Nɔ Ðɔ Nugbǒ Ðò Nǔ Bǐ Mɛ

1, 2. Aniwu gǎn e dó wɛ mǐ ɖè bo na nyí nugbǒɖɔtɔ́ é ka nɔ víví nú Jehovah? Nǎ kpɔ́ndéwú ɖé.

MAMÁA ɖé kpo vǐ sunnu tɔn kpɛví ɔ kpo tɔ́n sín cɔ́fu ɖé mɛ ɖó kpɔ́. Ajijimɛ ɔ, vǐ ɔ nɔte, bɔ è mɔ ɖò nukún tɔn ta ɖɔ nùɖé vɛ́ n’i. É zé ayihundanú kpɛví ɖé ɖò cɔ́fu ɔ mɛ b’ɛ ɖò alɔ tɔn nu. É sɔ́ flín bo sɔ́ ɖ’ayǐ alǒ ɖɔ nú nɔ tɔn ɖɔ é ni xɔ nú emi ǎ. É ylɔ nɔ tɔn kpo adohu adohu kpo. Nɔ tɔn na jiɖe é bo kplá ɛ lɛkɔ yì cɔ́fu ɔ mɛ bonu é na sɔ́ ayihundanú ɔ ɖ’ayǐ bo dó kɛnklɛn. Hwenu e é ɖò mɔ̌ wà wɛ é ɔ, nɔ ɔ ɖó awǎjijɛ bo lɛ́ gó. Aniwu?

² Hweɖebǔnu e mɛjitɔ́ lɛ mɔ bɔ vǐ yetɔn lɛ ɖò lee nugbǒɖiɖɔ xɔ akwɛ sɔ́ é kplɔ́n wɛ é ɔ, é nɔ víví nú ye tawun. Mɔ̌ wɛ é nɔ cí nú Tɔ́ mǐtɔn jixwé tɔn “Mawu gbejinɔtɔ́ [alǒ nugbǒɖɔtɔ́, NW]” ɔ lɔ. (Ðɛhan 31:6) Hwenu e é ɖò mǐ mɔ wɛ bɔ mǐ ɖò susu wɛ ɖò gbigbɔ lixo é ɔ, gǎn e dó wɛ mǐ ɖè bo na nyí nugbǒɖɔtɔ́ é nɔ víví n’i. Ðó mǐ jló na hɛn xomɛ tɔn hun bo lɛ́ hɛn mǐɖée ɖò wanyiyi tɔn mɛ wutu ɔ, mǐ nɔ ɖó linlin ɖokpo ɔ kpodo mɛsɛ́dó Pɔlu kpo, é ɖɔ: “Mǐ ɖó jlǒ bo na nɔ zán gbɛ̀ ɖagbe ɖò nǔ bǐ mɛ.” (Eblée lɛ 13:18) Xógbe Glɛkigbe tɔn e è lilɛ dó “ɖagbe” é sín tinmɛ lɛ́ nyí nugbǒɖiɖɔ. Mi nú mǐ ni zé ayi ɖó ali e nu nugbǒɖiɖɔ nɔ kàn sunnu byɔ ɖè hweɖelɛnu é taji ɛnɛ jí. Enɛ gudo ɔ, mǐ na ɖɔ xó dó lè e è nɔ mɔ ɖò nugbǒɖiɖɔ mɛ é ɖé lɛ jí.

NUGBǑÐIÐƆ NÚ MǏÐESUNƆ

3-5. (a) Nɛ̌ Xó Mawu Tɔn ka gb’akpá nú mǐ dó mɔ e ɖò mɛɖée blɛ́blɛ́ mɛ lɛ é wu gbɔn? (b) Etɛ ka na d’alɔ mǐ bɔ mǐ na nɔ ɖɔ nugbǒ nú mǐɖesunɔ?

³ Nǔ nukɔntɔn e nɔ kàn sunnu byɔ é wɛ nyí nugbǒɖiɖɔ nú mǐɖesunɔ hwebǐnu. Ðó mǐ nyí gbɛtɔ́ hwɛhutɔ́ lɛ wutu ɔ, é bɔwǔ tawun bɔ mǐ na blɛ́ mǐɖesunɔ. Ði kpɔ́ndéwú ɔ, Jezu ɖɔ nú Klisanwun Lawodisée tɔn lɛ ɖɔ ye blɛ́ yeɖée bo ɖò linlin wɛ ɖɔ emi jɛ dɔkun, loɔ, “wamamɔnɔ wɛ [ye] nyí; nukúntíntɔ́nnɔ wɛ nú [ye]; mɛ̌ wɛ [ye] ɖè” ɖò gbigbɔ lixo; ninɔmɛ yetɔn blawu tawun. (Nǔɖexlɛ́mɛ 3:17) Yeɖée e ye blɛ́ é zɔ́n bɔ ninɔmɛ yetɔn lɛ́ nyla d’eji.

⁴ A sixu ko lɛ́ flín ɖɔ Jaki gb’akpá nú mǐ ɖɔ: “Enyi mɛɖé mɔ ɖɔ emi nyí sinsɛnnɔ, bo ma ka nɔ hɛn nu tɔn ǎ ɔ, éɖée blɛ́ wɛ é ɖè; sinsɛn tɔn nyí nùɖewánu ǎ.” (Jaki 1:26) Enyi mǐ lin ɖɔ mǐ sixu zán ɖɛ̌ mǐtɔn nyì dó cobɔ Jehovah ka na lɛ́ yí gbè nú lee sɛ̀n ɛ gbɔn wɛ mǐ ɖè é ɔ, mǐɖée blɛ́ wɛ jɛn mǐ na ɖè kpowun. Jehovah sinsɛn mǐtɔn na nyí nùɖewánu ǎ, nǔ vɔtɔ́ ɖé jɛn é na nyí. Etɛ ka sixu d’alɔ mǐ bɔ mǐ ma na zán gbɛ̀ nyanya mɔhun ǎ?

⁵ Ðò akpáxwé ɖokpo ɔ mɛ ɔ, Jaki jlɛ́ Mawuxó ɔ dó nùkpɛ́n wu. É ɖɔ nú mǐ ɖɔ mǐ ni nɔ kpɔ́n mǐɖée ɖò sɛ́n maɖóblɔ̌ Mawu tɔn mɛ bo nɔ bló huzuhuzu e jɛxa lɛ é. (Xà Jaki 1:23-25.) Biblu sixu d’alɔ mǐ bɔ mǐ na nɔ ɖɔ nugbǒ nú mǐɖesunɔ, bo na tuùn nǔ e mǐ ɖó na wà bá kpɔ́n te é. (Gbɛvíhan 3:40; Ajée 1:5) Mǐ sixu lɛ́ xoɖɛ sɛ́dó Jehovah bo byɔ ɛ ɖɔ é ni gbéjé mǐ kpɔ́n, bo d’alɔ mǐ bonu mǐ na yí gbè nú nǔjɛdo ɖebǔ e ɖò mǐ wu é bo dó gǎn bo huzu. (Ðɛhan 139:23, 24) Nugbǒmaɖɔ nyí gǎnmaɖó ɖé bo nɔ nyí mɛ, bɔ mǐ ɖó na ɖó linlin e Tɔ́ mǐtɔn jixwé tɔn ɔ nɔ ɖó d’ewu é d’ewu. Ðɛhan 5:7 ɖɔ: “Hwi Mawu Mavɔmavɔ ɔ, a nɔ sú mɛ e ɖò adingban te lɛ é kún dó. A gbɛ́ wǎn nú gbɛtɔ́ e nɔ kɔn hun kɔn nyì ayǐ é, gbɛtɔ́ e nɔ ɖó sísɛ́ nukɔn nú mɛ é.” Jehovah sixu d’alɔ mǐ bɔ mǐ na ɖó linlin e éyɛ nɔ ɖó dó nugbǒɖiɖɔ wu é, bo na sɔ́ linlin tɔn dó gbéjé nǔwiwa mǐtɔn lɛ kpɔ́n na. Flín nǔ e Pɔlu ɖɔ é: “Mǐ ɖó jlǒ bo na nɔ zán gbɛ̀ ɖagbe ɖò nǔ bǐ mɛ.” Mǐ sixu nyí gbɛtɔ́ maɖóblɔ̌ dìn ǎ, amɔ̌, mǐ jló ɖesu bo na nɔ ɖɔ nugbǒ.

NUGBǑÐIÐƆ ÐÒ XWÉDO MƐ

6. Aniwu asú kpo asì kpo lɛ ka ɖó na nɔ ɖɔ nugbǒ nú yeɖée? Mɔ tɛ lɛ nyì alɔ na wɛ ye ka ɖè mɔ̌ nɛ?

⁶ Nugbǒɖiɖɔ ɖó na nyí wuntun e è na dó tuùn xwédo Klisanwun tɔn na é ɖé. Enɛ wu ɔ, asú kpo asì kpo ɖó na nɔ ɖɔ xomɛ nú yeɖée. Klisanwun e ko wlí alɔ é ɖé ɖó na ɖó walɔ blíblí lɛ ǎ, ɖi jlǒ wanyiyi tɔn ɖiɖó nú mɛ e ma nyí asì tɔn alǒ asú tɔn ǎ é, gbɛ̌dido dó nǔglɔ gbɔn ɛntɛnɛti jí alǒ fɔtóo nùblibliwiwa tɔn lɛ kpinkpɔn ɖò ɛntɛnɛti jí, telée mɛ, xójlawema lɛ mɛ. Klisanwun e ko wlí alɔ é ɖé lɛ ko dó ta walɔ blíblí mɔhun lɛ mɛ bo sɔ́ hwla dó mɛ e ye da é. Mɔ̌ wiwa nyí nugbǒmaɖɔ. Ðǒ ayi xógbe axɔsu gbejinɔtɔ́ Davidi tɔn elɔ lɛ wu: “Un nɔ dó gbɛtɔ́ nuwenɔgbɛ́ ǎ, un nɔ zɔn xá gbɛtɔ́ yɛmɛnuwatɔ́ ǎ.” (Ðɛhan 26:4) Enyi a ko wlí alɔ hǔn, ma dó ta walɔ e sixu zɔ́n bɔ a hwla nǔ e a nyí é dó mɛ e a da é é mɛ gbeɖé ó!

7, 8. Kpɔ́ndéwú Biblu tɔn tɛ lɛ ka sixu d’alɔ vǐ lɛ bɔ ye na kplɔ́n lee nugbǒɖiɖɔ xɔ akwɛ sɔ́ é?

⁷ Hwenu e mɛjitɔ́ lɛ ɖò lee nugbǒɖiɖɔ xɔ akwɛ sɔ́ é kplɔ́n vǐ yetɔn lɛ wɛ é ɔ, é na nyɔ́ ɖɔ ye ni nɔ zán kpɔ́ndéwú Biblu tɔn lɛ. Kpɔ́ndéwú nugbǒmaɖɔ tɔn ɖé lɛ wɛ nyí tan Akani tɔn, é j’ajo bo lɛ́ kàn ayixa bo na gbá nǔ na; tan Gehazíi tɔn, é ɖ’adingban bo na mɔ tɛn dó yí nùnina ɖé lɛ; tan Judasi tɔn, é j’ajo bo lɛ́ ɖ’adingban baɖabaɖa dó wà nǔ dó Jezu wu.​—Jozuwée 6:17-19; 7:11-25; 2 Axɔsu lɛ 5:14-16, 20-27; Matie 26:14, 15; Jaan 12:6.

⁸ Kpɔ́ndéwú nugbǒɖiɖɔ tɔn ɖé lɛ wɛ nyí tan Jakɔbu tɔn, é ɖɔ nú vǐ tɔn lɛ ɖɔ ye ni lɛkɔ nú akwɛ e ye mɔ ɖò ati yetɔn lɛ mɛ é, ɖó é lin ɖɔ wɔn wɛ mɛ e sà nǔ nú ye lɛ é sixu ko wɔn jó dó nyì mɛ; tan Jɛfutée kpo vǐ nyɔnu tɔn kpo tɔn, é sɔ́ nǔ gègě dó savɔ̌ bo wà nǔ e sín akpá daa tɔn dó é; tan Jezu tɔn, é kpankɔ́n bo ɖè éɖée xlɛ́ ɖò ahwan adakaxotɔ́ ɖé nukɔn, bonu nǔɖɔɖ’ayǐ ɖé na dó jɛnu bo cyɔn alɔ xɔ́ntɔn tɔn lɛ jí. (Bǐbɛ̌mɛ 43:12; Hwɛɖɔtɔ́ lɛ 11:30-40; Jaan 18:3-11) Kpɔ́ndéwú klewun enɛ lɛ sixu d’alɔ mɛjitɔ́ lɛ bɔ ye na mɔ dɔkun e ɖò Xó Mawu Tɔn mɛ, bo sixu d’alɔ ye bɔ ye na kplɔ́n vǐ yetɔn lɛ ɖɔ ye ni yí wǎn nú nugbǒɖiɖɔ bonu é lɛ́ xɔ akwɛ ɖò nukún yetɔn mɛ lɛ é.

9. Enyi mɛjitɔ́ lɛ jló na zé kpɔ́ndéwú nugbǒɖiɖɔ tɔn ɖ’ayǐ nú vǐ yetɔn lɛ ɔ, etɛ ye ka ɖó na nyì alɔ na? Etɛwu kpɔ́ndéwú mɔhun ka ɖò taji?

⁹ Mɛkplɔnkplɔn mɔhun byɔ nǔ taji ɖé ɖò mɛjitɔ́ lɛ sí. Mɛsɛ́dó Pɔlu kanbyɔ ɖɔ: “Hwi mɛ e nɔ kplɔ́n nǔ mɛ ɖě lɛ ɔ, etɛwu a ma ka nɔ kplɔ́n nǔ hwiɖée ǎ? A nɔ ɖɔ nú mɛ lɛ ɖɔ è ma jɛ ajo ó; etɛwu hwiɖesunɔ ka nɔ jɛ ajo?” (Hlɔmanu lɛ 2:21) Mɛjitɔ́ ɖé lɛ nɔ bú vǐ yetɔn lɛ, ɖó ye nɔ kplɔ́n vǐ lɛ ɖɔ ye ni nɔ ɖɔ nugbǒ lobɔ yeɖesunɔ ka nɔ ɖ’adingban. Ye sixu ba hwɛjijɔ nú ajo kpo adingban winniwinni lɛ kpo, bo ɖɔ: “Gbě e mɛ xɔ dɔ é wɛ xɔ nɔ ɖu ɖè” alǒ “Adingban kpɛví wɛ ka nyí enɛ mɛ. Nùɖé ma nyla ɖ’emɛ nɛ.” Enyi è na ɖɔ xó jɔ xó ɔ, ajo ɔ ajo wɛ, nǔ e è fin é sixu nɔ ma xɔ akwɛ; mɔ̌ ɖokpo ɔ, adingban ɔ adingban wɛ, nǔ e mɛ è ɖó adingban ɔ ɖè é sixu nɔ ma nyí nùjɔnǔ.a (Xà Luki 16:10.) Vǐ lɛ nɔ yawu ɖ’ayi yɛmɛnuwiwa wu, b’ɛ sixu wà nǔ dó ye wu. (Efɛzinu lɛ 6:4) Amɔ̌, enyi kpɔ́ndéwú mɛjitɔ́ lɛ tɔn kplɔ́n nugbǒɖiɖɔ vǐ lɛ ɔ, ye sixu sù bo na kpa susu nú Jehovah ɖò gbɛ̀ nugbǒmaɖɔ tɔn elɔ mɛ.​—Nùnywɛxó 22:6.

NUGBǑÐIÐƆ ÐÒ AGUN MƐ

10. Ðò xó ɖɔ ɖó kpɔ́ xá nùɖitɔ́ hàtɔ́ lɛ hwenu ɔ, etɛ lɛ mǐ ka ɖó na hɛn dó ayi mɛ?

¹⁰ Kpɔ́ninɔ kpodo Klisanwun hàtɔ́ mǐtɔn lɛ kpo nɔ hun nugbǒɖiɖɔ sín ali gègě nú mǐ. Lee mǐ ko kplɔ́n gbɔn ɖò Wemata 12gɔ́ ɔ mɛ é ɔ, mǐ ɖó na ɖò acéjí dó alɔkpa e mɛ mǐ nɔ zán nùnina xóɖiɖɔ tɔn mǐtɔn gbɔn é wu, ɖò taji ɔ, hwenu e mǐ ɖò nɔví sunnu kpo nɔví nyɔnu gbigbɔ mɛ tɔn mǐtɔn lɛ kpo tɛntin é. Xóɖɔɖókpɔ́ ayihɔngbe ayihɔngbe tɔn sixu yawu byɔ mɛnuɖiɖɔ kpo jidómɛ kpo mɛ! Enyi mǐ vɔ́ xó e mǐ ma tuùn dò tɔn ǎ é ɖɔ ɔ, é sixu nyí ɖɔ adingban fúnfún kpé wɛ mǐ ɖè, enɛ wu ɔ, é na nyɔ́ hú ɖɔ mǐ ni nɔ hɛn nu mǐtɔn. (Nùnywɛxó 10:19) Ðò alɔ ɖevo mɛ ɔ, mǐ sixu tuùn dò nú xó ɖé, amɔ̌, enɛ ko xlɛ́ ɖɔ é sɔgbe ɖɔ mǐ ni jɛ ɖiɖɔ kpé jí ǎ. Ði kpɔ́ndéwú ɔ, é sixu ko nyí ɖɔ xó ɔ kàn mǐ ǎ, abǐ ɖiɖɔ tɔn nyɔ́ ǎ. (1 Piyɛ́ɛ 4:15) Mɛɖé lɛ nɔ dó mɛmasi xógbe bo nɔ ba hwɛjijɔ ɖɔ nugbǒ ɖɔ wɛ emi ɖè, amɔ̌, xógbe mǐtɔn lɛ ɖó na nɔ nyɔ́ sè hwebǐnu bo nɔ dɔn mɛ.​—Xà Kolosinu lɛ 4:6.

11, 12. (a) Ali tɛ lɛ nu wɛ mɛ e jɛ hwɛ syɛnsyɛn mɛ é ɖé lɛ ka nɔ hɛn ninɔmɛ ɔ syɛn ɖè? (b) Adingban tɛ lɛ mɔ̌ Satáan ka nɔ sɔ́ sù dó hwɛ syɛnsyɛn lɛ wu? Nɛ̌ mǐ ka sixu ɖu ɖò ye jí gbɔn? (c) Nɛ̌ mǐ ka sixu ɖɔ nugbǒ nú tutoblonunu Jehovah tɔn gbɔn?

¹¹ É ɖò taji tawun ɖɔ mǐ ni nɔ ɖɔ nugbǒ nú mɛ e ɖò nukún kpé dó nǔ wu wɛ ɖò agun ɔ mɛ lɛ é. Mɛ e jɛ hwɛ syɛnsyɛn mɛ é ɖé lɛ nɔ hɛn ninɔmɛ ɔ syɛn, ɖó ye nɔ ba na bú nǔ dó hwɛ yetɔn lɛ bo nɔ ɖ’adingban nú mɛxo agun tɔn lɛ hwenu e ye kàn nǔ byɔ ye d’ewu é. Mɛ mɔhun lɛ tlɛ nɔ jɛ gbɛ̀ wè zán jí, ye nɔ xlɛ́ ɖò nukúnta ɖɔ emi ɖò Jehovah sɛ̀n wɛ lobo ka nɔ ɖò hwɛ syɛnsyɛn huhu gbɛ̀ zán wɛ. Wǎgbɔ tɔn ɔ, nǔwiwa yetɔn lɛ nɔ zɔ́n bɔ gbɛzinzan yetɔn bǐ nɔ wá huzu adingban. (Ðɛhan 12:3) Mɛ ɖevo lɛ nɔ ɖɔ xó ɔ nugbǒ tɔn alabǔ nú mɛxo lɛ, bo ka nɔ bú nǔ dó nǔ taji lɛ. (Mɛsɛ́dó 5:1-11) Hwɛhwɛ ɔ, nùɖiɖi ɖiɖó nú adingban e Satáan nɔ sɔ́ sù lɛ é wɛ nɔ zɔ́n nugbǒmaɖɔ mɔhun.—Kpɔ́n gbàví “Adingban Satáan Tɔn lɛ Dó Hwɛ Syɛnsyɛn lɛ Wu.”

¹² É lɛ́ ɖò taji ɖɔ mǐ ni nɔ ɖɔ nugbǒ nú tutoblonunu Jehovah tɔn hwenu e mǐ nɔ ɖò xósin na nú nùkanbyɔ ɖé lɛ dó wema jí wɛ é. Ði kpɔ́ndéwú ɔ, hwenu e mǐ ɖò ganmɛ na wɛ é ɔ, mǐ ɖó na ɖò acéjí bo na wlan azɔ̌ e mǐ ma wà ǎ é ǎ. Mɔ̌ ɖokpo ɔ, hwenu e mǐ jló na bɛ́ sinsɛnzɔ́ hwebǐnu tɔn ɖé mɔ̌ bo ɖò gbè yí nú nùkanbyɔ lɛ wɛ dó wema jí é ɔ, mǐ ɖó na ɖɔ lee lanmɛ mǐtɔn ɖè gbɔn é alǒ nǔ ɖevo e kúnkplá mǐɖesunɔ, gbɛzinzan mǐtɔn kpo sinsɛnzɔ́ mǐtɔn kpo é pɛ́pɛ́pɛ́.​—Xà Nùnywɛxó 6:16-19.

13. Enyi mǐ nɔ wà ajɔ̌ alǒ azɔ̌ ɖó kpɔ́ xá nùɖitɔ́ hàtɔ́ ɖé ɔ, nɛ̌ mǐ ka sixu nyí nugbǒɖɔtɔ́ gbɔn?

¹³ Nugbǒɖiɖɔ nú nùɖitɔ́ hàtɔ́ mǐtɔn lɛ lɛ́ kàn nǔ e kúnkplá ajɔ̌ kpo azɔ̌ kpo lɛ é. Hweɖelɛnu ɔ, Klisanwun nɔví sunnu kpo nɔví nyɔnu lɛ kpo sixu wà ajɔ̌ ɖó kpɔ́. Ye ɖó na ɖò acéjí bonu ajɔ̌ xó yetɔn ni ma vá dó sinsɛn-biblo yetɔn wu ó. Ye ɖó na nɔ nyì alɔ nú xó ɖɔ ɖó kpɔ́ dó nǔ mɔhun lɛ jí hwenu e ye ɖò Kpléxɔ Axɔsuɖuto ɔ Tɔn mɛ alǒ kúnnuɖegbe é. Azɔ̌wiwa ɖó kpɔ́ sixu byɔ ɖɔ mɛɖé ni nyí gǎn bɔ mɛ ɖě ɔ nyí mɛ e è yí dó azɔ̌ mɛ é. Enyi ɖɔ mǐ yí nɔví sunnu lɛ alǒ nɔví nyɔnu lɛ dó azɔ̌ mɛ ɔ, mǐ ɖó na ɖò acéjí bo na wà nǔ xá ye kpo nugbǒɖiɖɔ kpo, gbɔn akwɛ e jí mǐ ɖɔ ɖó é súsú ye dó ganmɛ gblamɛ, bɔ ye ka na lɛ́ ɖu lè ɖevo e xó mǐ ɖɔ alǒ sɛ́n byɔ lɛ é. (1 Timɔtée 5:18; Jaki 5:1-4) Ðò alɔ ɖevo mɛ ɔ, enyi ɖɔ nɔví sunnu ɖé alǒ nɔví nyɔnu ɖé yí mǐ dó azɔ̌ mɛ ɔ, mǐ ɖó na wà akwɛ e mǐ nɔ yí é sín azɔ̌ mlɛ́mlɛ́. (2 Tɛsalonikinu lɛ 3:10) Mǐ ɖó na ɖó nukún ɖɔ é ni nɔ kpɔ́n wewé ɖé bo nɔ gbò dó wiwi mɛ nú mǐdɛɛ lɛ ɖò gbɔjɛyiyi, akwɛ, alǒ lè ɖevo lɛ linu, ɖó kancica gbigbɔ mɛ tɔn e ɖò mǐ kpo é kpo tɛntin é wutu ǎ.​—Efɛzinu lɛ 6:5-8.

14. Hwenu e Klisanwun lɛ ɖò ajɔ̌ wà ɖó kpɔ́ wɛ é ɔ, nùnywɛnú tɛ ye ka ɖó na wà? Aniwu?

¹⁴ Enyi é byɔ ɖɔ è ni va akwɛ dó ajɔ̌ ɖé mɛ alǒ nya akwɛ ɔ ka ló? Nugbodòdó Biblu tɔn taji elɔ e nyɔ́ zán é sixu d’alɔ mɛ: Mi nɔ wlan nǔ lɛ bǐ ɖ’ayǐ! Ði kpɔ́ndéwú ɔ, hwenu e Jelemíi xɔ ayikúngban ɖé é ɔ, é ɖɔ bɔ è bló wema tɔn ɖó wè jí, ɖò kúnnuɖetɔ́ lɛ nukɔn, bo sɛ̀ ye xwè ganji nú sɔgudo. (Jelemíi 32:9-12; lɛ̌ kpɔ́n Bǐbɛ̌mɛ 23:16-20.) Hwenu e mǐ ɖò ajɔ̌ wà wɛ kpo nùɖitɔ́ hàtɔ́ lɛ kpo é ɔ, nǔ lɛ bǐ winwlan ɖ’ayǐ hlɛ́nhlɛ́n, bo d’alɔ mɛ ɖò kúnnuɖetɔ́ lɛ nukɔn ko xlɛ́ ɖɔ mǐ kún ɖeji dó ye wu ó ǎ. É nyɔ́ wà ɔ, enɛ nɔ zɔ́n bɔ è nɔ nyì alɔ nú nukúnnú ma mɔ jɛ mɛɖée mɛ, xomɛsin, kpo nǔ e na hɛn kínklán wá lɛ é kpo. Klisanwun e nɔ wà ajɔ̌ ɖó kpɔ́ kpo Klisanwun hàtɔ́ yetɔn lɛ kpo lɛ é ɖó na hɛn dó ayi mɛ ɖɔ é kún jɛxa gbeɖé bonu ajɔ̌waɖókpɔ́ ɖebǔ ni zé kpɔ́ninɔ kpo fífá agun ɔ tɔn kpo ɖó axɔ nu ó.b​—1 Kɔlɛntinu lɛ 6:1-8.

NUGBǑÐIÐƆ ÐÒ NǓWIWA MǏTƆN LƐ MƐ

15. Nɛ̌ nugbǒmaɖɔ ɖò ajɔ̌ lixo ka nɔ cí nú Jehovah? Nɛ̌ Klisanwun lɛ ka nɔ wà nǔ gbɔn ɖò ali enɛ nu?

¹⁵ Nugbǒɖiɖɔ Klisanwun ɖé tɔn fó ɖó agun mɛ ǎ. Pɔlu ɖɔ: “Mǐ ɖó jlǒ bo na nɔ zán gbɛ̀ ɖagbe ɖò nǔ bǐ mɛ.” (Eblée lɛ 13:18) Gbɛɖotɔ́ mǐtɔn nɔ ba tawun ɖɔ mǐ ni nɔ ɖɔ nugbǒ ɖò ajɔ̌ sín ali nu. Ðò wema Nùnywɛxó tɔn kɔ́kɔ́ɖɔkɔ́ mɛ ɔ, azɔn ɛnɛ wɛ è tɛɖɛ̌ jí ɖɔ nǔdagan e sɔgbe é zinzan ɖò dandan. (Nùnywɛxó 11:1; 16:11; 20:10, 23) Ðò hwexónu ɔ, mɛ lɛ nɔ yawu zán nǔdagan lɛ bo nɔ dó da nǔ e ye ja xixɔ gbé lɛ é kpo akwɛ e ye nɔ dó xɔ nǔ lɛ é kpo na. Ajɔ̌tɔ́ adingbannɔ lɛ nɔ zán nǔdagan e ma sɔgbe ǎ lɛ é bo nɔ dó blɛ́ axisinɔ yetɔn lɛ alǒ xò ye ɖu. Jehovah gbɛ́ wǎn nú walɔ mɔhun lɛ! Bo na dó sixu hɛn mǐɖée ɖò wanyiyi tɔn mɛ ɔ, mǐ nɔ nyì alɔ nú nugbǒmaɖɔ alɔkpa lɛ bǐ mlɛ́mlɛ́ ɖò ajɔ̌ lixo.

16, 17. Nugbǒmaɖɔ alɔkpa tɛ lɛ ka gbakpé ɖò égbé? Etɛ Klisanwun nugbǒ lɛ ka kanɖeji bo na bló?

¹⁶ Ðó Satáan wɛ nyí gǎn gbɛ̀ elɔ tɔn wu ɔ, nugbǒmaɖɔ e lɛlɛ̌ dó mǐ lɛ é nɔ kpaca mǐ ǎ. Ayihɔngbe ayihɔngbe wɛ nugbǒmaɖɔ xó sixu ba mǐ. Nú gbɛtɔ́ lɛ ɖò wema wlan dó ba azɔ̌ na wɛ ɔ, ye nɔ ɖó adingban bo nɔ dó sìn xó jí, bo nɔ lɛ́ slɛ́ kúnnuɖewema kpo nǔ e wu ye ma kpé ǎ lɛ é kpo. Enyi mɛ lɛ ɖò togudoyiyiwema, takwɛwema, ganjɛwuwema, kpo wema mɔhun ɖevo lɛ kpo bló wɛ ɔ, ye nɔ yawu ɖó adingban ɖò xósin lɛ nina hwenu bo na dó sixu mɔ nǔ e ba wɛ ye ɖè é. Azɔ̌mɛví gègě nɔ fin wema kpɔ́n ɖò tɛnkpɔn lɛ hwenu, alǒ enyi è zɔ́n azɔ̌ ye bonu ye na yì bló ɖò xwégbe bo wá ɔ, ye nɔ yì ɛntɛnɛti jí bo nɔ wlan nǔ e ye mɔ ɖò finɛ lɛ é, lobo nɔ wá ɖó gbè tɔn yeɖesunɔ wɛ bló ɖɔhun. Gɔ́ na ɔ, hwenu e gbɛtɔ́ lɛ kpé nǔ xá axɔsuzɔwatɔ́ nùɖuɖonǔmɛtɔ́ lɛ é ɔ, ye nɔ na nǔ ye bo na dó sixu mɔ nǔ e ba wɛ ye ɖè é. Mǐ nɔ ɖó nukún nùwalɔ mɔhun lɛ, ɖó ɖò gbɛ̀ ɔ mɛ ɔ, mɛ gègě ‘nɔ ba ɖɔ emitɔn jɛn na nyɔ́; ye nɔ yí wǎn nú akwɛ; ye nɔ gbɛ́ wǎn nú ɖagbewiwa.’​—2 Timɔtée 3:1-5.

¹⁷ Klisanwun nugbǒ lɛ kanɖeji bo na dó ta nùwalɔ enɛ lɛ ɖebǔ mɛ ǎ. Nǔ e nɔ zɔ́n bɔ nugbǒɖiɖɔ nɔ vɛwǔ hweɖelɛnu é wɛ nyí ɖɔ nǔ nɔ nyɔ́ nú mɛ ɖěɖee nɔ dó ta adingban mɔhun lɛ mɛ é, bɔ ye wɛ tlɛ nɔ nɔ nukɔn ɖò gbɛ̀ égbé tɔn mɛ. (Ðɛhan 73:1-8) Hwe ɖokpo ɔ nu ɔ, Klisanwun lɛ sixu jiya ɖò akwɛ lixo ɖó ye ba na ɖɔ nugbǒ “ɖò nǔ bǐ mɛ” wutu. Vɔsisa enɛ ka xɔ akwɛ à? Ganji! Bɔ aniwu wɛ é ka xɔ akwɛ? Nyɔna tɛ lɛ nugbǒɖiɖɔ ka nɔ hɛn wá?

NYƆNA E NUGBǑÐIÐƆ NƆ HƐN WÁ LƐ É

18. Aniwu nugbǒɖiɖɔ ka xɔ akwɛ ɖesu?

¹⁸ Nǔ e xɔ akwɛ hú è tuùn we ɖɔ a nyí nugbǒɖɔtɔ́ bo lɛ́ nyí mɛ ɖejid’ewu é kpiti ɖò gbɛ̀ ɔ mɛ ǎ. (Kpɔ́n gbàví “Un ka Nɔ Ðɔ Nugbǒ Hwebǐnu À?”) Ka tuùn ɖɔ mɛ bǐ sixu ɖó nyikɔ ɖagbe mɔhun! É ka nyí nǔwukpikpé, dɔkun, ɖɛkpɛ, xá e mɛ è jɔ ɖè é, alǒ nǔ mɔhun ɖevo wɛ nɔ zɔ́n bɔ è nɔ kpéwú ǎ. É ɖò mɔ̌ có, mɛ gègě nɔ dó gǎn bá ɖó nyikɔ ɖagbe enɛ ǎ, b’ɛ sín enɛ wu bɔ é hán. (Micée 7:2) Mɛɖé lɛ sixu cá nú we ɖó a nɔ ɖɔ nugbǒ wutu, amɔ̌, nugbǒɖiɖɔ towe na sù mɛ ɖevo lɛ nukúnmɛ, b’ɛ na sín enɛ wu bɔ ye na ɖeji dó wu we bo na lɛ́ sí we. Kúnnuɖetɔ́ Jehovah Tɔn gègě ko mɔ bɔ nugbǒɖiɖɔ yetɔn hɛn lè wá nú ye ɖò akwɛ lixo. Hwenu e azɔ̌ ɖò gblègblé dó azɔ̌watɔ́ nugbǒmaɖɔtɔ́ lɛ wɛ é ɔ, yedɛɛ lɛ tɔn nɔ gblé ɖě ǎ, alǒ ye nɔ mɔ azɔ̌ hwenu e è ɖò azɔ̌watɔ́ nugbǒɖɔtɔ́ lɛ ba wɛ nukún myamya é.

19. Etɛ nugbǒɖiɖɔ ka sixu wà nú ayixa mǐtɔn kpo kancica e ɖò mǐ kpo Jehovah kpo tɛntin é kpo?

¹⁹ Nǔ e mǐ ɖɔ wá yì nɛ lɛ é sixu ko nɔ ma jɛ dó jǐ towe kpɔ́n, amɔ̌, mɔ nǔ jɛ wu ɖɔ nugbǒɖiɖɔ nɔ hɛn lè ɖaxó lɛ wá. É na zɔ́n bɔ a na ɖó ayixa mímɛ́ ɖé. Pɔlu wlan ɖɔ: “Mǐ ɖeji ɖɔ ayixa mǐtɔn mɛ́.” (Eblée lɛ 13:18) Hú mɔ̌ ɔ, Tɔ́ mǐtɔn jixwé tɔn wanyiyinɔ ɔ nɔ gbɔ ayi ɖó jijɔ towe wu gbeɖé ǎ, lobɔ é lɛ́ yí wǎn nú gbɛtɔ́ nugbǒɖɔtɔ́ lɛ. (Xà Ðɛhan 15:1, 2; Nùnywɛxó 22:1.) Nugbǒ ɔ, nugbǒɖiɖɔ na d’alɔ we bɔ a na hɛn hwiɖée ɖò wanyiyi Mawu tɔn mɛ, lobɔ ajɔ ɖaxó hugǎn e mǐ sixu mɔ é ka nɛ. Mi nú mǐ ni ɖɔ xó dó xota e kúnkplá ɛ é ɖé jí: Linlin e Jehovah nɔ ɖó dó azɔ̌ wu é.