A ka Jló Na Jlɛ́ Nǔ E A Ði Nǔ Na lɛ É Dó Biblu Wu Kpɔ́n À?

KLISANWUN ɖé wɛ nú we à? Enyi mɔ̌ hǔn, hwi lɔ ɖò gbɛtɔ́ liva wè jɛji e ɖò ayikúngban jí (é ɖibla bló mɛ e ɖò ayikúngban ɔ jí é 1 ɖò 3 jí nɛ) bo nɔ ɖɔ ɖɔ emi nyí ahwanvu Klisu tɔn é mɛ nɛ. Égbé ɔ, sinsɛn afatɔ́n mɔkpan lɛ wɛ nɔ ylɔ yeɖée ɖɔ Klisanwun, loɔ, nùkplɔnmɛ yetɔn lɛ sɔ́ ta yeɖée lɛ tɔn lɛ, bɔ ye lɛ́ ɖó linlin vovo lɛ. Enɛ wu ɔ, nǔ e a ɖi nǔ na lɛ é sixu gbɔn vo tawun dó mɛ ɖevo e nɔ ɖɔ ɖɔ emi nyí Klisanwun lɛ é tɔn lɛ. Nǔ e a ɖi nǔ na é ka ɖò taji wɛ à? Ɛɛn, é ɖò taji, enyi a jló na nyí Klisanwun lee Biblu kplɔ́n mɛ ɖó é ɔ nɛ.

È wá ylɔ ahwanvu Jezu Klisu tɔn nukɔntɔn lɛ ɖɔ “Klisanwun lɛ.” (Mɛsɛ́dó 11:26, NWT) É sɔ́ byɔ ɖɔ è ni ɖó nyikɔ ɖevo nú ye ǎ, ɖó nùɖiɖi Klisanwun tɔn kwín ɖokpo wɛ ɖè. Klisanwun lɛ nɔ nɔ bǔ bo nɔ xwedó nùkplɔnmɛ kpo alixlɛ́mɛ Jezu Klisu e nyí Dowatɔ́ Sinsɛn Klisanwun Tɔn tɔn é tɔn lɛ. Sinsɛn towe ka lo? A ka lin ɖɔ é nɔ kplɔ́n nǔ e Klisu kplɔ́n mɛ lɛ é kpo nǔ e ahwanvu Klisu tɔn nukɔntɔn lɛ ɖi nǔ na lɛ é kpo mɛ à? Nɛ̌ a ka sixu tuùn gbɔn? Wlɛnwín ɖokpo jɛn ɖè, é wɛ nyí ɖɔ a ni zán Biblu dó gbéjé kpɔ́n na.

Lin tamɛ dó nǔ elɔ jí: Jezu Klisu ɖó sísí ɖaxó ɖé nú Mawuxówema ɔ, bo nɔ kpɔ́n dó mɔ Xó Mawu Tɔn na. Xomɛ tɔn hun ɖebǔ dó mɛ ɖěɖee dó sìn nùkplɔnmɛ Biblu tɔn lɛ jí, gbɔn hwɛndo mɛ sín nǔ lɛ sísɔ́ ɖó ta gblamɛ é wu ǎ. (Maki 7:9-13) Enɛ wu ɔ, mǐ sixu ɖeji bo ɖɔ ɖɔ nǔ e ahwanvu Jezu tɔn nugbǒ lɛ na ɖi nǔ na lɛ é ɖó na gosin Biblu mɛ. Klisanwun ɖokpo ɖokpo ɖó na kanbyɔ éɖée dìn ɖɔ, ‘Nùkplɔnmɛ sinsɛn ce tɔn lɛ ka sɔgbe kpo Biblu kpo à?’ Bo na dó mɔ xósin nú nùkanbyɔ enɛ ɔ, etɛwu a ma ka na sɔ́ nǔ e sinsɛn towe nɔ kplɔ́n mɛ lɛ é sɔ́ jlɛ́ dó nǔ e Biblu ɖɔ tawun lɛ é wu ǎ?

Jezu ɖɔ ɖɔ Mawu sinsɛn mǐtɔn ɖó na jinjɔn nugbǒ e ɖò Biblu mɛ é jí. (Jaan 4:24; 17:17) Bɔ mɛsɛ́dó Pɔlu ɖɔ jí, hwlɛngán mǐtɔn na sín tuùn e mǐ na “tuùn nugbǒ ɔ bǐ dégbédégbé” é wu. (1 Timɔtée 2:4) Enɛ wu ɔ, é ɖò taji ɖɔ nǔ e mǐ ɖi nǔ na lɛ é ni jinjɔn nugbǒ Biblu tɔn e sɔgbe é jí. Ðó é kúnkplá gbɛ̀ mǐtɔn!

LEE MǏ SIXU JLƐ́ NǓ E MǏ ÐI NǓ NA LƐ É DÓ BIBLU WU GBƆN É

Mǐ byɔ we ɖɔ a ni xà nùkanbyɔ ayizɛ́n e zɔn kpɔ́ kpo xota elɔ kpo lɛ é, bo ɖ’ayi xósin e Biblu na nú ye é wu. Xà wemafɔ Biblu tɔn e è ɖè lɛ é, lobo lin tamɛ kpɔ́n dó xósin lɛ jí. Enɛ gudo hǔn, kanbyɔ hwiɖée ɖɔ, ‘Nǔ e Biblu ɔ ɖɔ dìn é jɛn sinsɛn ce ka nɔ kplɔ́n mɛ à?’

Azɔ̌ klewun enɛ sixu d’alɔ we bɔ a na jlɛ́ nǔ e a ɖi nǔ na lɛ é dó Biblu wu. É ka jló we bɔ a na jlɛ́ sinsɛn towe sín nùkplɔnmɛ ɖevo lɛ dó nǔ e Biblu ɖɔ é wu à? Xomɛ na hun Kúnnuɖetɔ́ Jehovah Tɔn lɛ bɔ ye na d’alɔ we bonu a na gbéjé nugbǒ Biblu tɔn e zawě é kpɔ́n. Etɛwu a ma ka na byɔ Kúnnuɖetɔ́ lɛ ɖokpo ɖɔ é ni kplɔ́n Biblu xá emi vɔ̌nu ǎ? Alǒ a sixu yì tɛn ɛntɛnɛti tɔn mǐtɔn jw.org jí.

1 NÙKANBYƆ: Mɛ̌ ka nyí Mawu?

XÓSIN: Jehovah, Jezu sín Tɔ́, wɛ nyí Mawu mavɔmavɔ kpo Gbɛɖotɔ́ nǔbǐwukpétɔ́ e dá nǔ bǐ é kpo.

NǓ E BIBLU ÐƆ É:

“Enyi mǐ ɖò ɖɛ xò dó ta mitɔn mɛ wɛ hweɖebǔnu ɔ, mǐ nɔ dokú nú Mawu Aklunɔ mǐtɔn Jezu Klisu sín Tɔ́.”—Kolosinu lɛ 1:3.

“Aklunɔ mǐtɔn, Mawu mǐtɔn, susu, yɛ̌yi kpo hlɔnhlɔn kpo jɛxa we, ɖó a bló nǔ bǐ.”—Nǔɖexlɛ́mɛ 4:11.

Lɛ̌ kpɔ́n Hlɔmanu lɛ 10:13; 1 Timɔtée 1:17.

2 NÙKANBYƆ: Mɛ̌ ka nyí Jezu Klisu?

XÓSIN: Jezu wɛ nyí Nukɔngbeví Mawu tɔn. È dá Jezu, hǔn é ɖó bǐbɛ̌ nɛ. Jezu hwíhwɛ́ éɖée dó Mawu glɔ bo nɔ wà jlǒ Tɔn.

NǓ E BIBLU ÐƆ É:

“Tɔ́ ɔ hugǎn mì.”—Jaan 14:28.

“Klisu ɔ, akpajlɛ Mawu e è ma nɔ mɔ ǎ ɔ tɔn wɛ é nyí. Nukɔngbeví wɛ é nyí, bo hugǎn nǔ e Mawu bló lɛ bǐ.”—Kolosinu lɛ 1:15.

Lɛ̌ kpɔ́n Matie 26:39; 1 Kɔlɛntinu lɛ 15:28.

3 NÙKANBYƆ: Etɛ ka nyí gbigbɔ mímɛ́?

XÓSIN: Gbigbɔ mímɛ́ ɔ, hlɔnhlɔn e Mawu nɔ zán dó wà jlǒ tɔn na é wɛ. É nyí mɛɖé ǎ. Gbigbɔ mímɛ́ sixu gɔ́ ayi mɛ nú mɛ lɛ bo na hlɔnhlɔn ye.

NǓ E BIBLU ÐƆ É:

“Ee Elizabɛti sè gbedómɛ Mali tɔn lě é ɔ, vǐ e ɖò xò tɔn mɛ é danwǔ, bɔ [gbigbɔ mímɛ́] gɔ́ ayi mɛ nú Elizabɛti.”—Luki 1:41.

“Mi na mɔ acɛ yí hwenu e [gbigbɔ mímɛ́] na jɛte wá mi jí é.”—Mɛsɛ́dó 1:8.

Lɛ̌ kpɔ́n Bǐbɛ̌mɛ 1:2; Mɛsɛ́dó 2:1-4; 10:38.

4 NÙKANBYƆ: Etɛ ka nyí Axɔsuɖuto Mawu Tɔn?

XÓSIN: Axɔsuɖuto Mawu Tɔn nyí acɛkpikpa jixwé tɔn ɖé. Jezu wɛ nyí Axɔsu nú Axɔsuɖuto Mawu Tɔn. Malin-malin mɛ ɔ, Axɔsuɖuto enɛ na bló bɔ jlǒ Mawu tɔn na nyí wiwa ɖò ayikúngban ɔ bǐ jí.

NǓ E BIBLU ÐƆ É:

“Enɛ ɔ gudo ɔ, wɛnsagun Mawu tɔn tɛnwegɔ ɔ kún kpɛn, bɔ gbè ɖaxó ɖé lɛ ɖi ɖò jixwé bo ɖɔ: ‘Axɔsuɖuɖu gbɛ̀ ɔ tɔn nyí Aklunɔ mǐtɔn kpo Klisu tɔn kpan tɔn lo! Bɔ é na ɖu axɔsu kaka sɔyi.’”—Nǔɖexlɛ́mɛ 11:15.

Lɛ̌ kpɔ́n Daniyɛli 2:44; Matie 6:9, 10.

5 NÙKANBYƆ: Mɛ ɖagbe lɛ bǐ wɛ nɔ yì jixwé à?

XÓSIN: Eǒ. Mawu cyan gbɛtɔ́ gbejinɔtɔ́ ɖé lɛ bɔ ye na yì jixwé, bɔ è nɔ ylɔ ye ɖɔ “lɛngbɔhwan kpɛví.” Ye na nyí axɔsu bo na ɖu gǎn xá Jezu dó gbɛtɔ́ lɛ jí.

NǓ E BIBLU ÐƆ É:

“Lɛngbɔhwan kpɛví, ma ɖi xɛsi ó, ɖó Tɔ́ mitɔn jló ɖɔ mi ni ɖu axɔsu xá emi.”—Luki 12:32.

“Ye na nyí vɔsanúxwlémawutɔ́ nú Mawu kpo Klisu kpo, bo na ɖu axɔsu xá Klisu.”—Nǔɖexlɛ́mɛ 20:6.

Lɛ̌ kpɔ́n Nǔɖexlɛ́mɛ 14:1, 3.

6 NÙKANBYƆ: Etɛ ka nyí jlǒ Mawu tɔn nú ayikúngban ɔ kpo gbɛtɔ́ lɛ kpo?

XÓSIN: Ðò Axɔsuɖuto Mawu Tɔn glɔ ɔ, ayikúngban ɔ na huzu palaɖisi ɖé, bɔ gbɛtɔ́ gbejinɔtɔ́ lɛ na ɖu vivǐ lanmɛ syɛn hunsin ɖagbe, fífá mavɔmavɔ, kpo gbɛ̀ mavɔmavɔ kpo tɔn.

NǓ E BIBLU ÐƆ É:

“Tò [alǒ ayikúngban] ɔ ka na nyí mɛ e nɔ sɔ́ yeɖée hwe lɛ tɔn, bɔ fífá ma ɖó dogbó e ye na mɔ ɔ, wɛ na nyí nǔ e na nɔ víví nú ye é.”—Ðɛhan 37:10, 11.

“È na súnsún ɖasin bǐ sín nukún yetɔn mɛ; kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ; nǔ xóxó lɛ ko bú.”—Nǔɖexlɛ́mɛ 21:3, 4.

Lɛ̌ kpɔ́n Ðɛhan 37:29; 2 Piyɛ́ɛ 3:13.