Nǔ ɖagbe kpó nǔ nyanya kpó: Wěɖexámɛ e wa azɔ̌ é

1. Alɔwlíwlí

Linlin vovo wɛ mɛ lɛ́ nɔ ɖó dó alɔwlíwlí kpó nǔ e é nɔ byɔ́ cóbɔ è ná ɖó alɔwlíwlí awǎjijɛnɔ ɖé é kpó wú.

TÍNMƐ TƆN: Alɔwlíwlí ɔ, tuto ɖé wɛ bɔ Mawu ɖó ayǐ, énɛ́ wú ɔ, é tuun nǔ e sín hudó asú kpó asi kpó ɖé ɖó bo ná ɖó awǎjijɛ é. (Maki 10:6-9) Ényí yě mɛ e da yěɖée lɛ́ é ma nɔ sɔ́ ayi ɖó nǔ e alɔwlíwlí ɔ ná hɛn wá nú yě mɛ ɖokpó ɖokpó é jí ǎ, bo nɔ sɔ́ ayi ɖó nǔ e yě mɛ ɖokpó ɖokpó sixú wa bo ná ná hlɔ̌nhlɔ́n alɔwlíwlí ɔ é jí ɔ, yě sixú ɖó awǎjijɛ. Asú e yí wǎn nú asi tɔn é ná ɖe xlɛ́ gbɔn lěe é nɔ wa nǔ xá ɛ gbɔn é kpó lěe é nɔ kpé nukún dó wǔ tɔn gbɔn é kpó gblamɛ. Gɔ́ ná ɔ, asi e nɔ sí asú tɔn é nɔ nɔ gǔdo n’i, bo nɔ lɛ́ ɖɔ xó n’i kpó sísí kpó.

WĚÐEXÁMƐ BIBLU TƆN LƐ́ NƆ WA AZƆ̌: Quang kpó Thi kpó e nɔ nɔ Viêtnam é ɖi ɖɔ émí kún ná ɖó alɔwlíwlí awǎjijɛnɔ gbeɖé ó. Hwɛhwɛ ɔ, Quang nɔ nyɔ́ xomɛ ǎ. É ɖɔ: “Lěe nǔ nɔ cí nú Thi é nɔ ɖɔ nǔɖé nú mì ǎ, bɔ un nɔ ɖe è kpo hwɛhwɛ.” Thi ba ná gbɛ́ asú. É ɖɔ: “Un mɔ ɖɔ un kún sɔ́ sixú ɖeji dó asú ce wú alǒ ɖó sísí n’i ó.”

Gǔdo mɛ ɔ, Quang kpó Thi kpó kplɔ́n nǔ e Biblu kplɔ́n mɛ é kpó lěe yě ná zán Efɛ́zinu lɛ́ 5:33 gbɔn ɖo alɔwlíwlí yětɔn mɛ é kpó. Quang ɖɔ: “Wěmafɔ énɛ́ d’alɔ mì bɔ un mɔ ɖɔ un ɖó ná nɔ nyɔ́ xomɛ bo ná nɔ bló bɔ Thi ná nɔ mɔ ɖɔ un yí wǎn nú émí bo nɔ lɛ́ kpé nukún dó émí wú ɖo agbaza kpó lěe nǔ nɔ cí nú mɛ é kpó lixo. Ée un jɛ nǔ wa gbɔn mɔ̌ jí é ɔ, é nɔ yí wǎn nú mì bo nɔ lɛ́ ɖó sísí nú mì.” Gɔ́ ná ɔ, Thi ɖɔ: “Lě do un zán nǔ e Efɛ́zinu lɛ́ 5:33 ɖɔ é bo nɔ ɖó sísí nú asú ce sɔ é ɔ, mɔ̌ do wɛ é nɔ bló bɔ un nɔ mɔ ɖɔ é yí wǎn nú mì, nɔ nya xɛ ɖo jǐ ce, lobo nɔ lɛ́ bló bɔ un nɔ ɖó fífá sɔ.”

2. Lěe è ná nɔ wa nǔ xá mɛ ɖěvo lɛ́ gbɔn é

Hwɛhwɛ ɔ, mɛ lɛ́ nɔ wa nǔ xá mɛ ɖěvo lɛ́ ɖo ali e ma sɔgbe ǎ é nu, ɖó sinmɛ agbaza tɔn yětɔn, to e mɛ yě gosín é, lěe yě cí ɖo wěxo é, alǒ sinsɛn e mɛ yě ɖe é wútu.

TÍNMƐ TƆN: Biblu kplɔ́n mɛ ɖɔ è ní gbɛ́ wǎn nú mɛ e ɖó sinmɛ agbaza tɔn ɖěvo alǒ gosín akɔta ɖěvo mɛ kabǐ nɔ ɖó xó xá mɛ e kpó yě kpó ɖó mɛ̌ ɖokpó ɔ lɛ́ é ǎ. É nyɔ́ wa ɔ, é dó wǔsyɛ́n lanmɛ nú mǐ ɖɔ mǐ ní nɔ ɖó sísí nú gbɛtɔ́ lɛ́ bǐ, ényí yě ná bo ɖó sinmɛ agbaza tɔn ɖěbǔ, gosín akɔta ɖěbǔ mɛ kabǐ jɛ dɔkun alǒ ji ya ɔ nɛ́. (Mɛsɛ́dó 10:34) Ényí mǐ ná bo ma tlɛ yí gbe nú nǔ e mɛ ɖěvo lɛ́ ɖi nǔ ná é alǒ lěe yě nɔ wa nǔ gbɔn é ǎ ɔ, mǐ sixú kpo ɖo nǔ wa xá yě wɛ kpó xomɛnyínyɔ́ kpó kpódó sísí kpán.—Matíe 7:12.

WĚÐEXÁMƐ BIBLU TƆN NƆ WA AZƆ̌: È kplɔ́n Daniel ɖɔ é ní nɔ kpɔ́n mɛ e gosín Asie lɛ́ é dó mɔ mɛ ɖěɖěe nyí awǒvinú nú to tɔn lɛ́ é. Wǎgbɔ tɔn ɔ, é nɔ gbɛ́ wǎn nú mɛ ɖěbǔ e gosín Asie sín xá mɛ lɛ́ é, bɔ hwɛhwɛ ɔ, é nɔ zun yě ɖo agbawungba. Daniel ɖɔ: “Un lin ɖɔ to ce jí jɛ hun dó wɛ un ɖe. Un tlɛ nɔ lin ɖ’ayǐ ɖɔ lěe un nɔ lin nǔ gbɔn é, alǒ lěe un nɔ wa nǔ gbɔn é kún sɔgbe ó ǎ.”

Daniel wá kplɔ́n nǔ e Biblu kplɔ́n mɛ é. Daniel ɖɔ: “Un ɖó ná húzú lěe un nɔ lin nǔ gbɔn é bǐ mlɛ́mlɛ́. Un ɖó ná nɔ kpɔ́n mɛ ɖěvo lɛ́ lěe Mawu nɔ kpɔ́n yě gbɔn é, énɛ́ wɛ nyí ɖɔ mǐ bǐ wɛ nyí nǔ ɖokpó ɔ, ényí mǐ ná bo nɔ nɔ fí ɖěbǔ ɔ nɛ́.” Daniel tínmɛ lěe nǔ nɔ cí n’i din dó mɛ e é nɔ xo go lɛ́ é wú é. É ɖɔ: “Hwɛhwɛ ɔ, un tlɛ nɔ lin tamɛ dó fí e yě gosín é jí ǎ. Gbɛtɔ́ alɔkpa lɛ́ bǐ wɛ un yí wǎn ná din bo zun xɔ́ntɔn vívɛ́ lɛ́ gbɔn awa vovo gbɛ ɔ tɔn lɛ́ xwé.”

Nú a ná ɖó mɔjɛmɛ ɖěvo lɛ́ gɔ́ ná hǔn, xa Fɔ́n! (Gungbe) No. 3 2020 tɔn e xóta tɔn nyí “Be Nuvẹun Gán Busẹ Ya?” é ɖo jw.org jí

3. Akwɛ́

Mɛ gěgé nɔ nya dɔkun jijɛ gbé bo ná dó ɖó awǎjijɛ kpó sɔgúdo ɖagbe ɖé kpó.

TÍNMƐ TƆN: Mǐ ɖó akwɛ́ sín hudó, amɔ̌, ényí mǐ ɖó akwɛ́ ɔ, énɛ́ ko xlɛ́ ɖɔ mǐ ná ɖó awǎjijɛ alǒ sɔgúdo ɖagbe dandan ǎ. (Nǔnywɛ́xó 18:11; 23:4, 5) É nyɔ́ wa ɔ, nǔnywɛ́ Mawu tɔn zínzán lěe é ɖe gbɔn ɖo Biblu ɔ mɛ é wɛ nɔ zɔ́n bɔ è nɔ ɖó awǎjijɛ jɔ awǎjijɛ kpó sɔgúdo e ɖó jiɖe é kpó.—1 Timɔtée 6:17-19.

WĚÐEXÁMƐ BIBLU TƆN NƆ WA AZƆ̌: Cardo nyí nya ɖé bo nɔ nɔ Indonésie, bo sɔ́ ayi ɖó dɔkun jijɛ jí. É ɖɔ: “Un ɖu vǐví nǔ e sín dlɔ̌ mɛ gěgé nɔ kú é tɔn. Un kpé wú bo nɔ yi to lɛ́ mɛ, bo nɔ lɛ́ xɔ nǔ axivɛ́nú lɛ́, mɔ̌to lɛ́ kpó xwé lɛ́ kpó.” Dɔkun mɔ̌hun nɔ ayǐ ǎ. Cardo ɖɔ: “È hízí mì, bɔ akwɛ́ e un jɛ tagba nú xwe énɛ́ lɛ́ bǐ bo mɔ é bǐ yi ɖo nukúnxwixwe ɖokpó mɛ. Un wa azɔ̌ syɛ́nsyɛ́n nú xwe énɛ́ lɛ́ bǐ bo jɛ dɔkun, amɔ̌, énɛ́ gúdo ɔ, awakanmɛ kú mì ɖó un sɔ́ ɖó nǔ ɖě ǎ, bo mɔ ɖɔ un kún hwɛ́n nǔtí ó.”

Cardo jɛ wě e Biblu ɖe xá mɛ dó akwɛ́ wú é xwedó jí. É sɔ́ nɔ zán hlɔ̌nhlɔ́n tɔn bǐ dó nya dɔkun jijɛ gbé ɖě ǎ, é nyɔ́ wa ɔ, é wá gbeta ɔ kɔn bo ná nɔ zán gbɛ e bɔkun é. É ɖɔ: “Un mɔ ɖɔ din ɔ, un jɛ dɔkun jɔ dɔkun ɔ, ɖó un zun xɔ́ntɔn vívɛ́ xá Mawu. Un hɛn ɔ, un ná d’amlɔ jɛ tó jí hwebǐnu; un ɖó awǎjijɛ nǔgbó ɔ.”

Nú a ná tuun nǔ ɖěvo lɛ́ dó linlin e Biblu ɖó dó akwɛ́ wú é wú hǔn, xa xóta “Wěma kplɔ́nkplɔ́n kpó dɔkun jijɛ kpó ka sixú zɔ́n bɔ è ɖó sɔgúdo ɖagbe hú gǎn ɖé a?” ɖo Atɔxwɛ No. 32021 mɛ, ɖo jw.org jí.

4. Xóɖóxámɛ

Linlin vovo wɛ mɛ lɛ́ nɔ ɖó dó nǔ e è yí gbe ná ɖo xóɖóxámɛ kpáxwé lɛ́ é wú.

TÍNMƐ TƆN: Biblu ɖó dogbó nú lěe mǐ ɖó ná ɖe jlǒ xóɖóxámɛ tɔn mǐtɔn xlɛ́ gbɔn é. Nyɔ̌nu ɖěvo biba alǒ afɔdógbě, to nyinya, xóɖóxámɛ e nɔ tíin ɖo mɛ e ma wlí alɔ ǎ lɛ́ é tɛ́ntin é, xó ɖó xá mɛ e kpó mɛ kpó ɖó mɛ̌ ɖokpó ɔ é kpó xó ɖó xá kanlin kpó ɖo xókwín “agalilɛ” ɔ mɛ. (1 Kɔlɛ́ntinu lɛ́ 6:9, 10) Xóɖóxámɛ ɔ, nǔníná ɖé wɛ bo gosín Mawu gɔ́n, bɔ é sɔ́ ɖó te nú súnnu ɖokpó nyɔ̌nu ɖokpó e wlí alɔ xá yěɖée lɛ́ é kɛ́ɖɛ́.—Nǔnywɛ́xó 5:18, 19.

WĚÐEXÁMƐ BIBLU TƆN NƆ WA AZƆ̌: Nǎwe ɖé nɔ nɔ Australie bo nɔ nyí Kylie, bo ɖɔ: “Hwenu e un ɖo tlɛnmɛ é ɔ, un nɔ lin ɖɔ nú è ɖó xó xá mì ɔ, un ná mɔ ɖɔ è yí wǎn nú mì, bɔ un lɛ́ ɖo ayijayǐ mɛ. Amɔ̌, flíjɛ tɔn wɛ jɛ. Un ɖó linkpɔ́n bo lɛ́ mɔ ɖɔ è kún yí wǎn nú mì ó.”

Nukɔnmɛ ɔ, Kylie kplɔ́n nǔ e Biblu kplɔ́n mɛ dó xóɖóxámɛ wú é, bo zán. É ɖɔ: “Un mɔ ɖɔ nǔgbódodó Mawu tɔn lɛ́ ɖo fínɛ́ bo ná nya xɛ ɖo jǐ ce, nú un ma se wǔvɛ́ ó. Un nɔ mɔ din ɖɔ un ɖo ayijayǐ mɛ, bɔ è lɛ́ yí wǎn nú mì, ɖó un nɔ wa nǔ lɛ́ lěe Jexóva nɔ ba ɖɔ mǐ ní wa gbɔn é. Wěɖexámɛ Biblu tɔn lɛ́ zínzán xɔ mì ɖo wǔvɛ́ gěgé sí!”