TÀN 114
Vivɔnu Nǔnyanyawiwa Tɔn
ETƐ a ka mɔ ɖò finɛ? Ahwangɔnu ɖé wɛ, bo ɖò sɔ́ wewé lɛ jí. A ka ɖ’ayi fí e gosin wɛ ye ɖè é wu à? Jixwé lɔ́n sín wɛ ye ɖè, bo ɖò akpɔ́kpɔ́ mɛ! Sɔ́ ka ɖò jixwé dóó à?
Eǒ. Sɔ́ enɛ lɛ nyí sɔ́ jɔ sɔ́ ǎ, ɖó è sixu kun sɔ́ gbɔn akpɔ́kpɔ́ mɛ ǎ. Kabǐ? Amɔ̌, etɛwu Biblu ka ɖɔ ɖɔ sɔ́ lɛ ɖò te jɛ sín jixwé wɛ?
È nɔ zán sɔ́ dó fun ahwan hwexónu wu wɛ zɔ́n. Enɛ wu ɔ, Biblu ɖɔ ɖɔ sɔxatɔ́ lɛ ɖò sɔ́ kun wɛ bo jɛte sín jixwé, bo dó xlɛ́ ɖɔ Mawu na fun ahwan ɖé xá gbɛtɔ́ lɛ ɖò ayikúngban jí. A ka tuùn ahwan enɛ sín nyikɔ à? É nɔ nyí Amagedɔ́ɔ́n. Ahwan enɛ wɛ na sú kún dó nú nǔnyanyawiwa bǐ ɖò ayikúngban ɔ jí.
Jezu wɛ nyí Mɛ e na nɔ nukɔn nú Amagedɔ́ɔ́n é. Jezu wɛ Jehovah sɔ́ bɔ é na nyí axɔsu nú acɛkpikpa Tɔn. A ka flín à? Nǔ e wu Jezu xwè axɔsugbakún é nɛ. Hwǐ e ɖò alɔ tɔn mɛ é ɖexlɛ́ ɖɔ é na hu kɛntɔ́ Mawu tɔn lɛ bǐ. Hǔn, Mawu na sú kún dó nú nǔnyanyawatɔ́ lɛ bǐ. É ka ɖó na kpaca mǐ wɛ à?
Hun Tàn 10 gɔ́ ɔ bo kpɔ́n. Etɛ a ka mɔ ɖò finɛ? Jǐ ɖaxó ɖé ja, bo sú kún dó nú nǔnyanyawatɔ́ lɛ. Mɛ̌ ka bló bɔ jǐ ɖaxó enɛ ja? Jehovah Mawu wɛ. Lɛ̌ hun Tàn 15 gɔ́ ɔ, bo kpɔ́n. Etɛ ka ɖò jijɛ wɛ ɖò finɛ? Jehovah sɔ́ myɔ dó ɖò Sodɔmu kpo Gomɔɔ kpo viva wɛ.
Hun Tàn 33 gɔ́ ɔ, bo kpɔ́n nǔ e ɖò jijɛ dó sɔ́ kpo ahwankɛkɛ Ejipunu lɛ tɔn kpo wu wɛ é. Mɛ̌ ka hihɔ sín ɔ dó jǐ yetɔn? Jehovah wɛ bló mɔ̌, bo dó cyɔn alɔ togun tɔn jí. Lɛ̌ hun Tàn 36 kpo 76 gɔ́ ɔ kpo, bo kpɔ́n. A na mɔ ɖò finɛ ɖɔ Jehovah tlɛ tin, bɔ è gbà Izlayɛli-ví lɛ, ɖó nǔnyanyawiwa yetɔn wu.
Enɛ wu ɔ, é ɖó na kpaca mǐ ɖɔ Jehovah na sɛ́ ahwangɔnu tɔn jixwé tɔn lɛ dó, bɔ ye na sú kún dó nú nǔnyanyawiwa ɖò ayikúngban jí ǎ. Amɔ̌, lin tamɛ dó lè e na tɔ́n sín mɛ é jí! Hun wexwɛ e bɔ d’ewu é, bonu mǐ na kpɔ́n..