Alɔdlɛndonǔ Kplé Gbɛzán kpo Sinsɛnzɔ́ kpo Tɔn Sín Azɔ̌wema Tɔn Lɛ
7-13 NOVEMBRE
DƆKUN MAWUXÓ Ɔ TƆN ÐÉ LƐ | NÙNYWƐXÓ 27-31
it-1 873
Asì
Sɛ́n ɔ cyɔn alɔ asì lɛ jí. Asú wɛ nyí tatɔ́ ɖò tito alɔwliwli tɔn mɛ có, Mawu byɔ ɖò así tɔn ɖɔ é na kpé nukún xwédo ɔ wu ɖò agbaza lixo bo lɛ́ wà mɔ̌ ɖò gbigbɔ lixo. Gɔ́ na ɔ, nùwanyido xwédo ɔ tɔn lɛ bǐ wɛ na kúnkplá ɛ; mɔ̌ mɛ ɔ, é ɖó agban ɖaxó ɖé ɖò ta. É ɖó wǔjɔmɛ ɖaxó lɛ hú asì ɔ có, sɛ́n Mawu tɔn ka cyɔn alɔ nyɔnu ɔ jí lobo na ɛ wǔjɔmɛ bunɔ ɖé lɛ, b’ɛ na zɔ́n bɔ é na sixu ɖó awǎjijɛ bɔ gbɛzán tɔn na lɛ́ ɖó nu.
Akpáxwé Sɛ́n ɔ tɔn e kàn asì ɔ é ɖé lɛ ɖíe: Enyi asú alǒ asì lɛ̀ aga ɔ, è sixu hu i. Enyi asú ɔ vɛ gbejimanɔ dó asì tɔn ɔ, é sixu kplá ɛ yì vɔsanúxwlémawutɔ́ ɔ gɔ́n, bɔ Jehovah Mawu na gbò hwɛ ɔ, lobɔ enyi nyɔnu ɔ kú hwɛ ɔ, ajikpo tɔn na sú; amɔ̌, enyi é ma kú hwɛ ǎ ɔ, asú ɔ ɖó na dó xò n’i bo na xlɛ́ ɖò agbawungba ɖɔ xomɛvɔnɔ wɛ nú nyɔnu ɔ. (Kɛ́ 5:12-31) Enyi asú ɖé mɔ nǔmasɔgbe ɖé ɖò asì tɔn wu ɔ, é sixu gbɛ́ ɛ. Nǔ lehun lɛ sixu ɖ’emɛ: mɛmasi ɖaxó abǐ nǔ e na kɔn cí dó xwédo ɔ alǒ asú tɔn tɔ́ wu lɛ é wiwa. Amɔ̌, é byɔ nùɖé ɖò asú ɔ sí b’ɛ cyɔn alɔ nyɔnu ɔ jí, é wɛ nyí ɖɔ asú ɔ ɖó na wlan wema ɖé d’así nú asì ɔ ɖɔ emi gbɛ́ ɛ. Enɛ ɔ, nyɔnu ɔ vo dìn bo na da asú ɖevo. (Sɛ́ 24:1, 2) Enyi asì ɔ d’akpá ɖé bonu asú tɔn lin ɖɔ é kún sɔgbe ó alǒ é na wà nǔ dó ganjininɔ xwédo ɔ tɔn wu ɔ, é sixu gbɛ́. (Kɛ́ 30:10-15) Amɔ̌, enɛ nyí alɔcyɔnmɛji ɖé nú asì ɔ bo na zɔ́n bɔ é na zɔn kplakpla jí bo wà nǔ e sixu dɔn tagba wá n’i é ɖě ǎ.
È yí gbè nú asì gègě dida ɖò Mɔyizi Sɛ́n ɔ mɛ, amɔ̌, lee é nɔ nyí gbɔn é cyɔn alɔ asì ɔ jí. Asú ɔ sixu yí vǐsunnuɖaxó sín acɛ ɔ sín nyɔnu e é ma yí wǎn na ǎ é sín vǐ sunnu sí bo sɔ́ jó nú nyɔnu e é yí wǎn na é sín vǐ sunnu ǎ. (Kɛ́ 21:15-17) Enyi tɔ́ ɖé sà vǐ nyɔnu tɔn bɔ é na nyí kannumɔ nú mɛɖé, bɔ mɛ ɔ sɔ́ ɛ dó ɖó asì na bo wá mɔ ɖɔ nǔ tɔn kún sɔ́ nyɔ́ nukún emitɔn mɛ ó ɔ, é sixu lɛ́vɔ sɔ́ ɛ sà, amɔ̌, é sixu sà xá toɖevomɛnu ǎ. (Tí 21:7, 8) Enyi éyɛ alǒ vǐ tɔn sunnu wɛ da nyɔnu ɔ bo lɛ́ wá da asì ɖevo ɔ, é ɖó na nɔ na ɛ nùɖuɖu, avɔ, kpo adɔ̌tɛn kpo lobo na nɔ ɖɔ ee ɖò mɔ̌ é xá ɛ.—Tí 21:9-11.
Enyi asú ɖé dó hɛ̌n asì tɔn ɖɔ emi kún mɔ ɛ ɖò alɔji hwenu e emi da ɛ é ó, bonu è wá mɔ ɖɔ adingban wɛ é ɖó ɔ, è nɔ dɔn tó n’i bɔ é nɔ sú agban e è nɔ na nyɔnu ɖò alɔji é donu wè nyɔnu ɔ sín tɔ́, bo ka sɔ́ sixu gbɛ́ ɛ gbeɖé cobo kú ǎ. (Sɛ́ 22:13-19) Enyi sunnu ɖé ɖɔ xó víví nú nyɔnu ɖò alɔji e ma ko ɖó sunnu xɔ́ntɔn ǎ é ɖé ɔ, é ɖó na sú agban e è nɔ na nú nyɔnu é tɔ́ tɔn. Bɔ enyi tɔ́ ɔ yí gbè ɔ, é na da nyɔnu ɔ, bo sɔ́ sixu gbɛ́ ɛ gbeɖé cobo kú ǎ.—Sɛ́ 22:28, 29; Tí 22:15, 16.
Ninɔmɛ nyɔnu Eblée ɖé tɔn gbɔn vo kpɛɖé nú ninɔmɛ nyɔnu égbé tɔn tɔn có, nyɔnu Eblée gbejinɔtɔ́ ɖé nɔ ɖu ninɔmɛ tɔn kpo azɔ̌ tɔn kpo sín vivǐ tawun. É nɔ d’alɔ asú tɔn, nɔ kpé nukún dó xwédo ɔ kpo xwégbezɔ́ lɛ kpo wu, bo nɔ ɖu vivǐ nǔ gègě tɔn, lobo nɔ kpéwú bo nɔ ɖè nyɔnu alɔkpa e é nyí é kpo nǔwukpikpé tɔn lɛ kpo xlɛ́ bǐ mlɛ́mlɛ́.
Nǔ E asì Ðagbe ɖé Nyí É. È tinmɛ ninɔmɛ ɖagbe e mɛ asì gbejinɔtɔ́ ɖé nɔ nɔ é kpo azɔ̌ tɔn lɛ kpo ɖò Nùnywɛxó wemata 31gɔ́ ɔ mɛ. È ɖɔ ɖɔ é xɔ akwɛ nú asú tɔn hú jɛ̌ nana. Asú tɔn sixu ɖeji dó wǔ tɔn. É nɔ ɖókan dó azɔ̌ wu: é nɔ lɔn avɔ, nɔ bló awu nú xwédo tɔn, é nɔ yì xɔ nǔ e hudo xwédo tɔn lɛ é, é nɔ wà azɔ̌ ɖò vǐwungbo mɛ, é kpo mɛsɛntɔ́ lɛ kpo nɔ kpé nukún dó xwédo ɖé wu, é nɔ d’alɔ mɛ e ɖò hudo mɛ lɛ é, é nɔ kpɔ́n bɔ mɛ e ɖò xwédo tɔn mɛ lɛ é nɔ b’acɔ́ ganji, é tlɛ nɔ w’ajɔ̌ bo nɔ hɛn akwɛ wá xwé, é nɔ sɔnǔ nú xwédo tɔn dó ajijimɛ sín nǔ e sixu wá jɛ lɛ é wu, é nɔ ɖɔ xó kpo nùnywɛ kpo kpodo xomɛnyínyɔ́ kpan, sísí e é nɔ ɖó nú Jehovah é kpo azɔ̌ ɖagbe e é nɔ wà lɛ é kpo nɔ zɔ́n bɔ asú tɔn kpo vǐ tɔn lɛ kpo nɔ sɔ́ ɛ sù, bɔ mɔ̌ mɛ ɔ, é nɔ ɖó wi ta nú asú tɔn kpo vǐ tɔn lɛ kpo ɖò tò ɔ mɛ. Nugbǒ ɔ, mɛ e mɔ asì ɖagbe ɖé é mɔ nǔ ɖagbe ɖé sɔ́ bɔ Jehovah nɔ nyɔ́ xomɛ dó wǔ tɔn.—Nùx 18:22.
Ðò Agun Klisanwun Tɔn Mɛ. Ðò agun Klisanwun tɔn mɛ ɔ, asú ɖé ɖó na ɖó asì ɖokpo géé. (1Kɔ 7:2; 1Ti 3:2) È ɖegbe nú asì lɛ ɖɔ ye ni nɔ hwíhwɛ́ yeɖée dó asú yetɔn lɛ glɔ, enyi asú lɛ nyí Klisanwun alǒ gbɔ ɔ nɛ. (Efɛ 5:22-24) Asì lɛ ɖó na nɔ gbɛ́ xɔ nú asú yetɔn lɛ ǎ ɖó asú lɛ ɖɔhun ɔ, ye “ɖó acɛ dó agbaza [ye]ɖesunɔ tɔn jí ǎ.” (1Kɔ 7:3, 4) È ɖè wě xá asì lɛ ɖɔ nǔ e ye na nɔ ba acɔ́ na jɛ nukɔn é wɛ nyí mɛ e ye nyí ɖò xomɛ é, bo na nɔ ɖó sínsɛ́n e gbigbɔ ɔ nɔ zɔ́n bɔ è nɔ ɖó lɛ é, bonu, vlafo gbɔn walɔ yetɔn lɛ gblamɛ ɔ, ye na sixu dɔn asú nùmaɖitɔ́ ɔ b’ɛ na huzu Klisanwun.—1Pi 3:1-6.
Nùjlɛdonǔwu. Ðò nùjlɛdonǔwu linu ɔ, Jehovah ylɔ Izlayɛli ɖɔ asì emitɔn ɖó akɔ e é jɛ xá akɔta ɔ é wutu. (Eza 54:6) Mɛsɛ́dó Pɔlu ylɔ Jehovah ɖɔ Tɔ́ Klisanwun e gbigbɔ ɖè lɛ é tɔn, bo ɖɔ dó “Jeluzalɛmu [jixwé] tɔn” ɔ wu ɖɔ é nyí nɔ yetɔn, cí nǔ ɖɔ Jehovah wlí alɔ xá ɛ bonu é na jì Klisanwun e gbigbɔ ɖè lɛ é ɖɔhun. (Ga 4:6, 7, 26) È ɖɔ dó agun Klisanwun tɔn wu ɖɔ é nyí yawo alǒ asì nú Jezu Klisu.—Efɛ 5:23, 25; Nǔ 19:7; 21:2, 9.