Nǔgbo ɔ Dó Sɔgudo Wu
A ko kan nǔ e sɔgudo hɛn nu é byɔ hwiɖée kpɔ́n à? Biblu xlɛ́ mǐ ɖɔ nǔ taji e na jɛ ɖò malin-malin mɛ dìn lɛ é na kúnkplá mɛ e ɖò ayikúngban ɔ jí lɛ é bǐ.
Jezu tinmɛ lee mǐ sixu wà gbɔn bo “nywɛ ɖɔ axɔ́suɖuɖu Mawu tɔn ko sɛya” é. (Luki 21:31) É ɖɔ ɖ’ayǐ ɖɔ ahwan ɖaxó lɛ na tíìn, ayikúngban na dánwǔ, adɔ na tɔ́n, jɛmɛji na tíìn kpo nǔ ɖevo lɛ kpo; mǐ ka ɖò nǔ enɛ lɛ mɔ wɛ ɖò égbé.—Luki 21:10-17.
Biblu lɛ́ xlɛ́ ɖɔ nǔ e na ɖè acɛkpikpa gbɛtɔ́ tɔn sín “azǎn gudogudo tɔn lɛ” xlɛ́ é wɛ nyí nǔwalɔ gbɛtɔ́ lɛ tɔn, alǒ è na ɖɔ tawun ɔ, ye na nɔ wà nǔ nyanya. A sixu xà tinmɛ e è na é ɖò 2 Timɔtée 3:1-5 mɛ. Enyi a mɔ bɔ mɛ lɛ ɖò nǔ wà gbɔn mɔ̌ wɛ égbé ɔ, é ɖò wɛn ɖɔ a na yí gbè ɖɔ nǔɖɔɖ’ayǐ Biblu tɔn enɛ sɔgbe pɛ́pɛ́ kpo nǔ e ɖò jijɛ wɛ dìn é kpo.
Etɛ ka nyí tinmɛ enɛ tɔn? Hwenu e Axɔ́suɖuto Mawu tɔn na bló huzuhuzu ɖaxó ɖěɖee na zɔ́n bɔ gbɛ̀ na kpɔ́n te tawun ɖò ayikúngban jí dó é ko sɛkpɔ. (Luki 21:36) Ðò Biblu mɛ ɔ, Mawu d’akpá nǔ ɖagbe lɛ tɔn nú ayikúngban ɔ kpo mɛ e na nɔ gbɛ̀ ɖ’eji lɛ é kpo. Kpɔ́ndéwú ɖé lɛ ɖíe.
ACƐKPIKPA ÐAGBE
“È na ɛ acɛkpikpa kpo susu kpo, kpodo axɔ́suɖuɖu kpo, bonu togun lɛ, akɔta lɛ kpodo gbɛtɔ́ e nɔ dó gbè alɔkpa alɔkpa lɛ kpo bǐ na sɛn ɛ. Acɛkpikpa tɔn nyí acɛkpikpa ɖé, bo na nɔ ayǐ kaka sɔyi; é na ɖó vivɔnu ǎ, mɛɖé ka na sixu gbà axɔ́suɖuto tɔn gbeɖé ǎ.”—DANIYƐLI 7:14.
Tinmɛ tɔn: A sixu ɖu vivǐ gbɛ̀ tɔn ɖò acɛkpikpa e hugǎn bǐ bo na kpa acɛ gbɔn gbɛ̀ ɔ bǐ mɛ, bɔ Mawu ɖó ayǐ bo sɔ́ Vǐ tɔn b’ɛ nyí Axɔ́su ɖ’enu é glɔ́.
LANMƐ SYƐN HUNSIN ÐAGBE
“Toví ɖé sɔ́ na ɖɔ: ‘Un ɖò azɔn jɛ wɛ’ ǎ.”—EZAYÍI 33:24.
Tinmɛ tɔn: A na j’azɔn alǒ ɖó wɔ̌n ɖò wǔ gbeɖé ǎ; a na kpéwú bo na nɔ gbɛ̀ lobo na kú gbeɖé ǎ.
FÍFÁ NA TÍÌN GBƆN FÍ BǏ
“É . . . sú ahwan kún dó gbɔn gbɛ̀ ɔ bǐ mɛ.”—ÐƐHAN 46:10.
Tinmɛ tɔn: Ahwan kpo wuvɛ̌ e é nɔ hɛn wá lɛ é kpo ɖě sɔ́ na tíìn ǎ.
MƐ ÐAGBE LƐ WƐ NA GƆ́ AYIKÚNGBAN Ɔ JÍ
“Mɛdídá sɔ́ na ɖè ǎ . . . [Ayikúngban] ɔ ka na nyí mɛ e nɔ sɔ́ yeɖée hwe lɛ tɔn.”—ÐƐHAN 37:10, 11.
Tinmɛ tɔn: Mɛ nyanya ɖě sɔ́ na tíìn ǎ, mɛ e tónúsíse nú Mawu nɔ sɔ́ akpakpa lɛ é kɛɖɛ wɛ na tíìn.
AYIKÚNGBAN Ɔ BǏ NA HUZU PALAÐISI
“Ye na sá xwé bo nɔ ɛ mɛ. Ye na tun vǐwun bo na ɖu sínsɛ́n tɔn.”—EZAYÍI 65:21, 22.
Tinmɛ tɔn: È na bló ayikúngban ɔ bǐ jí ɖó bɔ é na nyɔ́ kpɔ́n. Mawu na sè ɖɛ mǐtɔn bɔ jlǒ tɔn na nyí wiwa “ɖò ayikúngban jí fí.”—Matie 6:10.