Xwedó kpɔ́ndéwú wɛnsagun gbejínɔtɔ́ lɛ́ tɔn

1-2. (a) Ali tɛ́ lɛ́ nu mǐ ka gbɔn vo nú wɛnsagun lɛ́ ɖe? (b) Étɛ́ mǐ kpó wɛnsagun lɛ́ kpó ka ɖó ɖo bǔ?

ÐÓ MǏ nyí togun Jexóva tɔn wútu ɔ, mǐ ɖo xwédo wǎnyíyínɔ e mɛ mɛ e nɔ sɛn ɛ lɛ́ é ɖe é ɖé mɛ. Nɔví súnnu kpó nɔví nyɔ̌nu kpó mǐtɔn e gbɔn gbɛ ɔ bǐ mɛ lɛ́ é, gɔ́ nú wɛnsagun lǐvi mɔ̌kpán ɖo xwédo énɛ́ mɛ. (Dan. 7:9, 10) Ényí è ɖo wɛnsagun lɛ́ xó ɖɔ wɛ ɔ, mǐ sixú nɔ lin tamɛ dó lě do yě gbɔn vo nú mǐ sɔ é jí. Ði kpɔ́ndéwú ɔ, wɛnsagun lɛ́ ko tíin xóxó có mǐdɛɛ lɛ́ wá jɔ. (Jɔb. 38:4, 7) Yě ɖ’agbɔ̌n hú mǐ tawun. Gɔ́ ná ɔ, bǎ e mɛ yě nyí mɛ mímɛ́ bo lɛ́ nyí nǔjlɔ́jlɔ́watɔ́ yi ɖó é ɔ, mǐ mɛ gbɛtɔ́ hwɛhutɔ́ lɛ́ sixú nyí mɛ mímɛ́ bo lɛ́ nyí nǔjlɔ́jlɔ́watɔ́ yi ɖó bǎ énɛ́ mɛ ǎ.—Luk. 9:26.

² Vogbingbɔn énɛ́ lɛ́ ɖo fínɛ́ có, mǐ kpó wɛnsagun lɛ́ kpó bǐ ka ɖó nǔ gěgé ɖo bǔ. Ði kpɔ́ndéwú ɔ, wɛnsagun lɛ́ ɖɔhun ɔ, mǐ sixú tɛ́n kpɔ́n bo ɖó jijɔ ɖaaɖagbe Jexóva tɔn lɛ́. Mǐ ɖó mɛɖésúsíninɔ wɛnsagun lɛ́ ɖɔhun. Wɛnsagun lɛ́ ɖó nyǐkɔ yětɔn yětɔn, bɔ mɛ alɔkpa e yě nyí é lɛ́ gbɔn vovo, lobɔ yě lɛ́ ɖó azɔ̌ vovo lɛ́ bo nɔ wa ɖo sinsɛnzɔ́ Jexóva tɔn mɛ. Mɔ̌ wɛ nǔ nyí gbɔn nú mǐ lɔmɔ̌. Gɔ́ ná ɔ, wɛnsagun lɛ́ ɖɔhun ɔ, mǐ nɔ mɔ ɖɔ é byɔ́ ɖɔ mǐ ní sɛn Gbɛɖótɔ́ mǐtɔn.—1 Pi. 1:12.

3. Étɛ́ kpɔ́ndéwú wɛnsagun gbejínɔtɔ́ lɛ́ tɔn ka sixú kplɔ́n mǐ?

³ Ðó mǐ kpó wɛnsagun lɛ́ kpó ɖó nǔ gěgé ɖo bǔ wútu ɔ, kpɔ́ndéwú ɖagbe yětɔn sixú dó wǔsyɛ́n lanmɛ nú mǐ, bo lɛ́ kplɔ́n nǔ mǐ. Nǔgbó ɔ, kpɔ́ndéwú yětɔn sixú kplɔ́n nǔ ɖagbe gěgé mǐ. Ðo xóta élɔ́ mɛ ɔ, mǐ ná gbéjé lěe mǐ sixú xwedó kpɔ́ndéwú mɛɖéesɔ́hwe tɔn wɛnsagun gbejínɔtɔ́ lɛ́ tɔn gbɔn é kpɔ́n. Mǐ ná lɛ́ gbéjé lěe mǐ sixú xwedó wǎn e yě yí nú gbɛtɔ́ lɛ́ é, didɛ yětɔn kpó gǎn e dó wɛ yě ɖe bo ná bló bɔ agun ɔ ná kpo ɖo mǐmɛ́ jí é kpó sín kpɔ́ndéwú kpɔ́n.

WƐNSAGUN LƐ́ NƆ ZÉ YĚÐÉE HWE

4. (a) Nɛ̌ wɛnsagun lɛ́ ka nɔ ɖe xlɛ́ ɖɔ émí nɔ sɔ́ émíɖée hwe gbɔn? (b) Étɛ́wú wɛnsagun lɛ́ ka nɔ sɔ́ yěɖée hwe? (Ðɛhan 89:8)

⁴ Wɛnsagun gbejínɔtɔ́ lɛ́ nɔ zé yěɖée hwe. Yě mɔ nǔ kpɔ́n, ɖó hlɔ̌nhlɔ́n bo lɛ́ ɖó nǔnywɛ́ có, yě ka nɔ xwedó ali e Jexóva nɔ xlɛ́ yě é. (Ðɛh. 103:20) Ényí yě ɖo azɔ̌ e è sɔ́ d’así nú yě lɛ́ é wa wɛ ɔ, yě nɔ yí nugo gbeɖé ɖó nǔ e yě wa lɛ́ é wú, alǒ xlɛ́ ɖɔ émí ɖó hlɔ̌nhlɔ́n hú gbɛtɔ́ lɛ́ flaflá tɔn ǎ. Yě nɔ wa jlǒ Mawu tɔn kpó xomɛhunhun kpó, ényí è ma tlɛ tuun nyǐkɔ yětɔn ǎ ɔ nɛ́.a (Bǐb. 32:25, 30; 2 Axɔ́. 19:35) Yě nɔ yí gbe bónú è nɔ xɔ susu e jɛxá Jexóva é ɖěbǔ nú yě ǎ. Étɛ́wú wɛnsagun lɛ́ ka nɔ zé yěɖée hwe sɔmɔ̌? Ðó yě yí wǎn nú Jexóva bo nɔ ɖó sísí e gɔ́ngɔ́n é n’i wútu.—Xa Ðɛhan 89:8.

5. Nɛ̌ wɛnsagun ɖé ka ɖe xlɛ́ ɖɔ émí nɔ sɔ́ émíɖée hwe hwenu e é ɖo nǔ gbɛ́ nú mɛsɛ́dó Jaan wɛ é gbɔn? (Kpɔ́n ɖiɖe ɔ lɔmɔ̌.)

⁵ Mǐ ní kpɔ́n nǔ e jɛ bo xlɛ́ mɛɖéesɔ́hwe wɛnsagun lɛ́ tɔn é ɖokpó. Ðo 96 H.M. tɔn mɔ̌ ɔ, wɛnsagun e è ma tuun nyǐkɔ tɔn ǎ é ɖé xlɛ́ nǔmimɔ e jí wǔ é ɖé mɛsɛ́dó Jaan. (Nǔɖe. 1:1) Nɛ̌ Jaan ka wa nǔ gbɔn hwenu e é mɔ nǔmimɔ ɔ é? É tɛ́n kpɔ́n bá sɛn wɛnsagun ɔ. Amɔ̌, nǔɖíɖó gbigbɔ tɔn gbejínɔtɔ́ énɛ́ yá wǔ gbɛ́ nǔ n’i bo ɖɔ: ‘Cɔ́ hwiɖée! Ma bló mɔ̌ ó! Kannumɔ hǎtɔ́ towe wɛ un nyí kpowun, bo lɛ́ nyí kannumɔ hǎtɔ́ nɔví towe lɛ́ tɔn. Sɛn Mawu!’ (Nǔɖe. 19:10) Wɛnsagun énɛ́ zé éɖée hwe tawun! Wɛnsagun ɔ ba ɖɔ è ní xɔ susu nú émí ǎ. É yá wǔ dɔn ayi Jaan tɔn yi Jexóva Mawu jí. Ðo hwe ɖokpó ɔ nu ɔ, wɛnsagun ɔ ɖe Jaan kpo ǎ. Wɛnsagun ɔ ko sɛn Jexóva nú xwe mɔ̌kpán, bo lɛ́ ɖó hlɔ̌nhlɔ́n hú Jaan flaflá tɔn có, é sɔ́ éɖée hwe bo ylɔ́ mɛsɛ́dó ɔ ɖɔ kannumɔ hǎtɔ́ émítɔn. Wɛnsagun ɔ tlɛ ɖó ná ɖe wě xá Jaan có, é ka wa nǔ xá mɛsɛ́dó mɛxómɔ ɔ kpó xomɛsin kpó ǎ. É nyɔ́ wa ɔ, wɛnsagun ɔ ɖɔ xó kpó xomɛnyínyɔ́ kpó. É sixú ko mɔ ɖɔ nǔ e Jaan mɔ é wɛ jí wǔ n’i.

6. Nɛ̌ mǐ ka sixú xwedó kpɔ́ndéwú mɛɖéesɔ́hwe tɔn wɛnsagun lɛ́ tɔn gbɔn?

⁶ Nɛ̌ mǐ ka sixú xwedó mɛɖéesɔ́hwe wɛnsagun lɛ́ tɔn sín kpɔ́ndéwú gbɔn? Mǐ lɔ sixú nɔ wa azɔ̌ e è sɔ́ d’así nú mǐ lɛ́ é ma yí nugo, alǒ nyi alɔ nú nǔ wiwa cí nǔ ɖɔ mǐ ɖó nǔwúkpíkpé bǔnɔ lɛ́ wɛ ɖɔhun. (1 Kɔ. 4:7) Gɔ́ ná ɔ, mǐ ɖó ná nɔ lin ɖɔ mǐ hú gǎn mɛ ɖěvo lɛ́ ɖó mǐ ko ɖo Jexóva sɛn wɛ sín xwe mɔ̌kpán ɖíe, alǒ ɖó mǐ ɖó wǔjɔmɛzɔ́ ɖé lɛ́ wútu ǎ. Nǔgbó ɔ, lě do mǐ ɖó wǔjɔmɛzɔ́ lɛ́ sɔ é ɔ, mɔ̌ do wɛ mǐ ɖó ná nɔ mɔ ɖɔ mǐ hwe hú mɛ ɖěvo lɛ́ sɔ. (Luk. 9:48) Mǐ ba ná wa mɛsɛntɔ́zɔ́ nú mɛ ɖěvo lɛ́ wɛnsagun lɛ́ ɖɔhun. Mǐ ba ná sɔ́ mǐɖée ɖ’ajo ǎ.

7. Ényí mǐ ɖó ná gbɛ́ nǔ nú mɛɖé, alǒ ɖe wě xá mɛɖé ɔ, nɛ̌ mǐ ka sixú ɖe xlɛ́ ɖɔ mǐ nɔ sɔ́ mǐɖée hwe gbɔn?

⁷ Mǐ sixú lɛ́ xlɛ́ ɖɔ mǐ nɔ sɔ́ mǐɖée hwe hwenu e mǐ ɖó ná gbɛ́ nǔ nú mɛɖé alǒ ɖe wě xá ɛ é; é sixú nyí nǔɖitɔ́ hǎtɔ́ ɖé alǒ vǐ mǐtɔn. Ényí mǐ ɖo wě ɖe xá mɛɖé wɛ ɔ, é sixú byɔ́ ɖɔ mǐ ní nɔ tlɔlɔ. Amɔ̌, lěe wɛnsagun e ɖe wě xá Jaan é bló kpó xomɛnyínyɔ́ kpó gbɔn é ɖɔhun ɔ, mǐ sixú nɔ tlɔlɔ hwenu e mǐ ɖo wě ɖe xá mɛɖé wɛ é, bo ka ná bló bɔ awakanmɛ ná kú mɛ ɔ ǎ. Ényí mǐ ma nɔ mɔ ɖɔ mǐ hú gǎn mɛ ɖěvo lɛ́ ǎ ɔ, mǐ ná nɔ ɖe wě e jínjɔ́n Biblu jí lɛ́ é xá yě kpó sísí kpó kpódó xomɛnyínyɔ́ kpán.—Koló. 4:6.

WƐNSAGUN LƐ́ YÍ WǍN NÚ GBƐTƆ́ LƐ́

8. (a) Sɔgbe xá Luki 15:10 ɔ, nɛ̌ wɛnsagun lɛ́ ka nɔ ɖe xlɛ́ ɖɔ émí yí wǎn nú gbɛtɔ́ lɛ́ gbɔn? (b) Azɔ̌ tɛ́ wɛnsagun lɛ́ ka nɔ wa ɖo wɛnjíjlázɔ́ ɔ kpáxwé? (Kpɔ́n ɖiɖe e ɖo jí é lɔmɔ̌.)

⁸ Wɛnsagun lɛ́ nɔ ɖó wǔ zɔ nú gbɛtɔ́ lɛ́ ǎ. Yě yí wǎn nú gbɛtɔ́ lɛ́. Ényí hwɛhutɔ́ ɖé sín hwɛ vɛ́ n’i, énɛ́ wɛ nyí ɖɔ, ényí lɛ̌ngbɔ́ e bú é ɖé lɛ́ kɔ wá Jexóva gɔ́n alǒ ényí mɛɖé húzú lěe é nɔ zán gbɛ gbɔn é bo wá nǔgbó ɔ mɛ ɔ, yě nɔ j’awǎ. (Xa Luki 15:10.) Wɛnsagun lɛ́ nɔ lɛ́ ɖ’alɔ ɖo wɛn Axɔ́súɖuto ɔ tɔn jíjlá mɛ kpó kanɖódónǔwú kpó. (Nǔɖe. 14:6) Yě nɔ jlá wɛn ɔ gbɛtɔ́ lɛ́ tlɔlɔ ǎ có, yě ka sixú xlɛ́ ali wɛnjlátɔ́ ɖé yi mɛ e ɖo biba wɛ bo ná kplɔ́n nǔ dó Jexóva wú é ɖé gɔ́n. É ɖo wɛn ɖɔ, mǐ kún sixú ɖɔ bo t’afɔ jí ɖɔ wɛnsagun lɛ́ nɔ ɖ’alɔ ɖo ninɔmɛ ɖokpó ɖokpó mɛ ó. È ná ɖɔ ɔ, Jexóva sixú zán wlɛnwín ɖěvo lɛ́, ɖi gbigbɔ mímɛ́ tɔn mɔ̌ dó d’alɔ gbɛtɔ́ lɛ́ alǒ dó xlɛ́ ali mɛsɛntɔ́ tɔn lɛ́. (Mɛ. 16:6, 7) É ɖo mɔ̌ có, é nɔ zán wɛnsagun tɔn lɛ́ dó d’alɔ mǐ hwenu e mǐ ɖo wɛn ɔ jlá wɛ é. Énɛ́ wú ɔ, ényí mǐ ɖo wɛn ɖagbe ɔ jlá wɛ ɔ, mǐ sixú ɖeji ɖɔ wɛnsagun lɛ́ ná ɖo fínɛ́ bá d’alɔ mǐ.—Kpɔ́n gbǎví “Mawu ná sin nú ɖɛ yětɔn lɛ́.”

9. Nɛ̌ mǐ ka sixú nɔ yí wǎn nú gbɛtɔ́ lɛ́ wɛnsagun lɛ́ ɖɔhun gbɔn?

⁹ Nɛ̌ mǐ ka sixú xwedó wǎn e wɛnsagun lɛ́ yí nú gbɛtɔ́ lɛ́ é sín kpɔ́ndéwú gbɔn? Ényí è ɖɔ nú agun ɔ ɖɔ è yí mɛɖé dó agun mɛ ɔ, mǐ ná j’awǎ wɛnsagun lɛ́ ɖɔhun. Mǐ ná yi dó doo nú nɔví ɔ, bo ná bló bɔ é ná mɔ ɖɔ mǐ yí wǎn nú émí. (Luk. 15:4-7; 2 Kɔ. 2:6-8) Mǐ sixú lɛ́ xwedó kpɔ́ndéwú wɛnsagun lɛ́ tɔn gbɔn nǔ e wú mǐ kpé é bǐ wiwa ɖo wɛnɖagbejíjlázɔ́ ɔ mɛ gblamɛ. (Nǔt. 11:6) Gɔ́ ná ɔ, lěe wɛnsagun lɛ́ nɔ nɔ gǔdo nú mǐ ɖo wɛnɖagbejíjlázɔ́ ɔ mɛ gbɔn é ɔ, mǐ lɔ sixú ba ali e nu mǐ ná nɔ gǔdo nú nɔví súnnu kpó nɔví nyɔ̌nu kpó mǐtɔn lɛ́ ɖo sinsɛnzɔ́ ɔ mɛ ɖe lɛ́ é. Ði kpɔ́ndéwú ɔ, mǐ ka sixú bló tito bá wa azɔ̌ xá wɛnjlátɔ́ e ma ko mɔ nǔ káká ɖé kpɔ́n ǎ é ɖé a? Mǐ ka sixú nɔ gǔdo nú nɔví súnnu kpó nɔví nyɔ̌nu kpó mǐtɔn mɛxómɔ lɛ́ alǒ wɔ̌nɖowǔnánɔ lɛ́ bónú yě lɔ ná sixú ɖ’alɔ ɖo sinsɛnzɔ́ ɔ mɛ a?

10. Étɛ́ kpɔ́ndéwú Sara tɔn ka sixú kplɔ́n mǐ?

¹⁰ Ényí ninɔmɛ mǐtɔn lɛ́ ɖó dogbó nú nǔ e mǐ sixú wa é ɔ ka lo? Mǐ sixú kpo ɖo ali ɖěɖěe nu mǐ ná wa azɔ̌ ɖó kpɔ́ xá wɛnsagun lɛ́ ɖo wɛnjíjlázɔ́ ɔ mɛ ɖe lɛ́ é ba wɛ. Mǐ ní kpɔ́n nɔví nyɔ̌nu e nɔ nyí Sarab bo nɔ nɔ Inde é sín kpɔ́ndéwú. Ée Sara wa gběxosín-alijítɔ́zɔ́ nú xwe 20 mɔ̌ gúdo é ɔ, é bɛ́ azɔn bo nɔ ɖo zan jí hwebǐnu. É ɖó linkpɔ́n tawun, hwɛ tɔn ka jɔ. Amɔ̌, gǔdo e nɔví lɛ́ nɔ nú Sara kpó wǎnyíyí kpó é, gɔ́ nú Biblu e é nɔ xa gbe bǐ gbe é zɔ́n bɔ kpɛɖé kpɛɖé ɔ, é jɛ linlin ɖagbe lɛ́ ɖó jí. É ɖo wɛn ɖɔ, é ɖó ná húzú sinsɛnzɔ́ tɔn sɔgbe xá ninɔmɛ tɔn yɔ̌yɔ́ ɔ. Ðó é ma tlɛ sixú jínjɔ́n ayǐ bo wlán nǔ sɛ́dó mɛ ǎ wútu ɔ, mawuxóɖiɖɔ gbɔn alǒkan jí kɛ́ɖɛ́ mɛ jɛ́n é nɔ ɖ’alɔ ɖe. Énɛ́ wú ɔ, é nɔ ylɔ́ mɛbakpɔ́n tɔn lɛ́ gbɔn alǒkan jí, bɔ yědɛɛ lɛ́ nɔ dó mɛ ɖěvo e wɛn ɔ sixú dɔn lɛ́ é gesí n’i. Le tɛ́ énɛ́ ka hɛn wá? Sun yɔywɛ ɖé gúdo ɔ, Sara ɖó Biblu kplɔ́nkplɔ́n 70. Éɖokpónɔ sixú kplɔ́n nǔ xá mɛ énɛ́ lɛ́ bǐ ǎ. Énɛ́ wú ɔ, é jó yě mɛ ɖé lɛ́ dó nú mɛ ɖěvo lɛ́ ɖo agun ɔ mɛ. Gěgé nǔkplɔ́ntɔ́ lɛ́ tɔn nɔ wá kplé mǐtɔn lɛ́ din. Kpɔ́n lěe xomɛ ná ko hun wɛnsagun lɛ́ sɔ ɖɔ yě ɖo azɔ̌ wa ɖó kpɔ́ xá nɔví súnnu kpó nɔví nyɔ̌nu kpó Sara ɖɔhun, éé ɖo nǔ e wú yě kpé lɛ́ é bǐ wa wɛ ɖo wɛnɖagbejíjlázɔ́ ɔ mɛ é!

WƐNSAGUN LƐ́ NƆ DƐ

11. Nɛ̌ wɛnsagun gbejínɔtɔ́ lɛ́ ka sɔ́ kpɔ́ndéwú téwúngbéjú ɖé ɖ’ayǐ ɖo didɛ linu gbɔn?

¹¹ Kpɔ́ndéwú didɛ tɔn nukúnɖéjí wɛ wɛnsagun gbejínɔtɔ́ lɛ́ nyí. Yě ko dɛ ɖo nǔ agɔ kpó nǔ nyanya kpó e è wa xá Jexóva nú xwe afatɔ́n mɔ̌kpán, bɔ é wa nǔ dó yě lɔ wú é nu. Yě mɔ bɔ Satáan kpó nǔɖíɖó gbigbɔ tɔn gěgé ɖěvo lɛ́ kpó fɔ́n gǔ dó Jexóva jí; yě bǐ wɛ ka ko sɛn Jexóva ɖó kpɔ́ ɖ’ayǐ. (Bǐb. 3:1; 6:1, 2; Judi 6) Biblu ɖɔ wɛnsagun gbejínɔtɔ́ ɖé xó nú mǐ bɔ wɛnsagun nyanya ɖé fɔ́n gǔ dó jǐ tɔn. (Dan. 10:13) Gɔ́ ná ɔ, ɖo hwenuxó gbɛtɔ́ tɔn bǐ mɛ ɔ, gbɛtɔ́ alɔsɛ́xwi bǔ ɖé jɛ́n wɛnsagun lɛ́ mɔ bɔ yě nɔ sɛn Jexóva. Nǔ énɛ́ lɛ́ bǐ ɖo fínɛ́ có, wɛnsagun gbejínɔtɔ́ énɛ́ lɛ́ kpo ɖo Jexóva sɛn wɛ kpó awǎjijɛ kpó kpódó kanɖódónǔwú kpán. Yě tuun ɖɔ Mawu ná sú kún dó nú nǔagɔwiwa bǐ ɖo hwetɔnnu.

12. Étɛ́ ka sixú d’alɔ mǐ bɔ mǐ ná dɛ?

¹² Nɛ̌ mǐ ka sixú xwedó kpɔ́ndéwú didɛ tɔn wɛnsagun lɛ́ tɔn gbɔn? Wɛnsagun lɛ́ ɖɔhun ɔ, mǐ sixú mɔ nǔagɔwiwa. Amɔ̌, wɛnsagun lɛ́ ɖɔhun ɔ, mǐ kú d’é jí ɖɔ Mawu ná sú nǔnyanyawiwa bǐ sín kún dó ɖo hwetɔnnu. Énɛ́ wú ɔ, wɛnsagun gbejínɔtɔ́ lɛ́ ɖɔhun ɔ, ‘awakanmɛ nɔ kú mǐ dó nǔɖagbewiwa wú ǎ.’ (Ga. 6:9) Gɔ́ ná ɔ, Mawu d’akpá ɖɔ émí ná d’alɔ mǐ bɔ mǐ ná dɛ. (1 Kɔ. 10:13) Mǐ sixú xo ɖɛ sɛ́dó Jexóva dó byɔ́ gbigbɔ tɔn, éé nɔ zɔ́n bɔ è nɔ ɖó suúlu kpó awǎjijɛ kpó é. (Ga. 5:22; Koló. 1:11) Ényí gbeklánxámɛ ɖí xwi xá wɛ a ka ɖe ɔ lo? Ðeji dó Jexóva wú bǐ mlɛ́mlɛ́, bónú xɛsi ma ɖi we ó. Jexóva ná nɔ gǔdo towe hwebǐnu, bo ná ná hlɔ̌nhlɔ́n we hwebǐnu.—Ebl. 13:6.

WƐNSAGUN LƐ́ NƆ D’ALƆ BƆ È NƆ HƐN AGUN Ɔ ÐÓ MǏMƐ́ JÍ

13. Azɔ̌ bǔnɔ tɛ́ è ka sɔ́ d’así nú wɛnsagun lɛ́ ɖo azǎn gǔdo gúdo tɔn lɛ́ mɛ? (Matíe 13:47-49)

¹³ Jexóva sɔ́ azɔ̌ tají ɖé dó así nú wɛnsagun lɛ́ ɖo azǎn gǔdo gúdo tɔn lɛ́ mɛ. (Xa Matíe 13:47-49.) Wɛnjíjlázɔ́ ɔ nɔ dɔn gbɛtɔ́ lǐvi mɔ̌kpán, éé gosín awa vovo gbɛ ɔ tɔn lɛ́ xwé lɛ́ é. Mɛ énɛ́ lɛ́ ɖé lɛ́ nɔ ɖe afɔ e jɛxá lɛ́ é bo nɔ húzú klisánwun nǔgbó, mɛ ɖěvo lɛ́ ka nɔ wa mɔ̌ ǎ. È ko sɔ́ azɔ̌ dó así nú wɛnsagun lɛ́ bɔ yě ná “ɖe mɛ nyanya lɛ́ ɖó vo nú nǔjlɔ́jlɔ́watɔ́ lɛ́.” Énɛ́ xlɛ́ ɖɔ è sɔ́ azɔ̌ dó así nú yě bɔ yě ná d’alɔ bɔ è ná nya xɛ ɖo mǐmɛ́jíninɔ agun ɔ tɔn jí. Xlɛ́xlɛ́ wɛ énɛ́ ɖe ɖɔ mɛ ɖěbǔ e ɖó gbɛ̌ dídó xá togun Jexóva tɔn te ɖó hwɛjijɔ ɖěbǔ wú é kún sɔ́ sixú lɛ́ kɔ wá gbeɖé ó ǎ; mɔ̌ jɛ́n é ma ka lɛ́ ɖo xlɛ́xlɛ́ wɛ ɖɔ tagba ɖě kún ná nɔ agun ɔ mɛ gbeɖé ó ǎ é nɛ́. Amɔ̌, mǐ sixú kú d’é jí ɖɔ wɛnsagun lɛ́ ɖo gǎn dó wɛ syɛ́nsyɛ́n bónú è ná hɛn agun ɔ ɖó mǐmɛ́ jí.

14-15. Nɛ̌ mǐ ka sixú xwedó kpɔ́ndéwú wɛnsagun lɛ́ tɔn bɔ mǐmɛ́jíninɔ agun ɔ tɔn ɖo gbigbɔ kpó walɔ ɖagbe kpó lixo ná nɔ ɖu ayi mɛ nú mǐ gbɔn? (Kpɔ́n ɖiɖe lɛ́ lɔmɔ̌.)

¹⁴ Nɛ̌ mǐ ka sixú xwedó mǐmɛ́jíninɔ agun ɔ tɔn e nɔ ɖu ayi mɛ nú wɛnsagun lɛ́ é sín kpɔ́ndéwú gbɔn? Mǐ ná wa nǔ e wú mǐ kpé é bǐ bo ná hɛn agun ɔ ɖó mǐmɛ́ jí ɖo walɔ ɖagbe kpó gbigbɔ kpó lixo. Bo ná dó kpé énɛ́ wú ɔ, mǐ nɔ tɛ́n kpɔ́n bo nɔ nya xɛ ɖo ayi mǐtɔn jí gbɔn gbɛ̌ ɖagbe lɛ́ dídó gblamɛ, bo nɔ lɛ́ tɛ́n kpɔ́n bo nɔ nyi alɔ nú nǔ ɖěbǔ e sixú zɔ́n bɔ mǐ ná gɔn gbejí nɔ nú Jexóva é. (Ðɛh. 101:3) Mǐ sixú lɛ́ d’alɔ mawusɛntɔ́ hǎtɔ́ mǐtɔn lɛ́ bɔ yě ná kpo ɖo gbejí nú Jexóva. Ði kpɔ́ndéwú ɔ, ényí mǐ se ɖɔ nǔɖitɔ́ hǎtɔ́ ɖé hu hwɛ syɛ́nsyɛ́n ɖé ɔ, étɛ́ mǐ ka ɖó ná wa? Ðó mǐ yí wǎn n’i wútu ɔ, mǐ ná dó wǔsyɛ́n lanmɛ n’i ɖɔ é ní yi ɖɔ xó ɔ nú mɛxó agun tɔn lɛ́. Ényí é ma yi ɖɔ xó ɔ nú mɛxó agun tɔn lɛ́ ǎ ɔ, mǐdɛɛ lɛ́ ná yi ɖɔ. Mǐ ba ɖɔ nɔví mǐtɔn e nǔɖé d’akpa xɔ́ntɔn e é zun xá Jexóva é wú é ní yá wǔ mɔ alɔdó lěe é nyɔ́ bló gbɔn é!—Ja. 5:14, 15.

¹⁵ É blá wǔ ɖɔ, è ɖó ná ɖe mɛ e hu hwɛ syɛ́nsyɛ́n é ɖé lɛ́ sín agun ɔ mɛ. Ðo ninɔmɛ mɔ̌hun lɛ́ mɛ ɔ, mǐ “sɔ́ nɔ dó gbɛ̌” xá yě ɖě ǎ.c (1 Kɔ. 5:9-13) Tuto énɛ́ nɔ d’alɔ bɔ è nɔ hɛn agun ɔ ɖó mǐmɛ́ jí. Gɔ́ ná ɔ, ényí mǐ wá gbeta ɔ kɔn ɖɔ mǐ kún ná dó gbɛ̌ xá mɛ e è ɖe sín agun mɛ lɛ́ é ó ɔ, mǐ nɔ xlɛ́ nǔgbó nǔgbó ɖɔ mǐ nyɔ́ xomɛ dó yě wú. Kán e mǐ kán ɖ’é jí bo ná se tónú é sixú sísɛ́ yě bɔ yě ná mɔ ɖɔ émí ɖó ná lɛ́ kɔ wá Jexóva gɔ́n. Ényí yě lɛ́ kɔ wá ɔ, mǐ kpó Jexóva kpó, gɔ́ nú wɛnsagun lɛ́ nɔ j’awǎ.—Luk. 15:7.

16. Ali tɛ́ lɛ́ nu a ka ná tɛ́n kpɔ́n bo xwedó kpɔ́ndéwú wɛnsagun lɛ́ tɔn ɖe?

¹⁶ Wǔjɔmɛ ɖaxó wɛ é nyí ɖɔ Jexóva hun ali nú mǐ bɔ mǐ kplɔ́n nǔ dó wɛnsagun lɛ́ wú, bo nɔ lɛ́ wa azɔ̌ xá yě! Mi nú mǐ ní tɛ́n kpɔ́n bo ɖó jijɔ yětɔn ɖaaɖagbe élɔ́ lɛ́: mɛɖéesɔ́hwe yětɔn, wǎn e yě yí nú gbɛtɔ́ lɛ́ é, didɛ yětɔn kpó mǐmɛ́jíninɔ agun ɔ tɔn ɖo walɔ kpó gbigbɔ kpó lixo e nɔ ɖu ayi mɛ nú yě é kpó. Ényí mǐ xwedó kpɔ́ndéwú wɛnsagun gbejínɔtɔ́ lɛ́ tɔn ɔ, mǐ lɔ sixú nɔ xwédo Jexóva tɔn e mɛ mɛsɛntɔ́ tɔn lɛ́ ɖe é mɛ káká sɔ́yi.