TÀN 55
Nyaví Kpɛví Ðé Sɛ̀n Mawu
NYAVÍ kpɛví e ɖò ɖiɖe ɔ mɛ é nyɔ́ ɖɛkpɛ à cé? Nyikɔ tɔn nɔ nyí Samuwɛli. Vɔsanúxwlémawutɔ́ ɖaxó Izlayɛli tɔn Elii wɛ nyí nya e sɔ́ alɔ ɖó ta tɔn é. Samuwɛli sín tɔ́ Ɛlukana kpo nɔ tɔn Ana kpo wɛ kplá ɛ wá nú Elii.
Xwè ɛnɛ alǒ atɔ́ɔ́n mɔ̌ ɖǒ wɛ jɛn Samuwɛli ɖè hwenɛnu. Amɔ̌, é na gɔ́ nú Elii kpo vɔsanúxwlémawutɔ́ ɖevo lɛ kpo, ɖò goxɔ Jehovah tɔn mɛ. Etɛwu Ɛlukana kpo Ana kpo ka sɔ́ nyaví kpɛví enɛ jó, bɔ é na sɛ̀n Jehovah ɖò goxɔ Tɔn mɛ? Mi nú mǐ ni kpɔ́n.
Ana nɔ aluwɛ mɛ ɖesu nú xwè yɔywɛ ɖé cobo jì Samuwɛli. Ðó é ba vǐ kaka, bo ka mɔ jì ǎ. Enɛ wu ɔ, ee é yì goxɔ Jehovah tɔn mɛ gbè ɖokpo é ɔ, é xoɖɛ, bo ɖɔ: ‘Có Jehovah! Ma wɔn mì ó. Un d’akpá ɖɔ enyi a na vǐ sunnu ɖé mì ɔ, un na sɔ́ ɛ na we bɔ é na sɛ̀n we kaka jɛ kú.’
Jehovah sè ɖɛ Ana tɔn, bɔ sun yɔywɛ ɖé gudo ɔ, é jì Samuwɛli. Ana yí wǎn nú vǐ sunnu tɔn, bo jɛ xó Jehovah tɔn kplɔ́n ɛ jí sín vǔ. É ɖɔ nú asú tɔn ɖɔ: ‘Enyi Samuwɛli ɖè anɔ̌ tlolo ɔ, un na kplá ɛ jó, bɔ é na sɛ̀n Jehovah ɖò goxɔ Tɔn mɛ.’
Nǔ e wà wɛ Ana kpo Ɛlukana kpo ɖè ɖò ɖiɖe ɔ mɛ é nɛ. Xomɛ hun Samuwɛli, ɖó mɛjitɔ́ tɔn lɛ kplɔ́n ɛ ganji, bɔ é kpé nǔ wu bo na sɛ̀n Jehovah ɖò goxɔ Tɔn mɛ. Xwewu xwewu ɔ, Ana kpo Ɛlukana kpo nɔ yì sɛ̀n Jehovah ɖò goxɔ bunɔ enɛ mɛ, bo nɔ lɛ́ ɖɔ nǔ dó vǐ yetɔn. Ana nɔ lɛ́ tɔ̀ awu yɔyɔ̌, bo nɔ hɛn yì jó nú Samuwɛli xwemɛ xwemɛ.
Xwè ɖò xwè jí jɛ wɛ có Samuwɛli kpò ɖò Jehovah sɛ̀n wɛ. Enɛ zɔ́n bɔ Jehovah kpo togun ɔ kpo yí wǎn n’i. Amɔ̌, vɔsanúxwlémawutɔ́ ɖaxó Elii sín vǐ Ɔfunii kpo Fineasu kpo nyí nùɖewánu ǎ. Ye nɔ dó nǔ baɖabaɖa gègě sìn, bo nɔ lɛ́ dɔn mɛ ɖevo lɛ dó tónúmase nú Jehovah mɛ. Elii ɖó na yí vɔsanúxwlémawutɔ́zɔ́ ɔ sín ye sí, é ka wà mɔ̌ ǎ.
Samuwɛli lɔn nú nǔ nyanya e ɖò jijɛ lɛlɛ̌ dó é wɛ lɛ é ɖebǔ zɔ́n, bonu é jó Jehovah sinsɛn dó ǎ. Jehovah ɖɔ xó nú gbɛtɔ́ tlɔlɔ lě é ɔ, é ko lín, ɖó mɛ kpɛɖé jɛn yí wǎn n’i tawun. Amɔ̌, ee Samuwɛli sù é ɔ, nǔ e jɛ é ɖíe:
Samuwɛli ɖò amlɔ dɔ wɛ ɖò goxɔ Jehovah tɔn mɛ, bɔ gbè ɖé fɔ́n ɛ. É ɖɔ: ‘Nyɛ ɖíe.’ É site, bo kanwezun yì Elii gɔ́n, bo ɖɔ: ‘A ylɔ mì, nyɛ ɖíe.’
Amɔ̌, Elii ɖɔ n’i ɖɔ: ‘Un ylɔ we ǎ, lɛ̌kɔ yì mlɔ́ ayǐ.’ Samuwɛli lɛkɔ yì mlɔ́ ayǐ nugbǒ.
Enɛ gudo ɔ, gbè ɔ lɛ́ ɖɔ azɔn wegɔ ɔ ɖɔ: ‘Samuwɛli!’ Samuwɛli lɛ́ site, bo kanwezun yì Elii gɔ́n, bo ɖɔ: ‘A ylɔ mì, nyɛ ɖíe.’ Amɔ̌, Elii ɖɔ n’i ɖɔ: ‘Un ylɔ we ǎ vǐ ce. Lɛ̌vɔ lɛkɔ yì mlɔ́ ayǐ.’ Samuwɛli lɛkɔ yì mlɔ́ ayǐ nugbǒ.
Gbè ɔ lɛ́ ylɔ ɛ azɔn atɔngɔ ɔ bo ɖɔ: ‘Samuwɛli!’ Samuwɛli kanwezun yì Elii gɔ́n, bo ɖɔ: ‘Nyɛ ɖíe, dìn tɔn ɔ, hwi wɛ ylɔ mì.’ Elii wá mɔ nǔ jɛ wu ɖɔ Jehovah wɛ ɖò ylɔylɔ ɛ wɛ. Enɛ wu ɔ, é ɖɔ nú Samuwɛli ɖɔ: ‘Lɛ̌vɔ yì mlɔ́ ayǐ bonu a sɔ́ sè gbè ɔ ɖě hǔn, ɖɔ: “Ðɔ xó, Jehovah, ɖó deví towe ɖò tó ɖó we wɛ.”’
Nǔ e Samuwɛli ɖɔ hwenu e Jehovah ylɔ ɛ ɖevo é nɛ. Jehovah wá ɖɔ nú Samuwɛli ɖɔ emi ɖò tó na dɔn nú Elii kpo vǐ sunnu tɔn lɛ kpo wɛ. Enɛ gudo ɔ, Filisitiinu lɛ hu Ɔfunii kpo Fineasu kpo ɖò ahwangbenu. Ee Elii sè mɔ̌ é ɔ, é j’ayǐ jɛ wɛn, bo wɛ́n kɔ. É lɔmɔ̌ kú. Nǔ e Jehovah ɖɔ é jɛ nugbǒ.
Samuwɛli wá nyí mɛxo. É wɛ nyí hwɛɖɔtɔ́ Izlayɛli tɔn gudo tɔn. Ee é kpò é ɔ, togun ɔ ɖɔ n’i ɖɔ: ‘Sɔ́ axɔsu ɖokpo bonu é na kpa acɛ dó mǐ nu.’ Samuwɛli ka ba mɔ̌ ǎ, ɖó Jehovah wɛ nyí axɔsu yetɔn. Amɔ̌, Jehovah ɖɔ n’i ɖɔ é ni sè xó e ɖɔ wɛ togun ɖè é.
1 Samuel 1:1-28; 2:11-36; 3:1-18; 4:16-18; 8:4-9.