Nɔ d’alɔ mɛ ɖěvo lɛ́ bónú yě ní dɛ ɖo ninɔmɛ syɛ́nsyɛ́n e mɛ gbɔn wɛ yě ɖe lɛ́ é nu

1. Hwɛhwɛ ɔ, nɛ̌ Jexóva ka nɔ ná xósin nú mɛsɛntɔ́ tɔn lɛ́ sín ɖɛ gbɔn?

A KA tuun ɖɔ Jexóva sixú zán we dó ná xósin nú ɖɛ vívɛ́ e mɛɖé xo é a? Mɛxó agun tɔn, devízɔ́watɔ́ sinsɛnzɔ́wiwa tɔn, gběxosín-alijítɔ́, alǒ wɛnjlátɔ́ wɛ nú we hǔn, a sixú d’alɔ. Mɛ wínnyáwínnyá alǒ mɛxó wɛ nú we oo, nɔví súnnu, alǒ nɔví nyɔ̌nu wɛ nú we ɔ, a sixú d’alɔ. Ényí mɛ e yí wǎn nú Mawu e ɖé sú xó ylɔ́ ɛ bo byɔ́ alɔdó ɔ, hwɛhwɛ wɛ Mawu mǐtɔn nɔ gbɔn mɛxó agun tɔn lɛ́ kpó mɛsɛntɔ́ gbejínɔtɔ́ ɖěvo lɛ́ kpó jí, bɔ yě nɔ “dó wǔsyɛ́n lanmɛ nú” mɛ énɛ́. (Koló. 4:11) Wǔjɔmɛ ɖaxó ɖé wɛ é nyí ɖɔ mǐ ní sɛn Jexóva, bo lɛ́ wa devízɔ́ nú nɔví mǐtɔn lɛ́ ɖo ali énɛ́ nu! Mǐ sixú kpé wú bo d’alɔ nɔví mǐtɔn lɛ́, lobo lɛ́ dó gbɔ nú yě hwenu e jɛmɛjí ɖé, adla, alǒ yadónúmɛ wa nǔ dó yě wú é.

NƆ D’ALƆ MƐ ÐĚVO LƐ́ HWENU E JƐMƐJÍ ÐO NǓ GBA WƐ É

2. Aniwú é ka sixú vɛ́ wǔ nú mǐ ɖɔ mǐ ní d’alɔ mɛ ɖěvo lɛ́ hwenu e jɛmɛjí ɖo nǔ gba wɛ é?

² Jɛmɛjí sixú zɔ́n bɔ é vɛ́ wǔ nú mǐ bɔ mǐ ná d’alɔ mǐɖée. Ði kpɔ́ndéwú ɔ, mǐ sixú jló ná yi ba xɔ́ntɔn mǐtɔn lɛ́ kpɔ́n, amɔ̌, mɔ̌ wiwa ná sɔ́ ganjíninɔ mǐtɔn ɖ’axɔ́ nu. Mǐ sixú ba ná ylɔ́ mɛ e ma ɖó nǔ káká ɖé ǎ lɛ́ é bɔ yě ná gɔ́ nú mǐ bónú mǐ ná ɖu nǔɖé ɖó kpɔ́, amɔ̌, énɛ́ lɔ nyɔ́ bló ǎ. Mǐ sixú nɔ ba ná d’alɔ mɛ ɖěvo lɛ́, amɔ̌, ényí mɛ e ɖo xwédo mǐtɔn mɛ é ɖé lɛ́ ɖo azɔn jɛ wɛ ɔ, énɛ́ sixú vɛ́ wǔ nú mǐ. Nǔ ɖo mɔ̌ có, mǐ ba ná d’alɔ nɔví mǐtɔn lɛ́, bɔ ényí mǐ wa nǔ e wú mǐ kpé é bǐ dó d’alɔ yě ɔ, é nɔ su Jexóva nukúnmɛ. (Nǔx. 3:27; 19:17) Étɛ́ mǐ ka sixú wa?

3. Étɛ́ kpɔ́ndéwú mɛxó agun tɔn e ɖo Desi sín agun mɛ lɛ́ é tɔn ka kplɔ́n mǐ? (Jelemíi 23:4)

³ Nǔ e mɛxó agun lɛ́ sixú wa é. Ényí mɛxó agun tɔn wɛ nú we hǔn, tɛ́n kpɔ́n bo tuun lɛ̌ngbɔ́ lɛ́ ganjí. (Xa Jelemíi 23:4.) Nɔví nyɔ̌nu e nɔ nyí Desi, bɔ mǐ ɖɔ xó tɔn ɖo xóta e wá yi é mɛ é ɖɔ: “Mɛxó agun tɔn ɖěɖěe ɖo gbɛ̌ta kúnnuɖegbé tɔn e mɛ un ɖe lɛ́ é nɔ w’azɔ̌ ɖó kpɔ́ xá nyi kpó mɛ ɖěvo lɛ́ kpó ɖo sinsɛnzɔ́ ɔ mɛ, bɔ mǐ nɔ lɛ́ nɔ kpɔ́ ɖo mɛkplékpɔ́mɛ-núwiwa lɛ́ hwenu ɖ’ayǐ.”b Mɔ̌ e mɛxó agun tɔn énɛ́ lɛ́ nɔ wa é zɔ́n bɔ é bɔ wǔ nú yě, bɔ yě d’alɔ Desi ɖo hwenu e jɛmɛjí Covid-19 bɛ́, bɔ mɛ e ɖo xwédo tɔn mɛ é ɖé lɛ́ sɔ́ azɔnkwín ɔ bo kú é.

4. Aniwú mɛxó agun tɔn lɛ́ ka kpé wú bo d’alɔ Desi? Étɛ́ énɛ́ ka sixú kplɔ́n mɛxó agun tɔn lɛ́?

⁴ Desi tínmɛ ɖɔ: “Ðó un ko tuun mɛxó agun tɔn lɛ́, bɔ yě nyí xɔ́ntɔn ce lɛ́ wútu ɔ, é bɔ wǔ nú mì bɔ un nɔ ɖɔ lěe nǔ cí nú mì é kpó nǔ e ɖo adohu adohu ɖó nú mì wɛ lɛ́ é kpó nú yě.” Étɛ́ énɛ́ ka sixú kplɔ́n mɛxó agun tɔn lɛ́? Mi nɔ kpé nukún dó mɛ ɖěɖěe ɖo glɔ̌ mitɔn lɛ́ é wú, cóbónú ninɔmɛ vɛ́ wǔ ɖé ní wá xwetɔ́n. Mi nɔ dó xɔ́ntɔn yě. Ényí jɛmɛjí ɖé zɔ́n bɔ mi ma sɔ́ sixú nɔ yi ba yě kpɔ́n lě tlɔlɔ ǎ hǔn, mi nɔ ba ali ɖěvo e nu mi ná nɔ ɖɔ xó ɖó kpɔ́ xá yě ɖe lɛ́ é. Desi ɖɔ: “Hweɖélɛ́nu ɔ, mɛxó agun tɔn vovo gěgé nɔ ylɔ́ mì, alǒ wlán nǔ sɛ́dó mì ɖo azǎn ɖokpó ɔ jí. Wěmafɔ ɖěɖěe yě nɔ má xá mì lɛ́ é nɔ byɔ́ ayi mɛ nú mì tawun, ényí é ná bo tlɛ nyí ɖɔ un ko tuun wěmafɔ énɛ́ lɛ́ ɔ nɛ́.”

5. Nɛ̌ mɛxó agun tɔn lɛ́ ka sixú tuun nǔ e hudó nɔví lɛ́ é gbɔn? Nɛ̌ yě ka sixú d’alɔ yě gbɔn?

⁵ Ali e nu a sixú tuun nǔ e hudó nɔví towe lɛ́ ɖe é ɖokpó wɛ nyí ɖɔ a ní ɖó ayi te dó kan nǔ byɔ́ yě. (Nǔx. 20:5) Yě ka ɖó nǔɖuɖu, amasin, gɔ́ nú dandannú gbɛmɛ tɔn ɖěvo lɛ́ a? Azɔ̌ gblé dó yě, alǒ yě sɔ́ ɖó akwɛ́ káká ɖé bá dó sú xɔkwɛ́ ǎ wɛ a? Yě ka ɖó hudó mɛ e ná d’alɔ yě bɔ yě ná d’alɔ wěma mɛ, bá dó ɖu le alɔ e acɛkpikpa nɔ dó mɛ é tɔn wɛ a? Nǔɖitɔ́ hǎtɔ́ Desi tɔn lɛ́ d’alɔ ɛ ɖo agbaza lixo. Amɔ̌, gǔdo e mɛxó agun tɔn lɛ́ nɔ n’i ɖo lěe nǔ nɔ cí nú mɛ é kpó gbigbɔ kpó lixo é wɛ d’alɔ ɛ hú gǎn bɔ é xo wǔvɛ́ tɔn lɛ́ zlɛ́. É ɖɔ: “Mɛxó agun tɔn lɛ́ xo ɖɛ ɖó kpɔ́ xá mì. Nǔgbó wɛ ɖɔ un sɔ́ flín nǔ e yě ɖɔ ɖo ɖɛ yětɔn lɛ́ mɛ é pɛ́pɛ́pɛ́ ǎ, amɔ̌, un ka kpo ɖo lěe nǔ cí nú mì é flín wɛ. É cí ɖɔ Jexóva wɛ ɖo ɖiɖɔ nú mì wɛ ɖɔ: ‘A ɖo hwiɖokpó ǎ’ ɖɔhun.”—Eza. 41:10, 13.

6. Étɛ́ mɛ ɖěɖěe ɖo agun ɔ mɛ lɛ́ é gěgé ka sixú wa dó d’alɔ mɛ ɖěvo lɛ́? (Kpɔ́n ɖiɖe ɔ.)

⁶ Nǔ e mɛ ɖěvo lɛ́ sixú wa é. Mǐ nɔ ɖó nukún ɖɔ mɛxó agun tɔn lɛ́ wɛ ná ɖe afɔ nukɔntɔn ɔ, bɔ é ka sɔgbe. Amɔ̌, Jexóva byɔ́ mǐ mɛ bǐ ɖɔ mǐ ní nɔ dó wǔsyɛ́n lanmɛ nú mɛ ɖěvo lɛ́, bo nɔ lɛ́ d’alɔ yě. (Ga. 6:10) Ényí mǐ ná bo tlɛ wa nǔ kléwún ɖé dó d’alɔ mɛ e ɖo azɔn jɛ wɛ é ɖé ɔ, é sixú dó wǔsyɛ́n lanmɛ n’i tawun. Yɔkpɔ́vú ɖé sixú sɛ́ káti, alǒ desɛ́ɛn e é ɖe é dó nɔví súnnu ɖé dó dó wǔsyɛ́n lanmɛ n’i. Mɛ wínnyáwínnyá ɖé sixú xwlé axi, alǒ wa nǔ mɔ̌hun ɖěvo lɛ́ nú nɔví nyɔ̌nu ɖé. Mɛ ɖěvo e ɖo agun ɔ mɛ lɛ́ é sixú ɖa nǔɖuɖu yi jó nú mɛ e ɖo agun ɔ mɛ bo ɖo azɔn jɛ wɛ é ɖé. Ényí jɛmɛjí ɖé vun kan ɔ, mɛ e ɖo agun ɔ mɛ lɛ́ é bǐ wɛ nɔ ɖó hudó wǔsyɛ́n dó lanmɛ nú mɛ tɔn. Vlafo, mǐ sixú nɔ nɔ te kpɛɖé hú gǎn ɖo kplé agun tɔn lɛ́ gúdo, bá ɖɔ xó xá nɔví lɛ́, é sixú nyí ɖo kpléxɔ Axɔ́súɖuto ɔ tɔn lɛ́ mɛ, alǒ ɖo kan jí. Gɔ́ ná ɔ, mɛxó agun tɔn lɛ́ lɔ ɖó hudó wǔsyɛ́n dó lanmɛ nú mɛ tɔn. Kúnnuɖetɔ́ ɖé lɛ́ sɛ́ wěmasɛ́dómɛ wǔsyɛ́n dó lanmɛ nú mɛ tɔn ɖé lɛ́ dó mɛxó agun tɔn lɛ́; hwɛhwɛ ɔ, mɛxó agun tɔn énɛ́ lɛ́ sín alɔnu nɔ ján ɖo jɛmɛjí ɖé hwenu hú lěe alɔnu yětɔn ko nɔ ján gbɔn ɖ’ayǐ é. Ényí mǐ wa nǔ e wú mǐ kpé é bǐ, bo ‘ná akɔ́nkpinkpan mǐɖée, lobo dó wǔsyɛ́n lanmɛ nú mǐɖée’ ɔ, é nɔ nyɔ́ tawun!—1 Tɛ. 5:11.

NƆ D’ALƆ MƐ ÐĚVO LƐ́ HWENU E ADLA J’AYǏ É

7. Wǔvɛ́ tɛ́ è ka nɔ mɔ ɖo adla j’ayǐ ɖé gúdo?

⁷ Adla ɖé sixú d’avaja gbɛzán mɛɖé tɔn mɛ ajijimɛ. Mɛ e jí é jɛ dó lɛ́ é sixú ba nǔɖókan yětɔn lɛ́, xwé yětɔn, alǒ mɛ e yě tlɛ yí wǎn ná lɛ́ é kpo. Nǔ baɖabaɖa énɛ́ lɛ́ nɔ jɛ dó nɔví súnnu kpó nɔví nyɔ̌nu kpó mǐtɔn lɛ́ lɔmɔ̌ jí. Étɛ́ mǐ ka sixú wa dó d’alɔ?

8. Étɛ́ mɛxó agun tɔn lɛ́ kpó tatɔ́ xwédo tɔn lɛ́ kpó ka sixú wa cóbɔ adla ɖé ná j’ayǐ?

⁸ Nǔ e mɛxó agun tɔn lɛ́ sixú wa é. Mɛxó agun tɔn lɛ́ mi, mi nɔ d’alɔ nɔví lɛ́ nú yě ní nɔ sɔ́ nǔ ɖ’ayǐ cóbónú adla ɖé ná j’ayǐ. Mi tɛ́n kpɔ́n bónú mɛ e ɖo agun ɔ mɛ lɛ́ é bǐ ní tuun afɔ tawun tawun e yě ná ɖe bá dó nɔ ayijayǐ mɛ lɛ́ é kpó lěe yě ná ylɔ́ mɛxó agun tɔn lɛ́ gbɔn é kpó. Margaret e xó mǐ ɖɔ ɖo xóta e wá yi é mɛ é ɖɔ: “Mɛxó agun tɔn mǐtɔn lɛ́ xwlé hudó agun tɔn ɖé agun mǐtɔn, bo gb’akpá nú mǐ ɖɔ gbě e ɖo zo ji wɛ é kún ko ɖó te ó. Yě ɖɔ ɖɔ ényí acɛkpatɔ́ lɛ́ ɖɔ ɖɔ mǐ ní sɛ tɛn, alǒ ninɔmɛ ɔ wá syɛ́n ɔ, mǐ ɖó ná sɛ tɛn afɔjíafɔjí.” Xó énɛ́ e nɔví lɛ́ ɖɔ é jɛ gan, ɖó aklúnɔzángbla atɔ́ɔ́n gúdo ɔ, gbě ji zo titewungbe tɔn. Ðo sinsɛn-bíbló xwédo tɔn hwenu ɔ, tatɔ́ xwédo tɔn lɛ́ ná gbéjé nǔ e mɛ e ɖo xwédo ɔ mɛ é ɖokpó ɖokpó ná wa é kpɔ́n. Ényí hwi kpó vǐ towe lɛ́ kpó ko sɔ́ nǔ ɖ’ayǐ ɔ, hwenu e adla ɖé ná wá j’ayǐ ɔ, ayi mitɔn ná gba dó dín ǎ.

9. Nɛ̌ mɛxó agun tɔn lɛ́ ka sixú bló tuto nú gǎn e yě ná dó jɛ nukɔn nú adla ɖé é kpó ée yě ná dó ɖo adla ɖé gúdo é kpó gbɔn?

⁹ Ényí nukúnkpénǔwútɔ́ gbɛ̌ta kúnnuɖegbé tɔn ɖe wɛ nú we ɔ, a ɖó ná ɖó mɛ e ɖo gbɛ̌ta towe mɛ lɛ́ é ɖokpó ɖokpó sín adlɛsi e sɔgbe é, bo lɛ́ ɖó alǒkankɛ́n yětɔn cóbɔ adla ɖé ná j’ayǐ. Wlǎn nǔ énɛ́ lɛ́ ɖ’ayǐ, lobo nɔ tɛ́n kpɔ́n bónú é ní nɔ nyí adlɛsi yětɔn gǔdo gúdo tɔn ɔ wɛ ɖ’é jí. Énɛ́ ɔ, ényí adla ɖé wá j’ayǐ ɔ, a ná kpé wú bo ylɔ́ wɛnjlátɔ́ lɛ́ ɖokpó ɖokpó bá tuun hudó yětɔn. Sɛ́ nǔ e sín kɛ́n a sɔ́ lɛ́ é dó titoblónúnǔtɔ́ kplékplé mɛxó lɛ́ tɔn tɔn afɔjíafɔjí. Éyɛ́ ná sɛ́ yě dó nukúnkpénǔwútɔ́ lɛ̌dó tɔn. Ényí nɔví énɛ́ lɛ́ w’azɔ̌ ɖó kpɔ́ ɔ, yě sixú d’alɔ ɖo ali ɖagbe hú gǎn ɔ nu. Hwenu e myɔ ji nǔ gúdo é ɔ, nukúnkpénǔwútɔ́ Margaret tɔn nɔ wunzɛn nú ganxixo 36, bo ɖo tuto bló nú gǎn e dó wɛ mɛxó agun tɔn lɛ́ ɖe, bá ylɔ́ nɔví 450 mɔ̌ e sɛ tɛn sín fí e yě ɖe lɛ́ é é, lobo lɛ́ kpé nukún dó yě wú é wɛ. (2 Kɔ. 11:27) Mɔ̌ mɛ ɔ, mɛ ɖěɖěe ɖó hudó fí e yě ná nɔ é tɔn lɛ́ é bǐ mɔ xɔ ɖo ta.

10. Aniwú mɛxó agun tɔn lɛ́ ka nɔ ylɔ́ nukúnkpíkpé dó lɛ̌ngbɔ́ lɛ́ wú ɖɔ nǔ tají? (Jaan 21:15)

¹⁰ Azɔ̌ e mɛxó agun tɔn lɛ́ nɔ wa é ɖokpó wɛ nyí alɔ dídó mɛ ɖo gbigbɔ kpó lěe nǔ nɔ cí nú mɛ é kpó lixo. (1 Pi. 5:2) Ényí adla ɖé j’ayǐ ɔ, mɛxó agun tɔn lɛ́ ɖó ná tɛ́n kpɔ́n bo tuun ɖɔ nɔví lɛ́ ɖo ayijayǐ mɛ, ɖó nǔɖuɖu, avɔ kpó fí e yě ná dɔ́ é kpó. Amɔ̌, ɖo sun mɔ̌kpán gúdo ɔ, mɛ ɖěɖěe gán ɖ’é mɛ lɛ́ é ná ɖó hudó nǔ gbigbɔ tɔn lɛ́ tɔn, bo ná lɛ́ ba ɖɔ è ní d’alɔ émí ɖo lěe nǔ nɔ cí nú mɛ é linu. (Xa Jaan 21:15.) Harold e ɖo Wěɖegbɛ́ alaxɔ tɔn mɛ, bo ko xo go nɔví ɖěɖěe wú adla wa nǔ dó lɛ́ é gěgé é ɖɔ: “É nɔ byɔ́ hwenu cóbɔ è nɔ mɔ mɛɖée mɛ. Yě sixú jɛ nǔ e bú dó yě lɛ́ é wɔn jí kpɛɖé kpɛɖé, amɔ̌, yě nɔ sixú yá wǔ wɔn nǔ élɔ́ lɛ́ ǎ: mɛ vívɛ́ná yětɔn e kú é, nǔɖókan yětɔn bǔnɔ ɖé, ninɔmɛ vɛ́ wǔ e mɛ yě ko gbɔn é. Nǔ énɛ́ lɛ́ flínflín sixú zɔ́n bɔ yě ná nɔ nɔ aluwɛ mɛ. Ényí nǔɖiɖi hwe dó mɛ ǎ, loɔ, lěe nǔ nɔ cí nú mɛ ɖo jɔwámɔ linu é wɛ.”

11. Hudó tɛgbɛ tɔn tɛ́ xwédo lɛ́ ka ɖó?

¹¹ Mɛxó agun tɔn lɛ́ nɔ zán wěɖexámɛ e ɖɔ ɖɔ è ní “nɔ ya avǐ xá mɛ e ɖo avǐ ya wɛ lɛ́” é é. (Hlɔ̌. 12:15) É sixú byɔ́ ɖɔ è ní vɔ́ gǎnjɛwú ná mɛ ɖěɖěe gán ɖo adla j’ayǐ ɖé gúdo lɛ́ é ɖɔ Jexóva kpó klisánwun hǎtɔ́ yětɔn lɛ́ kpó kpo ɖo wǎn yí nú yě wɛ. Mɛxó agun tɔn lɛ́ ná ba ná d’alɔ xwédo lɛ́ bɔ yě ná kpo ɖo aca gbigbɔ tɔn yětɔn lɛ́ wú hɛn wɛ, káká jɛ ɖɛ xixo, nǔ kplɔ́nkplɔ́n, kplé lɛ́ yiyi kpó alɔ ɖíɖó ɖo wɛnɖagbejíjlázɔ́ ɔ kpó mɛ jí. Mɛxó agun tɔn lɛ́ sixú lɛ́ dó wǔsyɛ́n lanmɛ nú mɛjitɔ́ lɛ́ ɖɔ yě ní d’alɔ vǐ yětɔn lɛ́ bónú yě ní sɔ́ ayi ɖó nǔ ɖěɖěe adla ma nɔ hɛn gblé ǎ lɛ́ é jí. Mɛjitɔ́ lɛ́ mi, mi nɔ flín vǐ mitɔn lɛ́ ɖɔ Jexóva ná nyí xɔ́ntɔn yětɔn tɛgbɛ, bo ka ná lɛ́ ɖo ahwan yětɔn mɛ hwebǐnu. Gɔ́ ná ɔ, tɛ́n kpɔ́n bo tínmɛ nú yě ɖɔ yě ɖo kplékplé nɔví lɛ́ tɔn e gbɔn gbɛ ɔ bǐ mɛ é ɖé mɛ, bɔ kplékplé énɛ́ ɖo gbesisɔmɛ hwebǐnu bo ná d’alɔ yě.—1 Pi. 2:17.

12. Étɛ́ mɛ ɖěvo lɛ́ ka sixú wa dó nɔ gǔdo nú sɔhɛnmɛzɔ́ ɔ? (Kpɔ́n ɖiɖe ɔ.)

¹² Nǔ e mɛ ɖěvo lɛ́ sixú wa é. Ényí adla ɖé j’ayǐ ɖo xá towe mɛ hǔn, kanbyɔ́ mɛxó agun tɔn lɛ́ ɖɔ nɛ̌ émí ka sixú d’alɔ gbɔn a jí. Vlafo, a sixú yí gbe bɔ mɛ ɖěɖěe adla ɔ zɔ́n bɔ yě hɔn sín xwé yětɔn gbe lɛ́ é kpó mɛ ɖěɖěe ɖo sɔhɛnmɛzɔ́ wa wɛ lɛ́ é kpó ná nɔ xwé towe gbe nú hwenu ɖé. A sixú ná nǔɖuɖu, alǒ dandannú ɖěvo e sín hudó wɛnjlátɔ́ lɛ́ ná ɖó é yě. Ényí adla j’ayǐ ɖo fí e lín dó we é ɖé ɔ, a sixú lɛ́ d’alɔ. Gbɔn nɛ̌ é? Nɔ xo ɖɛ dó mɛ e nǔ wa lɛ́ é tamɛ. (2 Kɔ. 1:8-11) A sixú ná akwɛ́ dó nɔ gǔdo nú sɔhɛnmɛzɔ́ ɔ gbɔn nǔ níná dó azɔ̌ e è nɔ wa gbɔn gbɛ ɔ bǐ mɛ é takúnmɛ gblamɛ. (2 Kɔ. 8:2-5) Ényí a kpé wú bá sɛ tɛn yi fí e adla ɔ j’ayǐ ɖe é bá d’alɔ hǔn, kan nǔ byɔ́ mɛxó agun tɔn lɛ́ dó lěe a sixú sɔ́ hwiɖée jó gbɔn é wú. Ényí è ylɔ́ we ɖɔ hwi ní wá d’alɔ ɔ, è ná kplɔ́n azɔ̌ ɖé lɛ́ we, énɛ́ ná zɔ́n bɔ a ná kpé wú bo d’alɔ ɖo ali ɖagbe hú gǎn ɔ nu.

NƆ D’ALƆ NƆVÍ LƐ́ BÓNÚ YĚ NÁ DƐ ÐO YADÓNÚMƐ NU

13. Wǔvɛ́ tɛ́ lɛ́ nɔví mǐtɔn lɛ́ ka nɔ se ɖo fí ɖěɖěe è gbɛ́ azɔ̌ mǐtɔn ɖe lɛ́ é?

¹³ Fí e è gbɛ́ azɔ̌ mǐtɔn ɖe lɛ́ é ɔ, yadónúmɛ nɔ zɔ́n bɔ gbɛ nɔ vɛ́ wǔ nú nɔví mǐtɔn lɛ́ tawun. Akwɛ́yózo, azɔn kpó kú mɛ vívɛ́ná ɖé tɔn kpó nɔ lɛ́ dó tagba nú nɔví ɖěɖěe ɖo xá énɛ́ lɛ́ mɛ lɛ́ é. Amɔ̌, é sín azɔ̌ mǐtɔn e è gbɛ́ é wútu bɔ mɛxó agun tɔn lɛ́ sɔ́ nɔ sixú kpé wú bo yi ba mɛ mɔ̌hun lɛ́ kpɔ́n, alǒ vo bo ɖɔ xó xá mɛ e ɖó hudó wǔsyɛ́n dó lanmɛ nú mɛ tɔn lɛ́ é ǎ. Nǔ e jɛ dó Andrei e xó mǐ ɖɔ ɖo xóta e wá yi é mɛ é wú é nɛ́. Nɔví nyɔ̌nu ɖokpó ɖo gbɛ̌ta kúnnuɖegbé tɔn tɔn mɛ, bo ɖo xwi ɖí xá akwɛ́yózo wɛ. Ninɔmɛ énɛ́ mɛ gbɔn wɛ é ɖe bo lɛ́ bló alitawoví. É byɔ́ ɖɔ è ní wa azɔ̌ n’i azɔn mɔ̌kpán, bɔ é sɔ́ sixú wa nǔɖé ǎ. È gbɛ́ azɔ̌ mǐtɔn, bɔ jɛmɛjí ɔ lɛ́ ɖo nǔ gba wɛ có, Jexóva mɔ nǔ jɛ ninɔmɛ nɔví nyɔ̌nu ɔ tɔn mɛ, bo bló bɔ nɔví lɛ́ wa nǔ e wú yě kpé é bǐ dó d’alɔ ɛ.

14. Nɛ̌ mɛxó agun tɔn lɛ́ ka nɔ ɖeji dó Jexóva wú dó sɔ́ kpɔ́ndéwú ɔ ɖ’ayǐ gbɔn?

¹⁴ Nǔ e mɛxó agun tɔn lɛ́ sixú wa é. Andrei xo ɖɛ bo wa nǔ e wú é kpé é. Nɛ̌ Jexóva ka ná xósin nú ɖɛ tɔn gbɔn? É sɛ́ nǔɖitɔ́ hǎtɔ́ ɖěɖěe sixú wa nǔɖé dó d’alɔ ɛ lɛ́ é dó è. Mɛ ɖé lɛ́ nɔ sɔ́ nɔví nyɔ̌nu ɔ yi dotóoxwé. Mɛ ɖěvo lɛ́ nɔ ná akwɛ́ dó d’alɔ ɛ. Jexóva sísɛ́ yě bɔ yě wa nǔ e wú yě kpé é, bɔ é kɔn nyɔ̌ná dó gǎn e yě dó ɖo bǔ, ɖo agun ɔ mɛ kpó akɔ́nkpinkpan kpó dó d’alɔ nɔví nyɔ̌nu ɔ lɛ́ é jí. (Ebl. 13:16) Mɛxó agun tɔn lɛ́ mi, ényí è ɖó dogbó nú azɔ̌ mǐtɔn hǔn, mi byɔ́ mɛ ɖěvo lɛ́ ɖɔ yě ní d’alɔ mi. (Jel. 36:5, 6) Tají hú gǎn ɔ, mi ɖeji dó Jexóva wú. É sixú d’alɔ mi bɔ mi ná sú hudó nɔví mǐtɔn lɛ́ tɔn sín do.

15. Nɛ̌ mǐ ka sixú jɛ hun dó bǔninɔ mǐtɔn jí ɖo yadónúmɛ hwenu gbɔn?

¹⁵ Nǔ e mɛ ɖěvo lɛ́ sixú wa é. Ényí è gbɛ́ azɔ̌ mǐtɔn ɔ, gbɛ̌ta kpɛví kpɛví lɛ́ mɛ jɛ́n mǐ sixú nɔ kplé ɖó kpɔ́ ɖe. Énɛ́ wú ɔ, hwe ɔ nu ɖíe din bɔ mǐ ná nɔ fífá mɛ xá mǐɖée. Mi fun ahwan xá Satáan, é ní ma nyí xá miɖée o. Mi nɔ kpɔ́n nǔ zɛ nǔwanyido nɔví mitɔn lɛ́ tɔn wú, alǒ nɔ yá wǔ ɖe ɖɛ gbemanɔkpɔ́ lɛ́. (Nǔx. 19:11; Efɛ́. 4:26) Mi nɔ sɔ́ jlǒ dó d’alɔ miɖée. (Ti. 3:14) Alɔ e mɛ ɖěvo lɛ́ dó nɔví nyɔ̌nu ɔ é wa ɖagbe nú gbɛ̌ta kúnnuɖegbé tɔn ɔ tawun. Yě lɛ́ sɛkpɔ́ yěɖée d’é jí xwédo ɖé ɖɔhun.—Ðɛh. 133:1.

16. Sɔgbe xá Kolósinu lɛ́ 4:3, 18 ɔ, nɛ̌ mǐ ka sixú nɔ d’alɔ nɔví mǐtɔn e dó ya ná wɛ è ɖe lɛ́ é gbɔn?

¹⁶ Acɛkpikpa lɛ́ ɖó dogbó nú azɔ̌ mǐtɔn có, nɔví mǐtɔn lɛ́ afatɔ́n mɔ̌kpán kpo ɖo Jexóva sɛn wɛ. È wlí mɛɖé lɛ́ dó gankpá mɛ ɖó nǔɖiɖi yětɔn wú. Mǐ sixú nɔ xo ɖɛ dó yě kpó xwédo yětɔn lɛ́ kpó takúnmɛ. Mǐ sixú lɛ́ xo ɖɛ dó nɔví ɖěɖěe nɔ sɔ́ mɛɖésúsíninɔ yětɔn ɖ’axɔ́ nu dó d’alɔ nɔví énɛ́ lɛ́ ɖo gbigbɔ, agbaza kpó hwɛɖiɖɔ kpó linu lɛ́ é tamɛ.c (Xa Kolósinu lɛ́ 4:3, 18.) Ðɛ ɖó hlɔ̌nhlɔ́n tawun, ma wɔn énɛ́ gbeɖé ó!—2 Tɛ. 3:1, 2; 1 Tim. 2:1, 2.

17. Nɛ̌ a ka sixú sɔ́ nǔ ɖ’ayǐ din nú yadónúmɛ gbɔn?

¹⁷ Hwi kpó xwédo towe kpó sixú sɔ́ nǔ ɖ’ayǐ din nú yadónúmɛ. (Mɛ. 14:22) Mi tɛ́n kpɔ́n, bo ma lin tamɛ dó nǔ nyanya e sixú jɛ lɛ́ é bǐ jí ó. É nyɔ́ wa hǔn, mi bló bónú xɔ́ntɔn e mi zun xá Jexóva é ní syɛ́n d’é jí, bo d’alɔ vǐ mitɔn lɛ́ bónú yě lɔ ní wa mɔ̌. Ényí ado nɔ wá hu we hweɖélɛ́nu hǔn, nɔ ɖɔ nǔ e ɖo ayi towe mɛ lɛ́ é bǐ nú Mawu. (Ðɛh. 62:8, 9) Mi nɔ ɖɔ xó dó hwɛjijɔ e wú è sixú gán jɛ Jexóva wú lɛ́ é jí ɖó kpɔ́ ɖo xwédo mitɔn mɛ.d Lěe nǔ sísɔ́ ɖ’ayǐ jɛ nukɔn nú adla ɖé ná d’alɔ vǐ mitɔn lɛ́ gbɔn é ɔ, mɔ̌ wɛ nǔ sísɔ́ ɖ’ayǐ jɛ nukɔn nú yadónúmɛ ná d’alɔ yě gbɔn é nɛ́. Yě ná kpankɔ́n, bɔ ayi yětɔn ná lɛ́ j’ayǐ, ɖó è ko kplɔ́n yě ɖɔ yě ní ɖeji dó Jexóva wú.

18. Étɛ́ sɔ ka hɛn nu nú mǐ?

¹⁸ Fífá Mawu tɔn nɔ zɔ́n bɔ mǐ nɔ nɔ ayijayǐ mɛ. (Filí. 4:6, 7) Jexóva nɔ zán fífá tɔn dó xo hwihwɛ́ ayi mǐtɔn, ényí azɔn, adla kpó yadónúmɛ kpó e sixú wa nǔ dó mǐ wú égbé lɛ́ é ná bo ɖo fínɛ́ ɔ nɛ́. É nɔ zán mɛxó agun tɔn azɔ̌syɛ́nsyɛ́nwatɔ́ lɛ́ dó kpé nukún mǐ wú. Gɔ́ ná ɔ, é jɔ wǔ mǐ mɛ bǐ bɔ mǐ sixú d’alɔ mǐɖée. Fífá e sín vǐví ɖu wɛ mǐ ɖe din é ná sɔ́ nǔ ɖ’ayǐ nú mǐ, bɔ mǐ ná sixú dɛ ɖo wǔvɛ́ e syɛ́n hú gǎn éé mɔ wɛ mǐ ɖe din lɛ́ é nu, káká jɛ “wǔvɛ́ ɖaxó” ɔ jí. (Mat. 24:21) Hwe énɛ́ nu ɔ, é ná byɔ́ ɖɔ mǐ ní kpo ɖo fífá ɖó wɛ, bo lɛ́ d’alɔ mɛ ɖěvo lɛ́ bónú yě lɔ ní wa nǔ ɖokpó ɔ. Amɔ̌, ɖo wǔvɛ́ ɖaxó ɔ gúdo ɔ, mǐ sɔ́ ná mɔ tagba syɛ́nsyɛ́n e ná ɖó adohu adohu nú mǐ lɛ́ é ɖě ǎ. Gǔdo mɛ ɔ, mǐ ná wá ɖu vǐví nǔ e Jexóva nɔ ba nú mǐ hwebǐnu é tɔn; énɛ́ wɛ nyí fífá jɔ fífá e ná nɔ ayǐ káká sɔ́yi é.—Eza. 26:3, 4.