Nɔ ba gbɔdónúmɛ ɖo Jexóva gɔ́n

1. Tínmɛ ninɔmɛ e mɛ Jwifu e è wlí yi Babilɔ́nu lɛ́ é ɖe é.

DǑ NUKÚN lěe nǔ ná ko cí nú Jwifu e è wlí yi Babilɔ́nu lɛ́ é mɛ kpɔ́n. Yě mɔ bɔ è sú toxo yětɔn sín kún dó. Ðó hwɛ e yě kpó tɔ́gbó yětɔn lɛ́ kpó hu é wútu ɔ, è kplá yě sín to yětɔn mɛ bo kplá yě yi to ɖěvo mɛ. (2 Tan 36:15, 16, 20, 21) Nǔgbó wɛ ɖɔ ɖo Babilɔ́nu ɔ, yě ɖó mɛɖésúsíninɔ ɖó bǎ ɖé mɛ bo nɔ wa azɔ̌ yětɔn gbe bǐ gbe tɔn lɛ́. (Jel. 29:4-7) Amɔ̌, gbɛ bɔ wǔ ǎ, bɔ é ɖo wɛn ɖɔ, é kún nyí gbɛ alɔkpa e yě ba ná zán é nɛ́ ó. Nɛ̌ nǔ ka cí nú yě dó ninɔmɛ yětɔn wú? Nǔ e yě mɛ ɖokpó ɖɔ é ɖíe: “Mǐ jínjɔ́n Babilɔ́nu tɔ lɛ́ tó; bo ɖo Sinyɔ́ɔ flín sɛ́dó wɛ, bo ɖo avǐ ya wɛ.” (Ðɛh. 137:1) Jwifu lɛ́ ɖó hudó gbɔdónúmɛ tɔn nǔgbó, amɔ̌, mɛ̌ ka ná dó gbɔ énɛ́ nú yě?

2-3. (a) Étɛ́ Jexóva ka wa nú Jwifu e è wlí yi Babilɔ́nu lɛ́ é? (b) Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

² Jexóva nyí “Mawu e nɔ dó gbɔ nú mɛ ɖo ali bǐ nu é.” (2 Kɔ. 1:3) Ðó Mawu wǎnyíyínɔ wɛ é nyí wútu ɔ, gbɔ dídó nú mɛ e sɛkpɔ́ ɛ lɛ́ é bǐ nɔ dó xomɛhunhun n’i. Jexóva tuun ɖɔ mɛ e è wlí yi Babilɔ́nu é ɖé lɛ́ ná yí gbe nú tódɔnnúmɛ émítɔn, bo ná lɛ́ kɔ wá gɔ̌n émítɔn. (Eza. 59:20) Énɛ́ wú ɔ, xwe 100 jɛjí jɛ nukɔn nú hwenu e è wlí yě yi Babilɔ́nu é ɔ, Jexóva sɔ́ dó ayi mɛ nú gbeyíɖɔ Ezayíi bɔ é wlán wěma e nu nyǐkɔ tɔn ɖe é. Étɛ́wú é ka wlán? Ezayíi ɖɔ: “Mawu mitɔn ɖɔ: ‘Mi dó wǔsyɛ́n lanmɛ nú togun ce. Mi dó wǔsyɛ́n lanmɛ n’i.’” (Eza. 40:1) Ɛɛn, gbɔn nǔ e gbeyíɖɔ ɔ wlán lɛ́ é gblamɛ ɔ, Jexóva dó gbɔ e sín hudó Jwifu e è wlí yi Babilɔ́nu lɛ́ é ná ko ɖó é nú yě.

³ Jwifu énɛ́ lɛ́ e è wlí yi Babilɔ́nu é ɖɔhun ɔ, mǐ lɔ nɔ ɖó hudó gbɔdónúmɛ tɔn sín hweɖénu jɛ hweɖénu. Ðo xóta élɔ́ mɛ ɔ, mǐ ná ɖɔ xó dó ali e nu Jexóva dó gbɔ nú Jwifu e è kplá yi Babilɔ́nu lɛ́ é ɖe é atɔn jí: (1) É d’akpá ɖɔ émí ná sɔ́ hwɛ kɛ mɛ ɖěɖěe sín hwɛ vɛ́ nú yě lɛ́ é, (2) é ná nukúnɖíɖó togun tɔn, (3) é d’alɔ yě bɔ xɛsi sɔ́ nɔ ɖi yě ǎ. Ée mǐ ná ɖo xó ɖɔ dó nǔ énɛ́ lɛ́ jí wɛ é ɔ, ɖ’ayi lěe mǐ sixú ɖu le gbɔdónúmɛxó Jexóva tɔn lɛ́ tɔn gbɔn é wú.

JEXÓVA NƆ SƆ́ HWƐ KƐ MǏ

4. Nɛ̌ Jexóva ka ɖe xlɛ́ ɖɔ Mawu nǔbláwǔkúnúmɛtɔ́ wɛ émí nyí gbɔn? (Ezayíi 55:7)

⁴ Jexóva nyí “Tɔ́ e nɔ kú nǔbláwǔ ɖaxó nú mɛ é.” (2 Kɔ. 1:3) É ɖe jijɔ énɛ́ xlɛ́ hwenu e é d’akpá bo ná sɔ́ hwɛ kɛ Jwifu e è wlí yi Babilɔ́nu bɔ hwɛ yětɔn vɛ́ nú yě lɛ́ é é. (Xa Ezayíi 55:7.) É ɖɔ: “Ðó wǎnyíyí ma ɖó dogbó e un ɖó ɔ wú ɔ, un ná kú nǔbláwǔ nú we.” (Eza. 54:8) Nɛ̌ Jexóva ka ná kú nǔbláwǔ nú yě gbɔn? Nǔgbó wɛ ɖɔ Jwifu lɛ́ ná kpo ɖo xɔxɔ nǔ e yě wa lɛ́ é tɔn se wɛ có, Jexóva d’akpá nú yě ɖɔ yě kún ná nɔ Babilɔ́nu káká sɔ́yi ó. Táan ɖé jɛ́n yě ná nɔ Babilɔ́nu ná. (Eza. 40:2) Xó énɛ́ lɛ́ ná ko dó gbɔ nú mɛ ɖěɖěe hwɛ yětɔn lɛ́ vɛ́ ná lɛ́ é, bo ná ko vɔ́ gǎnjɛwú ná yě tawun!

5. Étɛ́wú mǐ ka ɖó hwɛjijɔ gěgé hú gǎn Jwifu e è wlí ahwankannumɔ yětɔn lɛ́ é ɖɔ Jexóva nɔ sɔ́ hwɛ mǐtɔn lɛ́ kɛ mǐ?

⁵ Étɛ́ mǐ ka kplɔ́n? Jexóva ɖo gbesisɔmɛ bo ná sɔ́ hwɛ kɛ mɛsɛntɔ́ tɔn lɛ́ bǐ mlɛ́mlɛ́. Égbé ɔ, mǐ ɖó hwɛjijɔ gěgé hú Jwifu e è kplá yi Babilɔ́nu lɛ́ é, bo ná yí gbe ɖɔ Jexóva nɔ sɔ́ hwɛ kɛ mǐ. Gbɔn nɛ̌ é? Mǐ mɔ nukúnnú jɛ nǔ e jí Jexóva nɔ zɔn dó dó sɔ́ hwɛ kɛ mɛ é wú. Ezayíi ɖɔ nǔ ɖ’ayǐ bɔ é ná bló xwe kanweko mɔ̌kpán gúdo é ɔ, Jexóva sɛ́ Vǐ vívɛ́ná tɔn dó ayǐkúngban jí bónú é ná sɔ́ gbɛ tɔn dó sá vɔ̌ dó hwɛhutɔ́ e hwɛ yětɔn lɛ́ vɛ́ ná lɛ́ é bǐ tamɛ. Vɔ̌sísá énɛ́ jí wɛ Jexóva nɔ zɔn dó dó “súnsún” hwɛ mǐtɔn lɛ́ bǐ mlɛ́mlɛ́. (Mɛ. 3:19; Eza. 1:18; Efɛ́. 1:7) Mawu nǔbláwǔkúnúmɛtɔ́ ɖé wɛ mǐ nɔ sɛn!

6. Nɛ̌ ayi sísɔ́ ɖó nǔbláwǔkúnúmɛ Jexóva tɔn jí ka sixú hɛn le wá nú mǐ gbɔn? (Kpɔ́n ɖiɖe lɛ́ lɔmɔ̌.)

⁶ Ényí hwɛ dó mɛɖée sín linlin lɛ́ wá ɖí bú mǐ ɔ, xó e Jexóva sɔ́ dó ayi mɛ nú mɛ bɔ è wlán, bɔ é ɖo Ezayíi 55:7 mɛ é sixú dó gbɔ nú mǐ. Mǐ mɛ ɖé lɛ́ sixú kpo ɖo hwɛ dó mǐɖée wɛ ɖó nǔ e mǐ wa nyi do wá yi, bɔ é ka ko vɛ́ nú mǐ é wú. Nǔ sixú nyí mɔ̌, tají ɔ, ényí mǐ kpo ɖo xɔxɔ nǔ e mǐ wa nyi do é tɔn se wɛ ɔ nɛ́. Amɔ̌, ényí mǐ ɖɔ hwɛ mǐtɔn lɛ́, bo ɖó nǔnyanyawiwa te ɔ, mǐ sixú kú d’é jí ɖɔ Jexóva ko sɔ́ hwɛ mǐtɔn lɛ́ kɛ mǐ. Gɔ́ ná ɔ, ényí Jexóva sɔ́ hwɛ kɛ mǐ ɔ, é nɔ wá gbeta ɔ kɔn bo nɔ wɔn hwɛ e mǐ hu é. (Jlɛ̌ dó Jelemíi 31:34 wú.) Énɛ́ wú ɔ, ényí Jexóva ma nɔ ɖo tamɛ lin dó nǔ e mǐ wa nyi do wá yi lɛ́ é jí wɛ ǎ ɔ, mǐ lɔ sɔ́ ɖó ná kpo ɖo tamɛ lin dó yě jí wɛ ǎ. Nǔ e ɖo tají nú Jexóva é wɛ nyí nǔ e wa wɛ mǐ ɖe din é, é nyí nǔ e mǐ wa nyi do wá yi lɛ́ é ǎ. (Ezek. 33:14-16) Gɔ́ ná ɔ, ɖo malínmálín mɛ ɔ, Tɔ́ mǐtɔn e nɔ kú nǔbláwǔ ɖaxó nú mǐ é ná bló bɔ mǐ ná jɛ mǐɖée sí sín xɔxɔ nǔ e mǐ wa nyi do lɛ́ é tɔn sí bǐ mlɛ́mlɛ́.

7. Ényí mǐ ɖo hwɛ e mǐ hu é ɖé zé hwlá wɛ ɔ, étɛ́ ka sixú sísɛ́ mǐ bɔ mǐ ná ba alɔdó?

⁷ Ényí ayi mǐtɔn nɔ ɖo hwɛ dó mǐ wɛ, ɖó mǐ hu hwɛ syɛ́nsyɛ́n ɖé bo zé hwlá wútu ɔ, étɛ́ mǐ ka ɖó ná wa? Biblu dó wǔsyɛ́n lanmɛ nú mǐ ɖɔ mǐ ní ba alɔdó mɛxó agun tɔn lɛ́ tɔn. (Ja. 5:14, 15) É ɖo mɔ̌ có, é sixú vɛ́ wǔ nú mǐ bɔ mǐ ná yí gbe nú nǔ e mǐ wa nyi do é. Amɔ̌, ényí hwɛ mǐtɔn lɛ́ vɛ́ nú mǐ, bɔ mǐ lɛ́ flín ɖɔ Jexóva kpó súnnu e é sɔ́ bɔ yě ná d’alɔ mǐ lɛ́ é kpó ná kú nǔbláwǔ nú mǐ, bo lɛ́ wa nǔ xá mǐ kpó wǎnyíyí kpó ɔ, énɛ́ ná sísɛ́ mǐ bɔ mǐ ná yi súnnu gbejínɔtɔ́ énɛ́ lɛ́ gɔ́n. Ð’ayi lěe nǔbláwǔkúnúmɛ Jexóva tɔn dó gbɔ nú nɔví súnnu e nɔ nyí Arthur,a bɔ ayixa tɔn nɔ dó hwɛ ɛ syɛ́nsyɛ́n gbɔn é wú. Arthur ɖɔ: “Un kpɔ́n fɔtóo nǔblíblíwiwa tɔn nú xwe ɖokpó mɔ̌. Amɔ̌, ée un se xóɖiɖɔ e ɖɔ xó dó ayixa wú é ɖé gúdo é ɔ, un ɖɔ hwɛ ce nú asi ce kpó mɛxó agun tɔn lɛ́ kpó. Énɛ́ gúdo ɔ, un wá mɔ kɔ dó sa fún, amɔ̌, nǔ e un wa nyi do é sín agban kpo ɖo kpinkpɛn mì wɛ. Mɛxó agun tɔn lɛ́ flín mì ɖɔ Jexóva kpo ɖo biba wɛ bo ná nyí xɔ́ntɔn ce. É nɔ dɔn tó nú mǐ, ɖó é yí wǎn nú mǐ wútu. Xomɛnyínyɔ́xó e yě ɖɔ lɛ́ é byɔ́ lanmɛ nú mì, bo d’alɔ mì bɔ un vɔ́ azɔ̌ wa ɖo linlin ce lɛ́ wú.” Égbé ɔ, Arthur nyí gběxosín-alijítɔ́ hwebǐnu tɔn, bo lɛ́ nyí mɛsɛntɔ́ agun tɔn. Ényí è tuun ɖɔ nú hwɛ mɛtɔn lɛ́ vɛ́ nú mɛ ɔ, Jexóva nɔ kú nǔbláwǔ nú mɛ ɔ, é nɔ dó gbɔ nú mɛ tawun!

JEXÓVA NÁ MǏ NUKÚNÐÍÐÓ

8. (a) Nukúnɖíɖó tɛ́ Jexóva ka ná mɛ e ɖo kannumɔgbénu lɛ́ é? (b) Sɔgbe xá Ezayíi 40:29-31 ɔ, ɖagbe tɛ́ nukúnɖíɖó ka sixú ko wa nú Jwifu e hwɛ yětɔn lɛ́ vɛ́ nú yě lɛ́ é?

⁸ Ðo gbɛtɔ́ nukúnmɛ ɔ, nukúnɖíɖó ɖě sɔ́ ɖe nú Jwifu e è wlí lɛ́ é ǎ. È tuun dó Babilɔ́nunu lɛ́ wú ɖɔ yě kún nɔ yí gbe bo nɔ jó ahwankannumɔ yětɔn lɛ́ dó ó. (Eza. 14:17) É ɖo mɔ̌ có, Jexóva ná nukúnɖíɖó togun tɔn. É dó akpá bo ná ɖe togun tɔn sín mɛ kannu, bɔ nǔ ɖěbǔ ka sixú ɖó è te ǎ. (Eza. 44:26; 55:12) Kɔ́kwín ɖokpó ɖɔhun wɛ Babilɔ́nu cí ɖo Jexóva nukúnmɛ. (Eza. 40:15) È nɔ dó funfún kɔ́kwín bónú é nɔ nɔ te ǎ. Ðagbe tɛ́ nukúnɖíɖó ka sixú wa nú Jwifu e è wlí yi Babilɔ́nu lɛ́ é? É ná dó gbɔ nú yě. Amɔ̌, é sixú lɛ́ wa nǔ hú mɔ̌. Ezayíi wlán ɖɔ: ‘Mɛ e nɔ gán jɛ Jexóva wú lɛ́ ɔ, hlɔ̌nhlɔ́n ɖěvo nɔ wá nú yě.’ (Xa Ezayíi 40:29-31.) Ɛɛn, nukúnɖíɖó ná vɔ́ hlɔ̌nhlɔ́n ná yě; yě ná “zɔn hɔ̌nsúhɔ́nsú ɖɔhun.”

9. Étɛ́wú Jwifu lɛ́ ka sixú kú d’é jí ɖɔ akpá Jexóva tɔn lɛ́ ná jɛnu?

⁹ Jexóva lɛ́ ná hwɛjijɔ e wú mɛ e è wlí yi Babilɔ́nu lɛ́ é ná ɖeji dó akpá tɔn lɛ́ wú é yě. Gbɔn nɛ̌ é? Lin tamɛ dó nǔɖɔɖayǐ ɖěɖěe ko jɛnu lɛ́ é jí. Yě tuun ɖɔ Asilíi ɖu ɖo axɔ́súɖuto Izlayɛ́li tɔn e ɖo totaligbé é jí, bo wlí ahwankannumɔ mɛ lɛ́ tɔn. (Eza. 8:4) Yě mɔ bɔ Babilɔ́nunu lɛ́ sú Jeluzalɛ́mu sín kún dó, bo wlí ahwankannumɔ mɛ lɛ́ tɔn. (Eza. 39:5-7) Yě tuun ɖɔ è tɔ́n nukún axɔ́sú Sedesiyási, bo kplá ɛ yi Babilɔ́nu. (Jel. 39:7; Ezek. 12:12, 13) Nǔ e Jexóva ɖɔ ɖ’ayǐ lɛ́ é bǐ jɛnu. (Eza. 42:9; 46:10) Nǔ énɛ́ lɛ́ bǐ ɖó ná ko zɔ́n bɔ yě ná kú d’é jí ɖɔ akpa e Jexóva dó ɖɔ émí ná ɖe yě sín kannumɔgbénu é lɔ ná jɛnu!

10. Étɛ́ ka sixú d’alɔ mǐ bɔ mǐ ná kpo ɖo nǔ ɖó nukún wɛ ɖo azǎn gǔdo gúdo tɔn élɔ́ lɛ́ mɛ?

¹⁰ Étɛ́ mǐ ka kplɔ́n? Ényí mǐ mɔ ɖɔ gǎn vɔ ɖo mǐ wú ɔ, nukúnɖíɖó sixú dó gbɔ nú mǐ, bo lɛ́ d’alɔ mǐ bɔ mǐ ná mɔ hlɔ̌nhlɔ́n. Hwenu vɛ́ wǔ lɛ́ mɛ nɔ gbɛ ɖe wɛ mǐ ɖe, bo ɖo xwi ɖí xá kɛntɔ́ agbɔ̌nnɔ ɖé lɛ́ wɛ. Amɔ̌, awakanmɛ ɖó ná kú mǐ ǎ. Jexóva sɔ́ nukúnɖíɖó ɖaaɖagbe ɖé ɖó te nú mǐ, énɛ́ wɛ nyí gbɛ mavɔmavɔ e mɛ fífá jɔ fífá kpó ayijayǐ jɔ ayijayǐ kpó ɖe é. Mǐ ɖó ná bló bɔ nukúnɖíɖó énɛ́ ná za wě ɖo ayi mǐtɔn mɛ. É ma nyí mɔ̌ ǎ ɔ, nukúnɖíɖó mǐtɔn sixú cí fitii cí nǔ ɖɔ fí ɖɛkpɛ ɖɛkpɛ ɖé kpɔ́n wɛ mǐ ɖe gbɔn wěkpɛ́n kwíjikwíji mɛ ɖɔhun. Nɛ̌ mǐ ka sixú “súnsún wěkpɛ́n ɔ,” énɛ́ wɛ nyí ɖɔ mǐ ná bló, bɔ nukúnɖíɖó mǐtɔn ná kpo ɖo wě za wɛ gbɔn? Mǐ sixú nɔ ba hwenu hwɛhwɛ bo nɔ lin tamɛ dó lěe gbɛ mǐtɔn ná nyɔ́ sɔ ɖo gbɛ yɔ̌yɔ́ ɔ mɛ é jí. Mǐ sixú xa xóta, kpɔ́n video, bo nɔ lɛ́ ɖótó han ɖěɖěe ɖɔ xó dó nukúnɖíɖó mǐtɔn wú lɛ́ é. Gɔ́ ná ɔ, mǐ sixú nɔ xo ɖɛ sɛ́dó Jexóva bo nɔ ɖɔ xó n’i dó akpá ɖěɖěe mǐ ɖo nukún ɖó wɛ kpó akpakpa sɔ́ mɛ kpó ɖɔ yě ní jɛnu lɛ́ é wú.

11. Étɛ́ ka d’alɔ nɔví nyɔ̌nu e ɖo azɔn syɛ́nsyɛ́n jɛ wɛ é ɖé bɔ é lɛ́ mɔ hlɔ̌nhlɔ́n?

¹¹ Ð’ayi lěe nukúnɖíɖó dó gbɔ nú nɔví nyɔ̌nu e nɔ nyí Joy, bo ɖo azɔn syɛ́nsyɛ́n ɖé jɛ wɛ é, bo lɛ́ ná ɛ hlɔ̌nhlɔ́n gbɔn é wú. É ɖɔ: “Ényí tagba ce lɛ́ wá hú agbɔ̌n mì ɔ, un nɔ ɖɔ lěe nǔ cí nú mì ɖo ayi gɔngɔn ce mɛ é nú Jexóva, bo nɔ tuun ɖɔ é ná mɔ nukúnnú jɛ mɛ. Bɔ ɖo hwe énɛ́ lɛ́ nu ɔ, Jexóva nɔ ná mì ‘hlɔ̌nhlɔ́n e zɛ gbɛtɔ́ tɔn wú é.’” (2 Kɔ. 4:7) Joy nɔ lɛ́ kpɔ́n éɖée sɛ́dó ɖo gbɛ yɔ̌yɔ́ ɔ mɛ, fí e “tóví ɖé [ma] sɔ́ ná ɖɔ: ‘Un ɖo azɔn jɛ wɛ’” ɖe ǎ é. (Eza. 33:24) Ényí mǐ lɔ nɔ ɖɔ nǔ e ɖo akɔ́n mǐtɔn jí é nú Jexóva, bo nɔ sɔ́ ayi ɖó nukúnɖíɖó mǐtɔn jí ɔ, mǐ sixú lɛ́ mɔ hlɔ̌nhlɔ́n.

12. Hwɛjijɔ tɛ́ lɛ́ mǐ ka ɖó bo ná ɖeji dó akpá Jexóva tɔn lɛ́ wú? (Kpɔ́n ɖiɖe lɛ́ lɔmɔ̌.)

¹² Lěe é nyí gbɔn nú mɛ e è wlí yi kannumɔgbénu lɛ́ é ɖɔhun ɔ, Jexóva ná mǐ lɔ hwɛjijɔ e wú mǐ ná ɖeji dó akpá tɔn lɛ́ wú é gěgé. Lin tamɛ dó nǔɖɔɖayǐ ɖěɖěe mǐ mɔ bɔ yě ɖo jijɛnu wɛ lɛ́ é jí. Ði kpɔ́ndéwú ɔ, mǐ mɔ acɛkpikpa e ɖ’agbɔ̌n hú bǐ ɖo gbɛ ɔ mɛ, bɔ “akpá bǔ ná dó hlɔ̌nhlɔ́n, bo syɛ́n gan ɖɔhun, bɔ akpá bǔ ná vɔ́ da” é. (Dan. 2:42, 43) Gɔ́ ná ɔ, mǐ nɔ se bɔ “ayǐkúngban [nɔ] dán wǔ sín fí ɖé jɛ fí ɖěvo;” mǐ nɔ lɛ́ jlá wɛn ɔ “akɔta lɛ́ bǐ.” (Mat. 24:7, 14) Nǔɖɔɖayǐ énɛ́ lɛ́ kpó gěgé ɖěvo lɛ́ kpó nɔ ná hlɔ̌nhlɔ́n nǔ e mǐ ɖi nú akpá gbɔdónúmɛ tɔn Jexóva tɔn ɖěɖěe ma ko jɛnu ǎ lɛ́ é.

JEXÓVA NƆ D’ALƆ MǏ BƆ MǏ SƆ́ NƆ ÐI XƐSI Ǎ

13. (a) Wǔvɛ́ tɛ́ lɛ́ Jwifu lɛ́ ka mɔ hwenu e mɛɖéesíjijɛ yětɔn sín hwenu su é? (b) Sɔgbe xá Ezayíi 41:10-13 ɔ, nɛ̌ Jexóva ka dó gbɔ nú Jwifu e è wlí ahwankannumɔ yětɔn lɛ́ é gbɔn?

¹³ Jexóva dó gbɔ nú mɛ e è wlí yi kannumɔgbénu lɛ́ é kpó nukúnɖíɖó ɖaaɖagbe ɖé kpó có, é tuun ɖɔ yě ná mɔ wǔvɛ́ ɖo mɛɖéesíjijɛ yětɔn hwenu. Jexóva ɖɔ ɖ’ayǐ ɖɔ xwe nyǐ gbe vivɔnu táan e Jwifu lɛ́ ná bló ɖo kannumɔgbénu é tɔn ɔ, axɔ́sú hlɔ̌nhlɔ́nnɔ ɖé ná ɖu ɖo akɔta e lɛ́ lɛ̌ dó Babilɔ́nu lɛ́ é jí, bo ná tɔ́n ahwan Babilɔ́nu ɖésú. (Eza. 41:2-5) É ka byɔ́ ɖɔ ado ní hu Jwifu lɛ́ wɛ a? Jexóva ko dó gbɔ nú togun tɔn jɛ nukɔn ɖɔ: “Ma ɖi xɛsi ó, ɖó un ɖo kpɔ́ xá we. Ma ɖo nukún dó gbɛ mɛ kpɔ́n wɛ ó, ɖó nyi wɛ nyí Mawu towe.” (Xa Ezayíi 41:10-13.) Étɛ́ ɖɔ wɛ é ka ɖe bo ɖɔ “nyi wɛ nyí Mawu towe”? É nyí flínflín Jwifu lɛ́ wɛ é ɖe ɖɔ yě ní sɛn émí ǎ, ɖó yě ko tuun ɖɔ émí ɖó ná wa mɔ̌. É nyɔ́ wa ɔ, flínflín yě wɛ é ɖe ɖɔ émí kpo ɖo jǐ yětɔn.—Ðɛh. 118:6.

14. Nǔ ɖěvo tɛ́ Jexóva ka wa dó d’alɔ Jwifu lɛ́ bónú yě ma ɖi xɛsi ó?

¹⁴ Jexóva lɛ́ bló bɔ xɛsi e ɖi wɛ mɛ e è wlí yi kannumɔgbénu lɛ́ é ɖe é blí bú, gbɔn hlɔ̌nhlɔ́n tɔn ma ɖó dogbó ɔ kpó nǔtuuntuun tɔn ma ɖó dogbó ɔ kpó flínflín yě gblamɛ. É byɔ́ Jwifu e è wlí ahwankannumɔ yětɔn lɛ́ é ɖɔ yě ní kpɔ́n sunví e ɖo jǐxwé lɛ́ é. É ɖɔ nú yě ɖɔ émí kún bló sunví lɛ́ kɛ́ɖɛ́ kpowun ó, loɔ, émí lɛ́ tuun nyǐkɔ yě mɛ bǐ tɔn. (Eza. 40:25-28) Ényí Jexóva tuun nyǐkɔ sunví lɛ́ ɖokpó ɖokpó tɔn hǔn, é ɖo wɛn ɖɔ, é tuun nyǐkɔ mɛsɛntɔ́ tɔn lɛ́ ɖokpó ɖokpó tɔn. Gɔ́ ná ɔ, ényí Jexóva ɖó hlɔ̌nhlɔ́n bo bló sunví lɛ́ ɔ, é ɖo wɛn ɖɔ, é ɖó hlɔ̌nhlɔ́n bo ná d’alɔ togun tɔn. Ɛɛn, Jwifu e sín ahwankannumɔ è wlí lɛ́ é ɖó hwɛjijɔ ɖěbǔ nú ado ná hu yě, alǒ xɛsi ná ɖi yě ǎ.

15. Nɛ̌ Mawu ka sɔ́ nǔ nú Jwifu e è wlí ahwankannumɔ yětɔn lɛ́ é nú nǔ e ɖo nukɔn ja lɛ́ é gbɔn?

¹⁵ Jexóva lɛ́ sɔ́ nǔ nú togun tɔn nú nǔ e ɖo nukɔn ja lɛ́ é. Ðo wěma Ezayíi tɔn sín akpáxwé nukɔntɔn ɔ mɛ ɔ, Mawu ɖɔ nú togun ɔ ɖɔ: “Mi yi xɔ mitɔn lɛ́ mɛ, mi dɔn hɔn mitɔn sú dó ta, bo nɔ fínɛ́ kpɛɖé, bónú xomɛsin Mawu tɔn ní wá yi.” (Eza. 26:20) Wěmafɔ énɛ́ sixú ko jɛnu ɖokpó hwenu e axɔ́sú Silúsi ɖu ɖo Babilɔ́nu jí é. Hwenuxówlántɔ́ Glɛ̌kinu hwexónu tɔn ɖé ɖɔ ɖɔ hwenu e Silúsi byɔ́ Babilɔ́nu é ɔ, é “ɖe gbe [nú sɔ́ja tɔn lɛ́] ɖɔ yě ní hu mɛ e yě mɔ ɖo hɛnkɛ́n lɛ́ é bǐ.” Dǒ nukún lě do xɛsi ná ko ɖi Babilɔ́nunu lɛ́ sɔ é mɛ kpɔ́n! Amɔ̌, Jwifu e è wlí ahwankannumɔ yětɔn lɛ́ é sixú ko gán ɖ’é mɛ wǔ ɖíɖí aji ɖɔhun, ɖó yě se tónú nú ali e Jexóva xlɛ́ yě é wútu.

16. Étɛ́wú ado ma ka ɖó ná hu mǐ zɛ xwé wú dó sɔgúdo mǐtɔn wú ǎ? (Kpɔ́n ɖiɖe ɔ lɔmɔ̌.)

¹⁶ Étɛ́ mǐ ka kplɔ́n? Zaanɖé din ɔ, mǐ ná gbɔn wǔvɛ́ ɖaxó hú gǎn e gbɛtɔ́ lɛ́ ma ko mɔ kpɔ́n ǎ é mɛ. Ényí é bɛ́ ɔ, mɛ lɛ́ ná dán ɖěwagbɛn bɔ xɛsi ná lɛ́ jɛ yě jí. Amɔ̌, nǔ ná nyí mɔ̌ nú togun Jexóva tɔn ǎ. Mǐ tuun ɖɔ Jexóva wɛ nyí Mawu mǐtɔn. Mǐ ná ɖeji lobo tuun ɖɔ “hwlɛngán [mǐtɔn] ɖo sisɛkpɔ́ wɛ.” (Luk. 21:28) É ná bo tlɛ nyí hwenu e kplékplé akɔta lɛ́ tɔn ná tɔ́n ahwan mǐ é ɔ, mǐ ná gbí dɔn. Jexóva ná ɖe gbe nú wɛnsagun lɛ́ bɔ yě ná nya xɛ ɖo mǐ jí; é ná lɛ́ ɖe wě e ná nya xɛ ɖo gbɛ mǐtɔn jí lɛ́ é xá mǐ. Nɛ̌ è ka ná ɖe wě énɛ́ lɛ́ xá mǐ gbɔn? Te jɛ́n mǐ ná nɔ bo ná kpɔ́n. É ɖo mɔ̌ có, è ná ɖibla ɖe wě énɛ́ lɛ́ xá mǐ gbɔn agun mǐtɔn lɛ́ gblamɛ. Ðo ali ɖé nu ɔ, agun lɛ́ sixú nyí “xɔ [mǐtɔn] lɛ́,” fí e mǐ ná nɔ ayijayǐ mɛ ɖe é. Nɛ̌ mǐ ka sixú sɔ́ nǔ ɖ’ayǐ nú nǔ e ɖo nukɔn ja lɛ́ é gbɔn? Mǐ ɖó ná vɛ́ kpó nɔví mǐtɔn lɛ́ kpó, ɖo gbesisɔmɛ bo ná nɔ se tónú nú ali e tutoblónúnǔ ɔ nɔ xlɛ́ mǐ lɛ́ é, bo kú d’é jí ɖɔ Jexóva wɛ ɖo ali xlɛ́ tutoblónúnǔ mǐtɔn wɛ.—Ebl. 10:24, 25; 13:17.

17. Nɛ̌ a ka sixú ba gbɔdónúmɛ ɖo Jexóva gɔ́n gbɔn?

¹⁷ Jwifu e è wlí ahwankannumɔ yětɔn lɛ́ é ɖo ninɔmɛ vɛ́ wǔ mɛ có, Jexóva dó gbɔ e sín hudó yě ɖó é nú yě. É ná wa nǔ ɖokpó ɔ nú mǐ lɔ. Énɛ́ wú ɔ, nú sɔ na bo hɛn nǔ ɖěbǔ nu hǔn, kpo ɖo gbɔdónúmɛ ba wɛ ɖo Jexóva gɔ́n. Ɛɛn, ɖeji dó nǔbláwǔkúnúmɛ tɔn ɖaxó ɔ wú. Nǔ nukúnɖíɖó towe ní kpo ɖo gbɛ. Nɔ flín ɖɔ, ɖó Jexóva wɛ nyí Mawu towe wútu ɔ, a ɖó ná ɖi xɛsi nú nǔɖé ǎ.