Hwɛsɔ́kɛmɛ Jexóva tɔn: Nɛ̌ a ka sixú xwedó kpɔ́ndéwú tɔn gbɔn?

1-2. (a) Hwetɛ́nu é ka sixú vɛ́ wǔ tawun nú mǐ bɔ mǐ ná sɔ́ hwɛ kɛ mɛɖé? (b) Nɛ̌ Denise ka sɔ́ hwɛ kɛ mɛ gbɔn?

É KA nɔ vɛ́ wǔ nú we bónú a ná sɔ́ hwɛ kɛ mɛ ɖěvo lɛ́ wɛ a? Nǔ nɔ cí mɔ̌ nú mǐ mɛ gěgé, ɖo tají ɔ, hwenu e mɛɖé ɖɔ nǔɖé alǒ wa nǔɖé b’ɛ vɛ́ nú mǐ tawun é. É ɖo mɔ̌ có, mǐ sixú ɖu ɖo lěe nǔ cí nú mǐ é jí bo sɔ́ hwɛ kɛ mɛ. Ði kpɔ́ndéwú ɔ, kpɔ́n nǔ e jɛ dó nɔví nyɔ̌nu e nɔ nyí Denisea bo sɔ́ hwɛ kɛ mɛ ɖo ali e jí wǔ é ɖé nu é jí é. Ðo 2017 ɔ, Denise kpó xwédo tɔn kpó yi ba Hɔ̌nkan gbɛ ɔ tɔn Kúnnuɖetɔ́ Jexóva tɔn lɛ́ tɔn e è hun tlóló é kpɔ́n. Ée yě ɖo ali jí wá xwe xwé é ɔ, hǔnkuntɔ́ ɖěvo zɛ gbě bo yi gba dó mɔ̌to yětɔn wú. Denise ba éɖée kpo hwenu e alitawoví ɔ jɛ é. Ée é wá fɔ́n é ɔ, é se ɖɔ vǐ émítɔn lɛ́ gblé wǔ vantankánnyá, bɔ asú émítɔn Brian kú. Denise lin tamɛ dó hwe énɛ́ nu jí bo ɖɔ: “Gbɛ d’ablu dó mì, bɔ un dán ɖěwagbɛn.” Nukɔnmɛ ɔ, é wá se ɖɔ é kún nyí nǔ wɛ ci kɔ nú hǔnkuntɔ́ ɔ, alǒ nǔɖé wɛ fɛ́ ayi tɔn ó. Énɛ́ gúdo ɔ, é xo ɖɛ ɖɔ Jexóva ní ná émí fífá ayi mɛ tɔn.

² È wlí mɔ̌tokuntɔ́ ɔ, bo kplá ɛ yi hwɛ nukɔn, ɖó é hu mɛ ɖo manywɛ́ mɛ. Ényí hwɛɖɔxɔsá ɔ wá gbeta ɔ kɔn ɖɔ hwɛ tɔn kú ɔ, é sixú sɛn gan. Amɔ̌, hwɛɖɔxɔsá ɔ ɖɔ nú Denise ɖɔ kúnnu e é ná ɖe é wú wɛ hwɛ e è ná ɖó nú nya ɔ é ná sín. Denise ɖɔ: “É cí nú mì ɖɔ mɛɖé sɛ́n kan e è dó tɔ akpa ce ná lɛ́ é, bo húzú jɛ kɔn nyi mɛ wɛ ɖɔhun, ɖó un ɖó ná ɖɔ xó dó hwenu e vɛ́ wǔ nú mì hú gǎn ɖo gbɛzán ce mɛ lɛ́ é wú.” Aklúnɔzángbla yɔywɛ ɖé gúdo ɔ, Denise sɔ́ nǔ bo yi hwɛɖɔxɔsá ɔ, bá ɖɔ xó ɖo nya e wa nǔ dó xwédo tɔn wú sɔmɔ̌ é nukɔn. Étɛ́ é ka ɖɔ? Denise byɔ́ hwɛɖɔtɔ́ ɔ ɖɔ è ní kú nǔbláwǔ nú nya ɔ.b Ée é ɖɔ xó kpé é ɔ, ɖasin jɛ́n jɛ wǐwá yi dó hwɛɖɔtɔ́ ɔ jí. Hwɛɖɔtɔ́ ɔ ɖɔ: “Sín xwe 25 ɖíe e un bɛ́ hwɛɖiɖɔ é ɔ, un se xó lěhun ɖé kpɔ́n ɖo hwɛɖɔxɔsá ce ǎ. Un se nú xwédo e wú è wa nǔ dó é sa vo dó mɛ e wa nǔ nyi do é takúnmɛ ɖɔ è ní kú nǔbláwǔ n’i kpɔ́n ǎ. Un se nú mɛ e è wa nǔ nyi do ná é ɖɔ xó b’ɛ ɖe wǎnyíyí kpó hwɛsɔ́kɛmɛ kpó xlɛ́ mɔ̌ kpɔ́n ǎ.”

3. Étɛ́ ka sísɛ́ Denise b’ɛ sɔ́ hwɛ kɛ mɛ?

³ Étɛ́ ka d’alɔ Denise b’ɛ sɔ́ hwɛ kɛ mɛ? É lin tamɛ dó hwɛsɔ́kɛmɛ Jexóva tɔn jí. (Micée 7:18) Ényí hwɛ e Jexóva sɔ́ kɛ mǐ é nɔ su nukún mǐtɔn mɛ ɔ, énɛ́ ná sísɛ́ mǐ bɔ mǐ ná nɔ sɔ́ hwɛ kɛ mɛ ɖěvo lɛ́.

4. Étɛ́ Jexóva ka ba ɖɔ mǐ ní nɔ wa? (Efɛ́zinu lɛ́ 4:32)

⁴ Jexóva nɔ ba ɖɔ mǐ ní nɔ sɔ́ hwɛ kɛ mɛ ɖěvo lɛ́ faa lěe émí nɔ sɔ́ hwɛ kɛ mǐ gbɔn é. (Xa Efɛ́zinu lɛ́ 4:32.) É nɔ ɖó nukún ɖɔ mǐ ní nɔ ɖo gbesisɔmɛ bo ná nɔ sɔ́ hwɛ kɛ mɛ e jɛ agɔ dó mǐ lɛ́ é. (Ðɛh. 86:5; Luk. 17:4) Ðo xóta élɔ́ mɛ ɔ, mǐ ná gbéjé nǔ ɖěɖěe ná d’alɔ mǐ bɔ mǐ ná nɔ sɔ́ hwɛ kɛ mɛ hú gǎn é atɔn kpɔ́n.

MA NƆ WƆN YA NÚ LĚE NǓ CÍ NÚ WE É Ó

5. Sɔgbe xá Nǔnywɛ́xó 12:18 ɔ, ényí mɛɖé jɛ agɔ dó mǐ ɔ, nɛ̌ nǔ ka sixú cí nú mǐ?

⁵ Nǔ e mɛɖé ɖɔ nú mǐ, alǒ, wa nú mǐ é sixú vɛ́ nú mǐ tawun, tají ɔ, ényí mɛ ɔ nyí xɔ́ntɔn vívɛ́ alǒ ɖo xwédo mǐtɔn mɛ ɔ nɛ́. (Ðɛh. 55:13-15) Hweɖélɛ́nu ɔ, wǔvɛ́ e mǐ nɔ se ɖo lěe nǔ nɔ cí nú mɛ é linu é sixú cí hwǐ sɔ́ mɛ ɖɔhun. (Xa Nǔnywɛ́xó 12:18.) Mǐ sixú tɛ́n kpɔ́n bá ɖe ayi sín lěe nǔ cí nú mǐ é jí, alǒ, wɔn ya ná. Amɔ̌, mɔ̌ wiwa sixú cí, è sɔ́ hwǐ mɛ bo lɛ́ jó hwǐ ɔ dó nyi akpa ɔ mɛ ɖɔhun. Ðo ali ɖokpó ɔ nu ɔ, ényí mǐ nɔ wɔn ya nú lěe nǔ nɔ cí nú mǐ é kpowun ɔ, mǐ sixú ɖó nukún ɖɔ é ná kpɔ́n te ǎ.

6. Ényí mɛɖé jɛ agɔ dó mǐ ɔ, nɛ̌ mǐ ka sixú wa nǔ gbɔn?

⁶ Ényí mɛɖé jɛ agɔ dó mǐ ɔ, xomɛ sixú sin mǐ tlóló. Biblu yí gbe ɖɔ xomɛ sixú wá sin mǐ. Amɔ̌, é gba akpá nú mǐ ɖɔ mǐ ní ma lɔn bónú xomɛsin ɖu ɖo mǐ jí ó. (Ðɛh. 4:5; Efɛ́. 4:26) Aniwú? Ðó hwɛhwɛ ɔ, lěe nǔ nɔ cí nú mǐ é wɛ nɔ sísɛ́ mǐ bɔ mǐ nɔ wa nǔ. Gɔ́ ná ɔ, é yá bónú è ɖo xomɛsin jí bo wa nǔ ɖagbe ǎ. (Ja. 1:20) Flín ɖɔ, è sixú sin xomɛ, amɔ̌, táan nabí e è ná nɔ xomɛsin jí ná é ɔ, mɛɖésúnɔ sí wɛ é ɖe.

7. Ényí mɛɖé wa nǔ vívɛ́ ɖé nú mǐ ɔ, nɛ̌ mɔ̌ nǔ ka sixú lɛ́ cí nú mǐ?

⁷ Nú è wa nǔ nyanya xá mǐ ɔ, mǐ sixú se wǔvɛ́ tawun ɖo lěe nǔ nɔ cí nú mɛ é linu. Ði kpɔ́ndéwú ɔ, nɔví nyɔ̌nu ɖé nɔ nyí Ann bo ɖɔ: “Hwenu e un ɖo vǔ é ɔ, tɔ́ ce jó nɔ ce dó bo da mɛ e nɔ wa xwégbezɔ́ nú mǐ é. Un mɔ ɖɔ un kún sɔ́ ɖó mɛɖé ó. Ée yě ji vǐ lɛ́ é ɔ, un mɔ ɖɔ un kún sɔ́ ɖó tɛn ce ó. Ée un ɖo susu wɛ é ɔ, un nɔ mɔ ɖɔ è kún yí wǎn nú mì ó.” Nɔví nyɔ̌nu ɖé nɔ nyí Georgette bo tínmɛ lěe nǔ cí n’i hwenu e asú tɔn ɖó xó xá nyɔ̌nu ɖěvo é; é ɖɔ: “Mǐ ko nyí xɔ́ntɔn sín vǔhwenu ɖokpóo. Mǐ wa gběxosín-alijítɔ́zɔ́ ɖó kpɔ́! Ayi ce xo akpa.” Gɔ́ ná ɔ, nɔví nyɔ̌nu ɖé nɔ nyí Naomi bo ɖɔ: “Un lin gbeɖé ɖɔ asú ce ná ɖó wǔvɛ́ nú mì ǎ. Énɛ́ wú ɔ, hwenu e é ɖɔ nú mì ɖɔ émí nɔ kpɔ́n fɔtóo nǔblíblíwiwa tɔn ɖo nǔglɔ́ é ɔ, un mɔ ɖɔ é flú mì, bo kún nɔ gbejí nú mì ó.”

8. (a) Ðɔ hwɛjijɔ e wú mǐ ɖó ná nɔ sɔ́ hwɛ kɛ mɛ ɖěvo lɛ́ é ɖé lɛ́. (b) Ényí mǐ sɔ́ hwɛ kɛ mɛ ɖěvo lɛ́ ɔ, le tɛ́ lɛ́ mǐ ka nɔ mɔ? (Kpɔ́n gbǎví “Ényí mɛɖé ɖɔ nǔɖé alǒ wa nǔɖé b’ɛ vɛ́ nú mǐ tawun bo dó azɔn mǐ ɖo taglomɛ ɔ ka lo?”)

⁸ Mǐ sixú ɖó acɛ dó nǔ e mɛ ɖěvo lɛ́ nɔ ɖɔ alǒ wa nú mǐ lɛ́ é jí ǎ, amɔ̌, mǐ hɛn ɔ, mǐ ná tɛ́n kpɔ́n bo ɖó acɛ dó lěe mǐ ná wa nǔ gbɔn é jí. Bɔ hwɛhwɛ ɔ, nǔ ɖagbe hú gǎn e mǐ sixú wa é wɛ nyí ɖɔ mǐ ní sɔ́ hwɛ kɛ mɛ. Aniwú? Ðó mǐ yí wǎn nú Jexóva, bɔ é ka ba ɖɔ mǐ ní nɔ sɔ́ hwɛ kɛ mɛ wútu. Ényí mǐ kpo ɖo xomɛsin jí bo ma sɔ́ hwɛ kɛ mɛ ǎ ɔ, mǐ sixú wa xlonɔnú, bɔ vlafo ɔ, mǐ ná lɛ́ wa nǔ dó mǐɖée wú ɖo agbaza lixo. (Nǔx. 14:17, 29, 30) Ð’ayi kpɔ́ndéwú nɔví nyɔ̌nu e nɔ nyí Christine é tɔn wú. É ɖɔ: “Ényí xomɛ sin mì ɔ, un nɔ ko nǔ káká ɖé ǎ. Adɔ ce sɔ́ nɔ hun ǎ. Un sɔ́ nɔ d’amlɔ káká ɖé ǎ, bɔ é nɔ lɛ́ vɛ́ wǔ nú mì tawun nú má ɖu ɖo nyiɖée jí, bɔ wǎgbɔ tɔn ɔ, é nɔ wa nǔ dó alɔwlíwlí ce kpó xɔ́ntɔn e un zun xá mɛ ɖěvo lɛ́ é kpó wú.”

9. Étɛ́wú mǐ ka ɖó ná jó mɛhɛndóxomɛ dó?

⁹ Ényí mɛ e wa nǔ nyi do nú mǐ é ná bo ma wá dó kɛnklɛ́n nú mǐ gbeɖé ǎ ɔ, mǐ sixú bló bɔ wǔvɛ́ e é dó nú mǐ é ná ɖe kpo. Gbɔn nɛ̌ é? Georgette e xó mǐ ɖɔ wá yi é ɖɔ: “Táan kpɛɖé wá yi hwɛ̌, amɔ̌, un wá jó hɛn e hɛn asú ce xóxó ɔ dó xomɛ wɛ un ɖe é kpó xomɛ e sin wɛ un ɖe é kpó dó. Wǎgbɔ tɔn ɔ, un wá mɔ ɖɔ un ɖó fífá ayi mɛ tɔn hú gǎn.” Ényí mǐ jó mɛhɛndóxomɛ dó ɔ, mǐ sɔ́ nɔ lɔn nú akpɔmimɔ nɔ wa nǔ dó lěe mǐ nɔ wa nǔ xá mɛ ɖěvo lɛ́ gbɔn é wú ǎ. Mǐ nɔ lɛ́ ná nǔɖé mǐɖée, énɛ́ wɛ nyí ɖɔ mǐ nɔ ɖe ayi mǐtɔn sín nǔ e jɛ é jí, bo nɔ lɛ́ jɛ gbɛ mǐtɔn sín vǐví ɖu jí. (Nǔx. 11:17) Amɔ̌, ényí a ma ko ɖo gbesisɔmɛ bo ná sɔ́ hwɛ kɛ mɛ ǎ ɔ, étɛ́ a ka ɖó ná wa?

XWI ÐÍÐÍ XÁ LĚE NǓ NƆ CÍ NÚ WE É

10. Étɛ́wú mǐ ka ɖó ná ná hwenu mǐɖée bɔ akpa e jɛ mǐ wú ɖo lěe nǔ nɔ cí nú mɛ é linu é ná kú? (Kpɔ́n ɖiɖe lɛ́ lɔmɔ̌.)

¹⁰ Étɛ́ ka sixú d’alɔ we bɔ a ná ɖu ɖo xomɛ e sin wɛ a ɖe é jí? Ali e nu a sixú wa mɔ̌ ɖe é ɖokpó wɛ nyí ɖɔ, a ná tin bɔ jɔ ná jɛ mɛ. Ényí è kpé nukún dó mɛ e gblé wǔ vantankánnyá é ɖé wú ɖo dotóoxwé gúdo ɔ, é ná byɔ́ hwenu cóbɔ akpa tɔn ná kú. Ðo ali ɖokpó ɔ nu ɔ, é sixú byɔ́ hwenu cóbɔ akpa e è dó mǐ wú ɖo lěe nǔ nɔ cí nú mɛ é linu é ná kú, bɔ mǐ ná ɖo gbesisɔmɛ bo ná sɔ́ hwɛ kɛ mɛ sín ayi mɛ.—Nǔt. 3:3; 1 Pi. 1:22.

11. Nɛ̌ ɖɛ ka sixú d’alɔ we bɔ a ná nɔ sɔ́ hwɛ kɛ mɛ gbɔn?

¹¹ Xo ɖɛ bo byɔ́ Jexóva ɖɔ é ní d’alɔ we nú a ná nɔ sɔ́ hwɛ kɛ mɛ.c Ann e xó mǐ ɖɔ wá yi é tínmɛ lěe ɖɛ d’alɔ ɛ gbɔn é. É ɖɔ: “Un byɔ́ Jexóva ɖɔ é ní sɔ́ hwɛ kɛ mǐ mɛ e ɖo xwédo ɔ mɛ lɛ́ é ɖokpó ɖokpó ɖó nǔ ɖěɖěe mǐ ma kpé wú bo ɖe ɖɛ ganjí ǎ lɛ́ é wú. Énɛ́ gúdo ɔ, un wlán wěma sɛ́dó papá ce kpó asi tɔn yɔ̌yɔ́ ɔ kpó bo ɖɔ nú yě ɖɔ un sɔ́ hwɛ kɛ yě.” Ann yí gbe ɖɔ mɔ̌ wiwa kún bɔ wǔ ó. Amɔ̌, é ɖɔ: “Un ɖo nukún ɖó wɛ ɖɔ gǎn e dó wɛ un ɖe bo ná sɔ́ hwɛ kɛ mɛ Jexóva ɖɔhun é ná sísɛ́ tɔ́ ce kpó asi tɔn kpó bɔ yě ná kplɔ́n nǔ d’é jí dó Jexóva wú.”

12. Étɛ́wú mǐ ka ɖó ná nɔ ɖeji dó Jexóva wú b’ɛ ma ná nyí dó lěe nǔ nɔ cí nú mǐ é wú ǎ? (Nǔnywɛ́xó 3:5, 6)

¹² Ðeji dó Jexóva wú, é ní ma nyí dó lěe nǔ cí nú we é wú ó. (Xa Nǔnywɛ́xó 3:5, 6.) Jexóva nɔ tuun nǔ e nyɔ́ nú mǐ hú gǎn é hwebǐnu. (Eza. 55:8, 9) Gɔ́ ná ɔ, é ná byɔ́ mǐ ɖɔ mǐ ní wa nǔ e ná wa nǔ dó mǐ wú é ɖé gbeɖé ǎ. Énɛ́ wú ɔ, wǔsyɛ́n e é dó lanmɛ nú mǐ ɖɔ mǐ ní nɔ sɔ́ hwɛ kɛ mɛ é ɔ, mǐ sixú kú d’é jí ɖɔ, mɔ̌ wiwa ná hɛn le wá nú mǐ. (Ðɛh. 40:5; Eza. 48:17, 18) Ðo alɔ ɖěvo mɛ ɔ, ényí mǐ nɔ ɖeji dó lěe nǔ nɔ cí nú mǐ é wú ɔ, mǐ ná sixú kpé wú gbeɖé bo sɔ́ hwɛ kɛ mɛ ǎ. (Nǔx. 14:12; Jel. 17:9) Naomi e xó mǐ ɖɔ wá yi é ɖɔ: “Ðo bǐbɛ́mɛ ɔ, un mɔ ɖɔ hwɛ ce jɔ bɔ un ná gɔn hwɛ sɔ́ kɛ asú ce ɖó fɔtóo nǔblíblíwiwa tɔn e é kpɔ́n é wú. Xɛsi ɖi mì ɖɔ é ná lɛ́ dó wǔvɛ́ nú mì, alǒ ɖɔ é ná wɔn lě do é wa nǔ dó wǔ ce sɔ é. Bɔ un lin ɖɔ Jexóva mɔ nǔ jɛ lěe nǔ cí nú mì é mɛ. Amɔ̌, un wá jɛ mimɔ jí ɖɔ é kún nyí ɖɔ Jexóva mɔ nǔ jɛ lěe nǔ cí nú mì é mɛ kpowun wɛ xlɛ́ ɖɔ é yí gbe ná ó. É tuun lěe nǔ nɔ cí nú mì é, bo lɛ́ tuun ɖɔ é nɔ byɔ́ hwenu cóbɔ akpa ɔ nɔ kú, amɔ̌, é lɛ́ ba ɖɔ má nɔ sɔ́ hwɛ kɛ mɛ.”d

TƐ́N KPƆ́N BO NƆ ÐÓ LINLIN ÐAGBE LƐ́

13. Sɔgbe xá Hlɔ̌manu lɛ́ 12:18-21 ɔ, étɛ́ mǐ ka ɖó ná wa?

¹³ Ényí mǐ sɔ́ hwɛ kɛ mɛ e wa nǔ vívɛ́ ɖé nyi do nú mǐ é ɔ, mǐ nɔ ba ná wa nǔ hú alɔ nyinyi nú xó ɖiɖɔ dó nǔ e jɛ é wú kpowun. Ényí mɛ e wa nǔ nyi do nú mǐ é lɛ́ nyí nɔví súnnu alǒ nɔví nyɔ̌nu mǐtɔn ɖé ɔ, nǔ e gbé mǐ nɔ nya é wɛ nyí ɖɔ mǐ ná xo fífá kan. (Mat. 5:23, 24) Mǐ nɔ wá gbeta ɔ kɔn bo nɔ sɔ́ nǔbláwǔkúnúmɛ dó ɖyɔ́ xomɛsin mǐtɔn, lobo nɔ sɔ́ hwɛsɔ́kɛmɛ dó ɖyɔ́ mɛhɛndóxomɛ mǐtɔn. (Xa Hlɔ̌manu lɛ́ 12:18-21; 1 Pi. 3:9) Étɛ́ ka sixú d’alɔ mǐ bɔ mǐ ná kpé énɛ́ wú?

14. Étɛ́ mǐ ka ɖó ná tɛ́n kpɔ́n bo ná nɔ wa? Aniwú?

¹⁴ Mǐ ɖó ná nɔ tɛ́n kpɔ́n bo ná nɔ ɖó linlin ɖokpó ɔ Jexóva ɖɔhun dó mɛ e jɛ agɔ dó mǐ é wú. Jexóva nɔ wá gbeta ɔ kɔn bo nɔ ba jijɔ ɖagbe e mɛ lɛ́ ɖó é. (2 Tan 16:9; Ðɛh. 130:3) Hwɛhwɛ ɔ, jijɔ e ba ná mɔ wɛ mǐ ɖe ɖo mɛ lɛ́ sí é wɛ mǐ nɔ mɔ, é sixú nyí ɖagbe alǒ nyanya. Ényí mǐ nɔ ba jijɔ ɖagbe e mɛ ɖěvo lɛ́ ɖó é ɔ, é ná bɔ wǔ nú mǐ hú gǎn bɔ mǐ ná sɔ́ hwɛ kɛ yě. Ði kpɔ́ndéwú ɔ, nɔví súnnu ɖé nɔ nyí Jarrod bo ɖɔ: “Ényí un jlɛ́ do e nɔví ɖé jɛ nú mì é dó nǔ tobutóbú e un mɔ ɖo gɔ̌n tɔn bɔ é jɛjí nú mì lɛ́ é wú ɔ, é nɔ bɔ wǔ nú mì hú gǎn nú má sɔ́ hwɛ kɛ ɛ.”

15. Ényí a ɖɔ nú mɛɖé ɖɔ émí sɔ́ hwɛ kɛ ɛ ɔ, le tɛ́ lɛ́ mɔ̌ é ka sixú hɛn wá?

¹⁵ Nǔ tají ɖěvo e è sixú lin tamɛ dó wiwa tɔn jí é wɛ nyí ɖɔ è ná ɖɔ nú mɛ ɔ ɖɔ è sɔ́ hwɛ kɛ ɛ. Aniwú? Ð’ayi nǔ e Naomi e xó mǐ ɖɔ wá yi é ɖɔ é wú; é ɖɔ: “Asú ce kanbyɔ́ mì ɖɔ: ‘A sɔ́ hwɛ kɛ mì a?’ Ée un hun nu ce bo ná ɖɔ ‘un sɔ́ hwɛ kɛ we’ é ɔ, un kpé wú ǎ. Un mɔ ɖɔ un kún sɔ́ hwɛ kɛ ɛ nǔgbó nǔgbó sín ayi mɛ ó. Hwenu ɖo yiyi wɛ é ɔ, un wá kpé wú bo ɖɔ xókwín agbɔ̌nnɔ élɔ́ lɛ́ n’i: ‘Un sɔ́ hwɛ kɛ we.’ Un sixú dó nukún lě do mɔ̌ e un ɖɔ é zɔ́n bɔ agbɔ̌n asú ce e ɖo ɖasin kun wɛ é tɔn jɛ do sɔ é kpó lě do nyɛɖésúnɔ ɖó awǎjijɛ sɔ é kpó mɛ kpɔ́n ǎ. Sín hwenɛ́nu ɔ, un lɛ́ ɖeji dó wǔ tɔn, bɔ mǐ lɛ́ húzú xɔ́ntɔn vívɛ́.”

16. Étɛ́ a ka kplɔ́n dó hwɛsɔ́kɛmɛ wú?

¹⁶ Jexóva ba ɖɔ mǐ ní nɔ sɔ́ hwɛ kɛ mɛ. (Koló. 3:13) É ɖo mɔ̌ có, hwɛ sísɔ́ kɛ mɛ ɖěvo lɛ́ sixú vɛ́ wǔ nú mǐ. Amɔ̌, ényí mǐ ma wɔn ya nú lěe nǔ cí nú mǐ é ǎ, bo tɛ́n kpɔ́n bo ɖí xwi xá ɔ, mǐ hɛn ɔ, mǐ ná kpé wú. Énɛ́ gúdo ɔ, mǐ sixú tɛ́n kpɔ́n bo ɖó linlin ɖagbe lɛ́.—Kpɔ́n gbǎví “Afɔ ɖěɖěe è sixú ɖe bo sɔ́ hwɛ kɛ mɛ lɛ́ é atɔn.”

NƆ LIN TAMƐ DÓ LE ÐĚÐĚE ÐO HWƐSƆ́KƐMƐ MƐ LƐ́ É JÍ

17. Étɛ́wú mǐ ka ɖó ná nɔ sɔ́ hwɛ kɛ mɛ ɖěvo lɛ́?

¹⁷ Mǐ ɖó hwɛjijɔ e wú mǐ ná nɔ sɔ́ hwɛ kɛ mɛ lɛ́ é gěgé. Mǐ ní kpɔ́n ɖé lɛ́. Nukɔntɔn, mǐ nɔ xwedó kpɔ́ndéwú Tɔ́ nǔbláwǔkúnúmɛtɔ́ mǐtɔn Jexóva tɔn, bɔ nǔ mǐtɔn nɔ lɛ́ nyɔ́ nukún tɔn mɛ. (Luk. 6:36) Wegɔ́, mǐ nɔ ɖe xlɛ́ ɖɔ hwɛ e Jexóva sɔ́ kɛ mǐ kpó xomɛnyínyɔ́ kpó é su nukún mǐtɔn mɛ. (Mat. 6:12) Atɔngɔ́, mǐ nɔ nɔ ganjí ɖo agbaza mɛ, bo nɔ lɛ́ kpo ɖo xɔ́ntɔn vívɛ́ zun xá mɛ ɖěvo lɛ́ wɛ.

18-19. Ényí mǐ nɔ sɔ́ hwɛ kɛ mɛ ɔ, le tɛ́ é ka sixú hɛn wá?

¹⁸ Ényí mǐ nɔ sɔ́ hwɛ kɛ mɛ ɖěvo lɛ́ ɔ, mǐ sixú ɖu nyɔ̌ná maɖónukún lɛ́ sín le. Ði kpɔ́ndéwú ɔ, ɖ’ayi lěe nǔ lɛ́ wá yi gbɔn nú Denise e xó mǐ ɖɔ wá yi é wú. Nya e wú alitawoví ɔ sín é ko lin ɖɔ ényí è ɖɔ hwɛ émítɔn fó ɔ, émí ná hu émíɖée; Denise ka tuun mɔ̌ hwe ɔ nu ǎ. Amɔ̌, hwɛ e Denise sɔ́ kɛ ɛ é byɔ́ lanmɛ n’i sɔmɔ̌ bɔ é wá gbeta ɔ kɔn bo jɛ Biblu kplɔ́n xá Kúnnuɖetɔ́ Jexóva tɔn lɛ́ jí.

¹⁹ Mǐ sixú mɔ ɖɔ hwɛ sísɔ́ kɛ mɛɖé wɛ nyí nǔ e vɛ́ wǔ hú gǎn bɔ mǐ ná wa lɛ́ é ɖokpó, amɔ̌, é sixú lɛ́ nyí nǔ e nɔ hɛn le wá hú gǎn lɛ́ é ɖokpó. (Mat. 5:7) Énɛ́ wú ɔ, mi nú mǐ bǐ ní wa nǔ e wú mǐ kpé é bǐ bo xwedó kpɔ́ndéwú hwɛsɔ́kɛmɛ tɔn Jexóva tɔn.