Yǐ gbe nú hwɛsɔ́kɛmɛ Jexóva tɔn

1-2. Ényí hwɛ mǐtɔn lɛ́ vɛ́ nú mǐ ɔ, étɛ́ Jexóva ka nɔ wa? (Kpɔ́n ɖiɖe ɔ lɔmɔ̌.)

AXƆ́SÚ Davídi tuun nǔ e hwɛ dídó mɛɖée ɖó hwɛ e è hu wá yi lɛ́ é wú é nyí é. (Ðɛh. 40:13; 51:1, 2, 5) É hu hwɛ syɛ́nsyɛ́n ɖé lɛ́ ɖo gbɛzán tɔn mɛ. Amɔ̌, é ɖe xlɛ́ ɖɔ hwɛ émítɔn lɛ́ vɛ́ nú émí nǔgbó nǔgbó bɔ Jexóva sɔ́ hwɛ tɔn lɛ́ kɛ ɛ. (2 Sam. 12:13) Wǎgbɔ tɔn ɔ, Davídi ɖ’awǎjijɛ hwenu e é mɔ ɖɔ Jexóva sɔ́ hwɛ kɛ émí é.—Ðɛh. 32:1.

² Davídi ɖɔhun ɔ, mǐ sixú mɔ awǎjijɛ e nɔ tɔ́n sín nǔbláwǔkúnúmɛ Jexóva tɔn mɛ é. Tuun e mǐ tuun ɖɔ Jexóva nɔ ɖo gbesisɔmɛ bo ná sɔ́ hwɛ mǐtɔn lɛ́ kɛ mǐ, ényí é ná bo tlɛ nyí hwɛ syɛ́nsyɛ́n lɛ́ é nɔ dó gbɔ nú mǐ, ényí hwɛ e mǐ hu lɛ́ é vɛ́ nú mǐ, mǐ ɖɔ yě bo ka wa nǔ e wú mǐ kpé é bǐ bo ma sɔ́ lɛ́ wa nǔ ɖokpó ɔ lɛ́ nyi do ǎ ɔ nɛ́! (Nǔx. 28:13; Mɛ. 26:20; 1 Jaan 1:9) Gɔ́ ná ɔ, tuun e mǐ tuun ɖɔ é nɔ sɔ́ hwɛ kɛ mɛ bǐ mlɛ́mlɛ́ cí nǔ ɖɔ è kún hwɛ ɔ kpɔ́n ó ɖɔhun é dó gbɔ nú mɛ kpɔ́n!—Ezek. 33:16.

3-4. Nɛ̌ nǔ ka cí nú nɔví nyɔ̌nu ɖé hwenu e é bló batɛ́mu gúdo é? Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Amɔ̌, hweɖélɛ́nu ɔ, é sixú vɛ́ wǔ nú mɛɖé lɛ́ tawun bɔ yě ná yí gbe nú hwɛsɔ́kɛmɛ Jexóva tɔn. Mǐ ní ɖɔ xó dó kpɔ́ndéwú Jennifer e è kplɔ́n bɔ é su ɖo nǔgbó ɔ mɛ é tɔn wú. Hwenu e é ɖo wǐnnyáwínnyá mɛ jɔ́lwɛ é ɔ, é jɛ gbɛ blíblí zán jí, bo nɔ zán gbɛ we. Xwe ɖé lɛ́ gúdo ɔ, é lɛ́ kɔ wá Jexóva gɔ́n bo wá jɛxá bo bló batɛ́mu. É ɖɔ: “Nǔ agbaza tɔn lɛ́ gbé nyinya, agalilɛ, ahan syɛ́nsyɛ́n nunu zɛ xwé wú kpó xomɛsin syɛ́nsyɛ́n kpó wɛ gɔ́ gbɛzán ce xóxó ɔ mɛ. Ðo ayi ce mɛ ɔ, un tuun ɖɔ Biblu ɖɔ ɖɔ ɖó vɔ̌sísá Klísu tɔn wútu ɔ, Jexóva sixú sɔ́ hwɛ mǐtɔn lɛ́ kɛ mǐ. Amɔ̌, un kú d’é jí ɖo ayi ce mɛ ɖɔ è ko sɔ́ hwɛ ce lɛ́ kɛ mì ǎ.”

⁴ Hweɖélɛ́nu ɔ, é ka nɔ vɛ́ wǔ nú we bɔ a ná kú d’é jí ɖo ayi towe mɛ ɖɔ Jexóva ko sɔ́ hwɛ e a hu wá yi lɛ́ é kɛ we wɛ a? Jexóva ba ɖɔ mǐ ní ɖeji dó nǔbláwǔkúnúmɛ émítɔn wú Davídi ɖɔhun. Ðo xóta élɔ́ mɛ ɔ, mǐ ná ɖɔ xó dó nǔ e wú mǐ ɖó ná yí gbe nú hwɛsɔ́kɛmɛ Jexóva tɔn é kpó nǔ e sixú d’alɔ mǐ bɔ mǐ ná wa mɔ̌ é kpó jí.

ÉTƐ́WÚ MǏ KA ÐÓ NÁ YÍ GBE NÚ HWƐSƆ́KƐMƐ JEXÓVA TƆN?

5. Étɛ́ Satáan ka ba ɖɔ mǐ ní ɖi nǔ ná? Nǎ kpɔ́ndéwú ɖé.

⁵ Ényí mǐ yí gbe nú hwɛsɔ́kɛmɛ Jexóva tɔn ɔ, mǐ sixú nyi alɔ nú fɛ́ca Satáan tɔn lɛ́ ɖokpó mɛ jijɛ. Flín ɖɔ Satáan ná wa nǔ e wú é kpé é bǐ bónú mǐ ná ɖó Jexóva sinsɛn te. Bónú Satáan ná dó jɛ nǔ e gbé nya wɛ é ɖe é kɔn ɔ, é sixú bló bɔ mǐ ná kú d’é jí ɖɔ hwɛ mǐtɔn lɛ́ kún sɔ́ ɖó sɔ́ kɛ ó. Lin tamɛ dó kpɔ́ndéwú nya e ɖo Kɔlɛ́nti bɔ è sɔ́ ɛ ɖó kɛ́n nú agun ɔ ɖó agalilɛ wú é tɔn jí. (1 Kɔ. 5:1, 5, 13) Nukɔnmɛ e hwɛ tɔn wá vɛ́ n’i é ɔ, Satáan ba ɖɔ mɛ e ɖo agun ɔ mɛ lɛ́ é ní ma sɔ́ hwɛ kɛ ɛ ó, énɛ́ wɛ nyí ɖɔ yě ní syɛ́n nukún káká bo ma dó doo nú nya ɔ ó. Hwe ɖokpó ɔ nu ɔ, Satáan ba ɖɔ nya e hwɛ tɔn ko vɛ́ ná é ní mɔ ɖɔ è kún sɔ́ hwɛ kɛ émí ó, énɛ́ wɛ nyí ɖɔ “wǔ ní . . . kú i zɛ xwé wú” bónú é ní ɖó Jexóva sinsɛn te. Nǔ e gbé nya wɛ Satáan ɖe é kpó wlɛnwín tɔn lɛ́ kpó ko húzú ǎ. Amɔ̌, “mǐ dán linlin tɔn lɛ́ ǎ.”—2 Kɔ. 2:5-11.

6. Nɛ̌ mǐ ka sixú vo sín hwɛ dídó mɛɖée sí gbɔn?

⁶ Ényí mǐ yí gbe nú hwɛsɔ́kɛmɛ Jexóva tɔn ɔ, mǐ sixú vo sín hwɛ dídó mɛɖée sí. Ðo jɔwámɔ linu ɔ, ényí mǐ hu hwɛ ɔ, mǐ nɔ dó hwɛ mǐɖée. (Ðɛh. 51:19) Énɛ́ sɔgbe. Ayixa mǐtɔn sixú sísɛ́ mǐ bɔ mǐ ná ɖe afɔ ɖagbe lɛ́ bo ná vɔ́ mǐɖée jlá ɖó. (2 Kɔ. 7:10, 11) É ɖo mɔ̌ có, ényí hwɛ mǐtɔn ko vɛ́ nú mǐ, bɔ mǐ ka kpo ɖo hwɛ dó mǐɖée wɛ magbokɔ ɔ, mǐ sixú ba ná jó gbe. Ényí mǐ yí gbe nú hwɛsɔ́kɛmɛ Jexóva tɔn ɔ, mǐ sixú gɔn hwɛ dó mǐɖée. Énɛ́ gúdo ɔ, mǐ sixú sɛn Jexóva lěe é ba ɖɔ mǐ ní sɛn émí gbɔn é, énɛ́ wɛ nyí kpó ayixa mímɛ́ ɖé kpó kpódó awǎjijɛ ɖaxó kpán. (Koló. 1:10, 11; 2 Tim. 1:3) Bɔ nɛ̌ mǐ ka sixú ná gǎnjɛwú ayi mǐtɔn b’ɛ ná yí gbe nú hwɛsɔ́kɛmɛ Mawu tɔn gbɔn?

ÉTƐ́ KA SIXÚ D’ALƆ MǏ BƆ MǏ NÁ YÍ GBE NÚ HWƐSƆ́KƐMƐ JEXÓVA TƆN?

7-8. Étɛ́ Jexóva ka ɖɔ dó éɖée wú nú Mɔyízi? Gǎnjɛwú tɛ́ énɛ́ ka ná mǐ? (Tíntɔ́n 34:6, 7)

⁷ Lin tamɛ dó nǔ e Jexóva ɖɔ dó éɖésúnɔ wú é jí. Ði kpɔ́ndéwú ɔ, ɖ’ayi nǔ e Jexóva ɖɔ nú Mɔyízi ɖo só Sinayíi tɔn jí é wú.a (Xa Tíntɔ́n 34:6, 7.) Jexóva ɖó jijɔ ɖagbe ɖagbe gěgé có, é wá gbeta ɔ kɔn bo ɖɔ nú Mɔyízi ɖɔ émí nyí “Mawu nǔbláwǔkúnúmɛtɔ́, Mawu xomɛfátɔ́.” Mawu mɔ̌hun ka sixú gɔn hwɛ sɔ́ kɛ mɛsɛntɔ́ tɔn e hwɛ tɔn lɛ́ vɛ́ ná nǔgbó nǔgbó é ɖé a? Gbeɖé ǎ! Nǔbláwǔmakúnúmɛ kpó nukún syɛ́nsyɛ́n kpó wɛ énɛ́ ná nyí; jijɔ énɛ́ lɛ́ ka vɛ́ Jexóva.

⁸ Mǐ sixú kú d’é jí ɖɔ Jexóva kún ná gɔn nǔ wa sɔgbe xá mɛ alɔkpa e é nyí é gbeɖé ó, ɖó Mawu nǔgbóɖɔtɔ́ wɛ n’i. (Ðɛh. 31:6) Énɛ́ wú ɔ, mǐ sixú ɖeji dó xó tɔn wú. Ényí é vɛ́ wǔ nú we bɔ a ná gɔn hwɛ dó hwiɖée ɖó hwɛ e a ko hu wá yi lɛ́ é wú hǔn, kanbyɔ́ hwiɖée ɖɔ: ‘Un ka ɖi nǔ ɖɔ Jexóva nyí nǔbláwǔkúnúmɛtɔ́ kpó wǔvɛ́sexámɛtɔ́ kpó nǔgbó nǔgbó bo kún ná gɔn hwɛ sɔ́ kɛ hwɛhutɔ́ ɖěbǔ e hwɛ tɔn lɛ́ vɛ́ ná é gbeɖé ó a? Nyi wɛ ma ka yí gbe ɖɔ é sɔ́ hwɛ kɛ mì ǎ a?’

9. Étɛ́ ka nyí tínmɛ è ní sɔ́ hwɛ mɛ tɔn lɛ́ kɛ mɛ tɔn? (Ðɛhan 32:5)

⁹ Lin tamɛ dó nǔ e Jexóva sɔ́ dó ayi mɛ nú bibluwlántɔ́ lɛ́ bɔ yě ɖɔ dó hwɛsɔ́kɛmɛ tɔn wú é jí. Ði kpɔ́ndéwú ɔ, lin tamɛ dó nǔ e Davídi wlán dó hwɛsɔ́kɛmɛ Jexóva tɔn wú é jí. (Xa Ðɛhan 32:5.) Davídi ɖɔ: “A ɖe agɔ e un jɛ ɔ sín kɔ nú mì.” Hwɛ e Jexóva sɔ́ kɛ Davídi é ɔ, ɖo ali ɖé nu ɔ, sɔ́ wɛ é sɔ́ hwɛ tɔn lɛ́ yi. Davídi wá vo sín hwɛ dídó mɛɖée sín agban kpinkpɛn e hɛn wɛ é ɖe é sí. (Ðɛh. 32:2-4) Nǔ sixú nyí mɔ̌ nú mǐ lɔ. Ényí hwɛ mǐtɔn lɛ́ vɛ́ nú mǐ nǔgbó nǔgbó ɔ, é sɔ́ byɔ́ ɖɔ mǐ ní kpo ɖo hwɛ e Jexóva ko sɔ́ sɛ yi zɔ nú mǐ lɛ́ é sín agban hɛn wɛ ǎ.

10-11. Étɛ́ xógbe “ɖo gbesisɔmɛ bo ná sɔ́ hwɛ kɛ mɛ” ɔ ka kplɔ́n mǐ dó Jexóva wú? (Ðɛhan 86:5)

¹⁰ Xa Ðɛhan 86:5. Davídi ɖɔ dó Jexóva wú ɖo fí ɖɔ é nɔ “ɖo gbesisɔmɛ bo ná sɔ́ hwɛ kɛ mɛ.” Alɔdlɛ́ndónǔ Biblu tɔn ɖé ɖɔ xó dó xógbe énɛ́ wú bo ɖɔ dó Jexóva wú ɖɔ: “‘Hwɛsɔ́kɛmɛtɔ́’ ɖé wɛ [n’i]; ‘walɔ’ tɔn wɛ.” Étɛ́wú walɔ Jexóva tɔn wɛ é ka nyí bɔ é nɔ sɔ́ hwɛ kɛ mɛ? Akpáxwé wěmafɔ ɔ tɔn e bɔ d’é wú é tínmɛ ɖɔ: “A nɔ nyɔ́ xomɛ dó mɛ e nɔ ylɔ́ we lɛ́ bǐ wú.” Lěe mǐ kplɔ́n gbɔn ɖo xóta e wá yi é mɛ é ɔ, wǎnyíyí e ma nɔ sɛ do ǎ é nɔ sísɛ́ Jexóva b’ɛ nɔ tɛ́ dó mɛsɛntɔ́ tɔn lɛ́ wú gbánwúngbánwún. Wǎnyíyí e ma nɔ sɛ do ǎ é nɔ sísɛ́ ɛ bɔ hwɛ sísɔ́ kɛ hwɛhutɔ́ e hwɛ yětɔn lɛ́ vɛ́ ná lɛ́ é bǐ “nɔ ci kɔ” n’i ǎ. (Eza. 55:7.) Ényí é nɔ vɛ́ wǔ nú we bónú a ná yí gbe nú hwɛsɔ́kɛmɛ Mawu tɔn ɔ, a sixú kanbyɔ́ hwiɖée ɖɔ: ‘Un ka ɖi nǔ ɖɔ Jexóva nyí hwɛsɔ́kɛmɛtɔ́, énɛ́ wɛ nyí ɖɔ é nɔ ɖo gbesisɔmɛ bo ná sɔ́ hwɛ kɛ mɛ ɖěɖěe hwɛ yětɔn lɛ́ vɛ́ ná bɔ yě nɔ byɔ́ ɛ nǔbláwǔkúnúmɛ tɔn lɛ́ é bǐ a? Nyi wɛ ma ka yí gbe ɖɔ é sɔ́ hwɛ kɛ mì hwenu e un sú xó bo byɔ́ ɛ nǔbláwǔkúnúmɛ tɔn é ǎ a?

¹¹ Tuun e mǐ tuun ɖɔ Jexóva tuun hwɛhuhu gbaza mǐtɔn hlɛ́nhlɛ́n é sixú dó gbɔ nú mǐ. (Ðɛh. 139:1, 2) Énɛ́ za wě ɖo ɖɛhan Davídi tɔn ɖěvo lɛ́ mɛ. Ðɛhan énɛ́ lɛ́ sixú lɛ́ d’alɔ mǐ bɔ mǐ ná yí gbe nú hwɛsɔ́kɛmɛ Jexóva tɔn.

MA WƆN NǓ E JEXÓVA NƆ FLÍN É Ó

12-13. Sɔgbe xá Ðɛhan 103:14 ɔ, étɛ́ Jexóva ka nɔ flín dó mǐ wú? Étɛ́ énɛ́ ka nɔ sísɛ́ ɛ b’ɛ nɔ wa?

¹² Xa Ðɛhan 103:14. Davídi ɖɔ dó Jexóva wú ɖɔ “é tuun ɖɔ kɔ́gúdu kpowun wɛ mǐ nyí; é wɔn ǎ.” Ðo xógbe ɖěvo mɛ ɔ, tíntínmɛ wɛ Davídi ɖe ɖɔ hwɛjijɔ e wú Jexóva nɔ ɖo gbesisɔmɛ bo ná sɔ́ hwɛ kɛ mɛsɛntɔ́ tɔn e hwɛ yětɔn lɛ́ vɛ́ ná lɛ́ é ɖokpó wɛ nyí ɖɔ é nɔ flín hwɛhuhu gbaza mǐtɔn. Bo ná dó mɔ nukúnnú jɛ énɛ́ mɛ d’é jí ɔ, mi nú mǐ ní gbéjé xó Davídi tɔn lɛ́ kpɔ́n yi gɔngɔn mɛ.

¹³ Davídi ɖɔ ɖɔ Jexóva “tuun nǔ e é dó bló mǐ é.” É “kán kɔ́ dó mɛ” Adámu bo tuun ganjí ɖɔ gbɛtɔ́ maɖóblɔ̌ lɛ́ ɖó dogbó ɖé lɛ́ ɖo jɔwámɔ linu. Ði kpɔ́ndéwú ɔ, yě ɖó hudó nǔɖuɖu, amlɔ kpó jɔhɔn gbíngbɔ́n kpó tɔn. (Bǐb. 2:7) Amɔ̌, hwenu e Adámu kpó Ɛvu kpó hu hwɛ é ɔ, kɔ́gúdu e yě nyí é lɛ́ wá ɖó tínmɛ ɖěvo. Ðó kúnkan yětɔn wɛ mǐ nyí wútu ɔ, mǐ ɖu hwɛhuhu gú, b’ɛ byɔ́ ɖɔ mǐ ní dó gǎn tawun bá fun ahwan xá nǔ masɔgbe lɛ́ wiwa. Jexóva tuun kpowun ɖɔ mǐ nyí hwɛhutɔ́ ǎ; Davídi ɖɔ dó wǔ tɔn ɖɔ “é wɔn ǎ.” Xókwín Ebléegbe tɔn e è zán ɖo fí é sín tínmɛ sixú lɛ́ nyí è ní ɖe afɔ ɖagbe. Mǐ sixú sɛ sin xwe nú xó Davídi tɔn gbɔn lě: Jexóva tuun ɖɔ mǐ ná hu hwɛ hweɖélɛ́nu; ényí nǔ mɔ̌hun jɛ ɔ, hwɛ mǐtɔn e vɛ́ nú mǐ nǔgbó nǔgbó é nɔ sísɛ́ ɛ b’ɛ nɔ kú nǔbláwǔ nú mǐ bo nɔ sɔ́ hwɛ kɛ mǐ.—Ðɛh. 78:38, 39.

14. (a) Nɛ̌ Davídi ka tínmɛ lě do hwɛsɔ́kɛmɛ Jexóva tɔn gbló ada sɔ é gbɔn? (Ðɛhan 103:12) (b) Nɛ̌ kpɔ́ndéwú Davídi tɔn ka xlɛ́ lěe Jexóva nɔ sɔ́ hwɛ kɛ mɛ bǐ mlɛ́mlɛ́ gbɔn é gbɛn? (Kpɔ́n gbǎví “Lěe Jexóva nɔ sɔ́ hwɛ kɛ mɛ bo nɔ wɔn gbɔn é” ɔ.)

¹⁴ Nɛ̌ do hwɛsɔ́kɛmɛ Jexóva tɔn ka gbló ada sɔ? (Xa Ðɛhan 103:12.) Davídi ɖɔ ɖɔ ényí Jexóva sɔ́ hwɛ kɛ mǐ ɔ, é nɔ sɛ hwɛ mǐtɔn lɛ́ dó zɔ nú mǐ tawun “lě do gbadahwe jí lín dó zǎnzǎnhwe jí sɔ” é ɖɔhun. Ðo ali ɖé nu ɔ, zǎnzǎnhwe jí lín dó gbadahwe jí bɔ è sixú ɖɔ ǎ; fí we lɛ́ sixú kplé gbeɖé ǎ. Étɛ́ énɛ́ ka kplɔ́n mǐ dó hwɛ e Jexóva nɔ sɔ́ kɛ mǐ lɛ́ é wú? Alɔdlɛ́ndónǔ ɖokpó tínmɛ énɛ́ gbɔn lě: “Ényí è sɛ hwɛ ɔ dó zɔ sɔmɔ̌ ɔ, mǐ sixú kú d’é jí ɖɔ wǎn tɔn, nǔwanú tɔn kpó nǔ e è sixú flín d’é wú lɛ́ é bǐ kpó ná bú bǐ mlɛ́mlɛ́.” Vɛ̌ dó nukún mɛ kpɔ́n: Wǎn ɖé sixú flín nǔɖé mɛ. Amɔ̌, ényí Jexóva sɔ́ hwɛ kɛ mɛ ɔ, é nɔ cí ɖɔ wǎn tɔn kwín ɖokpó kún sɔ́ kpo bo ná flín hwɛ e è hu é mɛ, bo ná zɔ́n bɔ Jexóva ná lɛ́ wá wa nǔ tɔn xá mɛ ó wɛ ɖɔhun.—Ezek. 18:21, 22; Mɛ. 3:19.

15. Ényí hwɛ e mǐ hu wá yi lɛ́ é sín agban kpo ɖo mǐ kpɛn wɛ ɔ, étɛ́ mǐ ka sixú wa?

¹⁵ Nɛ̌ xó Davídi tɔn e ɖo Ðɛhan 103 mɛ lɛ́ é ka sixú d’alɔ mǐ bɔ mǐ ná yí gbe nú hwɛsɔ́kɛmɛ Jexóva tɔn gbɔn? Ényí hwɛ e mǐ hu wá yi lɛ́ é sín agban kpo ɖo mǐ kpɛn wɛ ɔ, mǐ sixú kanbyɔ́ mǐɖée ɖɔ: ‘Nǔ e Jexóva nɔ flín é wɔn wɛ un ka ɖe a? Énɛ́ wɛ nyí ɖɔ wunwɔn wɛ un ka ɖe ɖɔ é nɔ flín ɖɔ hwɛhutɔ́ wɛ un nyí bo ná sɔ́ hwɛ kɛ hwɛhutɔ́ e hwɛ tɔn vɛ́ ná nyiɖɔhun é a? Nǔ e Jexóva wá gbeta ɔ kɔn bo wɔn é flín wɛ un ka lɛ́ ɖe a? Énɛ́ wɛ nyí ɖɔ hwɛ ɖěɖěe é ko sɔ́ kɛ mì bo ma sɔ́ ná wa nǔ tɔn xá mì gbeɖé ǎ lɛ́ é flín wɛ un ka lɛ́ ɖe a?’ Jexóva nɔ sɔ́ ayi ɖó hwɛ e mǐ ko hu wá yi lɛ́ é jí ǎ. Mǐ lɔ ɖó ná wa mɔ̌ ǎ. (Ðɛh. 130:3) Ényí mǐ yí gbe nú hwɛsɔ́kɛmɛ Jexóva tɔn ɔ, mǐ ná kpé wú bo sɔ́ hwɛ e mǐ ko hu wá yi lɛ́ é kɛ mǐɖée bo ná wɔn ya ná.

16. Tínmɛ awǒvinú e ɖo hwɛ dídó mɛɖée magbokɔ ɖó hwɛ e è hu wá yi lɛ́ é wú é mɛ é. (Kpɔ́n ɖiɖe ɔ lɔmɔ̌.)

¹⁶ Kpɔ́n kpɔ́ndéwú élɔ́. Hwɛ dídó mɛɖée magbokɔ ɖó hwɛ e è hu wá yi lɛ́ é wú cí lěe è nɔ ɖo mɔ̌to kun wɛ bo ka nɔ ɖo mɔ̌to ɔ sín gǔdokpɔ́nnú (rétroviseur) mɛ kpɔ́n wɛ magbokɔ é ɖɔhun. É nyɔ́ ɖɔ a ní nɔ nyi kɔ kpɔ́n gǔdokpɔ́nnú ɔ mɛ ɖokpó ɖokpó; é sixú zɔ́n bɔ a ná nyi alɔ nú awǒvinú e sixú jɛ dó jǐ we lɛ́ é. Amɔ̌, bo ná dó yi ɖo ayijayǐ mɛ ɔ, é ná nyɔ́ hú gǎn ɖɔ a ní sɔ́ ayi ɖó nukɔn. Ðo ali ɖokpó ɔ nu ɔ, ényí mǐ nɔ flín nǔ e mǐ wa nyi do wá yi lɛ́ é hweɖélɛ́nu ɔ, é sixú d’alɔ mǐ; yě sixú kplɔ́n nǔ mǐ bo lɛ́ ná hlɔ̌nhlɔ́n mǐ bɔ mǐ ná kán ɖ’é jí bo sɔ́ ná vɔ́ nǔ ɖokpó ɔ lɛ́ wa nyi do ǎ. Amɔ̌, ényí mǐ nɔ sɔ́ ayi ɖó nǔ e mǐ wa sɔ́ nyi do lɛ́ é jí dín ɔ, hwɛ e dó mǐɖée wɛ mǐ ɖe é sixú ɖó dogbó nú nǔ e mǐ sixú wa ɖo sinsɛnzɔ́ Mawu tɔn mɛ din é. É nyɔ́ wa hǔn, mi nú mǐ ní sɔ́ ayi ɖó nukɔn. Ali e nɔ kplá mɛ yi gbɛ yɔ̌yɔ́ e Mawu dó akpá tɔn é mɛ é jí wɛ mǐ ɖe; “mɛɖé sɔ́ ná flín” nǔ nyanya lɛ́ ɖo gbɛ énɛ́ mɛ ǎ.—Eza. 65:17; Nǔx. 4:25.

KPO ÐO JIÐE NÁ AYI TOWE WƐ

17. Étɛ́wú mǐ ka ɖó ná kpo ɖo gǎnjɛwú ná ayi mǐtɔn wɛ ɖɔ Jexóva yí wǎn nú mǐ bo nɔ ɖo gbesisɔmɛ hwebǐnu bo ná sɔ́ hwɛ kɛ mǐ?

¹⁷ Mǐ ɖó ná kpo ɖo jiɖe ná ayi mǐtɔn wɛ ɖɔ Jexóva yí wǎn nú mǐ bo ná ɖo gbesisɔmɛ hwebǐnu bo ná sɔ́ hwɛ kɛ mǐ. (1 Jaan 3:19.) Étɛ́wú? Ðó Satáan ná jó gbe dó gǎn e dó wɛ é ɖe bo ná bló bɔ mǐ ná mɔ ɖɔ è kún yí wǎn nú mǐ ó alǒ è kún sixú sɔ́ hwɛ kɛ mǐ ó é wú ǎ. Ðěbǔ wɛ é ná bo nyí ɔ, nǔ ɖokpó ɔ gbé nya wɛ é ɖe, énɛ́ wɛ nyí ɖɔ é ná bló bɔ mǐ ná ɖó Jexóva sinsɛn te. Mǐ sixú ɖó nukún ɖɔ Satáan ná ná hlɔ̌nhlɔ́n gǎn e dó wɛ é ɖe é ɖó é tuun ɖɔ hwenu kpɛɖé wɛ kpo nú émí wútu. (Nǔɖe. 12:12) Mǐ ɖó ná lɔn bónú é ná ɖu ɖ’é jí ǎ!

18. Étɛ́ a ka sixú wa dó ná gǎnjɛwú ayi towe ɖɔ Jexóva yí wǎn nú we bo nɔ ɖo gbesisɔmɛ hwebǐnu bo ná sɔ́ hwɛ kɛ we?

¹⁸ Bo ná dó ná hlɔ̌nhlɔ́n ji e a ɖe ɖɔ Jexóva yí wǎn nú we é hǔn, zǎn wěɖexámɛ ɖěɖěe jí mǐ ɖɔ xó dó ɖo xóta e wá yi é mɛ lɛ́ é. Bo ná dó ná hlɔ̌nhlɔ́n ayi towe ɖɔ Jexóva ɖo gbesisɔmɛ hwebǐnu bo ná nɔ sɔ́ hwɛ kɛ we hǔn, nɔ lin tamɛ dó lěe Jexóva ɖɔ xó dó éɖésúnɔ wú gbɔn é jí. Nɔ lin tamɛ dó nǔ e é sɔ́ dó ayi mɛ nú bibluwlántɔ́ lɛ́ bɔ yě ɖɔ dó hwɛsɔ́kɛmɛ tɔn wú lɛ́ é jí. Ma wɔn ɖɔ é tuun céɖécéɖé ɖɔ hwɛhutɔ́ wɛ a nyí bo ná nɔ kú nǔbláwǔ nú we ó. Gɔ́ ná ɔ, nɔ lɛ́ flín ɖɔ ényí é sɔ́ hwɛ kɛ mɛ ɔ, é nɔ wa mɔ̌ bǐ mlɛ́mlɛ́ wɛ. Mɔ̌ mɛ ɔ, kpó jiɖe e a ɖó dó nǔbláwǔkúnúmɛ Jexóva tɔn wú Davídi ɖɔhun é kpó ɔ, a ná kpé wú bo ná ɖɔ xó élɔ́: “É ná cɛ nú we Jexóva ɖɔ a sɔ́ ‘agɔ e un jɛ ɔ’ kɛ mì!”—Ðɛh. 32:5.