, ali ɔ kún hun nú émí bɔ émí ná xósin ó jɛ́n wɛ ɔ ka lo? Ðɔ xó xá mɛ e nɔ kpé nukún dó akpáxwé ɔ wú é jɛ nukɔn nú kplé ɔ, bo ɖɔ nǔkanbyɔ́ e a jló ná ná xósin ná é n’i. w23.04 21-22 akpá. 9-10

Jozɛ́fu nɔ yá wǔ wa nǔ sɔgbe xá wěɖexámɛ Jexóva tɔn lɛ́, bɔ énɛ́ zɔ́n bɔ é nyí asú ɖagbe ɖé. É hwe bǐ ɔ, ɖo ninɔmɛ atɔn mɛ ɔ, Mawu ɖe wě ɖé lɛ́ xá ɛ dó xwédo tɔn wú. Ðo ninɔmɛ lɛ́ ɖokpó ɖokpó mɛ ɔ, é yá wǔ se tónú, nú é ná bo tlɛ nyí ɖɔ é byɔ́ ɖɔ é ní bló hǔzúhúzú ɖaxó lɛ́ ɔ nɛ́. (Mat. 1:20; 2:13-15, 19-21) Wěɖexámɛ Mawu tɔn lɛ́ xwixwedó zɔ́n bɔ Jozɛ́fu cyɔ́n alɔ Mali jí, nɔ gǔdo n’i, bo lɛ́ kpé nukún dó wǔ tɔn. Dǒ nukún lěe nǔ e Jozɛ́fu wa lɛ́ é zɔ́n bɔ wǎn e Mali yí n’i é kpó sísí e é ɖó n’i é kpó tlɛ lɛ́ jɛji sɔ é mɛ kpɔ́n! Asú lɛ́ mi, mi sixú wa nǔ Jozɛ́fu ɖɔhun gbɔn wěɖexámɛ e jínjɔ́n Biblu jí, bo kúnkplá nukún kpíkpé dó xwédo mitɔn wú lɛ́ é biba gblamɛ. Ényí mi nɔ wa mɔ̌, é ná bo tlɛ nyí hwenu e mɔ̌ wiwa nɔ byɔ́ hǔzúhúzú lɛ́ ɖo mi sí é hǔn, wǎn e mi yí nú asi mitɔn é xlɛ́ wɛ mi ɖe mɔ̌, bo lɛ́ ɖo hlɔ̌nhlɔ́n ná alɔwlíwlí mitɔn wɛ. Nɔví nyɔ̌nu ɖé nɔ nɔ Vanuatu, bo ko wlí alɔ sín xwe 20 jɛjí ɖíe; é ɖɔ: “Ényí asú ce ba wěɖexámɛ Jexóva tɔn lɛ́ bo xwedó ɔ, un nɔ ɖó sísí n’i hú gǎn. Un nɔ mɔ ɖɔ un ɖo ayijayǐ mɛ, lobo nɔ lɛ́ gán jɛ gbeta e kɔn é nɔ wá lɛ́ é wú.” w23.05 21-22 akpá. 5

Jwifu ɖěɖěe ná lɛ́ kɔ sín Babilɔ́nu lɛ́ é ná húzú “togun ɖeɖóvo” ɖé nú Mawu yětɔn. (Sɛ́n. 7:6) Amɔ̌, ɖiɖɔ wɛ è ɖe ɖɔ yě kún sɔ́ ná bló hǔzúhúzú ɖě cóbɔ nǔ yětɔn ná nyɔ́ Jexóva nukúnmɛ ó ǎ. Babilɔ́nu wɛ è ji Jwifu gěgé dó, bɔ yě mɛ gěgé tíin bɔ é cí ɖɔ lěe Babilɔ́nunu lɛ́ nɔ lin nǔ, bo nɔ lɛ́ wa nǔ gbɔn é ko má yě. Jwifu nukɔn nukɔntɔn lɛ́ lɛ́ kɔ wá yi Izlayɛ́li bɔ é ná bló xwe 69 gúdo é ɔ, tokpɔngán Nɛɛmíi mɔ ɖɔ vǐ ɖěɖěe è ji ɖo Izlayɛ́li lɛ́ é kún tlɛ se Jwifu lɛ́ sín gbe ó é ɔ, é kpácá ɛ tawun. (Sɛ́n. 6:6, 7; Nɛɛ. 13:23, 24) Ényí mɛ wínnyáwínnyá énɛ́ lɛ́ ma se Ebléegbe e nyí gbe tají e mɛ è wlán Xó Mawu tɔn dó é ǎ ɔ, nɛ̌ yě ka sixú kplɔ́n bá yí wǎn nú Jexóva, lobo lɛ́ sɛn ɛ gbɔn? (Ɛsd. 10:3, 44) Énɛ́ wú ɔ, Jwifu énɛ́ lɛ́ ɖó ná bló hǔzúhúzú tají lɛ́, amɔ̌, é ná bɔ wǔ nú yě hú gǎn ɖɔ yě ní bló hǔzúhúzú énɛ́ lɛ́ ɖo Izlayɛ́li, fí e è lɛ́ vɔ́ ɖo mawusinsɛn nǔgbó ɔ ɖ’ayǐ ɖe wɛ kpɛɖé kpɛɖé é.—Nɛɛ. 8:8, 9. w23.05 15 akpá. 6-7

É blá wǔ ɖɔ, ényí akpakpa tlɛ nɔ sɔ́ mǐ gbɔn ɖěbǔ, alǒ mǐ tlɛ nɔ gbɛ́ nǔ nú mǐɖée gbɔn ɖěbǔ ɔ, nǔɖé lɛ́ sixú wá jɛ nǔ mɛ. Ði kpɔ́ndéwú ɔ, “nǔmaɖónukún lɛ́” sixú jɛ bo ná xo hwenu e sín hudó mǐ ɖó bo ná w’azɔ̌ dó nǔ e gbé nya wɛ mǐ ɖe é jí é yí sín mǐ sí. (Nǔt. 9:11, nwt) Mǐ sixú wá mɔ tagba e ná zɔ́n bɔ awakanmɛ ná kú mǐ, bɔ hlɔ̌nhlɔ́n káká ɖé ma sɔ́ ná ɖo mǐ wú ǎ é ɖé. (Nǔx. 24:10) Hwɛhuhu gbaza mǐtɔn sixú zɔ́n bɔ mǐ wa nǔ e ná zɔ́n bɔ nǔ e gbé nya wɛ mǐ ɖe é wú kpíkpé sixú vɛ́ wǔ nú mǐ tawun é ɖé. (Hlɔ̌. 7:23) Alǒ, nǔ sixú cikɔ nú mǐ. (Mat. 26:43) Ényí nǔmaɖónukún ɖé jɛ, alǒ kéze ɖé ma yi nú mǐ ganjí ǎ ɔ, étɛ́ ka sixú d’alɔ mǐ bɔ mǐ ná ɖu ɖ’é jí? Flín ɖɔ é kún nyí ɖɔ nǔmaɖónukún ɖé jɛ wɛ xlɛ́ ɖɔ a hwe dó nǔ wú ó. Biblu ɖɔ ɖɔ tagba lɛ́ kpó wǔvɛ́ lɛ́ kpó kún ná hán ó. É ɖo mɔ̌ có, é lɛ́ ɖe xlɛ́ nyi wɛn ɖɔ mǐ hɛn ɔ, mǐ ná kpé nǔ e gbé nya wɛ mǐ ɖe é wú. Ɛɛn, ényí nǔmaɖónukún ɖé jɛ cóbɔ a ka lɛ́ kpo ɖo gǎn dó wɛ hǔn, xlɛ́xlɛ́ Jexóva wɛ a ɖe ɖɔ a ba ná hɛn xomɛ tɔn hun nɛ́. Ényí Jexóva mɔ bɔ a ɖo tíntɛ́nkpɔ́n wɛ, bo ná kpé nǔ e gbé nya wɛ a ɖe é wú ɔ, dǒ nukún lě do xomɛ ná hun i sɔ é mɛ kpɔ́n! w23.05 30-31 akpá. 14-15

Gběxosín-alijítɔ́zɔ́ wiwa nɔ d’alɔ nɔví súnnu wínnyáwínnyá ɖé, b’ɛ nɔ kplɔ́n bo nɔ tuun lěe é ná wa azɔ̌ ganjí xá gbɛtɔ́ alɔkpa lɛ́ bǐ gbɔn é. É nɔ lɛ́ d’alɔ ɛ bɔ é nɔ tuun lěe é ná zán akwɛ́ e é mɔ é kpó nǔnywɛ́ kpó, bo ma ná zɛ éé é ɖɔ émí ná zán é wú ǎ gbɔn é. (Filí. 4:11-13) Ali ɖagbe hú gǎn e nu è sixú bɛ́ sinsɛnzɔ́ hwebǐnu tɔn ɖe é wɛ nyí ɖɔ è ní to nyí gběxosín-alijítɔ́ alɔgɔ́tɔ́ hwɛ̌, énɛ́ nɔ d’alɔ mɛ bɔ è nɔ ɖo gbesisɔmɛ bá bɛ́ sinsɛnzɔ́ hwebǐnu tɔn. Gběxosín-alijítɔ́zɔ́ wiwa sixú hun sinsɛnzɔ́ hwebǐnu tɔn alɔkpa ɖěvo lɛ́ sín hɔn nú mɛ, káká jɛ xɔ tutoblónúnǔ ɔ tɔn lɛ́ gbígbá, alǒ sinsɛnzɔ́ wiwa ɖo Betɛ́li jí. Nɔví súnnu lɛ́ bǐ ɖó ná tɛ́n kpɔ́n bo kpé nǔ e ɖó nukún wɛ è ɖe ɖo yě sí lɛ́ é wú, bo lɛ́ ɖe jijɔ ɖěɖěe è byɔ́ yě lɛ́ é xlɛ́ bá dó nyí mɛxó agun tɔn, lobo sɛn nɔví yětɔn lɛ́. Biblu ɖɔ ɖɔ súnnu ɖěɖěe ɖo azɔ̌ énɛ́ gbé nya wɛ lɛ́ é ɔ, “azɔ̌ ɖagbe ɖé wɛ jló [yě].” (1 Tim. 3:1) Nɔví súnnu ɖé ɖó ná to nyí mɛsɛntɔ́ agun tɔn hwɛ̌. Mɛsɛntɔ́ agun tɔn lɛ́ nɔ d’alɔ mɛxó agun tɔn lɛ́ ɖo ali tawun tawun gěgé nu. Mɛxó agun tɔn lɛ́ kpó mɛsɛntɔ́ agun tɔn lɛ́ kpó bǐ nɔ sɔ́ yěɖée hwe, bo nɔ wa mɛsɛntɔ́zɔ́ nú nɔví súnnu kpó nɔví nyɔ̌nu kpó yětɔn lɛ́, lobo nɔ ɖ’alɔ ɖo sinsɛnzɔ́ ɔ mɛ kpó kanɖódónǔwú kpó. w23.12 28 akpá. 14-16

Axɔ́sú Joziyási kpo ɖo wǐnnyáwínnyá mɛ cóbó jɛ Jexóva ba jí. É ba ná kplɔ́n nǔ dó Jexóva wú, lobo lɛ́ wa jlǒ tɔn. É ɖo mɔ̌ có, gbɛ ka bɔkun nú axɔ́sú wínnyáwínnyá énɛ́ ǎ. Hwenɛ́nu ɔ, mɛ gěgé wɛ ɖo vodún sɛn wɛ, énɛ́ wú ɔ, é ná byɔ́ akɔ́nkpinkpan ɖo Joziyási sí cóbɔ é ná jɛ hun dó Mawu sinsɛn nǔgbó ɔ jí. Bɔ mɔ̌ wɛ é ka wa nǔgbó! Joziyási ko jɛ vodún e ɖo toxo ɔ mɛ lɛ́ é ɖe síin jí, cóbó ɖó xwe 20. (2 Tan 34:1, 2) Ényí a ná bo tlɛ kpo ɖo wǐnnyáwínnyá mɛ tawun ɔ, a sixú wá gbeta ɔ kɔn bo ná wa nǔ Joziyási ɖɔhun gbɔn nǔ kplɔ́nkplɔ́n dó Jexóva kpó jijɔ tɔn ɖaaɖagbe lɛ́ kpó wú d’é jí gblamɛ. Afɔ ɖagbe énɛ́ e a ná ɖe é ná sísɛ́ we bɔ a ná zé hwiɖée jó n’i. Ðagbe tɛ́ zě e a zé hwiɖée jó n’i é ka ná wa nú we gbe bǐ gbe? Luke e bló batɛ́mu hwenu e é ɖo xwe 14 ɖó wɛ é ɖɔ: “Bɛ́sín din ɖidó ɔ, un ná sɔ́ Jexóva sinsɛn dó ɖó nǔ e ɖo tají hú gǎn é ɖo gbɛzán ce mɛ, lobo ná tɛ́n kpɔ́n bo ná nɔ hɛn xomɛ tɔn hun.” (Mak. 12:30) Ényí hwi lɔ ba ná wa nǔ ɖokpó ɔ ɔ, dǒ nukún nyɔ̌ná e a ná mɔ ɖ’é mɛ é mɛ kpɔ́n! w23.09 11 akpá. 12-13

Hwenu e mɛsɛ́dó Pɔ́lu wlán wěma élɔ́ sɛ́dó Tɛsaloníkinu lɛ́ é ɔ, è ɖó agun yětɔn ayǐ é ɔ, xwe ɖokpó mɔ̌ bló wɛ jɛ́n é ɖe nɛ́. É cí ɖɔ súnnu e è sɔ́ ɖo agun énɛ́ mɛ lɛ́ é kún ko mɔ nǔ káká ɖé kpɔ́n ó, bo sixú ko lɛ́ ɖe afɔ ɖé lɛ́ nyi do. Nǔ ɖo mɔ̌ có, yě jɛxá sísí. Ée wǔvɛ́ ɖaxó ɔ ná ɖo sisɛkpɔ́ wɛ é ɔ, é sixú nyí mɛxó agun tɔn e ɖo xá mǐtɔn mɛ lɛ́ é gɔ́n wɛ mǐ ná nɔ ba wěɖexámɛ ɖe hú gǎn lěe mǐ ɖ’é wú gbɔn din é. Bóyá, ali sɔ́ ná hun nú mǐ bónú mǐ ná mɔ wěɖexámɛ lɛ́ sín nɔví mǐtɔn e ɖo Hɔ̌nkan gbɛ ɔ tɔn mǐtɔn lɛ́ é gɔ́n, alǒ alaxɔ mɛ ǎ, énɛ́ wú ɔ, é ɖo tají ɖɔ mǐ ní kplɔ́n bo nɔ yí wǎn nú mɛxó agun tɔn mǐtɔn lɛ́ din, lobo nɔ lɛ́ ɖó sísí nú yě. Gbɛ ná bo gbɔn ɖěbǔ hǔn, mi nú mǐ ní nɔ zán nǔwúkpíkpé tamɛ linlin tɔn mǐtɔn ganjí, bo ma nɔ sɔ́ ayi ɖó nǔwanyido yětɔn lɛ́ jí ó, loɔ, mǐ ní nɔ sɔ́ ayi ɖó lěe Jexóva gbɔn Klísu jí bo ɖo ali xlɛ́ súnnu gbejínɔtɔ́ énɛ́ lɛ́ wɛ gbɔn é jí. Lěe gangbákún ɖé nɔ cyɔ́n alɔ ta sɔ́ja ɖé tɔn jí gbɔn é ɔ, mɔ̌ wɛ nukúnɖíɖó hwlɛngán tɔn mǐtɔn nɔ cyɔ́n alɔ linlin mǐtɔn lɛ́ jí gbɔn é nɛ́. Mǐ tuun ɖɔ nǔ e gbɛ ɔ nɔ xwlé mɛ lɛ́ é kún hwɛ́n nǔtí ó. (Filí. 3:8) Nukúnɖíɖó mǐtɔn nɔ d’alɔ mǐ bɔ mǐ nɔ cí xwíí, lobo nɔ lɛ́ ɖó ninɔmɛ ayi mɛ tɔn ɖagbe. w23.06 11-12 akpá. 11-12

Mɛ ɖěɖěe se xó e sú wɛ “nyɔ̌nu tagbanɔ ɔ” ɖe lɛ́ é ɖó ná wá gbeta ɖé kɔn: Yě ná yí gbe nú ylɔ̌ e ylɔ́ yě wɛ é ɖe é alǒ gbɔ. Mǐ ɖó hwɛjijɔ ɖagbe e wú mǐ ná nyi alɔ nú nǔblíblíwiwa lɛ́ é. È tínmɛ ɖɔ “nyɔ̌nu tagbanɔ” ɔ ɖɔ xó élɔ́: “Sin e è fin ɔ nɔ nyɔ́ nu tawun!” (Nǔx. 9:17) Étɛ́ xó ɖɔ gbé è ka ja tawun bo ɖɔ “sin e è fin” é xó? Biblu jlɛ́ vǐví e súnnu kpó nyɔ̌nu kpó e ko wlí alɔ lɛ́ é nɔ se, ɖo xó e yě nɔ ɖó xá yěɖée mɛ é dó sin e nɔ fá kɔ nú mɛ é wú. (Nǔx. 5:15-18) Súnnu kpó nyɔ̌nu kpó e wlí alɔ ɖo sɛ́n lixo é ɖó acɛ bo ná nɔ ɖóxó xá yěɖée. Amɔ̌, énɛ́ gbɔn vo tawun nú “sin e è fin” é. È hɛn ɔ, è ná ylɔ́ “sin e è fin ɔ” ɖɔ nǔ e sín gbe è ma ná ǎ é, alǒ agalilɛ. Mɛ ɖěɖěe nɔ wa mɔ̌ lɛ́ é nɔ lɔn nú mɛɖé nɔ tuun ǎ, lěe ajotɔ́ ɖé nɔ fin nǔ gbɔn é ɖɔhun. Mɛ e ɖo ‘sin ɔ’ fin nu wɛ lɛ́ é ɔ, é sixú cí nú yě ɖɔ é víví tawun, tají ɔ, ényí yě lin ɖɔ mɛɖé kún ná mɔ nǔ jɛ nǔ nyanya e wa wɛ émí ɖe é wú ó ɔ nɛ́. Amɔ̌, yěɖée blɛ́ wɛ yě ɖe, ɖó Jexóva mɔ nǔ e dó sin wɛ yě ɖe é bǐ. Nǔ ɖě sɔ́ nylá hú è ní ba fɛ́nú Mawu tɔn kpo ǎ, énɛ́ wú ɔ, nǔ ɖě “nyɔ́” ɖo fínɛ́ ǎ, alǒ yě mɔ vǐví ɖě bo se ǎ.—1 Kɔ. 6:9, 10. w23.06 22-23 akpá. 7-9

Ényí a mɔ ɖɔ nú hwenu ɖé ɔ, ɖɛ émítɔn lɛ́ kún sɔ́ nɔ gosín ayi mɛ ó, bɔ a kún sɔ́ nɔ ɖu vǐví sinsɛnzɔ́ ɔ tɔn lěe é ko nɔ nyí gbɔn ɖ’ayǐ é ó ɔ, étɛ́ a ka ɖó ná wa? Ma wá gbeta ɔ kɔn ɖɔ émí ba gbigbɔ mímɛ́ Jexóva tɔn kpo ó. Hwɛhutɔ́ wɛ nú we, bɔ lěe nǔ nɔ cí nú we é sixú húzú sín hweɖénu jɛ hweɖénu. Ényí kanɖódónǔwú towe jɛ ɖiɖekpo jí hǔn, lin tamɛ dó kpɔ́ndéwú mɛsɛ́dó Pɔ́lu tɔn jí. Nǔgbó wɛ ɖɔ é nɔ tɛ́n kpɔ́n bá wa nǔ Jezu ɖɔhun, amɔ̌, é tuun ɖɔ hweɖélɛ́nu ɔ, émí kún nɔ ɖó jlǒ syɛ́nsyɛ́n bá wa nǔ e é byɔ́ ɖɔ émí ní wa lɛ́ é ó. Pɔ́lu kán ɖ’é jí bo ná wa sinsɛnzɔ́ tɔn, ényí gbɛ na bo gbɔn ɖěbǔ ɔ nɛ́. Ðo ali ɖokpó ɔ nu ɔ, ma nɔ zɔn dó lěe nǔ nɔ cí nú we é wú bo wá gbeta towe lɛ́ kɔn ó. Ényí nǔ ná bo tlɛ cí ɖěbǔ nú we hǔn, kán ɖ’é jí bá wa nǔ ɖagbe. Nú a kpo ɖo nǔ e sɔgbe é wa wɛ ɔ, lěe nǔ nɔ cí nú we é sixú wá húzú.—1 Kɔ. 9:16. w24.03 11-12 akpá. 12-13

Mǐ sixú xlɛ́ nɔví mǐtɔn lɛ́ ɖɔ mǐ yí wǎn nú yě, gbɔn xɔ́ntɔn dídó yě kpó hwenu zínzán ɖó kpɔ́ xá yě kpó gblamɛ. (2 Kɔ. 6:11-13) Mǐ mɛ gěgé nɔ yi kplé dó agun e mɛ nɔví lɛ́ gosín fí vovo ɖe lɛ́ é, bɔ jijɔ vovo lɛ́ wɛ yě lɛ́ ɖó. Mǐ sixú ná hlɔ̌nhlɔ́n wǎn e mǐ yí nú yě mɛ ɖokpó ɖokpó é gbɔn ayi sísɔ́ ɖó jijɔ ɖagbe yětɔn lɛ́ jí gblamɛ. Ényí mǐ kplɔ́n bo nɔ ɖó linlin ɖokpó ɔ dó mɛ lɛ́ wú Jexóva ɖɔhun ɔ, mǐ nɔ ɖe xlɛ́ ɖɔ mǐ yí wǎn nú yě. Wǎnyíyí ná ɖo tají ɖo wǔvɛ́ ɖaxó ɔ hwenu. Nɛ̌ Jexóva ka ná cyɔ́n alɔ mǐ jí hwenu e wǔvɛ́ énɛ́ ná bɛ́ é gbɔn? Ð’ayi nǔ e Jexóva ɖɔ nú togun tɔn ɖɔ é ní wa hwenu e è tɔ́n ahwan Babilɔ́nu hwexónu tɔn ɔ é wú, é ɖɔ: “Togun ce e mi, mi yi xɔ mitɔn lɛ́ mɛ, mi dɔn hɔn mitɔn sú dó ta, bo nɔ fínɛ́ kpɛɖé, bónú xomɛsin Mawu tɔn ní wá yi.” (Eza. 26:20) Vlafo é ná byɔ́ ɖɔ mǐ lɔmɔ̌ ní xwedó wěɖexámɛ ɖokpó ɔ lɛ́ ɖo wǔvɛ́ ɖaxó ɔ hwenu. w23.07 6-7 akpá. 14-16

Nɔ xlɛ́ gbɔn nǔwalɔ towe lɛ́ gblamɛ ɖɔ a nɔ nɔ jlɛ̌ jí. Kan nǔ élɔ́ lɛ́ byɔ́ hwiɖée: ‘Mɛ lɛ́ ka nɔ mɔ ɖɔ un nɔ nɔ jlɛ̌ jí, nɔ yá wǔ jó xó dó, bo kún ka nɔ lɛ́ hɛn nǔ gángángán ó a? Abǐ, yě nɔ mɔ ɖɔ un nɔ hɛn nǔ gángángán, nɔ syɛ́n nukún, kabǐ nɔ syɛ́n ta wɛ a? Nú é byɔ́ ɖó mɔ̌ ɔ, un nɔ ɖótó mɛ ɖěvo lɛ́, lobo nɔ lɛ́ yí gbe nú linlin yětɔn lɛ́ a?’ Lě do mǐ nɔ nɔ jlɛ̌ jí sɔ é ɔ, mɔ̌ do wɛ mǐ nɔ xwedó kpɔ́ndéwú Jexóva kpó Jezu kpó tɔn sɔ. Jlɛ̌jíninɔ nɔ byɔ́ ɖɔ mǐ ní nɔ húzú sɔgbe xá hǔzúhúzú e nɔ wá xwetɔ́n ɖo gbɛzán mǐtɔn mɛ lɛ́ é. Hǔzúhúzú énɛ́ lɛ́ sixú dɔn tagba e mǐ ma ɖó nukún tɔn gbeɖé ǎ lɛ́ é wá. Ði kpɔ́ndéwú ɔ, mǐ sixú bɛ́ azɔn syɛ́nsyɛ́n ɖé ɖo ajijimɛ. Alǒ akwɛ́yózo sixú hɛn mǐ ajijimɛ, kabǐ hǔzúhúzú sixú tíin ɖo toxóɖiɖɔ linu ɖo fí e mǐ nɔ nɔ é, bɔ énɛ́ sixú d’avaja gbɛzán mǐtɔn mɛ bǐ mlɛ́mlɛ́. (Nǔt. 9:11, nwt) Ényí hǔzúhúzú ɖé tlɛ xwetɔ́n ɖo sinsɛnzɔ́ mǐtɔn kpáxwé ɔ, é sixú vɛ́ wǔ nú mǐ. Mǐ sixú bló hǔzúhúzú lɛ́ bɔ é ná kpa mǐ, nú mǐ nɔ wa nǔ ɛnɛ élɔ́ lɛ́ ɔ nɛ́: (1) nɔ yí gbe nú hǔzúhúzú ɔ, (2) nɔ kpɔ́n sɔgúdo sɛ́dó, (3) nɔ sɔ́ ayi ɖó nǔ ɖagbe lɛ́ jí, (4) nɔ wa nǔɖé lɛ́ dó d’alɔ mɛ ɖěvo lɛ́. w23.07 21-22 akpá. 7-8

Mɛ wínnyáwínnyá wɛ gbeyíɖɔ Daniyɛ́li nyí hwenu e Babilɔ́nunu lɛ́ wlí ahwankannumɔ tɔn yi Babilɔ́nu é; Babilɔ́nu ɔ, toxo ɖé wɛ bo lín dó Jeluzalɛ́mu e nyí jɔtɛn tɔn é tawun. Mɛ wínnyáwínnyá wɛ Daniyɛ́li nyí có, azaglɔ́gán Babilɔ́nu tɔn lɛ́ ɖ’ayi wǔ tɔn. Yě mɔ “nǔ e ɖo wěxo ɔ,” énɛ́ wɛ nyí ɖɔ Daniyɛ́li ‘ɖó blɔ̌ ɖěbǔ ɖo wǔ ǎ; ninɔmɛ tɔn nyɔ́ kpɔ́n,’ é nyɔ́ ɖɛkpɛ, bo lɛ́ gosín xwédo nukúnɖéjí mɛ. (1 Sam. 16:7) Hwɛjijɔ énɛ́ lɛ́ wú wɛ Babilɔ́nunu lɛ́ kplɔ́n azɔ̌ ɛ, bónú é ná húzú mɛ nukúnɖéjí ɖo hɔnmɛ axɔ́sú ɔ tɔn. (Dan. 1:3, 4, 6) Jexóva yí wǎn nú Daniyɛ́li, ɖó mɛ alɔkpa e dɔ̌nkpɛvú énɛ́ wá gbeta ɔ kɔn bo ná nyí é wútu. Nǔgbó ɔ, hwenu e Jexóva ɖɔ ɖɔ Daniyɛ́li cí Nɔwée kpó Jɔbu kpó ɖɔhun é ɔ, é cí ɖɔ xwe 20 mɔ̌ ɖó wɛ Daniyɛ́li ɖe ɖɔhun. Jexóva mɔ Daniyɛ́li dó mɔ nǔjlɔ́jlɔ́watɔ́ súnnu énɛ́ lɛ́ e sɛn ɛ kpó gbejíninɔ kpó nú xwe mɔ̌kpán lɛ́ é ɖɔhun. (Bǐb. 5:32; 6:9, 10; Jɔb. 42:16, 17; Ezek. 14:14) Gɔ́ ná ɔ, ɖo gbɛzán Daniyɛ́li tɔn bǐ mɛ ɔ, Jexóva yí wǎn n’i.—Dan. 10:11, 19. w23.08 2 akpá. 1-2

Ényí a ɖo linlin wɛ bo ná xɔ xwé ɖé ɔ, a ná ba ná zɔn afɔ te bo gbéjé gǒflɛ́mɛ e kunkplá xwé e xɔ gbé a ja é lɛ́ é bǐ kpɔ́n. Mǐ sixú wa nǔ ɖokpó ɔ, hwenu e mǐ ɖo Biblu xa wɛ, bo lɛ́ ɖo kplɔ́nkplɔ́n wɛ é. Ényí a nɔ zɔn kplakpla jí dó xa Biblu ɔ kpowun ɔ, nǔgbó bǐbɛ́mɛ tɔn lɛ́ kɛ́ɖɛ́ jɛ́n a sixú kplɔ́n, énɛ́ wɛ nyí “xó mímɛ́ Mawu tɔn lɛ́ sín nǔ dodónú tɔn lɛ́.” (Ebl. 5:12) Amɔ̌, lěe é byɔ́ ɖɔ è ní “byɔ́” xɔ ɖé mɛ, bá mɔ tɛn dó tuun gǒflɛ́mɛ tɔn lɛ́ hú gǎn gbɔn é ɔ, é byɔ́ ɖɔ a ní xwe sɔ dó kplɔ́n Biblu bá mɔ tɛn dó mɔ nǔ jɛ mɛ bǐ dégbédégbé. Ali ɖagbe hú gǎn e nu è sixú kplɔ́n Biblu ɖe é ɖokpó wɛ nyí ɖɔ è ní kpɔ́n lěe akpáxwé vovo wɛn e ɖ’é mɛ é tɔn lɛ́ xo nǔ dó akpa ɖokpó ɔ mɛ gbɔn é. Tɛ́n kpɔ́n bo mɔ nǔ jɛ nǔgbó ɖěɖěe a ɖi nǔ ná lɛ́ é mɛ, bo lɛ́ tɛ́n kpɔ́n bo tuun nǔ e wú a ɖi nǔ nú nǔ énɛ́ lɛ́ é. Bo ná dó mɔ nǔ jɛ Xó Mawu tɔn mɛ bǐ hlɛ́nhlɛ́n ɔ, mǐ ɖó ná kplɔ́n nǔgbó Biblu tɔn e gɔ́ngɔ́n lɛ́ é. Mɛsɛ́dó Pɔ́lu byɔ́ klisánwun hǎtɔ́ tɔn lɛ́ ɖɔ yě ní kplɔ́n Xó Mawu tɔn kpó kanɖódónǔwú kpó, bá mɔ tɛn dó “mɔ nukúnnú jɛ lěe nǔgbó ɔ gbló, ɖi ga, yi jǐ, bo gɔ́ngɔ́n sɔ é wú bǐ mlɛ́mlɛ́.” Énɛ́ ɔ, yě ná “dó ɖɔ do, bo lí dǒ” ɖo nǔɖiɖi mɛ d’é jí. (Efɛ́. 3:14-19.) É byɔ́ ɖɔ mǐ lɔmɔ̌ ní nɔ wa nǔ ɖokpó ɔ. w23.10 18 akpá. 1-3

Biblu lɛ́ ɖɔ mɛ gěgé ɖěvo lɛ́ xó, bɔ yě ɖó suúlu. Aniwú a ma ka ná bló tuto, bo gbéjé kpɔ́ndéwú mɔ̌hun lɛ́ kpɔ́n ǎ? Ði kpɔ́ndéwú ɔ, Davídi kpo ɖo wǐnnyáwínnyá mɛ cóbɔ è sɔ́ ɛ bɔ é ná nyí axɔ́sú, amɔ̌, é ɖó ná nɔ te nú xwe mɔ̌kpán cóbó jɛ axɔ́sú ɖu jí. Sinmɛnyɔ́ɔ kpó Ana kpó sɛn Jexóva kpó gbejíninɔ kpó, hwenu e yě ɖo te kpɔ́n Mɛsíya e sín akpá è dó é é. (Luk. 2:25, 36-38) Ée a ná ɖo tan mɔ̌hun lɛ́ gbéjé kpɔ́n wɛ é ɔ, ba xósin nú nǔkanbyɔ́ élɔ́ lɛ́: Étɛ́ ka sixú ko d’alɔ mɛ énɛ́ bɔ é ɖó suúlu? Le tɛ́ é ka mɔ, ɖó suúlu e é ɖó é wú? Nɛ̌ un ka sixú xwedó kpɔ́ndéwú tɔn gbɔn? Nǔ kplɔ́nkplɔ́n dó mɛ ɖěɖěe ma ɖó suúlu ǎ lɛ́ é wú lɔ sixú hɛn le wá nú we. (1 Sam. 13:8-14) A sixú nɔ kan nǔ élɔ́ lɛ́ byɔ́ hwiɖée: ‘Étɛ́ ka sixú ko zɔ́n bɔ yě ma ɖó suúlu ǎ? Awě tɛ́ lɛ́ ka xo yě, ɖó suúlu e yě ma ɖó ǎ é wú?’ w23.08 25 akpá. 15

Mɛsɛ́dó Piyɛ́ɛ nɔ gbejí; é lɔn bónú nǔ ɖěbǔ sú ali dó è bónú é gɔn Jezu xwedó ǎ. É ɖe gbejíninɔ tɔn xlɛ́ ɖo ninɔmɛ ɖé mɛ hwenu e Jezu ɖɔ nǔ e ahwanvú tɔn lɛ́ ma mɔ nukúnnú jɛ mɛ ǎ é ɖé é. (Jaan 6:68) Nǔ ɖo ganjí ɔ, yě ná nɔ te bɔ é ná tínmɛ nǔ e ɖɔ wɛ é ɖe é, alǒ yě ná ba tínmɛ nǔ e ɖɔ wɛ é ɖe é tɔn; mɛ gěgé ka wa mɔ̌ ǎ, loɔ, yě ɖó Jezu xwixwedó te. Piyɛ́ɛ ka wa mɔ̌ ǎ. É tuun ɖɔ Jezu ɖokpónɔ sín nu mɛ wɛ “xó e nɔ ná gbɛ mavɔmavɔ mɛ é” nɔ tɔ́n sín.Jezu tuun ɖɔ Piyɛ́ɛ kpó mɛsɛ́dó ɖě lɛ́ kpó ná jó émí dó. É ɖo mɔ̌ có, Jezu ɖɔ nú Piyɛ́ɛ ɖɔ émí kú d’é jí ɖɔ é ná lɛ́ kɔ wá, lobo ná kpo ɖo gbejí. (Luk. 22:31, 32) Jezu tuun nǔ élɔ́: “Ayi . . . ɖó jlǒ syɛ́nsyɛ́n, amɔ̌, agbaza ɖó gǎn ɖé ǎ.” (Mak. 14:38) Énɛ́ wú ɔ, é ná bo tlɛ nyí hwenu e Piyɛ́ɛ gbɛ́ ɖɔ émí kún tuun Jezu ó é ɔ, Jezu jó gbe dó mɛsɛ́dó tɔn wú ǎ. Ée Jezu fɔ́n sín kú gúdo é ɔ, é sɔ́ éɖée xlɛ́ Piyɛ́ɛ, bɔ é ɖo wɛn ɖɔ, Piyɛ́ɛ ɖo éɖokpónɔ hwe ɔ nu. (Mak. 16:7; Luk. 24:34; 1 Kɔ. 15:5) Dǒ nukún lěe énɛ́ ná ko dó wǔsyɛ́n lanmɛ nú Piyɛ́ɛ e wǔ kú tawun é sɔ é mɛ kpɔ́n! w23.09 22 akpá. 9-10

Mawu sɔ́ mɛ ɖěɖěe ɖi nǔ n’i lɛ́ é sín hwɛ lɛ́ kɛ yě alǒ cyɔ́n nǔ dó hwɛ yětɔn lɛ́. É sɔ́ hwɛ yětɔn lɛ́ kɛ yě bǐ mlɛ́mlɛ́, bo sɔ́ nɔ xa dó kɔ nú yě ǎ. (Ðɛh. 32:1, 2) É nɔ kpɔ́n yě dó mɔ mɛ e wú è ma nɔ mɔ nǔɖé ɖɔ dó ǎ lɛ́ é kpó nǔjlɔ́jlɔ́watɔ́ kpó, ɖó nǔɖiɖi yětɔn wútu. Nǔgbó wɛ ɖɔ Mawu mɔ Ablaxámu, Davídi kpó mɛsɛntɔ́ tɔn gbejínɔtɔ́ ɖěvo lɛ́ kpó dó mɔ nǔjlɔ́jlɔ́watɔ́ có, hwɛhutɔ́ nyí wɛ jɛ́n yě kpo ɖe. Amɔ̌, ɖó nǔɖiɖi yětɔn wútu ɔ, Mawu nɔ kpɔ́n yě dó mɔ mɛ e wú è ma nɔ mɔ nǔɖé ɖɔ dó ǎ é, ɖo tají ɔ, ényí é sɔ́ yě jlɛ́ dó mɛ e ma nɔ sɛn ɛ ǎ lɛ́ é wú ɔ nɛ́. (Efɛ́. 2:12) Lěe mɛsɛ́dó Pɔ́lu xlɛ́ nyi wɛn ɖo wěmasɛ́dómɛ tɔn mɛ gbɔn é ɔ, nǔɖiɖi ɖo tají cóbɔ è ná vɛ́ xá Mawu. Mɔ̌ wɛ é nyí gbɔn ɖo ninɔmɛ Ablaxámu kpó Davídi kpó tɔn mɛ, mɔ̌ wɛ é nɔ lɛ́ nyí gbɔn ɖo ninɔmɛ mǐ lɔ tɔn mɛ. w23.12 3 akpá. 6-7

Égbé ɔ, klisánwun lɛ́ bǐ wɛ è jɔ wǔ, bɔ yě ná sá vɔ̌ nú Jexóva gbɔn hwenu yětɔn, hlɔ̌nhlɔ́n yětɔn kpó nǔɖókan yětɔn lɛ́ kpó zínzán dó nɔ gǔdo nú nukɔnyiyi Axɔ́súɖuto Mawu tɔn tɔn gblamɛ. Mǐ sixú xlɛ́ ɖɔ wǔ e Jexóva jɔ mǐ bɔ mǐ nɔ sɛn ɛ é xɔ akwɛ́ nú mǐ, gbɔn nǔ ɖagbe hú gǎn e mǐ ɖó lɛ́ é níná ɛ gblamɛ. Mɛsɛ́dó Pɔ́lu tɛ ɖɛ̌ akpáxwé mawusinsɛn mǐtɔn tɔn vovo e mǐ ma ɖó ná dó vɛ̌ ná gbeɖé ǎ lɛ́ é jí. (Ebl. 10:22-25) Nǔ élɔ́ lɛ́ ɖo nǔ énɛ́ lɛ́ mɛ: Ðɛ xixo sɛ́dó Jexóva, mawuxó ɖiɖɔ, kplé lɛ́ yiyi kpó wǔsyɛ́n dídó lanmɛ nú mǐɖée lɛ́ “hú gǎn, din e [mǐ] mɔ ɖɔ azǎn [Jexóva tɔn] ɖo sisɛkpɔ́ wɛ é” kpó. Ée wěma Nǔɖexlɛ́mɛ tɔn xwe vivɔnu é ɔ, wɛnsagun Jexóva tɔn ɖɔ xó élɔ́ azɔn we: “Sɛn Mawu!” (Nǔɖe. 19:10; 22:9) Mi nú mǐ ní ma wɔn nǔgbó gbigbɔ tɔn e gɔ́ngɔ́n, bo kunkplá tɛ́npli ɖaxó gbigbɔ tɔn Jexóva tɔn é kpó wǔjɔmɛ bǔnɔ e mǐ ɖó, bo ná sɛn Mawu ɖaxó mǐtɔn é kpó gbeɖé ó! w23.10 29 akpá. 17-18

Mǐ bǐ wɛ ba bo ná nɔ “yí wǎn nú mǐɖée lɛ́.” Amɔ̌, é ɖo tají tawun ɖɔ mǐ ní flín ɖɔ Jezu gba akpá nú mǐ ɖɔ “wǎnyíyí mɛ gěgé tɔn ná fá.” (Mat. 24:12) É nyí ɖiɖɔ wɛ Jezu ɖe ɖɔ ahwanvú émítɔn lɛ́ gěgé ná gɔn wǎn yí nú yěɖée lɛ́ ǎ. Amɔ̌, mǐ ɖó ná ɖo acéjí bɔ wǎnyíyí e mɛ e lɛ́ lɛ̌ dó mǐ lɛ́ é ma ɖó ǎ é ná wa nǔ dó mǐ wú ǎ. Énɛ́ ní ɖo ayi mɛ nú mǐ bónú mǐ ní ba xósin nú nǔkanbyɔ́ tají élɔ́: Étɛ́ ka ná d’alɔ mǐ bɔ mǐ ná tuun nú wǎnyíyí e mǐ ɖó nú nɔví mǐtɔn lɛ́ é gɔ́ngɔ́n, alǒ gbɔ? Nǔ e sixú d’alɔ mǐ é ɖokpó wɛ nyí ɖɔ mǐ ní gbéjé lěe mǐ nɔ wa nǔ gbɔn ɖo ninɔmɛ ɖé lɛ́ mɛ é kpɔ́n. (2 Kɔ. 8:8) Mɛsɛ́dó Piyɛ́ɛ ɖɔ xó dó ninɔmɛ énɛ́ lɛ́ ɖokpó wú, é ɖɔ: “Tají bǐ ɔ, mi ɖó wǎnyíyí e gɔ́ngɔ́n é nú miɖée lɛ́, ɖó wǎnyíyí nɔ cyɔ́n nǔ dó hwɛ wɔ̌búwɔ́bú.” (1 Pi. 4:8) Hǔn, gǎnmaɖó kpó nǔwanyido kpó mɛ ɖěvo lɛ́ tɔn sixú tɛ́n wǎnyíyí mǐtɔn kpɔ́n. w23.11 10-11 akpá. 12-13

Ényí mǐ nɔ ɖe wǎnyíyí xlɛ́ mɛɖé lɛ́ ɖo agun ɔ mɛ, bo ma ka nɔ ɖe wǎnyíyí xlɛ́ mɛ ɖěvo lɛ́ ǎ ɔ, mǐ sixú ɖɔ ɖɔ mǐ ɖo tónú se nú gbe e Jezu ɖe nú mǐ ɖɔ mǐ ní yí wǎn nú mǐɖée lɛ́ é wɛ ǎ. É ɖo wɛn ɖɔ, mǐ sixú mɔ ɖɔ mǐ kpó mɛɖé lɛ́ kpó vɛ́ tawun hú mɛ ɖěvo lɛ́, lěe é nyí gbɔn nú Jezu é ɖɔhun. (Jaan 13:23; 20:2) Amɔ̌, mɛsɛ́dó Piyɛ́ɛ flín mǐ ɖɔ mǐ ɖó ná tɛ́n kpɔ́n bo yí wǎn nú “kplékplé nɔví lɛ́ tɔn,” énɛ́ wɛ nyí, mǐ ná tɛ́ dó yě wú xwédo ɖé ɖɔhun. (1 Pi. 2:17) Piyɛ́ɛ byɔ́ mǐ ɖɔ mǐ ní yí “wǎn ɖaxó nú mɛ sín ayi mɛ.” (1 Pi. 1:22) Ðo ninɔmɛ élɔ́ mɛ ɔ, wǎnyíyí “ɖaxó” ɔ sín tínmɛ wɛ nyí è ní yí wǎn nú mɛɖé, ényí é ná bo tlɛ vɛ́ wǔ bɔ è ná ɖe wǎnyíyí xlɛ́ ɛ ɔ nɛ́. Ði kpɔ́ndéwú ɔ, ényí nɔví ɖé wa nǔ nyi do nú mǐ, alǒ dó xomɛsin nú mǐ ɔ ka lo? Ðo bǐbɛ́mɛ ɔ, mǐ sixú ba ná ba hlɔn, bo ná ba ná ɖe wǎnyíyí xlɛ́ ɛ ǎ. Amɔ̌, Jezu kplɔ́n Piyɛ́ɛ ɖɔ Mawu kún yí wǎn nú hlɔnbiba ó. (Jaan 18:10, 11) Piyɛ́ɛ wlán ɖɔ: “Mi ma sɔ́ nyanya dó sú nyanya xɔ́ ná ó, mi ma sɔ́ zun dó sú zun xɔ́ ná ó. É nyɔ́ wa hǔn, mi nɔ xo nyɔ̌ná ɖɛ dó sú axɔ́ ná.” (1 Pi. 3:9) Tɛ́n kpɔ́n bónú wǎnyíyí ɖaxó ní sísɛ́ we nú a nɔ nyɔ́ xomɛ, bo nɔ lɛ́ ké ya nú mɛ. w23.09 28-29 akpá. 9-11

Lěe vǐ ɖé nɔ yá wǔ su gbɔn é nɔ jí wǔ nú mǐ tawun. É cí ɖɔ vǐ lɛ́ nɔ su ma dó gǎn ɖě ɖɔhun. Amɔ̌, è sixú su ɖo gbigbɔ lixo gǎndídó mɛvo ǎ. (1 Kɔ. 13:11; Ebl. 6:1) Bo ná dó kpé énɛ́ wú ɔ, mǐ ɖó ná zun xɔ́ntɔn vívɛ́ xá Jexóva. Mǐ lɛ́ ɖó hudó gbigbɔ mímɛ́ tɔn tɔn b’ɛ ná d’alɔ mǐ bɔ mǐ ná tɛ́n kpɔ́n bo ɖó jijɔ ɖěɖěe nɔ nyɔ́ nukún tɔn mɛ lɛ́ é, kplɔ́n nǔ tawun tawun e ná nyɔ́ zán lɛ́ é, lobo lɛ́ sɔ́ nǔ nú mǐɖée nú azɔ̌ sɔgúdo tɔn lɛ́. (Nǔx. 1:5) Jexóva dá súnnu kpó nyɔ̌nu kpó. (Bǐb. 1:27) É ɖo wɛn ɖɔ, è mɔ súnnu kpó nyɔ̌nu kpó ɖo te ɔ, vogbingbɔn nɔ ɖo yě tɛ́ntin, amɔ̌, yě lɛ́ gbɔn vo nú yěɖée lɛ́ ɖo ali ɖěvo lɛ́ nu. Ði kpɔ́ndéwú ɔ, Jexóva dá súnnu kpó nyɔ̌nu kpó bónú yě mɛ ɖokpó ɖokpó ná w’azɔ̌ tawun tawun ɖé lɛ́, énɛ́ wú ɔ, yě ɖó hudó jijɔ kpó nǔwúkpíkpé kpó ɖé lɛ́ tɔn bɔ é ná d’alɔ yě bónú yě ná w’azɔ̌ yětɔn yětɔn.—Bǐb. 2:18. w23.12 18 akpá. 1-2

Jezu ka ba ɖɔ mɛ ɖěvo lɛ́ ní nɔ zán Tɔ́ émítɔn sín nyǐkɔ ɖésú ɔ a? Ganjí. Sinsɛngán ɖé lɛ́ sixú lin ɖɔ mɛmasí núwiwa wɛ é ná nyí ɖɔ è ní ylɔ́ nyǐkɔ Mawu tɔn, amɔ̌, Jezu lɔn gbeɖé bónú nǔkplɔ́nmɛ énɛ́ lɛ́ e ma jínjɔ́n Mawuxówéma ɔ jí ǎ é sú ali d’è, bónú é gɔn yɛ̌yi wlí nú Tɔ́ tɔn sín nyǐkɔ ǎ. Lin tamɛ dó hwenu e Jezu gbɔ azɔn nú nya e jí awǒvi ɖe ɖo Jelazáanu lɛ́ sín xá mɛ é jí. Xɛsi jɛ mɛ lɛ́ jí, bɔ yě sa vo nú Jezu ɖɔ é ní gosín fínɛ́, énɛ́ wú ɔ, Jezu gosín xá énɛ́ mɛ. (Mak. 5:16, 17) Amɔ̌, Jezu ba ɖɔ è ní tuun nyǐkɔ Jexóva tɔn ɖo fínɛ́. Énɛ́ wú ɔ, é sɔ́ azɔ̌ d’así nú nya e é gbɔ azɔn ná é ɖɔ é ní yi ɖɔ nǔ e Jexóva wa n’i é nú mɛ lɛ́, é ní ma nyí nǔ e émí Jezu wa n’i é ó. Mak. 5:19) Nǔ ɖokpó ɔ wɛ é nɔ lɛ́ ba ɖo égbé, énɛ́ wɛ nyí ɖɔ, è ná bló bɔ mɛ lɛ́ ná tuun Tɔ́ tɔn sín nyǐkɔ, gbɔn gbɛ ɔ bǐ mɛ! (Mat. 24:14; 28:20) Ényí mǐ wa azɔ̌ e nyí mǐtɔn é ɔ, mǐ nɔ dó xomɛhunhun nú Axɔ́sú mǐtɔn, Jezu. w24.02 10 akpá. 10

Nyɔ̌ná ɖaxó wɛ é nyí nú mǐ ɖɔ mǐ ɖo tutoblónúnǔ Jexóva tɔn mɛ ɖo azǎn gǔdo gúdo tɔn élɔ́ lɛ́ e vɛ́ wǔ é mɛ. Ninɔmɛ gbɛ élɔ́ tɔn lɛ́ fɔ́n bo ɖo nylǎnylá d’é jí wɛ, amɔ̌, Jexóva ná mǐdɛɛ lɛ́ xwédo gbigbɔ tɔn e ɖo bǔ é ɖé. (Ðɛh. 133:1) É nɔ d’alɔ mǐ bónú mǐ ná ɖó gbɛzán xwédo tɔn awǎjijɛnɔ ɖé. (Efɛ́. 5:33–6:1) Gɔ́ ná ɔ, é nɔ ná mǐ nǔnywɛ́ e sín hudó mǐ ɖó bo ná ɖí xwi xá adohu adohu bo lɛ́ ɖó awǎjijɛ é. É ɖo mɔ̌ có, mǐ ɖó ná w’azɔ̌ syɛ́nsyɛ́n bo ná kpo ɖo Jexóva sɛn wɛ kpó gbejíninɔ kpó. Aniwú? Ðó nǔwanyido mɛ ɖěvo lɛ́ tɔn nɔ dó xomɛsin nú mǐ hweɖélɛ́nu. Awakanmɛ sixú lɛ́ kú mǐ hwenu e mǐ wa nǔɖé lɛ́ nyi do é, tají ɔ, ényí mǐ nɔ ɖo nǔ ɖokpó ɔ lɛ́ wa nyi do wɛ gbɛmɛ ɔ nɛ́. Mǐ ɖó ná syɛ́nlǐn bo kpo ɖo Jexóva sɛn wɛ (1) hwenu e nǔɖitɔ́ hǎtɔ́ ɖé wa nǔ nyi do nú mǐ é, (2) hwenu e mɛ e mǐ da é dó awakanmɛ kú nú mǐ é, kpó (3) hwenu e awakanmɛ kú mǐ dó mǐɖésúnɔ wú é kpó. w24.03 14 akpá. 1-2

Sín hweɖénu jɛ hweɖénu ɔ, a ná nɔ se nǔ ɖěɖěe nɔví ɖěɖěe ko wá gbeta ɔ kɔn, bo vlɔ́n kan nú sinsɛnzɔ́ mímɛ́ yětɔn lɛ́ é mɔ kpɔ́n lɛ́ é. Vlafo, yě yi Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́, alǒ sɛ tɛn yi fí e hudó sukpɔ́ ɖe é. Ényí ali nǔ énɛ́ lɛ́ ɖě tɔn hun nú we hǔn, ma nú é gbɔ wǔ we gbeɖé ó. Akpakpa nɔ sɔ́ togun Jexóva tɔn bónú é ná vlɔ́n kan nú sinsɛnzɔ́ tɔn. (Mɛ. 16:9) Ényí a ma kpé wú bá wa mɔ̌ din ǎ ɔ ka lo? Ma lin ɖɔ émí hwedó nǔ wú ó. Nǔ e ɖo tají é wɛ nyí ɖɔ, a ní kpo ɖo didɛ wɛ. (Mat. 10:22) Flín ɖɔ, ényí a wa nǔ e wú a kpé é bǐ ɖo ninɔmɛ towe mɛ ɔ, xomɛ nɔ hun Jexóva dó wǔ we tawun. Ali tají e nu a sixú nɔ xwedó Jezu ɖo batɛ́mu towe gúdo ɖe é ɖokpó nɛ́.—Ðɛh. 26:1. w24.03 10 akpá. 11

Tɔ́ mǐtɔn jǐxwé tɔn ɔ d’akpá ɖɔ ényí hwɛ mǐtɔn lɛ́ vɛ́ nú mǐ ɔ, émí ná sɔ́ hwɛ kɛ mǐ. (Ðɛh. 86:5) Énɛ́ wú ɔ, ényí hwɛ e mǐ hu lɛ́ é vɛ́ nú mǐ nǔgbó nǔgbó ɔ, mǐ sixú ɖeji ɖɔ nǔ e Jexóva ɖɔ é ɔ, nǔgbó wɛ, é wɛ nyí ɖɔ é ko sɔ́ hwɛ mǐtɔn lɛ́ kɛ mǐ. Flín ɖɔ Jexóva kún nɔ hɛn nǔ gángángán ó. É nɔ ɖó nukún nǔ ɖo mǐ sí zɛ nǔ e wú mǐ sixú kpé bo wa é wú gbeɖé ǎ. Ényí mǐ vɛ́ ko ɖo nǔ ɖagbe hú gǎn e wú mǐ kpé é ná ɛ wɛ kpowun ɔ, nǔ mǐtɔn nɔ nyɔ́ nukún tɔn mɛ. Gɔ́ ná ɔ, nɔ lin tamɛ dó mɛ ɖěɖěe xó Biblu ɖɔ bɔ yě sɛn Jexóva kpó lǐndɔ̌n yětɔn bǐ kpó lɛ́ é sín kpɔ́ndéwú jí. Lin tamɛ dó kpɔ́ndéwú mɛsɛ́dó Pɔ́lu tɔn jí. É wa sinsɛnzɔ́ kpó kanɖódónǔwú kpó nú xwe mɔ̌kpán, zɔn ali nú kilomɛ́tlu afatɔ́n mɔ̌kpán hɛn yi tomɛ, bo lɛ́ ɖó agun gěgé ayǐ. Amɔ̌, ée ninɔmɛ lɛ́ ɖó dogbó nú alɔ e é nɔ ɖó ɖo mawuxóɖiɖɔzɔ́ ɔ mɛ é ɔ, énɛ́ xlɛ́ ɖɔ nǔ tɔn kún sɔ́ nyɔ́ Mawu nukúnmɛ ó wɛ a? Éǒ. É kpo ɖo nǔ e wú é kpé é wa wɛ bɔ Jexóva kɔn nyɔ̌ná dó jǐ tɔn. (Mɛ. 28:30, 31) Ðo ali ɖokpó ɔ nu ɔ, nǔ e mǐ sixú ná Jexóva é sixú gbɔn vo sín hweɖénu jɛ hweɖénu. Amɔ̌, nǔ e nɔ ɖu ayi mɛ n’i é wɛ nyí nǔ e wú mǐ wa nǔ ɔ é. w24.03 27 akpá. 7, 9

Gbɔn ɖɛ e Jezu ɖésúnɔ xo sɛ́dó Jexóva lɛ́ é gblamɛ ɔ, é sɔ́ kpɔ́ndéwú ɖé ɖ’ayǐ nú ahwanvú tɔn lɛ́ bɔ yě ná xwedó. Jezu nɔ xo ɖɛ hwɛhwɛ ɖo sinsɛnzɔ́ tɔn hwenu. É ɖó ná ba hwenu dó xo ɖɛ, ɖó hwɛhwɛ ɔ, alɔnu tɔn nɔ ján tawun, bɔ mɛ gěgé nɔ lɛ́vɔ́ lɛ́ lɛ̌ dó è. (Mak. 6:31, 45, 46) É nɔ fɔ́n zǎn, mɔ̌ mɛ ɔ, é sixú mɔ hwenu bá dó xo ɖɛ éɖokpónɔ. É hwe bǐ ɔ, ɖo ninɔmɛ ɖokpó mɛ ɔ, é xo ɖɛ nú zǎn ɖokpó blěbú cóbó wá gbeta tají ɖé kɔn. (Luk. 6:12, 13) Gɔ́ ná ɔ, ɖo zǎn e jɛ nukɔn nú kú Jezu tɔn é mɛ ɔ, é xo ɖɛ azɔn mɔ̌kpán bo sɔ́ ayi tɔn bǐ ɖó lěe é ná fó azɔ̌ e wú é wá ayǐkúngban jí é sín akpáxwé e vɛ́ wǔ hú gǎn bǐ é gbɔn é jí. (Mat. 26:39, 42, 44) Kpɔ́ndéwú Jezu tɔn kplɔ́n mǐ ɖɔ alɔnu mǐtɔn ná bo tlɛ nɔ ján gbɔn ɖěbǔ ɔ, mǐ ɖó ná nɔ ba hwenu dó xo ɖɛ. Jezu ɖɔhun ɔ, é sixú nɔ byɔ́ ɖɔ mǐ ní nɔ ɖe hwenu ɖó vo dó xo ɖɛ; mǐ sixú nɔ fɔ́n zǎn bo nɔ xo ɖɛ, alǒ nɔ wa mɔ̌ ɖo gbadanu bǐ. Ényí mǐ nɔ wa mɔ̌ hǔn, xlɛ́xlɛ́ Jexóva wɛ mǐ ɖe ɖɔ nǔníná bǔnɔ énɛ́ xɔ akwɛ́ ɖo nukún mǐtɔn mɛ nɛ́. w23.05 3 akpá. 4-5

Ð’ayi nukɛgbe “è kɔn . . . dó” ɔ wú ɖo tɛ́si e ɖo aga é mɛ. Xókwíntínmɛwégbó ɖé tínmɛ gbɔn lě: “É sa wá mǐ gɔ́n ayǐsun ɖɔhun.” Nǔjlɛ́dónǔwú agbɔ̌nnɔ e tɛ ɖě lě do Jexóva yí wǎn nú mɛ e gbigbɔ mímɛ́ sɔ́ lɛ́ é sɔ é jí é ɖé nɛ́! Mɛ ɖěɖěe gbigbɔ mímɛ́ sɔ́ lɛ́ é tuun ɖɔ ‘Mawu yí wǎn nú’ émí. (Ju. 1) Mɛsɛ́dó Jaan ɖe lěe nǔ nɔ cí nú yě é xlɛ́ hwenu e é wlán xó élɔ́ é: “Mi kpɔ́n wǎnyíyí alɔkpa e Tɔ́ ɔ ɖe xlɛ́ mǐ, bónú è ní dó ylɔ́ mǐ ɖɔ vǐ Mawu tɔn lɛ́ é!” (1 Jaan 3:1) Mɛ e gbigbɔ mímɛ́ sɔ́ lɛ́ é kɛ́ɖɛ́ wɛ Jexóva yí wǎn ná a? Éǒ, mǐ mɛ bǐ wɛ Jexóva ko ɖe wǎnyíyí tɔn xlɛ́. Étɛ́ ka nyí nǔ ɖaxó e ɖe wǎnyíyí Jexóva tɔn xlɛ́ é? Gbɛxixɔ ɔ wɛ; é wɛ nyí wǎnyíyí núwíwa ɖaxó hú gǎn e è wa kpɔ́n ɖo wɛ̌kɛ́ ɔ mɛ é!—Jaan 3:16; Hlɔ̌. 5:8. w24.01 28 akpá. 9-10

Wěmafɔ e ɖo aga é xlɛ́ ali e nu Davídi ɖu ɖo xɛsi tɔn lɛ́ jí ɖe é. Gbɛ tɔn ɖo axɔ́ nu có, é lin tamɛ dó nǔ e Jexóva ná wá wa n’i lɛ́ é jí. Davídi tuun ɖɔ Jexóva ná hwlɛ́n émí ɖo hwetɔnnu. È ná ɖɔ ɔ, Jexóva ko ɖɔ ɖɔ Davídi wɛ ná nyí axɔ́sú e ná bɔ dó axɔ́sú e ɖo acɛ kpa wɛ ɖo Izlayɛ́li hwenɛ́nu é wú é. (1 Sam. 16:1, 13) Nú Davídi ɔ, nǔ ɖěbǔ e sín akpá Jexóva dó é nɔ jɛnu dandan. Akpá tɛ́ Jexóva ka dó nú we? Mǐ nɔ ɖó nukún ɖɔ Jexóva ní ɖe mǐ sín wǔvɛ́ mǐtɔn lɛ́ bǐ mɛ ǎ. É ɖo mɔ̌ có, ényí mǐ ná bo tlɛ ɖo mɛtɛ́nkpɔ́n ɖěbǔ mɛ gbɔn wɛ ɖo gbɛ élɔ́ mɛ ɔ, Jexóva ná ɖe yě bǐ síin ɖo gbɛ yɔ̌yɔ́ e ja é mɛ. (Eza. 25:7-9) Agbɔ̌n ɖo Gbɛɖótɔ́ mǐtɔn wú sɔmɔ̌ bɔ é ná fɔ́n mɛkúkú lɛ́, gbɔ azɔn nú mǐ, lobo sú gbeklánxámɛtɔ́ mǐtɔn lɛ́ bǐ sín kún dó.—1 Jaan 4:4. w24.01 6 akpá. 12-13

Nɔ lin tamɛ dó zě e a zé hwiɖée jó nú Jexóva é kpó batɛ́mu e a bló é kpó jí. A ɖe afɔ énɛ́ lɛ́, ɖó a jló ná nɔ Jexóva kpáxwé wútu. Nɔ flín nǔ e d’alɔ we, bɔ a kú d’é jí ɖɔ émí mɔ nǔgbó ɔ é. A ɖó nukúnnúmɔjɛnǔmɛ e sɔgbe é dó Jexóva wú, bɔ sísí e a ɖó nú Tɔ́ towe jǐxwé tɔn ɔ é kpó wǎn e a yí n’i é kpó jɛjí. A tɛ́n kpɔ́n bo ɖó nǔɖiɖi, bɔ énɛ́ sísɛ́ we bɔ a bló hǔzúhúzú lɛ́. Ayi towe sísɛ́ we bɔ a jó nǔwalɔ nyanya lɛ́ dó, bo jɛ gbɛ zán sɔgbe xá jlǒ Jexóva tɔn jí. Ée a mɔ ɖɔ Mawu sɔ́ hwɛ kɛ we é ɔ, agbɔ̌n towe jɛ do. (Ðɛh. 32:2) A nɔ yi kplé klisánwun tɔn lɛ́, bo lɛ́ jɛ nǔ ɖaaɖagbe e a kplɔ́n lɛ́ é má xá mɛ ɖěvo lɛ́ jí. Ée a zé hwiɖée jó nú Jexóva bo bló batɛ́mu gúdo é ɔ, a ɖo zɔnlin zun wɛ din ɖo gbɛli ɔ jí, bo kán ɖ’é jí, bo ná nɔ jí káká sɔ́yi. (Mat. 7:13, 14) Gbí dɔn, lobo syɛ́nlǐn ɖo sɔ́ e a sɔ́ hwiɖée jó nú Jexóva é mɛ, lobo kpo ɖo wǎn yí n’i wɛ hwebǐnu, bo nɔ se tónú nú sɛ́n tɔn lɛ́. w23.07 17 akpá. 14; 19 akpá. 19

Ényí a nɔ lin tamɛ dó ɖɛ e a xo dó zé hwiɖée jó nú Jexóva é jí ɔ, a ná mɔ hlɔ̌nhlɔ́n bá ɖí hwi xá mɛtɛ́nkpɔ́n ɖěbǔ. Ði kpɔ́ndéwú ɔ, a ka ná jɛ alɔlwɛ́ ɖú xá mɛ ɖěvo si, alǒ mɛ ɖěvo sú jí wɛ a? Gbeɖé kpɔ́n! A ko d’akpá nú Jexóva ɖɔ émí kún ná wa nǔ mɔ̌hun ɖě gbeɖé ó. Ényí a ma jó jlǒ nyanya lɛ́ dó bónú yě dó ɖɔ do ɖo ayi towe mɛ ǎ ɔ, a ná wá jɛ lěe a ná ɖe yě síin gbɔn é kan xo jí ǎ. A ná “sɔ́ mɛdídá lɛ́ sín ali” ǎ. (Nǔx. 4:14, 15) Tamɛ linlin dó lěe Jezu kán ɖ’é jí bá wa nǔ dó nyɔ́ Tɔ́ tɔn nukúnmɛ gbɔn é jí ná sísɛ́ mǐ, bɔ mǐ ná yá wǔ gbɛ́ nǔ ɖěbǔ e mǐ tuun ɖɔ é nɔ vɛ́ mɔ nú Mawu e mǐ sɔ́ mǐɖée jó ná é bǐ mlɛ́mlɛ́. (Mat. 4:10; Jaan 8:29) Nǔ ɔ wɛ nyí ɖɔ, wǔvɛ́ lɛ́ kpó mɛtɛ́nkpɔ́n lɛ́ kpó nɔ hun ali nú we bɔ a nɔ xlɛ́ kán e a kán ɖ’é jí bo ná nɔ xwedó Jezu é. Nú a ɖo mɔ̌ wa wɛ ɔ, a sixú kú d’é jí ɖɔ Jexóva ná d’alɔ we. w24.03 9-10 akpá. 8-10